ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܚܰܕ ܐܰܠܳܗܳܐ ܫܰܪܝ̣ܪܳܐ ܕܨܳܒܶܐ ܒܚܰܝ̈ܶܐ ܘܦܘ̣ܪܩܳܢܳܐ ܕܰܒܢܰܝ̈ܢܳܫܳܐ: ܘܚܳܕܶܐ ܒܥܰܒ̈ܕܰܘܗ̱ܝ ܕܡܶܬܢܰܨܚܝ̣ܢ ܒܦܘ̣ܠܚܳܢܳܐ ܕܰܡܝܰܬܪ̈ܳܬܳܐ: ܘܦܳܪܰܥ ܛܳܒ̈ܳܬܳܐ ܠܰܕܡܶܬܟܰܫܪܝ̣ܢ ܒܰܥܒ̈ܳܕܶܐ ܕܙܰܕܝ̣ܩܘ̣ܬܳܐ: ܘܝܳܗܶܒ ܐܰܓܪܳܐ ܛܳܒܳܐ ܠܕܰܡܝܰܩܪܝ̣ܢ ܠܶܗ ܒܩܰܕܝ̣ܫܘ̣ܬܳܐ: ܘܫܳܦܪܝ̣ܢ ܠܶܗ ܒܰܡܚܰܡܣܢܳܢܘ̣ܬܳܐ ܘܥܳܢܘܳܝܽܘ̣ܬܳܐ: ܕܠܶܗ ܢ̇ܰܘܕܶܐ ܘܢ̇ܶܣܓܘ̣ܕ ܘܰܢ̇ܫܰܒܰܚ ܘܰܢ̇ܪܰܡܪܶܡ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܗܰܘ̇ ܕܡܰܢܗܰܪ ܐܰܢ̱ܬ ܟܰܣ̈ܝܳܬܶܗ ܕܚܶܫܘ̣ܟܳܐ: ܘܒܳܚܰܪ ܐܰܢ̱ܬ ܠܶܒܰܘ̈ܳܬܳܐ ܘܟܘ̣ܠ̈ܝܳܬܳܐ ܕܰܒܢܰܝ̈ܢܳܫܳܐ: ܗܰܘ̇ ܕܰܒ̣ܪܰܝܬ ܐܝ̣ܡ̈ܳܡܶܐ ܘܠܰܝ̈ܠܰܘܳܬܳܐ: ܗܳܠܶܝܢ ܡܰܢ ܠܦܘ̣ܠܚܳܢܳܐ ܕܛܳܒ̈ܳܬܳܐ ܘܰܠܣܳܥܘ̣ܪܘ̣ܬܳܐ ܕܫܰܦܝ̣ܪ̈ܳܬܳܐ: ܗܳܠܶܝܢ ܕܶܝܢ ܠܫܶܠܝܳܐ ܕܡ̣ܶܢ ܬܥܳܫ̈ܶܐ ܣܪ̈ܝ̣ܩܶܐ ܘܰܠܢܰܘܚܳܐ ܕܡ̣ܶܢ ܪ̈ܶܗܛܶܐ ܠܳܐ ܡܰܘܬܪ̈ܳܢܶܐ: ܐܰܢ̱ܬ ܓܶܝܪ ܡܳܪܳܐ ܛܳܒܳܐ ܘܒܰܣܝ̣ܡܳܐ ܟܰܕ ܬܶܫܡܶܫܬܳܐ ܕܝ̣ܠܳܟ ܟܳܗܢܳܝܬܳܐ ܐܰܓܥܶܠ̣ܬ ܠܰܢ: ܘܫܽܘ̈ܘ̣ܟܳܢܶܐ ܐܰܠܳܗ̈ܳܝܶܐ ܒܐܝ̣̈ܕܰܝܳܐ ܚܰܣ̈ܝܳܬܳܐ ܕܪ̈ܝ̣ܫܰܝ ܟܳܗ̈ܢܶܐ ܕܝ̣ܠܳܟ ܩܰܕܝ̣̈ܫܶܐ ܐܰܣܪܰܚ̣ܬ ܠܰܢ: ܘܰܒܦܳܠܚܘ̣ܬܳܐ ܗܳܕܶܐ ܐܰܠܳܗܳܝܬܳܐ ܐܶܣ̣ܰܪܬ ܠܰܢ: ܘܰܒܛܘ̈ܦܣܶܐ ܕܓܘ̣ܕ̈ܶܐ ܡܰܠܰܐܟܳܝ̈ܳܬܳܐ ܠܰܢ ܠܥܰܦܪ̈ܳܢܶܐ ܛܰܟܶܣ̣ܬ: ܘܰܒܝܰܕ ܙܘ̣ܡܳܪ̈ܶܐ ܘܗܘ̣̈ܠܳܠܶܐ ܥܒ̣ܰܕܬܳܗ̇ ܠܰܐܪܥܳܐ ܫܡܰܝܳܐ ܕܡܰܠܝܳܐ ܡ̣ܶܢ ܬܶܫܒ̈ܚܳܬܳܐ ܕܝ̣ܠܳܟ: ܗܳܫܳܐ ܐܳܘ ܡܳܪܝܳܐ ܡܶܛܽܠ ܕܰܠܩܰܘܡܳܐ ܕܰܩܕܳܡܰܝܟ ܐܰܫܘܝ̣ܬܳܢ ܒܠܺܠܝܳܐ ܗܳܢܳܐ: ܘܰܒܡܰܚ̈ܫܒܳܬܳܐ ܟܢܝ̣̈ܟܳܬܳܐ ܘܫܰܦܝ̈ܳܬܳܐ: ܐܰܫܘܳܐ ܠܰܢ ܕܰܢ̇ܙܰܡܰܪ ܠܳܟ ܘܰܢ̇ܫܰܒܰܚ ܠܳܟ: ܘܟܰܕ ܠܒܰܪܢܳܫܰܢ ܥܰܬܝ̣ܩܳܐ ܠܺܠܝܳܝܳܐ ܡܰܫܠܰܚ ܐܰܢ̱ܬ ܡܶܢܰܢ: ܐܰܠܒܶܫ ܠܰܢ ܗܰܘ̇ ܚܰܕܬܳܐ ܘܨܰܦܪܳܝܳܐ ܕܒܰܥ̈ܒܳܕܶܐ ܡܝܰܬܪ̈ܶܐ ܡܶܬܓܡܰܪ: ܟܰܕ ܠܒܶܗܬܬܳܐ ܘܰܟܡܝ̣ܪܘ̣ܬܳܐ ܕܣܰܢܝ̈ܳܬܳܐ ܕܝ̣ܠܰܢ ܩܳܦܶܠ ܐܰܢ̱ܬ: ܒܫܘ̣ܦܪ̈ܶܐ ܗܳܢܽܘܢ ܕܢܘ̣ܪܳܐ ܘܪܘ̣ܚܳܐ ܨܰܒܶܬ ܠܰܢ: ܘܟܰܕ ܠܶܐܫܛܳܪܳܐ ܕܚܰܘܒ̈ܳܬܰܢ ܡܣܰܕܶܩ ܐܰܢ̱ܬ: ܒܣܶܦܪܳܐ ܕܝ̣ܠܳܟ ܗܰܘ̇ ܕܚܰܝ̈ܶܐ ܥܰܠܳܐ ܘܰܟܬܘ̣ܒ ܠܰܢ: ܘܟܰܕ ܠܥ̱ܽܘ̣ܗܕܳܢܳܐ ܕܒܝ̣̈ܫܳܬܳܐ ܡܶܢ ܬܰܪ̈ܥܝܳܬܳܐ ܕܝ̣ܠܰܢ ܡܳܪܶܩ ܐܰܢ̱ܬ: ܪܫܘ̣ܡ ܥܰܠ ܠܘ̣ܚ̈ܶܐ ܕܠܶܒܰܘ̈ܳܬܳܐ ܕܝ̣ܠܰܢ ܦܘ̣ܩ̈ܕܳܢܶܐ ܕܝ̣ܠܳܟ ܐܶܘܰܢ̈ܓܶܠܳܝܶܐ ܘܦܳܪ̈ܘ̣ܩܳܝܶܐ: ܘܰܐܫܘܳܐ ܠܰܢ ܕܰܒܡܰܟܝ̣ܟܘ̣ܬܳܐ ܕܩܰܕܝ̣̈ܫܰܝܟ ܢ̇ܶܬܕܰܡܶܐ: ܘܰܚܠܝ̣ܡܳܐܝ̣ܬ ܢ̇ܶܪܗܰܛ ܘܢ̇ܰܦܪܶܓ ܒܶܐܣܛܰܕܺܝܳܘܢ ܗܳܢܳܐ ܕܨܰܘܡܳܐ ܩܰܕܝ̣ܫܳܐ ܕܠܳܐ ܡܰܐܝ̣ܢܘ̣ܬܳܐ ܘܪܰܦܝܘ̣ܬܳܐ: ܘܰܐܟܡܳܐ ܕܶܐܫܬܰܘܕܝ̣ܬ ܒܰܣܒܰܪܬܳܐ ܕܝ̣ܠܳܟ ܡܰܠܝܰܬ݀ ܚܰܝ̈ܶܐ ܘܶܐܡ̣ܰܪܬ: ܕܟܽܠ ܕܪܳܚܶܡ ܠܝ̣ ܘܢܳܛܰܪ ܦܘ̣ܩ̈ܕܳܢܰܝ܆ ܐܶܢܳܐ ܘܰܐܒܳܐ ܠܘܳܬܶܗ ܐܳܬܶܝܢܰܢ ܘܰܥܡܘ̣ܪܝܳܐ ܠܘܳܬܶܗ ܥܳܒܕܝ̣ܢܰܢ: ܗܳܟܰܢܳܐ ܥܡܰܪ ܘܕܰܝܰܪ ܒܗܰܘ̈ܢܶܐ ܘܪ̈ܶܥܝܳܢܶܐ ܕܝ̣ܠܰܢ: ܘܰܥܒܶܕܰܝܢ ܢܰܘܣ̈ܶܐ ܕܟܰܝ̈ܳܐ ܘܩܰܕܝ̣̈ܫܶܐ ܠܰܥܡܘ̣ܪܝܳܐ ܕܐܝ̣ܩܳܪܳܟ: ܘܒܶܝܬ ܡܰܫܪܝܳܐ ܠܪ̈ܰܚܡܰܝܟ: ܘܰܐܥܝ̣ܪ ܠܪ̈ܶܥܝܳܢܰܝܢ ܠܫܘ̣ܒܚܳܐ ܕܰܫܡܳܟ: ܘܠܳܐ ܢ̇ܶܕܡܰܟ ܫܶܢܬܳܐ ܕܡܰܗܡܝܳܢܘ̣ܬܳܐ ܘܕܰܚܛܝ̣ܬܳܐ: ܗܳܝ̇ ܕܰܡܙܰܡܢܳܐ ܠܬܰܫܢܝ̣̈ܩܶܐ ܕܰܠܥܳܠܰܡ: ܐܶܠܳܐ ܕܰܒܰܪ ܠܰܢ ܒܐܘ̣ܪ̈ܚܳܬܳܐ ܕܟܺܐܢܘ̣ܬܳܐ: ܘܒܰܐܝܠܶܝܢ ܕܰܡܢܝ̣̈ܚܳܢ ܠܨܶܒܝܳܢܳܐ ܕܝ̣ܠܳܟ: ܘܰܒܝܰܘܡܳܐ ܕܩܶܨܳܐ ܐܰܘܟܝ̣ܬ ܕܡܰܦܩܳܢܳܐ ܕܡܶܢ ܥܳܠܡܳܐ ܒܝܰܕ ܡܰܘܬܳܐ ܕܰܓܙܝ̣ܪ ܥܠܰܝܢ: ܒܛܘ̣ܒܬܳܢܘ̣ܬܳܐ ܗܳܝ̇ ܕܠܳܐ ܡܶܣܬܰܒܥܳܐ ܐܰܘܟܝ̣ܬ ܒܘ̣ܣܳܡܳܐ ܪܘ̣ܚܳܢܳܝܳܐ ܘܗܰܘܢܳܢܳܝܳܐ: ܕܰܒܬܶܐܘܳܪ̈ܺܝܰܐܣ ܐܰܠܳܗ̈ܳܝܳܬܳܐ ܥܰܡ ܚܰܝ̈ܠܰܘܳܬܳܐ ܫܡܰܝ̈ܳܢܶܐ ܒܰܣܶܡ ܠܰܢ: ܘܰܠܘܳܬܳܟ ܩܰܕܡܳܝܳܐ ܘܰܐ̱ܚܪܳܝܳܐ ܘܰܪܓܝ̣ܓܳܐ ܘܗܰܢܺܝܳܐܐ ܠܡܶܬܩܰܪܳܒܘ̣ ܐܰܫܘܳܐ ܠܰܢ: ܘܫܘ̣ܒܚܳܐ ܕܠܳܐ ܣܳܟܳܐ ܘܐܝ̣ܩܳܪܳܐ ܠܳܐ ܡܶܬܦܰܚܡܳܢܳܐ ܘܪܘ̣ܡܪܳܡܳܐ ܠܳܐ ܡܰܘܦܝܳܢܳܐ: ܘܬܰܘܕܝ̣ܬܳܐ ܐܰܡܝ̣ܢܬܳܐ ܘܩܘ̣ܒܳܠܛܰܝܒܘ̣ܬܳܐ ܠܳܐ ܡܶܬܦܰܣܩܳܢܝ̣ܬܳܐ ܘܣܶܓܕܬܳܐ ܡܬܘ̣ܡܳܝܬܳܐ: ܢ̇ܰܣܶܩ ܠܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܒܐܝ̣̈ܕܰܝܟ ܘܥܰܡܳܟ ܘܠܰܐܒܘ̣ܟ ܟܰܣܝܳܐ ܘܰܓܢܝ̣ܙܳܐ: ܘܰܠܪܘ̣ܚܳܐ ܕܝ̣ܠܳܟ ܛܘ̣ܒܬܳܢ ܬܠܝ̣ܬܳܐܝ̣ܬ: ܘܰܫ̇ܘܶܐ̣ ܠܳܟ ܒܐܘ̣ܣܺܝܰܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀