ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܓܢܺܝ̣ܙܳܐ ܕܬܶܓ̈ܡܰܝ ܓܰܘܙܰܠܬܳܐ ܓܡܝ̣ܪܳܐܝ̣ܬ ܡܗܰܠܠܝ̣ܢ ܠܶܗ: ܡܰܠܰܐܟ̈ܰܝ ܢܘ̣ܗܪܳܐ ܢܰܗܝ̣ܪܳܐܝ̣ܬ ܡܗܰܕܪܝ̣ܢ ܠܶܗ: ܨܒܝ̣ ܡܳܪܝܳܐ ܘܩܰܒܶܠ ܡܶܢܰܢ ܨܠܰܘ̈ܳܬܳܐ ܘܒܳܥ̈ܘܳܬܳܐ ܘܬܰܟܫ̈ܦܳܬܳܐ ܨܰܦܪ̈ܳܝܳܬܳܐ ܕܰܡܩܰܪܒܝ̣ܢܰܢ ܠܳܟ: ܘܥܰܡ ܕܶܢܚܶܗ ܕܨܰܦܪܳܐ ܐܰܨܡܰܚ ܒܰܢ ܢܘ̣ܗܪܳܐ ܕܝ̣ܠܳܟ ܠܳܐ ܡܶܬܥܰܡܛܳܢܳܐ: ܘܡܶܢܳܟ ܘܒܳܟ ܢ̇ܶܬܢܗܰܪ ܘܰܒܢܘ̣ܗܪܳܐ ܕܰܐܦܰܝ̈ܟ ܢ̇ܶܬܗܰܕܶܐ ܐܰܝܟ ܫܶܡܫܳܐ ܒܡܰܠܟܘ̣ܬܳܟ ܚܢܰܢ ܘܥܰܢܝ̣̈ܕܰܝܢ: ܘܟܽܠܗܽܘܢ ܥܰܢܝ̣̈ܕܶܐ ܡܗܰܝܡ̈ܢܶܐ ܥܰܡ ܩܰܕܝ̣̈ܫܰܝܟ ܢ̇ܶܬܚܙܶܐ: ܘܥܰܡܗܽܘܢ ܘܒܰܝܢܳܬܗܽܘܢ ܐܰܟܘܳܬܗܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܫܘ̣ܒܚܳܐ ܠܗܰܘ̇ ܡܫܰܒܚܳܐ ܘܩܰܕܝ̣ܫܳܐ ܕܰܫܡܰܝܳܐ ܫܘ̣ܒܚܶܗ ܡܶܫܬܰܥܶܝܢ: ܘܰܪܩܝ̣ܥܳܐ ܬܡܝ̣̈ܗܳܬܶܗ ܡܚܰܘܶܐ: ܘܰܐܪܥܳܐ ܒܰܡܠܳܐܴܗ̇ ܬܶܫܒܘ̣ܚܬܶܗ ܡܰܟܪܙܳܐ: ܘܳܐܦ ܒܢܰܝ̈ܢܳܫܳܐ ܠܛܰܝܒܘ̣ܬܶܗ ܡܰܘܕܶܝܢ: ܗܰܘ̇ ܕܡܶܛܽܠ ܪܶܚܡܰܬ݀ ܐ̱ܢܳܫܘ̣ܬܶܗ ܪܰܒܬܳܐ ܘܛܰܝܒܘ̣ܬܶܗ ܕܠܳܐ ܣܳܟܳܐ ܟܰܕ ܚ̣ܙܳܐ ܕܰܒܪܶܓܰܬ݀ ܡܶܐܟܘ̣ܠܬܳܐ ܐܰܒܥ̣ܶܕ ܓܢܶܣ ܐ̱ܢܳܫܘ̣ܬܰܢ ܡܶܢ ܕܘ̣ܝܳܪܳܐ ܕܰܒܦܰܪܕܰܝܣܳܐ ܘܠܰܒܥܝ̣ܪܳܐ ܐܶܬ̣ܕܰܡܝ̣: ܘܶܐܫ̣ܬܠܶܡ ܠܚܰܝܽܘ̣ܬܳܐ ܘܰܗ̣ܘܳܐ ܪܶܥܝܳܐ ܠܡܰܘܬܳܐ ܒܝܰܕ ܨܰܘܡܳܐ ܩܰܕܝ̣ܫܳܐ ܐܰܣܝ̣ ܠܝܰܥܢܘ̣ܬܳܐ ܕܓܶܫ̣ܦܰܬ݀ ܒܶܗ: ܘܥܰܠ ܫܶܕܬܶܗ ܩܰܕܡܳܝܬܳܐ ܐܰܦܢ̣ܝܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܡܶܛܽܠ ܦܘ̣ܪܩܳܢܳܐ ܕܓܶܢܣܰܢ ܐ̱ܢܳܫܳܝܳܐ ܢܚ̣ܶܬܬ ܡ̣ܶܢ ܡܶܕܝܳܪ̈ܰܝܟ ܪ̈ܳܡܶܐ ܘܰܡܥܰܠܰܝ̈ܳܐ ܠܘܳܬܰܢ ܟܰܕ ܠܳܐ ܫܰܢܝ̣ܬ ܡܶܢ ܨܶܝܕ ܐܰܒܘ̣ܟ ܡܫܰܒܚܳܐ: ܘܶܐܬܗ̣ܰܦܰܟܬ ܒܥܳܠܡܳܐ ܥܰܡܰܢ ܡܕܰܒܪܳܢܳܐܝ̣ܬ: ܘܟܽܠܗܶܝܢ ܗܳܠܶܝܢ ܕܶܝܢ ܫܰܡ̣ܠܝ̣ܬ ܣܛܰܪ ܡܶܢ ܚܛܝ̣ܬܳܐ: ܘܨܰܘܡܳܐ ܐܰܪܒܥܝ̣ܢܳܝܳܐ ܚܠܳܦܰܝܢ ܨܳܡ̣ܬ ܘܰܕܪܰܫ̣ܬ ܠܰܢ ܒܶܗ ܐܘ̣ܪܚܳܐ ܕܡܰܘܒܠܳܐ ܠܚܰܝ̈ܶܐ ܛܘ̣ܒ̈ܬܳܢܶܐ ܘܕܰܠܥܳܠܰܡ ܡܩܰܘܶܝܢ: ܘܡ̣ܶܢ ܐܳܟܶܠܩܰܪܨܳܐ ܐܶܬ̣ܢܰܣܝ̣ܬ ܘܫܰܦܶܠ̣ܬ ܠܰܡܢܰܣܝܳܢܳܐ ܒܚܰܝܠܳܟ: ܘܙܳܟܘ̣ܬܳܐ ܫܰܟܶܢ̣ܬ ܠܰܢ ܥܠܰܘܗ̱ܝ ܒܝܰܕ ܨܰܘܡܳܐ ܩܰܕܝ̣ܫܳܐ ܘܰܨܠܰܘ̈ܳܬܳܐ ܣܒܝ̣̈ܣܳܬܳܐ: ܐܰܟܡܳܐ ܕܫܰܘܕܰܥ̣ܬ ܒܰܣܒܰܪܬܳܟ ܦܳܪܘ̣ܩܳܝܬܳܐ ܟܰܕ ܐܳܡܰܪ ܐܰܢ̱ܬ: ܕܗܳܐ ܠܰܡ ܓܶܢܣܳܐ ܠܳܐ ܢܳܦܶܩ ܐܶܠܳܐ ܒܨܰܘܡܳܐ ܘܒܰܨܠܘ̣ܬܳܐ: ܐܰܢ̱ܬ ܐܳܦ ܡܳܪܝܳܐ ܗܰܒܠܰܢ ܕܢ̇ܶܬܰܐܣܶܐ ܡ̣ܶܢ ܡܚܘ̣ܬܳܐ ܕܰܚܛܳܗ̈ܰܝܢ ܒܝܰܕ ܬܝܳܒܘ̣ܬܳܐ ܫܰܪܝ̣ܪܬܳܐ: ܘܰܒܥܘ̣ܕܪܳܢܳܐ ܕܡܶܢܳܟ ܢ̇ܶܣܰܒ ܙܳܟܘ̣ܬܳܐ ܥܰܠ ܟܽܠܗܽܘܢ ܩܪ̈ܳܒܰܘܗ̱ܝ ܕܳܐܟܶܠܩܰܪܨܳܐ ܘܨܶܢܥ̈ܳܬܶܗ ܕܒܝ̣ܫܳܐ: ܐܰܢ̱ܬ ܗ̱ܘ̣ ܓܶܝܪ ܕܰܠܓܘ̣ܫ̈ܡܶܐ ܕܡܰܟܶܐܒܝ̣ܢ ܝܳܗܶܒ ܐܰܢ̱ܬ ܥܘ̣ܕܪ̈ܳܢܶܐ ܣܰܓܺܝ̈ܶܐܐ: ܠܢܰܦܫ̈ܳܬܰܢ ܣܰܡ̱̈ܡܳܢܶܐ ܕܚܰܝ̈ܶܐ ܫܰܟܶܢ: ܐܳܣܝܘ̣ܬܳܐ ܕܐܝ̣ܬܰܝܗܽܘܢ ܗܰܝܡܳܢܘ̣ܬܳܐ ܬܪܝ̣ܨܬܳܐ: ܬܝܳܒܘ̣ܬܳܐ ܫܰܪܝ̣ܪܬܳܐ ܕܟܝ̣ܬܳܐ ܘܰܡܩܰܒܰܠܬܳܐ: ܬܰܘܕܝ̣ܬܳܐ ܩܰܕܝ̣ܫܬܳܐ ܒܟܳܬܳܐ ܡܶܬܚܰܢܳܢܝ̣ܬܳܐ: ܨܠܘ̣ܬܳܐ ܕܟܝ̣ܬܳܐ: ܙܶܕܰܩܬܳܐ ܫܦܝ̣ܥܬܳܐ: ܨܰܘܡܳܐ ܩܰܕܝ̣ܫܳܐ: ܚܘ̣ܒܳܐ ܫܰܪܝ̣ܪܳܐ: ܠܶܒܳܐ ܕܰܕܟ̇ܶܐ̣ ܡܶܢ ܐܰܟܬܳܐ ܘܰܫ̇ܦܶܐ̣ ܡ̣ܶܢ ܚܶܪܝܳܢܳܐ: ܢܰܟܦܘ̣ܬܳܐ: ܙܰܕܝ̣ܩܘ̣ܬܳܐ: ܟܽܠ ܣܘ̣ܥܪܳܢܳܐ ܝܰܡܝ̣ܢܳܝܳܐ ܘܫܰܦܝ̣ܪܳܐ: ܠܳܐ ܬ̣ܶܐܢܰܕ ܠܳܟ ܡ̣ܶܢ ܚܛܳܗ̈ܰܝܢ ܘܬ̣ܶܐܚܘ̣ܕ ܒܰܐܦܰܝ̈ܢ ܬܰܪܥܳܐ ܕܚܰܝ̈ܶܐ: ܘܗܰܒܠܰܢ ܕܢ̣ܰܐܡܶܕ ܡ̣ܶܢ ܟܽܠܗܽܘܢ ܦܰܚܰܘ̈ܗ̱ܝ ܘܰܡܨܝ̣̈ܕܳܬܶܗ ܡܰܘܒ̈ܕܳܢܝܳܬܳܐ ܕܒܝ̣ܫܳܐ: ܘܠܳܐ ܢ̇ܩܰܘܶܐ ܒܫܘ̣ܪ̈ܥܳܬܳܐ ܕܓܳܕ̈ܫܳܢ ܠܰܢ: ܘܶܐܬܦܰܢ ܥܠܰܝܢ ܒܪ̈ܰܚܡܶܐ ܘܒܰܚܢܳܢܳܐ: ܐܰܢ̱ܬ ܓܶܝܪ ܐܶܡ̣ܰܪܬ: ܐܶܬܦܢܰܘ ܠܘܳܬܝ̱ ܘܶܐܬܦ̇ܢܶܐ ܥܠܰܝܟܽܘܢ ܘܰܐܣܶܐ ܬܒܳܪܟܽܘܢ: ܘܦܰܨܳܐ ܘܫܰܘܙܶܒ ܠܰܢ ܡ̣ܶܢ ܡܣܳܡܒܪܝ̣ܫܳܐ ܕܰܠܥܳܠܰܡ: ܡܶܛܽܠ ܕܚܰܢܳܢܳܐ ܐܝ̣ܬܰܝܟ ܘܰܡ̇ܠܶܐ̣ ܪ̈ܰܚܡܶܐ: ܘܠܳܟ ܫܘ̣ܒܚܳܐ ܡܰܣܩܝ̣ܢܰܢ ܘܠܰܐܒܘ̣ܟ ܘܰܠܪܘܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܕܝ̣ܫܳܐ ܘܰܡܩܰܕܫܳܢܳܐ ܕܟܽܠܗܽܘܢ ܐܰܝܠܶܝܢ ܕܰܒܨܰܘܡܳܐ ܩܰܕܝ̣ܫܳܐ ܘܰܒܗܰܝܡܳܢܘ̣ܬܳܐ ܫܰܪܝ̣ܪܬܳܐ ܡܶܬܩܰܪܒܝ̣ܢ ܠܶܗ: ܩܰܒܶܠ ܡܶܢܰܢ ܡܚܝ̣̈ܠܶܐ ܘܚܰܛܳܝ̈ܶܐ ܠܒܶܣ̈ܡܶܐ ܗܳܠܶܝܢ ܕܩܰܪܶܒ̣ܢܰܢ ܩܕܳܡܰܝܟ: ܘܕܰܟܳܐ ܠܠܶܒܰܘ̈ܳܬܰܢ: ܘܩܰܕܶܫ ܠܢܰܦ̈ܫܳܬܰܢ: ܘܰܥܒܶܕܰܝܢ ܗܰܝܟ̈ܠܶܐ ܩܰܕܝ̣̈ܫܶܐ ܠܰܥܡܘ̣ܪܝܳܐ ܕܐܝ̣ܩܳܪܳܟ: ܘܰܠܫܘ̣ܒܚܳܐ ܘܪܘ̣ܡܪܳܡܳܐ ܕܰܐܠܳܗܘ̣ܬܳܟ ܘܰܠܩܘ̣ܠܳܣܳܐ ܕܰܫܡܳܟ ܩܰܕܝ̣ܫܳܐ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀