ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܚܰܝܶܠ ܠܰܢ ܘܫܰܪܰܪ ܠܰܢ ܡܳܪܝܳܐ ܒܚܰܝܠܬܳܢܘ̣ܬܳܐ ܕܝ̣ܠܳܟ: ܠܰܡܩܳܡ ܚܠܝ̣ܨܳܐܝ̣ܬ ܘܠܳܐ ܡܶܙܕܰܟܝܳܢܳܐܝ̣ܬ ܒܶܐܣܛܰܕܺܝܽܘܢ ܗܳܢܳܐ: ܠܘ̣ܩܒܰܠ ܟܽܠܶܗ ܡܰܥܒܕܳܢܘ̣ܬܳܐ ܕܐܳܟܶܠܩܰܪܨܳܐ: ܟܰܕ ܡܶܬܓܰܢ̱ܒܪܝ̣ܢܰܢ ܒܬܰܟܬܘ̣ܫܳܐ ܡܳܪܳܢܳܝܳܐ: ܢ̇ܶܫܬܘܶܐ ܥܰܡ ܙܳܟܘ̣ܬܳܐ ܠܰܟܠܝ̈ܠܶܐ ܕܩܰܕܝ̣̈ܫܶܐ ܕܝ̣ܠܳܟ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܫܘ̣ܒܚܳܐ ܘܬܰܘܕܝ̣ܬܳܐ ܢ̇ܶܫܬܘܶܐ ܕܢ̇ܰܣܶܩ ܘܐܝ̣ܩܳܪܳܐ ܘܩܘ̣ܠܳܣܳܐ ܢ̇ܩܰܪܶܒ: ܘܣܶܓ݂ܕܬܳܐ ܥܰܡ ܪܘ̣ܡܪܳܡܳܐ ܢ̇ܶܬܶܠ: ܘܪܝ̣ܚܳܐ ܗܰܢܺܝܳܐܐ ܕܨܰܘܡܳܐ ܕܰܟܝܳܐ ܢ̇ܰܥܛܰܪ: ܩܕܳܡ ܬܪܘ̣ܢܘ̣ܣ ܓܰܐܝܳܐ ܕܡܰܠܟܳܐ ܙܰܟܳܝܳܐ ܕܰܚܠܳܦ ܥܰܒ̈ܕܶܐ ܡܳܪ̈ܘ̣ܕܶܐ ܠܰܐܓܘ̣ܢܳܐ ܢܚ̣ܶܬ ܥܰܡ ܒܝ̣ܫܳܐ: ܘܰܒܕܰܪܶܗ ܫܰܦ̣ܠܶܗ ܠܳܐܟܶܠܩܰܪܨܳܐ ܛܪܘ̣ܢܳܐ: ܘܝܰܗ̣ܒ ܠܰܢ ܙܰܝܢܳܐ ܚܰܣܝ̣ܢܳܐ ܨܰܘܡܳܐ ܕܝ̣ܠܶܗ ܩܰܕܝ̣ܫܳܐ: ܕܒܶܗ ܢ̇ܰܩܪܶܒ ܥܰܡ ܣܳܛܳܢܳܐ ܡܶܬܟܰܬܫܳܢܳܐ: ܘܰܒܣܰܟܪܳܐ ܕܰܨܠܰܘ̈ܳܬܳܐ ܢ̇ܶܣܬܰܬܰܪ ܡ̣ܶܢ ܟܡܺܐܢ̈ܰܘܗ̱ܝ ܕܰܒܥܶܠܕܒܳܒܳܐ: ܘܰܒܥܳܢܘܳܝܽܘܬܳܐ ܘܙܰܗܝܘ̣ܬܳܐ ܢ̇ܶܣܰܒ ܟܠܝ̣ܠܳܐ ܕܢܳܨܰܚ ܒܙܳܟܘ̣ܬܳܐ: ܕܠܶܗ ܡܶܬܟܰܫܦܝ̣ܢܰܢ ܕܰܢ̇ܚܰܝܶܠ ܠܰܢ ܕܐ̱ܪܳܙܳܢܳܐܝ̣ܬ ܢ̇ܶܬܟܰܬܰܫ: ܘܰܠܒܝ̣ܒܐܝ̣ܬ ܢ̇ܶܬܚܰܙܰܩ ܘܓܰܢ̱ܒܳܪܳܐܝ̣ܬ ܢ̇ܰܩܪܶܒ: ܘܰܟܠܝ̣ܠܳܐ ܕܦܳܠ̈ܚܶܐ ܟܰܫܝ̣ܪ̈ܶܐ ܢ̇ܰܥܕܶܐ ܘܢ̇ܰܘܕܶܐ ܠܶܗ ܘܰܢ̇ܫܰܒܚܝ̣ܘܗ̱ܝ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܚܰܝܽܘ̣ܣܬܳܢܳܐ ܘܰܫܦܝ̣ܥ ܒܪ̈ܰܚܡܶܐ ܘܥܰܬܝ̣ܪ ܒܛܳܒܘ̣ܬܳܐ ܐܰܠܳܗܳܐ ܡܕܰܒܪܳܢܳܐ ܘܝܳܨܽܘܦܳܐ ܕܟܽܠ: ܗܰܘ̇ ܕܐܝ̣ܬܰܝܟ ܫܰܪܝ̣ܪܳܐ ܘܩܳܪܶܐ ܐܰܢ̱ܬ ܠܰܐܝܠܶܝܢ ܕܰܟܪܝ̣ܗܝ̣ܢ ܕܬܰܘ ܐܶܬ̣ܰܐܣܰܘ ܡܰܓܳܢ: ܝܳܗܘ̣ܒܳܐ ܚܰܕܳܝܳܐ ܕܡܰܠܝܳܐܝ̣ܬ ܥܰܠ ܣܢܝ̣̈ܩܶܐ ܐܳܫܶܕ ܐܰܢ̱ܬ ܥܘ̣ܕܪ̈ܳܢܰܝܟ: ܘܐܳܡܰܪ ܐܰܢ̱ܬ ܕܰܒܥܰܘ ܬ̣ܶܫܟܚܘܢ: ܩܘ̣ܫܘ̱ ܘܢ̣ܶܬܦܬܰܚ ܠܟܽܘܢ: ܗܰܘ̇ ܕܝܰܨܝ̣ܦܳܐܝ̣ܬ ܡܰܙܥܶܩ ܐܰܢ̱ܬ ܠܘܳܬ ܐܰܝܠܶܝܢ ܕܰܒܢܝ̣ܪܳܐ ܕܰܚܛܝ̣ܬܳܐ ܟܕܝ̣ܢܝ̣ܢ: ܘܰܒܝܘ̣ܩܪܳܐ ܕܥܰܘܠܳܐ ܐܰܣܝ̣ܪܝ̣ܢ: ܕܬܰܘ ܠܘܳܬܝ̱ ܟܽܠܟܽܘܢ ܐܰܝܠܝܢ ܕܰܠܐܶܝܢ ܡ̣ܶܢ ܝܰܩܝ̣ܪܘ̣ܬ ܡܰܘܒ̈ܠܶܐ ܕܥܳܠܡܳܐ ܗܳܢܳܐ ܘܶܐܢܳܐ ܐܰܢܺܝ݂ܚ̇ܟܽܘܢ: ܗܰܘ̇ ܕܟܰܕ ܚ̣ܙܰܝܬ ܕܡ̣ܶܢ ܫܘ̣ܪܳܝܳܐ ܠܘܳܬ ܒܝ̣̈ܫܳܬܳܐ ܐܶܫ̣ܬܰܪܓܰܠܢܰܢ: ܘܠܰܚܒܳܠܳܐ ܡܫܰܡܠܝܳܐ ܐܶܬ̣ܬܰܘܒܰܠܢܰܢ ܘܠܰܐܒܕܳܢܳܐ ܪܗ̣ܶܛܢܰܢ: ܘܡ̣ܶܢ ܬܝܳܒܘ̣ܬܳܐ ܘܰܒܥܳܬܳܐ ܕܚܰܝܰܝ̈ܢ ܐܰܗ̣ܡܝ̣ܢܰܢ: ܐܶܬ̣ܰܝܬ ܡܶܛܽܠ ܦܘ̣ܪܩܳܢܰܢ ܘܐܶܬ̣ܗ̣ܰܦܰܟ݂ܬ ܥܰܡܰܢ ܡܕܰܒܪܳܢܳܐܝ̣ܬ ܒܶܐܣܟܺܡܳܐ ܕܰܒܢܰܝ̈ܢܳܫܳܐ: ܟܰܕ ܚ̣ܰܘܺܝ̣ܬ ܠܰܢ ܐܘ̣ܪܚܳܐ ܓܡܝ̣ܪܬܳܐ ܘܦܳܪܘ̣ܩܳܝܬܳܐ: ܗܳܝ ܕܰܒܡܝ̣̈ܠܶܐ ܐܰܪܒܥܺܝ̣ܢ ܠܘܳܬ ܚܰܝ̈ܶܐ ܡܙܰܡܢܳܐ ܠܰܢ ܘܰܠܪܰܘܡܳܐ ܕܰܠܥܶܠ ܒܝܰܕ ܨܰܘܡܳܐ ܘܰܢܙܝ̣ܪܘ̣ܬܳܐ ܠܰܢ ܡܕܰܪܓܳܐ: ܘܚܰܘܪܳܐ ܡܰܠܰܐܟܳܝܳܐ ܡܰܩܢܝܳܐ ܠܰܢ: ܐܰܢ̱ܬ ܕܶܝܢ ܐܳܘ ܡܳܪܝܳܐ ܪܳܚܶܡ ܐ̱ܢܳܫ̈ܳܐ ܫܰܟܶܢ ܠܰܢ ܕܰܒܝܰܘܡ̈ܳܬܳܐ ܗܳܠܶܝܢ ܕܟܰܝ̈ܳܐ ܘܩܰܕܝ̣̈ܫܶܐ ܕܰܒܨܰܘܡܳܐ ܘܒܰܨܠܘ̣ܬܳܐ ܢ̇ܶܬܥܢܶܐ: ܘܰܒܟܺܐܢܘ̣ܬܳܐ ܘܰܒܙܰܕܝ̣ܩܘ̣ܬܳܐ ܢ̇ܶܬܕܰܒܰܪ: ܘܰܒܕܰܟܝܘ̣ܬܳܐ ܘܩܰܕܝ̣ܫܘ̣ܬܳܐ ܢ̇ܶܬܕܰܪܰܫ: ܘܰܒܗܰܘܢܳܐ ܕܰܟܝܳܐ ܠܘܳܬ ܡܥܰܠܝܘ̣ܬܳܐ ܢ̇ܶܬܕܰܪܰܓ: ܘܰܠܘܳܬ ܕܘ̣ܒܳܪܳܐ ܡܝܬܪܐ ܢ̇ܶܣܰܩ: ܘܰܠܘܳܬ ܓܡܝ̣ܪܘ̣ܬܳܐ ܢ̇ܶܫܬܰܘܫܰܛ: ܘܠܘ̣ܩܒܰܠ ܟܽܠ ܚܰܫ̈ܶܐ ܒܝ̣̈ܫܶܐ ܢ̇ܥܰܙܶܐ: ܘܡ̣ܶܢ ܟܽܠ ܚܒܳܠܳܐ ܢ̇ܶܬܚܰܪܰܪ: ܘܒܰܡܚܰܡܣܢܳܢܘ̣ܬܳܐ ܢ̇ܶܨܛܰܒܰܬ: ܘܰܒܙܰܝܢܳܐ ܕܝ̣ܠܳܟ ܢ̇ܶܬܚܰܙܰܩ: ܘܰܒܥܘ̣ܕܪ̈ܳܢܰܝܟ ܢ̇ܶܬܠܰܒܰܒ: ܘܠܳܐܟܶܠܩܰܪܨܳܐ ܘܫܺܐܕ̈ܶܐ ܒܕܰܪܳܐ ܘܬܰܟܬܘ̣ܫܳܐ ܢ̇ܶܙܟܶܐ: ܬܘ̣ܒ ܕܶܝܢ ܗܳܠܶܝܢ ܐܳܘ ܡܳܪܝܳܐ ܕܰܠܟܽܠܗܽܘܢ ܝܘ̣ܩܪ̈ܶܐ ܘܡܰܫܩ̈ܠܶܐ ܕܰܚܛܝ̣ܬܳܐ ܠܪܘ̣ܚܩܳܐ ܡܶܢܰܢ ܢ̇ܶܫܕܶܐ: ܘܰܠܫܘ̣ܚ̈ܢܶܐ ܡܶܬܝܰܕ̈ܥܳܢܶܐ ܢ̇ܰܚܠܶܡ: ܘܰܠܨܳܐܝܘ̣ܬܳܐ ܕܢܰܦܫܳܐ ܢ̇ܚܰܠܶܠ: ܘܰܠܝܰܥܢܘ̣ܬܳܐ ܢ̇ܶܒܣܽܘ̣ܪ: ܘܥܝ̣ܪ̈ܶܐ ܘܰܚܦܝ̣̈ܛܶܐ ܢ̇ܶܗܘܶܐ: ܘܚܰܝ̈ܶܐ ܕܫܳܦܪܝ̣ܢ ܠܳܟ ܢ̇ܺܚܶܐ: ܘܰܠܒܘ̣ܣܳܡܳܐ ܕܦܶܨܚܳܐ ܩܰܕܝ̣ܫܳܐ ܢ̇ܶܬܛܰܝܰܒ: ܘܰܠܝܰܘܡܳܐ ܕܰܩܝܳܡܬܳܐ ܢ̇ܶܬܡܰܢܰܥ: ܘܰܒܛܘ̣̈ܒܶܐ ܕܡܰܠܟܘ̣ܬܳܟ ܢ̇ܶܬܦܰܛܰܡ: ܘܒܰܟܠܝ̣̈ܠܶܐ ܕܙܳܟܘ̣ܬܳܐ ܢ̇ܶܬܟܰܠܰܠ: ܘܠܰܫܡܳܟ ܩܰܕܝ̣ܫܳܐ ܢ̇ܫܰܒܰܚ: ܘܠܰܐܒܘ̣ܟ ܣܓܝ̣ܕܳܐ ܢ̇ܰܘܕܶܐ: ܘܰܠܪܘ̣ܚܳܟ ܩܰܕܝ̣ܫܳܐ ܢ̇ܗܰܠܶܠ ܘܰܢ̇ܙܰܡܰܪ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܰܠܳܗܳܐ ܗܰܘ̇ ܕܩܰܒ̣ܶܠ ܨܰܘ̈ܡܶܐ ܘܰܨܠܰܘ̈ܳܬܳܐ ܕܟ̈ܺܐܢܶܐ ܩܰܕ̈ܡܳܝܶܐ: ܕܩܰܕܶܡ̣ܘ̱ ܐܰܟ̣ܪܶܙܘ̱ ܥܰܠ ܡܶܬܓܰܠܝܳܢܘ̣ܬܶܗ ܕܒܰܒܣܰܪ ܘܡܶܐܬܝ̣ܬܶܗ ܕܡܶܛܽܠ ܦܘ̣ܪܩܳܢܰܢ: ܘܰܒܚ̈ܶܙܘܳܢܶܐ ܪ̈ܘ̣ܚܳܢܳܝܶܐ ܘܰܒܓܶܠ̈ܝܳܢܶܐ ܐܰܠܳܗ̈ܳܝܶܐ ܫ̣ܰܪܪܘ̱ ܠܰܢ: ܘܰܒܣܰܒܪܳܐ ܘܚܰܕܘ̣ܬܳܐ ܡܠ̣ܰܘ ܠܠܶܒ̈ܰܘܳܬܰܢ: ܕܨܰܘܡܳܐ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ ܢ̇ܩܰܪܶܒ ܠܳܟ ܡܫܝ̣ܚܳܐ ܐܰܠܳܗܳܐ ܕܨܳܡ̣ܬ ܡܶܛܽܠܳܬܰܢ: ܕܒܶܗ ܢ̣ܶܗܘܶܐ ܠܰܢ ܚܘ̣ܣܳܝܳܐ ܕܚܰܘܒ̈ܶܐ ܘܫܘ̣ܒܩܳܢܳܐ ܕܰܚܛܳܗ̈ܶܐ: ܘܕܘ̣ܟܪܳܢܳܐ ܛܳܒܳܐ ܠܟܽܠܗܽܘܢ ܥܰܢܝ̣̈ܕܶܐ ܡܗܰܝܡ̈ܢܶܐ ܠܥܳܠܡܝ̣ܢ܀