ܛܟܣܐ ܕܙܘܝܚܐ ܕܨܠܝܒܐ
ܡܚܰܘܝܳܢܳܐ
ܡ̣ܶܢ ܩܕܳܡ ܕܢܶܫܬܰܡܠܶܐ ܩܽܘ̣ܪܳܒܳܐ ܐܰܠܳܗܳܝܳܐ܆ ܒܳܬܰܪ ܕܰܡܫܰܡܠܶܝܢ ܠܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ ܡܛܰܝܒܺܝ̣ܢ ܨܠܺܝܒܳܐ ܘܰܡܢܰܘ̈ܳܬܳܐ ܕܩܰܕܺܝ̣̈ܫܶܐ ܘܡܰܪ̈ܘ̣ܚܳܬܳܐ. ܘܩܳܪܶܒ ܪ̈ܺܝ̣ܫܟܳܗܢܶܐ ܐܳܚܶܕ ܠܰܨܠܺܝܒܳܐ ܘܛܳܥܶܢ ܠܶܗ. ܘܩܰܫܺܝ̣ܫܳܐ ܐ̱ܚܪܺܢܳܐ ܠܶܐܘܰܢܓܶܠܝܽܘܢ. ܘܰܐ̱ܚܪܺܢܳܐ ܡܢܰܘ̈ܳܬܳܐ ܕܩܰܕܺܝ̣̈ܫܶܐ. ܘܰܐ̱ܚܪ̈ܳܢܶܐ ܩܶܪ̈ܝܽܘ̣ܢܶܐ ܘܡܰܪ̈ܘ̣ܚܳܬܳܐ ܡܶܟܳܐ ܘܡܶܟܳܐ ܟܰܕ ܛܳܪܦܺܝ̣ܢ. ܘܰܡܫܰܡܫܳܢܳܐ ܕܰܛܥܺܝ̣ܢ ܦܺܝܪܡܳܐ ܐܳܙܶܠ ܩܕܳܡܰܝܗܽܘ̇ܢ ܘܟܽܠܶܗ ܥܰܡܳܐ ܬܳܪܶܨ ܐܰܦܰܘ̈ܗ̱ܝ ܠܡܰܕܢܚܳܐ ܘܪܺܝ̣ܫ ܟܳܗ̈ܢܶܐ ܡܫܰܪܶܐ ܨܠܽܘ̣ܬܳܐ ܗܳܕܶܐ܀
ܦܳܢܶܝܢ ܠܡܕܢܚܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘ̣ܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ
ܡ̣ܶܢ ܡܰܕܢܚܳܐ ܝܳܗܶܒ ܩܳܠܶܗ ܩܳܠܳܐ ܥܰܫܺܝ̣ܢܳܐ܆ ܒܪܳܐ ܝܺܚܺܝ̣ܕܳܝܳܐ ܕܰܐܒܳܐ ܡܬܽܘ̣ܡܳܝܳܐ܆ ܘܰܐܝܟ ܚܰܬܢܳܐ ܡ̣ܶܢ ܒܶܝܬ ܓܢܽܘ̣ܢܳܐ ܙܳܐܰܚ ܒܝܰܘܡܳܐ ܐ̱ܚܪܳܝܳܐ ܘܰܒܡܰܥܪܒܳܐ ܕܳܢܰܚ܆ ܘܒܰܨܠܺܝܒܳܐ ܕܰܥܠܰܘܗ̱ܝ ܐܶܨܛܠܶܒ܆ ܠܟܽܠܗܽܘܢ ܟܳܦܽܘ̣ܪ̈ܶܐ ܕܠܳܐ ܗܰܝܡܶܢܘ̱ ܒܶܗ ܡܰܒܗܶܬ ܘܰܡܩܰܦܰܚ. ܘܰܠܝܳܠܶܕܬܶܗ ܘܰܠܢܰܨܝ̣̈ܚܰܘܗ̱ܝ ܘܰܓܒܰܘ̈ܗ̱ܝ ܒܰܟܠܺܝ̣̈ܠܶܐ ܪ̈ܽܘ̣ܚܳܢܳܝܶܐ ܡܗܰܕܰܪ. ܘܰܠܣܳܓ̈ܕܰܝ ܠܰܨܠܺܝ̣ܒܶܗ ܘܡܰܘܕ̈ܝ݂ܰܝ݂ ܒܰܫܡܶܗ܆ ܘܰܡܝܰܩܪ̈ܰܝ ܠܝܳܠܶܕܬܶܗ ܘܠܰܪ̈ܚܽܘ̣ܡܰܘܗ̱ܝ ܡܰܘܪܶܒ ܘܰܡܝܰܩܰܪ܆ ܚܢܰܢ ܡܳܪܝ̱ ܕܠܰܨܠܺܝ̣ܒܳܟ ܦܳܪܽܘ̣ܩܳܝܳܐ ܣܳܓܕܺܝ̣ܢܰܢ ܘܰܡܙܰܝܚܺܝ̣ܢܰܢ܆ ܘܚܶܣܕܶܗ ܕܰܙܩܺܝ̣ܦܳܟ ܒܦܰܓܪ̈ܰܝܢ ܘܰܒܢܰܦ̈ܫܳܬܰܢ ܛܥܺܝ̣ܢܺܝܢܰܢ ܘܰܠܡܶܬܓܰܠܝܳܢܽܘ̣ܬܶܗ ܕܒܺܐܝ̣ܕܳܟ ܘܥܰܡܳܟ ܡܣܰܟܶܝܢܰܢ. ܐܰܫܘܳܐ ܠܰܢ ܕܰܬܚܶܝܬ ܟܶܢ̈ܦܰܘܗ̱ܝ ܢܶܣ̇ܬܰܬܰܪ. ܘܡ̣ܶܢ ܒܶܗܬܰܬ݂ ܐܰܦ̈ܶܐ ܕܰܩܕܳܡܰܝܟ ܢܶܬܚܰܪܰܪ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܶܩܒܳܐ ܒܩ̄: ܛܠܳܝ̈ܶܐ ܕܳܚܠܰܝ̈ ܐܰܠܳܗܳܐ
ܡ̣ܶܢ ܪܰܘܡܳܐ ܐܰܚܬܳܟ ܚܽܘ̣ܒܳܐ܆ ܝܶܫܽܘܥ ܡܰܠܟܰܢ ܙܰܟܳܝܳܐ. ܕܰܬܣܰܝܒܰܪ ܚܠܳܦܰܝܢ ܨܰܥܪܳܐ ܘܒܶܙܚܳܐ ܘܰܙܩܺܝ̣ܦܳܐ܆ ܒܪܽܘ̣ܡܪܳܡܳܟ ܕܥܰܠ ܓܳܓܽܘ̣ܠܬܳܐ܆ ܒܰܨܠܺܝ̣ܒܳܟ ܦܪܰܩܬ ܡ̣ܶܢ ܒܺܝ̣ܫܳܐ܆ ܠܰܢ ܗܳܢܽܘܢ ܕܰܡܫܰܒܚܺܝ̣ܢܰܢ ܠܳܟ ܟܰܕ ܐܳܡܪܺܝ̣ܢܰܢ܆ ܡܒܰܪܟܳܐ ܐܺܝ̣ܬܰܝܟ ܐܰܠܳܗܳܐ ܕܰܐܒܳܗ̈ܳܬܳܐ ܕܺܝܠܰܢ܀
ܒܰܝܬܳܐ ܕܙܽܘ̣ܝܳܚܳܐ ܡܰܙܥܩܳܢܘ̣ܬܳܐ
ܦܶܬܓܳܡܳܐ: ܒܳܟ ܢܕܰܩܰܪ ܠܰܒܥܶܠܕܒܳܒܰܝ̈ܢ܆ ܘܡܶܛܽܠ ܫܡܳܟ ܢܕܽܘܫ ܠܣܳܐܢܰܝ̈ܢ܀
ܨܠܺܝܒܳܐ ܕܢܽܘ̣ܗܪܳܐ ܕܶܐܬܚܰܘܺܝ̣ ܠܩܽܘ̣ܣـܛܰܢܛܺܝ̣ܢܳܘܣ ܒܰܫܡܰܝܳܐ. ܘܗܰܝܡܶܢ ܒܶܗ ܘܶܐܬܓܰܘܰܣ ܒܶܗ܆ ܘܰܙܟܳܐ ܒܶܗ ܠܰܒܥܶܠܕܰܪܳܐ ܠܡܰܠ̈ܟܶܐ ܛܪ̈ܽܘ̣ܢܶܐ܆ ܗܽܘ̣ ܢܶܗܘܶܐ ܫܽܘ̣ܪܳܐ ܪܳܡܳܐ ܠܥܺܕ̈ܳܬܰܢ ܘܰܠܕܰܝܪ̈ܳܬܰܢ܆ ܘܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܟܰܕ ܐܳܡܪܺܝ̣ܢܰܢ: ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ ܩܽܘܪܝܶܐܠܰܝܣܳܘܢ܀
ܦܳܢܶܝܢ ܠܡܰܥܪܒܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘ̣ܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ
ܫܰܒܰܚܘ̱ ܠܕܰܪܟܺܝ̣ܒ ܠܡܰܥܪܒܳܐ܆ ܡܳܪܝܰܐ ܗ̱ܘ ܫܡܶܗ܆ ܙܰܡܰܪܘ̱ ܠܡܳܪܝܳܐ ܕܰܪܟܺܝ̣ܒ ܒܰܫ̈ܡܰܝ ܫܡܰܝ̈ܳܐ ܕܺܐܝܩܳܪܶܗ܆ ܕܰܫܒܰܩ ܪܰܘܡܳܐ ܕܪܰܒܽܘ̣ܬܶܗ܆ ܘܰܒܓܰܘ ܟܰܪܣܳܗ̇ ܕܰܒܬܽܘ̣ܠܬܳܐ ܡܰܪܝܰܡ ܫܪܳܐ ܕܰܫܦܰܪ ܠܶܗ. ܘܰܒܡܰܘܠܳܕܶܗ ܕܡ̣ܶܢ ܛܽܘ̣ܒܳܢܝ̣ܬܳܐ ܠܡܰܥܪܒܳܐ ܕܚܶܫܽܘ̣ܟܽܘ̣ܬܰܢ ܒܝܽܘ̣ܠܦܳܢܰܘ̈ܗ̱ܝ ܐܰܠܳܗܳܝ̈ܶܐ ܠܟܽܠܰܢ ܐܰܢܗܰܪ܆ ܘܰܠܢܰܦܫ̈ܳܬܰܢ ܡ̣ܶܢ ܡܰܥܪ̈ܳܒܰܝ ܚܶܫܽܘ̣ܟܽܘ̣ܬܳܐ ܚܰܪܰܪ܆ ܘܰܠܡܰܕ̈ܢܳܚܰܝ ܕܶܢܚܳܐ ܒܕܽܘ̣ܒܳܪ̈ܶܐ ܕܙܰܕܺܝ̣ܩܽܘ̣ܬܳܐ ܫܰܪܰܪ. ܗܰܒܠܰܢ ܡܳܪܝ ܕܒܰܦܨܺܝ̣ܚܽܘ̣ܬܳܐ ܢܰܘܪܶܒ ܕܽܘ̣ܟܪܳܢ ܝܳܠܶܕܬܳܟ܆ ܘܰܕܢܰܨܝ̣ܚܳܐ ܡܳܪܝ̱ ܦܠܳܢ ܕܝܰܘܡܳܢܳܐ ܕܽܘ̣ܟܪܳܢܶܗ ܒܟܶܢܫܰܢ ܡܶܙܕܰܝܰܚ ܢܝܰܩܰܪ܆ ܘܰܒܚܽܘ̣̈ܓܳܝܶܐ ܘܙܽܘ̣ܡܳܪ̈ܶܐ ܪ̈ܽܘ̣ܚܳܢܳܝܶܐ ܢܚܰܓܶܐ ܘܢܶܙܡܰܪ܆ ܟܰܕ ܡܫܰܘܙܶܒ ܐܰܢ̱ܬ ܠܰܢ ܒܰܨܠܰܘ̈ܳܬܳܗ̇ ܕܶܐܡܳܟ ܒܬܽܘ̣ܠܬܳܐ ܩܰܕܺܝ̣ܫܬܳܐ܆ ܘܕܰܡܢܺܝ̣ܚܳܢܳܐ ܕܪܰܒܽܘ̣ܬܳܟ ܡ̣ܶܢ ܟܽܠ ܢܶܟܝ̈ܳܢܶܐ܆ ܘܰܡܫܰܟܶܢ ܐܰܢ̱ܬ ܘܝܳܗܶܒ ܐܰܢ̱ܬ ܠܰܢ ܙܰܒ̈ܢܶܐ ܟܰܗܺܝ̣̈ܢܶܐ ܘܡܰܠ̈ܝ݂ܰܝ݂ ܕܽܘ̣ܗ̈ܳܢܶܐ܆ ܘܠܳܟ ܢܗܰܕܰܪ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܶܩܒܳܐ :
ܒܬܽܘ̣ܠܬܳܐ ܕܟܺܝ̣ܬܳܐ ܩܰܕܺܝ̣ܫܬܳܐ܆ ܐܶܡܶܗ ܕܰܐܠܳܗܐ ܡܪܰܝܡܳܐ܆ ܡܰܢܽܘ̣ ܣܳܦܶܩ ܕܰܢܩܰܠܣܶܟܝ̱ ܐܰܟܡܳܐ ܕܺܐܝܬܰܝܟܝ̱܆ ܕܰܫܡܰܝܳܐ ܪܳܡܰܬܝ̱ ܡܶܢܳܗ̇܆ ܘܰܐܪܥܳܐ ܙܥܽܘ̣ܪܝܳܐ ܗ̱ܝ ܠܺܐܝ̣ܩܳܪܶܟܝ̱܆ ܘܰܒܪܳܐ ܕܡܶܢܶܟܝ̱ ܐܶܬܺܝ̣ܠܶܕ܆ ܠܳܐ ܡܶܬܒܨܶܐ ܐܰܘ ܡܶܬܦܰܫܰܩ܆ ܡܒܰܪܰܟܬܳܐ ܐܰܢ̱ܬܝ̱ ܒܢܶܫ̈ܶܐ܆ ܘܰܒܪܺܝ̣ܟ ܦܺܐܪܳܐ ܕܡܶܢܶܟܝ̱ ܕܢܰܚ܀
ܦܶܬܓܳܡܳܐ܆ ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ݂ ܘܡܰܠܟܬܳܐ ܡ̣ܶܢ ܝܰܡܺܝ̣ܢܳܟ܀
ܡܰܙܥܩܳܢܽܘ̣ܬܳܐ
ܒܗܳܢܳܐ ܝܰܘܡܳܐ ܕܚܰܕܘ̈ܳܬܳܐ܆ ܡܦܺܝ̣ܣܺܝ̣ܢܰܢ ܠܳܟ ܦܳܪܘ̣ܩܰܢ܆ ܕܬܰܫܪܶܐ ܫܰܝܢܳܟ ܘܰܫܠܳܡܳܟ܆ ܒܰܐܪܒܰܥ ܦܶܢ̈ܝܳܢ ܕܰܒܪܺܝ̣ܬܳܐ܆ ܒܰܨܠܽܘ̣ܬ ܐܶܡܳܐ ܕܺܝܠܶܕܬܳܟ܆ ܘܕܰܪܚܽܘ̣ܡܳܟ ܡܳܪܝ̱ ܦܠܳܢ ܘܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܟܰܕ ܐܳܡܪܺܝ̣ܢܰܢ: ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ ܩܽܘܪܝܶܐܠܰܝܣܳܘܢ܀
ܦܳܢܶܝܢ ܠܓܰܪܒܝܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘ̣ܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ
ܛܽܘ̣ܪܳܐ ܕܨܶܗܝܽܘܢ ܕܒܰܫܦܘ̈ܠܰܝ ܓܰܪܒܝܳܐ܆ ܩܪܺܝܬܶܗ ܗ̱ܝ̣ ܕܡܰܠܟܳܐ ܪܰܒܳܐ ܡܳܪܝܳܐ܆ ܥܺܕܬܳܐ ܩܰܕܺܝ̣ܫܬܳܐ ܗܳܝ ܕܶܐܬܦܰܪܩܰܬ݂ ܒܰܕܡܳܐ ܕܰܦܢܳܝܳܐ܆ ܗܳܝ ܕܝܰܬܺܝ̣ܪܳܐܺܝܬ ܒܰܦܢܺܝ̣ܬܳܐ ܓܰܪܒܝܳܝܬܳܐ ܕܥܰܡܽܘ̣ܛܳܐ ܗ̱ܘܳܬ ܡ̣ܶܢ ܟܽܠ ܦܶܢ̈ܝܳܬܳܐ ܐܶܫܬܰܪܬܚܰܬ݂ ܒܢܽܘ̣ܗܪܳܐ ܗܰܘ ܐܰܠܳܗܳܝܳܐ܆ ܘܰܒܡܰܘܠܳܕܶܗ ܕܡ̣ܶܢ ܒܬܽܘ̣ܠܬܳܐ ܡܰܪܝܰܡ ܡ̣ܶܢ ܡܰܕܢܚܳܐ ܘܡ̣ܶܢ ܡܰܥܪܒܳܐ ܘܡ̣ܶܢ ܓܰܪܒܝܳܐ ܘܡ̣ܶܢ ܝܰܡܳܐ ܕܺܐܝܬܰܘܗ̱ܝ ܬܰܝܡܢܳܐ܆ ܠܰܚܕܳܐ ܡܨܺܝ̣ܕܬܳܐ ܠܳܐ ܢܟܺܝ̣ܠܬܳܐ ܟܰܢ̣ܶܫ ܘܨܰܝܶܒ܆ ܘܠܳܐܟܶܠܩܰܪܨܳܐ ܕܫܰܥܒܶܕ ܐܶܢܽܘܢ ܠܰܒܢܰܝ̈ܢܳܫܳܐ ܒܥܰܡܽܘ̣ܛܽܘ̣ܬܳܐ ܕܛܽܘ̣ܥܝ݂ܰܝ݂ ܚܰܝܶܒ܆ ܘܰܒܪܽܘ̣ܡܪܳܡܶܗ ܕܠܰܨܠܺܝܒܳܐ܆ ܠܛܽܘ̣ܪ̈ܶܐ ܪ̈ܳܡܶܐ ܕܰܚܛܺܝ̣ܬܳܐ ܕܡܶܬܬܠܶܝܢ ܒܛܽܘ̣ܪ̈ܰܝ ܓܰܪܒܝܳܐ ܬܰܒܰܪ܆ ܘܰܠܥܰܡܛܳܢܳܐ ܗܰܘ ܕܰܚܛܺܝ̣ܬܳܐ ܡ̣ܶܢ ܟܽܠܳܗ̇ ܐܰܪܥܳܐ ܡ̣ܶܢ ܫܶܪ̈ܫܶܐ ܥܩܰܪ܆ ܘܢܽܘ̣ܪܶܗ ܐܰܠܳܗܳܝ̇ܬܳܐ ܒܰܐܪ̈ܒܰܥܦܶܢܝܳܢ ܫܰܡܰܪ܆ ܗܺܝ̣ ܗܳܕܶܐ ܢܽܘ̣ܪܳܐ ܐܰܠܳܗܳܝܬܳܐ ܒܠܶܒܶܗ ܕܢܰܨܺܝ̣ܚ ܫܽܘ̣ܦܪ̈ܶܐ ܡܳܪܝ̱ ܦܠܳܢ ܣܶܦܰܬ݂ ܘܶܐܬܓܰܘܙܠܰܬ݂ ܘܢܰܦܫܶܗ ܡܕܺܝܢ̱ܬܳܐ ܩܰܕܺܝ̣ܫܬܳܐ ܒܪܶܚܡܬܶܗ ܕܰܡܫܺܝ̣ܚܳܐ ܕܶܠܩܰܬ݂܆ ܘܰܒܚܽܘ̣ܒܶܗ ܐܶܬܒܰܠܥܰܬ݂܆ ܘܰܠܥܶܢܝܳܢܶܗ ܐܬܶܠܰܗܩܰܬ݂܆ ܥܕܰܡܳܐ ܕܠܶܗ ܢܶܩܦܰܬ݂ ܘܶܐܬܚܰܒܪܰܬ݂܆ ܗܰܒܠܰܢ ܡܳܪܝ̱ ܕܡ̣ܶܢ ܨܳܐܝܽܘ̣ܬܳܐ ܘܥܰܡܛܳܢܳܐ ܕܰܚܛܺܝ̣ܬܳܐ ܢܶܬܡܪܶܩ܆ ܘܡ̣ܶܢ ܫܽܘ̣ܥܒܳܕܳܐ ܕܳܐܟܶܠܩܰܪܨܳܐ ܢܶܬܦܪܶܩ. ܒܰܨܠܽܘ̣ܬ ܐܶܡܳܐ ܕܺܝ̣ܠܶܕܬܳܟ܆ ܘܰܒܚܺܝ̣ܠ ܬܽܘ̣ܩܦܶܗ ܕܰܨܠܺܝ̣ܒܳܟ܆ ܘܫܰܟܶܢ ܠܰܢ ܗܳܫܳܐ ܡܳܪܝ̱ ܒܝܽܘ̣ܡ ܕܽܘ̣ܟܪܳܢܶܗ ܕܰܪܚܽܘ̣ܡܳܟ ܡܳܪܝ̱ ܦܠܳܢ ܕܰܠܥܺܐܕܶܗ ܡܩܰܠܣܺܝ̣ܢܰܢ܆ ܘܰܒܝܰܘܡܳܐ ܕܚܽܘ̣ܓܳܝܶܗ ܠܰܨܠܺܝ̣ܒܳܟ ܡܰܚܝܳܢܳܐ ܣܳܓܺܕܝ̣ܢܰܢ ܘܰܡܙܰܝܚܺܝ̣ܢܰܢ܆ ܘܰܠܝܳܠܶܕܬܳܟ ܡܒܰܪܰܟܬܳܐ ܡܝܰܩܪܺܝ̣ܢܰܢ܆ ܟܽܠ ܒܽܘ̣ܪ̈ܟܳܬܳܐ ܫܦܺܝ̣̈ܥܳܬܳܐ ܘܟܽܠ ܛܳܒ̈ܳܬܳܐ ܡܫܰܪ̈ܬܚܳܬܳܐ܆ ܘܒܽܘ̣ܛܳܠܳܐ ܕܟܽܠ ܡܰܪ̈ܕܘܳܬܳܐ܆ ܟܽܠ ܫܽܘܒܩܳܢܳܐ ܕܣܰܟܠܘ̈ܳܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܶܩܒܳܐ:
ܕܽܘܨܝ̱ ܘܰܚܕܳܝ̇ ܥܺܕܰܬ݂ ܩܽܘ̣ܕܫܳܐ ܒܕܽܘ̣ܟܪܳܢܶܗ ܕܰܐܒܽܘ̇ܢ ܓܰܒܝܳܐ ܢܰܨܝ̣ܚܳܐ ܘܰܡܠܶܐ ܫܽܘ̣ܦܪ̈ܶܐ ܡܳܪܝ̱ ܦܠܳܢ ܘܰܐܣܶܩܝ̱ ܠܶܗ ܩܳܠܰܝ̈ ܫܽܘܒܚܳܐ ܠܰܡܫܺܝ̣ܚܳܐ ܕܰܫܪܶܐ ܒܓܰܪ̈ܡܰܘܗ̱ܝ܆ ܘܰܒܚܰܕܽܘ̣ܬܳܐ ܘܰܒܕܰܘܨܳܐ ܩܥܳܝ̇ ܟܰܕ ܐܳܡܪܰܬܝ̱܆ ܡܒܰܪܟܳܐ ܐܺܝ̣ܬܰܝܟ ܐܰܠܳܗܐ ܕܰܐܒܳܗ̈ܳܬܳܐ ܕܺܝ̣ܠܰܢ܀
ܡܰܙܥܩܳܢܽܘ̣ܬܳܐ
ܦܶܬܓܳܡܳܐ: ܙܰܕܺܝ̣ܩܳܐ ܐܰܝܟ ܕܶܩܠܳܐ ܢܰܦܪܰܥ܆ ܘܰܐܝܟ ܐܰܪ̈ܙܶܐ ܕܠܶܒܢܳܢ ܢܶܫܘܰܚ܀
ܩܽܘ̣ܡ ܩܰܕܺܝܫܳܐ ܡܳܪܝ̱ ܦܠܳܢ ܒܰܪܶܟ ܠܰܐܝܠܶܝܢ ܕܰܡܝܰܩܪܺܝ̣ܢ ܕܽܘ̣ܟܪܳܢܳܟ ܒܗܰܝܡܳܢܽܘ̣ܬܳܐ܆ ܘܫܳܐܠܺܝ̣ܢ ܡܶܢܳܟ ܒܽܘ̣ܪ̈ܟܳܬܳܐ܆ ܩܰܒܶܠ ܢܶܕܪ̈ܶܐ ܕܩܰܪܶܒܘ̱ ܠܳܟ܆ ܘܦܰܢܳܐ ܠܗܽܘܢ ܫ̈ܶܐܠܳܬܗܽܘ̇ܢ܆ ܘܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܟܰܕ ܐܳܡܪܺܝ̣ܢܰܢ: ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ ܩܽܘܪܝܶܐܠܰܝܣܳܘܢ܀
ܦܳܢܶܝܢ ܠܬܰܝܡܢܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘ̣ܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ
ܐܰܠܳܗܳܐ ܡ̣ܶܢ ܬܰܝܡܢܳܐ ܐܶܬܳܐ܆ ܘܩܰܕܺܝܫܳܐ ܡ̣ܶܢ ܛܽܘ̣ܪܳܐ ܕܦܳܪܳܢ܆ ܟܰܕ ܣܳܡ ܥܽܘ̣ܫܢܶܗ ܒܠܰܩܚܳܐ܆ ܘܡ̣ܶܢ ܢܳܨܪܰܬ ܗܳܝ̇ ܕܰܒܬܰܝܡܢܳܐ ܨܡܰܚ܆ ܘܡ̣ܶܢ ܛܽܘ̣ܪܳܐ ܩܰܕܺܝܫܳܐ ܡܰܪܝܰܡ ܒܰܪ̱ܬ ܕܰܘܺܝ̣ܕ ܕܢܰܚ܆ ܘܡ̣ܶܢ ܠܰܩܚܳܐ ܟܰܪܣܳܐ ܒܶܣܪܳܢܳܝܬܳܐ ܕܛܽܘ̣ܒܳܢܝ̣ܬܳܐ ܠܥܳܠܡܳܐ ܟܽܠܶܗ ܥܽܘ̣ܫܢܳܐ ܕܰܐܠܳܗܽܘ̣ܬܶܗ ܐܰܨܡܰܚ. ܘܰܠܟܽܠܳܗ̇ ܡܶܬܥܰܡܪܳܢܺܝ̣ܬܳܐ ܒܢܽܘܗܪܶܗ ܠܳܐ ܡܶܬܕܰܪܟܳܢܳܐ ܐܰܨܡܰܚ܆ ܘܰܒܢܰܦ̈ܫܳܬܳܐ ܕܡܰܚܒܳܢܰܘ̈ܗ̱ܝ ܠܰܫܪܳܪܶܗ ܐܰܕܢܰܚ܆ ܘܒܰܨܠܺܝ̣ܒܶܗ ܙܰܟܳܝܳܐ ܠܟܽܠܳܗ̇ ܟܳܦܽܘ̣ܪܽܘ̣ܬܳܐ ܕܰܚܛܺܝ̣ܬܳܐ ܬܠܰܚ܆ ܘܠܰܫܪܳܪܳܐ ܕܗܰܝܡܳܢܽܘ̣ܬܳܐ ܕܒܶܗ܆ ܒܐܺܝ̈ܕܰܝ ܬܰܠܡܺܝ̣̈ܕܰܘܗ̱ܝ ܩܰܕܺܝ̣̈ܫܶܐ ܠܟܽܠܳܗ̇ ܒܪܺܝ̣ܬܳܐ ܫܠܰܚ܆ ܒܗܳܕܶܐ ܗܰܝܡܳܢܽܘ̣ܬܳܐ ܫܠܺܝ̣ܚܳܝܬܳܐ ܝܰܬܺܝ̣ܪܳܐܺܝܬ ܢܰܨܝ̣ܚܳܐ ܘܓܰܒܝܳܐ ܡܳܪܝ̱ ܦܠܳܢ ܐܶܬܢܰܨܰܚ܆ ܘܥܰܠ ܗܳܕܶܐ ܩܕܳܡ ܡܰܠܟܶܝ̈ܗ̇ ܕܰܐܪܥܳܐ ܘܥܰܡ̱̈ܡܶܐ ܘܶܐܡܘ̈ܳܬܳܐ ܡ̣ܶܢ ܟܽܠ ܐ̱ܢܳܫ ܐܶܬܩܰܠܰܣ ܘܶܐܫܬܰܒܰܚ܆ ܘܰܕܠܳܐ ܫܶܠܝܳܐ ܠܰܫܪܳܪܳܐ ܕܡܳܪܶܗ ܒܦܽܘ̣ܡܶܗ ܩܕܳܡ ܟܽܠ ܐ̱ܢܳܫ ܐܰܟܪܶܙ ܘܢܰܨܰܚ܆ ܟܰܕ ܗܰܘܢܶܗ ܘܡܰܕܥܶܗ ܠܳܐ ܢܳܚ ܘܰܫܠܺܝ̣ ܡ̣ܶܢ ܗܳܝ̇ ܕܰܢܫܰܒܰܚ܆ ܗܰܒܠܰܢ ܡܳܪܝ̱ ܕܠܰܨܠܺܝ̣ܒܳܟ ܡܰܥܒܶܕ ܚܰܝ̈ܶܐ܆ ܘܰܠܝܳܠܶܕܬܳܟ ܡܒܰܪܰܟܬܳܐ܆ ܘܠܰܪܚܽܘܡܳܟ ܬܠܺܝܬܳܝ ܛܽܘ̣̈ܒܶܐ ܡܳܪܝ̱ ܦܠܳܢ ܒܙܽܘܝ̈ܳܚܶܐ ܪ̈ܽܘ̣ܚܳܢܳܝܶܐ ܢܙܰܝܰܚ܆ ܘܠܰܫܪܳܪܳܐ ܕܗܰܝܡܳܢܽܘ̣ܬܳܐ ܕܒܳܟ ܒܢܰܦܫ̈ܳܬܰܢ ܢܶܕܢܰܚ܆ ܘܒܰܥܒܳܕ̈ܶܐ ܕܙܰܕܺܝ̣ܩܽܘ̣ܬܳܐ ܢܶܫܬܰܪܬܰܚ܆ ܘܰܐܝܟ ܙܰܝܬܳܐ ܡܫܰܒܚܳܐ ܢܶܫܘܰܚ܆ ܘܰܩܕܳܡ ܥܰܡ̱̈ܡܶܐ ܒܰܪ̈ܳܝܶܐ ܕܣܳܢܶܝܢ ܠܰܢ ܢܶܬܢܰܨܰܚ܆ ܠܚܰܫ̈ܶܐ ܡܰܘܒܕ̈ܳܢܶܐ ܕܰܚܛܺܝ̣ܬܳܐ ܕܒܰܢ ܢܩܰܦܰܚ܆ ܘܰܒܕܽܘ̣ܒܳܪ̈ܶܐ ܡܰܠܰܐܟܳܝ̈ܶܐ ܢܨܰܠܰܚ܆ ܘܰܠܚܽܘ̣ܬܚ̈ܳܬܶܐ ܕܳܐܟܶܠܩܰܪܨܳܐ ܒܥܰܡ̈ܠܶܐ ܕܰܡܝܰܬܪܽܘ̣ܬܳܐ ܢܨܰܠܰܚ܆ ܘܰܒܝܰܘܡܳܐ ܗܰܘ ܕܡܶܐܬܺܝ̣ܬܳܟ ܠܐܽܘ̣ܪܥܳܟ ܒܚܰܕܽܘ̣ܬܳܐ ܢܶܣܘܰܚ܆ ܘܥܰܡ ܓܒܰܝ̈ܟ ܒܰܟܠܝ̣̈ܠܰܝ ܫܽܘܒܚܳܐ ܢܶܨܛܰܒܰܬ݂ ܘܢܶܫܬܰܒܰܚ܆ ܘܗܳܪܟܳܐ ܘܬܰܡܳܢ ܠܳܟ ܡܳܪܝ̱ ܘܠܰܐܒܽܘܟ ܘܰܠܪܽܘ̣ܚܳܟ ܩܰܕܺܝܫܳܐ ܢܫܰܒܰܚ܆ ܘܩܳܠܰܝ̈ ܬܰܘܕܺܝ̣ܬܳܐ ܢܕܰܒܰܚ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܶܩܒܳܐ :
ܘܰܒܝܰܘܡܳܐ ܕܗܳܘܶܐ ܕܽܘ̣ܟܪܳܢܳܟ ܢܰܨܺܝܚܳܐ ܡܳܪܝ̱ ܦܠܳܢ ܚܳܕܶܝܢ ܫܡܰܝ̈ܳܐ ܘܰܐܪܥܳܐ܆ ܘܳܐܦ ܟܽܠܡܳܐ ܕܰܒܗܽܘܢ ܐܳܦ ܝܰܠܕܶܝ̈ܗ̇ ܕܥܺܕܰܬ ܩܽܘ̣ܕܫܳܐ ܕܳܝܨܺܝܢ ܘܪܳܘܙܺܝ̣ܢ ܘܡܶܬܦܰܨܚܺܝ̣ܢ ܘܙܳܡܪܺܝ̣ܢ ܫܽܘܒܚܳܐ ܘܬܰܘܕܺܝ̣ܬܳܐ܆ ܟܰܕ ܩܳܥܶܝܢ ܘܳܐܡܪܺܝ̣ܢ܆ ܡܒܰܪܟܳܐ ܐܺܝ̣ܬܰܝܟ ܐܰܠܳܗܳܐ ܕܰܐܒܳܗ̈ܳܬܳܐ ܕܺܝ̣ܠܰܢ܀
ܡܰܙܥܩܳܢܽܘ̣ܬܳܐ
ܦܶܬܓܳܡܳܐ: ܪܶܚܡܶ݀ܬ ܕܢ̣ܶܫܡܰܥ ܡܳܪܝܳܐ ܩܳܠܳܐ ܕܒܳܥܽܘ̣ܬܝ̱ ܘܢܶܨܠܶܐ ܐܶܕ̈ܢܰܘܗ̱ܝ ܠܘܳܬܝ̱ ܒܝܰܘܡܳܐ ܕܶܐܩܪܶܝܘܗ̱ܝ܀
ܡܶܛܽܠ ܟܪ̈ܺܝ̣ܗܶܐ ܘܰܐܠܺܝ̣̈ܨܶܐ܆ ܡܶܛܽܠ ܒܳܝ̈ܫܶܐ ܘܡܶܣ̈ܟܺܢܶܐ܆ ܘܡܶܛܽܠ ܝܰܬܡ̈ܶܐ ܘܰܐܪ̈ܡܠܳܬܳܐ. ܡܶܛܽܠ ܗܳܝ̇ ܕܢܰܫܪܶܐ ܡܳܪܝܳܐ ܫܰܝܢܶܗ ܪܰܒܳܐ ܘܰܫܠܳܡܶܗ ܒܥܰܡܶܗ ܘܥܺܕܬܶܗ ܘܡܰܪܥܺܝ̣ܬܶܗ܆ ܘܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܟܰܕ ܐܳܡܪܺܝ̣ܢܰܢ: ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ ܩܽܘܪܝܶܐܠܰܝܣܳܘܢ܀
ܘܬܳܪܶܨ ܟܽܠܶܗ ܥܰܡܳܐ ܠܡܰܕܢܚܳܐ܆ ܘܰܡܫܰܪܶܐ ܪܺܝ̣ܫ ܟܳܗܢ̈ܶܐ ܒܩܺܝ̣ܢܬܳܐ ܩܰܕܡܳܝܬܳܐ ܟܰܕ ܡܪܺܝܡ ܘܰܡܙܰܝܰܚ ܠܰܨܠܺܝ̣ܒܳܐ ܘܳܐܡܰܪ:
ܦܳܢܶܝܢ ܠܡܰܕܢܚܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝ̣ܫܬ ܐܰܠܳܗܳܐ܀ | ܗܰܘ ܕܡܰܠܰܐܟ̈ܶܐ ܡܫܰܡܫܺܝ̣ܢ ܠܶܗ. |
| ܩܰܕܺܝ̣ܫܬ ܚܰܝܠܬܳܢܳܐ܀ | ܗܰܘ ܕܰܟܪ̈ܘ̣ܒܶܐ ܡܒܰܪܟܺܝ̣ܢ ܠܶܗ. |
| ܩܰܕܺܝ̣ܫܬ ܠܳܐ ܡܳܝܽܘ̣ܬܳܐ ܚܰܛܳܝ̈ܶܐ ܒܰܬܝܳܒܽܘ̣ܬܳܐ ܡܶܬܟܰܫܦܺܝ̣ܢ ܘܳܐܡܪܺܝܢ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀ | ܗܰܘ ܕܰܣܪ̈ܳܦܶܐ ܡܩܰܕܫܺܝ̣ܢ ܠܶܗ. |
ܘܦܳܢܶܝܢ ܠܡܰܥܪܒܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝ̣ܫܬ ܐܰܠܳܗܳܐ܀ | ܗܰܘ ܕܢܽܘ̣ܪ̈ܳܢܶܐ ܡܗܰܠܠܺܝ̣ܢ ܠܶܗ. |
| ܩܰܕܺܝ̣ܫܬ ܚܰܝܠܬܳܢܳܐ܀ | ܗܰܘ ܕܪ̈ܽܘ̣ܚܳܢܶܐ ܡܗܰܕܪܺܝ̣ܢ ܠܶܗ. |
| ܩܰܕܺܝ̣ܫܬ ܠܳܐ ܡܳܝܽܘ̣ܬܳܐ ܚܰܛܳܝ̈ܶܐ ܒܰܬܝܳܒܽܘ̣ܬܳܐ ܡܶܬܟܰܫܦܺܝ̣ܢ ܘܳܐܡܪܺܝܢ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀ | ܗܰܘ ܕܥܰܦܪ̈ܳܢܶܐ ܣܳܓܕܺܝ̣ܢ ܠܶܗ. |
ܘܦܳܢܶܝܢ ܠܓܰܪܒܝܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝ̣ܫܬ ܐܰܠܳܗܳܐ܀ | ܗܰܘ ܕܥܶܠܳܝ̈ܶܐ ܡܪܰܡܪܡܺܝܢ ܠܶܗ. |
| ܩܰܕܺܝ̣ܫܬ ܚܰܝܠܬܳܢܳܐ܀ | ܗܰܘ ܕܡܶܨܥܳܝ̈ܶܐ ܡܩܰܠܣܺܝ̣ܢ ܠܶܗ. |
| ܩܰܕܺܝ̣ܫܬ ܠܳܐ ܡܳܝܽܘ̣ܬܳܐ ܚܰܛܳܝ̈ܶܐ ܒܰܬܝܳܒܽܘ̣ܬܳܐ ܡܶܬܟܰܫܦܺܝ̣ܢ ܘܳܐܡܪܺܝܢ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀ | ܗܰܘ ܕܬܰܚܬܳܝ̈ܶܐ ܡܙܰܝܚܺܝ̣ܢ ܠܶܗ. |
ܘܦܳܢܶܝܢ ܠܬܰܝܡܢܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܡܳܪܰܢ ܚܽܘ̣ܣ ܘܪܰܚܶܡܥܠܰܝܢ܀ | ܡܳܪܰܢ ܐܶܬܪܰܚܰܡܥܠܰܝܢ. |
| ܫܽܘܒܚܳܐ ܠܳܟ ܐܰܠܳܗܳܐ܀ | ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬܰܢ ܘܶܐܬܪܚܰܡܥܠܰܝܢ. |
| ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ܆ ܒܰܪܶܟܡܳܪܝ̱܀ | ܫܽܘܒܚܳܐ ܠܳܟ ܒܳܪܽܘ̣ܝܳܐ. |
ܟܳܗܢܳܐ: ܐܰܒܽܘܢ ܕܒܰܫܡܰܝܳܐ.
ܥܰܡܳܐ: ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܘܟܶܢ ܚܳܬܶܡ ܪ̈ܺܝܫܟܳܗܢܶܐ ܠܥܰܡܳܐ ܒܰܨܠܺܝܒܳܐ ܘܩܳܪܒܺܝ̣ܢ ܟܳܗ̈ܢܶܐ ܘܰܡܫܰܡ̈ܫܳܢܶܐ ܘܰܡܗܰܝܡ̈ܢܶܐ ܘܝܳܗܒܺܝ̣ܢ ܫܠܳܡܳܐ ܘܡܶܬܒܰܪܟܺܝ̣ܢ ܡ̣ܶܢ ܨܠܺܝܒܳܐ ܘܡ̣ܶܢ ܐܶܘܰܢܓܶܠܝܽܘܢ ܩܰܕܺܝܫܳܐ܀
ܫܠܶܡ ܛܶܟܣܳܐ ܕܕܽܘ̣ܟܪܳܢܶܗ ܕܩܰܕܺܝܫܶܐ ܘܚܰܕ ܩܢܽܘܡܳܐ܀