ܦܪܽܘ̣ܡܝܽܘܢ

ܫܽܘ̣ܒܚܳܐ ܠܰܐܒܳܐ ܘܠܰܒܪܳܐ ܘܰܠܪܘ̣ܚܳܐ ܩܰܕܝ̣ܫܳܐ ܚܰܕ ܐܰܠܳܗܳܐ ܫܰܪܝ̣ܪܳܐ: ܕܒܰܬܠܳܬܳܐ ܩܢܘ̣ܡ̈ܶܐ ܩܰܕܝ̣̈ܫܶܐ ܡܶܬܗܰܝܡܰܢ: ܐܰܒܳܐ ܝܳܠܘ̣ܕܳܐ ܕܰܒܪܳܐ ܡܶܠܬܳܐ ܡܬܘ̣ܡܳܝܳܐ: ܒܪܳܐ ܝܰܠܕܳܐ ܕܰܠܗܰܠ ܡ̣ܶܢ ܛܰܘܪ̈ܶܐ ܐܶܬ̣ܝܠܶܕ ܡ̣ܶܢ ܐܰܒܳܐ ܕܠܳܐ ܫܘ̣ܪܳܝܳܐ: ܘܪܘ̣ܚܳܐ ܩܰܕܝ̣ܫܳܐ ܕܰܢܦ̣ܰܩ ܡ̣ܶܢ ܐܰܒܳܐ: ܢܣ̣ܰܒ ܕܶܝܢ ܡ̣ܶܢ ܒܪܳܐ: ܘܐܝ̣ܬܰܘܗ̱ܝ ܒܰܪ ܟܝܳܢܳܐ ܕܰܐܒܳܐ ܘܕܰܒܪܳܐ: ܚܕܳܐ ܐܘ̣ܣܺܝܰܐ ܘܰܟܝܳܢܳܐ: ܚܕܳܐ ܐܝ̣ܬܘ̣ܬܳܐ ܡܥܰܠܰܝܬܳܐ: ܚܕܳܐ ܐܰܠܳܗܘ̣ܬܳܐ ܣܓܝ̣ܕܬܳܐ ܕܠܳܗܿ ܟܰܕ ܠܳܗܿ ܣܳܓܕܝ̣ܢܰܢ ܘܡܰܘܕܶܝܢܰܢ ܘܰܡܫܰܒܚܝܢܰܢ: ܒܗܳܢܳܐ ܝܰܘܡܳܐ ܕܥ̱ܘ̣ܗܕܳܢܳܐ ܫܒܝ̣ܚܳܐ ܕܝܘ̣ܩܢܶܗ ܦܰܐܝܳܐ ܘܦܳܪܘ̣ܩܳܝܳܐ ܕܰܡܫܝ̣ܚܳܐ ܐܰܠܳܗܳܐ: ܥܰܡ ܕܰܐܒܓܰܪ ܡܰܠܟܳܐ ܡܗܰܝܡܢܳܐ ܡܫܰܡܠܶܝܢܰܢ: ܘܰܡܦܝ̣ܣܝ̣ܢܰܢ ܘܡܶܬܟܰܫܦܝ̣ܢܰܢ ܕܢ̣ܶܓܡܘ̣ܪ ܠܰܢ ܒܝ̣ܕܰܥܬܳܐ ܕܗܰܝܡܳܢܘ̣ܬܳܐ ܘܰܢ̣ܫܰܪܰܪ ܠܰܢ ܒܣܰܒܪܳܐ ܕܬܰܘܕܝ̣ܬܳܐ: ܘܰܢ̣ܚܰܣܶܐ ܚܛܳܗ̈ܰܝܢ ܘܰܕܥܰܢܝ̣̈ܕܰܝܢ ܒܣܘ̣ܓܳܐܐ ܕܛܰܝܒܘ̣ܬܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܕܰܬܪܶܝܢ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܣܳܓܕܝ̣ܢܰܢ ܘܰܡܫܰܒܚܝ̣ܢܰܢ ܘܡܰܘܕܶܝܢܰܢ ܠܳܟ ܐܰܠܳܗܳܐ ܐܰܒܳܐ ܓܢܝ̣ܙܳܐ ܘܠܳܐ ܡܶܬܚܰܙܝܳܢܳܐ: ܐܝ̣ܬܝܳܐ ܡܬܘ̣ܡܳܝܳܐ ܘܠܳܐ ܡܶܬܕܰܪܟܳܢܳܐ: ܗܰܘ̇ ܕܰܒܝܰܕ ܡܕܰܒܪܳܢܘ̣ܬܳܐ ܦܳܪܘ̣ܩܳܝ̇ܬܳܐ ܕܰܒܪܳܟ ܝ̣ܚܝ̣ܕܳܝܳܐ ܦܘ̣ܪܩܳܢܳܐ ܦܰܪܢܶܣ̣ܬ ܠܥܳܠܡܳܐ ܕܰܐܒܝ̣ܕ ܗ̱ܘܳܐ ܒܛܳܥܝܘ̣ܬܳܐ ܕܕܶܚܠܰܬ݀ ܦܬܰܟܪ̈ܶܐ: ܘܟܰܕ ܨܒ̣ܰܝܬ ܒܛܰܝܒܘ̣ܬܳܟ ܘܰܒܪ̈ܰܚܡܰܝܟ ܕܰܠܗܳܕܶܐ ܬܫܰܡܠܶܐ: ܒܝܰܕ ܣܒܰܪܬܳܐ ܡܚܰܕܝܳܢܝ̣ܬܳܐ ܕܪܝ̣ܫ ܡܰܠܰܐܟ̈ܶܐ ܢܚ̣ܶܬ ܘܰܫ̣ܪܳܐ ܒܰܒܬܘ̣ܠܬܳܐ ܡܰܠܝܰܬ݀ ܩܰܕܝ̣ܫܘ̣ܬܳܐ: ܘܟܰܕ ܐܶܬܝ̣ܠܶܕ ܡܶܢܳܗ̇ ܩܰܕܝ̣ܫܳܐܝ̣ܬ: ܐܶܬܝ̣ܕܰܥ ܒܥܳܠܡܳܐ ܕܰܐܠܳܗܰܐ ܗ̱ܘ̇ ܘܒܰܪ ܐܰܠܳܗܳܐ: ܒܝܰܕ ܣܳܥܘ̣ܪܘ̣ܬ ܬܶܕܡܪ̈ܳܬܳܐ ܐܰܠܗܳܝ̈ܳܬܳܐ ܕܰܣܥ̣ܰܪ: ܘܡ̣ܶܢ ܗܳܪܟܳܐ ܟܰܕ ܫܡ̣ܰܥ ܛܶܒ̈ܶܐ ܕܚܝ̣̈ܠܶܐ ܬܡܝ̣̈ܗܶܐ ܕܣܘ̣ܥܪ̈ܳܢܰܘܗ̱ܝ ܐܰܠܳܗܳܝ̈ܶܐ: ܐܰܒܓܰܪ ܡܰܠܟܳܐ ܡܗܰܝܡܢܳܐ ܗܰܘ̇ ܕܩܰܕܡܳܝܳܐ ܒܰܟ̣ܰܪ ܒܗܰܝܡܳܢܘ̣ܬܳܐ: ܐܶܬ̣ܝܰܐܝܰܒ ܕܢ̣ܶܚܙܶܝܘܗ̱ܝ ܘܢ̣ܶܬܰܐܣܶܐ ܡ̣ܶܢ ܟܺܐܒܳܐ ܡܫܝ̣ܡܳܢܳܐ ܗܰܘ̇ ܕܡܰܠܶܙ ܗ̱ܘܳܐ ܠܶܗ: ܘܰܒܝܰܕ ܐܝ̣ܙܓܰܕܳܐ ܘܰܟܬܝ̣ܒ̈ܳܬܳܐ ܡܦܝ̣ܣܳܢܘ̣ܬܳܐ ܒܒܳܥܘ̣ܬܳܐ ܡܶܬܚܰܢܳܢܝ̣ܬܳܐ ܫ̣ܰܕܰܪ ܠܘܳܬ ܦܳܪܘ̣ܩܳܐ ܘܣܳܥܘ̣ܪܳܐ ܕܢܰܦ̈ܫܳܬܰܢ: ܐܰܝܟܰܢܳܐ ܕܢ̣ܺܐܬܳܐ ܘܢ̣ܰܐܣܶܐ ܠܟܘ̣ܪܗܳܢܳܐ ܕܦܰܓܪܶܗ: ܘܟܰܕ ܠܳܐ ܚܙ̣ܳܝܗ̱ܝ ܗ̱ܘܳܐ ܗܰܝܡ̣ܶܢ ܘܰܐܫ̣ܰܪ ܒܬܰܪܥܝ̣ܬܶܗ ܚܰܟܝ̣ܡܬܳܐ: ܕܐܶܠܘ̣ܠܳܐ ܕܰܐܠܳܗܳܐ ܐܝ̣ܬܰܘܗ̱ܝ ܗ̱ܘܳܐ: ܠܳܐ ܡ̇ܨܶܐ̣ ܗ̱ܘܳܐ ܬܶܕܡܪ̈ܳܬܳܐ ܬܡܝ̣̈ܗܳܬܳܐ ܕܰܐܝܟ ܗܳܠܶܝܢ ܠܡܶܣܥܰܪ: ܗܳܢܳܐ ܕܠܳܐ ܐܶܣ̣ܬܢܶܩ ܥܰܠ ܦܶܛܪܘ̣ܣ ܘܦܰܘܠܽܘܣ ܕܢ̣ܰܟܪܙܽܘܢ ܠܶܗ ܡܶܛܽܠ ܗܰܝܡܳܢܘ̣ܬܳܐ: ܒܗܳܝ̇ ܕܡ̣ܶܢ ܠܓܰܘ ܝ̣ܥܳܬ݀ ܒܶܗ ܗܰܝܡܳܢܘ̣ܬܳܐ ܒܝܰܕ ܡܰܘܗܰܒܬܳܐ ܐܰܠܳܗܳܝܬܳܐ: ܗܰܘ̇ ܕܰܠܦܶܛܪܘ̣ܣ ܒܝܰܕ ܓܶܠܝܳܢܳܐ ܫ̣ܰܘܕܰܥ ܘܰܩ̣ܪܳܝܗ̱ܝ ܡܫܝ̣ܚܳܐ ܒܪܶܗ ܕܰܐܠܳܗܳܐ: ܗܘ̣ ܐܰܢܗܰܪ ܬܰܪܥܝ̣ܬܶܗ ܕܰܐܒܓܰܪ ܡܰܠܟܳܐ ܡܗܰܝܡܢܳܐ ܘܰܩܪܳܝܗ̱ܝ ܐܰܠܳܗܳܐ ܘܒܰܪ ܐܰܠܳܗܳܐ: ܗܳܢܳܐ ܕܡܶܫܡܰܥ ܒܰܠܚܘ̣ܕ ܫܡ̣ܰܥ ܛܶܒܶܗ: ܘܰܕܠܳܐ ܫܠܝ̣ܚܳܐ ܘܟܳܪܘ̣ܙܳܐ ܗܰܝܡ̣ܶܢ ܒܰܣܒܰܪܬܶܗ ܘܶܐܬ̣ܢܰܗܰܪ ܒܶܗ: ܗܳܢܳܐ ܕܠܰܘ ܡ̣ܶܢ ܩܶܪܝܳܢܳܐ ܕܡܽܘܫܶܐ ܘܓܶܠܝܳܢ̈ܶܐ ܕܰܢܒܺܝܘ̣ܬܳܐ ܐܶܬ̣ܢܰܗܰܪ ܗ̱ܘܳܐ: ܐܶܠܳܐ ܡ̣ܶܢ ܛܶܒܰܘ̈ܗ̱ܝ ܛܳܒ̈ܶܐ: ܘܡ̣ܶܢ ܣܘ̣ܥܪ̈ܳܢܰܘܗ̱ܝ ܐܰܠܳܗܳܝ̈ܶܐ ܕܰܒܪܳܐ ܝ̣ܕܝ̣ܥ ܗ̱ܘܳܐ ܘܶܐܣ̣ܬܰܟܰܠ ܕܡܰܢܘ̣ ܒܰܪ ܡܰܢܘ̣ ܐܝ̣ܬܰܘܗ̱ܝ: ܘܡܶܛܽܠ ܗܳܕܶܐ ܒܣܘ̣ܘܳܚܳܐ ܐܰܚ̣ܶܒ ܕܢ̣ܶܚܙܶܝܘܗ̱ܝ: ܘܰܡܦܝ̣ܣ ܗ̱ܘܳܐ ܠܶܗ ܕܢ̣ܺܐܬܶܐ ܨܶܝܕܰܘܗ̱ܝ ܘܢ̣ܰܐܣܶܝܘܗ̱ܝ ܡ̣ܶܢ ܟܘ̣ܪܗܳܢܶܗ: ܕܝܰܕܥ̣ܶܗ ܕܰܫܡܰܝܳܢܳܐ ܗ̱ܘ̇ ܒܰܥܒܝ̣̈ܕܳܬܶܗ: ܗܳܢܳܐ ܕܠܳܐ ܒ̣ܨܳܐ ܒܬܰܪܥܝ̣ܬܶܗ ܕܰܐܝܟܰܢ ܡܰܨܝܳܐ ܕܰܐܠܳܗܳܐ ܢ̣ܶܚܘ̣ܬ ܠܰܐܪܥܳܐ ܘܰܢ̣ܗܰܠܶܟ ܒܳܗܿ: ܐܶܠܳܐ ܗܰܝܡ̣ܶܢ ܘܰܐܫ̣ܰܪ ܕܠܳܐ ܦܘ̣ܠܳܓܳܐ ܘܰܒܨܳܬܳܐ: ܕܗܘ̣ ܐܰܠܳܗܳܐ ܢܚ̣ܶܬ ܡ̣ܶܢ ܫܡܰܝܳܐ ܘܗܰܠ̣ܶܟ ܒܰܐܪܥܳܐ ܘܩܰܒ̣ܶܠ ܛܘ̣ܒܳܐ: ܡ̣ܶܢ ܡܳܪܝܳܐ ܗܰܘ̇ ܕܗܰܝܡ̣ܶܢ ܒܶܗ: ܘܗܰܝܡܳܢܘ̣ܬܳܐ ܕܝ̣ܠܶܗ ܟܠܝ̣ܠܳܐ ܢܶܣ̣ܒܰܬ݀ : ܗܳܢܳܐ ܕܠܳܐ ܦܶܣ̣ܥܰܬ݀ ܗܰܝܡܳܢܘ̣ܬܶܗ ܥܰܠ ܟܰܣ̈ܝܳܬܳܐ: ܘܠܳܐ ܙܰܠ̣ܶܠ ܫܰܪܒܳܐ ܕܰܡܕܰܒܪܳܢܘ̣ܬܶܗ ܕܰܒܪܳܐ ܒܝܰܕ ܫܘ̣̈ܐܳܠܶܐ: ܐܳܦܠܳܐ ܐܶܣ̣ܬܢܶܩ ܥܰܠ ܝܘ̣ܠܦܳܢܳܐ ܐ̱ܚܪܺܢܳܐ ܕܢ̣ܶܬܬܰܘܣܰܦ ܠܶܗ: ܐܶܠܳܐ ܕܠܳܐ ܥܘ̣ܩܳܒܳܐ ܘܰܕܠܳܐ ܕܪܳܫܳܐ ܟܬ̣ܰܒ ܠܶܗ ܠܰܡܫܝ̣ܚܳܐ ܕܰܐܠܳܗܳܐ ܐܰܢ̱ܬ ܘܒܰܪ ܐܰܠܳܗܳܐ: ܘܠܳܐ ܣ̣ܕܰܪ ܫܰܪ̈ܒܶܐ ܐܰܪ̈ܝ̣ܟܶܐ ܒܣܘ̣ܓܳܐܐ ܕܡ̈ܶܠܶܐ ܝܰܬܝ̣ܪ̈ܳܬܳܐ: ܒܰܕܓܽܘܢ ܗܳܝ̇ ܕܛܘ̣ܒܰܝܟ ܩܰܒ̣ܶܠ ܡ̣ܶܢ ܡܫܝ̣ܚܳܐ ܐܰܠܳܗܳܐ: ܘܶܐܫ̣ܬܘܝ̣ ܠܡܰܘܗܰܒܬܳܐ ܕܝܘ̣ܩܢܶܗ ܦܰܐܝܳܐ ܘܦܳܪܘ̣ܩܳܝܳܐ: ܗܰܘ̇ ܕܟܰܕ ܠܳܐ ܚܙ̣ܳܝܗ̱ܝ ܝܰܕܥ̣ܶܗ ܘܗܰܝܡ̣ܶܢ ܒܶܗ: ܐܳܦ ܗܳܫܳܐ ܐܳܘ ܡܳܪܝܳܐ ܛܘ̣ܒܬܳܢ ܒܟܽܠ ܘܪܳܚܶܡ ܐ̱ܢܳܫ̈ܳܐ ܡܶܬܟܰܫܦܝ̣ܢܰܢ ܠܛܳܒܘ̣ܬܳܟ ܘܰܡܦܝ̣ܣܝ̣ܢܰܢ ܠܪ̈ܰܚܡܰܝܟ ܒܝܰܘܡܳܐ ܗܳܢܳܐ ܕܥ̱ܘ̣ܗܕܳܢܳܐ ܕܝܘ̣ܩܢܳܟ ܦܳܪܘ̣ܩܳܝܳܐ: ܕܬܶܬ̣ܩܰܒܰܠܝ̱ ܒܳܥܘ̣ܬܰܢ ܩܕܳܡܰܝܟ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܘܰܐܟܡܳܐ ܕܶܐܬܩܰܒ̣ܠܰܬ݀ ܒܳܥܘ̣ܬܶܗ ܕܰܐܒܓܰܪ ܡܰܠܟܳܐ ܡܗܰܝܡܢܳܐ: ܘܫܶܐܠܬܶܗ ܐܶܬ̣ܦܰܢܝܰܬ݀ : ܒܢܝ̣ ܠܥܺܕܬܳܟ ܗܳܝ ܕܰܩܢ̣ܰܝܬ ܕܝܳܬܒܳܐ ܥܰܠ ܣܰܒܪܳܟ ܘܰܡܣܰܟܝܳܐ ܠܦܘ̣ܪܩܳܢܳܐ ܕܝ̣ܠܳܟ: ܘܰܦܪܘ̣ܩܶܝܗܿ ܡ̣ܶܢ ܕܺܐܒ̈ܶܐ ܡܶܬܝܰܕ̈ܥܳܢܶܐ ܘܡܶܬܪ̈ܰܓܫܳܢܶܐ: ܘܡ̣ܶܢ ܚܺܐܦܳܐ ܕܥܰܡ̱̈ܡܶܐ ܒܰܪܒܪ̈ܳܝܶܐ ܘܰܕܠܳܐ ܐܰܠܳܗ: ܘܰܐܝܟܰܢܳܐ ܕܡ̣ܶܢ ܫܘ̣ܪܳܝܳܐ ܒܛܰܝܒܘ̣ܬܳܟ ܓܒܰܠ̣ܬܳܢ: ܘܡܶܢܕܪܝ̣ܫ ܟܰܕ ܢܦܰܠ̣ܢܰܢ ܒܝܰܕ ܡܰܛܥܝܳܢܘ̣ܬܳܐ ܕܚܶܘܝܳܐ ܢܳܟܘ̣ܠܳܐ ܫ̣ܰܕܰܪܬ ܠܰܒܪܳܟ ܝ̣ܚܝ̣ܕܳܝܳܐ ܠܦܘ̣ܪܩܳܢܰܢ: ܘܫܰܡ̣ܠܝ̣ ܒܰܩܢܘ̣ܡܶܗ ܟܽܠܗܽܝܢ ܐ̱ܢܳܫ̈ܳܝܳܬܳܐ ܘܰܦ̣ܪܰܩ ܠܰܢ: ܘܰܒܝܰܕ ܣܳܥܘ̣ܪܘ̣ܬ ܬܶܕܡܪ̈ܳܬܳܐ ܐܶܬܝ̣ܕܰܥ ܕܰܐܠܳܗܰܐ ܗ̱ܘ̇ ܘܒܰܪ ܐܰܠܳܗܳܐ: ܐܳܦ ܗܳܫܳܐ ܒܗܽܘܢ ܒܪ̈ܰܚܡܶܐ ܘܪܶܚܡܰܬ݀ ܐ̱ܢܳܫܘ̣ܬܳܟ ܣܥܘ̣ܪ ܠܰܢ: ܘܚܰܝܶܠ ܠܰܢ ܕܢ̇ܶܛܰܪ ܦܘ̣ܩ̈ܕܳܢܰܝܟ ܘܰܢ̇ܫܰܡܠܶܐ ܨܶܒܝܳܢܳܟ ܒܗܳܠܶܝܢ ܝܰܘ̈ܡܳܬܳܐ ܩܰܕܝ̈ܫܶܐ ܕܨܰܘܡܳܐ: ܘܰܒܟܽܠܗܽܘܢ ܝܰܘܡ̈ܳܬܳܐ ܕܚܰܝ̈ܰܝ݂ܢ: ܘܕܰܒܛܰܝܒܘ̣ܬܳܟ ܫܰܪܝ̣ܢܰܢ: ܘܰܒܚܰܝܠܳܟ ܡܰܨܰܥ̣ܢܰܢ: ܘܰܒܣܘ̣ܝܳܥܳܐ ܘܥܘ̣ܕܪܳܢܳܐ ܕܡܶܢܳܟ ܢܶܫ̇ܬܘܶܐ ܠܡܘܢܳܥܳܐ ܕܦܶܨܚܳܐ ܕܝ̣ܚܝ̣ܕܳܝܳܟ ܡܰܦܨܰܚ ܠܪ̈ܳܚܡܰܘܗ̱ܝ: ܘܠܰܩܝܳܡܬܶܗ ܦܳܪܘ̣ܩܳܝܬܳܐ ܒܦܰܪܶܗܣܺܝܰܐ ܢ̇ܩܰܒܶܠ: ܚܽܘܢ ܠܚܰܛܳܝ̈ܶܐ: ܣܰܡܶܟ ܠܰܡܚܝ̣̈ܠܶܐ ܐܰܣܳܐ ܠܰܟܪ̈ܝ̣ܗܶܐ: ܡܰܢܰܥ ܠܛܳܝ̈ܘ̣ܦܶܐ: ܪܰܝܰܚ ܩܺܐܪ̈ܣܶܐ: ܐܰܩܝ̣ܡ ܠܢܰܦ̈ܠܶܐ: ܟܰܢܶܟ ܠܙܰܠܝ̣̈ܠܶܐ: ܠܰܒܶܒ ܠܥܰܝ݂ܺܝ̈ܩܶܐ: ܠܰܘܳܐ ܠܬܰܝܳܒ̈ܶܐ: ܚܰܟܶܡ ܠܟܳܗ̈ܢܶܐ: ܛܰܟܶܣ ܠܰܡܫܰܡ̈ܫܳܢܶܐ: ܝܰܒܶܠ ܠܪ̈ܰܚܝ̣ܩܶܐ: ܐܰܦܢܳܐ ܠܛܳܥܰܝ̈ܳܐ: ܕܽܘܢ ܕܝ̣ܢܳܐ ܕܰܛܠܝ̣̈ܡܶܐ: ܟܰܘܶܢ ܠܛܳܠܘ̣ܡ̈ܶܐ: ܬܰܗܳܐ ܠܚܶܪ̈ܝܳܢܶܐ: ܒܰܝܰܐ ܠܰܙܥܘ̣ܪ̈ܰܝ ܢܰܦܫܳܐ: ܘܚܰܣܳܐ ܒܛܰܝܒܘ̣ܬܳܟ ܠܥܰܢܝ̣̈ܕܶܐ ܕܰܫܟ̣ܶܒܘ̱ ܥܰܠ ܣܰܒܪܳܟ ܒܗܰܝܡܳܢܘ̣ܬܳܐ ܕܰܫܪܳܪܳܐ: ܘܰܚܢܰܢ ܘܗ̣ܶܢܽܘܢ ܢܶܫ̇ܬܘܶܐ ܕܰܢ̇ܫܰܒܚܳܟ ܟܢܝ̣ܫܳܐܝ̣ܬ ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ: ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀