ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܒܳܟ ܡܳܪܝ̱ ܬܰܪܥܳܐ ܘܐܘ̣ܪܚܳܐ ܕܚܰܝ̈ܶܐ ܢ̇ܶܥܘ̣ܠ ܘܢ̇ܺܐܪܰܬ ܣܝ̣ܡܬܳܐ ܘܓܰܙܳܐ ܕܥܘ̣ܕܪ̈ܳܢܰܝܟ ܐܰܠܳܗ̈ܳܝܶܐ: ܘܥܰܡ ܨܰܘܡܳܐ ܘܰܨܠܰܘ̈ܳܬܳܐ ܘܕܘ̣ܒܳܪ̈ܶܐ ܢܰܟ̈ܦܶܐ ܡܶܬܚܙܶܝܢܰܢ ܩܕܳܡܰܝܟ: ܘܢ̇ܶܬܬܰܓܰܪ ܡ̣ܶܢ ܠܘܳܬܳܟ ܚܘ̣ܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚܛܳܗ̈ܶܐ ܘܪ̈ܰܚܡܶܐ ܫܦܝ̣̈ܥܶܐ ܕܰܡܪܰܚܡܳܢܘ̣ܬܳܟ ܢ̣ܶܫܬܰܦܥܽܘܢ ܥܠܰܝܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܛܳܒܳܐ ܪܳܚܶܡ ܐ̱ܢܳܫ̈ܳܐ: ܕܨܶܒܝܳܢܶܗ ܨܶܝܕ ܟܽܠ ܐ̱ܢܳܫ ܐܰܪܟܢ̣ܶܗ: ܘܚܘ̣ܒܶܗ ܣܰܓܺܝܳܐܐ ܠܟܽܠ ܦܶܢܝ̈ܳܢ ܐܰܘܒ̣ܠܶܗ: ܠܗܰܘ̇ ܡܥܰܠܝܳܐ ܕܟܰܕ ܡ̣ܶܢ ܟܽܠ ܓܢܝ̣ܙ ܗ̱ܘ̣ ܒܰܟܝܳܢܶܗ ܠܟܽܠ ܕܰܒܥ̣ܳܝܗ̱ܝ ܐܶܫ̣ܬܟܰܚ ܒܰܚܢܳܢܶܗ: ܠܗܰܘ̇ ܥܰܬܝ̣ܪܳܐ ܕܟܽܠ ܥܘ̣ܬܪ̈ܝ̣ܢ ܡܶܬܕܰܠܶܝܢ ܡ̣ܶܢ ܒܶܝܬ ܓܰܙܶܗ: ܘܰܠܟܽܠ ܓܰܒܝ̣̈ܢ ܡܦܰܠܶܓ ܣܝ̣̈ܡܳܬܶܗ: ܛܳܒܳܐ ܕܠܶܗ ܢ̇ܶܬܕܟܰܪ ܘܠܶܗ ܢ̇ܫܰܒܰܚ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܡܨܰܒܬܳܢܳܐ ܕܢܰܦ̈ܫܳܬܳܐ ܘܰܕܦܰܓܪ̈ܶܐ: ܗܰܘ̇ ܡܚܰܠܠܳܢܳܐ ܘܰܡܕܰܟܝܳܢܳܐ ܘܡܳܪܘ̣ܩܳܐ ܕܰܡܟܰܬܡ̈ܶܐ: ܗܰܘ̇ ܕܰܒܝܰܕ ܡܨܺܝ̣ܕܬܳܐ ܕܝ̣ܠܳܟ ܐܶܘܰܢܓܶܠܳܝܬܳܐ ܚܒܰܫ̣ܬ ܠܟܽܠܗܽܘܢ ܒܢܰܝ̈ܢܳܫܳܐ: ܘܰܐܢܝ̣ܚܬ ܡ̣ܶܢܗܽܘܢ ܠܡܰܘܒ̈ܠܶܐ ܝܰܩܝ̣ܪ̈ܳܬܳܐ ܕܚܰܘܒ̈ܶܐ ܘܕܰܚ̈ܛܳܗܶܐ: ܟܰܕ ܣܳܡ̣ܬ ܠܗܽܘܢ ܢܳܡܘ̣̈ܣܶܐ ܘܦܘ̣ܩ̈ܕܳܢܶܐ ܕܝ̣ܠܳܟ ܡܰܚ̈ܝܳܢܶܐ: ܕܰܒܝܰܕ ܢܳܛܘ̣ܪܘ̣ܬܗܽܘܢ ܢ̣ܺܐܪܬܽܘܢ ܡܰܠܟܘ̣ܬܳܐ ܕܰܫܡܰܝܳܐ ܘܰܕܢ̣ܶܬܩܪܽܘܢ ܒܢܰܝ̈ܳܐ ܕܐܰܒܳܐ ܫܡܰܝܳܢܳܐ ܒܝܰܕ ܕܘ̣ܒܳܪ̈ܶܐ ܬܰܩ̈ܢܶܐ: ܐܰܢ̱ܬ ܗ̱ܘ̣ ܕܰܠܟܺܐܢ̈ܶܐ ܩܰܕ̈ܡܳܝܶܐ ܒܨܰܘܡܳܐ ܚܰܝܠܬܳܢܳܐ ܘܰܨܠܰܘ̈ܳܬܳܐ ܕܰܟܝ̈ܳܬܳܐ ܓܡ̣ܰܪܬ ܘܫܰܡ̣ܠܝ̣ܬ: ܨܰܘܡܳܐ ܓܶܝܪ ܠܥܰܦܪ̈ܳܢܶܐ ܪ̈ܘ̣ܚܳܢܶܐ ܓܳܡܰܪ ܘܰܡܫܰܡܠܶܐ: ܨܰܘܡܳܐ ܙܰܗܝ̣ ܦܰܪܨܽܘ̣ܦܶܗ ܕܡܽܘܫܶܐ ܒܝܰܕ ܚܙܳܬܳܐ ܐܰܠܳܗܳܝܬܳܐ ܘܐܰܚ̣ܶܬ ܠܘ̣ܚ̈ܶܐ ܕܢܳܡܘ̣ܣܳܐ: ܨܰܘܡܳܐ ܦ̣ܰܨܺܝ̣ ܠܢܝ̣̈ܢܘܳܝܶܐ ܡ̣ܶܢ ܗܦܘ̣ܟܝܳܐ ܘܰܓܙܳܪܕܝ̣ܢܳܐ ܕܡܰܘܬܳܐ: ܘܰܐܩ̣ܢܝ̣ ܐܶܢܽܘܢ ܦܘ̣ܪܩܳܢܳܐ ܒܝܰܕ ܨܠܰܘ̈ܳܬܳܐ ܘܕܶܡ̈ܥܶܐ ܘܬܶܢܚ̈ܳܬܳܐ ܪ̈ܰܥܘ̣ܡܳܬܳܐ: ܨܰܘܡܳܐ ܫܰܘܙܶܒ ܠܰܛܠܳܝ̈ܶܐ ܕܒܶܝܬ ܚܰܢܰܢܝܳܐ ܡ̣ܶܢ ܢܘ̣ܪܳܐ ܒܝܰܕ ܚܙܳܬܳܐ ܕܒܰܪ ܐܰܠܳܗ̈ܝ̣ܢ ܩܳܐܶܡ ܗ̱ܘܳܐ ܒܰܡܨܰܥܬܳܐ: ܨܰܘܡܳܐ ܣܟ̣ܰܪ ܦܘ̣̈ܡܶܐ ܡܚܰܒ̈ܠܳܢܶܐ ܕܰܐܪ̈ܝܰܘܳܬܳܐ ܡ̣ܶܢ ܪܓܝܓܘ̣ܬܶܗ ܕܕܳܢܺܝ̣ܐܝܶܠ: ܘܰܐܒ̣ܗܶܬ ܐܶܢܽܘܢ ܠܟܰܠ̈ܕܳܝܶܐ: ܨܰܘܡܳܐ ܢ̣ܰܨܰܚ ܠܺܐܠܺܝܳܐ ܘܰܒܡܰܪܟܰܒܬܳܐ ܣܠ̣ܶܩ ܠܰܫܡܰܝܳܐ: ܨܰܘܡܳܐ ܡܫܰܗܶܐ ܠܟܽܠܗܶܝܢ ܪ̈ܓܝ̣ܓܳܬܳܐ ܒܶܣܪ̈ܳܢܳܝܳܬܳܐ ܘܡܰܘܠܶܕ ܠܗܶܝܢ ܐܰܠܳܗ̈ܳܝܳܬܳܐ: ܘܰܕܒܰܐܠܳܗܳܐ ܡܶܬܥܰܠ̈ܡܳܢ: ܨܰܘܡܳܐ ܣܰܚ̣ܶܦ ܘܣܳܚܶܦ ܠܳܐܟܶܠܩܰܪܨܳܐ ܒܥܶܠܕܒܳܒܳܐ ܕܓܶܢܣܳܐ ܕܝ̣ܠܰܢ: ܘܰܐܒ̣ܗܶܬ ܠܟܽܠܗܶܝܢ ܦܳܠܰܚ̈ܘܳܬܶܗ ܕܡܳܪܘ̣ܕܳܐ: ܨܰܘܡܳܐ ܡܓܰܢ̱ܒܪܳܢܳܐ ܗܰܘ̇ ܕܰܐܬܠܝ̣̈ܛܶܐ ܕܰܒܣܶܕܪܳܐ ܕܰܩܪܳܒܶܗ ܕܡܳܪܝܳܐ ܩܳܝܡܝ̣ܢ: ܘܠܘܩܒܰܠ ܒܶܠܶܐܝܰܪ ܡܶܬܝܰܕܥܳܢܳܐ ܡܰܩܪܒܝ̣ܢ: ܐܰܢ̱ܬ ܗ̱ܘ̣ ܗܰܘ̇ ܕܰܠܨܰܘܡܳܐ ܒܨܰܘܡܳܐ ܕܝ̣ܠܳܟ ܚܰܝܠܬܳܢܳܐ ܓܡ̣ܰܪܬ ܘܫܰܡ̣ܠܝ̣ܬ: ܐܰܢ̱ܬ ܗ̱ܘ̣ ܐܳܦ ܗܳܫܳܐ ܐܳܘ ܡܳܪܝܳܐ ܡܳܪܳܐ ܕܨܰܘܡܳܐ ܘܰܡܩܰܒܠܳܢܳܐ ܕܰܨܠܰܘ̈ܳܬܳܐ: ܩܰܒܶܠ ܠܨܰܘܡܳܐ ܕܥܰܒ̈ܕܶܐ ܕܝ̣ܠܳܟ ܘܰܒܢܰܝ̈ܳܐ ܕܥܺܕܬܳܐ ܕܝ̣ܠܳܟ ܩܰܕܝ̣ܫܬܳܐ: ܘܬ̣ܶܬܢܝ̣ܚـܝ̱ ܐܰܠܳܗܘ̣ܬܳܟ ܒܰܨܠܰܘ̈ܳܬܳܐ ܕܡ̣ܶܢ ܠܶܒ̈ܰܘܳܬܳܐ ܫܚܝ̣̈ܩܶܐ ܠܘܳܬܳܟ ܡܶܫܬܰܕܪ̈ܳܢ: ܘܪܰܥܳܐ ܐܰܢ̱ܬ ܠܳܟ ܚܠܳܦܰܝܢ ܡܶܛܽܠ ܕܠܳܐ ܣܳܦ̇ܩܳܐ ܒܳܥܘ̣ܬܰܢ ܕܰܬ̣ܪܰܥܶܝܟ: ܗܘܝ̣ ܐܰܢ̱ܬ ܠܳܟ ܡܦܝ̣ܣܳܢܳܐ ܚܠܳܦܰܝܢ ܡܶܛܽܠ ܕܝܰܡܳܐ ܕܪ̈ܰܚܡܶܐ ܘܰܕܛܳܒܘ̣ܬܳܐ ܐܝ̣ܬܰܝܟ: ܠܳܐ ܬ̣ܶܫܕܶܐ ܠܰܢ ܡ̣ܶܢ ܩܕܳܡܰܝܟ ܡܳܪܝܳܐ ܡܶܛܽܠ ܚܛܳܗ̈ܶܐ ܘܠܳܐ ܢܳܡܘ̣ܣ̈ܳܝܘܳܬܳܐ ܕܝ̣ܠܰܢ: ܕܠܳܐ ܢ̣ܶܬܬܥܝ̣ܩܽܘܢ ܥܠܰܝܢ ܚܰܝ̈ܠܰܘܳܬܳܐ ܫܡܰܝ̈ܳܢܶܐ ܘܢ̣ܰܡܛܪܽܘܢ ܥܠܰܝܢ ܟܺܐܦ̈ܶܐ ܕܢܘ̣ܪܳܐ ܘܓܘ̣ܡܪ̈ܶܐ ܕܝܰܩܕܳܢܳܐ: ܠܳܐ ܡܳܪܝ̱ ܢ̇ܶܗܘܶܐ ܐܘ̣ܟܠܳܐ ܠܢܘ̣ܪܳܐ ܒܝܰܘܡܳܐ ܗܰܘ̇ ܕܕܝ̣ܢܳܐ ܟܺܐܢܳܐ: ܠܳܐ ܢ̣ܶܬܦܰܪܣܽܘܢ ܡܘ̣̈ܡܰܝܢ ܡ̣ܶܢ ܟܺܐܢܘ̣ܬܳܟ ܒܝܰܘܡܳܐ ܕܦܳܣܝ̣̈ܩܳܬܳܐ: ܐܶܠܳܐ ܚܘ̣ܣ ܥܠܰܝܢ ܘܪܰܚܶܡܥܠܰܝܢ: ܫܡܰܥ ܠܰܓܙܳܪܕܝ̣ܢܳܐ ܗܰܘ̇ ܕܡܶܛܽܠ ܚܛܳܗܰܝ̈ܢ ܥܠܰܝܢ ܡܶܬܬܰܝܬܶܐ: ܫܡܰܥ ܓܥܳܬܳܐ ܕܣܳܓܘ̣̈ܕܰܝܟ ܡܳܪܝܳܐ: ܬ̣ܶܥܘ̣ܠܝ̱ ܩܕܳܡܰܝܟ ܬܰܚܢܰܢܬܳܐ ܕܐܰܝܠܶܝܢ ܕܰܐܣܝ̣ܪܝ̣ܢ: ܚܽܘ̣ܪ ܒܕܶܡ̈ܥܶܐ ܕܬܰܝ̈ܳܒܶܐ: ܐܶܬ̣ܪܰܥܳܐ ܒܬܶܢܚ̈ܳܬܳܐ ܕܚܰܛܳܝ̈ܶܐ: ܨܠܝ̣ ܐܶܕܢܳܟ ܠܒܳܥ̈ܘܳܬܳܐ ܕܡܰܣ̈ܟܠܳܢܶܐ: ܐܰܡܛܰܪ ܥܠܰܝܢ ܡܶܛܪܳܐ ܕܰܚܢܳܢܳܟ: ܘܛܰܠܳܐ ܕܒܰܣܝ̣ܡܘ̣ܬܳܟ ܪܘ̣ܣ ܥܰܠ ܓܰܪ̈ܡܶܐ ܕܥܰܢܝ̣̈ܕܶܐ ܡܗܰܝܡ̈ܢܶܐ: ܘܰܐܢܝ̣ܚ ܪ̈ܘ̣ܚܳܬܗܽܘܢ ܒܰܐܘ̈ܘܳܢܶܐ ܕܝ̣ܠܳܟ ܫܡܰܝ̈ܳܢܶܐ ܡܶܛܽܠ ܕܐܰܠܳܗܳܐ ܕܪ̈ܰܚܡܶܐ ܘܕܰܚܢܳܢܳܐ ܐܝ̣ܬܰܝܟ: ܘܒܶܝܬ ܓܰܘܣܳܐ ܕܟܽܠܗܽܘܢ ܬܰܝ̈ܳܒܶܐ ܘܠܳܟ ܫܘ̣ܒܚܳܐ ܡܰܣܩܝ̣ܢܰܢ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀