ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܳܗ̇ ܠܰܬܠܝ̣ܬܳܝܽܘ̣ܬܳܐ ܫܰܘܝܰܬ݀ ܒܐܘ̣ܣܺܝܰܐ: ܐܰܒܳܐ ܘܰܒܪܳܐ ܘܪܘܚܚܳܐ ܩܰܕܝ̣ܫܳܐ ܚܰܕ ܐܰܠܳܗܳܐ ܫܰܪܝ̣ܪܳܐ: ܗܰܘ̇ ܕܡܶܢܶܗ ܟܽܠ ܐܶܬ̣ܒܪܝ̣: ܘܰܠܒܰܪ ܡܶܢܶܗ ܡܶܕܶܡ ܠܳܐ ܗ̣ܘܳܐ: ܗܰܘ̇ ܕܢ̣ܰܨܰܚ ܠܟܺܐܢ̈ܶܐ ܩܰܕ̈ܡܳܝܶܐ ܒܥܰܡ̈ܠܶܐ ܕܙܰܕܝ̣ܩܘ̣ܬܳܐ: ܘܚ̣ܰܝܶܠ ܠܡܶܨ̈ܥܳܝܶܐ ܒܕܘ̣ܒܳܪ̈ܶܐ ܕܟܺܐܢܘ̣ܬܳܐ: ܘܝܰܗ̣ܒ ܠܗܽܘܢ ܢܳܡܘ̣̈ܣܶܐ ܘܦܘ̣ܩ̈ܕܳܢܶܐ ܕܢ̣ܶܬܬܰܓܪܽܘܢ ܚܰܝ̈ܶܐ ܠܰܩܢܘ̣ܡܰܝ̈ܗܽܘܢ: ܗܰܘ̇ ܕܰܒܝܰܕ ܛܰܝܒܘ̣ܬܶܗ ܠܳܐ ܐܰܗ̣ܡܝ̣ ܡܶܢ ܐ̱ܚܪ̈ܳܝܶܐ: ܐܶܠܳܐ ܕܟܰܕ ܚ̣ܙܳܐ ܕܥܰܘܠܳܐ ܘܒܝ̣ܫܬܳܐ ܕܝ̣ܠܗܽܘܢ ܚܰܘܝ̣ ܠܗܽܘܢ ܣܰܡܳܐ ܕܝܰܬܝ̣ܪ ܚܰܝܠܬܳܢ: ܨܰܘܡܳܐ ܩܰܕܝ̣ܫܳܐ ܡܪܰܒܝܳܢܳܐ ܕܢܰܦܫ̈ܳܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܝܘ̣ܩܢܳܐ ܕܰܐܒܳܐ ܡܬܘ̣ܡܳܝܳܐ ܘܨܶܡܚܳܐ ܕܫܘ̣ܒܚܶܗ: ܗܰܘ̇ ܕܐܝ̣ܬܰܝܟ ܬܗܘ̣ܡܳܐ ܕܰܚܢܳܢܳܐ ܘܝܰܡܳܐ ܕܚܰܝܽܘܣܬܳܢܘ̣ܬܳܐ: ܗܰܘ̇ ܕܡܶܢ ܠܳܐ ܡܶܕܶܡ ܒ̣ܪܰܝܬܳܢ: ܘܰܒܨܰܠܡܳܟ ܐܰܠܳܗܳܝܳܐ ܬܰܩܶܢ̣ܬܳܢ: ܘܒܝ̣ܕܰܥܬܳܐ ܪܘ̣ܚܳܢܳܝܬܳܐ ܐܰܥ̣ܬܰܪܬܳܢ: ܘܰܒܫܰܠܝ̣ܛܘ̣ܬ ܒܝܳܬܳܐ ܨܰܒ̣ܶܬܬܳܢ: ܘܰܒܓܰܢܬܳܐ ܥܕܶܝܢܳܝܬܳܐ ܐܰܘܬܶܒ̣ܬܳܢ: ܕܶܐܢܗܽܘ ܕܢܳܛܪܝ̣ܢܰܢ ܗܰܘ̇ ܡܳܐ ܕܰܦܩ̣ܰܕܬ ܠܰܢ ܠܪܰܘܡܳܐ ܕܰܠܥܶܠ ܡܶܢ ܗܰܘ̈ܢܶܐ ܥܬܝ̣ܕ ܗ̱ܘܰܝܬ ܕܰܬ̣ܥܰܠܶܐ ܠܰܢ: ܚܢܰܢ ܕܶܝܢ ܕܳܘ̈ܰܝܳܐ ܘܡܰܘܒ̈ܕܳܢܶܐ ܕܶܝܢ ܕܪ̈ܘ̣ܚܳܬܰܢ ܗ̣ܘܰܝܢܰܢ: ܘܰܠܗܰܘ̇ ܦܘ̣ܩܕܳܢܳܐ ܕܝ̣ܠܳܟ ܘܩܰܕܝ̣ܫܳܐ ܫ̣ܳܛܢܰܢ: ܘܡܶܢ ܐܝ̣ܠܳܢܳܐ ܗܰܘ̇ ܕܠܳܐ ܫܰܠܝ̣ܛ ܗ̱ܘܳܐ ܠܰܢ ܕܢ̇ܶܐܟܘ̣ܠ ܡܶܢܶܗ ܐܶܟܰܠ̣ܢܰܢ: ܘܰܠܫܘ̣ܒܚܳܐ ܗܰܘ̇ ܦܰܐܝܳܐ ܘܰܗܕܝ̣ܪܳܐ ܕܰܐܠܒ̣ܶܫܬܳܢ ܫܠܰܚ̣ܢܰܢ: ܘܦܳܫ̣ܢܰܢ ܒܰܗܝ̣̈ܬܶܐ ܡܶܢ ܛܰܝܒܘ̣ܬܳܟ ܘܰܡܫܰܠ̈ܚܶܐ ܡܶܢ ܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ: ܘܶܐܬ̣ܰܐܡܪܰܬ݀ ܡܶܢܳܟ ܗܳܝ̇ ܕܐܶܬܬܘܺܝܬ ܕܰܒܪܝ̣ܬ ܠܳܐܕܳܡ: ܘܶܐܫ̣ܬܡܰܥ ܡܶܢܳܟ ܗܳܝ̇ ܕܠܳܐ ܬ̣ܶܥܡܰܪܝ̱ ܪܘ̣ܚܝ̱ ܒܐ̱ܢܳܫ ܠܥܳܠܰܡ: ܘܰܡܣܳܡܒܪܝ̣ܫܳܐ ܗܰܘ̇ ܕܫܳܘܶܝܢܰܢ ܠܶܗ ܩܰܒܶܠܢܰܢ: ܐܰܢ̱ܬ ܕܶܝܢ ܚܰܝܽܘ̣ܣܬܳܢܳܐ ܘܰܡܠܶܐ ܪ̈ܰܚܡܶܐ ܡܳܪܝܳܐ: ܗܰܘ̇ ܕܠܰܝܬ ܠܳܗ̇ ܟܰܝܠܳܐ ܠܛܰܝܒܘ̣ܬܳܟ ܘܠܳܐ ܣܳܟܳܐ ܠܰܡܪܰܚܡܳܢܘ̣ܬܳܟ: ܚܘ̣ܒܳܟ ܥ̣ܨܳܟ ܕܬܶܗ̣ܘܶܐ ܒܰܪܢܳܫܳܐ ܕܠܳܐ ܫܘ̣ܚܠܳܦܳܐ ܡܶܢ ܡܰܪܝܰܡ ܩܰܕܝ̣ܫܬܳܐ ܘܶܐܬܝ̣ܠܶܕܬ ܦܰܓܪܳܢܳܐܝ̣ܬ: ܘܩܰܒ̣ܶܠܬ ܥܠܰܝܟ ܨܰܘܡܳܐ ܐܰܪܒܥܝ̣ܢܳܝܳܐ: ܟܰܕ ܐܝ̣ܬܰܝܟ ܒܳܪܘ̣ܝܳܐ ܕܨܰܝ̈ܳܡܶܐ ܘܰܡܩܰܒܠܳܢܳܐ ܕܨܰܘܡܰܝ̈ܗܽܘܢ: ܐܰܝܟܰܢܳܐ ܕܬ̣ܶܗܘܶܐ ܠܰܢ ܪܝ̣ܫܳܐ ܕܚܰܝ̈ܶܐ ܒܐܘ̣ܪܚܳܐ ܗܳܕܶܐ ܩܰܕܝ̣ܫܬܳܐ ܗܳܝ̇ ܕܠܰܢ ܦܘ̣ܪܩܳܢܳܐ ܕܡܶܢ ܒܥܶܠܕܒܳܒܳܐ ܗ̣ܘܳܬ݀: ܘܒܰܕܓܽܘܢ ܠܳܟ ܡܫܝ̣ܚܳܐ ܐܰܠܳܗܳܐ ܡܶܠܬܳܐ ܡܬܘ̣ܡܳܝܳܐ ܡܶܬܟܰܫܦܝ̣ܢܰܢ: ܕܡܶܢ ܡܪܰܚܡܳܢܘ̣ܬܳܟ ܒܳܥܶܝܢܰܢ: ܕܒܶܗ ܒܗܳܢܳܐ ܨܰܘܡܳܐ ܩܰܕܝ̣ܫܳܐ ܝܰܡܝ̣ܢܳܟ ܚܰܝܠܬܳܢܝ̣ܬܳܐ ܬ̣ܶܣܡܘ̣ܟ ܠܰܢ: ܘܒܶܗ ܫܽܘܘ̣ܙܳܒܳܐ ܡܶܢ ܡܳܪ̈ܰܝܳܐ ܠܳܐ ܡܪ̈ܰܚܡܳܢܶܐ ܢ̣ܶܫܬܰܟܰܢ ܠܰܢ: ܒܶܗ ܘܰܥܕܳܐ ܕܓ̈ܰܙܶܐ ܫܡܰܝ̈ܳܢܶܐ ܡܶܢܳܟ ܢ̣ܶܬܦܰܬܚܽܘܢ ܠܰܢ: ܒܶܗ ܥܘ̣ܬܪܳܐ ܪܰܒܳܐ ܗܰܘ̇ ܕܠܳܐ ܡܶܬܡܰܣܟܰܢ ܩܳܢܶܝܢܰܢ: ܒܶܗ ܒܦܰܪܕܰܝܣܳܐ ܗܰܘ̇ ܡ̇ܠܶܐ̣ ܓܶܐܘ̈ܳܬܳܐ ܐܰܫܪܳܐ ܠܰܢ: ܒܶܗ ܙܘܳܕ̈ܶܐ ܠܐܘ̣ܪܚܳܐ ܗܳܝ̇ ܕܰܠܥܳܠܰܡ ܡܶܢ ܛܰܝܒܘ̣ܬܳܟ ܢ̣ܶܫܬܰܟܢܽܘܢ ܠܰܢ: ܒܶܗ ܩܘ̣ܒܰܪܢܝ̣ܛܝ̣ ܚܰܟܝ̣ܡܳܐ ܕܰܠܘܳܬ ܐܰܒܘ̣ܟ ܢܶܬܡܰܢܰܥ ܗܘܝ̣ ܠܰܢ: ܒܶܗ ܝܘ̣ܩܢܳܟ ܡܰܚܝܳܢܳܐ ܨܠܝ̣ܒܳܟ ܦܳܪܘ̣ܩܳܝܳܐ ܢܢܰܛܰܪ ܠܰܢ: ܒܶܗ ܦܝ̣ܪܡܳܐ ܕܰܡܠܶܐ ܪ̈ܝ̣ܚܳܢܶܐ ܒܰܣܝ̣̈ܡܶܐ ܡܶܢܰܢ ܢ̣ܶܥܛܰܪ ܠܳܟ: ܒܶܗ ܟܘ̣ܡܪ̈ܶܐ ܕܟܰܝ̈ܳܐ ܘܩܰܕܝ̈ܫܶܐ ܗܳܘܶܝܢܰܢ: ܘܓܳܫܦܝ̣ܢܰܢ ܒܳܟ ܠܚܘ̣ܣܳܝܰܢ ܘܠܳܐ ܠܩܘ̣ܛܪܳܓܰܢ: ܒܶܗ ܘܝ̣ܠܳܐ ܕܢܘ̣ܗܪܳܐ ܗܰܘ̇ ܕ݂ܡܶܢ ܟܘ̣ܪܣܝܳܟ ܢܳܦܶܩ ܢ̣ܶܗܘܶܐ ܠܰܢ ܬܰܟܣܝ̣ܬܳܐ: ܒܶܗ ܒܳܥܶܝܢܰܢ ܡܶܢܳܟ ܚܘ̣ܣܳܝܳܐ ܠܟܽܠܗܽܘܢ ܝܰܠ̈ܕܶܝܗ̇ ܕܥܺܕܬܳܐ ܡܗܰܝܡܰܢܬܳܐ: ܒܶܗ ܚܶܘܝܳܐ ܠܝ̣ܛܳܐ ܗܰܘ̇ ܕܰܐܛܥܝ̣ ܠܰܢ ܢ̣ܶܬܪܨܶܨ: ܒܶܗ ܠܳܐ ܡܶܕܶܡ ܡܶܢ ܚܡܝ̣ܪܳܐ ܕܰܚܛܳܗ̈ܶܐ ܢ̣ܟܰܬܰܪ ܒܰܢ: ܒܶܗ ܒܛܰܝܒܘ̣ܬܳܟ ܢ̇ܶܗܘܶܐ ܒܢܰܝ̈ܳܐ ܠܰܐܒܘ̣ܟ: ܘܰܐܚ̈ܶܐ ܠܰܚܢܳܢܳܟ: ܘܫܰܘ̈ܬܳܦܶܐ ܠܪܘ̣ܚܳܟ ܩܰܕܝ̣ܫܳܐ: ܒܶܗ ܗܰܘܢܳܐ ܕܝ̣ܠܰܢ ܢ̣ܶܬܕܰܟܶܐ ܡܶܢ ܟܽܠܗܽܘܢ ܚܘ̣ܫ̈ܳܒܶܐ ܠܳܐ ܕܟܰܝ̈ܳܐ: ܒܶܗ ܕܰܝܪܳܐ ܩܰܕܝ̣ܫܬܳܐ ܗܳܘܶܝܢܰܢ ܕܨܶܒܝܳܢܳܟ ܐܰܠܳܗܳܝܳܐ ܒܰܢ ܢ̣ܶܬܓܡܰܪ: ܒܶܗ ܐܘ̣ܪܚܳܐ ܗܳܝ̇ ܕܰܠܦܰܪܕܰܝܣܳܐ ܬܳܪܨܳܐ ܡܶܬܢܰܩܠܳܐ ܩܕܳܡܰܝܢ: ܒܶܗ ܒܗܳܢܳܐ ܕܳܪܫܝ̣ܢܰܢ ܫܒܝ̣ܠܳܐ ܗܰܘ̇ ܕܩܰܕܝ̣̈ܫܶܐ ܗܳܢܽܘܢ ܕܰܫܦ̣ܰܪܘ̱ ܠܳܟ ܒܶܗ ܗܰܠܶܟܘ̱: ܒܶܗ ܘܰܪܕܳܐ ܒܰܣܝ̣ܡ ܪܝ̣ܚܳܐ ܓܳܕܠܝ̣ܢܰܢ: ܒܶܗ ܟܰܫܝ̣ܪ̈ܶܐ ܡܶܢ ܡܰܐܝ̈ܺܢܶܐ ܗܳܘܶܝܢܰܢ: ܘܰܚܠܝ̣̈ܨܶܐ ܒܥܰܡ̈ܠܶܐ ܕܦܘ̣ܪܫܳܢܳܐ ܢ̇ܶܬܓܡܰܪ ܒܶܗ ܒܚܰܡܪܳܐ ܗܰܘ̇ ܐܰܠܳܗܳܝܳܐ ܢ̣ܰܪܘܶܐ ܠܰܢ: ܒܶܗ ܣܡܘ̣ܟ ܠܰܢ ܒܰܕܪܳܥܳܟ: ܒܶܗ ܐܰܘܳܐ ܠܰܢ ܬܚܶܝܬ ܛܶܠܳܠܳܟ: ܒܶܗ ܠܰܚܶܡ ܠܟܽܠܰܢ ܒܚܘ̣ܒܳܟ: ܒܶܗ ܗܘܝ̣ ܠܰܢ ܠܶܘܝܳܐ ܒܐܘ̣ܪܚܳܐ ܥܰܣܩܬܳܐ: ܒܶܗ ܠܘ̣ܒܳܒܳܐ ܐܰܩܢܳܐ ܠܰܢ: ܒܶܗ ܫܒܘ̣ܩ ܠܰܢ ܚܰܘܒ̈ܳܬܰܢ: ܒܶܗ ܡܶܢ ܓܺܗܰܢܳܐ ܦܰܨܳܐ ܠܰܢ: ܒܶܗ ܥܰܡܳܟ ܒܝܰܘܡܳܐ ܐ̱ܚܪܳܝܳܐ ܢ̇ܶܬܒܰܣܰܡ: ܒܶܗ ܘܡܶܛܽܠܳܬܶܗ ܕܨܰܘܡܳܐ ܢ̇ܶܬܚܢܶܢ: ܒܶܗ ܢ̇ܶܩܢܶܐ ܚܘ̣ܒܳܐ: ܒܶܗ ܕܚܝ̣̈ܠܶܐ ܥܰܠ ܒܝ̣ܫܳܐ ܢ̇ܶܬܚܙܶܐ: ܒܶܗ ܐܰܒܘ̣ܟ ܢ̣ܢܰܛܰܪ ܠܰܢ: ܒܶܗ ܡܰܠܟܘ̣ܬܳܟ ܥܰܬܶܕ ܠܰܢ: ܒܶܗ ܪܘ̣ܚܳܟ ܩܰܕܝ̣ܫܳܐ ܫܰܟܶܢ ܠܰܢ: ܒܶܗ ܚܽܘܢ ܠܰܢ ܘܰܐܫܝ̣ܓ ܥܰܘ̈ܠܰܝܢ: ܒܶܗ ܥܰܪܦܶܠܳܐ ܗܳܝ̇ ܕܰܚܛܳܗ̈ܶܐ ܕܚܘ̣ܩ ܡܶܢܰܢ: ܒܶܗ ܠܳܐ ܬܶܪܓܰܙ ܥܠܰܝܢ: ܒܶܗ ܡܠܝ̣ ܠܰܢ ܒܰܣܝ̣ܡܘ̣ܬܳܐ: ܒܶܗ ܠܳܐ ܚܶܡ̈ܬܳܢܶܐ ܢ̇ܶܗܘܶܐ: ܒܶܗ ܝܘ̣ܒܳܒܳܐ ܕܫܘ̣ܒܚܳܐ ܢܶܪ̈ܬܡܳܢ ܣܶܦܘ̈ܳܬܰܢ: ܒܶܗ ܟܽܠܰܢ ܥܰܡ ܟܽܠܰܢ ܥܰܡ ܚܕ̈ܳܕܶܐ ܢ̇ܶܚܙܶܐ ܚܢܳܢܳܟ ܘܢ̇ܫܰܒܰܚ ܠܛܰܝܒܘ̣ܬܳܟ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀