ܨܠܽܘܬܳܐ ܕܫܽܘܪܳܝܳܐ

ܓܰܘܙܶܠ ܠܰܢ ܡܳܪܝ̱ ܒܚܽܘܒܳܟ: ܘܢܰܒܪܶܫ ܠܰܢ ܒܪܶܚܡܬܳܟ: ܘܚܰܟܶܡ ܠܰܢ ܒܚܶܟܡܬܳܟ ܘܰܐܩܺܝܡ ܠܰܢ ܡܶܢ ܝܰܡܺܝܢܳܟ ܘܫܰܪܰܪ ܠܰܢ ܒܣܰܒܪܳܐ ܒܪܺܝܟܳܐ ܕܰܩܝܳܡܬܳܟ: ܘܰܐܫܘܳܐ ܠܰܢ ܕܢܶܚܕܶܐ ܘܢܶܬܦܨܰܚ ܒܢܽܘܚܳܡܳܟ: ܕܢܶܬܓܠܐܷ ܒܰܢ ܚܽܘܒܳܟ ܐܰܠܳܗܳܝܳܐ ܒܪܶܚܡܬܳܐ ܕܦܽܘܩܕܳܢܰܝ̈ܟ ܡܰܥܒ̈ܕܰܝ ܚܰܝ̈ܶܐ ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀

ܦܪܽܘܡܝܽܘܢ

ܬܶܫܒܽܘܚܬܳܐ ܠܰܚܕܳܐ ܡܳܪܽܘܬܳܐ ܡܬܽܘܡܳܝܬܳܐ ܘܰܐܠܳܗܽܘܬܳܐ ܕܒܰܬܠܳܬܳܐ ܩܢܽܘ̈ܡܶܐ ܬܠܺܝܬܳܐܝ̣ܬ ܡܶܬܦܰܠܓܳܐ ܘܡܶܬܚܰܝܕܳܐ ܘܡܶܬܬܰܠܽܘܬܳܐ ܚܕܳܢܳܐܝ̣ܬ: ܐܰܟܡܳܐ ܕܐܪܳܙܳܢܳܐܝ̣ܬ ܡܒܰܕܩܳܐ ܒܡܰܡܠܠܽܘܬ ܫܽܘܒܚܳܐ ܕܰܣܪ̈ܳܦܶܐ ܩܰܕܺܝ̈ܫܶܐ: ܒܰܕܓܽܘܢ ܕܶܝܢ ܐܝ̣ܬܝܗ̇ ܘܡܶܬܗܰܝܡܢܳܐ ܗ̣ܺܝ ܟܰܕ ܗ̣ܺܝ ܚܕܳܐ ܐܰܠܳܗܽܘܬܳܐ ܡܫܰܡܠܰܝܬܳܐ: ܘܒܰܬܠܳܬܳܐ ܩܢܽܘ̈ܡܶܐ ܘܒܰܬܠܳܬ ܕܺܝܠܳܝ̈ܳܬܳܐ ܡܶܬܗܰܘܢܳܢ̈ܝܳܬܳܐ ܟܺܝܬ ܡܶܬܝܰܩܢܳܐ: ܕܰܠܗܶܝܢ ܐܝ̣ܬܰܘܗ̱ܝ ܥܽܘܬܪܳܐ ܘܰܫܒܺܝܚܽܘܬܳܐ ܘܛܳܒܽܘܬܳܐ ܘܨܶܒܝܳܢܳܐ ܘܡܰܥܒܕܳܢܽܘܬܳܐ ܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ܀

ܣܶܕܪܳܐ

ܐܰܠܳܗܳܐ ܡܶܠܬܳܐ ܡܪܰܝܡܳܐ ܕܶܐܬܺܝܠܶܕ ܡܶܢ ܐܰܒܳܐ ܕܠܐܴ ܪܶܕܝܳܐ ܘܰܕܠܐܴ ܙܰܒܢܳܐ ܢܽܘܗܪܳܐ ܕܡܶܢ ܢܽܘܗܪܳܐ: ܐܰܠܳܗܳܐ ܫܰܪܺܝܪܳܐ ܕܡܶܢ ܐܰܠܳܗܳܐ ܫܰܪܺܝܪܳܐ: ܗܰܘ ܕܟܰܕ ܡܶܢ ܥܳܠܡܳܐ ܬܪܰܝܳܢܳܐ ܒ̣ܪܳܐ ܘܰܐܬܩܢ: ܘܒܳܪܽܘܝܽܘܬܳܐ ܕܳܐܕܳܡ ܒܨܰܠܡܶܗ ܘܒܰܕܡܽܘܬܶܗ ܘܰܒܫܰܦܺܝܪܽܘܬ ܡܠܰܚܡܽܘܬܳܐ ܝܰܩܪܶܗ ܘܥܰܠ ܟܽܠ ܐܰܫܠܛܶܗ: ܘܰܒܦܰܪܕܰܝܣܳܐ ܕܰܥܕܶܝܢ ܡܳܪܳܐ ܥܰܒܕܶܗ: ܘܚܺܐܪܽܘܬܳܐ ܝܰܗܒ ܠܶܗ ܘܰܬܚܽܘܡܳܐ ܣܳܡ ܠܶܗ: ܕܠܐܴ ܒܙܰܒܢܶܗ: ܘܟܰܕ ܠܦܰܐܝܽܘܬܶܗ ܕܦܺܐܪܳܐ ܪܓܺܝܓܳܐ ܐܶܬܪܰܓܪܰܓ ܐܶܟܰܠ ܘܰܥܒܰܪ ܦܽܘܩܕܳܢܳܐ: ܘܰܚ̣ܛܳܐ ܒܫܽܘܠܛܳܢܳܐ ܕܚܺܐܪܽܘܬܶܗ ܘܰܠܦܺܐܪܳܐ ܕܺܐܝܠܳܢܳܐ ܢܰܫܺܝܫܳܐܝ̣ܬ ܐܶܫܬܰܪܓܰܠ ܘܡܶܢ ܫܽܘܒܚܶܗ ܐܶܫܬܰܠܰܚ: ܒܗܳܝ ܕܰܢܦܰܠ ܗ̱ܘܳܐ ܡܰܦܽܘܠܬܳܐ ܪܰܒܬܳܐ ܘܥܰܫܺܝܢܬܳܐ ܒܶܠܥܳܕ ܙܽܘܘܳܓܳܐ ܟܝܳܢܳܝܳܐ: ܟܰܕ ܕܶܝܢ ܚܙܳܐ ܒܳܪܽܘܝܳܐ ܠܨܰܠܡܶܗ ܕܶܐܬܚܰܒܰܠ ܘܰܫܪܶܟ ܠܰܚܒܳܠܐܴ ܘܒܺܝܫܳܐ ܒܰܚܣܳܡܶܗ ܕܳܐܶܫ ܘܡܰܗܶܠ ܒܶܗ: ܟܶܪܝܰܬ݀ ܠܶܗ ܠܒܳܪܽܘܝܳܐ ܥܰܠ ܨܰܠܡܶܗ ܘܰܢܒܺܝ̈ܶܐ ܘܚܰܙܳܝ̈ܶܐ ܫܰܕܰܪ ܘܰܒܟܽܠ ܡܢܰܘ̈ܳܢ ܘܟܽܠ ܕܶܡܘ̈ܳܢ ܕܢܰܪܬܽܘܢܳܝܗ̱ܝ ܘܠܐܴ ܐܶܬܬܰܪܬܺܝ: ܘܡܶܢ ܬܰܡܳܢ ܥܨܳܝܗ̱ܝ ܚܽܘܒܶܗ ܣܰܓܺܝܳܐܐ ܘܚܰܝܽܘܣܬܳܢܽܘܬܶܗ ܕܠܐܴ ܡܶܬܬܟܺܝܠܐܴ ܘܰܠܝܰܠܕܳܐ ܕܡܶܢ ܥܽܘܒܶܗ ܘܨܶܡܚܳܐ ܕܺܐܝܬܽܘܬܶܗ ܫܰܕܪܶܗ ܠܐܱܪܥܳܐ ܟܽܘܒܳܢܳܝܬܳܐ ܕܺܝܠܰܢ ܕܢܶܛܥܰܢ ܟܺܐܒܰܝ̈ܢ ܘܟܽܘܪ̈ܗܳܢܰܝܢ ܢܶܣܰܒ: ܘܰܗܘܳܐ ܕܶܒܚܳܐ ܡܚܰܣܝܳܢܳܐ ܡܶܛܽܠܳܬܰܢ: ܘܪܺܝܫ ܟܽܘܡܪ̈ܶܐ ܕܬܰܘܕܺܝܬܰܢ: ܘܰܠܒܶܫ ܦܰܓܪܳܐ ܡܶܢ ܒܬܽܘܠܬܳܐ ܩܰܕܺܝܫܬܳܐ ܘܠܐܴ ܡܢܰܣܝܰܬ݀ ܒܙܽܘܘܳܓܳܐ ܡܰܪܝܰܡ: ܡܶܢ ܓܶܢܣܶܗ ܕܕܰܘܺܝܕ: ܘܰܒܟܽܠܗܶܝܢ ܕܺܝܠܰܢ ܗܰܠܶܟ ܐܰܟܘܳܬܰܢ ܣܛܰܪ ܡܶܢ ܥܶܕܠܳܝܳܐ ܘܰܚܛܺܝܬܳܐ: ܘܶܐܬܳܐ ܠܚܰܫܳܐ ܘܡܽܘܟܳܟܳܐ ܒܨܶܒܝܳܢܶܗ ܗܰܘ ܠܐܴ ܚܳܫܽܘܫܳܐ ܘܠܐܴ ܡܳܝܽܘܬܳܐ: ܐܶܬܕܒܰܪ ܠܒܶܝܬ ܕܺܝܢܳܐ ܐܰܝܟ ܚܰܝܳܒܳܐ: ܗܰܘ ܕܐܰܠܒ̣ܶܫ ܠܐܴܕܳܡ ܬܶܢܝܳܢܽܘܬ ܬܶܫܒܽܘܚܬܳܐ: ܒܩܰܢܝܳܐ ܡܚܰܘ ܥܰܠ ܪܺܝܫܶܗ ܡܝܰܩܪܳܐ: ܗܰܘ ܕܰܡܬܰܚ ܫܡܰܝܳܐ ܐܰܝܟ ܝܳܪܺܝܥܬܳܐ: ܘܰܪܩܰܥ ܐܰܪܥܳܐ ܥܰܠ ܡܰܝ̈ܳܐ ܕܠܐܴ ܫܶܬܶܐܣ̈ܶܐ: ܡܰܬܚܽܘܗ̱ܝ ܥܰܠ ܩܰܝܣܳܐ ܕܰܨܠܺܝܒܳܐ ܒܢ̈ܰܝ ܨܶܗܝܽܘܢ ܨܳܠܽܘܒܬܳܐ: ܘܰܐܝܬܺܝܘ ܠܶܗ ܚܰܠܐܴ ܘܰܡܪܳܪ̈ܶܐ ܒܥܶܕܳܢ ܨܶܗܝܶܗ: ܠܗܰܘ ܕܡܰܪܘܶܐ ܠܐܱܪܥܳܐ ܒܡܶܛܪ̈ܶܐ ܘܰܪ̈ܣܺܝܣܶܐ ܕܒܰܣܺܝܡܽܘܬܶܗ ܓܕܰܠܘ̱ ܠܶܗ ܟܠܺܝܠܐܴ ܕܟܽܘ̈ܒܶܐ ܘܣܳܡܘ̱ ܒܪܺܝܫܶܗ ܐܰܝܟ ܕܰܒܒܶܙܚܳܐ: ܟܰܕ ܗ̣ܽܘ ܐܝ̣ܬܰܘܗ̱ܝ ܕܡܰܦܪܶܓ ܠܐܱܪܥܳܐ ܒܦܰܩ̈ܚܶܐ ܕܟܽܠ ܓܢܶܣ ܕܒܳܪܽܘܝܽܘܬܶܗ: ܚܰܒܫܽܘܗ̱ܝ ܒܓܰܘ ܩܰܒܪܳܐ ܕܠܐܴ ܢܶܬܢܰܚܰܡ ܘܢܰܓܗܽܘܢ ܡܶܢܶܗ ܒܗܳܝ ܕܰܐܣܠܺܝ ܐܶܢܽܘܢ: ܘܰܬܠܳܬܳܐ ܝܰܘ̈ܡܺܝܢ ܟܰܬܰܪ ܒܶܝܬ ܡܺܝ̈ܬܶܐ ܟܰܕ ܙܳܪܰܥ ܫܰܝܢܳܐ ܘܰܫܠܳܡܳܐ ܠܟܽܠܗܽܘܢ ܫܟܺܝ̈ܒܶܐ ܕܒܰܫܝܽܘܠ: ܩܳܡ ܡܶܢ ܩܰܒܪܳܐ ܕܠܐܴ ܚܒܳܠܐܴ ܒܳܬܰܪ ܫܟܺܝܒܽܘܬܳܐ ܘܒܳܬܰܪ ܡܰܪܬܝܳܢܽܘܬܳܐ ܕܺܝܠܶܗ ܠܪ̈ܳܚܡܰܘܗ̱ܝ ܘܰܣܒܰܪܬܳܐ ܕܚܰܕܽܘܬܳܐ ܐܰܟܪܶܙ: ܢܚܶܬ ܠܒܶܝܬ ܡܺܝ̈ܬܶܐ ܘܰܐܓܶܣ ܥܰܡ ܫܟܺܝ̈ܒܶܐ ܬܠܳܬܳܐ ܝܰܘ̈ܡܺܝܢ: ܘܕܳܫܶܗ ܠܡܰܘܬܳܐ ܝܰܥܢܳܐ ܘܠܰܫܝܽܘܠ ܕܳܘܺܝܬܳܐ ܐܰܚܪܶܒ: ܛܰܥܢܽܘܗ̱ܝ ܬܪܶܝܢ ܓܰܒܪ̈ܶܐ ܕܰܫܡܳܗ̈ܳܬܳܐ ܘܣܳܡܽܘܗ̱ܝ ܒܶܝܬ ܡܺܝ̈ܬܶܐ: ܘܛܰܥܢܶܗ ܠܐܴܕܳܡ ܥܶܪܒܳܐ ܕܶܐܒܰܕ ܘܰܣܠܶܩ ܒܙܰܘܚܳܐ ܪܰܒܳܐ ܡܰܢ: ܘܰܐܥܕܺܝ ܠܨܰܠܡܶܗ ܡܶܢ ܐܺܝܕܳܐ ܕܰܛܪܽܘܢܳܐ ܒܥܶܠܕܒܳܒܶܗ: ܘܟܰܬܰܪ ܥܰܠ ܐܰܪܥܳܐ ܐܰܪܒܥܺܝܢ ܝܰܘ̈ܡܺܝܢ ܒܳܬܰܪ ܩܝܳܡܬܶܗ ܡܫܰܒܰܚܬܳܐ: ܘܫܰܪܰܪ ܠܬܰܠܡܺܝ̈ܕܰܘܗ̱ܝ ܘܰܐܦܶܩ ܐܶܢܽܘܢ ܠܰܡܣܰܒܳܪܽܘ ܒܰܐܪܒܰܥ ܦܶܢ̈ܝܳܢ: ܫܰܕܰܪ ܥܠܰܝܗܽܘܢ ܪܽܘܚܳܐ ܩܰܕܺܝܫܳܐ ܘܰܐܢܗܰܪ ܐܶܢܽܘܢ ܘܩܰܕܶܫ ܚܽܘܫܳܒܰܝ̈ܗܽܘܢ ܘܡܰܕܥܰܝ̈ܗܽܘܢ ܘܰܠܥܳܡܰܪܬܳܐ ܐܰܦܶܩ ܐܶܢܽܘܢ: ܘܰܣܠܶܩ ܠܰܫܡܰܝܳܐ ܒܙܰܘܚܳܐ ܘܰܒܩ̈ܳܠܐܷ ܕܩܰܪ̈ܢܳܬܳܐ ܘܠܶܗ ܐܶܫܬܰܘܕܰܥܘ̱ ܟܝ̈ܳܢܶܐ ܟܽܠܗܽܘܢ ܕܗܽܘܝܽܘ ܡܳܪܗܽܘܢ ܘܐܰܠܳܗܗܽܘܢ: ܩܰܒܠܽܘܗ̱ܝ ܛܶܟ̈ܣܶܐ ܕܰܫܡܰܝ̈ܳܢܶܐ ܘܰܐܙܥܶܩܘ̱ ܟܽܠܗܽܘܢ ܡܶܢ ܕܽܘܟܝ̈ܳܬܗܽܘܢ ܒܪܺܝܟܳܐ ܗ̱ܝ ܡܶܐܬܺܝܬܳܟ ܡܰܠܟܳܐ ܪܰܒܳܐ ܕܬܶܫܒܽܘܚܬܳܐ: ܒܪܺܝܟ ܐܰܢ̱ܬ ܡܳܪܳܐ ܕܪܰܘܡܳܐ ܘܰܕܥܽܘܡܩܳܐ ܕܰܐܝܟ ܚܰܬܢܳܐ ܕܢܳܦܶܩ ܡܶܢ ܒܶܝܬ ܓܢܽܘܢܳܐ ܕܺܝܠܶܗ: ܗܳܟܰܢܳܐ ܩܳܡܬ ܡܶܢ ܩܰܒܪܳܐ ܠܰܬܠܰܬܳܐ ܝܰܘ̈ܡܺܝܢ: ܒܪܺܝܟܳܐ ܗ̱ܝ ܡܶܐܬܺܝܬܳܟ ܕܰܠܘܳܬܰܢ ܩܥܰܘ ܛܶܟ̈ܣܶܐ ܕܰܠܥܶܠ ܘܚܰܝܠܰܘ̈ܳܬܳܐ ܘܰܐܪ̈ܟܰܐܣ ܘܫܽܘܠܛܳܢ̈ܶܐ: ܒܪܺܝܟ ܫܽܘܘܕܳܝܳܟ ܕܰܠܘܳܬ ܪ̈ܳܚܡܰܝܟ ܟܺܐܢ̈ܶܐ ܘܙܰܕܺܝ̈ܩܶܐ: ܐܰܒܪܳܗܳܡ: ܘܺܐܝܣܚܳܩ ܘܝܰܥܩܽܘܒ ܘܡܽܘܫܶܐ: ܘܝܶܫܽܘܥ ܒܰܪܢܽܘܢ: ܘܰܐܗܪܽܘܢ ܘܶܐܠܺܝܥܳܙܳܪ: ܘܦܺܝܢܚܶܣ ܘܰܫܡܽܘܐܶܝܠ: ܘܟܽܠܳܗ̇ ܓܽܘܕܳܐ ܕܰܢܒܺܝ̈ܶܐ ܘܰܐܒܳܗ̈ܳܬܳܐ ܕܡܶܢ ܢܽܘܓܪܳܐ ܪܰܒܳܐ ܡܣܰܟܶܝܢ ܗ̱ܘܰܘ ܠܳܟ: ܘܟܰܕ ܚܙܰܐܘܽܘܟ ܐܶܫܬܰܘܕܥܽܘܟ ܘܝܰܕܥܽܘܟ ܕܰܐܢ̱ܬ ܗ̱ܘ ܐܝ̣ܬܝܟ ܡܳܪܗܽܘܢ ܘܰܐܠܳܗܗܽܘܢ ܘܦܳܪܽܘܩܗܽܘܢ: ܘܰܐܢܗܰܪܬܳܗ̇ ܠܗܳܡܳܢ ܥܠܰܝܗܽܘܢ ܘܰܐܕܢܰܚܬ ܒܳܗ̇ ܙܰܠܺܝ̈ܩܰܝܟ ܡܰܚܝ̈ܳܢܶܐ ܬܠܳܬܳܐ ܐܺܝܡ̈ܳܡܶܐ ܘܰܬܠܳܬܳܐ ܠܰܝܠܰܘ̈ܳܬܳܐ: ܘܰܠܗܰܘ ܨܰܚܢܳܐ ܐܳܕܳܡ ܕܰܛܥܳܐ: ܘܠܰܒܢܰܘ̈ܗ̱ܝ ܟܽܠܗܽܘܢ ܒܺܐܝܕܳܐ ܒܺܐܝܕܳܐ ܐܰܣܶܩܬ ܐܶܢܽܘܢ: ܘܡܶܢ ܥܰܒܕܽܘܬܳܐ ܘܫܽܘ̈ܢܳܩܶܐ ܕܡܳܪܽܘܕܳܐ ܐܰܓܗܺܝܬ ܐܶܢܽܘܢ: ܘܒܽܘܣܳܡܳܐ ܘܰܫܒܺܝܠܐܴ ܕܡܰܘܒܶܠ ܠܦܰܪܕܰܝܣܳܐ ܚܰܘܺܝܬ ܐܶܢܽܘܢ: ܘܡܶܢ ܚܶܫܽܘܟܬܳܐ ܕܡܺܝ̈ܬܶܐ ܗܳܝ ܕܡܰܠܝܳܐ ܗ̱ܘܳܬ݀ ܣܝܳܢܳܐ ܕܰܠܺܝܬ ܐܶܢܽܘܢ: ܡܳܐ ܫܒܺܝܚܺܝܢ ܥܒܳܕܰܝ̈ܟ ܡܳܪܝܳܐ ܘܡܳܐ ܣܰܓܺܝ̈ܳܐܢ ܬܶܕܡܪ̈ܳܬܳܟ: ܘܡܳܐ ܬܡܺܝܗܺܝܢ ܚܰܘܣܳܢܰܝ̈ܟ ܕܰܠܘܳܬ ܓܶܢܣܳܢ ܕܟܽܠܗܶܝܢ ܪ̈ܳܡܳܬܳܐ ܘܡܳܟ̈ܳܬܳܐ ܚܠܳܦܰܝܢ ܫܰܡܠܺܝܬ ܒܰܡܕܰܒܪܳܢܽܘܬܳܟ: ܘܩܳܡܬ ܡܶܢ ܩܰܒܪܳܐ ܘܰܐܩܺܝܡܬ ܠܰܢ ܡܳܪܳܢܳܐܝ̣ܬ: ܡܦܺܝܣܺܝܢܰܢ ܐܳܦ ܡܶܬܟܰܫܦܺܝܢܰܢ ܠܳܟ ܐܰܠܳܗܳܐ ܕܰܐܢ̱ܬ ܗ̣ܽܘ ܐܝ̣ܬܝܟ ܐܰܠܳܗܳܐ ܡܫܰܠܡܳܢܳܐ: ܘܒܰܪܢܳܫܳܐ ܡܫܰܠܡܳܢܳܐ: ܕܠܐܴ ܒܽܘܨܳܪܳܐ ܘܬܰܘܣܶܦܬܳܐ ܡܰܘܕܶܝܢܰܢ ܠܳܟ: ܘܰܬܚܰܕܶܐ ܠܰܢ ܒܥܺܐܕܰܝ̈ܟ ܡܚܰܕ̈ܝܳܢܶܐ: ܘܬܶܕܚܽܘܩ ܡܶܢܰܢ ܠܟܶܫ̈ܠܐܷ ܐܶܪ̈ܺܝܛܺܝܩܳܝܶܐ: ܘܰܠܓܽܘܕ̈ܳܦܶܐ ܡܰܢܺܝ̈ܢܳܝܶܐ: ܘܒܶܗܬܬܳܐ ܘܦܶܚ̈ܬܶܐ ܟܰܠܩܺܝܕܽܘ̈ܢܳܝܶܐ: ܘܫܰܪܰܪܺܝܢ ܥܰܠ ܕܽܘܡ̈ܣܶܐ ܫܠܺܝ̈ܚܳܝܶܐ: ܘܚܰܝܶܠܰܝܢ ܠܡܶܛܰܪ ܦܽܘܩܕ̈ܳܢܶܐ ܐܶܘܰܢܓܶܠܳܝ̈ܶܐ: ܘܫܽܘܡ̈ܠܳܝܶܐ ܗܳܢܘܢ̇ ܟܪ̈ܺܝܣܛܝܳܢܳܝܶܐ ܕܥܺܕܬܳܐ ܗܳܝ ܕܳܐܪܬܳܕܳܘܟܣܺܝܰܐ: ܘܰܒܝܰܘܡܳܐ ܐ̱ܚܪܳܝܳܐ ܡܳܐ ܕܳܐܬܶܐ ܐܰܢ̱ܬ ܘܡܶܬܚܰܘܝܳܐ ܐܰܠܳܗܽܘܬܳܟ ܠܟܽܠܗܽܘܢ ܥܰܡ̱̈ܡܶܐ ܕܠܐܴ ܬܰܚܦܺܝܬܳܐ: ܬܚܶܝܬ ܟܶܢ̈ܦܶܐ ܕܰܨܠܝ̣ܒܳܟ ܣܰܬܰܪ ܠܰܢ ܘܥܰܡ ܐܶܡܪ̈ܶܐ ܝܰܡܺܝ̈ܢܳܝܶܐ ܛܰܟܶܣ ܠܰܢ: ܘܡܶܢ ܒܽܘܣܳܡܳܐ ܕܺܝܠܳܟ ܦܰܛܶܡ ܠܰܢ: ܘܠܰܢ ܘܰܠܥܰܢܺܝ̈ܕܰܝܢ ܠܦܶܓܥܳܐ ܦܨܺܝܚܳܐ ܕܒܳܟ ܐܰܫܘܳܐ ܠܰܢ: ܡܶܛܽܠ ܕܒܳܟ ܘܒܰܐܒܽܘܟ ܘܰܒܪܽܘܚܳܟ ܩܰܕܺܝܫܳܐ ܡܰܘܕܶܝܢܰܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܒܰܥܒܳܕ̈ܶܐ ܛܳܒ̈ܶܐ ܘܒܰܙܡܺܝܪ̈ܳܬܳܐ ܒܰܣܺܝ̈ܡܳܬܳܐ ܘܰܒܕܽܘܒܳܪ̈ܶܐ ܪ̈ܽܘܚܳܢܳܝܶܐ ܢܝܰܩܰܪ ܘܰܢܪܰܡܪܶܡ ܠܝܰܘܡܳܐ ܗܳܢܳܐ ܕܰܩܝܳܡܬܳܟ ܡܫܰܒܰܚܬܳܐ ܕܡܶܢ ܒܶܝܬ ܡܺܝ̈ܬܶܐ: ܘܢܶܫܟܰܚ ܪ̈ܰܚܡܶܐ ܘܰܚܢܳܢܳܐ ܡܶܢ ܒܶܝܬ ܓܰܙܳܟ ܥܰܬܺܝܪܳܐ: ܘܢܶܫܬܘܶܐ ܟܺܝܬ ܕܢܶܬܩܰܒܰܠ ܦܺܝܪܡܰܢ: ܘܢܶܬܥܰܠܐܷ ܩܕܳܡ ܐܰܒܽܘܟ ܡܫܰܒܚܳܐ: ܘܢܶܥܒܰܪ ܒܰܐܬܪܳܐ ܪܓܺܝܓܳܐ ܕܫܰܪܝܳܐ ܒܶܗ ܐܰܠܳܗܽܘܬܳܟ: ܘܰܢܫܰܒܰܚ ܘܰܢܙܰܡܰܪ ܠܓܰܢ̱ܒܳܪܽܘܬܳܟ: ܗܳܫܳܐ܀

ܚܽܘܬܳܡܳܐ

ܩܰܒܶܠ ܡܳܪܝܳܐ ܨܠܰܘ̈ܳܬܰܢ ܘܒܳܥܘ̈ܳܬܰܢ ܕܩܰܪܶܒܢܰܢ ܩܕܳܡܰܝܟ ܡܳܪܝܳܐ ܡܪܰܚܡܳܢܳܐ: ܘܙܰܒ̈ܢܶܐ ܡܫܰܝ̈ܢܶܐ ܫܰܟܶܢ ܠܰܢ: ܘܰܫܢܰܝ̈ܳܐ ܟܰܗܺܝ̈ܢܳܬܳܐ ܡܶܢ ܒܶܝܬ ܓܰܙܳܟ ܥܰܬܺܝܪܳܐ ܒܥܺܐܕܳܐ ܗܳܢܳܐ ܕܰܩܝܳܡܬܳܟ: ܘܰܐܩܺܝܡ ܠܰܢ ܡܶܢ ܝܰܡܺܝܢܳܟ: ܘܚܰܣܳܐ ܠܰܢ ܟܽܠ ܕܰܚܛܰܝܢܰܢ ܠܳܟ ܡܳܪܰܢ ܘܰܐܠܳܗܰܢ܀