ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܦܳܪܘ̣ܩܳܐ ܕܒܰܨܠܝ̣ܒܶܗ ܣ̣ܰܝܶܟ ܐ̱ܪ̈ܳܙܶܐ ܕܰܢܒܺܝ̈ܶܐ: ܘܰܓܡ̣ܰܪ ܦ̈ܶܠܳܐܬܳܐ ܕܚܰܙܳܝ̈ܶܐ: ܘܫܰܪܰܪ ܛܘ̣̈ܦܣܶܐ ܕܙܰܕܝ̣̈ܩܶܐ: ܘܫܰܡ̣ܠܝ̣ ܨܘ̣ܪ̈ܳܬܳܐ ܕܩܰܕܝ̣̈ܫܶܐ: ܘܥܰܫ̣ܶܢ ܒܰܪ̱ܬ ܩܳܠܳܐ ܕܟܳܪ̈ܘ̣ܙܶܐ: ܘܝܰܗ̣ܒ ܡܶܠܬܳܐ ܠܰܡܣܰܒܪ̈ܳܢܶܐ ܒܚܰܝܠܳܐ ܪܰܒܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܰܬܫܰܥܫܳܥܝ̣̈ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܠܳܟ ܣܳܓ̇ܕܳܐ ܘܰܡܫܰܒܚܳܐ ܡܰܪܥܝ̣ܬܳܟ ܡܳܪܰܢ ܝܶܫܘ̣ܥ ܡܫܝ̣ܚܳܐ: ܪܳܥܝܳܐ ܛܳܒܳܐ ܕܐܶܬ̣ܢܟܶܣ ܚܠܳܦܰܝܢ: ܘܰܒܡܰܘܬܶܗ ܚ̣ܝܳܬ݀ ܡܝ̣ܬܘ̣ܬܰܢ: ܡܰܘ̇ܕܶܝܢܰܢ ܠܳܟ ܡܳܪܝܳܐ ܕܗܳܟܰܢܳܐ ܗ̣ܘܳܐ ܨܶܒܝܳܢܳܐ ܩܕܳܡܰܝܟ: ܕܬܶܚܣ̣ܟܰܢ ܡ̣ܶܢ ܕܶܒܚ̈ܶܐ ܕܚܰܝ̈ܘܳܬܳܐ ܚܰܪ̈ܫܳܬܳܐ ܘܢܘ̣̈ܩܳܝܶܐ ܕܰܕܡܳܐ: ܘܰܢ̇ܕܰܒܰܚ ܠܳܟ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ ܬܰܘܕܝ̣ܬܳܐ ܘܪܝ̣ܚܳܐ ܗܰܢܺܝܳܐܐ: ܐܰܣܓܳܐ ܡܳܪܝ̱ ܫܰܝܢܳܗ̇ ܕܥܺܕܬܳܐ ܩܰܕܝ̣ܫܬܳܐ ܩܰܬܘ̣ܠܝ̣ܩܝ̣ ܘܰܫܠܝ̣ܚܳܝ̇ܬܳܐ: ܗܳܝ̇ ܕܰܩܢ̣ܰܝܬ ܒܰܕܡܳܟ ܘܰܦܪܰܩ̣ܬ ܒܰܨܠܝ̣ܒܳܟ: ܘܡܰܟܶܟ ܩܕܳܡ ܬܰܪ̈ܥܶܝܗ̇ ܠܡܰܠ̈ܟܶܐ ܛܪ̈ܘ̣ܢܶܐ ܐܰܚܝ̣̈ܕܰܝ ܫܘ̣ܠܛܳܢܳܐ ܕܥܳܠܡܳܐ ܗܳܢܳܐ: ܛܰܪ ܠܳܗ̇ ܫܘ̣̈ܘܕܳܝܰܝܟ ܫܰܪܝ̣ܪ̈ܶܐ ܥܕܰܡܳܐ ܠܫܘ̣ܠܳܡܶܗ ܕܥܳܠܡܳܐ: ܘܐܶܬܪܰܥܳܐ ܒܰܨ̈ܠܰܘܳܬܳܐ ܕܪ̈ܝ̣ܫܰܝ ܟܳܗ̈ܢܶܐ ܘܰܕܟܳܗ̈ܢܶܝܗ̇: ܘܚܰܣܳܐ ܥܰܠ ܟܽܠܳܗ̇ ܡܰܪܥܝ̣ܬܳܟ: ܘܢܰܛܰܪ ܬܳܓܶܗ ܕܡܰܠܟܳܐ ܡܗܰܝܡܢܳܐ ܕܐܰܚܝ̣ܕ ܓܰܘܣܳܐ ܒܰܨܠܝ̣ܒܳܟ ܙܰܟܳܝܳܐ: ܘܐܰܒܪܶܟ ܩܕܳܡܰܘܗ̱ܝ ܠܰܒܥܶܠ̈ܕܒܳܒܰܘܗ̱ܝ: ܒܰܪܶܟ ܟܠܝ̣ܠܳܐ ܕܫܰܢ̱ܬܳܐ ܒܛܰܝܒܘ̣ܬܳܟ: ܘܢܰܛܰܪ ܦܺܐܪ̈ܶܝܗ̇ ܘܐܳܕ̈ܫܶܝܗ̇ ܕܐܰܪܥܳܐ ܡ̣ܶܢ ܟܽܠܗܽܘܢ ܢܶܟܝ̈ܳܢܶܐ ܒܝ̣̈ܫܶܐ: ܗܘܝ̣ ܥܳܕܘ̣ܪܳܐ ܠܰܐܠܝ̣̈ܨܶܐ: ܘܒܶܝܬ ܓܰܘܣܳܐ ܠܰܡ̈ܥܳܩܶܐ: ܡܢܝ̣ܚܳܢܳܐ ܠܰܡܛܰܪ̈ܦܶܐ: ܘܙܳܝܘ̣ܢܳܐ ܠܰܣܢܝ̣̈ܩܶܐ: ܬܶܥܘ̣ܠܝ̱ ܩܕܳܡܰܝܟ ܐܶܢܰܩܬܳܐ ܕܰܛܠܝ̣̈ܡܶܐ: ܘܡ̣ܶܢ ܐܘ̣ܠ̈ܨܳܢܶܐ ܕܰܫܒܰܝ̈ܳܐ ܠܳܐ ܬܶܟ̣ܠܶܐ ܪ̈ܰܚܡܰܝܟ: ܐܶܬܬܥܝ̣ܪ ܠܰܓܥܳܬܳܐ ܕܰܫܚܝ̣̈ܩܰܝ ܡ̣ܶܢ ܓܰܠ̱̈ܠܶܐ ܘܡܰܚܫܘ̣̈ܠܶܐ ܕܝܰܡܳܐ: ܘܕܰܒܰܪ ܐܶܢܽܘܢ ܠܰܠܡܺܐܢܳܐ ܕܣܰܘܩܳܐ ܕܝ̣ܠܗܽܘܢ ܥ̱ܶܗܰܕ ܒܛܰܝܒܘ̣ܬܳܟ: ܘܰܠܢܰܦ̈ܫܳܬܳܐ ܕܐܰܒܳܗܰܝ̈ܢ ܘܕܐܰܚܰܝ̈ܢ ܘܰܕܪ̈ܰܒܳܢܰܝܢ ܘܰܟܢܰܘ̈ܳܬܰܢ ܕܩܰܕܶܡ̣ܘ̱ ܫܟܶܒ̣ܘ̱ ܘܠܰܐܬܪܳܐ ܕܢܰܘܚܳܐ ܢ̣ܶܬܟܰܢ̈ܫܳܢ ܒܳܟ: ܘܰܠܘܰܥܕܳܟ ܕܚܰܝ̈ܶܐ ܢ̣ܶܬܡܰܢ̈ܥܳܢ: ܘܰܠܟܽܠ ܕܰܥܢ̣ܰܕ ܒܚܰܪܒܳܐ ܐܰܘ ܒܫܶܒܝܳܐ ܐܰܘ ܒܟܰܦܢܳܐ ܐܰܘ ܒܛܘ̣ܪܳܦܳܐ: ܐܰܘ ܒܟܽܠ ܐܰܢܰܢܩܝ̣ ܐܰܝ̇ܕܳܐ ܕܗܝ̣: ܟܰܕ ܡܰܘ̇ܕܶܐ ܒܚܰܫܰܝ̈ܟ ܘܣܳܓܶܕ ܠܰܨܠܝ̣ܒܳܟ: ܐܰܩܶܨ ܠܶܗ ܬܰܡܳܢ ܡܳܪܝܳܐ: ܘܡܰܢܰܥܳܝܗ̱ܝ ܠܰܓܢܽܘܢܳܟ ܕܚܰܝ̈ܶܐ ܘܰܠܡܰܠܟܘ̣ܬܳܟ ܕܒܰܫܡܰܝܳܐ ܘܡ̣ܶܢ ܟܽܠܗܽܘܢ ܚܰܝ̈ܶܐ ܘܡܝ̣̈ܬܶܐ ܬܶܫܒܘ̣ܚܬܳܐ ܬܶܣ̣ܰܩܝ̱ ܠܡܳܪܘ̣ܬܳܟ: ܘܠܰܐܒܘ̣ܟ ܡܒܰܪܟܳܐ ܘܛܘ̣ܒܬܳܢܳܐ ܕܫܰܠܚ̣ܳܟ ܠܦܘ̣ܪܩܳܢܰܢ: ܘܰܠܪܘ̣ܚܳܟ ܚܰܝܳܐ ܘܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܒܶܠ ܡܳܪܝܳܐ ܡܳܪܰܢ ܦܝ̣ܪܡܳܐ ܕܰܡܩܰܪܒܳܐ ܠܳܟ ܡܰܪܥܝ̣ܬܳܟ: ܘܗܰܒ ܠܳܗ̇ ܫܰܝܢܳܐ ܠܥܺܕܬܳܟ: ܘܰܒܗܝ̣ܠܘ̣ܬܳܐ ܘܢܰܘܚܳܐ ܠܥܳܢܳܟ: ܘܐܰܫܘܳܗ̇ ܕܟܰܕ ܣܳܓ̇ܕܳܐ ܬܚ̣ܰܒܶܒܝ̱ ܠܫܘ̣̈ܡܳܬܳܟ: ܘܟܰܕ ܐܰܒܝ̣ܠܳܐ ܬ̣ܶܩܰܦܝ̱ ܠܰܙܩܝ̣ܦܘ̣ܬܳܟ: ܘܟܰܕ ܕܳܝ̇ܨܳܐ ܬܒ̣ܰܪܶܟܝ̱ ܠܰܩܝܳܡܬܳܟ: ܘܬܶܥܘ̣ܠܝ̱ ܠܰܛܝܳܪܳܟ ܕܚܰܝ̈ܶܐ: ܘܬܰܣ̣ܶܩܝ̱ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀