ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܐܰܠܳܗܳܐ ܠܚܽܘܕܳܝܳܐ ܕܩܳܡ ܡܶܢ ܩܰܒܪܳܐ ܘܰܐܩܺܝܡ ܠܰܢ: ܘܚܰܘܺܝ ܢܰܦܫܶܗ ܠܬܰܠܡܺܝ̈ܕܰܘܗ̱ܝ ܩܰܕܺܝ̈ܫܶܐ ܒܰܓܠܺܝܠܐܴ: ܘܰܚܙܰܐܘܽܘܗ̱ܝ ܒܳܬܰܪ ܩܝܳܡܬܶܗ ܡܰܢ ܒܬܶܕܡܽܘܪܬܳܐ: ܐܰܢ̱ܬ ܡܳܪܝܳܐ ܐܰܠܳܗܳܐ ܚܰܕܳܐ ܒܫܽܘܒܩܳܢ ܚܰܘ̈ܒܰܝܢ ܘܣܰܟܠܘ̈ܳܬܰܢ ܕܰܢܫܰܒܚܳܟ ܠܐܴ ܫܰܠܘܳܐܝ̣ܬ: ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܐܰܢ̱ܬ ܗܳܟܺܝܠ ܡܫܺܝܚܳܐ ܐܰܠܳܗܳܐ ܕܺܝܠܰܢ ܒܰܡܕܰܒܪܳܢܽܘܬܳܟ ܦܳܪܽܘܩܳܝܬܳܐ ܘܰܒܣܳܥܽܘܪ̈ܘܳܬܳܟ: ܦܽܘܩܕܳܢ̈ܶܐ ܘܢܳܡܽܘ̈ܣܐ ܢܒܺܝ̈ܳܝܶܐ ܘܰܫܠܺܝ̈ܚܶܐ ܐܰܫܠܶܡܬ ܠܰܢ: ܐܰܝܟܰܢܳܐ ܕܰܒܟܽܠܙܒܰܢ ܘܟܽܠܝܽܘܡ ܥ̱ܽܘܗܕܳܢܳܐ ܕܰܩܝܳܡܬܳܟ ܡܫܰܒܰܚܬܳܐ ܢܫܰܡܠܐܷ ܘܰܢܥܰܕܥܶܕ: ܟܰܕ ܢܰܚ̈ܬܶܐ ܚܶܘܳܪ̈ܶܐ ܥܰܠ ܠܶܒܰܘ̈ܳܬܳܐ ܕܺܝܠܰܢ ܡܶܬܥܰܛܦܺܝܢܰܢ ܒܰܕܡܽܘܬ ܡܰܠܐܱܟ̈ܶܐ ܩܰܕܺܝ̈ܫܶܐ ܕܶܐܬܚܙܺܝܘ ܨܶܝܕ ܩܰܒܪܳܟ ܒܚܶܘܳܪ̈ܰܝܗܽܘܢ ܘܣܰܒܰܪܘ̱ ܢܽܘܚܳܡܳܐ ܘܚܰܝ̈ܶܐ ܠܢܶܫ̈ܶܐ ܕܰܛܥܶܢ̈ܝ̱ ܗ̱ܘ̈ܰܝ ܗܶܪ̈ܽܘܡܶܐ ܕܰܢܒܰܣ̈ܡܳܢ ܦܰܓܪܳܟ ܝܰܩܺܝܪܳܐ: ܘܡܶܢ ܚܰܕܘ̈ܳܬܗܽܘܢ ܗܦܰܟ̈ܝ̱ ܗ̱ܘ̈ܰܝ ܘܠܰܫܠܝ̣ܚ̈ܶܐ ܐܰܘܕܰܥ̈ܝ̱ ܗ̱ܘ̈ܰܝ ܒܰܦܨܺܝܚܽܘܬܳܐ: ܕܩܳܡ ܡܳܪܰܢ ܒܬܶܫܒܽܘܚܬܳܐ: ܘܰܚܙܰܝܢܰܢ ܥܺܝܪܳܐ ܘܣܰܒ̣ܪܰܢ ܘܶܐܡ̣ܰܪ ܠܰܢ ܕܗܳܐ ܩܳܕܶܡ ܠܟܽܘܢ ܠܰܓܠܺܝܠܐܴ ܘܬܰܡܳܢ ܬܶܚܙܽܘܢܳܝܗ̱ܝ: ܘܰܪܗܶܛܘ̱ ܫܶܡܥܽܘܢ ܘܝܽܘܚܰܢܳܢ ܥܰܡ ܚܰܕܽܘܬܳܐ ܘܰܚܙܰܘ ܠܩܰܒܪܳܐ ܕܰܣܦܺܝܩ ܡܶܢ ܐܰܠܳܗܽܘܬܳܐ: ܘܒܰܕܓܽܘܢ ܚܢܰܢ ܡܗܰܝ̈ܡܢܶܐ ܒܩ̈ܳܠܐܷ ܕܰܙܡܺܝܪ̈ܳܬܳܐ ܘܰܕܬܶܫܒ̈ܚܳܬܳܐ ܨܠܰܘ̈ܳܬܳܐ ܢܩܰܪܶܒ ܠܳܟ ܘܬܰܘܕ̈ܝܳܬܳܐ: ܘܫܰܟܶܢ ܠܰܢ ܒܪ̈ܰܚܡܰܝܟ ܕܰܚܦܺܝ̈ܛܶܐ ܢܶܗܘܶܐ ܠܰܡܫܰܡܠܳܝܽܘ ܠܥܺܐܕܳܐ ܕܰܩܝܳܡܬܳܟ ܡܫܰܒܰܚܬܳܐ ܡܫܺܝܚܳܐ ܐܰܠܳܗܰܢ ܒܰܕܝܳܨܳܐ ܘܥܰܡ ܚܰܕܽܘܬܳܐ ܪܽܘܚܳܢܳܝܬܳܐ ܘܢܳܛܽܘܪܽܘܬܳܐ ܕܬܰܘܕܺܝܬܳܐ ܫܠܺܝܚܳܝܬܳܐ ܒܚܽܘܪܳܪܳܐ ܕܡܶܢ ܚܰܫ̈ܶܐ ܒܕܰܟܝܽܘܬܳܐ ܕܦܰܓܪܳܐ: ܘܰܒܩܰܕܺܝܫܽܘܬܳܐ ܕܢܰܦܫܳܐ ܘܪܽܘܚܳܐ ܘܡܰܕܥܳܐ: ܒܰܙܗܺܝܪܽܘܬܳܐ ܕܗܰܘܢܳܐ: ܒܰܡܨܰܠܠܽܘܬܳܐ ܕܚܽܘܫ̈ܳܒܶܐ ܒܩܰܘܡܳܐ ܠܐܴ ܥܕܺܝܠܐܴ: ܒܦܰܪܶܗܣܺܝܰܐ ܓܡܺܝܪܬܳܐ ܕܰܩܕܳܡ ܒܺܐܡܰܐ ܕܺܝܠܳܟ ܕܚܺܝܠܬܳܐ: ܘܰܒܟܽܠܶܗ ܒܰܪܢܳܫܰܢ ܓܰܘܳܝܳܐ ܘܒܰܪܳܝܳܐ ܥܦܺܝܦܳܐܝ̣ܬ ܢܥܰܕܥܶܕ ܠܳܟ ܕܰܟܝܳܐܝ̣ܬ ܘܩܰܕܺܝܫܳܐܝ̣ܬ ܘܰܠܡܰܫܪ̈ܝܳܬܳܐ ܕܚܰܝܠܰܘ̈ܳܬܳܐ ܕܰܠܥܶܠ ܢܶܬܚܰܝܰܕ: ܢܶܗܘܶܐ ܕܶܒܚܬܳܐ ܡܩܰܒܰܠܬܳܐ ܠܐܱܠܳܗܽܘܬܳܟ: ܘܰܒܡܰܕܒܚܳܟ ܩܰܕܺܝܫܳܐ ܒܰܣܺܝܡܳܐܝ̣ܬ ܢܶܬܩܰܒܰܠ: ܘܩܽܘܪܳܒ ܦܺܐܪ̈ܶܐ ܘܦܺܝܪܡܳܐ ܗܰܢܺܝܳܐܐ ܘܕܶܒܚܳܐ ܡܩܰܒܠܐܴ ܘܐ̱ܪܳܙܳܢܳܝܳܐ ܕܰܠܛܰܝܒܽܘܬܳܐ ܕܺܝܠܳܟ ܡܶܢܰܢ ܡܶܬܩܰܪܰܒ: ܘܪܰܗܒܽܘܢܳܐ ܗܰܘ ܥܕܶܢܳܝܳܐ ܘܰܪܘܳܙܳܐ ܢܰܨܺܝܚܳܐ ܡܶܢ ܗܳܪܟܳܐ ܢܶܣܰܒ: ܘܒܰܐܦ̈ܶܐ ܓܰܠܝ̈ܳܬܳܐ ܠܐܘ̣ܪܥܳܐ ܕܡܶܐܬܺܝܬܳܟ ܢܡܰܢܰܥ ܘܬܶܫܒ̈ܚܳܬܳܐ ܕܙܳܟܽܘܬܳܐ ܒܥܺܕܬܳܐ ܕܒܽܘܟܪ̈ܶܐ ܕܒܰܫܡܰܝܳܐ ܢܙܰܡܰܪ ܠܳܟ ܫܽܘܒܚܳܐ ܕܠܐܴ ܫܶܠܝܳܐ ܘܰܐܟܣܺܝܣܝܳܐ: ܘܬܰܘܕܺܝܬܳܐ ܕܟܺܝܬܳܐ ܘܩܽܘܠܳܣܳܐ ܚܘܺܝܚܳܐ: ܠܳܟ ܡܳܪܝ̱ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀