ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܝ̣ܬܝܳܐ ܡܬܘ̣ܡܳܝܳܐ ܕܟܰܣܝܳܐܝ̣ܬ ܐܰܕܢܰܚ ܢܘ̣ܗܪܶܗ ܒܠܶܒܶܗ ܕܰܐܒܓܰܪ ܡܰܠܟܳܐ: ܘܰܐܗ̣ܦܟܶܗ ܡ̣ܶܢ ܗܰܘ̇ ܡܳܐ ܕܐܝ̣ܬܰܘܗ̱ܝ ܗ̱ܘܳܐ ܠܗܰܝܡܳܢܘ̣ܬܳܐ ܫܰܪܝ̣ܪܬܳܐ ܕܒܶܗ: ܗܰܘ̇ ܕܟܰܕ ܠܳܐ ܚܙ̣ܳܝܗ̱ܝ ܗܰܝܡ̣ܶܢ ܒܶܗ: ܘܶܐܫ̣ܬܘܝ̣ ܠܛܘ̣ܒܳܐ ܡܫܰܡܠܝܳܐ ܕܡܶܢܶܗ: ܡܦܝ̣ܣܝ̣ܢܰܢ ܠܳܟ ܡܳܪܝܳܐ ܒܗܳܢܳܐ ܝܰܘܡܳܐ ܕܥ̱ܘ̣ܗܕܳܢܶܗ ܪܚܝ̣ܡܳܐ: ܘܰܕܝܘ̣ܩܢܳܟ ܙܰܟܳܝܳܐ ܘܦܳܪܘ̣ܩܳܝܳܐ ܕܬ̣ܶܫܡܰܥ ܨܠܰܘ̈ܳܬܰܢ ܘܰܬ̣ܩܰܒܶܠ ܒܳܥ̈ܘܳܬܰܢ: ܘܬ̣ܰܦܢܶܐ ܫܶܐܠ̈ܳܬܰܢ ܫܰܦܝ̣ܪ̈ܳܬܳܐ: ܘܰܬ̣ܫܰܘܙܶܒ ܠܰܢ ܡ̣ܶܢ ܢܘ̣ܟ̈ܬܳܬܳܐ ܕܳܐܟܶܠܩܰܪܨܳܐ: ܘܰܬ̣ܦܰܨܶܐ ܠܰܢ ܡ̣ܶܢ ܚܘ̣ܣܪ̈ܳܢܶܐ ܘܣܘ̣ܓ̈ܦܳܢܶܐ ܢܰܦ̈ܫܳܢܳܝܶܐ ܘܦܰܓܪ̈ܳܢܳܝܶܐ: ܘܬ̣ܰܫܘܶܐ ܠܰܢ ܘܰܠܥܰܢܝ̣̈ܕܰܝܢ ܠܒܘ̣ܣܳܡܳܐ ܪܘ̣ܚܳܢܳܝܳܐ ܕܰܢ̇ܫܰܒܚܳܟ ܐܰܡܝ̣ܢܳܐܝ̣ܬ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܳܐ ܦܠܝ̣ܓܬܳܐ ܘܬܰܘܕܝ̣ܬܳܐ ܠܳܐ ܡܶܫܬܰܚܠܦܳܢܝ̣ܬܳܐ ܘܣܶܓܕܬܳܐ ܠܳܐ ܡܶܬܦܰܣܩܳܢܝ̣ܬܳܐ: ܥܰܡ ܕܘ̣ܒܳܪ̈ܶܐ ܬܰܩ̈ܢܶܐ ܢܶܫ̇ܬܘܶܐ ܕܢ̇ܰܣܶܩ: ܒܰܚܕܳܐ ܒܰܪ̱ܬ ܩܳܠܳܐ ܕܕܰܟܝܳܐ ܘܪܳܡܳܐ ܘܰܡܥܰܠܝܳܐ ܡ̣ܶܢ ܟܽܠܳܗܿ ܡܶܬܢܰܚܬܳܢܘ̣ܬܳܐ: ܘܡܰܒܥܕܳܐ ܡ̣ܶܢ ܟܽܠܳܗܿ ܣܰܩܘ̣ܒܠܳܝܘ̣ܬܳܐ: ܠܗܳܝ̇ ܐܘ̣ܣܺܝܰܐ ܪܳܡܰܬ݀ ܡ̣ܶܢ ܟܽܠ: ܘܡܳܪܰܬ݀ ܟܽܠ: ܘܡܰܝܬܝܰܬ݀ ܟܽܠ: ܘܰܡܟܰܝܢܳܢܰܬ݀ ܟܽܠ: ܕܰܐܚܝ̣ܕܳܐ ܘܢܳܛܪܳܐ ܠܟܽܠ ܘܐܝ̣ܬܶܝܗܿ ܒܟܽܠ: ܘܰܠܒܰܪ ܡ̣ܶܢ ܟܽܠ: ܕܟܽܠ ܠܘܳܬܳܗܿ ܡܶܬܬܙܝ̣ܥ: ܘܰܠܟܽܠ ܥܳܒ̇ܕܳܐ ܕܢ̣ܶܬܬܙܝܥ: ܘܰܠܟܽܠ ܡܶܕܶܡ ܕܰܗ̣ܘܳܐ: ܕܪܳܡܳܐ ܘܰܡܥܰܠܝܳܐ ܡ̣ܶܢ ܗܰܘ̈ܢܶܐ ܕܰܒܪ̈ܰܝܳܐ ܘܰܥܒܝ̣̈ܕܶܐ ܘܡ̣ܶܢ ܥܶܠ̈ܳܝܶܐ ܘܬܰܚ̈ܬܳܝܶܐ: ܕܠܶܗ ܢ̇ܫܰܒܰܚ ܘܢ̇ܰܘܕܶܐ: ܘܠܶܗ ܢ̇ܗܰܠܶܠ ܒܟܽܠܥܶܕܳܢ: ܘܰܒܟܽܠ ܫܳܥ ܒܟܽܠܶܗ ܙܰܒܢܳܐ ܕܚܰܝ݂̈ܰܝ݂ܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܠܥܳܠܡܝ̣ܢ܀

ܣܶܕܪܳܐ

ܐܰܒܳܐ ܕܠܳܐ ܫܘ̣ܪܳܝ: ܘܰܒܪܳܐ ܕܠܳܐ ܥܘ̣ܩܳܒ ܘܪܘ̣ܚܳܐ ܕܠܳܐ ܡܶܬܒܨܶܐ: ܪܝ̣ܫܳܐ ܕܠܳܐ ܪܝ̣ܫܳܐ ܘܰܒܪܳܐ ܕܡ̣ܶܢ ܪܝ̣ܫܳܐ ܠܳܐ ܙܰܒܢܳܐܝ̣ܬ ܘܰܡܬܘ̣ܡܳܐܝ̣ܬ ܕܠܳܐ ܫܰܪܝ̣ ܥܰܡ ܗܰܘ̇ ܕܠܳܐ ܫܰܪܝ̣: ܘܠܳܐ ܡܫܰܠܶܡ ܥܰܡ ܗܰܘ̇ ܕܠܳܐ ܡܫܰܠܶܡ: ܕܝ̣ܠܝ̣ܕ ܡܰܢ ܐܰܝܟ ܥܶܠܬܳܢܳܐ ܡ̣ܶܢ ܥܶܠܬܳܐ: ܕܰܒܗܰܘܢܳܐ ܪܰܒܳܐ ܘܰܡܥܰܠܰܝ ܡ̣ܶܢ ܗܰܘ̈ܢܶܐ ܢܛܝ̣ܪ: ܘܝ̣ܠܝ̣ܕ ܐܘ̣ܣܺܝܳܐܝ̣ܬ ܘܠܳܐ ܡܶܫܬܰܚܠܦܳܢܳܐܝ̣ܬ ܘܠܳܐ ܡܶܬܦܰܣܩܳܢܳܐܝ̣ܬ ܥܰܡ ܪܘ̣ܚܳܐ ܩܰܕܝ̣ܫܳܐ: ܕܢܳܦܶܩ ܡܰܢ ܡܬܘ̣ܡܳܐܝ̣ܬ ܘܠܳܐ ܡܶܬܬܰܚܕܳܢܳܐܝ̣ܬ: ܘܠܳܐ ܙܰܒܢܳܐܝ̣ܬ: ܕܠܳܐ ܫܘ̣ܪܳܝ ܘܠܳܐ ܫܘ̣ܠܳܡ ܐܝ̣ܬܝܳܐܝ̣ܬ ܘܳܐܣܝܳܐܝ̣ܬ: ܕܰܐܡܝ̣ܢܳܐܝ̣ܬ ܡܰܥܒܶܕ ܟܽܠ ܘܰܒܟܽܠ ܘܰܡܩܰܕܶܫ ܟܽܠ ܘܓܳܡܰܪ ܘܰܡܫܰܡܠܶܐ ܟܽܠ: ܘܐܝ̣ܬܰܘܗ̱ܝ ܟܽܠ ܒܟܽܠ ܠܳܐ ܡܶܬܬܟܝ̣ܠܳܢܳܐܝ̣ܬ: ܐܰܝܟ ܡܰܢ ܕܠܳܐ ܓܫܘ̣ܡ ܡܚܰܝܰܕ ܘܰܦܪܝ̣ܫ ܒܟܽܠ: ܘܰܦܪܝ̣ܣ ܥܰܠ ܟܽܠ ܘܰܫܘܶܐ ܘܰܐܘܶܐ ܒܟܽܠ ܥܰܡ ܟܽܠ: ܕܰܬܠܝ̣ܬܳܐܝ̣ܬ ܦܪܝ̣ܫܝ̣ܢ ܘܰܠܚܘ̣ܕܳܐܝ̣ܬ ܝ̣ܕܝ̣ܥܝ̣ܢ: ܚܰܕ ܟܝܳܢܳܐ ܕܰܡܦܰܪܰܫ ܘܰܚܕܳܐ ܐܘ̣ܣܺܝܰܐ ܕܰܡܦܰܠܓܳܐ ܘܠܳܐ ܡܶܬܦܰܠܓܳܐ: ܕܪܳܡ ܘܰܡܥܰܠܰܝ ܡ̣ܶܢ ܟܽܠ ܣܘ̣ܟܳܠ ܕܠܳܐ ܥܒܝ̣̈ܕܶܐ ܘܰܥܒܝ̣̈ܕܶܐ ܕܓܳܫܶܦ ܒܟܽܠ ܘܠܳܐ ܡܶܬܓܫܶܦ ܡ̣ܶܢ ܟܽܠ: ܕܰܐܝܬܝ̣ ܠܰܗܘܳܝܳܐ ܟܽܠ ܘܰܢܛܝ̣ܪ ܒܶܗ ܟܽܠ: ܕܡ̣ܶܢ ܫܘ̣ܪܳܝܳܐ ܛܰܟ̣ܶܣ ܘܨܳܪ ܠܰܢ ܕܶܡ̈ܘܳܬܳܐ: ܘܥܶܠܰܬ݀ ܥܘ̣ܕܪܳܢܰܢ ܒܟܽܠ ܟܰܕ ܐܰܝܬܝ̣ ܠܰܢ ܠܗܳܢܳܐ ܟܽܠ: ܬܗܘ̣ܡܳܐ ܬܚܘ̣ܡܳܐ ܣ̣ܳܡ ܒܶܠܥܳܕ ܟܽܠ: ܟܰܕ ܫܛܰܝܢܰܢ ܘܐܶܬܬܰܒܥ̣ܰܕܢܰܢ ܡ̣ܶܢ ܫܘ̣ܡܠܳܝܰܢ ܬܡܝ̣ܗ ܒܟܽܠ: ܬܘ̣ܒ ܚܳܢ̣ܰܢ ܪܰܚܡܳܢ ܒܟܽܠ: ܘܥܶܠܰܬ݀ ܦܘ̣ܪܩܳܢܰܢ ܨܳܪ ܒܟܽܠ ܘܐ̱ܪ̈ܳܙܰܝ ܐܳܣܝܘ̣ܬܰܢ ܐܰܛܥ̣ܶܢ ܠܟܽܠ: ܗܰܘ̇ ܕܰܠܐ̱ܪܳܙܳܐ ܕܪܶܚܡܰܬ݀ ܐ̱ܢܫܘ̣ܬܶܗ ܘܒܘ̣ܣܳܡ̈ܶܐ ܢܰܦ̈ܫܳܢܳܝܶܐ ܕܰܠܗܽܘܢ ܡܥܰܕܥܕܝ̣ܢܰܢ ܝܰܘܡܳܢܳܐ ܒܰܢܒܺܝܘ̣ܬܳܐ ܫܰܡ̣ܠܝ̣: ܘܰܒܕܳܪ̈ܰܝ ܕܳܪ̈ܶܐ ܐܰܝܟ ܡܰܛܪ̈ܳܬܳܐ ܘܰܨܘܳܝ̈ܶܐ ܠܰܢ ܕܰܒܪܘ̣ܚܩܳܐ ܩܳܝܡܝ̣ܢ ܗ̱ܘܰܝܢ ܘܰܠܘܳܬܰܢ ܗ̣ܘܳܬ݀: ܘܐܶܫܬ̣ܰܡܠܝܰܬ݀ ܓܡܝ̣ܪܘ̣ܬܳܐ ܒܰܕܡܘ̣ܬ ܚܰܘܪܳܐ ܪܰܒܳܐ ܫܒ̣ܰܩ ܐܰܝܟ ܡܰܢ ܕܝܰܬܝ̣ܪ ܡܶܬܚܰܢܳܢܝ̣ܬܳܐ ܬ̣ܶܬܝ̣ܕܰܥܝ̱ ܐܳܣܝܘ̣ܬܰܢ: ܘܬܶܬ̣ܚܙܶܐ ܒܛܝ̣ܠܘ̣ܬܳܐ ܪܰܒܬܳܐ ܕܰܥܠܰܝܢ: ܘܕܠܳܐ ܢ̣ܶܣܬܒܰܪ ܡ̣ܶܢ ܢܘ̣ܟܪ̈ܳܝ݂ܰܝ݂ ܝ̣ܕܰܥܬܳܐ ܕܟܽܠ ܚ̣ܰܕܶܬ ܗܘ̣ ܠܰܚܙܳܬܳܐ ܕܐܝ̣ܬܘ̣ܬܶܗ: ܐܰܘܕܰܥ ܠܰܢ ܒܗܳܠܶܝܢ ܩܰܕܝܡܘ̣ܬ ܝ̣ܕܰܥܬܶܗ ܘܢܳܛܘ̣ܪܘ̣ܬܶܗ ܠܳܐ ܚܰܫܢܳܝܬܳܐ ܕܰܒܟܽܠ ܠܕܳܪ̈ܶܐ ܙܥܘ̣ܪ̈ܰܝ ܫܰܪܟܳܢܳܐ: ܘܰܒܨܝ̣ܪ̈ܰܝ ܬܰܪܒܝ̣ܬܳܐ ܕܫܘ̣ܡܠܳܝܳܐ: ܛܘ̣ܦ̈ܣܶܐ ܐ̱ܪ̈ܳܙܢܳܝܶܐ ܫܰܡ̣ܠܝ̣ ܘܰܒܩܰܠܝ̣ܠ ܩܰܠܝ̣ܠ ܫܰܘܫ̣ܶܛ ܠܰܕܪܰܓ ܓܡܝ̣ܪܘ̣ܬܳܐ ܠܢܰܦ̈ܫܳܬܰܢ: ܟܰܕ ܐܰܬ̣ܩܶܢ ܥܳܠ̈ܡܶܐ ܒܪܝ̣ܫܝ̣ܬ ܡ̣ܶܢ ܗܽܘ̣̈ܠܶܐ ܪܒܝ̣ܥܳܝܰܬ݀ ܐܘ̣ܣܺܝ̈ܰܐܣ ܐܰܝܬܝ̣: ܘܰܠܗܳܢܳܐ ܟܽܠ ܒܰܪܒܝ̣ܥܳܝܘ̣ܬ ܬܚܘ̣ܡܳܐ ܨܰܒ̣ܶܬ ܘܠܰܐܪܒܥܳܐ ܐܶܣܛܘ̣ܟ̈ܣܶܐ ܚ̣ܰܝܶܕ ܘܰܐ‌ܠ̣ܘܶܬ: ܘܠܰܡܢܰܟܪܳܝܘ̣ܬܳܐ ܠܰܚܕܳܐ ܠܚܘ̣ܕܳܝܘ̣ܬ ܙܢܳܐ ܐܰܝܬܝ̣: ܘܡ̣ܶܢ ܗܳܢܳܐ ܠܨܰܠܡܰܢ ܦ̣ܪܰܫ ܘܰܐܬܩ̣ܶܢ: ܘܚܰܝܘ̣ܬܳܐ ܡܩܰܝܡܰܬ ܡ̣ܶܢ ܣܰܩܘ̣ܒܠܳܝܘ̣ܬܳܐ ܕܓܶܕܫ̣ܰܬ݀ ܡ̣ܶܢ ܫܰܠܝ̣ܛܘ̣ܬ ܒܝܳܬܳܐ ܠܳܐ ܥ̣ܨܳܬ݀ ܒܚܘ̣ܒܶܗ: ܒܛܝ̣ܠܘ̣ܬܳܐ ܐܝ̣ܬܝܳܝܬܳܐ ܕܰܥܠܰܝܢ: ܐܰܝܟܰܢܳܐ ܕܰܠܪܶܚܡܬܳܐ ܟܝܳܢܳܝܬܳܐ ܕܝ̣ܠܰܢ ܐܰܣܓܝ̣ܬ ܫܰܟ̣ܢܰܬ݀ ܝܰܬܝ̣ܪ ܬܶܬܝܕܰܥ ܘܬܶܬܒܨܶܐ ܠܟܽܠ ܐ̱ܢܳܫ: ܘܡܰܥܨܶܐ ܠܪܶܚܡܬܳܐ ܐܶܬ̣ܚܙܝ ܟܝܳܢܰܢ ܕܕܳܐܶܒ ܒܚܶܡܬܳܐ ܐܶܬ̣ܬܣܝ̣ܦ: ܟܰܕ ܠܳܐ ܟܽܠ ܟܽܠܶܗ ܠܰܚܒܳܠܳܐ ܐܶܬ̣ܬܰܝܬܝ̣ ܒܟܶܐܘܶܝܠܳܐ ܡܢܳܬܳܐ ܡܰܢ ܡܶܢܶܗ ܐܶܬ̣ܢܰܛܪܰܬ݀ ܘܰܒܛܰܘܦܳܢܳܐ ܠܪܘ̣ܫܥܶܗ ܐܰܫܝ̣ܓ: ܘܐ̱ܪ̈ܳܙܶܐ ܡ̣ܶܢ ܕܡܶܙܕܰܝܚܳܢܘ̣ܬܶܗ ܕܥܰܠ ܡܳܡ̈ܘ̣ܠܶܐ ܠܰܐܪܒܰܥ ܦܶܢ̈ܝܳܢ ܕܰܟ̣ܝܰܬ݀ ܘܰܒܗܘ̣ܦܳܟܳܐ ܕܝܠܳܗܿ ܩ̣ܰܕܫܰܬ݀ ܬܘ̣ܒ ܐܶܬ̣ܢܰܛܪܰܬ݀ ܘܰܡܠ̣ܳܬ݀ ܡܶܢܳܗܿ ܐܰܪܥܳܐ ܘܶܐܬ̣ܟܰܒܫܰܬ݀ : ܗܳܝܕܶܝܢ ܫܓ̣ܳܬ݀ ܐܘ̣ܣܺܝܰܐ ܕܝ̣ܠܰܢ: ܘܠܰܓܠܝ̣̈ܦܶܐ ܒ̣ܶܪܟܰܬ݀ ܘܣܶܓ̣ܕܰܬ݀ ܘܬܘ̣ܒ ܐܶܬܚܰܢ̣ܢܰܬ݀ : ܘܰܒܟܳܪܘ̣ܙܘ̣ܬܳܐ ܚܕܰܬܳܐ ܡܽܘܫܶܐ ܙܰܗܝܳܐ ܘܗܰܕܳܝܳܐ ܠܳܗܿ ܐܶܫ̣ܬܰܕܰܪ: ܘܠܰܡܢܳܬܳܐ ܡܫܰܘܕܥܰܬ݀ ܢܳܡܘ̣ܣܳܐ ܟܰܕ ܐܶܬ̣ܚܰܣܢܰܬ݀ ܡ̣ܶܢ ܦܶܪܥܽܘܢ ܦ̣ܪܰܩ ܘܰܠܡܰܒܥܳܕܘ̣ܬܳܗܿ ܒܥ̣ܳܐ ܡ̣ܶܢ ܣܶܓܕܰܬ ܨܰܠ̈ܡܶܐ ܠܡܰܕܒܪܳܐ ܕܰܒ̣ܪܳܗܿ: ܘܠܰܐܪܥܳܐ ܕܡܘ̣ܠܳܟܳܢܳܐ ܨܒ̣ܳܐ ܗ̱ܘܳܐ ܕܢ̣ܰܥܠܶܝܗܿ ܒܚܶܙܘܳܐ ܕܚܘ̣ܒܳܐ ܚܰܛܦܳܗܿ: ܘܛܳܒ̈ܳܬܳܐ ܡ̣ܶܢ ܫܡܰܝܳܐ ܘܡ̣ܶܢ ܐܰܪܥܳܐ ܐܰܡ̣ܛܰܪ ܠܳܗܿ ܘܬܘ̣ܒ ܠܳܐ ܦܶܪܫ̣ܰܬ݀ ܙܰܠܝ̣ܠܬܳܐ ܘܰܡܨܰܥܰܪܬܳܐ: ܐܘ̣ܗܿ ܡ̣ܶܢ ܒܶܗܬܬܳܐ ܟܡܳܐ ܚܰܢ̣ܳܗܿ ܓܳܒܘ̣ܠܳܗܿ: ܘܗ̱ܝ ܦܰܕܝ̣ܕܬܳܐ ܘܫܳܛܝ̣ܬܳܐ ܪܝ̣ܫܳܗܿ ܡ̣ܶܢ ܙܶܒܠܳܐ ܠܳܐ ܦ̣ܰܪܩܰܬ݀ : ܘܰܠܪ̈ܰܚܡܶܐ ܟܝܳܢܳܝ̈ܶܐ ܕܠܳܐ ܣܘ̣ܟܳܠ ܐܶܬ̣ܠܰܨܝܰܬ݀ : ܒܪܘ̣ܓܙܳܐ ܡܰܘܒܕܳܢܳܐ ܐܰܚܶܡ̣ܬܰܬ݀ ܠܚܰܢܳܢܳܗܿ: ܘܰܚ̈ܘܰܘܳܬܳܐ ܡܚܰܒ̈ܠܳܢܶܐ ܐܰܦ̣ܓܰܥ ܒܳܗܿ ܘܰܠܥܰܡܳܐ ܕܠܳܐ ܪ̈ܰܚܡܝ̣ܢ ܒܪܘ̣ܓܙܳܐ ܡܣܝ̣ܦܝ̣ܢ ܗ̱ܘܰܘ: ܬܘ̣ܒ ܐܶܬ̣ܟܰܫܰܦ ܡܽܘܫܶܐ ܬܘ̣ܒ ܚܰܢ̣ܳܗܿ ܦܳܪܘ̣ܩܳܗܿ ܗܰܘ̇ ܕܠܳܐ ܨܳܒܶܐ ܒܰܓܒܝ̣ܠܬܳܐ ܕܐܝ̣̈ܕܰܘܗ̱ܝ ܠܰܐܒܕܳܢܳܐ ܓܡܝ̣ܪܳܐ: ܠܰܢܒܺܝܳܐ ܚܰܘܝ̣ ܚܶܘܝܳܐ ܕܰܢܚܳܫܳܐ ܢܣ̣ܰܟ ܠܳܗܿ: ܥܰܠ ܩܳܝܶܡܬܳܐ ܡܘ̣ܫܳܝܬܳܐ ܐܰܪܝ̣ܡܶܗ ܘܰܒܡܶܨܥܰܬ݀ ܥܰܡܳܐ ܐܰܩܝ̣ܡܶܗ: ܘܰܒܗܳܕܶܐ ܟܰܕ ܡܙܰܗܰܪ ܠܥܰܡܳܐ ܕܰܢܚܘ̣ܪܽܘܢ ܒܶܗ ܘܡܶܫܬܰܘܙܒܝ̣ܢ ܦܩ̣ܰܕ ܠܶܗ ܡܣܰܝܥܳܢܶܗ: ܘܰܠܟܽܠ ܐܰܝܢܳܐ ܕܰܒܗܰܝܡܳܢܘ̣ܬܳܐ ܘܚܘ̣ܒܳܐ ܚܳܐܰܪ ܒܶܗ ܡܫܰܘܙܶܒ ܠܶܗ: ܠܰܐܝܢܳܐ ܕܶܝܢ ܕܰܒܚܰܫܳܐ ܕܡܰܗܡܝܳܢܘ̣ܬܳܐ ܡܶܬܬܚܶܕ ܗ̱ܘܳܐ ܡܰܘܒܶܕ ܘܰܡܛܰܠܶܩ ܠܶܗ: ܛܘ̣ܦܣܳܐ ܗܳܟܝ̣ܠ ܫܩܝ̣ܠ ܗ̱ܘܳܐ ܕܪܶܚܡܰܬ݀ ܐ̱ܢܳܫܘ̣ܬܶܗ ܕܝܶܫܘ̣ܥ ܕܠܰܨܠܝ̣ܒܳܐ ܣܠ̣ܶܩ: ܘܰܐܝܢܳܐ ܕܒܰܦܫܝ̣ܛܘ̣ ܡܰܘܕܶܐ ܒܶܗ ܕܠܰܢ ܦܳܪܶܩ: ܘܗܘ̣ܝܘ̣ ܐܰ‌ܠܳܗܳܐ ܫܰܪܝ̣ܪܳܐ ܚܳܝܶܐ: ܘܒܶܗ ܘܡ̣ܶܢ ܢܘ̣ܟ̈ܬܳܬܳܐ ܕܰܚܛܝ̣ܬܳܐ ܡܶܬܚܰܪܰܪ: ܕܰܐܝܟ ܚܘܰܘ̈ܳܬܳܐ ܡܚܰܒ̈ܠܳܢܶܐ ܡܚܰܒ̈ܠܳܢ ܠܢܰܦ̈ܫܳܬܰܢ ܐܰܝܢܳܐ ܕܶܝܢ ܕܒܳܣܶܐ ܘܒܶܗ ܘܗܳܡܶܣ ܘܡܰܗܡܶܐ ܡ̣ܶܢ ܣܶܓܕܬܶܗ: ܘܰܕܒܰܪܢܳܫܳܐ ܡܚܝ̣ܠܳܐ ܝܳܕܰܥ ܠܶܗ ܘܰܐܝܟ ܠܳܐ ܡ̇ܨܶܐ̣ ܚܝ̣ܠ ܟܽܠ ܡܰܕܪܶܟ ܠܶܗ ܗܳܢܳܐ ܒܰܚ̈ܛܳܗܰܘܗ̱ܝ ܡܳܐܶܬ: ܘܰܒܡܰܚ̈ܘܳܬܶܗ ܡ̣ܶܢ ܣܰܡܳܐ ܡܶܬܚܢܶܩ: ܘܡ̣ܶܢ ܚܰܝ̈ܶܐ ܐܰ‌ܠܳܗܳܝ̈ܶܐ ܡܶܬܢܰܟܪܶܐ ܘܰܠܡܰܘܬܳܐ ܓܡܝ̣ܪܳܐ ܘܠܳܐ ܡܶܬܰܐܣܝܳܢܳܐ ܡܶܫܬܠܶܡ: ܘܗܳܕܶܐ ܪܰܡ̣ܙܳܗܿ ܘܰܐܠܦ̣ܳܗܿ ܠܰܢ ܫܶܡܥܽܘܢ ܐܰܣܝܪܳܐ ܕܶܐܫ̣ܬܪܝ̣: ܘܒܶܗ ܐܶܣܳܪܶܗ ܕܗܳܐ ܗܳܢܳܐ ܠܡܰܦܘ̣ܠܬܳܐ ܘܠܰܩܝܳܡܬܳܐ ܕܣܰܓܺܝ̈ܶܐܐ ܒܐܝ̣ܣܪܳܐܝܶܠ: ܘܠܳܐܬܳܐ ܕܚܶܪܝܳܢܳܐ ܟܰܕ ܡܰܦܘ̣ܠܬܳܐ ܠܰܐܝܠܶܝܢ ܕܟܳܦܪܝܢ ܕܠܰܘ ܐܰ‌ܠܳܗܳܐ ܗܰܘ̇ ܕܶܐܨܛܠ̣ܶܒ: ܘܰܩܝܳܡܬܳܐ ܠܰܐܝܠܶܝܢ ܕܡܰܕܪܟܝ̣ܢ ܙܰܒܢܳܐ ܕܣܳܥܘ̣ܪܘ̣ܬܗܽܘܢ ܘܰܕܦܘ̣ܪܩܳܢܗܽܘܢ ܚܰܘܝ̣ ܘܰܐܠ̣ܶܦ: ܐܳܬܳܐ ܕܚܶܪܝܳܢܳܐ ܗܳܕܶܐ ܐܝ̣ܬܝܗܿ ܗܰܘ̇ ܨܠܝ̣ܒܳܐ ܡܰܥܒܶܕ ܚܰܝ̈ܶܐ ܕܡܶܬܓܠܶܐ ܒܚܰܪܰܬ ܙܰܒ̈ܢܶܐ: ܘܰܡܛܰܠܶܩ ܠܚܶܪܝܳܢܳܐ ܕܗܳܘܶܐ ܒܫܘ̣ܠܳܡܶܗ ܕܥܳܠܡܳܐ ܒܰܝܢܳܬ ܥܰܡ̱̈ܡܶܐ: ܘܡܶܛܽܠ ܗܳܕܶܐ ܡܦܝ̣ܣܳܐ ܠܳܟ ܥܺܕܬܳܟ ܒܝܰܘܡܳܐ ܗܳܢܳܐ ܩܰܪܝܳܐ ܘܩܰܕܝ̣ܫܳܐ: ܕܰܐܝܟܰܢܳܐ ܕܰܐܪܝ̣ܡ ܡܽܘܫܶܐ ܚܶܘܝܳܐ ܕܰܢܚܳܫܳܐ ܒܡܰܕܒܪܳܐ ܘܶܐܫ̣ܬܰܘܙܰܒ ܥܰܡܳܐ ܡ̣ܶܢ ܚܘܰܘ̈ܳܬܳܐ ܡܚܰܒ̈ܠܳܢܶܐ: ܗܳܟܰܢܳܐ ܘܠܰܨܠܝ̣ܒܳܐ ܡܪܝ̣ܡܳܐ ܠܘܳܬ ܒܢ̈ܰܝܳܐ ܕܝ̣ܠܳܗܿ ܕܢ̣ܶܫܬܰܘܙܒܽܘܢ ܡ̣ܶܢ ܢܘ̣ܟ̈ܬܳܬܳܐ ܕܰܚ̈ܛܳܗܶܐ: ܕܝܰܬܝ̣ܪ ܡ̣ܶܢ ܚܘܰܘ̈ܳܬܳܐ ܡܰܐܟܶܝܢ ܠܰܒܢ̈ܶܝܗ: ܘܰܚܠܳܦ ܚܘ̣ܛܪܳܐ ܡܘ̣ܫܳܝܬܳܐ ܡܘ̣ܪܳܢܝ̣ܬܳܐ ܕܪ̈ܳܥܰܘܳܬܳܗܿ ܕܰܥܠܶܝܗܿ ܬܰܠܝܳܐ ܐܳܬܶܗ ܕܰܨܠܝ̣ܒܳܐ ܡܰܥܒܶܕ ܚܰܝ̈ܶܐ: ܘܰܚܠܳܦ ܚܶܘܝܳܐ ܕܰܢܚܳܫܳܐ ܡܝ̣ܬܳܐ: ܗܽܘ ܨܠܝ̣ܒܳܐ ܚܰܝܳܐ ܘܦܳܪܘ̣ܩܳܝܳܐ ܥܰܠ ܐܝ̣̈ܕܰܝ ܟܳܗ̈ܢܶܝܗܿ ܡܙܰܝܚܳܐ ܘܰܡܪܰܡܪܡܳܐ: ܘܰܚܠܳܦ ܩܳܝܶܡܬܳܐ ܗܽܘ ܡܰܫܟܢܳܟ ܩܰܕܝ̣ܫܳܐ: ܕܰܐܝܟ ܗܳܕܶܐ ܩܳܝܶܡܬܳܐ ܡܰܨܡܰܚ ܒܰܝܢܳܬ ܐܶܡ̈ܘܳܬܳܐ: ܘܗܳܝ ܕܡܰܨܥ̣ܰܬ݀ ܡܰܫܪܝ̣ܬܳܐ ܐܝ̣ܣܰܪܠܳܝܬܳܐ: ܒܰܡܨܰܥܬܳܗܿ ܕܥܕܬܳܐ ܡܙܰܝܚܳܐ ܠܶܗ ܘܰܡܥܰܦܩܳܐ: ܘܬܘ̣ܒ ܗܳܕܶܐ ܕܰܒܡܶܨܥܰܬ݀ ܨܰܘܡܳܐ ܩܰܕܝ̣ܫܳܐ ܕܰܐܪܒܥܝ̣ܢ ܝܰܘ̈ܡܳܬܳܐ ܗܳܕܶܐ ܐܝ̣ܬܶܝܗܿ ܕܰܐܪܒܥܝ̣ܢ ܫܢܝ̣̈ܢ ܩܰܘܝ̣ ܥܰܡܳܐ ܒܳܬܪܳܗܿ ܕܰܡܚܘ̣ܬܳܐ ܗܳܝ̇ ܘܥ̣ܰܠ ܠܰܐܪܥܳܐ ܕܡܘ̣ܠܟܳܢܳܐ: ܗܳܟܰܢܳܐ ܘܥܺܕܬܳܐ ܩܰܕܝ̣ܫܬܳܐ ܐ̱ܪܳܙܳܐ ܫܶܩ̣ܠܰܬ݀ ܠܰܐܪܒܥܝ̣ܢ ܝܰܘ̈ܡܳܬܳܐ: ܝܰܘܡܳܐ ܠܫܰܢ̱ܬܳܐ ܡܰܢ ܒܡܶܢܝܳܢ ܐܰܪܒܥܝ̣ܢ ܫܢܰܝ̈ܳܐ ܕܰܒܗܶܝܢ ܐܶܬ̣ܕܰܟܝ̣ ܥܰܡܳܐ ܒܰܙܒܰܢ: ܗܳܟܰܢܳܐ ܘܰܢܒܺܝܳܐ ܚܰܙܩܺܝ̣ܐܝܶܠ ܝܰܘܡܳܐ ܠܫܰܢ̱ܬܳܐ ܢܣ̣ܰܒ ܕܘ̣ܟܳܝܳܐ ܠܥܰܡܶܗ: ܘܗܳܕܶܐ ܕܰܩܕܳܡ ܚܰܫܳܐ ܥܳܒܕܝ̣ܢܰܢ ܠܥ̱ܘ̣ܗܕܳܢܳܐ ܗܳܢܳܐ ܛܘ̣ܦܣܳܐ ܐܝ̣ܬܶܝܗܿ ܕܗܘ̣ ܗܳܢܳܐ ܐ̱ܪܳܙܳܐ ܕܩܰܕܡ̣ܶܗܿ ܠܦܳܪܘ̣ܩܰܢ ܘܰܠܚܰܫܶܗ ܡܰܥܒܶܕ ܚܰܝ̈ܶܐ: ܘܚܰܘܝ̣ ܐܳܬܶܗ ܠܬܰܠ̈ܡܝ̣ܕܶܐ ܕܝ̣ܠܶܗ ܩܕܳܡ ܚܰܫܳܐ ܘܶܐܡ̣ܰܪ: ܕܰܐܝܟܰܢܳܐ ܕܡܽܘܫܶܐ ܐܰܪܝ̣ܡ ܚܶܘܝܳܐ ܒܡܰܕܒܪܳܐ ܗܳܟܰܢܳܐ ܥܬܝ̣ܕ ܒܪܶܗ ܕܐ̱ܢܳܫܳܐ ܠܡܶܬܬܪܳܡܘ̣ ܥܰܠ ܩܰܝܣܳܐ ܠܚܘ̣ܣܳܝܶܗ ܕܥܳܠܡܳܐ: ܒܰܕܓܽܘܢ ܐܳܘ ܡܳܪܝܳܐ ܘܰܐ‌ܠܳܗܰܢ ܣܓܝ̣ܕܳܐ ܝܶܫܘ̣ܥ ܡܫܝ̣ܚܳܐ: ܕܰܒܗܳܠܶܝܢ ܐ̱ܪ̈ܳܙܶܐ ܐܰܢܗ̣ܰܪܬ ܠܰܢ ܘܰܐܒܪܶܩ̣ܬ ܠܢܰܦ̈ܫܳܬܰܢ ܘܡܶܬܟܰܫܦܝ̣ܢܰܢ ܠܳܟ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܩܕܳܡ ܪܰܒܘ̣ܬܳܟ ܡܩܰܪܒܝ̣ܢܰܢ ܒܥܶܕܳܢܳܐ ܗܳܢܳܐ ܕܥ̱ܘ̣ܗܕܳܢ ܛܘ̣ܦ̈ܣܰܝܟ ܪܳܫܡܝ̣ܢܰܢ: ܠܰܫܪܳܪܗܽܘܢ ܣܰܬܶܬ݂ ܒܢܰܦ̈ܫܳܬܰܢ: ܟܰܕ ܡܚܰܪܰܪ ܐܰܢ̱ܬ ܠܰܢ ܡ̣ܶܢ ܐܝ̣ܕܳܐ ܩܛܝ̣ܪܳܝܬܳܐ ܘܡ̣ܶܢ ܪܶܓܠܳܐ ܢܘ̣ܟܪܳܝܬܳܐ ܘܡ̣ܶܢ ܟܽܠ ܚܰܫܳܐ ܡܰܘܒܕܳܢܳܐ ܕܢܰܦ̈ܫܳܬܰܢ ܘܰܕܦܰܓܪ̈ܰܝܢ: ܘܡ̣ܶܢ ܐܘ̣ܠܨܳܢܳܐ ܘܚܘ̣ܣܪܳܢܳܐ: ܘܡ̣ܶܢ ܟܽܠܗܶܝܢ ܐܰܝܠܶܝܢ ܕܡܰܪ̈ܚܩܳܢ ܘܦܳܪ̈ܫܳܢ ܠܰܢ ܡܶܢܳܟ: ܘܫܰܟܶܢ ܐܰ‌ܠܳܗܳܐ ܫܰܝܢܳܐ ܐܰܡܝܢܳܐ ܘܰܫܠܳܡܳܐ ܟܰܗܝ̣ܢܳܐ: ܒܘ̣ܛܳܠܳܐ ܕܰܩܪ̈ܳܒܶܐ: ܫܘ̣ܘܙܳܒܳܐ ܕܡ̣ܶܢ ܚܶܪ̈ܝܳܢܶܐ: ܒܗܝ̣ܠܘ̣ܬܳܐ ܕܡ̣ܶܢ ܫܓܘ̣ܫ̈ܝܶܐ: ܢܰܘܚܳܐ ܕܡ̣ܶܢ ܢܘ̣ܘܳܓ̈ܶܐ ܘܐܰܘܝܘ̣ܬܳܐ ܕܟܽܠ ܦܘ̣ܠ̈ܳܓܶܐ: ܘܗܰܒ ܒܥܺܕܬܳܟ ܡܳܪܝܳܐ ܐܰܘܝܘ̣ܬܳܐ ܘܫܰܝܢܳܐ ܠܥܰܠ̈ܠܳܢܶܝܗܿ: ܙܰܗܝܘ̣ܬܳܐ ܘܩܰܕܝܫܘ̣ܬܳܐ ܠܟܳܗ̈ܢܶܝܗܿ: ܗܶܕܪܳܐ ܘܪܘ̣ܡܪܳܡܳܐ ܠܰܡܫܰܡ̈ܫܳܢܶܝܗܿ ܚܕܳܝܘ̣ܬܳܐ ܘܚܘ̣ܒܳܐ ܠܝܰܠ̈ܕܶܝܗܿ: ܢܰܟܦܘ̣ܬܳܐ ܘܰܟܢܝ̣ܟܘ̣ܬܳܐ ܠܰܚ̈ܕܘ̣ܓܶܝܗܿ: ܕܰܟܝܘ̣ܬܳܐ ܘܩܰܕܝܫܘ̣ܬܳܐ ܠܟܶܢ̈ܫܶܝܗܿ: ܢܘ̣ܛܳܪܳܐ ܟܚܝ̣ܕܳܐ ܘܰܡܗܰܘܢܳܐ ܠܟܽܠܗܽܘܢ ܬܶܓܡܶܝ̈ܗܿ: ܘܗܰܒ ܡܳܪܝܳܐ ܠܰܟܪ̈ܝ̣ܗܶܐ ܚܘ̣ܠܡܳܢܳܐ ܠܰܐܠܝ̣̈ܨܶܐ ܒܘ̣ܝܳܐܳܐ: ܠܰܐܒܝ̣̈ܠܶܐ ܠܘ̣ܒܳܒܳܐ: ܠܰܡ̈ܥܳܩܶܐ ܦܨܝ̣ܚܘ̣ܬܳܐ ܠܡܶܣ̈ܟܺܢܶܐ ܙܝܳܢܬܳܐ ܘܒܘ̣ܪܟܬܳܐ: ܘܰܠܟܽܠܰܢ ܚܰܪܬܳܐ ܛܳܒܬܳܐ: ܘܰܠܥܰܢܝ̣̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ̱ ܥܰܠ ܣܰܒܪܳܟ ܐܰܢܝ̣ܚ ܐܶܢܽܘܢ ܒܡܰܠܟܘ̣ܬܳܟ ܫܡܰܝܳܢܝ̣ܬܳܐ: ܕܢ̇ܰܘܕܶܐ ܠܳܟ ܡܳܪܳܐ ܛܳܒܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܒܶܠ ܡܳܪܝܳܐ ܐܰ‌ܠܳܗܳܐ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܒܥ̱ܘ̣ܗܕܳܢ ܝܘ̣ܩܢܳܟ ܦܳܪܘ̣ܩܳܝܳܐ ܕܩܰܪܶܒ̣ܢܰܢ ܠܳܟ: ܘܢܰܛܰܪ ܠܰܢ ܡ̣ܶܢ ܢܘ̣ܟ̈ܬܳܬܳܐ ܓܳܪ̈ܣܳܢܝܳܬܳܐ ܘܕܘ̣ܒܳܨ̈ܶܐ ܕܰܚܛܝ̣ܬܳܐ: ܘܫܰܟܶܢ ܠܰܢ ܚܘ̣ܠܡܳܢܳܐ ܓܡܝ̣ܪܳܐ: ܘܐܳܣܝܘ̣ܬܳܐ ܡܫܰܡܠܰܝܬܳܐ: ܠܢܰܦ̈ܫܳܬܰܢ ܘܰܠܦܰܓܪ̈ܰܝܢ: ܘܨܰܘܡܰܢ ܘܰܨܠܰܘ̈ܳܬܰܢ ܢ̣ܶܗ̈ܘܳܝܢ ܠܰܢܝܳܚܳܟ: ܘܫܰܝܢܳܟ ܘܰܫܠܳܡܳܟ ܢ̣ܰܡܠܶܟ ܒܰܝܢܳܬܰܢ: ܘܫܰܟܶܢ ܠܰܢ ܘܰܠܥܰܢܝ̣̈ܕܰܝܢ ܓܰܠܝܘ̣ܬ ܐܰܦ̈ܶܐ ܕܰܩܕܳܡܰܝܟ: ܕܰܢ̇ܫܰܒܚܳܟ ܥܰܡ ܐܰܒܘ̣ܟ ܘܪܘ̣ܚܳܟ ܚܰܝܳܐ ܘܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀