ܡܥܺܝܪܳܢܳܐ ܕܠܺܠܝܳܐ

ܛܰܝܶܒ ܘܥܰܬܶܕ ܠܰܢ ܡܳܪܝܳܐ ܒܚܰܝܠܳܐ ܕܺܝܠܳܟ ܡܨܶܐ ܟܽܠ ܕܒܰܥ̈ܒܳܕܶܐ ܕܪܰܚܺܝܩܺܝܢ ܡܶܢ ܚܶܫܽܘܟܳܐ ܕܰܚܛܺܝܬܳܐ ܘܫܶܢܬܳܐ ܕܡܰܗܡܝܳܢܽܘܬܳܐ. ܘܟܰܕ ܢܰܗܺܝܪܺܝܢ ܡܰܕ̈ܥܰܝܢ ܒܢܽܘܗܪܳܐ ܕܺܝܕܰܥܬܳܟ ܘܰܡܨܰܒ̈ܬܳܢ ܢܰܦ̈ܫܳܬܰܢ ܒܚܶܟܡܬܳܟ ܘܰܕܟܶܝܢ ܪ̈ܶܓܫܰܝܢ ܘܗܰܕܳܡܰܝ̈ܢ. ܘܰܫܦܶܝܢ ܙܰܘܥܰܝ̈ܢ ܘܚܽܘ̈ܫܳܒܰܝܢ ܘܢܰܗܺܝܪܺܝܢ ܠܰܡܦܺܐܕܰܝ̈ܢ ܒܡܶܫܚܳܐ ܕܰܡܝܰܬܪ̈ܳܬܳܐ. ܥܰܡ ܓܒܰܝ̈ܳܐ ܘܩܰܕܺܝ̈ܫܶܐ ܕܺܝܠܳܟ ܢܩܰܒܶܠ ܠܕܶܢܚܳܐ ܕܡܶܬܓܰܠܝܳܢܽܘܬܳܟ ܗܳܪܟܳܐ ܘܰܒܚܰܝ̈ܶܐ ܚܰܕ̈ܬܶܐ ܕܰܥܬܺܝܕܺܝܢ. ܘܗܳܟܰܢܳܐ ܥܰܡܳܟ ܠܥܳܠܰܡ ܢܶܗܘܶܐ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܚܽܘܬܳܡܳܐ ܓܰܘܳܢܳܝܳܐ

ܫܰܟܶܢ ܠܰܢ ܡܳܪܰܢ ܫܽܘܒܩܳܢܳܐ ܕܰܚ̈ܛܳܗܶܐ ܐܰܝܟ ܛܳܒܳܐ ܘܪܳܚܶܡ ܐ̱ܢܳܫ̈ܳܐ. ܘܟܽܠܗܶܝܢ ܠܳܐ ܢܳܡܽܘܣܳܝ̈ܘܳܬܳܐ ܘܚܰܫ̈ܶܐ ܘܚܶܫܽܘ̈ܟܶܐ ܕܠܳܐ ܝܺܕܰܥܬܳܐ ܥܩܽܘܪ ܘܒܰܛܶܠ ܡܶܢ ܬܰܪ̈ܥܝܳܬܰܢ ܘܡܰܕܥܰܢ ܚܰܠܳܫܳܐ. ܘܗܰܒܠܰܢ ܪܶܚܡܬܳܐ ܕܰܠܘܳܬܳܟ ܘܕܰܠܘܳܬ ܚ̈ܕܳܕܶܐ ܚܽܘܒܳܐ ܡܫܰܡܠܝܳܐ ܘܣܰܒܪܳܐ ܛܳܒܳܐ ܘܗܰܝܡܳܢܽܘܬܳܐ. ܫܪܳܪܳܐ ܕܠܶܫܳܢܳܐ ܘܩܰܕܺܝܫܽܘܬܳܐ ܕܦܰܓܪܳܐ ܘܛܳܒܽܘܬ ܥܰܝܢܳܐ ܘܫܰܦܺܝܪܽܘܬ ܨܶܒܝܳܢܳܐ. ܕܽܘܒܳܪܳܐ ܠܳܐ ܡܛܰܘܫܳܐ. ܫܽܘܠܳܡܳܐ ܕܠܳܐ ܒܶܗܬܬܳܐ. ܦܰܪܶܗ̱ܣܺܝܰܐ ܕܰܩܕܳܡ ܒܺܐܡܰܐ ܕܺܝܠܳܟ ܕܚܺܝܠܬܳܐ ܘܰܕܢܰܣܶܩ ܠܳܟ ܫܽܘܒܚܳܐ ܕܠܳܐ ܫܶܠܝܳܐ ܒܟܽܠܗܶܝܢ ܘܠܺܝܚܺܝܕܳܝܳܐ ܒܪܳܟ ܘܰܠܪܽܘܚܳܐ ܕܺܝܠܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀