ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܝ̣ܠܰܢ: ܠܡܶܬ̣ܩܰܪܳܒܘ̣ ܠܦܳܬܘ̣ܪܳܐ ܕܝ̣ܠܳܟ ܫܡܰܝܳܢܳܐ: ܟܰܕ ܐܰܣܝ̣ܪܝ̣ܢ ܚܰܨ̈ܶܐ ܕܢܰܦ̈ܫܳܬܰܢ: ܘܢܰܗܝ̣ܪܝ̣ܢ ܫܪ̈ܳܓܰܝܢ ܒܝ̣ܕܰܥܬܳܟ: ܘܰܣܡܝ̣̈ܟܳܢ ܩܰܘ̈ܡܳܬܳܐ ܕܪ̈ܘ̣ܚܳܬܳܐ ܕܝ̣ܠܰܢ ܥܰܠ ܚܘ̣ܛܪܳܐ ܕܬܘ̣ܟܠܳܢܳܟ: ܘܟܰܕ ܕܠܳܐ ܩܘ̣ܛܳܥܳܐ ܒܐܘ̣ܪܚܳܐ ܐܰܠܝ̣ܨܬܳܐ ܕܦܘ̣̈ܩܕܳܢܰܝܟ ܪܳܕܶܝ̇ܢܰܢ: ܘܢܶܫ̇ܬܰܘܬܰܦ ܒܦܰܓܪܳܟ ܩܰܕܝ̣ܫܳܐ ܘܒܰܕܡܳܟ ܡܚܰܣܝܳܢܳܐ: ܘܰܕܠܳܐ ܚܘ̣ܒܳܠܳܐ ܘܣܘ̣ܓܦܳܢܳܐ ܠܓܰܘ ܡ̣ܶܢ ܪܘ̣ܫܡܳܟ ܢ̇ܶܬܢܛܰܪ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܡܳܪܳܐ ܕܥܺܐܕ̈ܶܐ ܘܓܳܡܘ̣ܪܳܐ ܕܥܰܕ̈ܥܺܐܕܶܐ ܕܰܢ̣ܫܰܡܠܶܐ ܘܢ̣ܶܓܡܘ̣ܪ ܐ̱ܪ̈ܳܙܶܐ ܕܢܳܡܘ̣ܣܳܐ: ܠܗܰܘ̇ ܕܐܶܡ̣ܰܪ ܠܬܰܠܡܝ̣̈ܕܰܘܗ̱ܝ ܕܡܶܐܪܰܓ ܪܰܓܬ݂ܰܢܝ̱ ܕܐܶܟ̇ܘ̣ܠ ܥܰܡܟܽܘܢ ܦܶܨܚܳܐ ܡ̣ܶܢ ܩܕܳܡ ܕܐܶܡ̇ܘ̣ܬ: ܘܐܶܫܰܡܠܶܐ ܠܥܰܬܝ̣̈ܩܳܬܳܐ ܘܐܶܓ̇ܡܘ̣ܪ ܛܶܠܳܢܝ̈ܳܬܳܐ ܘܐܶܫܰܠܶܡ ܠܟܽܘܢ ܕܺܝܰܬܝ̣ܩܝ̣ ܚ̇ܕܰܬܳܐ ܒܕܶܡܝ̱ ܕܐܶܗ̇ܘܶܐ ܥܰܡܟܽܘܢ ܠܥܳܠܰܡ: ܘܦܰܓܪܝ̱ ܩܰܕܝ̣ܫܳܐ ܘܕܶܡܝ̱ ܝܰܩܝ̣ܪܳܐ ܐܶܬܶܠ ܠܟܽܘܢ ܪܰܗܒܘ̣ܢܳܐ ܕܚܰܝ̈ܶܐ ܥܬܝ̣̈ܕܶܐ ܕܠܳܐ ܣܳܐܒܝ̣ܢ: ܘܢܶܗ̣ܘܽܘܢ ܠܟܽܘܢ ܠܚܘ̣ܣܳܝܳܐ ܕܚܰܘ̈ܒܶܐ ܘܰܠܫܘ̣ܒܩܳܢܳܐ ܕܰܚ̈ܛܳܗܶܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܡܰܠܟܳܐ ܕܬܶܫܒܘ̣ܚܬܳܐ ܘܐܰܠܳܗܳܐ ܕܥܰܠ ܟܽܠ: ܗܰܘ̇ ܐܶܡܪܶܗ ܕܐܰܠܳܗܳܐ ܕܐܶܬ̣ܳܐ ܕܢ̣ܶܫܩܘ̣ܠ ܥܰܘܠܶܗ ܕܥܳܠܡܳܐ ܒܰܩܢܘ̣ܡܶܗ ܘܰܕܢ̣ܶܬܢܟܶܣ ܚܠܳܦ ܚܰܝܰܘ̈ܗ̱ܝ ܕܥܳܠܡܳܐ ܒܛܰܝܒܘ̣ܬܶܗ ܘܰܕܢ̣ܶܬܶܠ ܢܰܦܫܶܗ ܬܰܚܠܘ̣ܦܳܐ ܠܡܰܘܬܳܐ ܕܰܙܩܝ̣ܦܳܐ ܚܠܳܦ ܚܰܛܳܝ̈ܶܐ ܒܰܚܢܳܢܶܗ: ܗܰܘ̇ ܕܟܰܕ ܨܒ̣ܰܝܬ ܒܪܶܚܡܰܬ݀ ܐ̱ܢܳܫܘ̣ܬܳܟ ܕܡ̣ܶܢ ܥܶܓ̈ܠܶܐ ܘܬܰܘܪ̈ܶܐ ܘܐܶܡܪ̈ܶܐ ܘܰܓ̈ܕܰܝܳܐ ܘܢܘ̣̈ܩܳܝܶܐ ܘܰܣ̈ܘܳܬܶܐ ܕܢܳܡܘ̣ܣܳܐ ܘܰܕܗܳܠܶܝܢ ܕܰܠܒܰܪ ܬ̣ܥܰܠܶܐ ܠܰܢ: ܐܶܡ̣ܰܪܬ ܠܬܰܠܡܝ̣̈ܕܰܝܟ: ܕܙܶܠܘ̱ ܛܰܝܶܒܘ̱ ܠܰܢ ܡܶܕܶܡ ܕܥܰܕ̈ܥܺܐܕܶܐ ܡܶܛܽܠ ܕܪܶܓܬܳܐ ܪܶܓܶܬ ܕܐܶܟܘ̣ܠ ܦܶܨܚܳܐ ܥܰܡܟܽܘܢ ܝܰܘܡܳܢܳܐ: ܙܶܠܘ̱ ܥܰܡ ܐ̱ܢܳܫ ܛܥܝ̣ܢ ܙܶܩܳܐ ܠܰܐܝܟܳܐ ܕܥܳܐܶܠ: ܟܰܕ ܠܡܳܪܶܐ ܒܰܝܬܳܐ ܐܳܡܪܝ̣ܢ ܐܢ̱ܬܘܢ: ܕܪܰܒܰܢ ܘܡܳܪܰܢ ܐܳܡܰܪ: ܕܰܠܘܳܬܳܟ ܥܬܝ̣ܕ ܕܢܶܥ̣ܒܶܕ ܦܶܨܚܳܐ ܝܰܘܡܳܢܳܐ ܒܶܝܬ ܪ̈ܰܡܫܶܐ: ܟܰܕ ܐܶܙ̣ܰܠܘ̱ ܫܶܡܥܽܘܢ ܘܝܽܘܚܰܢܳܢ ܐܶܫܟ̣ܰܚܘ̱ ܐܰܝܟ ܕܐܶܡ̣ܰܪܬ ܠܗܽܘܢ ܥܶܠܝ̣ܬܳܐ ܡܛܰܝܰܒܬܳܐ ܒܶܝܬ ܪܳܚܡܳܟ ܗܰܘ̇ ܕܐܰܩܝ̣ܡܬ ܡ̣ܶܢ ܩܰܒܪܳܐ: ܘܛܰܝܶܒ̣ܘ̱ ܟܽܠ ܡܶܕܶܡ ܐܰܝܟ ܦܘ̣ܩܕܳܢܳܟ: ܟܰܕ ܕܶܝܢ ܠܰܚܫܳܡܝ̣ܬܳܐ ܫܰܡ̣ܠܝ̣ܬ ܐܰܝܟ ܢܳܡܘ̣ܣܳܐ ܥܰܡ ܬܰܠܡܝ̣̈ܕܰܝܟ: ܗܳܝܕܶܝܢ ܠܐܘ̣ܪܚܳܐ ܛܰܪܩܬܳܐ ܕܪܘ̣ܡܪܳܡܳܐ ܗܳܝ̇ ܕܐܝ̣ܬܶܝܗ̇ ܡܰܟܝ̣ܟܘ̣ܬܳܐ ܓܡܝ̣ܪܬܳܐ ܨܒ̣ܰܝܬ ܕܬܰܠ̣ܶܦ ܐܶܢܽܘܢ ܒܰܥܒܳܕܳܐ ܘܰܒܡܶܠܬܳܐ: ܠܚܰܨܰܝ̈ܟ ܐܶܣ̣ܰܪܬ ܒܣܶܕܘ̣ܢܳܐ: ܘܟܰܕ ܝ̣ܬܶܒ̣ܬ ܘܐܶܡ̣ܰܪܬ ܠܗܽܘܢ: ܕܗܳܟܰܢܳܐ ܥܒܶܕܘ̱ ܠܰܚ̈ܕܳܕܶܐ ܒܚܘ̣ܒܳܐ ܘܝ̣ܠܰܦܘ̱ ܡܶܢܝ̱ ܡܰܟܝ̣ܟܘ̣ܬ ܬܰܪܥܝ̣ܬܳܐ: ܘܟܰܕ ܓܡ̣ܰܪܬ ܚܫܳܡܝ̣ܬܳܐ ܡܶܚܕܳܐ ܢܣܰܒ̣ܬ ܠܰܚܡܳܐ ܚܰܡܝ̣ܥܳܐ ܥܰܠ ܐܝ̣ܕܰܝ̈ܟ ܩܰܕܝ̣̈ܫܳܬܳܐ ܘܥܰܡ ܡܰܘܕܝܳܢܘ̣ܬܳܐ ܒܰܪܶܟ݂ܬܳܝܗ̱ܝ: ܘܰܠܗܽܘܢ ܝܰܗ̣ܒܬ ܘܐܶܡ̣ܰܪܬ: ܕܗܳܢܰܘ ܐ̱ܪܳܙܳܐ ܕܰܚܠܳܦ ܟܽܠܶܗ ܥܳܠܡܳܐ ܡܶܬܕܒܰܚ: ܗܳܢܰܘ ܦܰܓܪܝ̱ ܣܰܒܘ̱ ܐܰܟܘ̣ܠܘ̱ ܡܶܢܶܗ ܠܚܘ̣ܣܳܝܳܐ ܕܚܰܘ̈ܒܶܐ ܕܟܽܠ ܕܰܡܗܰܝ̇ܡܶܢ ܒܝ̣: ܗܳܟܰܢܳܐ ܘܰܠܟܳܣܳܐ ܒܰܪܶܟ݂ܬ ܘܝܰܗ̣ܒܬ ܠܗܽܘܢ ܘܐܶܡ̣ܰܪܬ: ܕܗܳܟܰܢܳܐ ܕܗܳܢܳܐ ܕܡܳܐ ܕܝ̣ܠܝ̱ ܕܕܺܝܰܬܝ̣ܩܝ̣ ܚ̇ܕܰܬܳܐ: ܣܰܒܘ̱ ܐܶܫܬܰܘ ܡܶܢܶܗ ܟܽܠܟܽܘܢ ܠܫܘ̣ܒܩܳܢܳܐ ܕܰܚ̈ܛܳܗܶܐ ܕܟܽܠ ܕܰܡܗܰܝ̇ܡܶܢ ܒܝ̣: ܘܗܳܟܰܢܳܐ ܥܒܶܕܘ̱ ܠܕܘ̣ܟܪܳܢܳܐ ܕܡܰܘܬܝ̱ ܕܬܘ̣ܒ ܐܺܬܶܐ: ܘܡ̣ܶܢ ܒܳܬܰܪ ܕܐܰܓܥܶܠ̣ܬ ܐܶܢܽܘܢ ܠܰܐܒܳܐ ܘܰܓܠ̣ܰܝܬ ܠܗܽܘܢ ܥܰܠ ܡܰܫܠܡܳܢܘ̣ܬܳܐ: ܘܥܰܠ ܟܦܘ̣ܪܝܳܐ ܕܪܝ̣ܫ ܬܰܠܡܝ̣̈ܕܶܐ ܘܥܰܠ ܥܪܘ̣ܩܝܳܐ ܐܰܝܟ ܕܰܟܬܝ̣ܒ: ܚܰܘܺܝ̣ܬ ܠܥܰܬܝ̣̈ܩܳܬܳܐ ܐܦ̣ܛܰܪܬ ܘܰܒܕܺܝܰܬܝ̣ܩܝ̣ ܚ̇ܕܰܬܳܐ ܫܰܪܝ̣ܬ ܗܳܝ̇ ܕܰܡܫܰܟܢܳܐ ܚܰܝ̈ܶܐ ܕܰܠܥܳܠܰܡ: ܘܠܳܐ ܡܳܝܘ̣ܬܘ̣ܬܳܐ ܘܠܳܐ ܡܶܬܚܰܒܠܳܢܘ̣ܬܳܐ: ܐܳܘ ܠܥܰܕܥܺܐܕܳܐ ܚ̣ܰܕܬܳܐ ܘܡܳܪܳܢܳܝܳܐ: ܐܳܘ ܠܐ̱ܪܳܙܳܐ ܬܡܝ̣ܗܳܐ ܘܠܳܐ ܡܶܬܡܰܠܠܳܢܳܐ: ܐܳܘ ܠܪܰܒܘ̣ܬܳܐ ܕܠܳܐ ܡܶܬܡܰܠܠܳܐ: ܐܳܘ ܠܪܶܚܡܰܬ݀ ܐ̱ܢܳܫܘ̣ܬܳܐ ܕܠܳܐ ܡܶܣܬܰܝܟܳܐ: ܐܳܘ ܠܶܐܡܪܳܐ ܫܡܰܝܳܢܳܐ ܕܐܳܟܶܠ ܐܶܡܪܳܐ ܢܳܡܘ̣ܣܳܝܳܐ ܕܰܒܐ̱ܪܳܙܶܗ ܡܶܬܶܐܟܶܠ: ܐܳܘ ܠܝܰܘܡܳܐ ܪܰܒܳܐ ܕܦܰܛܝ̣ܪ̈ܶܐ ܕܒܶܗ ܐܶܬ̣ܓܡܰܪ ܐ̱ܪܳܙ ܦܘ̣ܪܩܳܢܰܢ: ܐܳܘ ܠܥܶܠܝ̣ܬܳܐ ܐ̱ܪܳܙܳܢܳܝ̇ܬܳܐ ܕܒܳܗ̇ ܐܶܬ̣ܶܐܟܶܠ ܐܶܡܪܳܐ ܚܰܝܳܐ ܕܐܰܠܳܗܳܐ: ܕܰܒܕܶܢܚܶܗ ܫܳܩܶܠ ܠܰܚܛܝ̣ܬܶܗ ܕܥܳܠܡܳܐ: ܝܰܘܡܳܢܳܐ ܠܰܚܡܳܐ ܕܚܰܝ̈ܶܐ ܡ̣ܶܢ ܫܡܰܝܳܐ ܠܰܢ ܐܶܬܓܥ̣ܶܠ ܐ̱ܪܳܙܳܢܳܐܝ̣ܬ: ܒܠܰܚܡܳܐ ܘܚܰܡܪܳܐ ܛܘ̣ܦܣܳܐ ܕܡܰܠܟܝ̣ܙܕܶܩ ܟܘ̣ܡܪܳܐ ܙܰܕܝ̣ܩܳܐ: ܝܰܘܡܳܢܳܐ ܢ̇ܥܰܕܥܶܕ ܟܽܠܰܢ ܥܺܐܕܳܐ ܕܕܘ̣ܟܳܝܳܐ ܘܥܺܐܕܳܐ ܕܚܘ̣ܣܳܝܳܐ: ܠܰܘ ܒܰܚܡܝ̣ܪܳܐ ܥܰܬܝ̣ܩܳܐ ܕܒܝ̣ܫܘ̣ܬܳܐ ܘܰܕܡܰܪܝ̣ܪܘ̣ܬܳܐ ܐܶܠܳܐ ܒܦܰܛܝ̣ܪܳܐ ܕܕܰܟܝܘ̣ܬܳܐ ܘܰܕܩܰܕܝ̣ܫܘ̣ܬܳܐ: ܝܰܘܡܳܢܳܐ ܢ̇ܥܰܕܥܶܕ ܦܶܨܚܳܐ ܩܰܕܝ̣ܫܳܐ ܘܡܳܪܳܢܳܝܳܐ ܘܫܘ̣ܢܳܝܳܐ ܕܡ̣ܶܢ ܥܰܬܝ̣ܩܬܳܐ ܠܰܚ̇ܕܰܬܳܐ: ܘܡ̣ܶܢ ܡܝ̣ܬܘ̣ܬܳܐ ܠܠܳܐ ܡܳܝܘ̣ܬܘ̣ܬܳܐ: ܘܡ̣ܶܢ ܫܘ̣ܥܒܳܕܳܐ ܕܥܰܒܕܘ̣ܬܳܐ ܠܚܺܐܪܘ̣ܬܳܐ ܡܳܪܳܢܳܝܬܳܐ: ܘܡ̣ܶܢ ܐܶܡܪܳܐ ܕܥܳܢܳܐ ܠܶܐܡܪܳܐ ܕܰܐܠܳܗܘ̣ܬܳܐ: ܝܰܘܡܳܢܳܐ ܡܰܥܒܰܪܬܳܐ ܗ̣ܘܳܬ݀ ܠܰܢ ܪܘ̣ܚܳܢܳܝܬܳܐ ܡ̣ܶܢ ܠܳܐ ܗܰܝܡܳܢܘ̣ܬܳܐ ܠܗܰܝܡܳܢܘ̣ܬܳܐ: ܘܡ̣ܶܢ ܛܳܥܝܘ̣ܬܳܐ ܠܐܘ̣ܪܚܳܐ ܕܰܫܪܳܪܳܐ: ܝܰܘܡܳܢܳܐ ܐܶܫܟܰܚ̣ܢܰܢ ܠܚܰܝ̈ܶܐ ܫܰܪ̈ܝ̣ܪܶܐ ܕܠܳܐ ܣܳܐܒܝ̣ܢ: ܝܰܘܡܳܢܳܐ ܣܰܟܝ̣ܢܳܐ ܡ̣ܶܢ ܒܶܝܬ ܠܶܘܺܝ̣ ܢܳܚ̣ܰܬ݀ ܡ̣ܶܢ ܕܬ̣ܶܚܪܘ̣ܫܝ̱ ܚܰܝ̈ܘܳܬܳܐ ܕܠܳܐ ܡܶܠܬܳܐ: ܒܕܶܒܚܳܐ ܡܠܝ̣ܠܳܐ ܘܰܕܠܳܐ ܕܡܳܐ ܕܐܶܬ̣ܩܰܪܰܒ ܒܥܶܠܝ̣ܬܳܐ: ܝܰܘܡܳܢܳܐ ܐܶܬ̣ܟܠܝ̣ ܫܘ̣ܦܳܥ ܕܡܳܐ ܘܰܪܣܳܣ ܩܶܛܡܳܐ ܡ̣ܶܢ ܗܰܝܟܠܳܐ ܕܨܶܗܝܽܘܢ ܒܰܕܒܝ̣ܚܘ̣ܬܶܗ ܕܶܐܡܪܳܐ ܡܠܝ̣ܠܳܐ ܘܰܕܠܳܐ ܕܡܳܐ ܗܰܘ̇ ܕܒܐ̱ܪܳܙܶܗ ܟܽܠܗܽܘܢ ܕܡ̈ܶܐ ܡܶܬܰܐܫܕܝ̣ܢ ܗ̱ܘܰܘ: ܒܰܕܓܽܘܢ ܡܦܝ̣ܣܝ̣ܢܰܢ ܠܳܟ ܡܫܝ̣ܚܳܐ ܐܰܠܳܗܰܢ ܗܰܘ̇ ܕܐܰܝܟ ܡܶܠܬܳܐ ܦܰܠ̣ܶܓܬ ܠܰܢ ܦܰܓܪܳܟ ܘܰܕܡܳܟ: ܘܐܰܝܟ ܚܰܝܳܐ ܡܶܢܶܗ ܐܳܟܶܠ ܗ̱ܘܰܝܬ ܘܫܳܬܶܐ: ܘܠܳܟ ܟܰܕ ܠܳܟ ܝܳܕܥܝ̣ܢܰܢ ܕܐܝ̣ܬܰܝܟ ܗ̱ܘܰܝܬ ܚܰܝܳܐ ܘܡܝ̣ܬܳܐ ܩܛܝ̣ܠܳܐ ܘܝܳܗܶܒ ܚܰܝ̈ܶܐ: ܐܰܝܟܰܢܳܐ ܕܬ̣ܰܫܘܶܐ ܠܰܢ ܗܳܫܳܐ ܠܰܢܣܝ̣ܒܘ̣ܬܳܐ ܡܰܥܒܕܰܬ݀ ܚܰܝ̈ܶܐ ܕܦܰܓܪܳܟ ܘܰܕܡܳܟ ܩܰܕܝ̣ܫܳܐ: ܘܒܶܗ ܢ̇ܶܬܦܰܨܶܐ ܡ̣ܶܢ ܡܚܰܒܠܳܢܳܐ ܕܠܳܐ ܢ̣ܶܥܘ̣ܠ ܘܰܢ̣ܚܰܒܶܠ ܒܘ̣ܟܪ̈ܶܐ ܕܢܰܦ̈ܫܳܬܰܢ: ܚܘ̣̈ܫܳܒܶܐ ܕܟܰܝ̈ܳܐ ܘܢܰܩ̈ܕܶܐ ܕܥܰܠ ܚܰܫܳܟ ܘܡܰܘܬܳܟ ܡܰܚܝܳܢܳܐ: ܘܐܰܫܘܳܐ ܠܰܢ ܕܟܰܕ ܐܰܣܝ̣ܪܝ̣ܢ ܚܰܨܰܝ̈ܢ ܒܢܰܟܦܘ̣ܬܳܐ ܘܐܰܣܝ̣ܢܝ̣ܢ ܒܪ̈ܶܓܠܰܝܢ ܣܐܘ̣ܢܳܐ ܕܰܫܠܳܡܳܐ: ܘܰܣܡܝ̣ܟܝ̣ܢܰܢ ܥܰܠ ܚܘ̣ܛܪܶܗ ܕܰܨܠܝ̣ܒܳܟ ܙܰܟܳܝܳܐ ܢ̇ܶܐܟܠܝ̣ܘܗ̱ܝ ܟܰܕ ܠܳܐ ܦܘ̣ܠܳܓܳܐ ܢܶܗ̣ܘܶܐ ܐܝ̣ܬ ܠܰܢ ܒܬܰܪܥܝ̣ܬܰܢ ܒܶܗ: ܐܶܠܳܐ ܒܗܰܝܡܳܢܘ̣ܬܳܐ ܫܰܪܝ̣ܪܬܳܐ ܘܰܕܠܳܐ ܡܘ̣ܡܳܐ ܢܳܣ̇ܒܝ̣ܢܰܢ ܠܶܗ ܟܰܕ ܡܛܰܘܰܝ ܒܢܘ̣ܪܳܐ ܕܚܘ̣ܒܳܐ ܘܰܡܡܰܕܰܟ ܒܡܶܠܚܳܐ ܕܰܫܪܳܪܳܐ: ܘܐܰܫܘܳܐ ܠܰܢ ܬܘ̣ܒ ܡܳܪܝܳܐ ܕܟܽܠܝܘ̣ܡ ܚ̣ܰܕܬܳܐܝ̣ܬ ܢ̇ܶܐܟܠܳܟ ܣܛܰܪ ܡ̣ܶܢ ܟܽܠܳܗ̇ ܥܰܬܝ̣ܩܘ̣ܬܳܐ ܘܚ̣ܰܕܬܳܐܝ̣ܬ ܢܶܫ̇ܬܶܝܟ ܒܡܰܠܟܘ̣ܬܳܟ: ܘܬܰܡܳܢ ܢ̇ܕܰܒܰܚ ܠܳܟ ܕܶܟܪ̈ܶܐ ܫܰܡܝ̣̈ܢܶܐ ܘܰܕܠܳܐ ܡܘ̣ܡ: ܘܐܶܡܪ̈ܶܐ ܬܰܡܝ̣̈ܡܶܐ ܘܰܕܠܳܐ ܛܘ̣ܠܫܳܐ: ܘܢܘ̣̈ܩܳܝܶܐ ܨܠܝ̣̈ܠܶܐ ܘܰܕܠܳܐ ܟܘ̣ܬܡܳܐ: ܝܰܘ̈ܢܶܐ ܘܫܘ̣ܦܢܝ̣̈ܢܶܐ ܕܟܰܝ̈ܳܐ ܘܰܕܠܳܐ ܨܳܐܬܳܐ: ܘܒܳܟ ܦܶܨܚܳܐ ܦܨܝ̣ܚܳܐ ܢ̇ܶܬܦܨܰܚ: ܘܢܶܚ̇ܕܶܐ ܘܢ̇ܶܪܘܰܙ ܗܳܪܟܳܐ ܘܬܰܡܳܢ ܒܥܳܠ̈ܡܶܐ ܕܠܳܐ ܦܳܛܪܝ̣ܢ: ܘܰܚܢܰܢ ܘܥܰܢܝ̣̈ܕܰܝܢ ܘܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ ܕܰܥܢ̣ܰܕܘ̱ ܒܳܟ: ܢ̇ܰܣܶܩ ܠܳܟ ܫܘ̣ܒܚܳܐ ܒܚܰܕܘ̣ܬܳܐ ܘܬܰܘܕܝ̣ܬܳܐ ܒܰܦܨܝ̣ܚܘ̣ܬܳܐ: ܘܪܘ̣ܡܪܳܡܳܐ ܒܰܡܗܰܒܒܘ̣ܬܳܐ: ܘܠܰܐܒܘ̣ܟ ܕܪܰܥܝ̣ܬܳܝܗ̱ܝ ܒܰܕܡܳܟ ܕܰܚܠܳܦܰܝܢ ܐܶܫ̣ܰܕܬ: ܘܰܠܪܘ̣ܚܳܐ ܩܰܕܝ̣ܫܳܐ ܘܰܫ̇ܘܶܐ̣ ܠܳܟ ܒܐܘ̣ܣܺܝܰܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܒܶܠܳܝܗ̱ܝ ܡܳܪܝܳܐ ܐܰܠܳܗܳܐ ܠܦܝ̣ܪܡܳܐ ܗܳܢܳܐ ܕܩܰܪܶܒ̣ܢܰܢ ܩܕܳܡܰܝܟ ܒܥܺܐܕܳܐ ܗܳܢܳܐ: ܐܰܝܟ ܩܘ̣ܪܒܳܢܶܗ ܕܗܳܒܝ̣ܠ ܘܰܕܡܶܗ: ܘܐܰܝܟ ܣܘܳܬܶܗ ܕܢܘ̣ܚ ܘܕܶܒܚܶܗ ܕܐܰܒܪܳܗܳܡ: ܕܟܘ̣̈ܗܳܢܰܘܗ̱ܝ ܕܡܰܠܟܝ̣ܙܕܶܩ: ܘܐܰܝܟ ܨܠܘ̣ܬܶܗ ܕܡܽܘܫܶܐ ܘܥܶܛܪܶܗ ܕܐܰܗܪܽܘܢ: ܘܰܛܢܳܢܶܗ ܕܦܝ̣ܢܚܶܣ ܘܰܦܝܳܣܶܗ ܕܕܰܘܝ̣ܕ: ܘܕܶܡܥܰܘ̈ܗ̱ܝ ܕܰܡܢܰܫܶܐ: ܐܰܦܨܰܚ ܠܰܢ ܡܳܪܝ̱ ܒܫܘ̣ܒܩܳܢ ܚܰܘ̈ܒܰܝܢ: ܘܐܰܣܳܐ ܠܟܽܠܗܽܘܢ ܟܺܐܒܰܝ̈ܢ ܘܢܰܛܰܪ ܠܢܰܦ̈ܫܳܬܰܢ ܘܚܰܣܳܐ ܠܥܰܢܝ̣̈ܕܰܝܢ: ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀