ܡܥܺܝܪܳܢܳܐ ܕܠܺܠܝܳܐ

ܗܽܘ̈ܠܳܠܶܐ ܪ̈ܽܘܚܳܢܶܐ ܘܰܙܡܺܝܪ̈ܳܬܳܐ ܡܰܠܰܐܟܳܝ̈ܳܬܳܐ ܐܰܫܘܳܐ ܠܰܢ ܒܪ̈ܰܚܡܰܝܟ ܕܰܕܠܳܐ ܫܶܠܝܳܐ ܢܩܰܪܶܒ ܠܳܟ ܡܳܪܝܳܐ. ܘܙܰܗܳܐ ܚܽܘܫܳܒܰܝ̈ܢ ܘܢܰܟܶܦ ܬܰܪ̈ܥܝܳܬܰܢ ܘܩܰܕܶܫ ܢܰܦ̈ܫܳܬܰܢ ܘܦܰܓܪ̈ܰܝܢ. ܘܟܰܢܶܫ ܙܰܘܥܰܝ̈ܢ ܘܗܰܘܢܰܝ̈ܢ ܠܘܳܬܳܟ ܡܶܢ ܦܶܗܝܳܐ ܕܰܣܪ̈ܺܝܩܳܬܳܐ ܘܥܽܘܗܕܳܢܳܐ ܕܚܰܫ̈ܶܐ ܒܺܝ̈ܫܶܐ. ܘܥܰܡ ܥܺܝܪܽܘܬܳܐ ܕܢܰܦܫܳܐ ܘܰܕܦܰܓܪܳܐ ܘܫܰܦܝܽܘܬܳܐ ܘܩܰܕܺܝܫܽܘܬܳܐ ܕܚܽܘ̈ܫܳܒܶܐ ܢܗܰܠܶܠ ܘܰܢܙܰܡܰܪ ܦܽܘܡܰܢ ܘܠܶܫܳܢܰܢ ܬܶܫ̈ܒܚܳܬܳܟ ܐܰܠܳܗܳܝ̈ܳܬܳܐ ܒܟܽܠܥܶܕܳܢ. ܠܳܟ ܡܫܺܝܚܳܐ ܐܰܠܳܗܰܢ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܠܥܳܠܡܺܝܢ܀

ܚܽܘܬܳܡܳܐ ܓܰܘܳܢܳܝܳܐ

ܐܰܠܳܗܳܐ ܐܰܪܚܶܩ ܡܶܢܰܢ ܫܶܢܬܳܐ ܕܦܰܓܪܳܐ ܘܗܰܒܠܰܢ ܒܛܰܝܒܽܘܬܳܟ ܕܥܺܝܪܳܐܺܝܬ ܢܶܬܰܥܗܰܕ ܫܡܳܟ ܩܰܕܺܝܫܳܐ ܘܢܰܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ. ܒܳܥܶܝܢܰܢ ܡܶܢܳܟ ܪܳܚܶܡ ܐ̱ܢܳܫ̈ܳܐ ܐܰܢܗܰܪ ܥܰܝ̈ܢܶܐ ܕܠܶܒܰܘ̈ܳܬܰܢ ܘܠܳܐ ܢܶܕܡܰܟ ܫܶܢܬܳܐ ܕܡܰܘܬܳܐ. ܕܰܟܳܐ ܠܰܢ ܡܶܢ ܚܶܙ̈ܘܳܢܶܐ ܒܺܝ̈ܫܶܐ ܘܗܰܒܠܰܢ ܠܡܶܛܰܪ ܦܽܘܩܕܳܢܰܝ̈ܟ ܘܢܶܬܗܰܓܶܐ ܐܺܝܡܳܡܳܐ ܘܠܺܠܝܳܐ ܒܢܳܡܽܘ̈ܣܰܝܟ. ܘܰܢܫܰܡܠܶܐ ܨܶܒܝܳܢܳܟ ܘܰܦܪܽܘܩ ܠܰܢ ܡܶܢ ܥܒܳܕ̈ܶܐ ܕܚܶܫܽܘܟܽܘܬܳܐ ܕܰܚܛܺܝܬܳܐ ܘܚܰܪܰܪ ܠܰܢ ܡܶܢ ܥܰܒܕܽܘܬܶܗ ܕܣܳܛܳܢܳܐ. ܘܰܥܒܶܕ ܠܰܢ ܡܢܳܬܳܐ ܥܰܡ ܩܰܕܺܝ̈ܫܰܝܟ ܘܢܶܗܘܶܐ ܒܢܰܝ̈ܳܐ ܕܢܽܘܗܪܳܐ ܘܕܺܐܝܡܳܡܳܐ. ܨܰܒܶܬ ܡܳܪܝ̱ ܢܰܦ̈ܫܳܬܰܢ ܒܟܽܠ ܡܝܰܬܪܽܘܬܳܐ ܘܩܰܕܺܝܫܽܘܬܳܐ ܐܰܝܟܰܢܳܐ ܕܰܢܫܰܒܚܳܟ ܘܰܢܩܰܕܫܳܟ ܠܥܳܠܡܺܝܢ܀