ܐ H

ܡܰܘܪܒܳܐ ܢܰܦܫܝ̱܀

ܫܠܳܡܠܶܟܝ ܩܰܕܺܝܫܬܳܐ. ܒܬܽܘܠܬܳܐ ܝܳܠܕܰܬ ܐܰܠܳܗܳܐ. ܐܶܡܳܐ ܡܰܠܝܰܬ ܒܽܘܪ̈ܟܳܬܳܐ. ܕܡܶܢܶܟܝ ܓܶܝܪ ܨܒܳܐ ܘܶܐܬܒܰܤܰܪ ܡܶܠܬܳܐ ܡܬܽܘܡܳܝܶܗ ܕܰܐܒܳܐ. ܕܠܶܗ ܗ̱ܽܘ ܡܫܰܒܚܺܝܢܰܢ ܘܠܶܟܝ ܕܶܝܢ ܐܶܡܳܐ ܕܟܺܝܬܳܐ ܡܰܘܪܒܺܝܢܰܢ܀

ܕܰܥܒܰܕ ܠܘܳܬܝ̱ ܪܰܘܪ̈ܒܳܬܳܐ܀

ܠܡܽܘܫܶܐ ܡܰܢ ܐܶܬܚܰܘܺܝܬܝ ܒܤܰܢܝܳܐ ܕܕܳܠܶܩ ܘܠܳܐ ܝܳܩܶܕ. ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ. ܘܰܠܝܰܥܩܽܘܒ ܒܤܶܒܠܬܳܐ ܘܚܰܙܩܺܝܐܝܶܠ ܒܬܰܪܥܳܐ ܕܰܐܚܺܝܕ. ܕܒܶܗ ܥܰܠ ܡܳܪܶܐ ܟܽܠ ܠܰܡܫܰܘܙܳܒܽܘ ܠܥܰܡ̱̈ܡܶܐ ܡܶܢ ܛܽܘܥܝܰܝ܀

ܥܒܰܕ ܙܳܟܽܘܬܳܐ ܒܰܕܪܳܥܶܗ܀

ܐܳܘ ܤܳܗ̈ܕܶܐ ܩܰܕܺܝ̈ܫܶܐ. ܕܤܰܝܒܰܪܘ ܫܶܢ̈ܕܶܐ ܘܽܐܘܠ̈ܨܳܢܶܐ ܡܶܢ ܕܰܝܳܢ̈ܶܐ ܥܰܘ̈ܳܠܶܐ. ܗܳܐ ܢܛܺܝܪ ܗ̱ܽܘ ܦܽܘܪܥܳܢܟܽܘܢ ܒܰܓܢܽܘܢ ܢܽܘܗܪܳܐ ܕܠܳܐ ܡܶܫܬܪܶܐ. ܨܠܽܘܬܟܽܘܢ ܬܶܗܘܶܐ ܠܰܢ ܫܽܘܪܳܐ ܪܳܡܳܐ ܘܒܶܝܬܓܰܘܤܳܐ܀

ܟܰܦ̈ܢܶܐ ܣܰܒܰܥ ܛܳܒ̈ܬܳܐ܀

ܡܺܝ̈ܬܶܐ ܕܰܥܬܶܩܘ ܘܰܒܠܺܝܘ. ܒܚ̈ܶܙܶܐ ܥܰܡܺܝ̈ܩܶܐ ܕܰܫܝܽܘܠ ܘܰܗܘܰܘ ܥܰܦܪܳܐ ܘܕܰܚܺܝܚܳܐ. ܢܰܚܶܡ ܘܰܐܚܺܝ ܡܳܪܰܢ ܟܰܕ ܩܳܡ ܒܝܰܘܡܳܐ ܬܠܺܝܬܳܝܳܐ. ܕܠܶܗ ܗ̱ܽܘ ܡܫܰܒܚܺܝܢܰܢ ܘܰܠܡܶܐܬܺܝܬܶܗ ܕܬܰܪܬܶܝܢ ܡܤܰܟܶܝܢܰܢ܀

ܫܽܘܒܚܳܐ: ܫܽܘܒܚܳܐ ܢܰܤܶܩ ܠܰܐܒܳܐ. ܘܬܰܘܕܺܝܬܳܐ ܠܰܒܪܳܐ ܕܡܶܢܶܗ. ܘܰܠܪܽܘܚܩܽܘܕܫܳܐ ܗܽܘܠܳܠܳܐ. ܐ̱ܪܳܙܳܐ ܕܰܬܠܺܝܬܳܝܽܘܬܳܐ ܚܰܕ ܐܰܠܳܗܳܐ ܫܰܪܺܝܪܳܐ. ܕܠܶܗ ܗ̱ܽܘ ܡܫܰܒܚܺܝܢܰܢ. ܘܒܰܙܡܺܝܪ̈ܳܬܳܐ ܕܪܽܘܚܳܐ ܡܰܘܪܒܺܝܢܰܢ܀

ܒ H

ܠܶܟܝ ܕܺܐܝܬܰܝܟܝ̱ ܫܽܘܒܗܳܪܳܐ ܕܟܽܠܳܗ̇ ܬܺܒܶܝܠ ܝܳܠܕܰܬ ܐܰܠܳܗܳܐ. ܕܡܶܢܶܟܝ̱ ܓܶܝܪ ܨܒܳܐ ܘܶܐܬܒܰܣܰܪ ܐܰܠܳܗܳܐ ܡܶܠܬܳܐ. ܒܬܽܘܠܬܳܐ ܕܰܒܟܽܠ ܩܰܕܺܝܫܰܬܝ̱ ܒܬܶܫܒ̈ܚܳܬܳܐ ܡܰܘܪܒܺܝܢܰܢ܀

ܠܶܟܝ̱ ܬܰܪܥܳܐ ܐܰܚܺܝܕܳܐ ܗܰܘ ܕܰܚܙܳܐ ܗܘܳܐ ܢܒܺܝܳܐ ܚܰܙܩܺܝܐܶܝܠ. ܕܐ̱ܢܳܫ ܡܶܡܬܽܘܡ ܠܳܐ ܥܰܠ ܗܘܳܐ ܒܶܗ. ܐܶܠܳܐ ܐܰܠܳܗܳܐ ܡܶܠܬܳܐ. ܒܬܽܘܠܬܳܐ ܕܰܒܟܽܠ ܩܰܕܺܝܫܰܬܝ̱ ܒܬܶܫܒ̈ܚܳܬܳܐ ܡܰܘܪܒܺܝܢܰܢ܀

ܠܳܟ ܕܶܐܫܬܰܘܕܺܝܬ ܘܶܐܡܰܪܬ ܕܰܐܝܟܳܐ ܕܺܐܝܬܰܝ ܢܶܗܘܽܘܢ ܡܫܰܡ̈ܫܳܢܰܝ. ܫܰܡܥܽܘܟ ܣܳܗ̈ܕܶܐ ܘܰܢܩܶܦܘ ܠܳܟ. ܘܰܠܚܰܝ̈ܶܐ ܕܙܰܒܢܳܐ ܐܰܣܠܺܝܘ. ܕܚܰܝ̈ܶܐ ܕܰܠܥܳܠܰܡ ܢܺܐܪܬܽܘܢ. ܒܬܶܫܒ̈ܚܳܬܳܐ ܡܩܰܠܣܺܝܢܰܢ܀

ܥܒܶܕ ܡܳܪܰܢ ܒܰܚܢܳܢܳܟ ܣܰܒܪܳܐ ܛܳܒܳܐ ܠܟܽܠܗܽܘܢ ܥܰܢܺܝ̈ܕܶܐ. ܕܶܐܟܰܠܘ ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ ܡܚܰܣܝܳܢܳܐ. ܘܰܢܩܽܘܡܽܘܢ ܡܶܢ ܝܰܡܺܝܢܳܟ. ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܫܽܘܒܚܳܐ: ܫܽܘܒܚܳܐ ܢܰܣܶܩ ܠܰܐܒܳܐ ܘܢܶܣܓܽܘܕ ܠܰܒܪܳܐ ܘܢܰܘܕܶܐ ܠܪܽܘܚܩܽܘܕܫܳܐ. ܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ. ܚܰܕ ܐܰܠܳܗܳܐ ܫܰܪܝܪܳܐ. ܕܠܶܗ ܫܽܘܒܚܳܐ ܘܰܥܠܰܝܢ ܪ̈ܰܚܡܰܘܗܝ ܒܟܽܠܥܶܕܳܢ. ܐܰܡܺܝܢ ܘܰܐܡܺܝܢ܀

ܓ H

ܛܽܘܒܰܝܟܝ ܡܰܪܝܰܡ ܒܰܪܬ ܕܰܘܺܝܕ ܕܰܫܘܰܝܬܝ̱ ܕܬܶܗܘܶܝܢ. ܐܶܡܳܐ ܠܰܐܠܳܗܳܐ ܘܶܐܬܓܰܫܰܡ ܡܶܢܶܟܝ̱. ܕܢܶܦܪܽܘܩ ܠܳܐܕܳܡ ܘܰܠܝܰܠ̈ܕܰܘܗܝ ܘܰܢܚܰܪܰܪ ܟܽܠ܀

ܛܽܘܒܰܝܟܝ̱ ܐܶܡܶܗ ܕܰܐܠܳܗܳܐ ܕܰܒܥܰܕܥܺܐܕܶܟܝ̱ ܗܳܐ ܚܳܕܝܳܐ ܥܺܕܬܳܐ ܥܰܡ ܟܽܠܗܽܘܢ ܝܰܠ̈ܕܶܝܗ̇. ܘܙܳܡܪܳܐ ܫܽܘܒܚܳܐ ܘܬܰܘܕܺܝܬܳܐ ܠܡܳܪܝܳܐ ܕܰܐܘܪܒܶܟܝ܀

ܢܒܺܝ̈ܶܐ ܘܰܫܠܺܝ̈ܚܶܐ ܘܣܳܗ̈ܕܶܐ ܘܟܺܐܢ̈ܶܐ ܘܟܳܗ̈ܢܶܐ. ܘܟܽܠܗܽܘܢ ܠܶܘܳܝ̈ܶܐ. ܐܰܦܺܝܣܘ ܠܰܡܫܺܝܚܳܐ. ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ ܒܰܨܠܰܘ̈ܳܬܟܽܘܢ܀

ܡܫܺܝܚܳܐ ܡܰܠܟܳܐ ܕܬܶܫܒܽܘܚܬܳܐ ܥܒܶܕ ܒܰܚܢܳܢܳܟ. ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ. ܕܶܐܟܰܠܘ ܦܰܓܪܳܟ ܩܰܕܺܝܫܳܐ ܘܶܐܫܬܺܝܘ ܠܰܕܡܳܟ. ܘܰܫܟܶܒܘ ܥܰܠ ܣܰܒܪܳܟ܀

ܫܽܘܒܚܳܐ: ܡܳܪܰܢ ܡܳܪܳܐ ܕܡܰܠܰܐܟ̈ܶܐ ܫܡܰܥ ܒܳܥܽܘܬܰܢ. ܘܩܰܒܶܠ ܬܶܫܡܶܫܬܰܢ ܘܶܐܬܪܰܚܡܥܠܰܝܢ. ܒܝܰܕ ܨܠܽܘܬ ܐܶܡܳܐ ܕܝܳܠܶܕܬܳܟ ܘܰܕܩܰܕܺܝ̈ܫܰܝܟ܀