ܛܟܣܐ ܕܡܥܠܬܗ ܕܡܪܢ ܠܗܝܟܠܐ
ܩܰܕܡܳܝܰܬ݂
ܒܰܙܒܰܢ ܨܠܽܘ̣ܬܳܐ ܕܪܰܡܫܳܐ ܕܢܳܓܰܗ ܥܺܐܕܳܐ ܡܶܬܬܣܺܝ̣ܡܺܝ̣ܢ ܩܶܪ̈ܝܽܘ̣ܢܶܐ ܠܥܶܠ ܡ̣ܶܢ ܟܽܘ̣ܪܣܝܳܐ ܕܰܡܟܰܣܰܝ ܒܫܽܘ̣ܫܶܦܳܐ ܩܕܳܡ ܐܶܘܰܢܓܶܠܝܽܘܢ. ܘܟܰܕ ܡܫܰܠܡܺܝܢ ܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ ܕܡܶܬܰܐܡܪܳܐ ܒܚܽܘ̣ܬܳܡܳܐ ܕܰܨܠܽܘ̣ܬܳܐ ܕܪܰܡܫܳܐ܆ ܪܺܝ̣ܫ ܟܳܗ̈ܢܶܐ ܘܟܳܗ̈ܢܶܐ ܢܩܽܘ̣ܡܽܘ̇ܢ ܚܕܳܪ̈ܰܝ ܟܽܘ̣ܪܣܝܳܐ܆ ܘܰܢܫܰܪܶܐ ܪ̈ܺܝ̣ܫܟܳܗܢܶܐ ܒܰܨܠܽܘ̣ܬܳܐ ܗܳܕܶܐ. ܘܰܒܚܽܘ̣ܬܳܡܳܐ ܢܙܰܡܪܽܘ̇ܢ ܬܶܫܡܶܫܬܳܐ ܕܡܳܪܝ̱ ܫܶܡܥܽܘܢ ܣܳܒܳܐ. ܘܡܶܫܬܪܶܐ ܟܢܽܘ̣ܫܝܳܐ ܒܒܽܘ̣ܪܟܬܳܐ. ܐܶܢ ܕܶܝܢ ܪ̈ܺܝ̣ܫܟܳܗܢܶܐ ܠܳܐ ܡܛܰܝ̣ܰܒ܆ ܟܳܗܢܳܐ ܡܒܰܪܶܟ ܠܩܶܪ̈ܝܽܘܢܶܐ ܚܠܳܦܰܘܗ̱ܝ܀ ܘܐܶܢ ܢܶܥܒܕܽܘ̇ܢ ܟܪܽܘ̣ܟܝܳܐ ܒܥܺܕܬܳܐ܆ ܪ̈ܺܝ̣ܫܟܳܗܢܶܐ ܛܳܥܶܢ ܨܠܺܝܒܳܐ ܥܰܠ ܕܪ̈ܳܥܰܘܗ̱ܝ ܐܰܝܟ ܫܶܡܥܽܘܢ ܣܳܒܳܐ. ܘܰܡܫܰܡ̈ܫܳܢܶܐ ܐܳܡܪܺܝܢ ܒ̈ܳܬܶܐ ܗܳܠܶܝܢ܀
ܩܠܐ: ܒܩ̄ ܡܫܺܝ̣ܚܳܐ ܢܰܛܰܪܶܝܗ̇ ܠܥܺܕܬܳܟ
ܥܰܠ ܕܪ̈ܳܥܰܘܗ̱ܝ ܛܰܥܢܶܗ ܫܶܡܥܽܘܢ܆ ܠܒܰܪ ܐܰܠܳܗܳܐ ܕܶܐܬܓܰܫܰܡ. ܒܗܰܝܟܰܠ ܩܽܘ̣ܕܫܳܐ ܟܰܕ ܩܰܪܶܒܘ̱܆ ܡܰܪܝܰܡ ܘܝܰܘܣܶܦ ܩܽܘ̣ܪ̈ܒܳܢܶܐ. ܘܰܡܦܺܝ̣ܣ ܗ̱ܘܳܐ ܠܶܗ ܟܰܕ ܐܳܡܰܪ܆ ܕܗܳܐ ܚܙܰܝ̈ ܥܰܝ̈ܢܰܝ ܠܰܚܢܳܢܳܟ ܪܰܒܳܐ܆ ܐܺܙܰܠ ܐܶܬܬܢܺܝ̣ܚ ܒܶܝܬ ܡܺܝ̈ܬܶܐ܆ ܥܰܕ ܐܳܬܶܐ ܝܽܘ̣ܡ ܢܽܘ̣ܚܳܡܳܐ܆ ܘܶܐܓ݉ܠܶܐ ܣܬܺܝܪ̈ܳܬܳܐ܆ ܕܶܐܬܡ̈ܰܠܰܠܝ̱ ܗ̱ܘܰܝ̈ ܡ̣ܶܢ ܪܽܘܚܳܐ. ܥܰܠ ܝܰܠܕܳܐ ܕܠܳܐ ܙܽܘ̣ܘܳܓܳܐ ܕܰܕܢܰܚ ܒܰܐܪܥܳܐ܆ ܕܢܶܦܪܽܘ̣ܩ ܠܳܐܕܳܡ ܘܰܠܝܰܠܕ̈ܰܘܗ̱ܝ܀
ܛܽܘ̣ܒܰܝܟ ܫܶܡܥܽܘܢ ܕܶܐܬܥܰܠܺܝ̣ܬ܆ ܘܰܠܒܰܪ ܐܰܠܳܗܳܐ ܙܰܝܰܚ̣ܬ܆ ܗܰܘ ܕܰܒܪܺܝ̣ܫܺܝ̣ܬ݂ ܐܺܝ̣ܬܰܘܗ̱ܝ ܗ̱ܘܳܐ܆ ܕܠܳܐ ܫܽܘ̣ܪܳܝܳܐ ܥܰܡ ܐܰܒܽܘ̣ܗ̱ܝ܆ ܘܰܚ̈ܙܰܝ ܥܰܝ̈ܢܰܝܟ ܦܰܪܨܽܘܦܶܗ܆ ܕܗܰܘ ܕܰܣܪ̈ܳܦܶܐ ܡܚܰܦܶܝܢ ܡ̣ܶܢ ܙܺܝܘܶܗ܆ ܘܥܰܠ ܕܪ̈ܳܥܰܝܟ ܡܶܙܕܰܝܰܚ ܗ̱ܘܳܐ܆ ܗܰܘ ܕܰܫܡܰܝܳܐ ܡܠܶܝܢ ܡܶܢܶܗ܆ ܫܽܘ݉ܒܚܳܐ ܠܡܽܘ̣ܟܳܟܶܗ. ܕܶܐܬܬܰܚܬܺܝ ܘܰܗܘܳܐ ܐ̱ܢܳܫܳܐ܆ ܘܰܠܟܳܗܢܳܐ ܡܶܬܩܰܪܰܒ ܗ̱ܘܳܐ ܠܰܘ ܕܰܣܢܺܝ̣ܩ ܗ̱ܘܳܐ܆ ܐܶܠܐ ܢܫܰܡܠܶܐ ܢܳܡܽܘ̣ܣܳܐ܀
ܚܙܳܝܗ̱ܝ ܫܶܡܥܽܘܢ ܠܒܰܪ ܐܰܠܳܗܳܐ܆ ܘܰܒܚܰܕܽܘ̣ܬܳܐ ܠܩܽܘ̣ܒܠܶܗ ܕܳܨ܆ ܕܰܠܡܰܘܠܳܕܶܗ ܡܣܰܟܶܐ ܗ̱ܘܳܐ܆ ܕܡܳܐ ܕܰܕܢܰܚ ܡܰܘܬܳܐ ܢܶܛܥܰܡ܆ ܠܗܰܘ ܕܰܫܪܳܝܗ̱ܝ ܗ̱ܘܳܐ ܡ̣ܶܢ ܚܰܝ̈ܶܐ܆ ܒܦܰܣܰܬ݂ ܐܺܝ̣ܕܶܗ ܙܰܝܰܚ ܘܛܰܥܢܶܗ܆ ܘܰܐܦܺܝ̣ܣܶܗ ܗ̱ܘܳܐ ܟܰܕ ܐܳܡܰܪ܆ ܕܰܫܪܺܝ̣ܢܝ̱ ܡ̣ܶܢ ܚܰܝ̈ܶܐ ܕܙܰܒܢܳܐ܆ ܫܽܘ݉ܒܚܳܐ ܠܗܰܘ ܟܰܣܝܳܐ܆ ܕܶܐܬܬܰܚܬܺܝ ܘܰܗ̣ܘܳܐ ܓܰܠܝܳܐ. ܡܶܛܽܠ ܦܽܘ̣ܪܩܳܢܶܗ ܕܳܐܕܳܡ܆ ܕܰܢܚܰܪܰܪ ܠܰܢ ܡ̣ܶܢ ܫܽܘ̣ܥܒܳܕܳܐ ܕܰܚܛܺܝ̣ܬܳܐ܀
ܟܰܕ ܡܳܛܶܝܢ ܠܰܩܕܳܡ ܡܰܕܒܚܳܐ ܪܺܝ̣ܫ ܟܳܗ̈ܢܶܐ ܡܫܰܪܶܐ ܘܳܐܡܰܪ:
ܨܠܽܘ̣ܬܳܐ ܕܫܽܘ̣ܪܳܝܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܠܛܰܝܒܘ̈ܳܬܳܐ ܘܒܽܘ̣ܪ̈ܟܳܬܳܐ ܡܫܰܡܠܝ̈ܳܬܳܐ܆ ܘܩܰܕܶܫ ܠܚܽܘ̣̈ܫܳܒܰܝܢ ܘܰܠܪ̈ܶܥܝܳܢܰܝܢ ܘܰܠܟܽܠܗܽܘܢ ܙܰܘܥܰܝ̈ܢ܆ ܐܰܝܟܰܢܳܐ ܕܰܢܩܰܒܠܳܟ ܒܗܳܢܳܐ ܝܰܘܡܳܐ ܕܡܰܥܰܠܬܳܟ ܕܰܠܗܰܝܟܠܳܐ܆ ܐܰܝܟ ܫܶܡܥܽܘܢ ܣܳܒܳܐ ܘܙܰܕܺܝ̣ܩܳܐ ܕܩܰܒ̣ܠܳܟ ܥܰܠ ܕܪ̈ܳܥܰܘܗ̱ܝ ܩܰܕܺܝ̣̈ܫܶܐ܆ ܘܰܒܩܶܪ̈ܝܽܘܢܶܐ ܕܫܽܘܒܚܳܐ ܘܬܶܫܒܽܘܚܬܳܐ܆ ܢܝܰܒܶܒ ܠܘܳܬܳܟ ܟܰܕ ܐܳܡܪܺܝ̣ܢܰܢ܆ ܡܶܟܺܝ̣ܠ ܫܪܺܝ̣ ܠܥܰܒܕܰܝ̈ܟ ܒܰܫܠܳܡܳܐ ܘܚܰܪܰܪ ܠܰܢ ܡ̣ܶܢ ܐܰܣܽܘ̣ܪܝܳܐ ܕܰܚܛܳܗܰܝ̈ܢ܆ ܕܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝ̣ܬܳܐ܆ ܗܳܫܳܐ ܘܒܟܽܠܙܒܰܢ ܠܥܳܠܡܺܝܢ܀
ܥܰܡܳܐ: ܐܰܡܺܝܢ܀
ܟܳܗܢܳܐ: ܡܶܢܳܟ ܫܳܐܠܺܝ̣ܢܰܢ ܐܳܘ ܡܶܠܬܳܐ ܐܰܠܳܗܳܐ ܪܰܒܳܐ܆ ܕܰܗ̣ܘܰܝܬ ܒܰܪܢܳܫܳܐ ܐܰܝܟܰܢܳܐ ܕܬܶܦܪܽܘ̣ܩ ܠܓܶܢܣܰܢ ܐ̱ܢܳܫܳܝܳܐ܆ ܐܳܘ ܥܶܠܳܝܳܐ ܗܰܘ ܕܡܶܫܬܰܒܰܚ ܐܰܢ̱ܬ ܡ̣ܶܢ ܡܰܠܰܐܟ̈ܶܐ ܢܽܘ̣ܪ̈ܳܢܶܐ. ܘܰܡܩܰܕܫܺܝ̣ܢ ܠܳܟ ܛܶܟ̈ܣܶܐ ܕܰܟܪ̈ܽܘ̣ܒܶܐ ܘܕܰܣܪ̈ܳܦܶܐ܆ ܐܳܘ ܕܰܒܡܰܚܰܬܬܳܟ ܠܰܐܪܥܳܐ ܫܰܡܠܺܝ̣ܬ ܠܕܽܘ̣ܒܳܪ̈ܶܐ ܐ̱ܢܳܫܳܝ̈ܶܐ܆ ܘܰܒܗܳܢܳܐ ܝܰܘܡܳܐ ܫܒܺܝܚܳܐ ܣܠܶܩ̣ܬ ܠܗܰܝܟܠܳܐ ܘܫܰܡܠܺܝ̣ܬ ܠܦܽܘ̣ܩܕܳܢܳܐ ܢܳܡܘܣܳܝܳܐ ܘܶܐܙܕܰܝܰܚ̣ܬ ܥܰܠ ܕܪ̈ܳܥܰܘܗ̱ܝ ܕܫܶܡܥܽܘܢ ܣܳܒܳܐ܆ ܐܰܢ̱ܬ ܕܡܶܙܕܰܝܰܚ ܐܰܢ̱ܬ ܥܰܠ ܓܶܦ̈ܶܐ ܕܰܟܪ̈ܽܘ̣ܒܶܐ܆ ܘܰܐܙܠܶܓ ܢܽܘ̣ܗܪܳܟ ܥܰܠ ܟܽܠܳܗ̇ ܒܪܺܝ̣ܬܳܐ܆ ܟܰܕ ܫܡܰܝ̈ܳܐ ܘܰܐܪܥܳܐ ܡܠܶܝܢ ܡ̣ܶܢ ܢܽܘ̣ܗܪܳܟ܆ ܗܳܫܳܐ ܒܳܥܶܝܢܰܢ ܡܶܢܳܟ ܐܳܘ ܡܳܪܝܳܐ܆ ܗܰܘ ܕܰܣܥ̣ܰܪܬ ܠܗܳܠܶܝܢ ܕܽܘ̣ܒܳܪ̈ܶܐ ܐܰܠܳܗܳܝ̈ܶܐ܆ ܒܰـܪܶܟ ♱ ܒܝܰܡܝ̣ܢܳܟ ܠܗܳܠܶܝܢ ܩܶܪ̈ܝܽܘ̣ܢܶܐ ܕܰܩܕܳܡܰܝܢ ܣܺܝ̣ܡܺܝܢ܆ ܕܢܶܗܘܽܘܢ ܒܽܘ̣ܪܟܬܳܐ ܠܰܐܝܠܶܝܢ ܕܢܳܣܒܺܝ̣ܢ ܐܶܢܽܘ̇ܢ܆ ܘܰܠܝܽܘ̣ܬܪܳܢܳܐ ܕܳܐܚܽܘ̣ܕܰܝ̈ܗܽܘ̇ܢ ܒܙܰܒ̈ܢܶܐ ܩܫܰܝ̈ܳܐ܆ ܘܢܶܗܘܽܘܢ ܩܶܪ̈ܝܽܘܢܶܐ ܕܩܰܕܺܝ̣ܫܽܘ̣ܬܳܐ܆ ܘܣܺܝ̣ܡܬܳܐ ܕܕܽܘ̣ܟܳܝܳܐ܆ ܘܫܽܘ̣ܪܳܪܳܐ ܕܗܰܝܡܳܢܽܘ̣ܬܳܐ܆ ܘܰܥܒ̈ܳܕܶܐ ܛܳܒ̈ܶܐ܆ ܘܪܽܘ̣ܡܪܳܡܳܐ ܕܥܺܕ̈ܳܬܳܐ܆ ܘܺܐܝ̣ܩܳܪܳܐ ܕܕܰܝܪ̈ܳܬܳܐ܆ ܘܒܽܘ̣ܪܟܬܳܐ ܠܒ̈ܳܬܶܐ ܕܰܡܫܺܝ̣̈ܚܳܝܶܐ܆ ܘܠܳܟ ܫܽܘܒܚܳܐ ܘܬܰܘܕܺܝ̣ܬܳܐ ܡܰܣܩܺܝ̣ܢܰܢ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܥܰܡܳܐ: ܐܰܡܺܝܢ܀
ܨܠܽܘ̣ܬܳܐ ܐ̱ܚܪܺܬܳܐ
ܡܳܪܝܳܐ ܐܰܠܳܗܳܐ ܡܳܪܳܐ ܕܚܰܝ̈ܠܰܘܳܬܳܐ ܫܡܰܝ̈ܳܢܶܐ܆ ܗܰܘ ܕܡܶܫܬܰܒܰܚ ܘܡܶܬܩܰܠܰܣ ܘܡܶܬܪܰܡܪܰܡ ܡ̣ܶܢ ܒܪ̈ܰܝܳܐ ܡܶܬܚܰܙ̈ܝܳܢܶܐ ܘܠܳܐ ܡܶܬܚܰܙܝܳܢ̈ܶܐ܆ ܗܰܘ ܕܒܰܫܦܺܝ̣ܥܽܘ̣ܬ݂ ܪ̈ܰܚܡܰܘܗ̱ܝ ܡܬܽܘ̣̈ܡܳܝܶܐ ܢܚ̣ܶܬ݂ ܡ̣ܶܢ ܫܡܰܝ̈ܳܐ ܥܶܠܳܝ̈ܶܐ ܒܨܶܒܝܳܢܶܗ ܘܰܗ̣ܘܳܐ ܒܰܪܢܳܫܳܐ ܒܰܕܡܽܘ̣ܬ݂ܰܢ ܕܢܶܦܪܽܘ̣ܩ ܠܰܢ ܡ̣ܶܢ ܚܛܺܝ̣ܬܳܐ ܫܶܪܫܳܢܳܝܬܳܐ܆ ܘܰܢܕܰܟܶܐ ܠܰܢ ܡ̣ܶܢ ܟܽܠ ܨܳܐܽܘ̣ܬܳܐ ܕܟܽܘ̣̈ܬܡܳܬܰܢ܆ ܐܳܘ ܕܰܒܗܳܢܳܐ ܝܰܘܡܳܐ ܥܰܠ̣ܬ ܠܗܰܝܟܠܳܐ ܐܰܝܟ ܥܝܳܕܳܐ ܕܥܶܒܪ̈ܳܝܶܐ܆ ܘܩܰܪܶܒ̣ܬ ܩܽܘ̣ܪ̈ܒܳܢܶܐ ܢܳܡܽܘ̣̈ܣܳܝܶܐ ܡܶܛܽܠ ܕܽܘ̣ܟܳܝܳܐ ܕܰܟܝܳܢܳܐ ܕܺܝ̣ܠܰܢ ܐ̱ܢܳܫܳܝܳܐ ܕܰܒܝܰܕ ܙܰܘܓܳܐ ܕܫܽܘ̣ܦܢܺܝ̈ܢܶܐ ܥܰܡ ܬܪܶܝܢ ܦܰܪ̈ܽܘ̣ܓܶܐ ܕܝܰܘ̈ܢܶܐ܆ ܘܰܒܗܳܕܶܐ ܚܰܘܺܝ̣ܬ ܕܰܐܢ̱ܬ ܗ̱ܘܽ ܡܳܪܳܐ ܕܬܰܪܬܶܝܢ ܕܺܝܰܬܺܝܩ̈ܰܐܣ ܕܥܰܬܺܝ̣ܩܬܳܐ ܘܕܰܚ̇ܕܰܬܳܐ܆ ܘܩܰܒ̣ܠܳܟ ܫܶܡܥܽܘܢ ܣܳܒܳܐ ܥܰܠ ܕܪ̈ܳܥܰܘܗ̱ܝ ܟܰܕ ܛܥܺܝ̣ܢ ܒܺܐܝ̣̈ܕܰܘܗ̱ܝ ܬܪܶܝܢ ܩܶܪ̈ܝܽܘܢܶܐ ܕܡܰܢܗܪܺܝܢ܆ ܥܰܠ ܗܳܕܶܐ ܥܺܕܬܳܐ ܩܰܕܺܝ̣ܫܬܳܐ ܢܳܛܪܳܐ ܠܗܳܢܳܐ ܥܝܳܕܳܐ ܡܝܰܬܪܳܐ ܟܰܕ ܡܒܰܪܟܳܐ ܠܩܶܪ̈ܝܽܘ̣ܢܶܐ ܘܝܳܗܒܳܐ ܠܰܒܢܶܝ̈ܗ̇ ܐܰܝܟܰܢܳܐ ܕܰܒܝܰܕܗܽܘ̇ܢ ܢܶܣܒܽܘܢ ܒܽܘ̣ܪܟܬܳܐ ܫܡܰܝܳܢܺܝ̣ܬܳܐ܆ ܘܗܳܫܳܐ ܒܳܥܶܝܢܰܢ ܡܶܢܳܟ ܐܳܘ ܡܳܪܝܳܐ ܐܰܠܳܗܳܐ ܘܡܶܢܳܟ ܡܦܺܝ̣ܣܺܝ̣ܢܰܢ ܕܬܶܫܪܶܐ ܒܽܘ̣ܪ̈ܟܳܬܳܟ ܥܰܠ ܗܳܠܶܝܢ ܩܶܪ̈ܝܽܘܢܶܐ ܕܰܩܕܳܡܰܝܢ ܣܺܝ̣ܡܺܝܢ܆ ܥܒܶܕ ܐܶܢܽܘ̇ܢ ܣܺܝܡܬܳܐ ܕܛܳܒ̈ܳܬܳܐ ܘܰܕܒܽܘ̣ܪ̈ܟܳܬܳܐ ܠܟܽܠܗܽܘܢ ܐܰܝܠܶܝܢ ܕܢܳܣܒܺܝ̣ܢ ܡܶܢܗܽܘ̇ܢ܆ ܢܶܗܘܽܘ̇ܢ ܛܳܪ̈ܽܘ̣ܕܶܐ ܕܫܺܐܕ̈ܶܐ ܘܰܕܒܺܝ̣̈ܫܶܐ. ܘܰܡܒܰܛܠܳܢ̈ܶܐ ܕܥܰܣ̈ܩܳܬܳܐ ܘܽܐܘ̣ܠܨ̈ܳܢܶܐ ܘܰܕܟܽܠܗܽܘܢ ܢܶܣܝܽܘ̈ܢܶܐ܆ ܘܰܐܫܘܳܐ ܠܰܢ ܕܒܰܢܣܺܝ̣ܒܽܘܬܗܽܘ̇ܢ ܢܶܫܟܰܚ ܪ̈ܰܚܡܶܐ ܘܰܚܢܳܢܳܐ ܘܫܽܘܒܩܳܢܳܐ ܕܚܰܘ̈ܒܰܝܢ܆ ܘܰܠܚܳܝܳܐ ܕܰܚܛܳܗܰܝ̈ܢ ܣܰܓܺܝ̈ܶܐܐ܆ ܘܢܰܣܶܩ ܠܳܟ ܫܽܘܒܚܳܐ܆ ܗܳܫܳܐ ܘܒܟܽܠܙܒܰܢ ܠܥܳܠܡܺܝܢ܀
ܥܰܡܳܐ: ܐܰܡܺܝܢ܀
ܟܳܗܢܳܐ ܟܰܕ ܦܫܺܝ̣̈ܛܳܢ ܐܺܝ̣ܕܰܘ̈ܗ̱ܝ
ܐܰܠܳܗܳܐ ܒܳܪܽܘ̣ܝܳܐ ܕܥܳܠܡ̈ܶܐ ܘܡܶܫܟܚܳܢܳܐ ܕܟܽܠ ܕܰܒܗܽܘܢ ܘܒܳܪܽܘ̣ܝܳܐ ܕܟܽܠ ܡܶܕܶܡ ܒܦܽܘܩܕܳܢܶܗ܆ ܘܰܡܬܰܩܢܳܢܳܐ ܕܟܽܠ ܒܶܪ̈ܝܳܢ ܕܡܶܬܚܰܙ̈ܝܳܢ ܘܰܕܠܳܐ ܡܶܬܚܰܙ̈ܝܳܢ܆ ܗܳܫܳܐ ܒܳܥܶܝܢܰܢ ܡܶܢܳܟ ܡܳܪܝܳܐ ܕܰܬܒܰܪܶܟ ܠܗܳܠܶܝܢ ܩܶܪ̈ܝܽܘܢܶܐ ܒܚܰܝܠܳܐ ܕܪܽܘܚܳܐ ܕܺܝܠܳܟ ܩܰܕܺܝܫܳܐ܆ ܐܰܓܶܢ ܒܗܽܘܢ ܛܰܝܒܽܘ̣ܬܳܐ ܘܚܰܝܠܳܐ ܕܠܽܘܩܒܰܠ ܗܰܦܟܳܝ̈ܳܬܳܐ܆ ܗܰܒ ܠܗܽܘܢ ܠܰܐܝܠܶܝܢ ܕܢܳܣܒܺܝ̣ܢ ܡܶܢܗܽܘ̇ܢ ܒܰܫܪܳܪܳܐ ܘܰܒܙܰܕܺܝ̣ܩܽܘ̣ܬܳܐ ܨ ܒܽܘ̣ܪܟܬܳܐ ܠܝ ܩܰܕܺܝ̣ܫܽܘ̣ܬܐܳ ܒ ܚܰܝܠܳܐ ܐ ܥܽܘ̣ܕܪܳܢܳܐ܆ ܨ ܠܽܘ̣ܒܳܒܳܐ ܠܝ ܚܽܘ̣ܠܡܳܢܳܐ ܒ ܐܳܣܝܽܘ̣ܬܳܐ ܐ ܢܦܺܐܫܳܐ ܨ ܚܽܘ̣ܪܳܪܳܐ ܠܝ ܫܪܳܝܳܐ ܒ ܕܰܟܝܽܘ̣ܬܳܐ ܐ ܩܽܘ̣ܝܳܡܳܐ ܕܠܽܘ̣ܩܒܰܠ ܢܶܣܝܽܘ̣̈ܢܶܐ ܘܢܽܘ̣ܛܳܪܳܐ ܓܡܺܝ̣ܪܳܐ ܠܦܽܘ̣̈ܩܕܳܢܰܝܟ ܐܰܠܳܗܳܝ̈ܶܐ܆ ܘܢܳܣܘ̣ܒܽܘ̣ܬ ܚܰܕܽܘ̣ܬܳܐ ܕܠܳܐ ܥܳܒܪܳܐ܆ ܝܳܪ̈ܽܘ̣ܬܶܐ ܕܛܽܘ̣̈ܒܶܐ ܡܫܰܡܠܰܝ̈ܳܐ܆ ܡܶܛܽܠ ܕܰܐܢ̱ܬ ܐܺܝ̣ܬܰܝܟ ܥܳܕܽܘ̣ܪܳܐ ܕܚܰܝ̈ܶܐ܆ ܘܡܰܒܽܘ̣ܥܳܐ ܕܒܽܘ̈ܣܳܡܶܐ ܫܦܺܝ̣̈ܥܶܐ܆ ܘܠܳܟ ܝܳܐܶܐ ܫܽܘܒܚܳܐ ܘܺܐܝܩܳܪܳܐ܆ ܗܳܫܳܐ ܘܒܟܽܠܙܒܰܢ ܠܥܳܠܡܺܝܢ܀
ܥܰܡܳܐ: ܐܰܡܺܝܢ܀
ܟܳܗܢܳܐ ܟܰܕ ܦܫܺܝ̣̈ܛܳܢ ܐܺܝ̣ܕܰܘ̈ܗ̱ܝ
ܣܶܓܕܬܳܐ ܡܩܰܪܒܺܝ̣ܢܰܢ ܠܳܟ ܡܳܪܝܳܐ ܫܒܺܝܚܳܐ ܕܰܓܢܺܝ̣ܙ ܡ̣ܶܢ ܚܙܳܬܳܐ ܕܟܽܠ ܚܰܙܳܝ̈ܶܐ܆ ܗܰܘ ܕܶܐܬܚܙܺܝ̣ܬ ܦܰܓܪܳܢܳܐܺܝܬ ܡ̣ܶܢ ܒܬܽܘܠܬܳܐ ܩܰܕܺܝ̣ܫܬܳܐ ܡܰܪܝܰܡ ܒܚܰܪܰܬ ܙܰܒ̈ܢܶܐ ܘܰܫܢܰܝ̈ܳܐ܆ ܐܰܢ̱ܬ ܗ̱ܘܽ ܕܰܒܝܰܘܡܳܐ ܗܳܢܳܐ ܥܰܠ̣ܬ ܠܗܰܝܟܠܳܐ ܘܶܐܙܕܰܝܰܚ̣ܬ ܥܰܠ ܕܪ̈ܳܥܰܘܗ̱ܝ ܕܫܶܡܥܽܘܢ ܣܳܒܳܐ ܥܰܬܺܝ̣ܩ ܝܰܘ̈ܡܳܬܳܐ ܗܰܘ ܕܰܐܦܺܝ̣ܣ ܠܳܟ ܟܰܕ ܐܳܡܰܪ: ܕܰܫܪܺܝ̣ܢܝ̱ ܡܶܟܺܝ̣ܠ ܒܰܫܠܳܡܳܐ ܕܗܳܐ ܚܙܰܝ̈ ܥܰܝ̈ܢܰܝ ܠܦܽܘ̣ܪܩܳܢܳܟ. ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܚܽܘ̣ܪ ܒܰܢ ܒܥܰܝܢܳܐ ܕܰܡܪܰܚܡܳܢܽܘ̣ܬܳܐ܆ ܩܰܒܶܠ ܨܠܽܘ̣ܬܰܢ ܘܒܳܥܽܘ̣ܬܰܢ ܗܳܫܳܐ ܘܰܐܡܺܝ̣ܢܳܐܺܝܬ܆ ܫܰܕܰܪ ܒܽܘ̣ܪ̈ܟܳܬܳܟ ܘܒܰܪܶܟ ܠܩܶܪ̈ܝܽܘܢܶܐ ܗܳܠܶܝܢ܆ ܨ ܣܺܝ̣ܡ ܒܗܽܘܢ ܛܰܝܒܽܘ̣ܬܳܐ ܫܦܺܝ̣ܥܬܳܐ ܠܝ ܥܒܶܕ ܐܶܢܽܘܢ ܡܰܒܽܘܥܳܐ ܕܩܰܕܺܝ̣ܫܽܘ̣ܬܳܐ ܒ ܘܕܰܟܝܽܘ̣ܬܳܐ ܐ ܠܳܐܣܝܽܘܬܳܐ ܕܟܺܐܒ̈ܶܐ ܘܟܽܘ̣ܪ̈ܗܳܢܶܐ܆ ܨ ܠܚܽܘ̣ܠܡܳܢܳܐ ܕܢܰܦ̈ܫܳܬܳܐ ܘܰܕܦܰܓܪ̈ܶܐ܆ ܠܝ ܠܰܐܒܕܳܢܳܐ ܕܫܺܐܕ̈ܶܐ ܘܪ̈ܽܘ̣ܚܶܐ ܒܺܝ̣̈ܫܳܬܳܐ ܒ ܠܛܽܘ̣ܠܳܩܳܐ ܕܟܽܠܗܽܘܢ ܫܺܐܕ̈ܶܐ ܐ . ܠܕܽܘܟܳܝ ܚܰܫ̈ܶܐ ܕܰܚܛܺܝ̣ܬܳܐ ܨ ܠܩܽܘܕܳܫ ܒ̈ܳܬܶܐ ܕܰܡܫܺܝ̣̈ܚܳܝܶܐ ܠܝ ܠܢܽܘ̣ܛܳܪܳܐ ܕܡ̣ܶܢ ܣܽܘܓܦܳܢ̈ܶܐ ܒ ܠܰܦܫܺܝ̣ܩܽܘܬ ܝ̣ܺܠܺܝ̣ܕܽܘܬܳܐ ܕܝܳܠܕ̈ܳܢ ܐ. ܠܰܢܦܺܐܫܳܐ ܕܰܐܝܠܶܝܢ ܕܰܐܠܺܝ̣ܨܺܝ̣ܢ܆ ܐܰܝܟܰܢܳܐ ܕܰܒܗܽܘܢ ܢܶܬܢܰܗܰܪ ܘܰܒܗܽܘܢ ܢܶܣܰܒ ܡܰܘܗ̈ܒܳܬܳܐ ܐܰܠܳܗܳܝ̈ܳܬܳܐ ܘܫܽܘ̣̈ܟܳܢܶܐ ܫܡܰܝ̈ܳܢܶܐ܆ ܘܢܶܣܓܽܘܕ ܘܰܢܫܰܒܰܚ ܠܰܫܡܳܟ ܡܝܰܩܰܪ ܒܟܽܠ ܘܰܡܒܰܪܟܳܐ܆ ܘܥܰܡ ܐܰܒܽܘܟ ܘܪܽܘ̣ܚܳܟ ܩܰܕܺܝܫܳܐ܆ ܗܳܫܳܐ ܘܒܟܽܠܙܒܰܢ ܠܥܳܠܡܺܝܢ܀
ܥܰܡܳܐ: ܐܰܡܺܝܢ܀
ܘܟܶܢ ܪܳܫܶܡ ܠܩܶܪ̈ܝܽܘ̣ܢܶܐ ܘܳܐܡܰܪ:
ܢܶܬܒܰܪܟܽܘܢ ܘܢܶܬܕܰܟܽܘܢ ܫܥܽܘ̈ܬܶܐ ܘܩܶܪ̈ܝܽܘܢܶܐ ܗܳܠܶܝܢ ܕܰܩܕܳܡܰܝܢ ܣܺܝ̣ܡܺܝ̣ܢ܆ ܒܰܫܡܳܐ ܕܰܐܒܳܐ ♱܆ ܐܰܡܺܝܢ. ܘܕܰܒـܪܳܐ ♱܆ ܐܰܡܺܝܢ. ܘܰܕܪܽܘܚܳـܐ ♱ ܚܰܝܳܐ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܡ ܥܳܠܡܺܝܢ܀
ܥܰܡܳܐ: ܐܰܡܺܝܢ܀
ܘܟܶܢ ܡܰܩܶܦ ܨܠܽܘ̣ܬܳܐ ܗܳܕܶܐ
ܐܰܠܳܗܳܐ ܡܳܪܳܐ ܕܚܰܝ̈ܠܰܘܳܬܳܐ ܥܶܠܳܝ̈ܶܐ. ܒܳܪܽܘ̣ܝܳܐ ܕܟܽܠ ܒܶܪ̈ܝܳܬܳܐ܆ ܥܳܒܽܘ̣ܕܳܐ ܕܟܽܠܗܽܘܢ ܣܳܓܽܘ̣̈ܕܶܐ܆ ܢܰܛܰܪ ܠܟܽܠܰܢ ܒܺܐܝ̣ܕܳܟ ܐܰܚܺܝ̣ܕܰܬ݂ ܟܽܠ ܘܒܰܕܪܳܥܳܟ ܚܰܝܠܬܳܢܳܐ ܘܬܰܩܺܝ̣ܦܳܐ܆ ܘܰܐܫܘܳܐ ܠܰܢ ܕܰܢܫܰܒܚܳܟ ܥܰܡ ܡܰܠܰܐܟ̈ܶܐ ܢܽܘ̣ܪ̈ܳܢܶܐ܆ ܘܢܰܙܥܶܩ ܥܰܡ ܫܶܡܥܽܘ̇ܢ ܣܳܒܳܐ ܘܢܺܐܡܰܪ: ܫܪܺܝ̣ ܠܰܢ ܡܶܟܺܝ̣ܠ ܚܢܰܢ ܥܰܒܕܰܝ̈ܟ ܡܶܢ ܐܰܣܽܘ̣ܪ̈ܶܐ ܕܰܚܛܺܝ̣ܬܳܐ ܡܰܘܒܕܳܢܺܝ̣ܬܳܐ܆ ܘܗܰܒ ܫܽܘܒܩܳܢܳܐ ܠܟܽܠܗܽܘܢ ܐܰܝܠܶܝܢ ܕܡܶܫܬܰܘܬܦܺܝ̣ܢ ܥܰܡܰܢ܆ ܗܳܫܳܐ ܘܒܟܽܠܙܒܰܢ ܠܥܳܠܡܺܝܢ܀
ܥܰܡܳܐ: ܐܰܡܺܝܢ܀
ܚܽܘ̣ܬܳܡܳܐ
ܡܳܪܝܳܐ ܡܳܪܰܢ ܫܡܰܥ ܨܠܽܘܬܰܢ ܘܩܰܒܶܠ ܒܳܥܽܘ̣ܬܰܢ ܚܢܰܢ ܡܚܺܝ̣̈ܠܶܐ ܘܥܰܕܰܪ ܠܟܽܠܰܢ ܘܰܫܒܽܘ̣ܩ ܠܰܢ܆ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ ܘܦܰܓܪ̈ܰܝܢ ܠܳܐ ܕܟܰܝ̈ܳܐ܆ ܘܕܰܟܳܐ ܠܰܢ ܡ̣ܶܢ ܛܽܘ̣ܠܫܳܐ ܕܰܚܛܺܝ̣ܬܳܐ܆ ܕܰܢܫܰܒܚܳܟ ܟܽܠܗܽܘܢ ܝܰܘ̈ܡܳܬܳܐ ܕܚܰܝ݂̈ܰܝ݂ܢ܀
ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀ ܩܽܘܪܝܶܐܠܰܝܣܳܘܢ܀
ܟܳܗܢܳܐ: ܐܰܒܽܘܢ ܕܒܰܫܡܰܝܳܐ.
ܥܰܡܳܐ: ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܘܶܐܢ ܙܰܒܢܳܐ ܡܰܦܶܣ ܡܙܰܝܰܚ ܪ̈ܺܝ̣ܫܟܳܗܢܶܐ ܠܰܨܠܺܝܒܳܐ: ܗܰܘ ܕܡܰܠܰܐܟ̈ܶܐ ܡܫܰܡܫܺܝ̣ܢ ܠܶܗ܆ ܟܶܢ ܐܳܡܪܺܝܢ ܬܶܫܡܶܫܬܳܐ ܕܩܰܕܺܝ̈ܫܶܐ ܘܰܕܥܰܢܺܝܕ̈ܶܐ. ܘܰܡܫܰܡܠܺܝܢ ܠܩܽܘܪܳܒܳܐ.
ܦܳܢܶܝܢ ܠܡܰܕܢܚܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝ̣ܫܬ ܐܰܠܳܗܳܐ܀ | ܗܰܘ ܕܡܰܠܰܐܟ̈ܶܐ ܡܫܰܡܫܺܝ̣ܢ ܠܶܗ. |
| ܩܰܕܺܝ̣ܫܬ ܚܰܝܠܬܳܢܳܐ܀ | ܗܰܘ ܕܰܟܪ̈ܘ̣ܒܶܐ ܡܒܰܪܟܺܝ̣ܢ ܠܶܗ. |
| ܩܰܕܺܝ̣ܫܬ ܠܳܐ ܡܳܝܽܘ̣ܬܳܐ ܚܰܛܳܝ̈ܶܐ ܒܰܬܝܳܒܽܘ̣ܬܳܐ ܡܶܬܟܰܫܦܺܝ̣ܢ ܘܳܐܡܪܺܝܢ: ܡܫܺܝܚܳܐ ܕܥ̣ܰܠ ܠܗܰܝܟܰܠ ܩܽܘ̣ܕܫܳܐ ܐܶܬܪܰܚܰܡܥܠܰܝܢ܀ | ܗܰܘ ܕܰܣܪ̈ܳܦܶܐ ܡܩܰܕܫܺܝ̣ܢ ܠܶܗ. |
ܘܦܳܢܶܝܢ ܠܡܰܥܪܒܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝ̣ܫܬ ܐܰܠܳܗܳܐ܀ | ܗܰܘ ܕܢܽܘ̣ܪ̈ܳܢܶܐ ܡܗܰܠܠܺܝ̣ܢ ܠܶܗ. |
| ܩܰܕܺܝ̣ܫܬ ܚܰܝܠܬܳܢܳܐ܀ | ܗܰܘ ܕܪ̈ܽܘ̣ܚܳܢܶܐ ܡܗܰܕܪܺܝ̣ܢ ܠܶܗ. |
| ܩܰܕܺܝ̣ܫܬ ܠܳܐ ܡܳܝܽܘ̣ܬܳܐ ܝܰܠܕܶܝ̈ܗ̇ ܕܥܺܕܬܳܐ ܡܗܰܝܡܰܢܬܳܐ ܡܶܬܟܰܫܦܺܝ̣ܢ ܘܳܐܡܪܺܝܢ: ܡܫܺܝܚܳܐ ܕܥ̣ܰܠ ܠܗܰܝܟܰܠ ܩܽܘ̣ܕܫܳܐ ܐܶܬܪܰܚܰܡܥܠܰܝܢ܀ | ܗܰܘ ܕܥܰܦܪ̈ܳܢܶܐ ܣܳܓܕܺܝ̣ܢ ܠܶܗ. |
ܘܦܳܢܶܝܢ ܠܓܰܪܒܝܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝ̣ܫܬ ܐܰܠܳܗܳܐ܀ | ܗܰܘ ܕܥܶܠܳܝ̈ܶܐ ܡܪܰܡܪܡܺܝܢ ܠܶܗ. |
| ܩܰܕܺܝ̣ܫܬ ܚܰܝܠܬܳܢܳܐ܀ | ܗܰܘ ܕܡܶܨܥܳܝ̈ܶܐ ܡܩܰܠܣܺܝ̣ܢ ܠܶܗ. |
| ܩܰܕܺܝ̣ܫܬ ܠܳܐ ܡܳܝܽܘ̣ܬܳܐ ܚܰܛܳܝ̈ܶܐ ܒܰܬܝܳܒܽܘ̣ܬܳܐ ܡܶܬܟܰܫܦܺܝ̣ܢ ܘܳܐܡܪܺܝܢ: ܡܫܺܝܚܳܐ ܕܥ̣ܰܠ ܠܗܰܝܟܰܠ ܩܽܘ̣ܕܫܳܐ ܐܶܬܪܰܚܰܡܥܠܰܝܢ܀ | ܗܰܘ ܕܬܰܚܬܳܝ̈ܶܐ ܡܙܰܝܚܺܝ̣ܢ ܠܶܗ. |
ܘܦܳܢܶܝܢ ܠܬܰܝܡܢܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܡܳܪܰܢ ܚܽܘ̣ܣ ܘܪܰܚܶܡܥܠܰܝܢ܀ | ܡܳܪܰܢ ܐܶܬܪܰܚܰܡܥܠܰܝܢ. |
| ܫܽܘܒܚܳܐ ܠܳܟ ܐܰܠܳܗܳܐ܀ | ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬܰܢ ܘܶܐܬܪܚܰܡܥܠܰܝܢ. |
| ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ܆ ܒܰܪܶܟܡܳܪܝ̱܀ | ܫܽܘܒܚܳܐ ܠܳܟ ܒܳܪܽܘ̣ܝܳܐ. |
ܟܳܗܢܳܐ: ܐܰܒܽܘܢ ܕܒܰܫܡܰܝܳܐ.
ܥܰܡܳܐ: ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܶܢ ܐܳܡܪܺܝ̣ܢ ܬܶܫܡܶܫܬܳܐ ܕܩܰܕܺܝ̣̈ܫܶܐ ܘܰܕܥܰܢܺܝ̣̈ܕܶܐ ܘܰܡܫܰܡܠܺܝܢ ܠܩܽܘ̣ܪܳܒܳܐ܀
ܫܠܶܡ ܛܶܟܣܳܐ ܕܒܽܘ̣ܪܳܟ ܩܶܪ̈ܝܽܘܢܶܐ