ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܣܳܗ̈ܕܰܘܗ̱ܝ ܐܰܢ̱ܬܽܘܢ
ܛܽܘܒܰܝܟܝ ܡܰܪܝܰܡ ܕܡܶܢ ܛܰܠܝܽܘܬܶܟܝ

ܫܠܳܡܳܐ ܒܪܰܘܡܳܐ ܐܰܟܪܶܙܘ ܥܺܝܪ̈ܶܐ܆ ܘܣܰܒܪܳܐ ܛܳܒܳܐ ܢܗܶܐ ܠܰܒ̈ܢܰܝܢܳܫܳܐ܆ ܒܗܳܢܳܐ ܝܰܘܡܳܐ ܕܒܶܗ ܐܶܬܺܝܠܶܕ܆ ܡܳܪܶܗ ܕܳܐܕܳܡ ܡܶܢ ܥܽܘܒܳܗ̇ ܕܡܰܪܝܰܡ܆ ܬܰܘ ܢܶܣܓܽܘܕ ܠܶܗ܆ ܠܰܐܒܳܐ ܕܫܰܕܪܶܗ ܠܦܽܘܪܩܳܢܰܢ ܘܰܐܦܢܺܝ ܒܪܺܝܬܳܐ ܡܶܢ ܛܽܘܥܝܰܝ܀

ܫܽܘܒܚܳܐ

ܚܙܳܝܗ̱ܝ ܚܰܙܩܺܝܐܶܝܠ ܥܰܠ ܡܰܪܟܰܒܬܳܐ܆ ܐܳܦ ܕܳܢܺܝܐܶܝܠ ܥܰܠ ܟܽܘܪܣܝܳܐ ܪܳܡܳܐ܆ ܚܙܳܝܗ̱ܝ ܐܶܫܰܥܝܳܐ ܕܰܐܝܟ ܥܶܩܳܪܳܐ܆ ܝܺܥܳܐ ܘܰܣܠܶܩ ܡܶܢ ܐܰܪܥܳܐ ܨܗܺܝܬܳܐ܆ ܘܕܰܘܺܝܕ ܐܶܡܰܪ܆ ܕܢܰܘܥܶܐ ܡܶܢ ܡܕܺܝܢ̱ܬܶܗ ܡܳܪܝܳܐ܆ ܘܢܶܗܘܶܐ ܫܡܶܗ ܥܕܰܡܳܐ ܠܥܳܠܰܡ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܰܥܪܽܘܒܬܳܐ ܒܪܺܝܫܺܝܬ
ܠܺܝ ܢܶܬܠܳــ̈ـܢ ܛܽܘܒܳܐ܆ ܟܽܠܗܶܝܢ ܫܰܪ̈ܒܳܬܳܐ (ܣܳܠܶܩ: ܒܕܰܚܛܳܐ ܠܳܐ ܢܶܚܛܶܐ)

ܝܰܘܡܳܢ ܐܶܬܺܝܠܶܕ ܝܰܠܕܳܐ ܫܰܪܺܝܪܳܐ ܒܪܶܗ ܕܰܐܒܳܐ ܡܪܰܝܡܳܐ: ܡܶܢ ܟܰܪܣܳܗ̇ ܕܡܰܪܝܰܡ: ܒܬܽܘܠܬܳܐ ܕܠܳܐ ܛܽܘܠܫܳܐ: ܘܰܒܬܽܘܠܶܝ̈ܗ̇ ܠܳܐ ܫܪܳܐ: ܗ̄ܘܗ̄: ܒܪܺܝܟ ܕܰܕܢܰܚ ܡܶܢܳܗ̇܀

ܫܽܘܒܚܳܐ ܠܗܰܘ ܟܰܣܝܳܐ: ܝܰܠܕܳܐ ܡܬܽܘܡܳܝܳܐ: ܒܪܶܗ ܕܰܐܒܳܐ ܓܢܺܝܙܳܐ: ܕܝܰܠܕܶܗ ܗܘܳܐ ܓܰܠܝܳܐ: ܝܰܘܡܳܢ ܒܒܶܝܬ ܠܚܶܡ ܗܳܝ ܩܽܘܪܝܰܬ ܕܰܘܺܝܕ: ܗ̄ܘܗ̄: ܠܶܗ ܬܶܫܒ̈ܚܳܢ ܡܶܢ ܟܽܠ܀

ܡܰܕܪܳܫܳܐ

ܩܳܠܳܐ ܒܩ̄: ܡܰܢܽܘ ܟܰܝ ܕܟܰܕ ܡܳܝܽܘܬܰܐ ܗ̱ܘ

ܥܽܘܢܺܝܬܳܐ: ܠܳܟ ܫܽܘܒܚܳܐ ܡܶܢ ܟܽܠ ܦܽܘܡܺܝ̈ܢ: ܒܗܳܢܳܐ ܝܰܘܡܳܐ ܕܡܰܘܠܳܕܳܟ.

ܕܽܘܡܳܪܰܐ ܗ̱ܘ ܪܰܒܳܐ ܒܰܛܢܳܟ܆ ܕܟܽܠܶܗ ܒܪܳܐ ܫܪܶܐ ܒܓܰܘ ܦܰܓܪܳܐ܆ ܥܡܰܪ ܒܶܗ ܟܽܠܶܗ ܘܰܣܦܰܩ ܠܶܗ܆ ܫܪܳܐ ܒܶܗ ܟܰܕ ܠܳܐ ܐܶܣܬܰܝܰܟ܆ ܨܶܒܝܳܢܶܗ ܟܽܠܶܗ ܒܶܗ ܗܘܳܐ ܣܳܟܶܗ ܟܽܠܶܗ ܠܰܘ ܒܶܗ ܗ̱ܘܳܐ܆ ܡܰܢ ܣܳܦܶܩ ܠܰܡܡܰܠܳܠܽܘ ܕܟܽܠܶܗ ܓܶܝܪ ܒܦܰܓܪܳܐ ܫܪܶܐ ܗ̱ܘܳܐ܆ ܟܽܠܶܗ ܒܰܐܒܽܘܗ̱ܝ ܐܺܝܬܰܘܗ̱ܝ ܗ̱ܘܳܐ܆ ܒܪܺܝܟ ܕܠܳܐ ܣܳܟܰܐ ܗ̱ܘ ܘܶܐܣܬܰܝܰܟ܀

ܝܽܘܡ ܡܰܘܠܳܕܳܟ ܠܳܟ ܕܳܡܶܐ܆ ܕܰܪܚܺܝܡ ܘܰܪܓܺܝܓ ܐܰܟܘܳܬܳܟ܆ ܕܠܳܐ ܚܙܰܝܢܳܗ̇ ܠܺܝܠܺܝܕܽܘܬܳܟ܆ ܚܰܒܶܒܢܳܗ̇ ܐܰܝܟ ܕܰܒܙܰܒܢܳܗ̇܆ ܒܚܽܘܒܳܟ ܗ̱ܽܘ ܚܳܙܶܝܢܰܢ ܠܳܟ ܟܶܐܡܰܬ ܥܽܘܠܳܐ ܐܰܟܘܳܬܳܟ܆ ܟܰܕ ܡܶܬܚܰܒܰܒ ܡܶܢ ܟܽܠܢܳܫ ܘܗܳܐ ܕܳܝ̈ܨܳܢ ܒܶܗ ܥܺܕ̈ܳܬܳܟ܆ ܨܰܒܶܬ ܝܰܘܡܳܟ ܘܶܐܨܛܰܒܰܬ܆ ܒܪܺܝܟ ܝܰܘܡܳܟ ܕܰܗܘܳܐ ܚܠܳܦܰܝܢ܀

ܝܰܗ̱ܒ ܠܰܢ ܝܰܘܡܳܟ ܡܰܘܗܰܒܬܳܟ܆ ܕܠܰܝܬ ܠܶܗ ܠܰܐܒܳܐ ܐܰܟܘܳܬܳܗ̇܆ ܠܳܐ ܗ̱ܘܳܐ ܣܪܳܦܳܐ ܫܰܕܰܪ ܠܰܢ܆ ܘܠܳܐ ܡܰܠܰܐܟܳܐ ܢܚܶܬ ܨܶܐܕܰܝܢ܆ ܠܳܐ ܬܽܘܒ ܥܺܝܪ̈ܶܐ ܫܰܡܳܫ̈ܶܐ ܐܶܠܳܐ ܒܽܘܟܪܳܐ ܕܡܶܫܬܰܡܰܫ܆ ܡܰܢܽܘ ܡܨܶܐ ܕܢܶܣܦܰܩ ܢܰܘܕܶܐ ܕܪܰܒܽܘܬܳܐ ܕܠܳܐ ܡܶܬܡܰܫܚܳܐ܆ ܒܽܐܘܪܝܳܐ ܫܺܝܛܳܐ ܪܰܡܝܳܐ ܗ̱ܘܳܬ܆ ܒܪܺܝܟ ܕܝܰܗ̱ܒܠܰܢ ܟܽܠ ܕܰܩܢܶܐ ܗ̱ܘܳܐ܀

ܟܽܠܗܽܘܢ ܗܳܠܶܝܢ ܫܽܘܚ̈ܠܳܦܶܐ܆ ܕܰܠܒܶܫ ܘܰܫܠܰܚ ܚܰܢܳܢܳܐ܆ ܕܢܶܬܦܰܪܰܣ ܕܢܰܠܒܶܫ ܠܳܐܕܳܡ܆ ܬܶܫܒܽܘܚܬܳܐ ܗܳܝ ܕܰܫܠܰܚ ܗ̱ܘܳܐ܆ ܟܪܺܝܟ ܥܰܙܪܽܘܪ̈ܶܐ ܚܠܳܦ ܛܰܪ̈ܦܰܘܗ̱ܝ ܘܰܠܒܶܫ ܢܰܚ̈ܬܶܐ ܚܠܳܦ ܡܶܫ̈ܟܰܘܗ̱ܝ܆ ܗܘܳܐ ܥܡܺܝܕܳܐ ܡܶܛܽܠ ܥܰܘܠܶܗ ܘܰܚܢܺܝܛܳܐ ܡܶܛܽܠ ܡܰܘܬܶܗ܆ ܘܩܳܡ ܘܰܐܩܺܝܡܶܗ ܒܬܶܫܒܽܘܚܬܳܐ܆ ܒܪܺܝܟ ܕܰܢܚܶܬ ܠܰܒܫܶܗ ܘܰܣܠܶܩ܀

ܣܶܦܪ̈ܶܐ ܩܳܪܶܝܢ ܗ̱ܘܰܘ ܟܽܠܝܽܘܡ܆ ܕܢܶܕܢܰܚ ܟܰܘܟܒܳܐ ܡܶܢ ܝܰܥܩܽܘܒ܆ ܠܥܰܡܳܐ ܩܳܠܳܐ ܘܩܶܪܝܳܢܳܐ܆ ܠܥܰܡ̱̈ܡܶܐ ܕܶܢܚܳܐ ܘܦܽܘܫܳܩܳܐ܆ ܠܗܽܘܢ ܣܶܦܪ̈ܶܐ ܘܠܰܢ ܣܽܘܥܪ̈ܳܢܶܐ ܠܗܽܘܢ ܣܰܘ̈ܟܶܐ ܘܠܰܢ ܦܺܐܪ̈ܰܝܗܽܘܢ܆ ܡܓܽܘ̈ܫܶܐ ܚܳܕܶܝܢ ܒܰܥܒܳܕܳܐ ܣܳܦܪ̈ܶܐ ܚܬܺܝܪܺܝܢ ܒܩܶܪܝܳܢܳܐ܆ ܙܰܠܺܝܩܶܗ ܕܗܰܘ ܩܶܪܝܳܢܳܐ܆ ܒܪܺܝܟ ܕܰܐܘܣܶܦ ܠܰܢ ܣܶܦܪ̈ܰܝܗܽܘܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܐ ܩܛܺܝܠ ܗ̱ܽܘ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܝܰܗܒܳܟ ܠܰܢ. ܟܰܕ ܠܳܐ ܫܶܐܠܢܳܟ. ܕܒܳܟ ܢܰܘܕܶܐ ܠܰܐܒܽܘܟ ܥܰܠ ܡܰܘܗܰܒܬܳܟ.

ܫܽܘܠܛܳܢܶܗ ܕܝܰܘܡܳܟ. ܐܰܝܟ ܕܺܝܠܳܟ ܗ̱ܽܘ܆ ܕܰܡܬܺܝܚ ܥܰܠ ܕܳܪ̈ܶܐ. ܕܶܐܬܰܘ ܘܳܐܬܶܝܢ܆ ܝܰܘܡܰܐ ܗ̱ܘ ܕܥܰܠ ܟܽܠܳܐ. ܡܰܙܠܶܓ ܢܽܘܗܪܶܗ܆ ܘܥܰܠ ܟܽܠܗܽܘܢ ܙܰܒ̈ܢܶܐ. ܡܬܺܝܚ ܫܽܘܠܛܳܢܶܗ܀

ܝܰܘܡܰܐ ܗ̱ܘ ܕܗܽܘ ܡܶܫܟܰܚ. ܠܰܡܪܰܥܳܝܽܘ܆ ܠܗܰܘ ܟܺܐܢܳܐ ܕܰܪܓܺܝܙ. ܥܰܠ ܚܰܘ̈ܒܳܬܰܢ܆ ܪܰܒܽ ܗ̱ܘ ܗܳܢ ܝܰܘܡܳܐ. ܡܶܢ ܟܽܠ ܝܰܘ̈ܡܺܝܢ܆ ܕܒܶܗ ܗ̱ܽܘ ܢܦܰܩ ܚܢܳܢܳܐ. ܨܶܝܕ ܚܰܛܳܝ̈ܶܐ܀

ܡܰܪܝܰܡ ܕܰܒܛܶܢܬܶܗ. ܣܢܳܬ ܙܽܘܘܳܓܳܐ܆ ܠܳܐ ܬܙܰܢܶܐ ܢܰܦܫܳܐ. ܕܰܫܪܶܐ ܒܓܰܘܳܗ̇܆ ܒܶܗ ܪܶܓܫܰܬ ܡܰܪܝܰܡ. ܘܫܶܒܩܰܬ ܡܟܺܝܪܳܗ̇܆ ܗܳܐ ܫܪܶܐ ܒܪ̈ܶܥܝܳܢܰܝܢ. ܐܶܢ ܐܰܪܓܶܫܘ ܒܶܗ܀

ܛܥܺܝܢܳܐ ܗ̱ܘܳܬ ܡܰܪܝܰܡ. ܥܽܘܠܳܐ ܫܰܠܝܳܐ܆ ܟܰܕ ܟܰܣ̈ܝܳܢ ܗ̱ܘܰܝ̈ ܒܶܗ. ܟܽܠ ܚܶܟ̈ܡܳܬܳܐ܆ ܛܥܺܝܢ ܗ̱ܘܳܐ ܠܶܗ ܝܰܘܣܶܦ. ܘܰܟܣܶܐ ܗ̱ܘܳܐ ܒܶܗ܆ ܚܰܝܠܳܐ ܕܒܶܗ ܩܳܝ̈ܡܳܢ. ܟܽܠ ܒܶܪ̈ܝܳܬܳܐ܀

ܒܫܽܘ̈ܩܶܐ ܐܰܝܟ ܫܰܒܪ̈ܶܐ. ܚܳܙܶܝܢ ܗ̱ܘܰܘ ܠܶܗ܆ ܟܰܕ ܥܰܬܺܝܩܳܐ ܒܶܗ. ܚܶܟܡܰܬ ܟܽܠܳܐ܆ ܦܨܺܝܚ ܗ̱ܘܳܐ ܨܶܝܕ ܫܰܒܪ̈ܶܐ. ܐܰܝܟ ܝܰܠܽܘܕܳܐ܆ ܕܚܺܝܠ ܗ̱ܽܘ ܨܶܝܕ ܥܺܝܪ̈ܶܐ. ܐܰܝܟ ܦܳܩܽܘܕܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܥܰܠ ܝܰܠܕܶܗ ܕܒܽܘܟܪܳܐ

ܥܽܘܢܺܝܬܳܐ: ܒܪܺܝܟ ܕܰܙܥܰܪ ܕܠܳܐ ܣܳܟ܆ ܕܰܕܠܳܐ ܣܳܟܳܐ ܢܰܘܪܒܰܢ.

ܠܝܰܠܕܶܗ ܕܶܝܢ ܕܒܽܘܟܪܳܐ܆ ܢܶܙܡܰܪ ܠܶܗ ܕܰܐܝܟܰܢ܆ ܐܰܠܳܗܽܘܬܳܐ ܒܟܰܪܣܳܐ܆ ܙܶܩܪܰܬ ܠܳܗ̇ ܠܒܽܘܫܳܐ܆ ܠܒܶܫܬܶܗ ܘܢܶܦܩܰܬ ܒܝܰܠܕܳܐ܆ ܒܡܰܘܬܳܐ ܬܽܘܒ ܫܠܰܚܬܶܗ܆ ܬܰܪܬܶܝܢ ܙܰܒܢܺܝ̈ܢ ܠܒܰܫܬܶܗ܆ ܕܣܶܡܳܠܳܐ ܚܛܰܦܬܶܗ܆ ܘܡܶܢܶܗ ܐܰܥܕܺܝܬܶܗ܆ ܘܥܰܠ ܝܰܡܺܝܢܳܐ ܣܳܡܬܶܗ܀

ܫܪܳܐ ܒܥܽܘܒܳܐ ܙܥܽܘܪܳܐ܆ ܚܰܝܠܳܐ ܕܰܠܟܽܠ ܡܕܰܒܰܪ܆ ܘܟܰܕ ܬܰܡܳܢ ܫܪܶܐ ܗ̱ܘܳܐ܆ ܦܓܽܘ̈ܕܶܐ ܕܟܽܠܳܐ ܥܪܶܐ ܗ̱ܘܳܐ܆ ܠܝܳܠܽܘܕܶܗ ܢܩܶܐ ܗ̱ܘܳܐ܆ ܕܨܶܒܝܳܢܶܗ ܢܫܰܡܠܶܐ܆ ܫܡܰܝ̈ܳܐ ܡܶܢܶܗ ܡܠܶܝܢ ܗ̱ܘܰܘ܆ ܘܒܶܪ̈ܝܳܬܳܐ ܟܽܠܗܶܝܢ܆ ܫܶܡܫܳܐ ܥܰܠ ܠܟܰܪܣܳܐ܆ ܘܰܒܪܰܘܡܳܐ ܘܥܽܘܡܩܳܐ܆ ܙܰܠܺܝܩܰܘ̈ܗ̱ܝ ܫܪܶܝܢ ܗ̱ܘܰܘ܀

ܡܰܢܽܘ ܕܠܳܐ ܢܶܬܗܰܪ ܒܡܰܪܝܰܡ ܒܰܪ̱ܬ ܕܰܘܺܝܕ܆ ܕܰܛܥܺܝܢܳܐ ܥܽܘܠܳܐ܆ ܘܰܢܛܺܝܪܺܝܢ ܒܬܽܘ̈ܠܶܝܗ̇܆ ܣܺܝܡ ܗ̱ܽܘ ܥܰܠ ܚܰܕܝܳܗ̇܆ ܡܢܰܨܪܳܐ ܠܶܗ ܘܕܳܐܶܨ܆ ܡܰܠܰܐܟ̈ܶܐ ܕܰܡܝܰܒܒܺܝܢ܆ ܣܪ̈ܳܦܶܐ ܕܰܡܩܰܕܫܺܝܢ܆ ܡܓܽܘ̈ܫܶܐ ܕܰܡܩܰܪܒܺܝܢ܆ ܩܽܘܪ̈ܒܳܢܶܐ ܕܟܰܝ̈ܳܐ܆ ܠܰܒܪܳܗ̇ ܕܰܒܬܽܘܠܬܳܐ܆ ܒܰܡܥܰܪܬܳܐ ܒܒܶܝܬ ܠܚܶܡ܀

ܒܽܘܟܪܳܐ ܥܰܠ ܠܟܰܪܣܳܐ܆ ܘܠܳܐ ܚܶܫܰܬ ܒܬܽܘܠܬܳܐ܆ ܕܳܠ ܘܰܢܦܰܩ ܒܚܶܒ̈ܠܶܐ܆ ܘܪܶܓܫܰܬ ܒܶܗ ܒܪܺܝܬܳܐ܆ ܫܒܺܝܚ ܘܰܟܣܶܐ ܒܡܰܥܠܶܗ܆ ܘܫܺܝܛ ܘܰܓܠܶܐ ܒܡܰܦܩܶܗ܆ ܕܰܐܠܳܗܰܐ ܗ̱ܘ ܒܡܰܥܠܶܗ܆ ܘܒܰܪܢܳܫܰܐ ܗ̱ܘ ܒܡܰܦܩܶܗ܆ ܬܶܗܪܳܐ ܘܦܶܗܝܳܐ ܠܡܺܐܡܰܪ܆ ܕܢܽܘܪܳܐ ܥܶܠܰܬ ܠܟܰܪܣܳܐ܆ ܘܠܶܒܫܰܬ ܦܰܓܪܳܐ ܘܢܶܦܩܰܬ܀

ܐܳܠܶܦ ܐܰܠܦܺܝ̈ܢ ܕܩܳܝܡܺܝܢ܆ ܕܰܒܢܽܘܪܳܐ ܘܪܽܘܚܳܐ ܡܙܺܝܓܺܝܢ܆ ܘܰܒܥܰܕܥܺܐܕܳܟ ܫܒܺܝܚܳܐ܆ ܕܰܡ̈ܟܶܐ ܚܠܺܝܛܺܝܢ ܒܫܳܗܪ̈ܶܐ܆ ܘܢܽܘܪܳܐ ܡܙܺܝܓܳܐ ܒܡܰܝ̈ܳܐ܆ ܘܐ̱ܢܳܫ̈ܳܐ ܒܪܽܘܚܳܐ ܡܠܺܝܠܺܝܢ܆ ܘܚܰܕ ܗ̱ܽܘ ܫܰܗܪܳܐ ܠܟܽܠܗܽܘܢ܆ ܪܳܥܶܡ ܩܳܠܶܗ ܕܝܰܠܕܳܟ܆ ܡܶܢ ܟܽܠ ܦܽܘܡܺܝ̈ܢ ܒܫܽܘܒܚܳܐ܆ ܒܪܺܝܟܽ ܗ̱ܘ ܕܰܣܦܰܩ ܠܟܺܐܒܰܝ̈ܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܒܳܐ ܟܬܰܒ ܗ̱ܘܳܐ
ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ

ܥܽܘܢܺܝܬܳܐ: ܒܪܺܝܟܳܐ ܗ̱ܝ ܡܰܪܝܰܡ ܕܺܝܠܶܕܬܶܗ ܠܰܡܫܺܝܚܳܐ ܕܗܽܘ ܦܳܪܶܩ ܥܳܠ̈ܡܶܐ.

ܕܶܢܚܳܐ ܓܰܐܝܳܐ ܒܪܶܗ ܕܰܐܒܳܐ. ܕܳܠ ܘܰܢܚܶܬ ܡܶܢ ܐܰܬܪܶܗ ܪܳܡܳܐ܆ ܘܩܰܒܶܠܬܶܗ ܛܠܺܝܬܳܐ܆ ܕܢܰܚ ܡܶܢܳܗ̇ ܒܬܶܗܪܳܐ܆ ܘܰܒܡܽܘܢܺܝܛܺܝ ܕܰܐܪ̈ܥܳܢܶܐ܆ ܛܒܰܥ ܝܳܬܶܗ ܘܰܢܦܰܩ ܠܥܳܠܡܳܐ܀

ܢܽܘܗܪܳܐ ܕܰܡܙܺܝܥ ܠܰܟܪ̈ܽܘܒܶܐ. ܚܡܰܠ ܙܺܝܘܶܗ ܒܓܰܘ ܟܰܪܣܳܐ ܕܒܶܣܪܳܐ. ܕܰܒܬܰܪܥܳܐ ܕܝܰܠܕܳܐ. ܢܶܦܽܘܩ ܠܰܒܪܺܝܬܳܐ. ܕܢܰܢܗܰܪ ܥܽܘ̈ܒܶܐ ܚܶܫܽܘ̈ܟܶܐ. ܘܰܒܕܶܢܚܶܗ ܐܰܣܺܝܪ̈ܶܐ ܢܶܫܬܪܽܘܢ܀

ܕܳܚܠܳܐ ܢܽܘܪܳܐ ܡܶܢ ܢܽܘܪܶܗ܆ ܘܓܰܘܙܰܠܬܳܐ ܡܶܢ ܗܰܘܦܶܗ ܝܳܩܕܳܐ܆ ܒܰܟܪ̈ܽܘܒܶܐ ܙܰܘܥܶܗ܆ ܒܰܣܪ̈ܳܦܶܐ ܩܽܘܕܫܶܗ܆ ܘܣܺܝܡ ܥܰܠ ܚܰܕܝܳܗ̇ ܕܰܛܠܺܝܬܳܐ܆ ܘܰܐܝܟ ܫܰܒܪܳܐ ܒܺܐܝ̈ܕܰܘܗ̱ܝ ܠܒܺܝܟ ܠܰܬܕܳܐ܀

ܡܫܰܕܰܪ ܫܶܦ̈ܥܶܐ ܒܰܥܢܳܢ̈ܶܐ. ܕܠܰܐܪ̈ܥܳܬܳܐ ܨܰܗ̈ܝܳܬܳܐ ܢܰܫ̈ܩܝܳܢ. ܡܦܰܠܶܓ ܢܽܘ̈ܛܦܳܬܳܐ. ܠܙܰܪ̈ܥܶܐ ܕܰܐܟܳܪ̈ܶܐ. ܛܽܘ̈ܦܰܝ ܚܰܠܒܳܐ ܝܺܢܶܩ ܗ̱ܘܳܐ. ܡܶܢ ܐܶܡܳܐ ܕܰܥܒܰܕ ܠܶܗ ܟܰܕ ܨܒܳܐ܀

ܚܰܝ̈ܠܰܘܳܬܳܐ ܥܶܠܳܝ̈ܶܐ. ܡܶܢ ܙܺܝܘܶܗ ܪܳܐܬܺܝܢ ܟܡܳܐ ܕܚܺܝܠ. ܪܳܥܶܠ ܓܰܒܪܺܐܶܝܠ ܘܟܳܘܶܙ ܡܺܝܟܳܐܶܝܠ. ܩܳܪܶܒ ܝܰܘܣܶܦ ܘܰܡܚܰܒܶܒ. ܛܥܺܝܢ ܣܳܓܶܕ ܘܰܚܠܺܝܛ ܒܪܶܚܡܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܚܕܰܘ ܥܰܡ̱̈ܡܶܐ

ܥܽܘܢܺܝܬܳܐ: ܠܳܟ ܫܽܘܒܚܳܐ ܒܟܽܠ ܥܶܕܳܢ܆ ܡܳܪܝܳܐ ܡܫܺܝܚܳܐ܆ ܕܰܒܝܰܠܕܳܟ ܐܶܬܦܰܪܩܰܬ ܥܺܕܰܬ ܩܽܘܕܫܳܐ.

ܬܰܘ ܥܰܡ̱̈ܡܶܐ ܬܰܘ ܥܰܡ̱̈ܡܶܐ. ܙܡܰܪܘ ܠܶܗ ܬܶܫܒܽܘܚܬܳܐ܆ ܠܗܰܘ ܕܰܒܝܰܠܕܶܗ ܦܪܰܩܟܽܘܢ. ܡܶܢ ܛܳܥܝܽܘܬܳܐ܀

ܒܢ̈ܳܬ ܨܰܦܪܳܐ ܒܢ̈ܳܬ ܨܰܦܪܳܐ. ܘܰܒ̈ܢܳܬ ܐܺܝܡܳܡܳܐ܆ ܙܡܰܪ̈ܶܝܢ ܠܶܗ ܬܶܫܒܽܘܚܬܳܐ. ܠܗܰܘ ܕܰܦܪ̈ܰܩܟܶܝܢ܀

ܥܰܠ ܛܽܘܪ̈ܶܐ ܥܰܠ ܛܽܘܪ̈ܶܐ. ܣܰܩܝ ܥܺܕܰܬ ܩܽܘܕܫܳܐ܆ ܘܰܙܡܰܪܝ ܠܶܗ ܬܶܫܒܽܘܚܬܳܐ. ܠܗܰܘ ܕܶܐܬܳܐ ܘܦܰܪܩܶܟܝ܀

ܡܰܠܰܐܟ̈ܶܐ ܡܰܠܰܐܟ̈ܶܐ. ܘܓܽܘ̈ܕܶܐ ܕܪ̈ܽܘܚܳܢܶܐ܆ ܙܡܰܪܽܘܢ ܠܶܗ ܬܶܫܒܽܘܚܬܳܐ. ܠܰܒܪܳܐ ܒܡܰܘܠܳܕܶܗ܀

ܙܥܰܩܘ ܟܶܢ̈ܫܶܐ ܙܥܰܩܘ ܟܶܢ̈ܫܶܐ. ܠܘܳܬ ܪ̈ܳܥܰܘܳܬܳܐ܆ ܕܙܰܡܰܪܘ ܠܶܗ ܬܶܫܒܽܘܚܬܳܐ. ܠܰܒܪܳܐ ܒܡܰܘܠܳܕܶܗ܀

ܕܽܘܨܘ ܘܶܐܬܦܰܨܚܘ ܕܽܘܨܘ ܘܶܐܬܦܰܨܚܘ. ܟܶܢ̈ܫܶܐ ܕܡܶܢ ܥܳܠܰܡ܆ ܘܰܙܡܰܪܘ ܠܶܗ ܬܶܫܒܽܘܚܬܳܐ. ܠܰܒܪܳܐ ܒܡܰܘܠܳܕܶܗ܀

ܛܥܶܢܘ ܘܰܐܝܬܺܝܘ ܛܥܶܢܘ ܘܰܐܝܬܺܝܘ. ܡܓܽܘ̈ܫܶܐ ܩܽܘܪ̈ܒܳܢܶܐ܆ ܘܰܙܡܰܪܘ ܠܶܗ ܬܶܫܒܽܘܚܬܳܐ. ܠܰܒܪܳܐ ܒܡܰܘܠܳܕܶܗ܀

ܚܕܰܘ ܓܰܒ̈ܶܐ ܚܕܰܘ ܓܰܒ̈ܶܐ. ܕܪܰܘܡܳܐ ܘܥܽܘܡܩܳܐ܆ ܘܰܙܡܰܪܘ ܠܶܗ ܬܶܫܒܽܘܚܬܳܐ. ܠܰܒܪܳܐ ܒܡܰܘܠܳܕܶܗ܀

ܥܺܕ̈ܳܬܳܐ ܥܺܕ̈ܳܬܳܐ. ܘܟܽܠܗܶܝܢ ܕܰܝܪ̈ܳܬܳܐ܆ ܙܡܰܪ̈ܶܝܢ ܠܶܗ ܬܶܫܒܽܘܚܬܳܐ. ܠܰܒܪܳܐ ܒܡܰܘܠܳܕܶܗ܀

ܟܽܠ ܥܰܡ̱̈ܡܺܝܢ ܟܽܠ ܥܰܡ̱̈ܡܺܝܢ. ܥܰܡ ܟܽܠ ܠܶܫܳܢܺܝ̈ܢ܆ ܙܡܰܪܽܘܢ ܠܶܗ ܬܶܫܒܽܘܚܬܳܐ. ܠܰܒܪܳܐ ܒܡܰܘܠܳܕܶܗ܀

ܐܶܬܪܰܡܪܰܡܘ ܐܶܬܪܰܡܪܰܡܘ. ܬܰܚܬܳܝ̈ܶܐ ܠܪܰܘܡܳܐ܆ ܘܰܙܡܰܪܘ ܠܶܗ ܬܶܫܒܽܘܚܬܳܐ. ܠܰܒܪܳܐ ܒܡܰܘܠܳܕܶܗ܀

ܗܳܐ ܦܪ̈ܺܝܩܶܐ ܗܳܐ ܦܪ̈ܺܝܩܶܐ. ܗܳܐ ܦܪܺܝܥܳܐ ܚܰܘܒܬܳܐ܆ ܙܡܰܪܽܘܢ ܠܶܗ ܬܶܫܒܽܘܚܬܳܐ. ܠܰܒܪܳܐ ܒܡܰܘܠܳܕܶܗ܀

ܠܳܟ ܫܽܘܒܚܳܐ ܠܳܟ ܫܽܘܒܚܳܐ. ܘܰܥܠܰܝܢ ܪ̈ܰܚܡܰܝܟ܆ ܒܪܳܐ ܕܺܝܠܺܝܕ ܝܰܘܡܳܢܳܐ. ܒܓܰܘ ܒܶܝܬ ܠܚܶܡ܀

ܐ̱ܚܪܺܢܳܐ

ܩܳܠܳܐ ܒܩ̄: ܥܰܡܳܐ ܘܥܰܡ̱̈ܡܶܐ

ܥܽܘܢܺܝܬܳܐ: ܫܽܘܒܚܳܐ ܠܳܟ ܡܳܪܝ ܕܰܒܡܶܐܬܝܳܟ܆ ܦܢܰܘ ܚܰܛܳܝ̈ܶܐ ܡܶܢ ܥܰܘܠܗܽܘܢ. ܘܥܰܠܘ ܘܶܐܣܬܰܬܰܪܘ ܒܓܰܢܰܬ ܥܕܶܢ܆ ܕܺܐܝܬܶܝܗ̇ ܥܺܕܬܳܐ ܩܰܕܺܝܫܬܳܐ.

ܕܢܰܚ ܡܶܢ ܟܰܪܣܳܐ ܕܰܒܬܽܘܠܬܳܐ. ܘܣܳܦܘ ܛܶܠܴ̈ܠܶܐ ܟܰܕ ܐܶܬܚܙܺܝ. ܘܚܶܫܟܳܐ ܕܛܽܘܥܝܰܝ ܒܶܗ ܐܶܬܚܢܶܩ. ܘܰܐܢܗܰܪܘ ܣܰܘ̈ܦܶܐ ܕܰܢܫܰܒܚܽܘܢ܀

ܒܝܰܠܕܶܗ ܕܰܒܪܳܐ ܢܽܘܗܪܳܐ ܕܢܰܚ܆ ܘܰܥܪܰܩ ܚܶܫܟܳܐ ܡܶܢ ܥܳܠܡܳܐ܆ ܘܢܶܗܪܰܬ ܬܺܒܶܝܠ ܕܰܬܫܰܒܚܺܝܘܗ̱ܝ ܠܨܶܡܚܶܗ ܕܰܐܒܳܐ ܕܗܽܘ ܐܰܢܗܪܳܗ̇܀

ܐܰܙܠܶܓ ܢܽܘܗܪܶܗ ܥܰܠ ܡܰܕܢܚܳܐ. ܘܢܶܗܪܰܬ ܬܺܒܶܝܠ ܡܶܢ ܟܰܘܟܒܶܗ. ܕܕܶܢܚܶܗ ܣܰܒܪܳܗ̇ ܐܳܦ ܙܰܡܢܳܗ̇. ܕܬܺܐܬܶܐ ܠܕܶܢܚܳܐ ܡܰܦܨܰܚ ܟܽܠ܀

ܒܥܰܡ̱̈ܡܶܐ ܪܰܘܒܳܐ ܪܰܒܳܐ ܗܘܳܐ܆ ܕܰܒܚܶܫܽܘܟܳܐ ܢܽܘܗܪܳܐ ܕܢܰܚ܆ ܘܕܳܨ̈ܝ ܐܶܡ̈ܘܳܬܳܐ ܕܰܢ̈ܫܰܒܚܳܢ܆ ܠܗܰܘ ܕܰܒܝܰܠܕܶܗ ܢܽܘܗܪܳܐ ܚܙܰܘ܀

ܚܰܕ ܐܺܝܙܓܰܕܳܐ ܡܶܢ ܟܰܘ̈ܟܒܶܐ܆ ܪܩܺܝܥܳܐ ܫܰܕܰܪ ܕܢܰܝܬܶܐ ܠܗܽܘܢ܆ ܠܰܒ̈ܢܰܝ ܦܳܪܶܣ ܕܢܶܬܛܰܝܒܽܘܢ. ܕܕܳܢܰܚ ܡܰܠܟܳܐ ܕܠܶܗ ܢܶܣܓܕܽܘܢ܀

ܪܗܶܛ ܢܰܗܺܝܪܳܐ ܘܶܐܙܰܠ ܕܢܰܚ܆ ܒܶܝܬ ܚܶܫܽܘ̈ܟܶܐ ܘܰܩܪܳܐ ܠܗܽܘܢ܆ ܕܢܺܐܬܽܘܢ ܥܰܡܶܗ ܘܢܶܬܒܰܣܡܽܘܢ܆ ܒܢܽܘܗܪܳܐ ܪܰܒܳܐ ܕܠܰܐܪܥܳܐ ܢܚܶܬ܀

ܪ̈ܺܝܫܰܝ ܦܳܪܶܣ ܟܰܕ ܪܳܘܙܺܝܢ. ܛܥܶܢܘ ܩܽܘܪ̈ܒܳܢܶܐ ܡܶܢ ܐܰܬܪܗܽܘܢ. ܘܰܐܝܬܺܝܘ ܠܰܒܪܳܗ̇ ܕܰܒܬܽܘܠܬܳܐ. ܕܰܗܒܳܐ ܘܡܽܘܪܳܐ ܘܰܠܒܽܘܢܬܳܐ܀

ܩܪܳܬ ܠܰܡܓܽܘ̈ܫܶܐ ܘܶܐܡܪܰܬ ܠܗܽܘܢ܆ ܐܳܬܽܘܪ ܪܰܒܬܳܐ ܟܰܕ ܫܶܡܥܰܬ܆ ܣܰܒܘ ܩܽܘܪ̈ܒܳܢܶܐ ܘܙܶܠܘ ܝܰܩܪܽܘܗ̱ܝ܆ ܠܡܰܠܟܳܐ ܪܰܒܳܐ ܕܒܺܝܗܽܘܕ ܕܢܰܚ܀

ܐܳܡܪܳܐ ܡܰܪܝܰܡ ܗܳܠܶܝܢ ܠܡܽܘܢ. ܘܡܶܛܽܠ ܡܳܢܳܐ ܘܡܽܘܢ ܥܶܠܬܳܐ. ܩܪܳܬܟܽܘܢ ܕܬܺܐܬܽܘܢ ܡܶܢ ܐܰܬܪܟܽܘܢ. ܨܶܝܕ ܝܰܠܽܘܕܳܐ ܒܣܺܝ̈ܡܳܬܟܽܘܢ܀

ܐܳܡܪܺܝܢ ܡܓܽܘ̈ܫܶܐ ܡܰܠܟܰܐ ܗ̱ܘ ܒܪܶܟܝ܆ ܘܩܳܛܰܪ ܬܳܓ̈ܶܐ ܘܡܳܪܳܐ ܕܟܽܠ܆ ܘܪܳܡ ܫܽܘܠܛܳܢܶܗ ܡܶܢ ܥܳܠܡܳܐ܆ ܘܰܠܡܰܠܟܽܘܬܶܗ ܟܽܠ ܡܶܫܬܡܰܥ܀

ܒܰܐܝܢܳܐ ܙܰܒܢܳܐ ܗܳܕܶܐ ܗܘܳܬ. ܕܬܺܐܠܰܕ ܡܰܠܟܳܐ ܡܶܣܟܺܢ̱ܬܳܐ܆ ܕܰܣܢܺܝܩܳܐ ܐ̱ܢܳܐ ܘܰܡܓܰܙܝܳܢ. ܘܰܐܝܟܰܢ ܡܰܠܟܳܐ ܡܶܢܝ ܡܶܬܚܙܶܐ܀

ܒܶܟܝ ܒܰܠܚܽܘܕܰܝܟܝ ܗܳܕܶܐ ܗܘܳܬ܆ ܕܡܰܠܟܳܐ ܪܰܒܳܐ ܒܶܟܝ ܢܶܬܚܙܶܐ܆ ܘܡܶܣܟܺܢܽܘܬܶܟܝ ܒܶܗ ܝܳܪܒܳܐ܆ ܕܠܰܒܪܶܟܝ ܬܳܓ̈ܶܐ ܡܶܫܬܰܥܒܕܺܝܢ܀

ܓܰܙܳܐ ܕܡܰܠ̈ܟܶܐ ܠܳܐ ܐܺܝܬ ܠܺܝ. ܒܥܽܘܬܪܳܐ ܕܡܰܠ̈ܟܶܐ ܠܳܐ ܦܓܺܝܥ ܠܺܝ. ܒܰܝܬܳܐ ܡܶܣܟܺܝܢ ܘܣܰܓܺܝ ܣܢܺܝܩ. ܘܰܕܡܰܠܟܰܐ ܗ̱ܘ ܒܶܪܝ ܠܳܐ ܬܰܟܪܙܽܘܢ܀

ܓܰܙܳܐ ܪܰܒܳܐ ܐܺܝܬܰܘܗ̱ܝ ܒܪܶܟܝ܆ ܘܥܽܘܬܪܳܐ ܕܣܳܦܶܩ ܢܰܥܬܰܪ ܠܟܽܠ܆ ܓܰܙܳܐ ܕܡܰܠ̈ܟܶܐ ܡܶܬܡܰܣܟܰܢ܆ ܘܗܽܘ ܠܳܐ ܚܳܣܰܪ ܘܠܳܐ ܡܶܬܒܨܰܪ܀

ܕܰܠܡܳܐ ܐ̱ܚܪܺܝܢ ܗ̱ܽܘ ܗܰܘ ܕܺܝܠܟܽܘܢ܆ ܡܰܠܟܳܐ ܕܺܝܠܺܝܕ ܥܰܩܶܒܘ ܥܠܰܘܗ̱ܝ. ܕܗܳܢܳܐ ܒܪܳܗ̇ ܗ̱ܽܘ ܕܡܶܣܟܺܢ̱ܬܳܐ. ܕܬܶܚܙܶܐ ܠܡܰܠܟܳܐ ܠܳܐ ܣܳܦܩܳܐ܀

ܕܰܠܡܳܐ ܡܰܨܝܳܐ ܕܛܳܥܶܐ ܡܬܽܘܡ܆ ܢܽܘܗܪܳܐ ܐܽܘܪܚܶܗ ܡܳܐ ܕܡܶܫܬܠܰܚ܆ ܠܰܘ ܚܶܫܽܘܟܳܐ ܩܪܳܢ ܘܰܐܬܝܰܢ܆ ܒܢܽܘܗܪܳܐ ܪܕܰܝܢܰܢ ܕܡܰܠܟܰܐ ܗ̱ܘ ܒܪܶܟܝ܀

ܗܳܐ ܚܳܙܶܝܬܽܘܢ ܕܥܽܘܠܳܐ ܫܠܶܐ. ܘܒܰܝܬܳܐ ܕܶܐܡܶܗ ܡܓܰܙܰܝ ܣܦܺܝܩ. ܫܰܪܒܬܳܐ ܕܡܰܠ̈ܟܶܐ ܠܳܐ ܐܺܝܬ ܒܶܗ. ܘܰܐܝܟܰܢ ܡܰܠܟܳܐ ܒܶܗ ܡܶܬܚܙܶܐ܀

ܗܳܐ ܚܳܙܶܝܢܰܢ ܕܰܫܠܶܐ ܘܢܺܝܚ܆ ܘܡܰܟܺܝܟ ܛܰܠܝܳܐ ܐܰܝܟ ܡܶܠܬܶܟܝ܆ ܘܰܚܙܰܝܢܰܢ ܬܽܘܒ ܕܰܠܟܰܘ̈ܟܒܶܐ܆ ܒܪܰܘܡܳܐ ܡܰܪܗܶܒ ܕܰܢܣܰܒܪܽܘܢ܀

ܘܳܠܶܐ ܐ̱ܢܳܫ̈ܳܐ ܕܰܬܥܰܩܒܽܘܢ. ܡܰܢܽܘ ܡܰܠܟܳܐ ܘܟܶܢ ܬܶܣܓܕܽܘܢ. ܕܰܠܡܳܐ ܐܽܘܪܚܳܐ ܐܶܫܬܰܚܠܦܰܬ. ܘܡܰܠܟܳܐ ܐ̱ܚܪܺܢܰܐ ܗ̱ܘ ܕܶܐܬܺܝܠܶܕ܀

ܘܳܠܶܐ ܛܠܺܝܬܳܐ ܕܰܬܩܰܒܠܺܝܢ܆ ܕܺܝܠܶܦܢܰܢ ܕܰܒܪܶܟܝ ܡܰܠܟܰܐ ܗ̱ܘ܆ ܡܶܢ ܢܰܗܺܝܪܳܐ ܕܠܳܐ ܡܶܬܥܒܰܪ܆ ܕܫܰܦܝܳܐ ܐܽܘܪܚܶܗ ܘܗܽܘ ܐܰܝܬܝܰܢ܀

ܙܥܽܘܪܰܐ ܗ̱ܘ ܛܰܠܝܳܐ ܘܗܳܐ ܠܰܝܬ ܠܶܗ. ܬܳܓܳܐ ܕܡܰܠ̈ܟܶܐ ܘܠܳܐ ܟܽܘܪܣܝܳܐ. ܡܳܢܳܐ ܚܙܰܝܬܽܘܢ ܕܰܬܩܰܪܒܽܘܢ. ܐܰܝܟ ܕܰܠܡܰܠܟܳܐ ܣܺܝ̈ܡܳܬܟܽܘܢ܀

ܙܥܽܘܪ ܗ̱ܽܘ ܕܰܨܒܳܐ ܘܢܺܝܚ ܕܰܒܥܳܐ܆ ܘܡܰܟܺܝܟ ܗܳܫܳܐ ܥܰܕ ܡܶܬܓܠܶܐ܆ ܘܺܐܝܬ ܠܶܗ ܙܰܒܢܳܐ ܕܢܶܬܪܰܟܢܽܘܢ܆ ܟܽܠܫܳܥ ܡܰܠ̈ܟܶܐ ܘܠܶܗ ܢܶܣܓܕܽܘܢ܀

ܚܰܝ̈ܠܰܘܳܬܳܐ ܠܳܐ ܐܺܝܬ ܠܶܗ. ܘܠܳܐ ܠܶܓܝܽܘ̈ܢܶܐ ܘܣܶܕܪ̈ܶܐ ܠܒܶܪܝ. ܒܡܶܣܟܺܢܽܘܬܳܐ ܕܶܐܡܶܗ ܫܠܶܐ. ܘܡܶܢܟܽܘܢ ܡܰܠܟܳܐ ܠܡܽܘܢ ܡܶܬܟܪܶܙ܀

ܚܰܝܠܰܘ̈ܳܬܶܗ ܕܰܒܪܶܟܝ ܠܥܶܠ܆ ܪܟܺܝܒܺܝܢ ܪܰܘܡܳܐ ܘܡܶܬܓܰܘܙܠܺܝܢ܆ ܘܡܶܢ ܚܰܕ ܡܶܢܗܽܘܢ ܕܶܐܬܳܐ ܩܪܳܢ܆ ܟܽܠܳܗ̇ ܦܢܺܝܬܰܢ ܐܶܬܪܰܗܒܰܬ܀

ܛܠܶܐ ܝܰܠܽܘܕܳܐ ܘܰܐܝܟܰܢ ܦܫܺܝܩ. ܕܢܶܗܘܶܐ ܡܰܠܟܳܐ ܥܰܠ ܥܳܠܡܳܐ. ܘܓܰܢ̱ܒܳܪ̈ܶܐ ܘܰܩܪ̈ܰܒܬܳܢܶܐ. ܐܰܝܟܰܢ ܫܰܒܪܳܐ ܡܕܰܒܰܪ ܠܗܽܘܢ܀

ܛܰܠܝܶܟܝ ܣܳܒܰܐ ܗ̱ܘ ܐܳܘ ܥܠܰܝܡܬܳܐ܆ ܘܥܰܬܺܝܩ ܝܰܘ̈ܡܶܐ ܘܩܰܕܺܝܡ ܠܟܽܠ܆ ܘܳܐܕܳܡ ܡܶܢܶܗ ܣܰܓܺܝ ܛܠܶܐ܆ ܘܒܶܪ̈ܝܳܬܳܐ ܒܶܗ ܡܶܬܦܰܪ̈ܢܣܳܢ܀

ܝܳܐܶܐ ܣܰܓܺܝ ܕܰܬܦܰܫܩܽܘܢ܆ ܟܽܠܶܗ ܐ̱ܪܳܙܳܐ ܘܰܬܒܰܕܩܽܘܢ܆ ܡܰܢܽܘ ܓܠܳܐ ܠܟܽܘܢ ܐ̱ܪܳܙܶܗ ܕܒܶܪܝ܆ ܕܺܐܝܬܰܘܗ̱ܝ ܡܰܠܟܳܐ ܒܰܦܢܺܝܬܟܽܘܢ܀

ܝܳܐܶܐ ܗ̱ܘܳܐ ܠܶܟܝ ܕܰܬܩܰܒܠܺܝܢ܆ ܕܶܐܠܽܘ ܫܪܳܪܳܐ ܠܳܐ ܐܺܝܬܰܘܗ̱ܝ܆ ܠܳܐ ܡܶܢ ܥܶܒܪ̈ܶܝܗ̇ ܕܰܐܪܥܳܐ ܠܟܳܐ܆ ܛܥܶܢܢܰܢ ܘܰܐܝܬܺܝܢ ܡܶܛܽܠ ܒܪܶܟܝ܀

ܟܽܠܶܗ ܐ̱ܪܳܙܳܐ ܐܰܝܟ ܕܶܐܣܬܥܰܪ. ܠܘܳܬܟܽܘܢ ܬܰܡܳܢ ܒܰܦܢܺܝܬܟܽܘܢ. ܓܠܰܘ ܠܺܝ ܗܳܫܳܐ ܐܰܝܟ ܪ̈ܳܚܡܶܐ. ܕܡܰܢܽܘ ܩܪܳܟܽܘܢ ܕܬܺܐܬܽܘܢ ܠܘܳܬܝ܀

ܟܰܘܟܒܳܐ ܪܰܒܳܐ ܠܰܢ ܐܶܬܚܙܺܝ܆ ܕܣܰܓܺܝ ܡܝܰܬܰܪ ܡܶܢ ܟܰܘ̈ܟܒܶܐ܆ ܘܰܐܪܥܰܢ ܟܽܠܳܗ̇ ܐܶܬܓܰܘܙܠܰܬ܆ ܘܕܰܕܢܰܚ ܡܰܠܟܳܐ ܗܽܘ ܣܰܒܪܰܢ܀

ܠܳܐ ܒܳܥܝܳܐ ܐ̱ܢܳܐ ܕܰܬܡܰܠܠܽܘܢ. ܗܳܠܶܝܢ ܒܰܐܬܪܰܢ ܕܠܳܐ ܢܰܪܓܫܽܘܢ. ܡܰܠ̈ܟܶܐ ܕܰܐܪܥܳܐ ܘܢܶܬܠܰܚܡܽܘܢ. ܥܰܠ ܝܰܠܽܘܕܳܐ ܒܰܚܣܳܡܗܽܘܢ܀

ܠܳܐ ܬܶܬܪܰܗܒܺܝܢ ܐܳܘ ܥܠܰܝܡܬܳܐ܆ ܕܟܽܠܗܽܘܢ ܬܳܓ̈ܶܐ ܫܳܪܶܐ ܒܪܶܟܝ܆ ܘܰܬܚܶܝܬ ܥܶܩܒܶܗ ܣܳܐܶܡ ܠܗܽܘܢ܆ ܠܳܐ ܡܰܟܶܝܢ ܠܶܗ ܐܶܢ ܚܳܣܡܺܝܢ܀

ܡܶܢ ܗܶܪܳܘܕܶܣ ܡܶܣܬܰܪܕܳܢ܆ ܟܰܠܒܳܐ ܦܰܩܪܳܐ ܠܳܐ ܢܰܕܚܠܰܢܝ܆ ܘܢܶܫܡܽܘܛ ܣܰܝܦܶܗ ܘܒܶܗ ܢܶܬܩܛܶܠ܆ ܣܓܽܘܠܳܐ ܚܰܠܝܳܐ ܟܰܕ ܠܳܐ ܒܫܶܠ܀

ܡܶܢ ܗܶܪܳܘܕܶܣ ܠܳܐ ܬܶܕܚܠܺܝܢ܆ ܕܒܺܐܝ̈ܕܰܘܗ̱ܝ ܕܰܒܪܶܟܝ ܣܺܝܡ ܟܽܘܪܣܝܶܗ܆ ܘܡܳܐ ܕܰܨܠܳܐ ܠܶܗ ܢܳܕ ܘܶܐܣܬܚܶܦ܆ ܘܰܢܦܰܠ ܬܳܓܶܗ ܘܙܳܥ ܕܳܘܝܳܐ܀

ܢܰܚܠܳܐ ܗ̱ܝ ܕܰܕܡܳܐ ܐܽܘܪܫܠܶܡ. ܕܒܳܗ̇ ܫܰܦܝܪ̈ܶܐ ܡܶܬܩܰܛܠܺܝܢ܆ ܐܶܢ ܪܳܓܫܳܐ ܒܶܗ ܣܳܒܟܳܐ ܥܠܰܘܗ̱ܝ܆ ܒܐ̱ܪܳܙܳܐ ܡܰܠܶܠܘ ܠܳܐ ܬܫܰܓܫܽܘܢ܀

ܢܰܚ̈ܠܶܐ ܟܽܠܗܽܘܢ ܐܳܦ ܢܺܐܪ̈ܒܶܐ܆ ܒܺܐܝ̈ܕܰܘܗ̱ܝ ܕܰܒܪܶܟܝ ܡܶܫܬܰܝܢܺܝܢ܆ ܘܩܳܗܝܳܐ ܚܰܪܒܳܗ̇ ܕܽܐܘܪܫܠܶܡ ܘܶܐܠܳܐ ܨܳܒܶܐ ܠܳܐ ܡܶܬܩܛܶܠ܀

ܣܳܦܪ̈ܶܐ ܘܟܳܗ̈ܢܶܐ ܕܽܐܘܪܫܠܶܡ܆ ܡܢܰܦܩܺܝܢ ܒܰܕܡܳܐ ܘܶܐܢ ܡܰܪܓܫܺܝܢ܆ ܡܥܺܝܪܺܝܢ ܗܶܪܬܳܐ ܩܳܛܽܘܠܬܳܐ܆ ܥܠܰܝ ܘܥܰܠ ܛܰܠܝܳܐ ܡܓܽܘ̈ܫܶܐ ܫܠܰܘ܀

ܣܳܦܪ̈ܶܐ ܘܟܳܗ̈ܢܶܐ ܒܰܚܣܳܡܗܽܘܢ܆ ܕܢܰܟܽܘܢ ܠܰܒܪܶܟܝ ܠܳܐ ܡܶܫܟܚܺܝܢ܆ ܕܒܶܗ ܡܶܫܬܰܪܝܳܐ ܟܳܗܢܽܘܬܗܽܘܢ܆ ܘܥܰܕܥܺܐܕܰܝ̈ܗܽܘܢ ܡܶܬܒܰܛܠܺܝܢ܀

ܥܺܝܪܳܐ ܓܠܳܐ ܠܺܝ ܟܰܕ ܩܰܒܠܶܬ܆ ܒܰܛܢܶܗ ܕܛܰܠܝܳܐ ܕܡܰܠܟܰܐ ܗ̱ܘ ܒܪܶܟܝ܆ ܘܰܕܪܳܡ ܬܳܓܶܗ ܘܠܳܐ ܡܶܫܬܪܶܐ܆ ܗܽܘ ܒܰܕܶܩ ܠܺܝ ܐܰܟܘܳܬܟܽܘܢ܀

ܥܺܝܪܳܐ ܡܳܕܶܝܢ ܕܶܐܡܰܪܬܝ ܥܠܰܘܗ̱ܝ܆ ܗܽܘܝܽܘ ܩܪܳܐ ܠܰܢ ܐܰܝܟ ܟܰܘܟܒܳܐ܆ ܘܶܐܬܚܰܘܺܝ ܠܰܢ ܕܰܢܣܰܒܪܰܢ܆ ܕܪܰܒ ܗ̱ܽܘ ܘܰܫܒܺܝܚ ܡܶܢ ܟܰܘ̈ܟܒܶܐ܀

ܦܰܫܶܩ ܗ̱ܘܳܐ ܠܺܝ ܟܰܕ ܣܰܒܪܰܢܝ܆ ܗܰܘ ܡܰܠܰܐܟܳܐ ܕܠܺܝ ܐܺܬܚܙܺܝ܆ ܕܰܠܡܰܠܟܽܘܬܶܗ ܣܽܘܦ ܠܳܐ ܢܗܶܐ܆ ܐ̱ܪܳܙܳܐ ܛܰܪ ܠܺܝ ܕܠܳܐ ܢܶܬܓܠܶܐ܀

ܦܰܫܶܩ ܠܰܢ ܬܽܘܒ ܐܳܦ ܟܰܘܟܒܳܐ܆ ܕܩܳܛܰܪ ܬܳܓ̈ܶܐ ܐܺܝܬܰܘܗ̱ܝ ܒܪܶܟܝ܆ ܚܙܳܬܶܗ ܡܳܕܶܝܢ ܐܶܫܬܰܚܠܦܰܬ܆ ܘܡܰܠܰܐܟܳܐ ܗ̱ܘܳܐ ܘܠܳܐ ܐܰܘܕܥܰܢ܀

ܨܶܐܕܰܝ ܥܺܝܪܳܐ ܟܰܕ ܣܰܒܪܰܢܝ܆ ܡܳܪܶܗ ܩܪܳܝܗ̱ܝ ܗ̱ܘܳܐ ܟܰܕ ܠܳܐ ܒܛܺܝܢ. ܘܒܰܪ ܥܶܠܳܝܳܐ ܠܺܝ ܐܰܟܪܙܶܗ܆ ܘܕܰܐܝܟܰܘ ܐܰܒܽܘܗ̱ܝ ܠܳܐ ܝܳܕܥܳܢ܀

ܨܶܐܕܰܝܢ ܐܳܦ ܟܰܘܟܒܳܐ ܐܰܟܪܙܶܗ܆ ܕܡܳܪܶܐ ܪ̈ܰܘܡܶܐ ܐܶܬܺܝܠܶܕ܆ ܘܥܰܠ ܢܰܗܺܝܪ̈ܶܐ ܫܰܠܺܝܛ ܒܪܶܟܝ܆ ܘܶܐܢ ܦܳܩܶܕ ܠܗܽܘ ܠܳܐ ܕܳܢܚܺܝܢ܀

ܩܕܳܡܰܝܟܽܘܢ ܗ̱ܽܘ ܗܳܐ ܓܳܠܝܳܢ܆ ܐ̱ܪܳܙܳܐ ܐ̱ܚܪܺܢܳܐ ܕܬܶܫܬܰܪܪܽܘܢ܆ ܕܰܒܬܽܘܠܳܐܺܝܬ ܝܶܠܕܶܬ ܒܪܳܐ܆ ܒܰܪ ܐܰܠܳܗܰܐ ܗ̱ܘ ܙܶܠܘ ܐܰܟܪܶܙܘ܀

ܩܰܕܶܡ ܐܰܠܶܦ ܠܰܢ ܟܰܘܟܒܳܐ܆ ܕܪܳܡܽ ܗ̱ܘ ܝܰܠܕܶܟܝ ܡܶܢ ܥܳܠ̈ܡܶܐ܆ ܘܰܠܥܶܠ ܡܶܢ ܟܽܠ ܐܺܝܬܰܘܗ̱ܝ ܒܪܶܟܝ܆ ܒܰܪ ܐܰܠܳܗܰܐ ܗ̱ܘ ܐܰܝܟ ܡܶܠܬܶܟܝ܀

ܪܰܘܡܳܐ ܘܥܽܘܡܩܳܐ ܣܳܓܕܺܝܢ ܠܺܝ܆ ܘܟܽܠܗܽܘܢ ܥܺܝܪ̈ܶܐ ܐܳܦ ܟܰܘ̈ܟܒܶܐ܆ ܕܒܰܪ ܐܰܠܳܗܳܐ ܐܺܝܬܰܘܗ̱ܝ ܒܪܶܟܝ܆ ܘܠܶܗ ܟܽܠ ܥܰܡ̱̈ܡܺܝܢ ܡܶܫܬܰܡܥܺܝܢ ܀

ܪܳܘܙܺܝܢ ܥܰܡܝ ܐܳܦ ܡܰܠܰܐܟ̈ܶܐ܆ ܟܰܕ ܬܳܗܪܺܝܢ ܒܺܝ ܟܶܢ̈ܫܰܝܗܽܘܢ܆ ܕܗܰܘ ܕܰܟܣܶܐ ܡܶܢ ܓܽܘܕܰܝ̈ܗܽܘܢ܆ ܗܳܐ ܓܢܶܐ ܨܶܐܕܰܝ ܕܰܫܦܰܪ ܠܶܗ܀

ܫܠܳܡܳܐ ܐܰܘܒܶܠܘ ܠܰܐܪ̈ܥܳܬܟܽܘܢ܆ ܫܰܝܢܳܐ ܢܶܣܓܶܐ ܒܰܦܢܺܝܬܟܽܘܢ܆ ܫܠܺܝܚ̈ܶܐ ܕܩܽܘܫܬܳܐ ܬܶܬܗܰܝܡܢܽܘܢ܆ ܒܟܽܠܳܗ̇ ܐܽܘܪܚܳܐ ܕܡܰܪܕܺܝܬܟܽܘܢ܀

ܫܠܳܡܶܗ ܕܰܒܪܶܟܝ ܗܽܘ ܢܰܘܒܠܰܢ܆ ܒܫܰܝܢܳܐ ܪܰܒܳܐ ܐܰܝܟ ܕܺܐܝܬܰܘܗ̱ܝ܆ ܘܡܳܐ ܕܡܰܠܟܽܘܬܶܗ ܡܶܬܓܰܠܝܳܐ܆ ܢܶܣܥܽܘܪ ܠܰܐܪܥܰܢ ܘܰܢܒܰܪܟܶܝܗ̇܀

ܬܶܚܕܶܐ ܦܳܪܶܣ ܒܰܣܒܰܪܬܟܽܘܢ܆ ܘܬܶܪܘܰܙ ܬܺܒܶܝܠ ܒܡܶܐܙܰܠܬܟܽܘܢ܆ ܘܡܳܐ ܕܡܰܠܟܽܘܬܶܗ ܡܶܬܬܰܨܡܚܳܐ܆ ܘܰܢܣܺܝܡ ܢܺܝܫܶܗ ܒܰܦܢܺܝܬܟܽܘܢ܀

ܬܶܙܡܰܪ ܥܺܕܬܳܐ ܥܰܡ ܝܰܠ̈ܕܶܝܗ̇܆ ܫܽܘܒܚܳܐ ܒܝܰܠܕܶܗ ܕܰܡܪܰܝܡܳܐ܆ ܕܪܰܘܡܳܐ ܘܥܽܘܡܩܳܐ ܒܶܗ ܗܽܘ ܢܗܰܪܘ܆ ܒܪܺܝܟ ܕܰܒܝܰܠܕܶܗ ܐܰܦܨܰܚ ܠܟܽܠ܀

ܬܰܘܕܺܝܬܳܐ ܠܳܟ ܡܳܪܶܐ ܟܽܠ: ܕܫܰܝܢܶܬ ܟܽܠ ܒܝܽܘܡ ܡܰܘܠܳܕܳܟ: ܫܰܝܶܢ ܥܺܕܬܳܟ ܘܡܰܪܥܺܝܬܳܟ: ܕܰܡܩܰܠܣܳܐ ܠܺܝܠܺܝܕܽܘܬܳܟ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܒܟܽܠ ܫܶܡ ܡܰܪܝܰܡ ܐܶܬܩܰܠܣܰܬ

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܰܒܝܰܠܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܰܒܝܰܠܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܒܰܡܥܰܪܬܳܐ ܒܽܐܘܪܝܳܐ ܪܡܶܐ ܗ̱ܘܳܐ܆ ܗܰܘ ܚܰܝܠܳܐ ܕܰܬܩܰܠ ܛܽܘܪ̈ܶܐ܆ ܘܰܚܠܳܦ ܐܶܣܛܰܠ ܡܰܠܟܽܘܬܳܐ܆ ܒܥܰܙܪܽܘܪ̈ܶܐ ܫܺܝ̈ܛܶܐ ܟܪܺܝܟ ܗ̱ܘܳܐ܆ ܪܶܡܙܶܗ ܡܕܰܒܰܪ ܒܶܪ̈ܝܳܬܳܐ܆ ܘܝܳܢܶܩ ܚܰܠܒܳܐ ܐܰܝܟ ܫܰܒܪܳܐ܀

ܫܽܘܒܚܳܐ ܠܳܗ̇ ܠܗܳܝ ܪܰܒܽܘܬܳܐ܆ ܕܰܣܦܰܩ ܠܳܗ̇ ܐܽܘܪܝܳܐ ܙܥܽܘܪܳܐ܆ ܘܚܰܠܒܳܐ ܝܺܢܶܩ ܐܰܝܟ ܫܰܒܪܳܐ܆ ܥܳܒܽܘܕܳܐ ܕܟܽܠ ܒܶܪ̈ܝܳܬܳܐ܆ ܠܶܗ ܫܽܘܒܚܳܐ ܘܠܰܐܒܳܐ ܕܫܰܠܚܶܗ܆ ܘܰܠܪܽܘܚ ܩܽܘܕܫܳܐ ܒܟܽܠܥܶܕܳܢ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܰܒܝܰܠܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܰܒܝܰܠܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀