ܦܪܽܘܡܝܽܘܢ

ܬܶܫܒܘ̣ܚܬܳܐ ܠܗܰܘ ܡܶܠܬܳܐ ܡܬܘ̣ܡܳܝܳܐ ܕܐܶܬܒܰܣܰܪ ܘܝܰܩܰܪ ܠܰܟܝܳܢܳܐ ܐ̱ܢܳܫܳܝܳܐ ܕܡܶܢܶܗ ܐܶܬܓܒܶܠ: ܠܗܰܘ ܠܳܐ ܡܳܝܽܘ̣ܬܳܐ ܕܥܰܡ ܡܰܘܬܳܐ ܐܶܬܥܰܪܙܰܠ ܘܒܰܛܶܠ ܘܰܫܪܳܐ ܠܐܘ̣ܚܕܳܢܶܗ ܕܡܰܘܬܳܐ ܝܰܥܢܳܐ: ܠܗܰܘ ܚܰܝܳܐ ܕܐܶܬܬܣܝ̣ܡ ܒܓܰܘ ܩܰܒܪܳܐ ܘܢܰܦܶܨ ܠܥܘ̣ܒܳܗ̇ ܕܰܫܝܽܘܠ: ܠܗܰܘ ܡܪܰܚܡܳܢܳܐ ܕܰܠܓܶܢܣܰܢ ܐܶܫܬܰܥܒܰܕ ܠܰܚܒܳܠܳܐ ܠܘܳܬ ܚܺܐܪܘ̣ܬܶܗ ܩܰܕܡܳܝܬܳܐ ܒܰܩܝܳܡܬܶܗ ܐܰܦܢܝ̣: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܘܢ̇ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܩܕܳܡܰܝܢ ܘܟܽܠܗܘܢ̇ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܫܽܘܒܚܳܐ ܠܳܟ ܐܰܠܳܗܳܐ ܡܶܠܬܳܐ ܡܥܰܠܝܳܐ ܕܰܒܝܰܕ ܡܶܬܢܰܚܬܳܢܘ̣ܬܳܟ ܨܶܒܝܳܢܳܝܬܳܐ ܐܶܬܥܰܠܝ̣ܢܰܢ: ܘܰܒܡܘ̣ܟܳܟܳܟ ܪܰܒܳܐ ܐܶܬܪܰܡܪܰܡܢܰܢ: ܘܰܒܣܘ̣ܪܳܩܳܟ ܬܗܝ̣ܪܳܐ ܐܶܬܗܰܕܰܪܢܰܢ: ܘܰܒܝܰܕ ܡܶܣܟܺܢܘ̣ܬܳܟ ܬܡܝ̣ܗܬܳܐ ܐܶܫܬܰܪܬܰܚܢܰܢ: ܘܰܒܛܰܝܒܘ̣ܬܳܟ ܒܪܝ̣ܟܬܳܐ ܐܶܬܒܰܪܰܟܢܰܢ: ܘܰܒܝܰܕ ܡܶܬܓܰܫܡܳܢܘ̣ܬܳܟ ܩܰܕܝ̣ܫܬܳܐ ܐܶܬܩܰܕܰܫܢܰܢ: ܘܰܒܡܶܬܒܰܪܢܫܳܢܘ̣ܬܳܟ ܫܰܪܝ̣ܪܬܳܐ ܐܶܬܰܐܠܰܗܢܰܢ: ܘܒܝ̣ܠܝ̣ܕܘ̣ܬܳܟ ܕܡܶܢ ܒܰܪ̱ܬ ܕܰܘܺܝ̣ܕ ܐܶܬܦܪܶܩܢܰܢ: ܘܰܒܬܰܪܒܝ̣ܬܳܟ ܚܰܟܝ̣ܡܬܳܐ ܐܶܫܬܰܘܫܰܛܢܰܢ: ܘܒܰܥܡܳܕܳܟ ܚܰܣܝܳܐ ܐܶܬܕܰܟܝ̣ܢܰܢ: ܘܰܒܨܰܘܡܳܟ ܙܰܗܝܳܐ ܐܶܙܕܰܗܝ̣ܢܰܢ: ܘܰܒܬܰܟܬܘ̣ܫܳܟ ܚܠܝ̣ܨܳܐ ܐܶܬܢܰܨܰܚܢܰܢ: ܘܒܕܰܪܳܟ ܙܰܟܳܝܳܐ ܐܶܬܡܠܝ̣ܢܰܢ ܙܳܟܘ̣ܬܳܐ: ܘܰܒܚܰܫܰܝ̈ܟ ܨܶܒܝ̈ܳܢܳܝܶܐ ܐܶܬܚܰܪܰܪܢܰܢ: ܘܰܒܫܘ̣̈ܡܳܬܳܟ ܡܫܰܒܚ̈ܳܬܳܐ ܐܶܬܰܐܣܝ̣ܢܰܢ: ܘܰܒܨܰܥܪܳܟ ܐܶܬܝܰܩܰܪܢܰܢ: ܘܒܰܟܪܝ̣ܗܘ̣ܬܳܟ ܚܠܝ̣ܡܬܳܐ ܐܶܬܚܠܶܡܢܰܢ: ܘܰܒܫܝ̣ܛܘ̣ܬܳܟ ܝܰܩܝ̣ܪܬܳܐ ܐܶܬܚܰܟܰܡܢܰܢ: ܘܰܒܢܶܓ̈ܕܰܝܟ ܕܰܚܠܳܦܰܝܢ ܐܶܬܓܢ̱ܒܰܪܢܰܢ: ܘܰܒܝܰܕ ܫܘ̣ܩܳܦܳܟ ܕܡܶܛܽܠܳܬܰܢ ܐܶܬܥܰܫܰܢܢܰܢ: ܘܒܰܙܩܝ̣ܦܳܟ ܕܥܰܠ ܐܰܦܰܝ̈ܢ ܐܶܬܦܪܶܩܢܰܢ: ܘܰܒܡܝ̣ܬܘ̣ܬܳܟ ܗܳܝ ܕܰܚܠܳܦܰܝܢ ܚـܝܰـܝـܢܰܢ: ܘܒܰܩܒܘ̣ܪܬܳܟ ܡܩܰܠܰܣܬܳܐ ܐܶܬܢܰܚܰܡܢܰܢ: ܘܒܰܩܝܳܡܬܳܟ ܡܫܰܒܰܚܬܳܐ ܐܶܬܬܰܪܰܨܢܰܢ: ܘܰܒܣܘ̣ܠܳܩܳܟ ܬܡܝ̣ܗܳܐ ܐܶܬܪܰܡܪܰܡܢܰܢ: ܐܳܦ ܒܡܰܘܬܒܳܟ ܕܥܰܡ ܐܰܒܘ̣ܟ ܐܶܫܬܰܒܰܚܢܰܢ: ܘܰܒܡܰܚܰܬܬܳܟ ܕܪܘ̣ܚܳܟ ܩܰܕܝ̣ܫܳܐ ܐܶܬܩܰܕܰܫܢܰܢ: ܘܗܳܫܳܐ ܠܪܶܚܡܰܬ݀ ܐ̱ܢܳܫܘ̣ܬܳܟ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܡܶܬܟܰܫܦܝ̣ܢܰܢ ܕܪ̈ܰܚܡܰܝܟ ܠܳܐ ܡܶܬܡܰܠ̈ܠܳܢܶܐ ܬܫܰܕܰܪ ܠܰܢ: ܘܣܘ̣ܓܳܐܐ ܕܰܚܢܳܢܳܟ ܐܰܫܦܰܥ ܥܠܰܝܢ ܘܚܘ̣ܣܳܝܳܐ ܕܚܰܘ̈ܒܶܐ ܬܫܰܟܶܢ ܠܰܢ: ܘܫܘ̣ܒܩܳܢܳܐ ܕܰܚܛܳܗ̈ܶܐ ܬܰܣܪܰܚ ܠܰܢ: ܘܫܰܝܢܳܐ ܘܰܫܠܳܡܳܐ ܢܰܡܠܶܟ ܥܠܰܝܢ: ܘܚܘ̣ܒܳܟ ܒܰܣܝ̣ܡܳܐ ܢܕܰܝܰܪ ܒܰܝܢܳܬܰܢ: ܘܡܶܢ ܟܽܠ ܫܳܪ̈ܥܳܬܳܐ ܫܰܘܙܶܒ ܠܰܢ: ܘܡܶܢ ܟܽܠ ܓܘ̣̈ܡܳܨܶܐ ܦܰܨܳܐ ܠܰܢ: ܘܡܶܢ ܟܽܠ ܣܘ̣ܓ̈ܦܳܢܶܐ ܣܰܬܰܪ ܠܰܢ: ܘܡܶܢ ܟܽܠ ܐܘ̣ܠ̈ܨܳܢܶܐ ܢܰܛܰܪ ܠܰܢ: ܘܡܶܢ ܟܽܠ ܒܘ̣ܪ̈ܟܳܬܳܐ ܐܰܥܬܰܪ ܠܰܢ: ܘܡܶܢ ܟܽܠ ܛܘ̣ܒܝ̣̈ܢ ܫܰܪܬܰܚ ܠܰܢ: ܘܫܘ̣ܠܳܡܳܐ ܕܫܳܦܰܪ ܠܳܟ ܫܰܟܶܢ ܠܰܢ ܘܰܠܩܰܘܡܳܐ ܕܡܶܢ ܝܰܡܝ̣ܢܳܟ ܐܰܫܘܳܐ ܠܰܢ: ܘܒܰܚܙܳܬܳܐ ܕܥܰܢܝ̣̈ܕܶܐ ܕܝ̣ܠܰܢ ܚܰܕܳܐ ܠܰܢ: ܘܥܰܡܗܘܢ̇ ܫܘ̣ܒܚܳܐ ܚܰܕܬܳܐ ܡܰܣܩܝ̣ܢܰܢ: ܠܳܟ ܘܠܰܐܒܳܐ ܕܫܰܠܚܳܟ ܠܦܘ̣ܪܩܳܢܰܢ ܘܰܠܪܘ̣ܚܳܐ ܩܰܕܝ̣ܫܳܐ ܡܢܰܚܡܳܢܰܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀