ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܕܰܝܳܢܳܐ ܪܰܒܳܐ ܘܰܕܚܝ̣ܠܳܐ ܡܳܪܝܳܐ: ܗܰܘ̇ ܕܰܥܬܝ̣ܕ ܕܰܒܨܰܦܪܶܗ ܕܥܳܠܡܳܐ ܚܰܕܬܳܐ ܢ̣ܶܬܶܒ ܠܕܝ̣ܢܳܐ ܘܰܠܒܘ̣ܚܳܢܳܐ ܚܰܬܝ̣ܬܳܐ: ܘܰܠܦܘ̣ܪܫܳܢܳܐ ܕܡܶܢ ܚܕ̈ܳܕܶܐ: ܘܰܠܦܘ̣ܪܥܳܢܳܐ ܬܪܝ̣ܨܳܐ ܕܟܽܠܢܳܫ ܐܰܝܟ ܕܫܳܘܶܐ: ܦܰܨܳܐ ܠܰܢ ܡܶܢ ܚܘ̣ܝܳܒܳܐ ܘܒܶܗܬܬܳܐ ܕܬܰܡܳܢ: ܘܙܰܡܶܢ ܠܰܢ ܠܰܦܨܝ̣ܚܘ̣ܬܳܐ ܘܰܪܘܳܙܳܐ ܕܢܰܨܝ̣̈ܚܶܐ ܕܝ̣ܠܳܟ: ܗܳܢܽܘܢ ܕܰܒܢܘ̣ܗܪܳܐ ܕܠܳܐ ܡܶܬܡܰܠܰܠ ܡܕܰܝܪܝ̣ܢ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܢܘ̣ܗܪܳܐ ܫܰܪܝ̣ܪܳܐ ܘܢܰܗܝ̣ܪ ܒܟܽܠ ܡܳܪܝܳܐ: ܢܘ̣ܗܪܳܐ ܚܰܕ ܘܠܳܐ ܡܶܬܩܰܪܒܳܢܳܐ ܘܩܰܕܡܳܝܳܐ ܕܰܬܠܝ̣ܬܳܝܽܘ̣ܬܳܐ ܘܕܰܐܡܝ̣ܢܳܐܝ̣ܬ ܢܰܗܝ̣ܪ: ܢܘ̣ܗܪܳܐ ܠܳܐ ܡܶܬܡܰܠܠܳܢܳܐ: ܫܶܡܫܳܐ ܠܳܐ ܡܶܬܡܰܫܚܳܢܳܐ: ܢܘ̣ܗܪܳܐ ܗܰܘ̇ ܡܬܘ̣ܡܳܝܳܐ ܘܝܳܗܘ̣ܒܳܐ ܕܢܘ̣ܗܪܳܐ: ܢܘ̣ܗܪܳܐ ܗܰܘ̇ ܪܝ̣ܫܳܝܳܐ ܘܠܳܐ ܥܒܝ̣ܕܳܐ ܘܠܳܐ ܡܶܬܚܰܒܠܳܢܳܐ: ܗܰܘ̇ ܢܘ̣ܪܳܐ ܐܳܟܶܠܬܳܐ ܘܠܳܐ ܗܘ̣ܠܳܢܳܝܬܳܐ: ܗܰܘ̇ ܐܝ̣ܡܳܡܳܐ ܪܰܒܳܐ ܘܰܕܠܳܐ ܣܘ̣ܦ ܘܕܰܠܥܳܠܰܡ: ܢܘ̣ܗܪܳܐ ܗܰܘ̇ ܗܕܝ̣ܪܳܐ ܘܠܳܐ ܡܶܬܦܰܣܩܳܢܳܐ ܠܳܐ ܡܶܬܰܐܡܪܳܢܳܐ ܒܡܶܠܬܳܐ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ ܢܘ̣ܗܪܳܐ ܠܳܐ ܡܶܬܡܰܠܠܳܢܳܐ ܘܠܳܐ ܡܶܬܕܰܪܟܳܢܳܐ ܕܠܶܗ ܡܶܬܬܚܝ̣ܒܳܐ ܬܶܫܒܘ̣ܚܬܳܐ ܘܐܝ̣ܩܳܪܳܐ ܘܣܶܓܕܬܳܐ: ܒܗܳܢܳܐ ܨܰܦܪܳܐ ܕܰܒܢܘ̣ܗܪܶܗ ܐܰܦܨܰܚ ܠܰܢ: ܘܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܢܘ̣ܗܪܳܐ ܫܰܪܝ̣ܪܳܐ ܘܠܳܐ ܡܶܬܚܰܙܝܳܢܳܐ: ܠܚܘ̣ܕܳܝܳܐ ܘܰܬܠܝ̣ܬܳܝܳܐ: ܠܚܘ̣ܕܳܐܝ̣ܬ ܘܰܬܠܝ̣ܬܳܐܝ̣ܬ ܐܰܢܗܰܪ ܠܩܘ̣ܝܳܡܳܐ ܕܝ̣ܠܰܢ: ܗܳܢܰܘ ܕܶܝܢ ܠܢܰܦܫܳܐ ܘܰܠܦܰܓܪܳܐ ܘܰܠܗܰܘܢܳܐ ܕܝ̣ܠܰܢ: ܢܘ̣ܗܪܳܐ ܐܰܫܝ̣ܕܳܐ ܘܰܡܥܝ̣ܢܳܐ ܕܛܳܒܘ̣ܬܳܐ: ܨܶܡܚܳܐ ܓܢܝ̣ܙܳܐ ܘܬܰܦܢܟܳܐ ܕܢܰܗܝ̣ܪܘ̣ܬܳܐ: ܚܰܝ̈ܶܐ ܐܘ̣ܣܺܝ̈ܳܝܶܐ ܘܪ̈ܰܚܝ̣ܩܰܝ ܡܶܢ ܚܶܫܘ̣ܟܘ̣ܬܳܐ: ܡܰܢܗܪܳܢܳܐ ܕܥܳܠ̈ܡܶܐ ܘܡܰܦܨܚܳܢܳܐ ܕܒܶܪ̈ܝܳܬܳܐ ܗܰܘ̇ ܕܰܠܢܘ̣ܗܪ̈ܶܐ ܬܪ̈ܰܝܳܢܶܐ ܐܰܠܦ̈ܶܐ ܘܪ̈ܶܒܘܳܬܳܐ ܐܰܩܝ̣ܡܬ ܠܬܶܫܒܘ̣ܚܬܳܟ: ܒܰܝ̈ܬܳܝܶܐ ܕܪܰܒܘ̣ܬܳܟ: ܨܶܡ̈ܚܶܐ ܘܙܰܠ̈ܓܶܐ ܕܛܘ̣ܒܬܳܢܘ̣ܬܳܟ: ܗܳܢܽܘܢ ܕܰܐܝܟ ܕܰܒܡܰܝ̈ܳܐ ܡܰܛܶܠ ܐܰܢ̱ܬ: ܘܣܳܐܶܡ ܐܰܢ̱ܬ ܥܰܠ ܥܢܳܢ̈ܶܐ ܡܰܪܟܰܒܬܳܟ: ܗܰܘ̇ ܕܰܠܢܘ̣ܗܪܳܐ ܗܘ̣ܠܳܢܳܝܳܐ ܒܫܘ̣ܪܳܝܳܐ ܕܰܒܪܝ̣ܬܳܐ ܗܳܕܶܐ ܚܰܘܺܝ̣ܬ: ܕܒܶܗ ܠܚܶܫܘ̣ܟܳܐ ܡܶܬܝܰܕܥܳܢܳܐ ܘܰܥܒܝ̣ܕܳܐ ܩܦܰܠ̣ܬ: ܘܠܰܥ̈ܢܳܢܶܐ ܠܺܠܝܳܝ̈ܳܬܳܐ ܓܰܠܶܓ̣ܬ: ܘܶܐܣܛܠܳܐ ܢܰܗܝ̣ܪܬܳܐ ܠܥܳܠܡܳܐ ܗܳܢܳܐ ܐܰܠܒܶܫ̣ܬ: ܨܰܦܪܳܐ ܐܰܦܨܰܚ ܠܰܒܪܝ̣ܬܳܐ ܘܰܡܠ̣ܳܐ ܐܰܦܰܝ̈ ܬܺܒܶܝܠ ܢܘ̣ܗܪܳܐ ܚܰܕܳܝܳܐ: ܨܰܦܪܳܐ ܐܰܙܝ̣ܥ ܠܫܶܡܫܳܐ ܗܳܢܳܐ ܡܰܠܟܳܐ ܕܥܳܠܡܳܐ ܘܰܐܒܳܐ ܕܢܰܗܝ̣ܪ̈ܶܐ: ܨܰܦܪܳܐ ܦܰܠܶܓ ܠܒܰܪܢܳܫܳܐ ܠܦܘ̣ܠܚܳܢܳܐ ܥܳܠܡܳܢܳܝܳܐ: ܨܰܦܪܳܐ ܐܰܥܝ̣ܪ ܠܰܣܢܘ̣ܢܝ̣ܬܳܐ ܕܰܒܠܶܥ̈ܙܶܐ ܡܫܰܒ̈ܚܶܐ ܬܢܰܨܰܪܝ̱: ܠܰܡܛܰܠܩܳܢܳܐ ܕܥܰܪܦܶܠܳܐ ܡܙܰܥܪܳܢܝ̣ܬܳܐ ܡܶܢ ܐܰܦܰܝ̈ ܐܰܪܥܳܐ: ܒܨܰܦܪܳܐ ܝܰܘܢܳܐ ܬܰܡܝ̣ܡܬܳܐ ܢܶܗܡ̈ܳܬܳܐ ܣܒܝ̣̈ܣܳܬܳܐ ܠܥܝ̣ܪܘ̣ܬܘܟ ܥܝ̣ܪܳܐ ܕܠܳܐ ܕܳܡܶܟ: ܒܪܰܡܫܳܐ ܘܨܰܦܪܳܐ ܡܫܰܒܰܚ ܗ̱ܘܳܐ ܡܽܘܫܶܐ ܗܰܘ̇ ܡܰܒܘ̣ܥܳܐ ܕܰܢܒܺܝܽܘ̣ܬܳܐ ܬܶܫܒܘ̣ܚܬܳܐ ܠܡܳܪܶܗ ܕܝܰܡܳܐ ܘܰܕܝܰܒܫܳܐ: ܒܨܰܦܪܳܐ ܢܶܩ̣ܫܰܬ݀ ܒܰܦܠܰܓ̈ܶܐ ܡܰܪܝܰܡ ܢܒܝ̣ܬܳܐ ܘܰܒܟܶܢܫܳܐ ܕܚܰܒܪ̈ܳܬܳܗ̇ ܠܡܳܪܶܗ ܕܐܝ̣ܣܪܳܐܝܶܠ ܡܢܰܨܪܳܐ ܗ̱ܘܳܬ݀: ܒܨܰܦܪܳܐ ܩ̣ܪܳܟ ܝܰܘܢܳܢ ܒܰܡ̈ܥܰܝ ܩܝ̣ܛܘ̣ܣ ܘܩܰܒܶܠ̣ܬ ܦܝܳܣܬܶܗ ܡܶܬܚܰܢܳܢܝ̣ܬܳܐ: ܒܨܰܦܪܳܐ ܩܳܪܝܳܐ ܠܳܟ ܥܺܕܬܳܐ ܕܝ̣ܠܳܟ ܘܰܡܦܝ̣ܣܳܐ ܠܳܟ ܡܰܪܥܝ̣ܬܳܟ: ܒܨܰܦܪܳܐ ܕܳܢܰܚ ܐܰܢ̱ܬ ܥܰܠ ܡܰܪܟܰܒܬܳܐ ܕܫܘ̣ܒܚܳܟ: ܘܪ̈ܶܒܘܳܬܳܐ ܕܡܰܠܰܐܟ̈ܶܐ ܙܳܠܚܝ̣ܢ ܠܳܟ ܩܘ̣ܕ̈ܳܫܶܐ ܬܠܝ̣̈ܬܳܝܶܐ: ܒܨܰܦܪܳܐ ܐ̱ܚܪܳܝܳܐ ܡܳܪܳܐ ܕܟܽܠܗܽܘܢ ܨܰܦܪ̈ܶܐ ܐܰܨܡܰܚ ܒܰܢ ܢܘ̣ܗܪܳܟ ܠܳܐ ܡܶܬܕܰܥܟܳܢܳܐ: ܘܕܰܠܩܳܟ ܠܳܐ ܡܶܬܥܰܡܛܳܢܳܐ: ܘܛܰܠܶܩ ܡܶܢܰܢ ܠܬܶܢܳܢܳܐ ܕܢܘ̣ܪܳܐ ܗܳܝ̇ ܡܰܘܩܕܰܬ݀ ܥܳܠ̈ܡܶܐ: ܘܰܐܕܢܰܚ ܒܰܢ ܢܘ̣ܗܪܳܐ ܗܰܘ̇ ܕܒܶܗ ܢܳܗܪܝ̣ܢ ܟܽܠܗܽܘܢ ܟܺܐܢ̈ܶܐ ܘܙܰܕܝ̣̈ܩܶܐ: ܘܡܶܢܳܟ ܘܒܳܟ ܢ̇ܶܬܢܰܗܰܪ ܘܢ̇ܶܬܗܰܕܶܐ ܡܗܰܕܝܳܢܘ̣ܬܳܐ ܛܳܒܬܳܐ ܕܗܰܝܡܳܢܘ̣ܬܳܐ ܗܘܝ̇ ܕܒܳܟ ܘܒܰܢܛܘ̣ܪܘ̣ܬܳܐ ܕܦܘ̣ܩ̈ܕܳܢܶܐ ܕܝ̣ܠܳܟ ܩܰܕܝ̣̈ܫܶܐ: ܘܚܰܕ ܢܘ̣ܗܪܳܐ ܢ̇ܶܗܘܶܐ ܥܰܡܳܟ ܡܳܪܳܐ ܕܢܘ̣ܗܪܳܐ: ܘܠܳܐ ܢ̇ܶܬܦܟܰܪ ܒܚܰܫ̈ܶܐ ܕܰܚܛܝ̣ܬܳܐ: ܐܳܦܠܳܐ ܢ̇ܶܬܛܥܶܐ ܡܶܢ ܐܳܟܶܠܩܰܪܨܳܐ ܗܰܘ̇ ܕܟܰܕ ܐܝ̣ܬܰܘܗ̱ܝ ܚܶܫܘ̣ܟܳܐ ܒܝ̣ܫܳܐ: ܡܕܰܡܶܐ ܡܰܢ ܒܢܘ̣ܗܪܳܐ: ܘܠܳܐ ܢ̣ܶܒܗܬܽܘܢ ܦܰܪ̈ܨܘ̣ܦܶܐ ܕܝ̣ܠܰܢ ܡܶܢ ܫܳܥܳܐ ܠܺܠܝܳܝܳܐ: ܘܡܶܢ ܒܳܬܰܪ ܦܘ̣ܠܳܛܳܐ ܕܡܶܢ ܚܶܫܘ̣ܟܳܐ ܕܥܳܠܡܳܐ ܗܳܢܳܐ: ܐܶܡܰܬܝ̱ ܕܰܒܢܘ̣ܗܪܳܐ ܕܡܰܠܟܘ̣ܬܳܟ ܙܰܕܝ̣̈ܩܶܐ ܡܰܨܡܚܝ̣ܢ ܘܡܶܬܦܰܨܚܝ̣ܢ: ܠܳܐ ܢ̇ܶܗܘܶܐ ܝܰܩܕܳܢܳܐ ܠܢܘ̣ܪܳܐ ܗܳܝ̇ ܕܐܝ̣ܬܶܝܗ̇ ܡܢܳܬܳܐ ܕܳܐܟܶܠܩܰܪܨܳܐ ܘܰܕܡܰܠܰܐܟ̈ܰܘܗ̱ܝ: ܐܶܠܳܐ ܦܪܘ̣ܣ ܥܠܰܝܢ ܢܘ̣ܗܪܳܐ ܕܦܰܪܨܽܘ̣ܦܳܐ ܕܝ̣ܠܳܟ: ܘܬܰܪܶܨ ܗܰܠ̈ܟܳܬܰܢ ܒܰܫܪܳܪܳܟ: ܟܰܕ ܙܳܪܥܝ̣ܢܰܢ ܙܰܕܝ̣ܩܘ̣ܬܳܐ ܒܥܳܠܡܳܐ ܗܳܢܳܐ: ܚܳܨܕܝ̣ܢܰܢ ܦܺܐܪ̈ܶܐ ܕܚܰܝ̈ܶܐ ܒܥܳܠܡܳܐ ܗܰܘ̇ ܕܰܥܬܝ̣ܕ: ܡܥܰܕܪ̈ܳܢܶܐ ܢ̣ܶܗܘܽܘܢ ܠܰܢ ܒܨܰܦܪܳܐ ܪ̈ܰܚܡܰܝܟ: ܘܢ̇ܶܫܡܰܥ ܠܩܳܠܳܐ ܕܰܕܝܳܨܳܐ ܘܰܕܚܰܕܘ̣ܬܳܐ: ܘܰܕܗܳܢܽܘܢ ܕܰܡܥܰܕܥܕܝ̣ܢ ܘܚܳܕܶܝܢ ܒܳܟ: ܘܰܐܝܟ ܢܘ̣ܗܪܳܐ ܕܨܰܦܪܳܐ ܡܳܐ ܕܕܳܢܰܚ ܫܶܡܫܳܐ ܕܠܳܐ ܥܢ̈ܳܢܶܐ ܗܳܟܰܢܳܐ ܢ̣ܶܕܢܰܚ ܠܰܢ ܒܰܥܓܰܠ ܦܘ̣ܪܩܳܢܳܟ: ܘܟܽܠܶܗ ܥܰܝܡܳܐ ܕܰܚܛܳܗ̈ܶܐ ܕܝ̣ܠܰܢ ܢ̣ܶܬܛܰܠܰܩ: ܘܨܰܚܘܳܐ ܦܨܝ̣ܚܳܐ ܕܫܘ̣ܒܩܳܢܳܐ ܕܡܶܢܳܟ ܥܠܰܝܢ ܢ̣ܶܬܦܪܶܣ: ܐܰܝܟܰܢܳܐ ܕܰܒܓܰܠܝܽܘܬ ܐܰܦ̈ܶܐ ܨܠܘ̣ܬܳܐ ܘܒܳܥܘ̣ܬܳܐ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ ܒܨܰܦܪܳܐ ܗܳܢܳܐ ܠܪܝ̣ܚܳܐ ܒܰܣܝ̣ܡܳܐ ܢ̇ܩܰܪܶܒ ܠܳܟ: ܒܨܰܦܪܳܐ ܡܰܢ ܗܳܟܝ̣ܠ ܦ̣ܬܰܚ ܢܽܘܚ ܟܶܘܶܝܠܳܐ ܘܫ̣ܰܕܪܳܗ̇ ܠܝܰܘܢܳܐ ܘܗܶܦܟ̣ܰܬ݀ ܠܘܳܬܶܗ ܟܰܕ ܛܥܝ̣ܢܳܐ ܛܰܪܦܳܐ ܕܙܰܝܬܳܐ ܒܦܘ̣ܡܳܗ̇: ܛܘ̣ܦܣܳܐ ܕܰܡܫܝ̣ܚܘ̣ܬܳܐ ܘܐ̱ܪܳܙܳܐ ܕܬܰܪܥܘ̣ܬܳܐ: ܒܨܰܦܪܳܐ ܦܬܰܚ ܐܳܦ ܠܰܢ ܬܰܪܥܳܐ ܕܪ̈ܰܚܡܰܝܟ ܘܦܰܢܳܐ ܫܶܐܠ̈ܳܬܰܢ ܫܰܦܝ̣ܪ̈ܳܬܳܐ ܡܶܢ ܒܶܝܬ ܓܰܙܳܐ ܕܰܡܪܰܚܡܳܢܘ̣ܬܳܟ: ܒܨܰܦܪܳܐ ܩ̣ܰܕܶܡ ܐܰܒܪܳܗܳܡ ܕܢ̣ܺܐܙܰܠ ܢ̣ܩܰܪܶܒ ܠܳܟ ܠܐܝ̣ܣܚܳܩ ܒܪܶܗ ܥܰܠ ܛܘ̣ܪܳܐ ܐܰܝܟ ܦܘ̣ܩܕܳܢܳܐ ܕܝ̣ܠܳܟ ܐܰܠܳܗܳܝܳܐ: ܒܨܰܦܪܳܐ ܗܳܢܳܐ ܐܰܫܘܳܐ ܐܳܦ ܠܰܢ ܡܚܝ̣̈ܠܶܐ ܘܚܰܛܳܝ̈ܶܐ ܕܰܢ̇ܩܰܪܶܒ ܠܳܟ ܢܰܦܫ̈ܳܬܰܢ ܘܦܰܓܪ̈ܰܝܢ ܕܶܒܚܬܳܐ ܚܰܝܬܳܐ ܘܰܡܠܝ̣ܠܬܳܐ ܕܫܳܦܪܳܐ ܠܳܟ: ܒܨܰܦܪܳܐ ܢܦ̣ܰܩ ܠܘ̣ܛ ܡܶܢ ܣܕܘ̣ܡ ܘܶܐܬ̣ܦܰܠܰܛ ܠܛܘ̣ܪܳܐ ܘܶܐܫ̣ܬܰܘܙܰܒ ܡܶܢ ܢܘ̣ܪܳܐ ܘܟܶܒܪܝ̣ܬܳܐ: ܒܨܰܦܪܳܐ ܗܳܢܳܐ ܐܳܦ ܠܰܢ ܦܰܨܳܐ ܡܶܢ ܡܣܳܡܒܪ̈ܝ̣ܫܶܐ ܘܫܰܒ̈ܛܶܐ ܡܢܰܓ̈ܕܳܢܶܐ ܕܥܰܘ̈ܳܠܶܐ ܘܪ̈ܰܫܝ̣ܥܶܐ ܕܡܶܫܬܰܕܪܝ̣ܢ: ܒܨܰܦܪܳܐ ܡܰܢ̱ܢܳܐ ܡܶܬܠܩܶܛ ܗ̱ܘܳܐ ܘܰܠܟܽܠ ܚܰܕ ܡܶܢ ܒܢܰܝ̈ ܐܝ̣ܣܪܳܐܝܶܠ ܣܳܦܩܳܐܝ̣ܬ ܡܶܬܦܰܪܢܰܣ ܗ̱ܘܳܐ: ܒܨܰܦܪܳܐ ܗܳܢܳܐ ܡܳܪܝ̱ ܒܥܘ̣ܬܪܳܐ ܕܡܶܢܳܟ ܢ̇ܶܬܦܰܪܢܰܣ ܘܰܒܝܰܨܺܝ̣ܦܘ̣ܬܳܐ ܕܝ̣ܠܳܟ ܐܰܠܳܗܳܝܬܳܐ ܢ̇ܶܬܕܰܒܰܪ: ܒܨܰܦܪܳܐ ܩ̣ܰܕܶܡ ܡܰܠܟܳܐ ܘܰܠܕܳܢܺܝ̣ܐܝܶܠ ܡܶܢ ܓܘ̣ܒܳܐ ܐܰܣ̣ܶܩ ܘܠܰܒܥܶܠܕ̈ܒܳܒܰܘܗ̱ܝ ܒܓܰܘܶܗ ܐܰܪܡܝ̣: ܒܨܰܦܪܳܐ ܐ̱ܚܪܳܝܳܐ ܕܰܠܳܐ ܘܰܐܣܶܩ ܠܰܢ ܡܶܢ ܗܰܘܬܳܐ ܥܰܡܝ̣ܩܬܳܐ ܕܡܰܘܬܳܐ: ܘܨܳܡܰܪܬܳܐ ܚܶܫܘ̣ܟܬܳܐ ܘܰܟܡܝ̣ܪܬܳܐ: ܐܰܝܟܰܢܳܐ ܕܰܒܢܘ̣ܗܪܳܐ ܕܰܐܦܰܝ̈ܟ ܢ̇ܶܬܢܗܰܪ: ܘܰܐܝܟ ܫܶܡܫܳܐ ܒܡܰܠܟܘ̣ܬܳܟ ܥܰܡ ܟܽܠܗܽܘܢ ܩܰܕܝ̣̈ܫܰܝܟ ܢ̇ܰܨܡܰܚ: ܘܥܰܡܗܽܘܢ ܘܒܰܝܢܳܬܗܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܺܝ̣ܪܡܳܐ

ܒܨܶܒܝܳܢܳܟ ܡܳܪܝ̱ ܐܶܬܩܦܶܠ ܫܘ̣ܠܛܳܢܶܗ ܕܠܺܠܝܳܐ ܡܶܢ ܥܳܠܡܳܐ: ܘܰܐܡܠ̣ܶܟ ܕܶܢܚܶܗ ܕܨܰܦܪܳܐ ܥܰܠ ܒܶܪ̈ܝܳܬܳܐ: ܗܰܒܠܰܢ ܡܳܪܝ̱ ܕܰܒܨܰܦܪܳܟ ܪܰܒܳܐ ܢ̇ܫܰܒܚܳܟ ܘܢ̣ܰܢܗܪܽܘܢ ܠܶܒܰܘ̈ܳܬܰܢ ܒܝ̣ܕܰܥܬܳܟ: ܘܢ̇ܶܫܰܐܠ ܡܶܢܳܟ ܚܢܳܢܳܐ ܘܪ̈ܰܚܡܶܐ ܘܢ̇ܶܥܬܰܪ ܡܶܢܳܟ ܒܡܰܘ̈ܗܒܳܬܳܐ ܐܰܠܳܗ̈ܳܝܳܬܳܐ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܳܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀