ܕܣܽܘܬܳܪܳܐ
ܒܳܥܽܘܬܳܐ ܕܡܳܪܝ ܐܰܦܪܶܝܡ

ܗܰܒܠܺܝ ܡܳܪܝ ܟܰܕ ܫܳܗܰܪ ܐ̱ܢܳܐ܆ ܕܥܺܝܪܳܐܺܝܬ ܐܶܩܽܘܡ ܩܽܘܕܡܰܝܟ. ܘܶܐܢܗܽܘ ܬܽܘܒ ܕܕܳܡܶܟ ܐ̱ܢܳܐ ܠܺܝ܆ ܕܠܳܐ ܚܛܺܝܬܳܐ ܬܶܗܘܶܐ ܫܶܢܰܬܝ܀

ܘܰܒܥܺܝܪܽܘܬܝ ܐܶܢ ܡܰܥܘܶܠ ܐ̱ܢܳܐ܆ ܒܛܰܝܒܽܘܬܳܟ ܡܳܪܝ ܐܶܬܚܰܣܶܐ. ܘܰܒܕܰܡܟܽܘܬܝ ܐܶܢ ܚܳܛܶܐ ܐ̱ܢܳܐ܆ ܚܢܳܢܳܟ ܢܶܗܘܶܐ ܫܳܒܽܘܩܳܐ܀

ܘܰܒܝܰܕ ܙܩܺܝܦܶܗ ܕܡܽܘܟܳܟܳܟ܆ ܫܶܢܬܳܐ ܕܰܢܝܳܚܳܐ ܗܰܒܠܺܝ. ܘܦܰܨܳܢܝ ܡܶܢ ܚܶܠ̈ܡܶܐ ܒܺܝ̈ܫܶܐ܆ ܘܡܶܢ ܕܶܡ̈ܘܳܬܳܐ ܫܟܺܝܪ̈ܳܬܳܐ܀

ܘܰܒܫܶܢܬܳܐ ܕܡܰܠܝܳܐ ܫܰܝܢܳܐ܆ ܟܽܠܶܗ ܠܺܠܝܳܐ ܕܰܒܰܪܰܝܢܝ. ܕܠܳܐ ܢܶܫܬܰܠܛܽܘܢ ܒܺܝ ܒܺܝ̈ܫܶܐ܆ ܘܚܽܘ̈ܫܳܒܶܐ ܕܰܡܠܶܝܢ ܥܰܘܠܳܐ܀

ܡܰܠܰܐܟܳܐ ܕܢܽܘܗܪܳܐ ܗܰܒܠܺܝ܆ ܕܢܶܛܰܪ ܠܟܽܠܗܽܘܢ ܗܰܕܳܡܰܝ̈. ܘܡܶܢ ܪܶܓܬܳܐ ܣܢܺܝܬܳܐ ܦܰܨܳܢܝ܆ ܒܝܰܕ ܦܰܓܪܳܟ ܚܰܝܳܐ ܕܶܐܟܠܶܬ܀

ܐܶܫܟܰܒ ܘܶܐܕܡܰܟ ܒܰܢܝܳܚܳܐ܆ ܢܳܛܽܘܪܳܐ ܕܡܳܟ ܢܶܗܘܶܐ ܠܺܝ. ܘܰܠܢܰܦܫܳܐ ܕܺܐܝܬܶܝܗ̇ ܨܰܠܡܳܟ܆ ܚܪܽܘܪ̈ܶܐ ܠܰܓܒܺܝܠܬܳܟ ܫܰܟܶܢ܀

ܘܰܠܦܰܓܪܳܐ ܕܰܓܒܰܠ̈ܝ ܐܺܝ̈ܕܰܝܟ܆ ܬܰܓܶܢ ܥܠܰܘܗ̱ܝ ܝܰܡܺܝܢܳܟ. ܘܰܐܚܕܰܪ ܠܶܗ ܫܽܘܪܳܐ ܕܪ̈ܰܚܡܰܝܟ܆ ܐܰܝܟ ܣܰܟܪܳܐ ܡܩܰܒܠܳܢܺܝܬܳܐ܀

ܡܳܐ ܕܰܫܠܺܝ ܦܰܓܪܳܐ ܘܰܕܡܶܟ܆ ܚܰܝܠܳܟ ܢܶܗܘܶܐ ܡܢܰܛܪܳܢܶܗ. ܘܰܐܝܟ ܥܶܛܪܳܐ ܕܒܶܣ̈ܡܶܐ ܬܶܗܘܶܐ܆ ܫܶܢܰܬܝ ܩܽܘܕܡܰܬ ܪܰܒܽܘܬܳܟ܀

ܠܳܐ ܢܶܩܪܽܘܒ ܒܺܝܫܳܐ ܠܬܶܫܘܺܝܬܝ܆ ܒܰܦܝܳܣܳܐ ܕܗܳܝ ܕܺܝܠܶܕܬܳܟ. ܘܰܒܝܰܕ ܕܶܒܚܳܟ ܕܰܚܠܳܦܰܝ܆ ܟܠܺܝ ܠܣܳܛܳܢܳܐ ܕܠܳܐ ܢܰܟܶܝܢܝ܀

ܫܰܡܠܳܐ ܠܘܳܬܝ ܡܳܪܝ ܫܽܘܘܕܳܝܳܟ܆ ܘܢܰܛܰܪ ܚܰܝܰܝ̈ ܒܰܨܠܺܝܒܳܟ. ܕܡܳܐ ܕܶܐܬܬܥܺܝܪܶܬ ܐܰܘܕܶܐ ܠܳܟ܆ ܕܚܽܘܒܳܟ ܚܰܘܺܝܬ ܨܶܝܕ ܫܰܦܠܽܘܬܝ܀

ܫܰܟܶܢ ܠܺܝ ܡܳܪܝ ܒܰܚܢܳܢܳܟ܆ ܕܶܐܫܡܰܥ ܘܶܐܥܒܶܕ ܨܶܒܝܳܢܳܟ. ܪܰܡܫܳܐ ܡܳܪܝ ܕܰܡܠܶܐ ܫܰܝܢܳܐ܆ ܐܳܦ ܠܺܠܝܳܐ ܕܙܰܕܺܝܩܽܘܬܳܐ܀

ܗܰܒܠܰܢ ܡܫܺܝܚܳܐ ܦܳܪܽܘܩܰܢ܆ ܕܰܐܢ̱ܬܽ ܗ̱ܘ ܢܽܘܗܪܳܐ ܫܰܪܺܝܪܳܐ. ܘܰܒܢܽܘܗܪܳܐ ܫܪܶܐ ܐܺܝܩܳܪܳܟ܆ ܘܰܒܢܰܝ̈ ܢܽܘܗܪܳܐ ܠܳܟ ܣܳܓܕܺܝܢ܀

ܫܪܶܐ ܒܢܽܘܗܪܳܐ ܘܥܳܡܰܪ ܒܢܽܘܗܪܳܐ܆ ܝܶܫܽܘܥ ܦܳܪܽܘܩܶܗ ܕܥܳܠܡܳܐ. ܠܳܟ ܫܽܘܒܚܳܐ ܘܰܥܠܰܝܢ ܪ̈ܰܚܡܰܝܟ܆ ܒܗܳܢ ܥܳܠܡܳܐ ܘܰܒܗܰܘ ܕܰܥܬܺܝܕ܀

ܚܽܘܬܳܡܳܐ ܕܒܰܪ ܨܰܠܺܝܒܺܝ

ܐܰܒܳܐ ܩܰܕܺܝܫܳܐ ܛܰܪ ܠܰܢ ܒܰܫܡܳܟ ܩܰܕܺܝܫܳܐ. ܒܪܳܐ ܦܳܪܽܘܩܳܐ ܣܰܬܰܪ ܠܰܢ ܒܰܨܠܺܝܒܳܟ ܙܰܟܳܝܳܐ. ܪܽܘܚܳܐ ܩܰܕܺܝܫܳܐ ܥܒܶܕ ܠܰܢ ܐܰܘܳܢ̈ܶܐ ܠܰܥܡܽܘܪܝܳܐ ܕܺܝܠܳܟ ܩܰܕܺܝܫܳܐ. ܘܢܰܛܰܪ ܠܰܢ ܘܣܰܬܰܪ ܠܰܢ ܬܚܶܝܬ ܟܶܢ̈ܦܶܐ ܕܰܐܠܳܗܽܘܬܳܟ ܒܟܽܠܙܒܰܢ܆ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀