ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܥܰܡ ܗܳܢܽܘܢ ܕܰܠܥܶܠ

ܒܝܽܘܡ ܝܰܠܕܶܗ ܕܰܒܪܳܐ: ܗܳܐ ܚܳܕܶܝܢ ܫܡܰܝܳܐ ܘܰܐܪܥܳܐ ܘܙܳܡܪܺܝܢ ܫܽܘܒܚܳܐ: ܠܰܐܒܳܐ ܕܫܰܕܰܪ ܠܰܒܪܶܗ ܠܦܽܘܪܩܳܢܰܢ: ܘܠܶܗ ܬܶܫܒܽܘܚܬܳܐ܀

ܡܓܽܘ̈ܫܶܐ ܒܢܰܝ̈ ܦܳܪܶܣ܆ ܩܽܘܪ̈ܒܳܢܶܐ ܛܥܶܢܘ ܘܰܐܝܬܺܝܘ ܠܰܒܪܳܐ ܒܽܘܟܪܳܐ܆ ܘܥܰܠܘ ܘܰܣܓܶܕܘ ܠܶܗ ܘܶܐܡܰܪܘ܆ ܠܳܟ ܬܶܫܒܽܘܚܬܳܐ܀

ܕܰܗܒܳܐ ܥܰܡ ܡܽܘܪܳܐ: ܘܰܠܒܽܘܢܬܳܐ ܥܰܡ ܬܶܫܒܽܘܚܬܳܐ ܡܓܽܘ̈ܫܶܐ ܩܰܪܶܒܘ: ܒܝܽܘܡ ܡܰܘܠܳܕܳܟ ܡܶܠܬܳܐ ܐܰܠܳܗܳܐ: ܘܠܳܟ ܬܶܫܒܽܘܚܬܳܐ܀

ܒܠܺܠܝܳܐ ܣܰܒܰܪ ܗ̱ܘܳܐ: ܡܰܠܰܐܟܳܐ ܠܪ̈ܳܥܰܘܳܬܳܐ: ܕܶܐܬܺܝܠܶܕ ܠܟܽܘܢ ܡܳܪܝܳܐ ܡܫܺܝܚܳܐ ܒܰܡܕܺܝܢ̱ܬܶܗ ܕܕܰܘܺܝܕ: ܙܡܰܪܘ ܠܶܗ ܬܶܫܒܽܘܚܬܳܐ܀

ܫܽܘܒܚܳܐ

ܥܰܠ ܡܰܕܒܰܚ ܩܽܘܕܫܳܐ: ܢܗܶܐ ܕܽܘܟܪܳܢܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ: ܕܶܐܟܰܠܘ ܦܰܓܪܳܟ ܩܰܕܺܝܫܳܐ: ܘܶܐܫܬܺܝܘ ܠܰܕܡܳܟ ܘܠܳܟ ܬܶܫܒܽܘܚܬܳܐ܀

ܐ̱ܚܪܺܢܳܐ

ܡܓܽܘ̈ܫܶܐ ܒܢܰܝ̈ ܦܳܪܶܣ܆ ܩܽܘܪ̈ܒܳܢܶܐ ܛܥܶܢܘ ܘܰܐܝܬܺܝܘ ܠܰܒܪܳܐ ܒܽܘܟܪܳܐ܆ ܘܥܰܠܘ ܘܰܣܓܶܕܘ ܠܶܗ ܘܶܐܡܰܪܘ܆ ܠܳܟ ܬܶܫܒܽܘܚܬܳܐ܀

ܡܶܢ ܦܳܪܶܣ ܘܰܐܝܬܺܝܘ܆ ܩܽܘܪ̈ܒܳܢܶܐ ܠܰܐܠܳܗܽܘܬܳܟ ܪܳܚܶܡ ܐ̱ܢܳܫ̈ܳܐ܆ ܘܥܺܕܬܳܐ ܡܝܰܩܪܳܐ ܠܝܰܘܡܳܐ ܕܡܰܘܠܳܕܳܟ܆ ܠܳܟ ܬܶܫܒܽܘܚܬܳܐ܀

ܢܽܘܗܪܳܐ ܕܡܶܢ ܢܽܘܗܪܳܐ܆ ܝܰܠܕܶܗ ܕܰܐܒܳܐ ܡܬܽܘܡܳܝܳܐ ܡܰܘܕܶܝܢܰܢ ܠܳܟ܆ ܕܰܨܒܰܝܬ ܒܚܽܘܒܳܟ ܘܰܗܘܰܝܬ ܒܰܪܢܳܫܳܐ܆ ܠܳܟ ܬܶܫܒܽܘܚܬܳܐ

ܫܽܘܒܚܳܐ

ܒܪܳܐ ܗܰܘ ܕܶܐܬܺܝܠܶܕ܆ ܡܶܢ ܡܰܪܝܰܡ ܕܠܳܐ ܙܽܘܘܳܓܳܐ ܦܰܓܪܳܢܳܐܺܝܬ܆ ܐܰܦܪܳܐ ܒܦܽܘ̈ܡܰܝܢ ܫܽܘܒܚܳܐ ܘܬܰܘܕܺܝܬܳܐ܆ ܕܰܢܩܰܪܶܒ ܠܳܟ ܒܝܽܘܡ ܡܰܘܠܳܕܳܟ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܩܽܘܩܳܝܳܐ
ܚܕܳܐ ܛܠܺܝܬܳܐ ܡܶܢ ܒܶܝܬ ܕܰܘܺܝܕ

ܒܗܳܢ ܠܺܠܝܳܐ ܟܰܕ ܕܰܡܺܝܟܺܝܢ ܪ̈ܳܥܰܘܳܬܳܐ܆ ܢܚܶܬ ܨܶܐܕܰܝܗܽܘܢ ܡܰܠܰܐܟܳܐ ܘܰܫܠܳܡܳܐ ܝܰܗ̱ܒ ܠܗܽܘܢ܆ ܫܠܳܡܳܐ ܥܰܡܗܽܘܢ܆ ܕܐ̱ܢܳܫ̈ܳܐ ܡܰܟܺܝ̈ܟܶܐ܆ ܫܰܝܢܳܐ ܒܰܐܪܥܳܐ܆ ܫܠܳܡܳܐ ܒܰܫܡܰܝܳܐ܆ ܕܰܐܠܳܗܳܐ ܘܒܰܪ ܐܰܠܳܗܳܐ ܝܶܠܕܰܬ ܡܰܪܝܰܡ܆ ܘܗܳܐ ܙܳܡܪ̈ܳܢ ܠܶܗ ܬܶܫܒܽܘܚܬܳܐ ܒܶܪ̈ܝܳܬܳܐ ܟܽܠܗܶܝܢ܆ ܗ̄ܘܗ̄܀

ܐܶܢ ܛܳܠܶܡ ܐ̱ܢܳܐ ܠܡܰܘܠܳܕܳܟ ܡܰܚܪܰܡ ܗ̱ܽܘ ܠܶܫܳܢܝ܆ ܘܰܐܝܢܳܐ ܕܰܦܠܺܝܓ ܥܰܠ ܝܰܠܕܳܟ ܢܽܘܟܪܳܝܳܐ ܚܫܺܝܒ ܠܺܝ܆ ܡܰܘܕܶܐ ܐ̱ܢܳܐ ܡܳܪܝ܆ ܕܡܶܢ ܐܰܒܳܐ ܐܺܝܬܰܝܟ܆ ܘܰܡܗܰܝܡܶܢ ܐ̱ܢܳܐ܆ ܕܡܰܪܝܰܡ ܝܺܠܶܕܬܳܟ܆ ܡܶܢ ܐܰܒܳܐ ܐܰܢ̱ܬ ܘܡܶܢ ܡܰܪܝܰܡ ܚܰܕ ܝܺܚܺܝܕܳܐ܆ ܚܰܕ ܐܺܝܬܰܝܟ ܘܠܳܟ ܩܳܥܶܝܢܰܢ ܕܠܳܟ ܫܽܘܒܚܳܐ ܡܳܪܝܳܐ܆ ܗ̄ܘܗ̄܀

ܫܽܘܒܚܳܐ

ܥܰܠ ܓܺܝ̈ܓܠܰܝ ܢܽܘܪܳܐ ܝܶܠܕܶܬ ܐܶܡܪܰܬ ܡܰܪܝܰܡ܆ ܘܥܰܠ ܓܶܦܰܝ̈ܗܽܘܢ ܕܰܣܪ̈ܳܦܶܐ ܢܩܰܫ ܠܺܝ ܒܶܪܝ ܡܰܫܟܢܳܐ܆ ܐܶܢܳܐ ܓܶܠܳܐ܆ ܘܝܶܠܕܶܬ ܓܰܘܙܰܠܬܳܐ܆ ܘܰܗܘܳܬ ܡܥܰܪܬܳܐ܆ ܫܡܰܝܳܐ ܕܪ̈ܽܘܚܳܢܶܐ܆ ܥܽܘܠ ܝܰܘܣܶܦ ܘܰܚܙܺܝ ܟܪ̈ܽܘܒܶܐ ܕܰܟܪܺܝܟܺܝܢ ܠܽܐܘܪܝܳܐ܆ ܩܥܺܝ ܥܰܡܗܽܘܢ ܩܰܕܺܝܫ ܩܰܕܺܝܫ ܩܰܕܺܝܫܰܬ ܡܳܪܝܳܐ܆ ܗ̄ܘܗ̄܀

ܐ̱ܚܪܺܢܳܐ

ܩܳܠܳܐ ܒܩ̄: ܬܗܰܪ ܓܰܒܪܺܐܶܝܠ
ܐܺܡܪܳܟ ܡܳܪܰܢ ܐܰܝܟ ܕܺܐܝܬܰܝܟ

ܗܳܐ ܡܰܠܰܐܟ̈ܶܐ. ܟܪܺܝܟܺܝܢ ܠܽܐܘܪܝܳܐ ܒܰܡܥܰܪܬܳܐ܆ ܒܓܰܘ ܒܶܝܬ ܠܚܶܡ ܕܺܝܗܽܘܕܳܐ܆ ܕܒܳܗ̇ ܐܶܬܺܝܠܶܕ ܦܳܪܽܘܩܰܢ܆ ܒܡܰܟܺܝܟܽܘܬܳܐ ܘܫܺܝܛܽܘܬܳܐ ܪܰܒܬܳܐ܆ ܘܰܟܪ̈ܽܘܒܶܐ ܕܢܽܘܪܳܐ ܘܪܽܘܚܳܐ܆ ܘܰܣܪ̈ܳܦܶܐ ܕܶܫܬܳܐ ܓܶܦܺܝ̈ܢ܆ ܩܳܥܶܝܢ ܗ̱ܘܰܘ ܘܳܐܡܪܺܝܢ܆ ܩܰܕܺܝܫ ܩܰܕܺܝܫ ܩܰܕܺܝܫܰܬ܆ ܒܪܳܐ ܕܶܐܬܺܝܠܶܕ ܡܶܢ ܡܰܪܝܰܡ܆ ܡܶܛܽܠ ܦܽܘܪܩܳܢܶܗ ܕܳܐܕܳܡ܀

ܫܽܘܒܚܳܐ

ܝܶܫܽܘܥ ܢܽܘܗܪܳܐ܆ ܐܶܬܺܝܠܶܕ ܡܶܢ ܒܰܪ̱ܬ ܕܰܘܺܝܕ܆ ܒܰܡܥܰܪܬܳܐ ܒܓܰܘ ܒܶܝܬ ܠܚܶܡ܆ ܐܰܝܟ ܕܶܐܬܢܰܒܺܝ ܗ̱ܘܳܐ ܡܺܝܟܳܐ܆ ܕܡܶܢܶܟܝ ܢܳܦܶܩ ܡܰܠܟܳܐ ܘܦܳܪܽܘܩܳܐ܆ ܘܪܳܥܝܳܐ ܕܪܳܥܶܐ ܠܺܝܣܪܳܐܶܝܠ܆ ܕܥܰܠ ܛܽܘܪ̈ܶܐ ܐܶܬܒܰܕܰܪܘ ܗ̱ܘܰܘ܆ ܘܠܰܐܠܳܗܳܐ ܠܳܐ ܝܺܕܰܥܘ ܗ̱ܘܰܘ܆ ܗܳܐ ܕܢܰܚ ܡܰܠܟܳܐ ܐܰܝܟ ܕܶܐܡܰܪ܆ ܘܦܳܪܽܘܩܳܐ ܐܰܝܟ ܕܶܐܬܢܰܒܺܝ܆ ܘܕܶܢܚܰܬ ܒܓܶܠܝܳܐ ܢܒܺܝܽܘܬܶܗ܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܗܳܢܰܘ ܝܰܪܚܳܐ܆ ܕܰܛܥܺܝܢ ܟܽܠܶܗ ܟܽܠ

ܥܽܘܢܺܝܬܳܐ: ܠܳܟ ܬܶܫܒܽܘܚܬܳܐ܆ ܝܰܠܕܳܐ ܦܰܐܝܳܐ ܕܰܒܬܽܘܠܽܘܬܳܐ.

ܗܳܢܰܘ ܝܰܪܚܳܐ܆ ܕܰܛܥܺܝܢ ܟܽܠܶܗ ܟܽܠ ܚܰܕܘ̈ܳܬܳܐ܆ ܚܽܘܪܳܪ ܥܰܒ̈ܕܶܐ. ܚܽܘܬܳܪ ܚܺܐܪ̈ܶܐ܆ ܟܽܘܠܳܠ ܬܰܪ̈ܥܶܐ. ܦܽܘܢܳܩ ܦܰܓܪ̈ܶܐ܆ ܐܳܦ ܐܰܪ̈ܓܘܳܢܶܐ܆ ܫܳܕܶܐ ܒܚܽܘܒܶܗ ܐܰܝܟ ܕܥܰܠ ܡܰܠ̈ܟܶܐ܀

ܒܗܳܢܳܐ ܝܰܪܚܳܐ܆ ܓܢܰܘ ܒܶܗ ܥܰܒ̈ܕܶܐ ܥܰܠ ܬܰܫ̈ܘܝܳܬܳܐ܆ ܘܰܓܢܰܘ ܚܺܐܪ̈ܶܐ ܥܰܠ ܐܳܡ̈ܶܠܶܐ܆ ܘܰܓܢܰܘ ܡܰܠ̈ܟܶܐ ܥܰܠ ܡܺܝ̈ܠܳܬܳܐ܆ ܒܽܐܘܪܝܳܐ ܓܢܳܐ ܗ̱ܘܳܐ܆ ܡܳܪܳܐ ܕܟܽܠܗܶܝܢ ܡܶܛܽܠ ܟܽܠܳܐ܀

ܢܶܪܕܽܘܦ ܟܽܠ ܐ̱ܢܳܫ܆ ܡܰܐܺܝܢܽܘܬܳܐ ܕܠܳܐ ܡܶܢܰܬ ܠܳܗ̇܆ ܠܗܳܝ ܪܰܒܽܘܬܳܐ. ܕܬܶܫܪܶܐ ܒܟܰܪܣܳܐ܆ ܝܰܪ̈ܚܶܐ ܬܶܫܥܳܐ ܡܶܛܽܠܳܬܰܢ܆ ܘܬܶܗܘܶܐ ܫܢܰܝ̈ܳܐ. ܬܠܳܬܺܝܢ ܒܰܣܕܽܘܡ ܒܰܝܢܳܬ ܦܰܩܪ̈ܶܐ܀

ܒܩ̈ܳܠܶܐ ܚܣܺܝ̈ܡܶܐ܆ ܪܶܬܡܰܬ ܡܰܪܝܰܡ ܐܳܦ ܢܰܨܰܪܬܶܗ܆ ܡܰܢܽܘ ܝܰܗ̱ܒ ܠܳܗ̇ ܠܰܡܓܰܙܰܝܬܳܐ܆ ܕܬܶܒܛܰܢ ܬܺܐܠܰܕ ܚܰܕ ܣܰܓܺܝ̈ܶܐܐ܆ ܕܨܶܐܕܰܝ ܟܽܠܶܗ܆ ܘܒܰܐܒܽܘܗ̱ܝ ܟܽܠܶܗ ܒܪܺܝܟ ܐܺܝܩܳܪܶܗ܀

ܐܶܬܳܐ ܙܟܰܪܝܳܐ ܘܰܦܬܰܚ ܦܽܘܡܶܗ ܙܰܗܝܳܐ ܘܩܳܥܶܐ܆ ܕܰܐܝܟܰܘ ܡܰܠܟܳܐ ܕܡܶܛܽܠܳܬܶܗ܆ ܝܶܠܕܶܬ ܩܳܠܳܐ ܕܢܰܟܪܶܙ ܩܽܘܕܡܰܘܗ̱ܝ܆ ܫܠܳܡ ܒܰܪ ܡܰܠܟܳܐ. ܕܳܐܦ ܟܽܘܡܪܽܘܬܰܢ ܠܳܟ ܡܶܬܝܰܗܒܳܐ܀

ܐܳܦ ܗܶܪܳܘܕܶܣ܆ ܬܰܥܠܳܐ ܫܺܝܛܳܐ ܕܡܶܙܕܰܪܟܰܠ ܗ̱ܘܳܐ܆ ܒܕܽܘܟܰܬ ܐܰܪܝܳܐ ܬܰܥܠܳܐ ܪܒܰܥ ܗ̱ܘܳܐ܆ ܐܰܝܠܶܠ ܕܰܫܡܰܥ ܢܶܗܡܰܬ ܐܰܪܝܳܐ܆ ܐܶܬܳܐ ܕܢܶܪܒܰܥ܆ ܥܰܠ ܡܰܠܟܽܘܬܳܐ ܐܰܟܡܳܐ ܕܰܟܬܺܝܒ܀

ܡܶܢ ܡܰܠܟܺܝܙܕܶܩ܆ ܟܽܘܡܪܳܐ ܪܰܒܳܐ ܐ̱ܬܳܐ ܠܳܟ ܙܽܘܦܳܐ܆ ܘܟܽܘܪܣܝܳܐ ܘܬܳܓܳܐ ܡܶܢ ܒܶܝܬ ܕܰܘܺܝܕ܆ ܓܶܢܣܳܐ ܘܛܽܘܗܡܳܐ ܡܶܢ ܐܰܒܪܳܗܳܡ܆ ܐܰܠܳܗܽܘܬܳܐ܆ ܡܶܢ ܒܶܝܬ ܐܰܒܽܘܟ ܕܠܳܐ ܫܽܘܪܳܝܳܐ܀

ܒܳܟ ܐܶܫܬܰܝܰܢ܆ ܟܰܪܡܶܗ ܕܚܰܒܺܝܒ ܕܝܰܗ̱ܒ ܚܰܪ̈ܽܘܒܶܐ܆ ܐܰܛܥܶܢ ܓܽܘ̈ܦܢܰܘܗ̱ܝ ܡܶܢ ܢܶܨ̈ܒܳܬܳܟ܆ ܢܶܛܥܰܢ ܟܽܠܶܗ ܡܶܢ ܒܽܘܪ̈ܟܳܬܳܟ܆ ܦܺܐܪܶܗ ܢܪܰܥܶܐ܆ ܠܡܳܪܶܐ ܟܪ̈ܽܘܒܶܐ ܕܶܐܬܠܰܚܰܡ ܠܶܗ܀

ܢܚܶܬܘ ܡܰܠܰܐܟ̈ܶܐ܆ ܠܓܰܘ ܒܶܝܬ ܠܚܶܡ ܕܰܢܫܰܒܚܽܘܢܳܝܗ̱ܝ܆ ܠܰܒܪܳܐ ܒܽܘܟܪܳܐ ܘܝܰܒܶܒܘ ܬܰܡܳܢ܆ ܟܶܢ̈ܫܶܐ ܕܥܺܝܪ̈ܶܐ ܟܰܕ ܡܰܙܥܩܺܝܢ܆ ܫܰܝܢܳܐ ܒܰܐܪܥܳܐ܆ ܫܠܳܡܳܐ ܒܥܽܘܡܩܳܐ ܘܠܳܐܕܳܡ ܣܰܒܪܳܐ܀

ܛܽܘܒܳܐ ܠܫܳܗܪ̈ܶܐ܆ ܕܰܥܬܰܪܘ ܡܶܢܶܗ ܡܶܠܰܬ ܚܰܝ̈ܶܐ܆ ܚܶܣܕܰܐ ܗ̱ܘ ܪܰܒܳܐ ܟܰܕ ܚܳܙܶܐ ܐ̱ܢܳܫ܆ ܚܰܒܪܶܗ ܕܣܳܒܶܠ ܡܰܦܶܩ ܓܰܙܳܐ܆ ܘܗܽܘ ܒܒܶܝܬ ܓܰܙܳܐ܆ ܝܰܬܺܝܒ ܢܳܐܶܡ ܕܰܣܦܺܝܩ ܢܶܦܽܘܩ܀

ܒܝܰܠܕܶܗ ܕܰܒܪܳܐ܆ ܪܰܘܒܳܐ ܪܰܒܳܐ ܗܘܳܐ ܒܒܶܝܬ ܠܚܶܡ܆ ܟܰܕ ܢܚܶܬܘ ܥܺܝܪ̈ܶܐ ܘܫܰܒܰܚܘ ܠܰܒܪܳܐ܆ ܪܰܥܡܳܐ ܪܰܒܳܐ ܗܘܳܐ ܩܳܠܰܝ̈ܗܽܘܢ܆ ܒܗܰܘ ܩܳܠ ܫܽܘܒܚܳܐ܆ ܐ̱ܬܰܘ ܫܰܬܺܝ̈ܩܶܐ ܘܫܰܒܰܚܘ ܠܰܒܪܳܐ܀

ܐ̱ܬܰܘ ܐܰܟܳܪ̈ܶܐ܆ ܕܩܽܘܪܝܰܬ ܕܰܘܺܝܕ ܘܰܣܓܶܕܘ ܩܽܘܕܡܰܘܗ̱ܝ܆ ܘܟܰܕ ܡܶܬܦܰܨܚܺܝܢ ܐܶܬܢܰܒܺܝܘ ܠܶܗ܆ ܒܪܺܝܟ ܐܰܟܳܪܳܐ ܕܡܶܬܦܰܠܚܳܐ ܒܶܗ܆ ܐܰܪܥܳܐ ܚܶܛܰܘ̈ܗ̱ܝ܆ ܟܳܢܶܫ ܠܰܐܘܨܰܪ ܚܰܝ̈ܶܐ ܚܰܕ̱̈ܬܶܐ܀

ܩܪܶܒܘ ܘܰܣܓܶܕܘ ܠܶܗ܆ ܪ̈ܳܥܰܘܳܬܳܐ ܥܰܡ ܚܽܘܛܪ̈ܰܝܗܽܘܢ܆ ܘܫܰܐܠܘ ܒܰܫܠܳܡܶܗ ܟܰܕ ܡܶܬܢܰܒܺܝܢ܆ ܫܠܳܡܠܳܟ ܪܰܒܳܐ ܕܪ̈ܳܥܰܘܳܬܳܐ܆ ܚܽܘܛܪܶܗ ܕܡܽܘܫܶܐ܆ ܢܰܘܕܶܐ ܠܚܽܘܛܪܳܟ ܪܳܥܶܐ ܟܽܠܳܐ܀

ܐ̱ܬܰܘ ܢܰܓܳܪ̈ܶܐ܆ ܡܶܛܽܠ ܝܰܘܣܶܦ ܨܶܝܕ ܒܰܪ ܝܰܘܣܶܦ܆ ܒܪܺܝܟܽ ܗ̱ܘ ܝܰܠܕܳܟ ܪܺܝܫ ܢܰܓܳܪ̈ܶܐ܆ ܕܒܳܟ ܐܶܬܪܰܫܡܰܬ ܐܳܦ ܟܶܐܘܶܝܠܳܐ܆ ܘܒܳܟ ܐܶܬܪܰܟܰܒ܆ ܡܰܫܟܰܢ ܙܰܒܢܳܐ ܕܰܗܘܳܐ ܠܙܰܒܢܳܐ܀

ܢܰܘܕܽܘܢ ܠܳܟ ܕܶܝܢ܆ ܪ̈ܳܥܰܘܳܬܳܐ ܕܰܐܢ̱ܬܽ ܗ̱ܘ ܡܫܰܝܶܢ܆ ܕܺܐܒ̈ܶܐ ܘܶܐܡܪ̈ܶܐ ܒܓܰܘ ܡܰܪܥܺܝܬܳܟ܆ ܐܰܢ̱ܬܽ ܗ̱ܘ ܥܽܘܠܳܐ ܕܩܰܫܺܝܫ ܡܶܢ ܢܽܘܚ܆ ܘܰܛܠܶܐ ܡܶܢ ܢܽܘܚ܆ ܕܫܰܝܶܢ ܟܽܠܳܐ ܥܰܡ ܟܶܐܘܶܠܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܗܳܢܳܐ ܝܰܘܡܳܐ ܚܰܕܺܝ

ܥܽܘܢܺܝܬܳܐ: ܠܳܟ ܫܽܘܒܚܳܐ ܡܶܢ ܟܽܠ ܦܽܘ̈ܡܺܝܢ܆ ܒܗܳܢܳܐ ܝܰܘܡܳܐ ܕܡܰܘܠܳܕܳܟ.

ܒܬܽܘܠܬܳܐ ܓܶܝܪ ܝܰܘܡܳܢ ܝܶܠܕܰܬ܆ ܠܥܰܡܰܢܽܘܐܶܝܠ ܒܒܶܝܬ ܠܚܶܡ܆ ܩܳܠܳܐ ܕܡܰܠܶܠ ܐܶܫܰܥܝܳܐ܆ ܝܰܘܡܳܢܳܐ ܗܘܳܐ ܦܽܘܫܳܩܶܗ܀

ܢܚܶܬ ܬܽܘܒ ܫܽܘܦܪܳܐ ܥܶܠܳܝܳܐ܆ ܘܰܐܨܡܰܚ ܢܽܘܗܪܳܐ ܡܶܢ ܦܰܓܪܳܐ܆ ܕܶܢܚܳܐ ܕܰܐܡܺܝܪ ܒܰܙܟܰܪܝܳܐ܆ ܝܰܘܡܳܢܳܐ ܕܢܰܚ ܒܒܶܝܬ ܠܚܶܡ܀

ܡܶܠܬܳܐ ܕܡܰܠܶܠ ܗ̱ܘܳܐ ܡܺܝܟܳܐ܆ ܝܰܘܡܳܢܳܐ ܗܘܳܬ ܒܰܥܒܳܕܳܐ܆ ܕܪܳܥܝܳܐ ܢܦܰܩ ܡܶܢ ܐܳܦܰܪܬܳܐ܆ ܘܰܪܥܳܐ ܒܚܽܘܛܪܶܗ ܢܰܦ̈ܫܳܬܳܐ܀

ܡܰܢܽܘ ܣܳܦܶܩ ܕܰܢܫܰܒܰܚ܆ ܠܰܒܪܳܐ ܒܽܘܟܪܳܐ ܕܰܕܢܰܚ ܠܰܢ܆ ܕܠܶܗ ܐܶܬܪܰܓܪܰܓܘ ܙܰܕܺܝ̈ܩܶܐ܆ ܕܰܒܕܳܪ̈ܰܝܗܽܘܢ ܢܶܚܙܽܘܢܳܝܗ̱ܝ܀

ܗܳܒܶܝܠ ܠܶܗ ܐܶܬܪܰܓܪܰܓ ܗ̱ܘܳܐ܆ ܕܰܒܝܰܘ̈ܡܳܬܶܗ ܢܺܐܬܶܐ ܗ̱ܘܳܐ܆ ܕܰܚܠܳܦ ܐܶܡܪܳܐ ܕܩܰܪܶܒ ܗ̱ܘܳܐ܆ ܢܶܚܙܶܐ ܠܶܐܡܪܶܗ ܕܰܐܠܳܗܳܐ܀

ܡܰܠܟܳܐ ܟܣܶܐ ܗ̱ܘܳܐ ܒܺܝܗܽܘܕܳܐ܆ ܓܢܰܒܬܶܗ ܬܳܡܳܪ ܡܶܢ ܚܰܨܶܗ܆ ܝܰܘܡܳܢܳܐ ܕܢܰܚ ܢܶܨܚܳܢܶܗ܆ ܕܫܽܘܦܪܳܐ ܕܪܶܚܡܰܬ ܟܰܣܝܽܘܬܶܗ܀

ܐܰܪܥܳܐ ܒܬܽܘܠܬܳܐ ܝܶܠܕܰܬ ܗ̱ܘܳܬ܆ ܠܗܰܘ ܐܳܕܳܡ ܪܺܝܫܳܗ̇ ܕܰܐܪܥܳܐ܆ ܘܰܒܬܽܘܠܬܳܐ ܝܰܘܡܳܢ ܝܶܠܕܰܬ܆ ܠܳܐܕܳܡ ܪܺܝܫܳܗ̇ ܕܰܫܡܰܝܳܐ܀

ܐܰܥܶܠ ܐܳܕܳܡ ܠܰܒܪܺܝܬܳܐ܆ ܫܶܢܰܬ ܡܰܘܬܳܐ ܒܰܚܛܳܗܰܝ̈ܢ܆ ܢܚܶܬ ܠܶܗ ܥܺܝܪܳܐ ܕܰܐܥܺܝܪܰܢ܆ ܡܶܢ ܛܽܘܒܳܥܳܐ ܕܰܚܛܺܝܬܳܐ܀

ܒܠܺܠܝܳܐ ܗܳܢܳܐ ܕܫܽܘܒܩܳܢܳܐ܆ ܠܳܐ ܢܶܬܒܰܥ ܒܶܗ ܣܰܟܠܽܘܬܳܐ܆ ܒܗܳܢܳܐ ܝܰܘܡܳܐ ܕܚܰܕܘ̈ܳܬܳܐ܆ ܠܳܐ ܢܶܥܒܰܕ ܒܶܗ ܒܺܝ̈ܫܳܬܳܐ܀

ܥܺܝܪ̈ܶܐ ܝܰܘܡܳܢ ܗܳܐ ܚܳܕܶܝܢ܆ ܕܶܐܬܳܐ ܥܺܝܪܳܐ ܕܰܢܥܺܝܪܰܢ܆ ܒܗܳܢܳܐ ܒܠܺܠܝܳܐ ܡܰܢ ܢܶܕܡܰܟ܆ ܕܥܺܝܪܳܐ ܒܶܗ ܒܪܺܝܬܳܐ ܟܽܠܳܗ̇܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܘܕܰܘ ܥܰܡ̱̈ܡܶܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܕܢܰܚ ܒܪ̈ܰܚܡܰܘܗ̱ܝ܆ ܡܶܢ ܒܰܪ̱ܬ ܕܰܘܺܝܕ ܒܬܽܘܠܬܳܐ.

ܐܰܘܕܰܘ ܥܰܡ̱̈ܡܶܐ ܒܥܺܐܕܳܐ܆ ܘܪܺܝܫ ܥܰܕ̈ܥܺܐܕܶܐ ܟܽܠܗܽܘܢ܆ ܬܰܢܰܘ ܚܰܫ̈ܶܐ ܕܺܐܝܬ ܒܶܗ܆ ܘܰܚܒܳܪ̈ܳܬܳܐ ܘܡܽܘ̈ܡܶܐ܆ ܕܢܶܚܙܶܐ ܐܰܝܕܳܐ ܡܚܽܘܬܳܐ܆ ܐܰܣܺܝ ܝܰܠܕܳܐ ܕܶܐܫܬܠܰܚ܆ ܒܪܺܝܟܽ ܗ̱ܘ ܕܰܣܦܰܩ ܠܟܺܐܒܰܝ̈ܢ܀

ܕܟܺܝܬܳܐ ܡܰܪܝܰܡ ܬܫܰܒܰܚ܆ ܠܰܒܪܳܐ ܕܰܕܢܰܚ ܒܪ̈ܰܚܡܰܘܗ̱ܝ܆ ܡܶܢ ܗܰܘ ܥܽܘܒܳܐ ܒܬܽܘܠܳܐ܆ ܕܠܳܐ ܙܽܘܘܳܓܳܐ ܘܢܶܩܦܳܐ܆ ܐܶܡܳܐ ܕܝܶܠܕܰܬ ܒܬܶܗܪܳܐ܆ ܠܡܰܘܠܶܕ ܓܶܢ̈ܣܶܐ ܘܛܽܘ̈ܗܡܶܐ܆ ܒܪܺܝܟܽ ܗ̱ܘ ܕܛܰܗܡܰܢ ܥܰܡܶܗ܀

ܓܕܰܠܘ ܗ̱ܘܰܘ ܝܰܪ̈ܚܶܐ ܬܠܳܬܳܐ܆ ܘܰܒ̈ܢܶܨܚܳܢܶܐ ܟܰܠܠܽܘܗ̱ܝ܆ ܒܪܺܝܟܽ ܗ̱ܘ ܕܫܰܡܶܫܘ ܠܝܰܠܕܶܗ܆ ܘܰܠܢܽܘܚܳܡܶܗ ܦܨܺܝܚܳܐ܆ ܘܰܠܣܽܘܠܳܩܶܗ ܪܓܺܝܓܳܐ܆ ܟܠܺܝ̈ܠܶܐ ܛܥܶܢܘ ܗ̱ܘܰܘ ܘܟܰܠܠܽܘܗ̱ܝ܆ ܒܪܺܝܟܽ ܗ̱ܘ ܕܰܢܨܰܚ ܒܪ̈ܰܚܡܰܘܗ̱ܝ܀

ܬܰܪܺܝܡ ܩܳܠܳܗ̇ ܕܟܺܝܬܳܐ܆ ܘܠܳܟ ܡܳܪܝ ܬܰܘܕܶܐ ܒܪܶܚܡܬܳܐ܆ ܕܚܽܘܒܳܟ ܢܰܓܕܳܟ ܕܬܺܐܬܶܐ܆ ܘܬܶܫܪܶܐ ܒܥܽܘܒܳܐ ܒܬܽܘܠܳܐ܆ ܘܬܶܦܽܘܩ ܡܶܢܶܗ ܠܓܶܠܝܳܐ܆ ܘܬܶܦܪܽܘܩ ܡܶܢܶܗ ܠܓܶܢܣܰܢ܆ ܒܪܺܝܟܽ ܗ̱ܘ ܟܰܣܝܳܐ ܕܣܰܝܒܪܰܢ܀

ܐܶܢ ܥܰܠ ܒܽܘܪ̈ܟܰܝ ܛܥܶܢܬܶܗ܆ ܘܠܳܐ ܩܰܪܒܶܬ ܠܶܗ ܕܪܳܫܳܐ܆ ܗܳܫܳܐ ܕܰܪܟܺܝܒ ܟܪ̈ܽܘܒܶܐ܆ ܘܙܳܝܥܺܝܢ ܡܶܢܶܗ ܣܪ̈ܳܦܶܐ܆ ܘܰܐܝܢܳܐ ܕܡܰܡܪܰܚ ܕܢܶܒܨܶܐ܆ ܟܡܳܐ ܟܰܝ ܢܶܒܠܰܥ ܡܚܺܝܠܳܐ܆ ܒܪܺܝܟܽ ܗ̱ܘ ܕܠܳܐ ܣܳܟ ܡܶܬܒܨܶܐ܀

ܦܽܘܡܳܗ̇ ܢܶܒܣܽܘܪ ܠܣܰܟ̈ܠܶܐ܆ ܕܠܳܟܽ ܗ̱ܘ ܡܩܰܪܒܺܝܢ ܕܪܳܫܳܐ܆ ܒܳܗ̇ ܢܶܬܒܰܠܡܽܘܢ ܣܳܦܪ̈ܶܐ܆ ܕܒܳܨܶܝܢ ܝܰܠܕܳܟ ܫܒܺܝܚܳܐ܆ ܢܶܬܰܐܘܽܘܢ ܒܳܗ̇ ܦܠܺܝ̈ܓܶܐ܆ ܕܝܶܠܕܰܬ ܟܰܕ ܠܳܐ ܚܟܺܝܡܳܐ܆ ܘܰܐܝܢܩܰܬ ܟܰܕ ܗܺܝ ܒܬܽܘܠܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܰܕܡܳܝܬܳܐ ܕܫܰܢ̱ܬܳܐ

ܥܽܘܢܺܝܬܳܐ: ܠܳܟ ܫܽܘܒܚܳܐ ܡܫܺܝܚܳܐ܆ ܕܶܐܬܰܝܬ ܠܡܰܘܠܳܕܳܐ.

ܩܰܕܡܳܝܬܳܐ ܕܫܰܢ̱ܬܳܐ܆ ܕܝܰܠܕܶܗ ܕܦܳܪܽܘܩܰܢ܆ ܪܺܝܫܳܐ ܗ̱ܝ ܕܛܳܒ̈ܳܬܳܐ܆ ܘܫܶܬܶܐܣܬܳܐ ܕܚܰܝ̈ܶܐ܆ ܗܺܝ ܗ̱ܝ ܛܥܺܝܢܳܐ ܗ̱ܘܳܬ܆ ܣܽܘܓܳܐܐ ܕܢܶܨ̈ܚܳܢܶܐ܆ ܘܣܳܟܳܐ ܕܥܽܘܕܪ̈ܳܢܶܐ܆ ܐܰܝܟ ܝܰܘܡܳܐ ܩܰܕܡܳܝܳܐ ܕܰܒܪܺܝܫܺܝܬ܆ ܥܰܡܽܘܕܳܐ ܪܰܒܳܐ ܕܒܶܪ̈ܝܳܬܳܐ܆ ܗܽܘܝܽܘ ܓܶܝܪ ܛܥܺܝܢ ܒܶܢܝܳܢܳܗ̇ ܕܰܒܪܺܝܬܳܐ܆ ܝܽܘܡ ܒܽܘܟܪܳܐ ܥܽܘܕܪ̈ܳܢܶܐ ܠܐ̱ܢܳܫܽܘܬܳܐ܀

ܝܰܘܡܳܐ ܩܰܕܡܳܝܳܐ܆ ܪܺܝܫܳܐ ܘܫܽܘܪܳܝܳܐ܆ ܛܽܘܦܣܰܐ ܗ̱ܘ ܕܥܶܩܳܪܳܐ܆ ܕܰܐܦܪܰܥ ܠܟܽܠܡܶܕܶܡ܆ ܝܰܘܡܶܗ ܕܦܳܪܽܘܩܰܢ܆ ܣܰܓܺܝ ܫܒܺܝܚ ܡܶܢܶܗ܆ ܕܰܢܨܺܝܒ ܒܓܰܘ ܬܺܒܶܝܠ܆ ܡܰܘܬܶܗ ܓܶܝܪ ܐܰܝܟ ܫܶܪܫܳܐ ܒܓܰܘ ܐܰܪܥܳܐ܆ ܘܢܽܘܚܳܡܳܐ ܐܰܝܟ ܪܺܝܫܳܐ ܠܰܫܡܰܝܳܐ܆ ܠܟܽܠܦܶܢ̈ܝܳܢ ܡܶܠܰܘ̈ܗ̱ܝ ܐܰܝܟ ܣܰܘ̈ܟܰܘܗ̱ܝ܆ ܘܰܐܝܟ ܦܺܐܪ̈ܶܐ ܦܰܓܪܶܗ ܠܳܐܟܽܘܠܰܘ̈ܗ̱ܝ܀

ܝܰܘܡܶܗ ܕܡܰܢܗܰܪ ܟܽܠ܆ ܦܨܺܝܚ ܗ̱ܽܘ ܒܡܰܘܠܳܕܶܗ܆ ܐܶܣܛܽܘܢ ܙܰܠܺܝ̈ܩܰܘܗ̱ܝ܆ ܕܰܪܕܰܦ ܒܙܰܗܪܺܝܪ̈ܰܘܗ̱ܝ܆ ܥ̈ܒܳܕܶܐ ܕܚܶܫܽܘܟܳܐ܆ ܒܛܽܘܦܣܶܗ ܕܗܰܘ ܝܰܘܡܳܐ܆ ܕܒܶܗ ܐܶܬܒܪܺܝ ܢܽܘܗܪܳܐ܆ ܘܣܰܕܩܶܗ ܠܚܶܫܽܘܟܳܐ܆ ܗܰܘ ܕܰܦܪܺܝܣ ܥܰܠ ܫܽܘܦܪܳܐ ܦܰܐܝܳܐ ܕܰܒܪܺܝܬܳܐ܆ ܙܰܠܺܝܩܳܐ ܕܡܰܘܠܳܕܶܗ܆ ܕܦܳܪܽܘܩܰܢ ܥܰܠ ܠܶܒܳܐ܀

ܝܰܘܡܳܐ ܬܪܰܝܳܢܳܐ܆ ܢܫܰܒܰܚ ܒܡܰܘܠܳܕܶܗ܆ ܕܰܒܪܳܐ ܬܪܰܝܳܢܳܐ܆ ܕܩܳܠܶܗ ܩܰܕܡܳܝܳܐ܆ ܪܩܺܝܥܳܐ ܦܩܰܕ ܘܰܗܘܳܐ܆ ܘܡܰܝ̈ܳܐ ܦܪܰܫ ܕܰܠܥܶܠ܆ ܘܡܰܝ̈ܳܐ ܦܪܰܫ ܕܰܠܬܰܚܬ܆ ܗܰܘ ܕܰܦܪܰܫ ܒܶܝܬ ܡܰܝ̈ܳܐ ܠܡܰܝ̈ܳܐ܆ ܡܶܢ ܥܺܝܪ̈ܶܐ ܦܪܰܚ ܘܰܢܚܶܬ ܨܶܝܕ ܐܰܪ̈ܥܳܢܶܐ܆ ܚܠܳܦ ܡܰܝ̈ܳܐ ܕܰܦܩܰܕ ܘܶܐܬܟܰܢܰܫܘ܆ ܡܰܒܽܘܥܳܐ ܕܚܰܝ̈ܶܐ ܬܪܰܥ ܘܰܐܫܩܺܝ܀

ܐܳܣܝܳܐ ܕܪ̈ܰܚܡܶܐ܆ ܕܶܐܫܬܰܕܰܪ ܠܰܐܬܪܳܐ ܣܢܺܝܩܳܐ܆ ܘܰܛܥܺܝܢ ܣܰܡ̱̈ܡܳܢܶܐ܆ ܢܽܘܗܪܳܐ ܠܚܶܫܽܘܟܳܐ܆ ܐܰܦܪܺܝ ܠܰܢ ܣܢܺܝ̈ܩܶܐ܆ ܡܶܠܬܳܐ ܡܶܢ ܓܽܘܫܡܳܐ܆ ܐܶܬܳܐ ܘܰܛܥܺܝܢ ܚܰܝ̈ܶܐ܆ ܐܰܚܝܰܢ ܒܡܽܘܟܳܟܶܗ܆ ܥܽܘܕܪ̈ܳܢܶܐ ܝܰܗ̱ܒ ܠܢܰܦ̈ܫܳܬܰܢ܆ ܘܠܳܐ ܫܒܰܩ ܒܳܐܣܝܽܘܬܶܗ ܟܽܘܪܗܳܢܳܐ܆ ܘܠܳܐ ܐܶܬܛܰܪܺܝܘ ܒܡܰܫܟܢܶܗ ܟܽܘܪ̈ܗܳܢܶܐ܀

ܫܢܰܬ ܕܰܫܢܰܬ ܬܰܪܬܶܝܢ܆ ܕܝܰܠܕܶܗ ܕܦܳܪܽܘܩܰܢ܆ ܡܓܽܘ̈ܫܶܐ ܦܨܺܝܚܺܝܢ ܒܳܗ̇܆ ܦܪ̈ܺܝܫܶܐ ܟܡܺܝܪܺܝܢ ܒܳܗ̇܆ ܓܰܙ̈ܶܐ ܦܨܺܝܚܺܝܢ ܒܳܗ̇܆ ܥܽܘ̈ܠܶܐ ܢܟܺܝܣܺܝܢ ܒܳܗ̇܆ ܒܳܗ̇ ܗ̱ܘ ܓܶܝܪ ܐܶܬܩܰܪܰܒܘ ܒܒܶܝܬ ܠܚܶܡ܆ ܩܽܘܪ̈ܒܳܢܶܐ ܪ̈ܓܺܝܓܶܐ ܘܫܰܦܺܝܪ̈ܶܐ܆ ܚܽܘܒܳܐ ܓܶܝܪ ܕܰܗܒܳܐ ܩܰܪܶܒ ܠܶܗ܆ ܘܰܚܣܳܡܳܐ ܒܝܰܠܽܘ̈ܕܶܐ ܣܰܝܦܳܐ܀

ܝܰܘܡܳܐ ܬܠܺܝܬܳܝܳܐ܆ ܟܠܺܝܠܳܐ ܕܡܰܙܡܽܘܪ̈ܶܐ܆ ܢܶܦܬܽܘܟ ܒܡܰܕܪܳܫܳܐ܆ ܘܢܰܘܫܶܛ ܒܚܰܕ ܩܳܠܳܐ܆ ܠܝܰܠܕܶܗ ܕܗܰܘ ܕܰܐܘܥܺܝ܆ ܦܰܩ̈ܚܶܐ ܘܗܰܒܳܒ̈ܶܐ܆ ܒܝܰܘܡܳܐ ܬܠܺܝܬܳܝܳܐ܆ ܗܳܢܳܐ ܕܶܝܢ ܗܽܘ ܟܽܠܶܗ ܡܰܘܥܶܐ ܟܽܠ܆ ܗܰܒܳܒܳܐ ܩܰܕܺܝܫܳܐ ܢܚܶܬ ܗ̱ܘܳܐ܆ ܡܶܢ ܐܰܪܥܳܐ ܨܗܺܝܬܳܐ ܫܘܰܚ ܘܰܣܠܶܩ܆ ܕܰܢܨܰܒܶܬ ܘܰܢܟܰܠܶܠ ܙܰܟܳܝ̈ܶܐ܀

ܝܰܘܡܳܐ ܪܒܺܝܥܳܝܳܐ܆ ܚܰܕ ܒܰܐܪܒܥܳܐ ܢܰܘܕܶܐ܆ ܠܝܰܠܕܶܗ ܕܗܰܘ ܕܰܒܪܳܐ ܒܝܰܘܡܳܐ ܪܒܺܝܥܳܝܳܐ܆ ܙܰܘܓܳܐ ܕܢܰܗܺܝܪ̈ܶܐ܆ ܕܰܠܗܽܘܢ ܣܢܰܘ ܣܰܟ̈ܠܶܐ܆ ܘܶܐܬܥܰܘܰܪܘ ܘܶܐܣܬܰܡܺܝܘ܆ ܢܚܶܬ ܠܳܗ̇ ܕܶܝܢ ܠܰܐܪܥܳܐ ܗܰܘ ܡܳܪܳܐ ܕܢܰܗܺܝܪ̈ܶܐ܆ ܘܰܐܝܟ ܫܶܡܫܳܐ ܡܶܢ ܟܰܪܣܳܐ ܐܰܙܠܶܓ ܠܰܢ܆ ܠܰܣ̈ܡܰܝܳܐ ܦܬܰܚܘ ܙܰܗܪܺܝܪ̈ܰܘܗ̱ܝ܆ ܘܙܰܠܺܝܩܰܘ̈ܗ̱ܝ ܐܰܢܗܰܪܘ ܠܛܳܥܰܝ̈ܳܐ܀

ܒܝܰܘܡܳܐ ܥܣܺܝܪܳܝܳܐ܆ ܢܫܰܒܰܚ ܒܡܶܢܝܳܢܶܗ܆ ܝܽܘܕ ܓܶܝܪ ܐܳܬܽܘܬܳܐ ܕܝܶܫܽܘܥ ܫܡܳܐ ܦܰܐܝܳܐ܆ ܥܶܣܪܳܐ ܗ̱ܝ ܒܡܶܢܝܳܢܳܐ܆ ܗܳܢܳܐ ܕܰܐܝܟ ܡܳܪܳܐ܆ ܡܰܗܦܶܟ ܠܡܶܢܝܳܢܳܐ܆ ܠܥܶܣܪܳܐ ܓܶܝܪ ܡܳܐ ܕܣܳܠܶܩ ܡܶܢܝܳܢܳܐ܆ ܗܳܦܶܟ ܠܶܗ ܬܽܘܒ ܡܶܢ ܚܰܕ ܕܰܢܫܰܪܶܐ܆ ܐܳܘ ܠܐ̱ܪܳܙܳܐ ܪܰܒܳܐ ܕܰܒܝܶܫܽܘܥ܆ ܕܚܰܝܠܶܗ ܡܰܗܦܶܟ ܠܡܶܢܝܳܢܳܐ܀

ܝܰܘܡܳܐ ܚܡܺܝܫܳܝܳܐ܆ ܢܫܰܒܰܚ ܠܗܰܘ ܕܰܒܪܳܐ܆ ܒܝܰܘܡܳܐ ܚܡܺܝܫܳܝܳܐ܆ ܪ̈ܰܚܫܳܐ ܘܬܰܢܺܝ̈ܢܶܐ܆ ܕܡܶܢ ܓܶܢܣܗܽܘܢ ܚܶܘܝܳܐ܆ ܢܟܰܠ ܐܰܛܥܝܳܗ̇ ܠܶܐܡܰܢ܆ ܫܒܰܪܬܳܐ ܕܠܳܐ ܠܶܒܳܐ܆ ܒܰܫܒܰܪܬܳܐ ܒܰܙܰܚ ܗ̱ܘܳܐ ܢܳܟܽܘܠܳܐ܆ ܘܡܶܢ ܝܰܘܢܳܐ ܐܶܬܦܰܪܣܺܝ ܙܺܐܦܳܢܳܐ܆ ܘܡܶܢ ܥܽܘܒܳܐ ܬܰܡܺܝܡܳܐ ܕܢܰܚ ܘܰܢܦܰܩ܆ ܚܰܟܺܝܡܳܐ ܕܪܰܨܶܗ ܠܬܰܢܺܝܢܳܐ܀

ܝܰܘܡܳܐ ܫܬܺܝܬܳܝܳܐ܆ ܢܫܰܒܰܚ ܠܗܰܘ ܕܰܒܪܳܐ܆ ܒܰܥܪܽܘܒܬܳܐ ܠܳܐܕܳܡ܆ ܕܒܺܝܫܳܐ ܚܣܰܡ ܗ̱ܘܳܐ ܒܶܗ܆ ܘܰܐܝܟ ܪܳܚܡܳܐ ܢܟܺܝܠܳܐ܆ ܐܰܦܨܰܚ ܘܰܐܘܫܶܛ ܠܶܗ܆ ܣܰܡܳܐ ܒܡܶܐܟܽܘܠܬܳܐ܆ ܣܰܡ ܚܰܝ̈ܶܐ ܐܶܬܦܪܶܣ ܠܰܬܪ̈ܰܝܗܽܘܢ܆ ܠܒܶܫ ܦܰܓܪܳܐ ܘܶܐܬܩܰܪܰܒ ܠܰܬܪ̈ܰܝܗܽܘܢ܆ ܡܳܝܽܘܬܳܐ ܕܛܰܥܡܶܗ ܚܝܳܐ ܒܶܗ܆ ܘܒܳܠܽܘܥܳܐ ܕܰܐܟܠܶܗ ܐܶܣܬܰܪܰܩ܀

ܝܰܘܡܳܐ ܫܒܺܝܥܳܝܳܐ܆ ܢܩܰܕܶܫ ܠܩܰܕܺܝܫܳܐ܆ ܕܰܠܫܰܒܬܳܐ ܩܰܕܶܫ܆ ܕܰܢܢܺܝܚ ܠܒܶܪ̈ܝܳܬܶܗ܆ ܛܳܒܳܐ ܕܠܳܐ ܠܳܐܶܐ܆ ܝܺܨܶܦ ܕܐ̱ܢܳܫܽܘܬܳܐ܆ ܘܝܺܨܶܦ ܕܚܰܝ̈ܘܳܬܳܐ܆ ܕܢܶܦܠܰܬ ܠܳܗ̇ ܚܺܐܪܽܘܬܳܐ ܬܚܶܝܬ ܢܺܝܪܳܐ܆ ܐܶܬܳܐ ܠܝܰܠܕܳܐ ܘܶܐܫܬܰܥܒܰܕ ܕܰܢܚܰܪܪܰܢ܆ ܒܠܰܥ ܦܰܟܳܐ ܕܥܰܒ̈ܕܶܐ ܒܶܝܬ ܕܺܝܢܳܐ܆ ܫܪܳܐ ܠܢܺܝܪܳܐ ܕܥܰܠ ܕܥܰܒ̈ܕܶܐ ܐܰܝܟ ܡܳܪܳܐ܀

ܒܽܘܟܪܳܐ ܡܕܰܟܶܐ ܟܽܠ܆ ܒܝܰܘܡܳܐ ܕܕܽܘܟܳܝܶܗ܆ ܕܰܟܝܳܗ̇ ܠܬܰܕܟܺܝܬܳܐ܆ ܕܒܽܘܟܪ̈ܶܐ ܕܶܐܬܩܰܪܰܒܘ܆ ܡܳܪܳܐ ܕܩܽܘܪ̈ܒܳܢܶܐ܆ ܐܶܨܛܒܺܝ ܕܩܽܘܪܒܳܢܳܐ ܢܩܰܪܶܒ ܕܦܳܪ̈ܚܳܬܳܐ܆ ܒܡܰܘܠܳܕܶܗ ܐܶܫܬܰܡ̈ܠܺܝ ܦ̈ܶܠܳܐܬܳܐ܆ ܒܬܰܕܟܺܝܬܶܗ ܘܰܓܙܽܘܪܬܶܗ ܕܡܰܘܬܳܐ܆ ܒܡܰܘܬܶܗ ܐܶܬܦܪ̈ܰܥܝ ܚܰܘ̈ܒܳܬܳܐ܆ ܒܢܽܘܚܳܡܶܗ ܣܠܶܩ ܫܰܕܰܪ ܣܺܝ̈ܡܳܬܳܐ܀

ܝܰܘܡܳܐ ܬܡܺܝܢܳܝܳܐ܆ ܕܰܓܙܰܪ ܠܥܶܒܪ̈ܳܝܶܐ܆ ܢܰܘܕܶܐ ܠܗܰܘ ܕܰܦܩܰܕ܆ ܠܗܰܘ ܒܰܪ ܫܡܶܗ ܝܶܫܽܘܥ܆ ܕܢܶܓܙܽܘܪ ܒܛܰܪܳܢܳܐ܆ ܠܥܰܡܳܐ ܕܰܓܙܺܝܪ ܦܰܓܪܶܗ܆ ܘܠܶܒܶܗ ܚܢܶܦ ܡܶܢ ܠܓܰܘ܆ ܗܳܐ ܒܝܰܘܡܳܐ ܬܡܺܝܢܳܝܳܐ܆ ܐܰܝܟ ܥܽܘܠܳܐ ܠܰܓܙܽܘܪܬܳܐ ܐܶܬܳܐ ܗ̱ܘܳܐ ܓܳܙܰܪ ܟܽܠ܆ ܟܰܕ ܐܳܬܶܗ ܕܰܐܒܪܳܡ ܥܰܠ ܒܶܣܪܶܗ܆ ܘܫܰܟܰܪܬܶܗ ܣܡܺܝܬܳܐ ܒܰܪ̱ܬ ܨܶܗܝܽܘܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܰܕܡܳܝܬܳܐ ܕܫܰܢ̱ܬܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ ܕܚܰܕܺܝ ܘܰܐܦܨܰܚ܆ ܒܝܽܘܡ ܡܰܘܠܳܕܶܗ ܠܥܺܕܰܬ ܩܽܘܕܫܳܐ ܕܒܶܗ ܐܶܬܦܰܪܩܰܬ.

ܛܽܘܒܰܝܟܝ ܥܺܕܬܳܐ܆ ܕܰܒܟܶܢܳܪܶܗ. ܗܳܐ ܙܳܡܰܪ ܒܶܟܝ ܕܰܘܺܝܕ ܡܰܠܟܳܐ. ܒܪܽܘܚܳܐ ܙܡܰܪ ܥܠܰܘܗ̱ܝ. ܕܒܶܪܝ ܐܰܢ̱ܬ ܘܶܐܢܳܐ. ܒܗܶܕܪ̈ܰܝ ܩܽܘܕܫܳܐ ܠܰܡ ܝܺܠܶܕܬܳܟ. ܛܽܘܒ ܠܶܐܕܢܰܝ̈ܟܝ ܕܶܐܬܡܪ̈ܶܩܝ ܕܢܶܫܡ̈ܥܳܢ. ܒܩ̈ܳܠܶܐ ܕܰܢܒܺܝ̈ܶܐ ܘܚܰܙܳܝ̈ܶܐ ܕܶܐܬܓܠܺܝܘ. ܒܶܟܽܝ ܗ̱ܘ ܐܶܬܓܡܰܪܘ. ܐ̱ܪ̈ܳܙܶܐ ܘܦ̈ܶܠܳܐܬܳܐ. ܕܰܗܘܰܘ ܒܰܥܒܳܕܳܐ܀

ܛܽܘܒܰܝܟܝ ܥܺܕܬܳܐ܆ ܕܟܽܠ ܩܽܘܪ̈ܒܳܢܺܝܢ܆ ܗܳܐ ܐܳܬܶܝܢ ܠܶܟܝ ܒܗܳܢܳܐ ܥܺܐܕܳܐ܆ ܡܓܽܘ̈ܫܶܐ ܚܕܳܐ ܙܒܰܢ ܒܶܝܬ ܢܳܟܽܘ̈ܠܶܐ܆ ܠܩܽܘܫܬܳܐ ܩܰܪܶܒܘ ܩܽܘܪ̈ܒܳܢܰܝܗܘܢ܆ ܛܽܘܒ ܠܕܰܝܪܶܟܝ ܕܶܐܬܪܟܶܢ ܘܒܳܗ̇ ܫܪܳܐ܆ ܒܰܪ ܡܰܠܟܳܐ ܕܶܐܣܬܓܶܕ ܒܕܳܫ̈ܢܶܐ. ܕܰܗܒܳܐ ܕܡܰܥܪܒܳܐ܆ ܘܗܶܪ̈ܽܘܡܶܐ ܕܡܰܕܢܚܳܐ. ܡܩܰܪܒܺܝܢ ܒܥܺܐܕܶܟܝ܀

ܛܽܘܒܰܝܟܝ ܥܺܕܬܳܐ܆ ܒܡܺܝܟܳܐ ܕܩܳܥܶܐ. ܕܪܳܥܝܳܐ ܢܳܦܶܩ ܡܶܢ ܐܳܦܰܪܬܳܐ. ܐ̱ܬܳܐ ܠܒܶܝܬ ܠܚܶܡ. ܕܢܶܣܰܒ ܡܶܢܳܗ̇. ܓܽܘܙܥܶܗ ܕܺܐܝܫܰܝ ܘܢܶܪܥܶܐ ܥܰܡ̱̈ܡܶܐ. ܛܽܘܒ ܠܥܶܪ̈ܒܰܝܟܝ ܕܶܐܬܪܫܶܡܘ ܒܪܽܘܫܡܶܗ. ܘܠܰܢܩܰܘ̈ܳܬܶܟܝ ܕܶܐܬܢܛܰܪ̈ܝ ܒܡܶܠܬܶܗ. ܐܰܢ̱ܬܺܝ ܗ̱ܝ ܥܺܕܬܳܐ. ܒܶܝܬ ܠܚܶܡ ܐܰܡܺܝܢܬܳܐ. ܕܒܶܟܝ ܗ̱ܽܘ ܠܚܶܡ ܚܰܝ̈ܶܐ܀

ܛܽܘܒܰܝܟܝ ܥܺܕܬܳܐ܆ ܕܗܳܐ ܕܳܐܶܨ ܒܶܟܝ. ܐܳܦ ܐܶܫܰܥܝܳܐ ܒܰܢܒܺܝܽܘܬܶܗ. ܕܗܳܐ ܠܰܡ ܒܬܽܘܠܬܳܐ܆ ܬܶܒܛܰܢ ܘܬܺܐܠܰܕ. ܝܰܠܕܳܐ ܕܡܶܬܩܪܶܐ ܫܡܶܗ ܕܽܘܡܳܪܳܐ. ܐܳܘ ܠܦܽܘܫܳܩܳܐ ܕܶܐܬܓܠܺܝ ܒܥܺܕܬܳܐ. ܘܰܬܪܶܝܢ ܫܡܳܗܺܝ̈ܢ ܕܶܐܬܚܰܝܰܕܘ ܘܚܰܕ ܗܘܰܘ. ܥܰܡܰܢܽܘܐܶܝܠ. ܥܰܡܶܟܝ ܗ̱ܽܘ ܒܟܽܠ ܙܒܰܢ. ܕܡܰܙܓܶܟܝ ܒܗܰܕܳܡܰܘ̈ܗܝ܀

ܛܽܘܒܰܝܟܝ ܐܰܢ̱ܬܬܳܐ܆ ܕܰܛܥܶܢ ܥܽܘܒܶܟܝ ܥܽܘܠܳܐ ܫܰܠܝܳܐ ܣܺܝܡܰܬ ܩ̈ܳܠܶܐ܆ ܝܺܕܰܥܬܳܐ ܕܡܶܢ ܠܒܰܪ. ܢܶܫܠܶܐ ܠܶܫܳܢܝ܆ ܘܚܰܝܠܶܗ ܒܳܨܶܐ ܟܽܠܒܶܪ̈ܝܳܬܳܐ܆ ܛܽܘܒ ܠܺܐܝ̈ܕܰܝܟܝ ܕܰܥܠܰܝܗܶܝܢ ܦܫܰܛ ܗ̱ܘܳܐ܆ ܗܰܘ ܦܰܓܪܳܐ ܩܺܝܬܳܪܳܐ ܕܚܶܟ̈ܡܳܬܳܐ܆ ܟܶܢܳܪܳܐ ܕܰܣܦܰܩ. ܘܰܙܡܰܪ ܠܟܰܣܝܽܘܬܳܐ܆ ܘܬܰܪܓܶܡ ܢܒܺܝܽܘܬܳܐ܀

ܛܽܘܒܰܝܟܝ ܡܰܪܝܰܡ܆ ܕܠܶܟܝ ܨܳܐܰܪ ܗ̱ܘܳܐ܆ ܗܰܘ ܐܺܝܠܳܢܳܐ. ܒܛܽܘܪܶܗ ܕܺܐܝܣܚܳܩ܆ ܕܝܰܗ̱ܒ ܗ̱ܘܳܐ ܐܶܡܪܳܐ ܕܢܶܗܘܶܐ ܕܶܒܚܳܐ܆ ܟܰܕ ܠܳܐ ܝܺܠܺܝܕ ܡܶܢ ܙܽܘܘܳܓܳܐ܆ ܒܬܽܘܠܳܐܺܝܬ ܝܺܠܶܕܬܶܗ ܣܰܘܟܬܳܐ܆ ܘܨܳܪ ܛܽܘܦܣܳܐ ܠܶܟܝ ܒܬܽܘܠܬܳܐ܆ ܕܺܝܠܶܕܬܝ ܕܠܳܐ ܢܶܩܦܳܐ܆ ܩܽܘܪܒܳܢܳܐ ܘܶܐܣܬܰܕܰܪ܆ ܥܠܳܬܳܐ ܒܓܳܓܽܘܠܬܳܐ܀

ܛܽܘܒܰܝܟܝ ܥܺܕܬܳܐ ܕܰܒܥܰܕܥܺܐܕܶܟܝ: ܥܺܝܪ̈ܶܐ ܚܳܕܶܝܢ ܒܰܝܢܳܬ ܟܶܢܫܰܝ̈ܟܝ: ܚܰܕ ܓܶܝܪ ܠܺܠܝܳܐ ܫܰܒܰܚܘ ܥܺܝܪ̈ܶܐ: ܒܰܐܪܥܳܐ ܕܟܳܡܰܬ ܘܫܽܘܒܚܳܐ ܛܶܠܡܰܬ: ܛܽܘܒ ܠܩܳܠܰܝ̈ܟܝ ܕܶܐܙܕܪܰܥܘ ܘܶܐܬܚܨܶܕܝ: ܘܒܰܫܡܰܝܳܐ ܐܶܬܚܡܶܠܘ ܒܰܐܘܨܪ̈ܶܐ: ܦܽܘܡܶܟܝ ܦܺܝܪܡܳܐ: ܘܩܳܠܰܝ̈ܟܝ ܐܰܝܟ ܒܶܣ̈ܡܶܐ: ܥܳܛܪܺܝܢ ܝܽܘܡ ܥܺܐܕܶܟܝ܀

ܣܽܘܓܺܝܬܳܐ

ܩܳܠܳܐ ܒܩ̄: ܐܶܬܬܥܺܝܪ ܫܳܗܪ̈ܶܐ
ܗܳܢܰܘ ܝܰܪܚܳܐ܆ ܕܰܛܥܺܝܢ ܟܽܠܶܗ ܟܽܠ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܒܝܰܠܕܶܗ: ܦܰܪܩܰܢ ܡܶܢ ܛܽܘܥܝܰܝ: ܘܟܰܢܫܰܢ ܠܒܶܝܬ ܚܰܝ̈ܶܐ: ܕܢܶܙܡܰܪ ܠܶܗ ܫܽܘܒܚܳܐ.

ܡܰܠܰܐܟ̈ܶܐ ܣܰܒܰܪܘ. ܚܰܕܽܘܬܳܐ ܕܰܗܘܳܬ܆ ܝܰܘܡܳܢ ܠܰܒܪܺܝܬܳܐ. ܘܰܠܟܽܠܶܗ ܥܳܠܡܳܐ܀

ܗܳܐ ܡܳܪܝܳܐ ܡܫܺܝܚܳܐ. ܝܰܘܡܳܢ ܐܶܬܺܝܠܶܕ܆ ܒܰܡܥܰܪܬܳܐ ܕܒܶܝܬ ܠܚܶܡ܆ ܒܰܡܕܺܝܢ̱ܬܶܗ ܕܕܰܘܺܝܕ܀

ܓܽܘ̈ܕܶܐ ܕܪ̈ܽܘܚܳܢܶܐ. ܘܟܶܢ̈ܫܶܐ ܕܢܽܘܪ̈ܳܢܶܐ܆ ܚܙܰܘ ܪ̈ܳܥܰܘܳܬܳܐ܆ ܟܰܕ ܩܳܥܶܝܢ ܘܳܐܡܪܺܝܢ܀

ܬܶܫܒܽܘܚܬܳܐ ܡܰܙܥܩܺܝܢ. ܒܝܰܕ ܩܺܝܢܬܳܐ ܕܪܽܘܚܳܐ܆ ܠܰܐܠܳܗܳܐ ܕܶܐܬܳܐ. ܕܢܶܣܥܽܘܪ ܠܰܓܒܺܝܠܬܶܗ܀

ܫܠܳܡܳܐ ܥܰܠ ܐܰܪܥܳܐ. ܘܫܰܝܢܳܐ ܒܰܫܡܰܝܳܐ܆ ܕܶܐܬܪܰܥܺܝ ܡܳܪܝܳܐ. ܘܶܐܬܳܐ ܠܡܰܘܠܳܕܳܐ܀

ܫܠܳܡܳܐ ܠܒܶܪ̈ܝܳܬܳܐ. ܘܫܰܝܢܳܐ ܒܰܡܪ̈ܰܘܡܶܐ܆ ܕܰܦܢܳܐ ܠܶܗ ܐܳܕܳܡ. ܠܰܐܬܪܶܗ ܩܰܕܡܳܝܳܐ܀

ܒܝܰܠܕܳܟ ܡܰܚܶܐ ܟܽܠ. ܦܨܺܝ̈ܚܳܢ ܒܶܪ̈ܝܳܬܳܐ܆ ܘܙܳܡܪ̈ܳܢ ܬܶܫܒܽܘܚܬܳܐ. ܒܥܺܐܕܳܐ ܕܚܰܕܘ̈ܳܬܳܐ܀

ܫܽܘܒܚܳܐ ܠܗܰܘ ܕܰܫܒܰܩ. ܪ̈ܰܘܡܶܐ ܥܶܠܳܝ̈ܶܐ܆ ܘܶܐܬܳܐ ܒܛܰܝܒܽܘܬܶܗ. ܠܥܽܘܡ̈ܩܶܐ ܬܰܚ̈ܬܳܝܶܐ܀

ܐܰܪܦܺܝ ܡܰܪܟܰܒܬܳܐ. ܕܬܶܗܪܳܐ ܕܰܟܪ̈ܽܘܒܶܐ܆ ܘܒܽܐܘܪܝܳܐ ܘܰܡܥܰܪܬܳܐ. ܫܦܰܪ ܠܶܗ ܕܢܶܬܗܰܦܰܟ܀

ܡܓܽܘ̈ܫܶܐ ܡܶܢ ܦܳܪܶܣ. ܒܩܽܘܪ̈ܒܳܢܶܐ ܐܶܬܰܘ܆ ܐܳܦ ܪ̈ܳܥܰܘܳܬܳܐ. ܣܶܓ̈ܕܳܬܳܐ ܝܰܗ̱ܒܘ ܠܶܗ܀

ܥܺܝܪ̈ܶܐ ܒܝܽܘ̈ܒܳܒܶܐ .ܣܪ̈ܳܦܶܐ ܒܩܽܘ̈ܕܳܫܶܐ܆ ܡܠܰܘ ܗ̱ܘܰܘ ܠܰܡܥܰܪܬܳܐ. ܫܽܘܒ̈ܚܶܐ ܬܠܺܝ̈ܬܳܝܶܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢ̱ܬܳܐ

ܗܰܠܶܠܘ ܗܰܠܶܠܘ ܗܰܠܶܠܘ ܘܶܐܡܰܪܘ ܗܰܠܶܠܽܘܝܰܗ܆

ܐܰܟܡܳܐ ܕܗܰܠܠܽܘܗ̱ܝ ܪ̈ܳܥܰܘܳܬܳܐ ܒܓܰܘ ܒܶܝܬ ܠܚܶܡ܀

ܬܶܗܪܳܐ ܠܡܺܐܡܰܪ ܡܶܛܽܠ ܝܰܠܕܶܗ ܕܒܰܪ ܐܰܠܳܗܐ܆ ܕܣܰܓܺܝ ܡܰܬܗܰܪ ܠܰܕܚܳܐܰܪ ܒܶܗ ܦܳܪܽܘܫܳܐܺܝܬ܆ ܗܰܘ ܕܰܟܣܶܐ ܗ̱ܘܳܐ ܒܥܽܘܒܳܐ ܕܰܐܒܽܘܗ̱ܝ ܗܳܐ ܡܶܢ ܥܳܠܰܡ܆ ܨܒܳܐ ܘܶܐܬܬܰ̇ܚܬܺܝ ܘܰܗܘܳܐ ܥܽܘܠܳܐ ܒܟܰܪܣܳܗ̇ ܕܡܰܪܝܰܡ܀

ܬܶܓ̈ܡܶܐ ܫܓܺܝܪ̈ܶܐ ܕܢܽܘܪܳܐ ܘܪܽܘܚܳܐ ܙܳܝܥܺܝܢ ܡܶܢܶܗ܆ ܘܡܰܪܝܰܡ ܛܶܥܢܰܬ ܘܙܰܝܚܰܬ ܙܺܝܘܶܗ ܠܥܶܠ ܡܶܢ ܚܰܕܝܳܗ̇܆ ܟܝܳܢ̈ܶܐ ܟܽܠܗܽܘܢ ܬܳܒܥܺܝܢ ܡܶܢܶܗ ܡܳܙܽܘܢܰܝ̈ܗܽܘܢ܆ ܘܗܽܘ ܬܳܒܰܥ ܠܳܗ̇ ܚܰܠܒܳܐ ܠܡܰܪܝܰܡ ܐܰܝܟ ܝܰܠܽܘܕܳܐ܀

ܙܰܡܰܪܘ ܙܰܡܰܪܘ ܙܰܡܰܪܘ ܘܶܐܡܰܪܘ ܗܰܠܶܠܽܘܝܰܗ܆

ܐܰܟܡܳܐ ܕܙܰܡܪܽܘܗ̱ܝ ܪ̈ܳܥܰܘܳܬܳܐ ܒܓܰܘ ܒܶܝܬ ܠܚܶܡ܀