ܦܪܽܘܡܝܽܘܢ

ܬܶܫܒܘ̣ܚܬܳܐ ܠܗܰܘ ܡܳܪܳܐ ܛܳܒܳܐ ܕܪܶܚܡܰܬ݀ ܐ̱ܢܳܫܘ̣ܬܶܗ ܒܓܰܘ ܩܰܒܪܳܐ ܣܳܡ̣ܬܶܗ: ܘܝܰܡܝ̣ܢܶܗ ܚܰܝܠܬܳܢܝ̣ܬܳܐ ܡܶܢ ܡܰܘܬܳܐ ܦܪܰܩܬܶܗ ܘܰܕܪܳܥܶܗ ܥܰܫܝ̣ܢܳܐ ܒܙܳܟܘ̣ܬܶܗ ܐܰܩܝ̣ܡܶܗ: ܘܬܘ̣ܩܦܶܗ ܩܰܕܝ̣ܫܳܐ ܠܰܫܡܰܝܳܐ ܥܰܠ̣ܝܶܗ: ܫܘ̣ܠܛܳܢܶܗ ܡܫܰܒܚܳܐ ܡܶܢ ܝܰܡܝ̣ܢ ܐܰܒܳܐ ܕܝ̣ܠܶܗ ܐܰܘܬܒܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܪܰܝܳܢܳܐ ܕܠܺܠܝܳܐ ܘܰܒܟܽܠܗܘܢ̇ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܩܕܳܡܰܝܢ ܘܟܽܠܗܘܢ̇ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝܚܳܐ ܚܰܝܠܳܐ ܘܚܶܟܡܬܳܐ ܕܐܰܠܳܗܳܐ ܐܰܒܳܐ: ܡܶܠܬܳܐ ܐܝ̣ܬܝܳܝܳܐ ܨܰܠܡܳܐ ܘܨܶܡܚܳܐ ܕܡܶܢ ܐܰܒܳܐ ܡܬܘ̣ܡܳܝܳܐ: ܕܝ̣ܠܝ̣ܕ ܡܬܘ̣ܡܳܐܝ̣ܬ ܘܠܳܐ ܡܶܬܦܰܣܩܳܢܳܐܝ̣ܬ ܡܶܢ ܥܶܠܬܳܐ ܩܰܕܡܳܝܬܳܐ: ܚܰܝ̈ܶܐ ܘܚܘ̣ܕܳܬܳܐ ܘܢܘ̣ܚܳܡܳܐ ܕܰܟܝܳܢܳܐ ܥܰܦܪܳܢܳܐ ܕܰܓܒܝ̣ܠܬܳܐ ܐ̱ܢܳܫܳܝܬܳܐ ܘܣܰܒܪܳܐ ܫܰܪܝ̣ܪܳܐ: ܘܚܘ̣ܒܳܐ ܐܰܟܣܝ̣ܣܳܝܳܐ ܠܳܐ ܡܶܫܬܰܓܢܝܳܢܳܐ ܘܠܳܐ ܡܶܫܬܰܚܠܦܳܢܳܐ ܕܡܶܢ ܒܳܬܰܪ ܟܪ̈ܘ̣ܟܝܶܐ ܕܡܶܬܒܰܣܪܳܢܘ̣ܬܳܐ ܕܝ̣ܠܶܗ ܦܳܪܘ̣ܩܳܝܬܳܐ ܕܰܚܠܳܦܰܝܢ: ܥܰܠܺܝ ܗܘ̣ ܠܶܗ ܠܪܰܘܡܳܐ ܕܰܙܩܝ̣ܦܳܐ ܘܐܰܪܗܶܒ ܐܶܢܘܢ̇ ܠܶܐܣܛܘ̣̈ܟܣܶܐ ܟܽܠܗܘܢ̇ : ܘܰܒܫܶܬܩܳܐ ܫܰܒܚܘ̣ܗ̱ܝ ܟܝ̈ܳܢܶܐ ܠܳܐ ܚܳܫܘ̣̈ܫܶܐ: ܦܪܰܥܘ̱ ܠܶܗ ܠܶܥـ̈ܙܶܐ ܬܶܫܒ̈ܚܳܬܳܐ: ܘܐܰܙܝ̣ܥ ܠܥܳܡܪ̈ܰܝ ܩܰܒܪ̈ܶܐ ܕܰܢܫܰܒܚܘ̣ܢܳܝܗ̱ܝ ܒܝܰܘܡܳܐ ܕܰܩܒܘ̣ܪܬܶܗ: ܬܶܩܢܰܬ݀ ܬܶܫܒܘ̣ܚܬܳܐ ܒܦܘ̣ܡܰܝ̈ܗܘܢ̇: ܘܰܣܘܰܚܘ̱ ܠܐܘ̣ܪܥܶܗ ܘܰܣܓܶܕܘ̱ ܠܶܗ ܒܰܐܘ̈ܘܳܢܰܝܗܘܢ̇: ܘܐܶܬܢܰܦܰܫܘ̱ ܢܒܺܝ̈ܰـܝ ܪܘ̣ܚܳܐ ܘܩܰܠܣܘ̣ܗ̱ܝ ܒܟܶܢܳܪ̈ܰܝܗܘܢ̇: ܘܰܒܝܰܕ ܩܝܳܡܬܶܗ ܡܫܰܒܰܚܬܳܐ ܐܶܣܬܥܰܪ̈ܝ̱ ܟܽܠ ܐܳܬܘ̈ܳܬܳܐ ܫܒܝ̣̈ܚܳܬܳܐ: ܟܽܠ ܬܶܕܡܪ̈ܳܬܳܐ ܬܡܝ̣̈ܗܳܬܳܐ: ܢܘ̣ܗܪܳܐ ܕܪܳܕܶܦ ܠܚܶܫܘ̣ܟܳܐ: ܝܰܡܝ̣ܢܳܐ ܕܪܳܦܣܳܐ ܒܚܰܕܘ̣ܬܳܐ: ܣܶܡܳܠܳܐ ܕܰܣܚܝ̣ܦܳܐ ܒܟܰܪܝܘ̣ܬܳܐ: ܚܰܝܠܱ̈ܝ ܪܰܘܡܳܐ ܕܛܳܝܣܝ̣ܢ ܘܰܣܒܰܪܬܳܐ ܡܝܰܒܠܝ̣ܢ: ܢܘ̣ܪ̈ܳܢܶܐ ܕܪܳܗܛܝ̣ܢ ܚܕܳܪ̈ܰܝ ܩܰܒܪܳܐ ܘܰܡܫܰܒܚܝ̣ܢ: ܡܰܠܰܐܟ̈ܶܐ ܕܨܳܝܒܝ̣ܢ ܘܟܺܐܦܳܐ ܡܥܰܓܠܝ̣ܢ: ܠܒܘ̣̈ܫܶܐ ܚܶܘܳܪ̈ܶܐ ܥܛܝ̣ܦܝ̣ܢ ܘܕܶܚܠܬܳܐ ܠܢܳܛܘ̣ܪ̈ܶܐ ܡܙܰܡܢܝ̣ܢ: ܘܢܶܫ̈ܶܐ ܕܪ̈ܳܗܛܳܢ ܘܗܶܪ̈ܘ̣ܡܶܐ ܫܩܝ̣ܠ̈ܳܢ: ܩܝܳܡܬܳܐ ܕܕܳܢܚܳܐ ܘܢܘ̣ܚܳܡܳܐ ܕܡܶܫܬܡܰܥ: ܪܒܳܒܬܳܐ ܒܦܘ̣̈ܡܶܐ ܕܡܳܪ̈ܰܘܳܬܳܐ ܘܰܪܘܳܙܳܐ ܒܰܐܪܥܳܐ ܡܫܰܡܪܝ̣ܢ: ܙܡܝ̣̈ܢܶܐ ܕܚܰܬܢܳܐ ܕܚܳܕܶܝܢ ܘܒܘ̣ܝܳܐܳܐ ܡܩܰܒܠܝ̣ܢ: ܚܕܘ̣̈ܓܶܐ ܕܰܣܡܳܟܳܐ ܕܰܙܩܝ̣ܦܘ̣ܬܳܐ ܕܪܳܘܙܝ̣ܢ: ܘܰܟܠܝ̣̈ܠܶܐ ܒܪ̈ܝ̣ܫܰܝܗܘܢ̇ ܡܶܬܬܣܝ̣ܡܝ̣ܢ: ܬܶܫܒܘ̣ܚܬܳܐ ܒܣܶܦܘ̈ܳܬܳܐ ܕܢܘ̣ܪ̈ܳܢܶܐ ܕܰܠܩܰܒܪܳܐ ܓܢܘ̣ܢܳܐ ܟܪܝܟܝ̣ܢ: ܥܩܰܪܬܳܐ ܒܶܛܢܰܬ݀ ܘܝܶܠܕܰܬ݀ ܣܓܺܝܰܐܬ݀ ܒܢܰܝ̈ܳܐ ܨܶܕܝܰܬ݀: ܨܠܝ̣ܒܳܐ ܕܡܶܬܦܠܰܚ ܘܣܶܓܕܰܬ݀ ܦܬܰܟܪ̈ܶܐ ܕܰܣܚܝ̣ܦܳܐ: ܣܝܳܓܳܐ ܕܰܬܪܝ̣ܥ ܓܘ̣̈ܕܶܐ ܕܰܚܠ̈ܝ̣ܛܳܢ ܐܰܪܥܳܐ ܕܰܥܒܝ̣ܕܳܐ ܫܡܰܝܳܐ: ܩܰܒܪܳܐ ܕܰܥܒܝ̣ܕ ܟܘ̣ܪܣܝܳܐ ܫܒܝ̣ܚܳܐ ܕܩܪܽܘ̣ܣܛܶܠܘ̣ܣ: ܫܠܝ̣̈ܚܶܐ ܕܨܳܝܒܝ̣ܢ ܡܶܢ ܡܰܛܫ̈ܝܳܬܗܘܢ̇ ܘܠܘ̣ܒܳܒܳܐ ܡܰܟܪܙܝ̣ܢ: ܚܰܕܘ̣ܬܳܐ ܕܰܦܪܝ̣ܣܳܐ ܒܣܰܘ̈ܦܰܝ ܥܳܡܰܪܬܳܐ ܘܰܪܘܳܙܳܐ ܒܰܐܪ̈ܒܰܥܦܶܢܝܳܢ: ܗܽܘܫܳܥ ܢܒܺܝܳܐ ܕܡܰܙܥܶܩ ܘܡܰܗܶܠ ܒܡܰܘܬܳܐ ܘܰܡܒܰܙܰܚ ܘܐܳܡܰܪ: ܕܐܰܝܟܰܘ ܥܘ̣ܫܢܳܟ ܡܰܘܬܳܐ ܝܰܥܢܳܐ: ܘܐܰܝܟܳܐ ܗ̱ܝ ܙܳܟܘ̣ܬܶܟܝ̱ ܫܝܘ̣ܠ ܕܳܘܺܝ̣ܬܳܐ: ܡܕܝ̣ܢܰܬ݀ ܡܝ̣̈ܬܶܐ ܕܰܥܩܝ̣ܪܳܐ ܘܕܺܝ̣ܫܳܐ: ܘܬܳܓܶܗ ܕܰܛܪܘ̣ܢܳܐ ܕܰܫܩܝ̣ܠ: ܘܰܚܢܰܢ ܕܰܒܢܘ̣ܨܪ̈ܳܬܳܐ ܪ̈ܚܝ̣ܡܳܬܳܐ ܠܝܰܘܡܳܐ ܕܰܩܝܳܡܬܳܟ ܥ̱ܳܗܕܝ̣ܢܰܢ ܘܒܰܒ̈ܢܳܬ ܩ̈ܳܠܶܐ ܕܫܘ̣ܒܚܳܐ ܠܳܥܙܝ̣ܢܰܢ ܟܰܕ ܐܳܡܪܝ̣ܢܰܢ: ܒܪܝ̣ܟ ܗ̱ܘ̣ ܝܰܘܡܳܟ ܡܰܦܨܰܚ ܠܰܟܡܝ̣ܪ̈ܶܐ: ܣܓܝ̣ܕ ܢܘ̣ܚܳܡܳܟ ܡܥܝ̣ܪ ܠܰܫܟܝ̣̈ܒܶܐ: ܒܪܝ̣ܟܝ̣ܢ ܪ̈ܰܚܡܰܝܟ ܕܫܰܠܚܘ̣ܟ ܨܶܝܕ ܐܰܪ̈ܥܳܢܶܐ: ܘܟܰܕ ܥܰܡ ܦܪܶܗܣܺܝܰܐ ܫܳܐܠܝ̣ܢܰܢ ܡܶܢܳܟ ܚܘ̣ܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚܛܳܗ̈ܶܐ: ܓܒܝ̣ܢܳܐ ܕܡܰܠܟܳܐ ܢܶܫܬܰܦܶܐ ܒܰܚܢܳܢܳܟ: ܫܘ̣ܪ̈ܰܝ ܥܺܕܬܳܐ ܩܰܕܝ̣ܫܬܳܐ ܢܶܫܬܰܪܪܘܢ̇ ܥܰܠ ܕܘ̣ܡ̈ܣܶܐ ܠܳܐ ܡܶܙܕܰܥܙ̈ܥܳܢܶܐ ܕܗܰܝܡܳܢܘ̣ܬܳܐ ܬܪܝ̣ܨܰܬ݀ ܫܘ̣ܒܚܳܐ: ܕܰܝ̈ܳܢܶܐ ܘܡܶܬܕܝ̣̈ܢܳܢܶܐ ܢܶܬܢܰܛܪܘܢ̇: ܗܰܠ̈ܟܶܐ ܘܰܡܫܰܪ̈ܰܝܳܐ ܢܶܬܚܰܝܨܘܢ̇ : ܢܶܣܝܘ̣̈ܢܶܐ ܥܰܣ̈ܩܶܐ ܘܰܡܣܳܡܒܪ̈ܝ̣ܫܶܐ ܡܥܰܪ̈ܡܶܐ ܢܶܫܬܰܦܘܢ̇ : ܡܰܪ̈ܕܘܳܬܳܐ ܘܫܰܒ̈ܛܶܐ ܕܪܘ̣ܓܙܳܐ ܢܶܥܒܪܘܢ̇ : ܚܰܝ̈ܶܐ ܕܥܰܠ ܣܰܒܪܳܐ ܕܡܰܠܟܘ̣ܬܳܟ ܢܶܬܥܰܕܪܘܢ̇ : ܘܡܝ̣̈ܬܶܐ ܕܥܰܠ ܣܰܒܪܳܐ ܕܰܚܢܳܢܳܟ ܫܟܶܒܘ̱ ܠܚܘ̣ܣܳܝ ܚܰܘ̈ܒܶܐ ܘܰܚܛܳܗ̈ܶܐ ܢܶܫܬܘܽܘܢ̇: ܘܰܠܡܰܠܟܘ̣ܬܳܟ ܡܬܘ̣ܡܳܝܬܳܐ ܢܶܬܡܰܢܥܘܢ̇ : ܥܰܠ ܦܳܬܘ̣ܪܳܐ ܕܝ̣ܠܳܟ ܪܘ̣ܚܳܢܳܝܳܐ ܢܶܣܬܰܡܟܘܢ̇ : ܐܰܝܟܰܢܳܐ ܕܰܚܢܰܢ ܘܗܶܢܽܘܢ̇ ܢܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܰܐܒܘ̣ܟ ܘܰܠܪܘ̣ܚܳܟ ܡܫܝ̣ܚܳܐ ܐܰܠܳܗܰܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀