ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܫܰܟܶܢ ܠܰܢ ܡܫܝ̣ܚܳܐ ܦܳܪܘ̣ܩܰܢ: ܕܘ̣ܟܳܝܳܐ ܗܰܘ̇ ܡܫܰܡܠܝܳܐ ܒܝܰܕ ܝܰܘܡ̈ܳܬܳܐ ܗܳܠܶܝܢ ܩܰܕܝ̣̈ܫܶܐ ܕܨܰܘܡܳܐ: ܟܰܕ ܡ̣ܶܢ ܦܰܓܪ̈ܰܝܢ ܡܕܰܟܶܐ ܐܰܢ̱ܬ ܠܚܰܫ̈ܶܐ ܡܨܰܥܪ̈ܶܐ: ܘܡ̣ܶܢ ܢܰܦܫ̈ܳܬܳܐ ܕܝ̣ܠܰܢ ܠܝܘ̣ܩܪܳܐ ܕܚܰܘܒ̈ܶܐ ܘܕܰܚܛܳܗ̈ܶܐ ܕܝ̣ܠܰܢ: ܗܳܟܰܢܳܐ ܟܰܕ ܠܟܽܠܗܽܘܢ ܪ̈ܶܓܫܰܝܢ ܡܕܰܟܶܐ ܐܰܢ̱ܬ ܡܫܰܡܠܝܳܐܝ̣ܬ: ܥܰܡ ܕܟܰܝ̈ܳܐ ܕܝ̣ܠܳܟ ܢ̇ܶܬܚܰܠܰܛ ܒܥܳܠܡܳܐ ܗܰܘ̇ ܪܰܒܳܐ: ܘܥܰܡܗܽܘܢ ܢ̇ܫܰܒܚܳܟ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܣܳܝܘ̣ܡܳܐ ܕܢܳܡܘ̣̈ܣܶܐ ܩܰܕܝ̣̈ܫܶܐ: ܘܳܐܣܝܳܐ ܫܰܪܝ̣ܪܳܐ ܕܢܰܦ̈ܫܳܬܳܐ ܘܰܕܦܰܓܪ̈ܶܐ: ܥܳܨܽܘܒܳܐ ܡܗܝ̣ܪܳܐ ܕܰܐܬ̣ܩܶܢ ܠܘ̣ܩܒܰܠ ܟܺܐܒ̈ܶܐ ܕܰܚܛܝ̣ܬܳܐ ܣܰܡ̱̈ܡܳܢܶܐ ܡܝܰܬܪ̈ܶܐ ܕܰܬܝܳܒܘ̣ܬܳܐ ܡܩܰܠܰܣܬܳܐ: ܘܣ̣ܳܡ ܥܰܠ ܫܘ̣ܚ̈ܢܶܐ ܘܡܰܚ̈ܘܳܬܳܐ ܕܰܓ̣ܕܰܫܘ̱ ܠܐ̱ܢܳܫܘ̣ܬܳܐ ܡ̣ܶܢ ܥܶܠܬܳܐ ܕܝܰܥܢܘ̣ܬܳܐ: ܥܶܩܳܪ̈ܶܐ ܡܰܚܠ̈ܡܳܢܶܐ ܕܰܒܝܰܕ ܨܰܘܡܳܐ ܘܰܨܠܘ̣ܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܥܶܩܳܪܳܐ ܕܚܰܝ̈ܶܐ ܘܰܥܨܳܒܳܐ ܡܥܰܕܪܳܢܳܐ ܘܦܳܪܘ̣ܩܳܝܳܐ: ܠܰܣܝܳܡ ܢܳܡܘ̣ܣܳܐ ܕܨܰܘܡܳܐ ܠܰܢ ܬܰܚܶܡ̣ܬ: ܘܒܐܝ̣̈ܕܰܘܗ̱ܝ ܠܣܰܡܳܐ ܡܰܘܒܕܳܢܳܐ ܗܰܘ̇ ܕܡ̣ܶܢ ܛܥܳܡܬܳܐ ܡܰܪܝ̣ܪܬܳܐ ܕܩܰܝܣܳܐ ܗܰܘ̇ ܕܝ̣ܕܰܥܬܳܐ ܐܰܝܟ ܚܒܳܠܳܐ ܒܰܢ ܐܶܬ̣ܥܰܠܰܠ: ܒܫܰܦܝ̣ܪܘ̣ܬ ܐܘ̣ܡܳܢܘ̣ܬܳܐ ܕܚܰܩ̣ܬ: ܘܠܰܟܝܳܢܳܐ ܕܝ̣ܠܳܟ ܫܒܝ̣ܚܳܐܝ̣ܬ ܐܰܣ̣ܝ̣ܬ: ܗܰܘ̇ ܕܰܠܗܳܠܶܝܢ ܕܰܥܕܰܟܝ̣ܠ ܒܓܘ̣ܫܡܳܐ ܕܰܡܚܝ̣ܠܘ̣ܬܳܐ ܐܝ̣ܬܰܝܗܽܘܢ: ܐܰܝܟ ܕܰܒܕܘ̣ܒܳܪ̈ܶܐ ܕܠܳܐ ܓܫܘ̣ܡ ܢ̣ܺܚܽܘܢ ܦܩ̣ܰܕܬ: ܘܰܠܠܳܐ ܬܘ̣ܪܣܳܝܳܐ ܗܰܘ̇ ܕܐܝ̣ܬܰܘܗ̱ܝ ܬܘ̣ܪܣܳܝܳܐ ܕܡܰܠܰܐܟ̈ܶܐ ܠܳܐ ܡܳܝܽܘ̣̈ܬܶܐ: ܘܠܰܒܢܰܝ̈ܢܳܫܳܐ ܡܳܝ̈ܽܘ̣ܬܶܐ ܒܰܕܡܘ̣ܬ ܦܘ̣ܢܳܩܳܐ ܡܶܕܶܡ ܫܰܟܶܢ̣ܬ: ܘܰܠܗܳܢܳܐ ܐܰܢ̱ܬ ܒܳܟ ܝܰܬܝ̣ܪ ܡܝܰܩܪܳܐ ܘܝܰܬܝ̣ܪ ܫܒܝ̣ܚܳܐ ܒܙܰܒ̈ܢܶܐ ܕܡܶܐܬܝ̣ܬܳܟ ܕܒܰܒܣܰܪ ܐܶܬ̣ܪܡܝ̣ܬ ܠܰܡܚܰܘܳܝܽܘ̣ ܐܰܝܟܰܢܳܐ ܕܠܰܢ ܡܚܝ̣̈ܠܶܐ ܬ̣ܚܰܝܶܠ: ܘܰܐܝܟ ܕܡܰܨܝܳܐ ܕܢ̇ܶܬܕܰܡܶܐ ܒܓܰܢ̱ܒܳܪܘ̣ܬܳܐ ܕܝ̣ܠܳܟ: ܘܐܰܝܟܰܢܳܐ ܕܫܰܘ̈ܬܳܦܶܐ ܕܝ̣ܠܳܟ ܦܳܪ̈ܘ̣ܩܳܝܶܐ ܗ̣ܘܰܝܢ: ܗܳܟܰܢܳܐ ܘܰܕܚܰܝ̈ܶܐ ܕܝ̣ܠܳܟ ܛܘ̣ܒ̈ܬܳܢܶܐ ܒܟܽܠ ܬ̣ܶܥܒܶܕ ܠܰܢ: ܘܫܰܟܶܢ ܠܰܢ ܡܳܪܝܳܐ ܐܳܦ ܗܳܫܳܐ ܥܘ̣ܕܪܳܢܳܐ ܕܛܰܝܒܘ̣ܬܳܐ ܗܳܝ̇ ܕܡ̣ܶܢ ܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ: ܘܟܰܕ ܠܢܰܫܝ̣ܫܘ̣ܬܳܐ ܘܰܡܫܰܪܝܘ̣ܬܳܐ ܕܰܟܝܳܢܳܐ ܕܝ̣ܠܰܢ ܡܰܚܠܶܡ ܐܰܢ̱ܬ: ܘܚܝ̣ܨܳܐ ܘܰܡܫܰܪܪܳܐ ܠܗܳܢܳܐ ܥܳܒܶܕ ܐܰܢ̱ܬ: ܘܰܠܪܶܚܡܰܬ݀ ܪ̈ܓܝ̣ܓܳܬܳܐ ܕܝ̣ܠܶܗ ܠܪܶܚܡܰܬ݀ ܡܝܰܬܪ̈ܳܬܳܐ ܡܰܗܦܶܟ ܐܰܢ̱ܬ: ܚܰܝܶܠ ܡܰܢ ܠܗܳܢܳܐ ܕܬܰܩܶܢ̣ܬ ܠܰܢ: ܗܳܢܰܘ ܕܶܝܢ ܠܦܰܓܪܳܐ ܕܡܘ̣ܟܳܟܳܐ ܠܘܳܬ ܗܳܝ̇ ܕܰܫ̇ܘܶܐ̣ ܒܪܶܗܛܳܐ ܝܰܬܝ̣ܪܳܐ ܢ̇ܶܗܘܶܐ: ܠܢܰܦܫܳܐ ܒܗܳܠܶܝܢ ܕܰܡܝܰܬܪ̈ܳܢ: ܘܠܳܐ ܢ̣ܶܗܘܶܐ ܢܳܬܶܦ ܠܶܗ ܠܘܳܬ ܗܳܠܶܝܢ ܕܰܫܟܝ̣ܪ̈ܳܢ: ܠܢܰܦܫܳܐ ܕܶܝܢ ܝܰܬܝ̣ܪ ܚܘܺܝ̣ܚܬܳܐ ܥܰܬܶܕ: ܐܰܝܟܰܢܳܐ ܕܰܠܘܳܬ ܗܳܠܶܝܢ ܪ̈ܳܡܳܬܳܐ ܘܰܡܥܰܠ̈ܝܳܬܳܐ ܘܰܒܢ̈ܳܬ ܓܶܢܣܳܐ ܕܝ̣ܠܶܗ ܐܰܟܚܕܳܐ ܬܪܝ̣ܡ ܘܰܬ̣ܥܰܠܶܐ: ܠܡܰܫܟܢܳܐ ܐܰܪܥܳܢܳܝܳܐ ܕܒܰܟܝܳܢܳܐ ܕܝ̣ܠܶܗ ܠܬܰܚܬ ܢܳܬܰܥ: ܚܰܝܶܠ ܕܶܝܢ ܐܳܦ ܠܗܰܘܢܳܐ ܪܝ̣ܫܳܢܳܝܳܐ ܠܘܳܬ ܗܳܝ̇ ܕܣܰܟܘ̣ܠܬܳܢܳܐܝ̣ܬ ܒܫܰܦܝ̣ܪܘ̣ܬ ܕܶܚܠܬܳܐ ܟܝ̣ܬ ܘܰܡܥܰܠܝܽܘ̣ܬ ܟܝܳܢܳܐ ܢ̣ܕܰܒܰܪ: ܘܗܶܢܝܽܘ̈ܟܝ̣ܣܶܐ ܢ̣ܶܥܒܶܕ ܠܡܰܪܟܰܒܬܳܐ ܕܝ̣ܠܶܗ ܗܳܝ̇ ܫܘܺܝ̣ܚܰܬ݀ ܐܰܟܚܕܳܐ ܘܰܢ̣ܕܰܪܫܺܝ̣ܗ̇ ܘܢ̣ܰܠܦܺܝ̣ܗ̇ ܕܰܒܫܰܘܝܽܘܬ ܨܶܒܝܳܢܳܐ ܘܰܡܥܰܙܝܳܢܳܐܝ̣ܬ ܘܰܒܟܽܠܙܒܰܢ ܬ̣ܶܦܠܘ̣ܚ ܡܰܢ ܡܝܰܬܪ̈ܳܬܳܐ ܕܝ̣ܠܳܟ: ܠܡܶܬܪܚܳܩܽܘ̣ ܕܶܝܢ ܠܰܘ ܒܰܠܚܘ̣ܕ ܡ̣ܶܢ ܐܳܣܘ̣ܛܘ̣ܬܳܐ ܘܡ̣ܶܢ ܣܰܒܥܳܐ ܕܡܶܐܟܘ̣ܠܬܳܐ ܝܰܬܝ̣ܪܬܳܐ: ܐܶܠܳܐ ܘܰܠܡܰܣܛܳܝܽܘ̣ ܡ̣ܶܢ ܟܽܠ ܒܝ̣̈ܫܳܬܳܐ ܗܳܝ̇ ܕܰܐܘ ܡ̣ܶܢ ܦܰܓܪܳܐ ܥܶܠܬܳܐ ܐܝ̣ܬ ܠܶܗ: ܘܰܡܫܰܥܒܶܕ ܐܰܢ̱ܬ ܒܫܰܦܝ̣ܪܘ̣ܬ ܛܶܟܣܳܐ: ܦܰܓܪܳܐ ܡܰܢ ܠܢܰܦܫܳܐ ܡܶܫܬܰܡܥܳܢܳܐ ܥܳܒܶܕ ܐܰܢ̱ܬ: ܘܰܒܥܝ̣ܪܘ̣ܬܳܐ ܕܝ̣ܠܶܗ ܒܝܰܕ ܡܠܝ̣ܠܘ̣ܬܳܐ ܕܫܰܦܝ̣ܪܘ̣ܬ ܓܰܘܣܳܐ ܕܗܳܝ̇ ܡܛܰܠܶܩ ܐܰܢ̱ܬ: ܢܰܦܫܳܐ ܕܶܝܢ ܠܗܰܘܢܳܐ ܡܥܰܒܕܶܕ ܐܰܢ̱ܬ ܘܡܰܪܟܶܢ: ܘܰܡܚܝ̣ܠ̈ܘܳܬܳܐ ܕܝ̣ܠܶܗ ܒܝܰܕ ܩܳܝܽܘ̣ܡܘ̣ܬܳܐ ܛܳܒܬܳܐ ܕܗܰܘܢܳܐ ܢ̣ܶܬܠܰܚ̈ܡܳܢ ܡܰܥܒܶܕ ܐܰܢ̱ܬ: ܒܳܗ̇ ܒܕܡܽܘ̣ܬܳܐ ܐܳܦ ܠܗܳܢܳܐ ܠܘܳܬ ܗܳܠܶܝܢ ܕܠܳܟ ܫܳܦܪ̈ܳܢ ܬܪܘ̣ܨ: ܐܰܝܟܰܢܳܐ ܕܕܰܟܝܳܐܝ̣ܬ ܠܪܝ̣ܫܳܢܘ̣ܬܳܐ ܘܫܘ̣ܦܪܳܐ ܗܰܘ̇ ܕܕܳܡܶܐ ܠܰܐܠܳܗܳܐ: ܘܡܶܬܕܰܡܶܐ ܒܰܐܠܳܗܳܐ ܢ̣ܫܰܘܙܶܒ: ܘܗܰܒܠܰܢ ܡܳܪܝܳܐ ܠܟܰܪܣܳܐ ܝܰܥܢܬܳܐ ܢ̇ܶܐܚܘ̣ܕ: ܠܫܘ̣ܠܗܳܒܳܐ ܕܦܰܓܪܳܐ ܢ̇ܺܐܩܰܪ: ܠܪ̈ܘ̣ܚܶܐ ܛܰܡ̈ܳܐܬܳܐ ܗܳܠܶܝܢ ܕܙܳܢܝܘ̣ܬܳܐ ܢ̇ܒܰܛܶܠ: ܡ̣ܶܢ ܪܶܚܡܰܬ݀ ܟܰܪܣܳܐ ܐܰܝܟ ܕܡ̣ܶܢ ܕܶܚܠܰܬ݀ ܦܬܰܟܪ̈ܶܐ ܢ̇ܰܗܦܶܟ ܐܰܦܰܝ̈ܢ: ܠܰܚܣܳܡܳܐ ܐܰܝܟ ܣܳܢܶܐ ܒܢܰܝ̈ܢܳܫܳܐ ܢ̇ܕܰܡܶܐ: ܠܬܶܫܒܘ̣ܚܬܳܐ ܣܪܝ̣ܩܬܳܐ ܢ̇ܫܰܗܶܐ: ܠܚܶܡܬܳܐ ܩܫܝ̣ܬܳܐ ܢ̇ܕܰܥܶܟ: ܠܪܘ̣ܓܙܳܐ ܗܰܘ̇ ܠܳܐ ܟܺܐܢܳܐ ܢ̇ܶܕܚܘ̣ܩ: ܠܰܪ̈ܓܝ̣ܓܳܬܳܐ ܗܳܠܶܝܢ ܠܳܐ ܡܠܝ̣̈ܠܳܬܳܐ ܢ̇ܶܟܒܘ̣ܫ: ܗܳܠܶܝܢ ܕܶܝܢ ܐܰܠܳܗܳܝ̈ܳܬܳܐ ܘܠܳܐ ܗܘ̣ܠܳܢܝ̈ܳܬܳܐ ܚܢܰܢ ܒܰܢ ܢܰܝ̇ܬܶܐ ܚܰܫ̈ܶܐ ܘܫܰܪܟܳܐ: ܕܳܡ̈ܝܰـܝ ܣܰܡܳܐ ܕܡܰܘܬܳܐ ܗܳܠܶܝܢ ܕܢܰܦܫܳܐ ܕܶܚܠܬܳܐ ܙܰܝܽܘܥܬܳܢܘ̣ܬܳܐ: ܘܗܰܢܺܝܽܐܘ̣ܬܳܐ ܟܝ̣ܬ ܘܰܐܫܝ̣ܕܘ̣ܬܳܐ: ܠܪܘ̣ܚܩܳܐ ܡ̣ܶܢ ܕܘ̣ܒܳܪ̈ܶܐ ܕܝ̣ܠܰܢ ܢ̇ܶܕܚܘ̣ܩ: ܘܰܠܚܰܝ̈ܶܐ ܡܰܢ ܗܳܠܶܝܢ ܒܝ̣̈ܫܶܐ ܘܒܰܥܪ̈ܝ̣ܪܳܝܶܐ ܢ̇ܶܬܟܽܘ̣ܣ: ܒܳܬܰܪ ܕܶܝܢ ܗܳܢܽܘܢ ܪ̈ܘ̣ܚܳܢܳܝܶܐ ܘܰܫܡܰܝ̈ܳܢܶܐ ܢ̇ܶܪܕܘ̣ܦ: ܘܢ̣ܶܓܕܫܽܘܢ ܠܰܢ ܟܠܝ̣̈ܠܶܐ ܗܳܠܶܝܢ ܕܙܰܕܝ̣ܩܘ̣ܬܳܐ: ܘܒܰܡܢܳܬܳܐ ܕܩܰܕܝ̣̈ܫܶܐ ܘܰܒܠܳܐ ܚܳܫܘ̣ܫܘ̣ܬܳܐ ܕܟ̈ܺܐܢܶܐ ܢ̇ܶܬܒܰܣܰܡ: ܘܥܰܡܗܽܘܢ ܫܘ̣ܒܚܳܐ ܘܐܝ̣ܩܳܪܳܐ ܢ̇ܰܣܶܩ ܠܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀

ܥܶܛܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܨܰܘܡܳܐ ܩܰܕܝ̣ܫܳܐ ܚܠܳܦܰܝܢ ܒܰܡܕܰܒܪܳܢܘ̣ܬܳܟ ܐܰܠܳܗܳܝܬܳܐ ܫܰܡܠܝ̣ܬ: ܘܐܰܠܶܦ̣ܬ ܠܰܢ ܘܐܶܫ̣ܬܰܘܕܝ̣ܬ ܘܶܐܡ̣ܰܪܬ: ܕܰܒܨܰܘܡܳܐ ܘܒܰܨܠܘ̣ܬܳܐ ܡܶܫܬܰܒܩܝ̣ܢ ܚܛܳܗ̈ܶܐ ܕܐ̱ܢܳܫܘ̣ܬܰܢ: ܩܰܒܶܠ ܦܝ̣ܪܡܰܢ ܗܰܢܺܝܳܐܐ ܘܒܰܣܝ̣ܡܳܐ ܒܚܘ̣ܒܳܟ: ܘܨܰܘܡܰܢ ܘܰܨܠܰܘ̈ܳܬܰܢ ܡܚܝ̣̈ܠܶܐ ܒܛܰܝܒܘ̣ܬܳܟ: ܘܚܰܣܳܐ ܚܰܘܒ̈ܰܝܢ ܒܪܶܚܡܬ݀ ܐ̱ܢܳܫܘ̣ܬܳܟ: ܘܰܫܒܘ̣ܩ ܚܛܳܗܰܝ̈ܢ ܒܰܡܪܰܚܡܳܢܘ̣ܬܳܟ: ܘܡܰܢܰܥ ܠܰܢ ܠܝܰܘܡܳܐ ܒܪܝ̣ܟܳܐ ܘܩܰܕܝ̣ܫܳܐ ܕܦܶܨܚܳܟ ܡܰܚܝܳܢܳܐ: ܘܰܠܚܰܕܘ̣ܬܳܐ ܘܰܪܘܳܙܳܐ ܕܰܩܝܳܡܬܳܟ ܡܫܰܒܰܚܬܳܐ: ܘܐܰܫܘܳܐ ܠܰܢ ܕܰܒܓܰܠܝܽܘ̣ܬ ܐܰܦ̈ܶܐ ܢ̇ܰܘܕܶܐ ܘܢ̇ܶܣܓܘ̣ܕ ܠܳܟ ܘܠܰܐܒܘ̣ܽܟ ܘܰܠܪܽܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀