ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܩܽܘܩܳܝܳܐ
ܠܳܟ ܝܳܗܒܳܐ ܥܺܕܬܳܐ ܛܽܘܒܳܐ ܐܳܘ ܡܳܪܝ

ܒܝܰܕ ܓܰܒܪܺܐܶܝܠ ܡܰܠܰܐܟܳܐ ܐܶܫܬܰܕܰܪ ܗ̱ܘܳܐ܆ ܫܠܳܡܶܗ ܕܰܐܒܳܐ ܠܘܳܬ ܡܰܪܝܰܡ ܒܬܽܘܠܬܳܐ ܩܰܕܺܝܫܬܳܐ܆ ܩܰܒܠܰܬ ܒܰܛܢܳܐ܆ ܝܰܠܕܶܗ ܕܥܶܠܳܝܳܐ܆ ܡܫܺܝܚܳܐ ܡܶܠܬܳܐ܆ ܕܠܰܝܬ ܠܶܗ ܫܽܘܪܳܝܳܐ܆ ܘܺܝܠܶܕܬܶܗ ܒܰܒܬܽܘܠܽܘܬܳܗ̇ ܠܒܰܪ ܐܰܠܳܗܳܐ܆ ܘܺܐܝܬܶܝܗ̇ ܐܶܡܳܐ ܘܰܒܬܽܘܠܬܳܐ ܒܬܶܕܡܽܘܪܬܳܐ ܪܰܒܬܳܐ܆ ܗ̄ܘܗ̄܀

ܫܽܘܒܚܳܐ

ܢܒܺܝܳܐ ܕܐ̱ܪ̈ܳܙܶܐ ܚܰܙܩܺܝܐܶܝܠ ܓܠܺܝ ܘܦܰܫܶܩ ܠܰܢ܆ ܕܡܳܢܰܘ ܬܰܪܥܳܐ ܕܰܐܚܺܝܕ ܗ̱ܘܳܐ ܕܚܰܘܺܝ ܠܳܟ ܡܳܪܝܳܐ܆ ܬܰܪܥܳܐ ܕܩܽܘܕܫܳܐ܆ ܕܰܚܙܺܝܬܶܗ ܕܰܐܚܺܝܕ܆ ܐܶܡܰܪ ܢܒܺܝܳܐ܆ ܕܚܰܘܺܝ ܠܺܝ ܡܳܪܝܳܐ܆ ܡܰܪܝܰܡ ܗ̱ܺܝ ܬܰܪܥܳܐ ܕܰܐܚܺܝܕ ܒܰܒܬܽܘܠܽܘܬܳܗ̇܆ ܕܡܶܢܳܗ̇ ܕܢܰܚ ܒܰܪ ܐܰܠܳܗܳܐ ܦܳܪܽܘܩܶܗ ܕܥܳܠܡܳܐ܆ ܗ̄ܘܗ̄܀

ܡܰܕܪܳܫܳܐ

ܩܳܠܳܐ ܒܩ̄: ܐܳܕܳܡ ܚܛܳܐ ܘܰܩܢܳܐ

ܥܽܘܢܺܝܬܳܐ: ܫܽܘܒܚܳܐ ܠܗܰܘ ܕܫܰܕܰܪ ܡܰܠܰܐܟܶܗ܆ ܢܚܶܬ ܣܰܒܰܪ ܒܰܛܢܳܐ ܠܰܒܬܽܘܠܬܳܐ.

ܫܶܡܥܰܬ ܠܰܫܠܳܡܶܗ ܕܓܰܒܪܺܐܶܝܠ܆ ܫܰܪܝܰܬ ܡܶܬܚܰܫܒܳܐ ܒܬܶܕܡܽܘܪܬܳܐ܆ ܕܡܳܢܳܐ ܗ̱ܝ ܫܶܐܠܶܬܶܗ ܕܰܫܠܳܡܳܐ܆ ܕܰܕܠܳܐ ܒܰܥܝܳܕܳܐ ܣܰܒܰܪܬܳܢܝ܆ ܦܰܫܶܩ ܠܺܝ ܓܰܒܪܳܐ ܡܽܘܢ ܛܶܒܳܟ܀

ܡܰܢܽܘ ܚܙܳܐ ܒܰܛܢܳܐ ܕܠܳܐ ܓܰܒܪܳܐ܆ ܐܰܘ ܟܰܪܣܳܐ ܕܝܶܠܕܰܬ ܕܠܳܐ ܙܽܘܘܳܓ܆ ܐܶܢܗܽܘ ܕܠܳܐ ܬܶܬܶܠ ܦܽܘܫܳܩܳܐ܆ ܠܳܐ ܡܩܰܒܶܠ ܗܰܘܢܳܐ ܠܡܽܘܢ ܕܶܐܡܰܪܬ܆ ܦܰܫܶܩ ܓܰܠܝܳܐܺܝܬ ܦܶܬܓܳܡܰܝ̈ܟ܀

ܡ̈ܶܠܶܐ ܕܕܽܘܡܳܪܳܐ ܫܶܡܥܰܬ ܗ̱ܘܳܬ܆ ܡܰܪܝܰܡ ܒܒܶܝܬ ܩܽܘܕܫܳܐ ܡܶܢ ܥܺܝܪܳܐ܆ ܕܰܣܒܰܪܬܳܐ ܕܡܰܠܝܳܐ ܚܰܕܘ̈ܳܬܳܐ܆ ܐܰܘܫܶܛ ܠܳܗ̇ ܒܬܶܗܪܳܐ ܠܰܒܬܽܘܠܬܳܐ܆ ܫܽܘܒܚܳܐ ܠܗܰܘ ܕܰܢܚܶܬ ܘܰܫܪܳܐ ܒܳܗ̇܀

ܐ̱ܚܪܺܢܳܐ

ܩܳܠܳܐ ܒܩ̄: ܦܰܪܕܰܝܣܳܐ
ܒܕܽܘܟܪܳܢ ܩܰܕܺܝ̈ܫܶܐ ܐܰܚܰܝ̈ ܢܶܬܟܰܢܰܫ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܥܰܒܕܶܟܝ ܠܶܟܝ ܐܶܡܳܐ ܒܛܰܝܒܽܘܬܶܗ܆ ܕܡܶܢܶܟܝ ܕܢܰܚ ܘܰܢܦܰܩ ܘܰܐܢܗܰܪ ܒܶܪ̈ܝܳܬܳܐ.

ܢܚܶܬ ܥܺܝܪܳܐ ܕܢܽܘܪܳܐ ܘܰܥܛܺܝܦ ܓܰܘܙܰܠܬܳܐ܆ ܘܰܛܥܺܝܢ ܐܶܓܰܪܬܳܐ ܕܡܰܠܝܳܐ ܣܰܒܪ̈ܳܬܳܐ܆ ܘܰܚܙܳܗ̇ ܠܰܛܠܺܝܬܳܐ ܘܰܒܪܶܟ ܘܰܣܓܶܕ ܠܳܗ̇܆ ܘܶܐܡܰܪ ܠܳܗ̇ ܫܠܳܡܠܶܟܝ ܡܰܪ݉ܝܰܡ܆ ܒܶܟܝ ܫܳܪܶܐ ܡܳܪܝܳܐ ܕܟܺܝܬܳܐ ܕܠܳܐ ܡܽܘܡܳܐ܆ ܘܡܶܢ ܥܽܘܒܶܟܝ ܕܳܢܰܚ ܘܦܳܪܶܩ ܒܶܪ̈ܝܳܬܳܐ܀

ܐܳܡܰܪ ܠܳܗ̇ ܥܺܝܪܳܐ ܠܳܐ ܬܶܕܚܠܺܝܢ ܡܰܪܝܰܡ܆ ܠܳܐ ܡܨܶܐ ܡܶܬܥܰܩܰܒ ܝܰܠܕܶܟܝ ܒܰܪ̱ܬ ܕܰܘܺܝܕ܆ ܕܰܓܢܺܝܙ ܡܶܢ ܥܺܝܪ̈ܶܐ ܘܰܟܣܶܐ ܡܶܢ ܟܪ̈ܽܘܒܶܐ܆ ܚܰܝܠܶܗ ܕܥܶܠܳܝܳܐ ܐܺܝܬܰܘ݉ܗ̱ܝ܆ ܕܰܨܒܳܐ ܒܛܰܝܒܽܘܬܶܗ ܕܢܶܬܓܰܫܰܡ ܡܶܢܶܟܝ܆ ܕܢܰܚܶܐ ܒܢܰܝ̈ܢܳܫܳܐ ܕܶܐܒܰܕܘ ܒܰܚܛܺܝܬܳܐ܀

ܐܶܡܪܰܬ ܠܶܗ ܡܰܪܝܰܡ: ܠܥܺܝܪܳܐ ܒܗܳܝ ܫܳܥܬܳܐ: ܕܰܐܟܰܢܳܐ ܡܰܨܝܳܐ: ܕܬܶܗܘܶܐ ܐܰܝܟ ܕܶܐܡܰܪܬ: ܕܰܒܬܽܘܠܬܳܐ ܐܺܝܬܰܝ: ܘܓܰܒܪܳܐ ܠܳܐ ܚܟܺܝܡ ܠܺܝ: ܘܙܽܘܘܳܓܳܐ ܡܶܡܬܽܘܡ ܠܳܐ ܝܶܕ݉ܥܶܬ: ܦܰܫܶܩ ܠܺܝ ܓܰܒܪܳܐ: ܐܶܢܗܽܘ ܕܫܰܪܺܝ ܐܰܢ̱ܬ: ܗܰܒ ܠܺܝ ܦܽܘܫܳܩܳܐ: ܕܰܐܫܰܪ ܦܶܬܓܳܡܰܝ̈ܟ܀

ܘܰܥܢܳܬ ܒܰܪ̱ܬ ܕܰܘܺܝܕ ܘܗܳܟܰܢ ܐܶܡܪܰܬ ܠܶܗ܆ ܚܰܘܳܐ ܠܺܝ ܥܺܝܪܳܐ ܡܶܕܶܡ ܕܳܐܡܰܪ ܐܰܢ̱ܬ܆ ܐܶܡܰܬܝ ܟܰܝ ܝܶܠܕܰܬ ܒܬܽܘܠܬܳܐ ܕܠܳܐ ܓܰܒܪܳܐ܆ ܘܶܐܡܰܬܝ ܬܽܘܒ ܝܶܗܒܰܬ ܚܰܩ݉ܠܳܐ܆ ܟܰܪܝܳܐ ܘܰܓܕܺܝܫܳܐ ܒܶܠܥܳܕ ܐܰܟܳܪܳܐ܆ ܘܶܐܢ ܠܳܐ ܬܦܰܫܶܩ ܠܺܝ ܥܰܛܠܳܐ ܗ̱ܝ ܠܺܝ ܕܰܐܫܪܳܟ܀

ܝܰܠܕܳܐ ܕܢܰܚ ܘܰܢܦܰܩ ܒܽܐܘܪܚܳܐ ܕܺܝܠܺܝ̈ܕܶܐ܆ ܘܶܐܡܶܗ ܚܬܺܝܡܳܐ ܗ̱ܘܳܬ ܘܬܶܗܪܳܐ ܡܰܠܝܳܐ ܗ̱ܘܳܬ܆ ܦܺܐܪܳܐ ܛܥܺܝܢܳܐ ܗ̱ܘܳܬ ܘܟܰܪܣܳܗ̇ ܛܒܺܝܥܳܐ ܗ̱ܘܳܬ܆ ܐܽܘܪܚܳܐ ܚܕܰܬܳܐ ܗ̱ܘܳܬ ܕܗܰܠ݉ܟܰܬ܆ ܘܝܶܗܒܰܬ ܒܬܶܕܡܽܘܪܬܳܐ ܠܰܒܬܽܘܠܬܳܐ ܝܰܠܕܳܐ܆ ܡܶܕܶܡ ܕܠܳܐ ܝܳܗܶܒ ܟܝܳܢܳܐ ܠܢܶܩ̈ܒܳܬܳܐ܀

ܢܒܺܝܳܐ ܫܩܰܠ ܫܰܒ̈ܛܶܐ ܕܰܐܦܪܶܝܡ ܘܕܰܡܢܰܫܶܐ܆ ܘܶܐܚܰܕ ܗ̱ܘܳܐ ܐܶܢܽܘܢ ܘܰܗܘܰܘ ܚܰܕ ܒܺܐܝܕܶܗ܆ ܐܺܝܕܶܗ ܕܢܒܺܝܳܐ ܟܰܪܣܳܐ ܕܰܒܬܽܘܠܬܳܐ܆ ܕܶܐܬܰܘ ܠܪܽܘܟܳܒܳܐ ܒܡܰܪ݉ܒܥܳܐ܆ ܟܝܳܢ̈ܶܐ ܬܪܶܝܢ ܕܰܗܘܰܘ ܚܰܕ ܟܝܳܢ ܕܠܳܐ ܦܽܘܠܳܓ܆ ܕܰܠܥܶܠ ܡܶܢ ܐܰܒܳܐ ܘܕܰܠܬܰܚܬ ܡܶܢ ܡܰܪܝܰܡ܀

ܒܪܺܝܫܺܝܬ ܡܶܠܬܳܐ ܗ̱ܘܳܐ ܘܡܶܢܰܢ ܩܢܳܐ ܦܰܓܪܳܐ܆ ܐܺܝܬܝܰܐ ܗ̱ܘ ܒܺܐܝܬܽܘܬܶܗ ܘܐ̱ܢܳܫܰܐ ܗ̱ܘ ܒܐ̱ܢܳܫܽܘܬܶܗ܆ ܟܰܣܝܰܐ ܗ̱ܘ ܒܟܰܣܝܽܘܬܶܗ ܘܓܰܠܝܰܐ ܗ̱ܘ ܒܝܰܕ ܦܰܓܪܶܗ܆ ܚܰܕܽ ܗ̱ܘ ܘܠܳܐ ܡܨܶܐ ܕܢܶܬ݉ܦܪܶܫ܆ ܡܶܠܬܳܐ ܕܡܶܢ ܐܰܒܳܐ ܢܚܶܬ ܘܰܫܪܳܐ ܒܡܰܪܝܰܡ܆ ܢܚܶܬ ܗ̱ܘܳܐ ܥܶܠܳܝܳܐ ܘܰܗܘܳܐ ܬܰܚܬܳܝܳܐ܀

ܨܳܪܽܘܟܝ ܒܗܰܘ ܫܰܒܛܳܐ ܕܶܐܬܬܣܺܝܡ ܒܳܐܪܽܘܢܳܐ܆ ܕܟܰܕ ܠܳܐ ܢܨܺܝܒ ܐܰܦܪܰܥ ܕܫܰܪܒܶܟܝ ܡܙܰܝܰܚ ܗ̱ܘܳܐ܆ ܫܰܒܛܳܐ ܕܠܳܐ ܫܶܩܝܳܐ ܒܛܰܪ̈ܦܶܐ ܡܟܰܠܰܠ ܗ̱ܘܳܐ܆ ܕܠܰܒܬܽܘܠܬܳܐ ܢܗܶܐ ܦܶܠܐ݉ܬܳܐ܆ ܕܰܐܫܘܚܰܬ ܘܝܶܗܒܰܬ ܠܰܢ ܦܺܐܪܳܐ ܕܬܶܕܡܽܘܪܬܳܐ܆ ܕܫܰܪܒܶܗ ܪܫܺܝܡ ܘܺܝܕܺܝܥ ܒܫܰܒܛܶܗ ܕܠܶܘܳܝܳܐ܀

ܘܶܐܢܗܽܘ ܕܠܰܡܫܺܝܚܳܐ ܒܳܬܰܪ ܚܕܳܝܽܘܬܳܐ܆ ܟܝܳܢ̈ܶܐ ܬܪܶܝܢ ܬܶܚܫܽܘܒ ܬܦܰܪܶܫ ܘܰܬܦܰܠܶܓ܆ ܥܰܠ ܚܰܕ ܬܣܺܝܡ ܚܰܝ̈ܶܐ ܘܥܰܠ ܗܰܘ ܐ̱ܚܪܺܝܢ ܚܰܫ̈ܶܐ܆ ܐܰܝܟܳܐ ܣܳܐܶܡ ܐܰܢ̱ܬ ܣܶܓ݉ܕܬܳܟ܆ ܒܗܰܘ ܕܶܐܨܛܠܶܒ ܒܨܶܗܝܽܘܢ ܟܶܦܪܰܬ ܕܠܰܘ ܡܳܪܝܳܐ ܗ̱ܘܳܐ܆ ܗܳܐ ܒܶܗܬܬܳܟ ܥܰܡܳܟ ܘܣܶܓܕܬܳܟ ܕܒܰܪܢܳܫܳܐ ܗ̱ܝ܀

ܝܶܫܽܘܥ ܫܡܳܐ ܦܰܐܝܳܐ ܕܡܶܢܶܗ ܘܒܶܗ ܨܰܒܬܶܗ܆ ܗܰܒܠܰܢ ܕܢܶܨܛܰܒܰܬ ܡܶܢܰܢ ܘܒܰܢ ܗܳܟܰܢ܆ ܨܰܘܡܰܢ ܢܗܶܐ ܨܶܒܬܳܐ ܨܠܽܘܬܰܢ ܠܬܰܨܒܺܝܬܰܢ܆ ܘܰܐܝܟܰܢ ܕܳܐܦ ܚܰܝܠܳܟ ܡܙܰܓܬ ܒܰ݉ܢ܆ ܡܰܙܶܓ ܠܰܢ ܒܰܫܡܳܟ ܕܢܶܫܦܰܪ ܫܡܰܢ ܒܰܫܡܳܟ܆ ܫܽܘܒܚܳܐ ܠܛܰܝܒܽܘܬܳܟ ܕܰܐܘܪܒܰܬ ܙܥܽܘܪܽܘܬܰܢ܀

ܟܺܐܦܳܐ ܒܓܰܘ ܕܰܒܪܳܐ ܛܽܘܦܣܶܟܝ ܪܶܫܡܰܬ ܗ̱ܘܳܬ܆ ܕܟܰܕ ܠܳܐ ܢܩܺܝܪܳܐ ܗ̱ܘܳܬ ܝܶܠܕܰܬ ܘܝܶܗܒܰܬ ܗ̱ܘܳܬ܆ ܫܶܩܝܳܐ ܠܡܰܫܪܺܝܬܳܐ ܕܥܳܦܰܬ ܘܡܺܝܬܰܬ ܗ̱ܘܳܬ܆ ܐ̱ܪܳܙܶܟܝ ܡܛܳܐ ܠܟܺܐܦܳܐ ܘܬܰܪ݉ܥܳܗ̇܆ ܕܡܶܢܶܟܝ ܪܕܳܐ ܘܰܢܦܰܩ ܫܶܩܝܳܐ ܪܽܘܚܳܢܳܐ܆ ܘܶܐܫܬܺܝ ܣܒܰܥ ܡܶܢܶܗ ܥܳܠܡܳܐ ܕܡܺܝܬܳܐ ܗ̱ܘܳܐ܀

ܢܒܺܝ̈ܶܐ ܒܐ̱ܪ̈ܳܙܰܝܗܽܘܢ ܝܰܩܪܽܘܟܝ ܒܰܪ̱ܬ ܕܰܘܺܝܕ܆ ܘܙܰܝܚܽܘܟܝ ܒܛܽܘ̈ܦܣܰܝܗܽܘܢ ܒܡ̈ܶܠܶܐ ܕܪܽܘܚ ܩܽܘܕܫܳܐ܆ ܪܰܫܡܽܘܟܝ ܒܓܰܘ ܝܽܘ̈ܩܢܶܐ ܣܕܺܝܪ̈ܶܐ ܕܦ̈ܶܠܳܐܬܳܐ܆ ܘܗܰܕܪܽܘܟܝ ܒܩܳܠܰܝ̈ܗܽܘܢ ܫܒܺܝ̈݉ܚܶܐ܆ ܛܽܘܒܰܝܟܝ ܕܒܶܟܝ ܐܶܬܬܨܺܝܪܘ ܐ̱ܪ̈ܳܙܶܐ ܩܰܕܺܝ̈ܫܶܐ܆ ܘܰܗܘܰܝܬܝ ܠܶܗ ܐܶܡܳܐ ܠܡܳܪܗܽܘܢ ܕܰܢܒܺܝ̈ܶܐ܀

ܠܺܝ ܢܶܬܠܳــ̈ــܢ ܛܽܘܒܳܐ ܟܽܠܗܶܝܢ ܫܰܪ̈ܒܳܬܳܐ܆ ܐܶܡܪܰܬ ܒܚܰܕܽܘܬܳܐ ܡܰܪܝܰܡ ܟܰܕ ܪܳܘܙܳܐ܆ ܕܰܗܘܺܝܬ ܒܬܶܕܡܽܘܪܬܳܐ ܐܶܡܳܐ ܠܡܳܪܶܐ ܟܽܠ܆ ܕܰܕܠܳܐ ܙܽܘܘܳܓܳܐ ܝܶܠ݉ܕܶܬ܆ ܐܶܡܪܶܗ ܕܰܐܠܳܗܳܐ ܘܰܒܪܶܗ ܕܥܶܠܳܝܳܐ܆ ܐܰܝܟܰܢ ܕܶܐܡܰܪ ܠܺܝ ܥܺܝܪܳܐ ܗܰܘ ܕܣܰܒܪܰܢܝ܀

ܠܫܽܘܦܪ̈ܰܝܟܝ ܒܰܪ̱ܬ ܕܰܘܺܝܕ ܩܶܪܒܶܬ ܕܶܐܡܰܠܶܠ܆ ܘܚܳܒܶܬ ܡܶܢ ܫܽܘܦܪ̈ܶܐ ܟܣܰܝ̈ܳܐ ܕܢܰܟܦܽܘܬܶܟܝ܆ ܛܽܘܒܰܝܟܝ ܕܰܗܘܰܝܬܝ ܠܶܗ ܐܶܡܳܐ ܠܡܳܪܳܐ ܕܟܽܠ܆ ܘܰܛܥܶܢܬܝ ܘܙܰܝܰܚܬܺܝܘܗ̱ܝ ܠܡܰܠ݉ܟܳܐ܆ ܕܙܺܝܘܶܗ ܒܰܫܡܰܝܳܐ ܡܰܪܗܶܒ ܠܰܣܪ̈ܳܦܶܐ܆ ܘܒܰܐܪܥܳܐ ܥܰܠ ܒܽܘܪ̈ܟܰܝܟܝ ܛܥܶܢܬܺܝܘܗ̱ܝ ܒܬܶܕܡܽܘܪܬܳܐ܀

ܠܳܐ ܢܶܬܬܕܺܝܢ ܨܶܒܝܳܢܝ ܨܶܐܕܰܝܟ ܝܳܕܰܥ ܟܽܠ܆ ܘܠܳܐ ܢܶܬܪܫܶܐ ܥܽܘܩܳܒܝ ܠܘܳܬܳܟ ܓܢܺܝܙ ܡܶܢ ܟܽܠ܆ ܠܰܘ ܓܶܝܪ ܥܰܠ ܝܰܠܕܳܟ ܐܰܡܪܚܶܬ ܟܣܶܐ ܡܶܢ ܟܽܠ܆ ܒܫܶܬܩܰܐ ܗ̱ܘ ܬܰܚܶܡܬܳܗ̇ ܠܡܶܠ݉ܬܳܐ܆ ܕܝܰܩܪܶܬ ܠܡܰܘܠܳܕܳܟ ܐܰܫܘܳܢܝ ܠܦܰܪܕܰܝܣܳܐ܆ ܡܶܢ ܟܽܠ ܕܪܳܚܶܡ ܠܳܟ ܫܽܘܒܚܳܐ ܠܟܰܣܝܽܘܬܳܟ܀

ܣܽܘܓܺܝܬܳܐ

ܩܳܠܳܐ ܒܩ̄: ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ
ܡܰܢ ܐܰܢ̱ܬ ܓܰܒܪܳܐ ܘܒܰܪ ܡܰܢ ܐܰܢ̱ܬ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܣܰܒܪܳܗ̇ ܠܰܒܬܽܘܠܬܳܐ܆ ܦܽܘܪܩܳܢܳܐ ܕܰܡܚܰܕܶܐ ܠܥܳܠܡܳܐ.

ܡܶܢ ܠܶܓܝܽܘ̈ܢܶܐ ܫܓܺܝܪ̈ܳܬܳܐ܆ ܘܡܶܢ ܐܰܠ̈ܦܶܐ ܘܪ̈ܶܒܘܳܬܳܐ ܕܢܽܘܪܳܐ܆ ܘܡܶܢ ܓܽܘ̈ܕܶܐ ܕܥܺܝܪ̈ܶܐ܆ ܘܬܶܓ̈ܡܶܐ ܕܓܰܘܙܰܠܬܳܐ܆ ܐܶܫܬܰܕܰܪ ܗ̱ܘܳܐ ܓܰܒܪܺܐܶܝܠ܆ ܠܘܳܬ ܒܬܽܘܠܬܳܐ ܕܰܢܣܰܒܪܺܝܗ̇ ܝܰܠܕܳܐ܀

ܝܰܠܦܶܗ ܠܐ̱ܪܳܙܳܐ ܐܺܝܙܓܰܕܳܐ܆ ܘܛܳܣ ܘܰܢܚܶܬ ܘܰܡܛܳܐ ܠܢܳܨܪܰܬ܆ ܘܰܚܙܳܗ̇ ܠܰܛܠܺܝܬܳܐ܆ ܘܰܒܪܶܟ ܘܰܣܓܶܕ ܠܳܗ̇܆ ܘܰܐܘܫܶܛ ܝܰܗ̱ܒ ܠܳܗ̇ ܐܶܓܰܪܬܳܐ܆ ܘܰܫܠܳܡܳܐ ܕܶܐܫܬܰܕܰܪ ܡܶܢ ܠܥܶܠ܀

ܫܠܳܡ ܠܶܟܝ ܡܰܠܝܰܬ ܛܰܝܒܽܘܬܳܐ܆ ܡܳܪܝ ܥܰܡܶܟܝ ܒܺܝܪܰܬ ܡܪܰܝܡܳܐ܆ ܒܶܟܝ ܫܳܪܶܐ ܢܽܘܗܪܳܐ܆ ܘܒܶܟܝ ܕܳܢܰܚ ܨܶܡܚܳܐ܆ ܘܡܶܢܶܟܝ ܢܳܦܶܩ ܠܰܒܪܺܝܬܳܐ܆ ܓܰܢ̱ܒܳܪܳܐ ܕܗܽܘ ܦܳܪܶܩ ܥܳܠ̈ܡܶܐ܀

ܓܰܒܪܳܐ ܕܢܽܘܪܳܐ ܡܶܢ ܐܰܝܟܳܐ܆ ܪܽܘܚܳܢܳܐ ܨܶܐܕܰܝ ܠܡܽܘܢ ܟܰܝ܆ ܡܰܢܽܘ ܟܰܝ ܗܳܢܳܐ܆ ܘܰܐܝܢܰܘ ܟܰܝ ܐܰܬܪܶܗ܆ ܡܰܢܽܘ ܡܳܪܶܗ ܕܶܐܡܰܪ ܠܺܝ܆ ܕܡܳܪܝ ܥܰܡܶܟܝ ܘܰܐܙܺܝܥܰܢܝ ܘܕܰܚܠܰܢܝ܀

ܐܳܡܪܳܐ ܡܰܪܝܰܡ ܦܰܫܶܩ ܠܺܝ܆ ܣܽܘܥܪܳܢܳܐ ܕܰܥܠܰܘܗ̱ܝ ܡܡܰܠܶܠ ܐܰܢ̱ܬ܆ ܝܰܠܕܳܐ ܣܰܒܰܪܬܳܢܝ܆ ܘܓܰܒܪܳܐ ܠܳܐ ܚܟܺܝܡ ܠܺܝ܆ ܕܚܺܝܠܽ ܗ̱ܘ ܫܰܪܒܳܟ ܐܰܟܘܳܬܳܟ܆ ܘܰܐܝܟ ܚܶܙܘܳܟ ܩܳܠܳܟ ܘܡܶܠܬܳܟ܀

ܐܰܝܟܰܢ ܒܰܛܢܳܐ ܠܰܒܬܽܘܠܬܳܐ܆ ܘܰܐܝܟܰܢܳܐ ܝܳܠܕܳܐ ܒܬܽܘܠܬܳܐ܆ ܡܰܢܽܘ ܚܙܳܐ ܡܶܡܬܽܘܡ܆ ܒܰܛܢܳܐ ܕܠܳܐ ܓܰܒܪܳܐ܆ ܦܰܫܶܩ ܗܳܠܶܝܢ ܕܳܐܡܰܪ ܐܰܢ̱ܬ܆ ܕܰܐܝܟܰܢܳܐ ܦܰܐܝ̈ܳܢ ܕܢܶܗܘ̈ܝܳܢ܀

ܣܳܡ ܐܰܠܳܗܳܐ ܒܰܡܨܰܥܬܳܐ܆ ܡܰܠܰܐܟܳܐ ܘܰܒܬܽܘܠܬܳܐ ܕܢܺܐܡܪܽܘܢ܆ ܘܰܢܦܰܫܩܽܘܢ ܫܰܪܒܳܐ܆ ܘܬܶܗܘܶܐ ܬܰܪܥܽܘܬܳܐ܆ ܒܶܝܬ ܥܶܠܳܝ̈ܶܐ ܠܬܰܚ̈ܬܳܝܶܐ܆ ܘܶܐܫܛܳܪܳܐ ܕܚܰܘ̈ܒܶܐ ܢܶܬܥܛܶܐ܀

ܢܚܶܬ ܡܰܠܰܐܟܳܐ ܡܶܢ ܪܰܘܡܳܐ܆ ܘܡܰܠܶܠ ܗ̱ܘܳܐ ܥܰܡܳܗ̇ ܕܰܒܬܽܘܠܬܳܐ܆ ܘܰܕܢܰܚ ܗ̱ܘܳܐ ܫܰܪܒܳܐ ܪܰܒܳܐ ܕܬܰܪܥܽܘܬܳܐ܆ ܘܰܗܘܳܬ ܬܰܢܘܰܝ ܥܰܠ ܫܰܝܢܳܐ܆ ܕܰܛܪ̈ܺܝܕܶܐ ܢܶܬܦܢܽܘܢ ܠܓܰܢܬܳܐ܀

ܡܶܢ ܬܰܚ̈ܬܳܝܶܐ ܠܰܘ ܓܰܒܪܳܐ܆ ܐܶܬܬܣܺܝܡ ܗ̱ܘܳܐ ܕܢܶܦܪܽܘܥ ܚܰܘܒܬܳܐ܆ ܐܶܠܳܐ ܡܶܢ ܢܶܫ̈ܶܐ܆ ܚܕܳܐ ܡܶܢ ܒܬܽܘ̈ܠܳܬܳܐ܆ ܫܶܡܥܰܬ ܘܶܐܡܪܰܬ ܘܰܐܬܩܶܢܬܶܗ܆ ܠܣܽܘܥܪܳܢܳܐ ܘܢܶܨܚܰܬ ܒܥܳܠܡܳܐ܀

ܐܶܬܚܰܠܰܦܝ̈ ܗ̱ܘܰܝ̈ ܥܳܩ̈ܳܬܳܐ܆ ܒܚܰܕܘ̈ܳܬܳܐ ܕܰܗ̈ܘܰܝ ܒܥܳܠܡܳܐ܆ ܥܒܰܪܘ ܙܰܒ̈ܢܶܐ ܒܺܝ̈ܫܶܐ܆ ܒܝܰܘ̈ܡܳܬܳܐ ܛܳܒ̈ܶܐ܆ ܘܰܢܚܶܬ ܥܽܘܬܪܳܐ ܡܶܢ ܪܰܘܡܳܐ܆ ܘܒܶܗ ܐܶܬܦܪ̈ܰܥܝ ܚܰܘ̈ܒܳܬܶܗ ܕܥܳܠܡܳܐ܀

ܐܳܡܪܳܐ ܒܬܽܘܠܬܳܐ ܠܡܰܠܰܐܟܳܐ܆ ܗܳܐ ܐܶܢܳܐ ܐܰܡܬܶܗ ܕܡܳܪܝܳܐ܆ ܢܗܶܐ ܠܺܝ ܐܰܝܟ ܡܶܠܬܳܟ܆ ܘܢܺܐܬܶܐ ܘܢܰܓܶܢ ܒܺܝ܆ ܡܶܠܬܶܗ ܕܰܐܒܳܐ ܕܡܶܬܓܰܫܰܡ܆ ܕܰܢܚܰܪܰܪ ܠܳܐܕܳܡ ܘܰܠܝܰܠ̈ܕܰܘܗ̱ܝ܀

ܢܰܦܫܳܗ̇ ܬܶܗܪܳܐ ܡܰܠܝܳܐ ܗ̱ܘܳܬ܆ ܘܰܒܬܶܗܪܳܐ ܠܝܰܠܽܘܕܳܐ ܡܰܠܠܰܬ܆ ܩ̈ܳـܠܶܐ ܕܦܽܘܪܫܳܢܳܐ܆ ܒܙܰܘ̈ܥܶܐ ܪ̈ܽܘܚܳܢܶܐ܆ ܘܰܒܩܺܝ̈ܢܳܬܳܐ ܪ̈ܚܺܝܡܳܬܳܐ܆ ܢܽܘܨܪ̈ܳܬܳܐ ܦܰܐܝ̈ܳܬܳܐ ܠܶܥܙܰܬ܀

ܡܰܢ ܐܰܢ̱ܬ ܓܰܒܪܳܐ ܘܒܰܪ ܡܰܢ ܐܰܢ̱ܬ܆ ܘܰܠܗܳܪܟܳܐ ܨܶܐܕܰܝ ܡܰܢ ܫܰܕܪܳܟ܆ ܐܶܢ ܐܳܬܶܐ ܝܰܘܣܶܦ܆ ܘܢܶܫܟܰܚ ܠܳܟ ܨܶܐܕܰܝ܆ ܣܳܠܶܩ ܪܽܘܓܙܶܗ ܘܩܳܛܶܠ ܠܺܝ܆ ܘܰܐܢ̱ܬ ܓܰܒܪܳܐ ܡܶܕܶܡ ܠܳܐ ܝܳܬܪܰܬ܀

ܡܶܢ ܡܶܕܝܳܪ̈ܰܘܗ̱ܝ ܥܶܠܳܝ̈ܶܐ܆ ܕܳܠ ܘܰܢܚܶܬ ܡܶܠܬܳܐ ܡܪܰܝܡܳܐ܆ ܘܰܫܪܳܐ ܒܰܕܟܺܝܬܳܐ܆ ܒܛܶܢܬܶܗ ܘܺܝܠܶܕܬܶܗ܆ ܘܪܳܡܳܐ ܗ̱ܝ ܡܶܢ ܟܽܠ ܕܶܐܬܡܰܠܰܠ܆ ܘܠܳܐ ܢܰܡܪܰܚ ܕܳܪܽܘܫܳܐ ܥܰܠ ܒܪܳܗ̇܀

ܐܰܝܟ ܛܽܘܪ ܣܺܝܢܰܝ ܩܰܒܶܠܬܳܟ܆ ܘܡܶܢ ܢܽܘܪܳܟ ܠܳܐ ܝܶܩܕܶܬ ܐܰܝܟ ܗܰܘ܆ ܕܰܐܢ̱ܬܽ ܗ̱ܘ ܛܰܫܺܝܬܳܗ̇܆ ܠܢܽܘܪܳܐ ܕܪܰܒܽܘܬܳܟ܆ ܕܠܳܐ ܢܶܥܛܰܪ ܒܺܝ ܬܶܢܳܢܳܐ܆ ܡܶܢ ܢܽܘܪܳܟ ܕܰܠܫܽܘ̈ܥܶܐ ܡܰܘܩܕܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܐܳܘ ܥܽܘܡܪܳܐ ܕܙܰܒܢܳܐ

ܥܽܘܢܺܝܬܳܐ: ܫܽܘܒܚܳܐ ܠܰܡܫܺܝܚܳܐ ܕܡܶܢ ܒܰܪ̱ܬ ܕܰܘܺܝܕ ܨܒܳܐ ܘܰܕܢܰܚ܆ ܘܰܐܘܪܶܒ ܕܽܘܟܪܳܢܳܗ̇ ܒܰܐܪܥܳܐ ܘܰܠܥܶܠ ܒܰܫܡܰܝܳܐ.

ܝܰܘܢܳܐ ܬܰܡܺܝܡܬܳܐ܆ ܠܢܶܫܪܳܐ ܪܰܒܳܐ ܛܥܺܝܢܳܐ ܗ̱ܘܳܬ܆ ܠܺܐܝܬܝܳܐ ܕܡܶܢ ܐܰܒܳܐ܆ ܕܦܰܪܩܶܗ ܠܥܳܠܡܳܐ ܡܶܢ ܛܽܘܥܝܰܝ܆ ܒܓܰܘ ܥܽܘܒܳܗ̇ ܛܶܥܢܰܬ܆ ܠܫܶܡܫܳܐ ܪܰܒܳܐ ܕܒܶܪ̈ܝܳܬܳܐ܆ ܕܢܰܚ ܡܶܢܳܗ̇ ܘܶܐܬܳܐ܆ ܘܰܐܢܗܰܪ ܠܰܐܪܥܳܐ ܒܙܰܠܺܝܩܰܘ̈ܗ̱ܝ܀

ܒܪܺܝܟ ܝܰܠܕܳܐ ܟܰܣܝܳܐ܆ ܕܰܒܨܶܒܝܳܢܶܗ ܗܘܳܐ ܓܰܠܝܳܐ܆ ܒܪܺܝܟ ܐܰܒܳܐ ܕܫܰܠܚܶܗ܆ ܘܰܒܡܰܪܝܰܡ ܫܪܳܐ ܕܰܫܦܰܪ ܠܶܗ܆ ܥܒܰܕ ܠܶܗ ܒܓܰܘ ܥܽܘܒܳܗ̇܆ ܦܰܓܪܳܐ ܕܰܟܝܳܐ ܘܒܶܗ ܐܶܬܚܙܺܝ܆ ܒܪܺܝܟ ܐܰܒܳܐ ܕܫܰܠܚܶܗ܆ ܡܶܛܽܠ ܦܽܘܪܩܳܢܶܗ ܕܳܐܕܳܡ܀

ܪܺܝܫܳܐ ܕܡܰܠܰܐܟ̈ܶܐ܆ ܫܠܳܡܳܐ ܝܰܗ̱ܒ ܠܳܗ̇ ܟܰܕ ܐܳܡܰܪ܆ ܫܠܳܡ ܠܶܟܝ ܒܰܪ̱ܬ ܐ̱ܢܳܫ̈ܳܐ܆ ܕܰܗܘܰܝܬܝ ܐܶܡܳܐ ܠܡܳܪܶܐ ܟܽܠ܆ ܡܶܛܽܠ ܕܒܶܟܽܝ ܗ̱ܘ ܫܪܳܐ܆ ܦܰܓܪܳܢܳܐܺܝܬ ܩܰܕܺܝܫܬܳܐ܆ ܗܰܘ ܢܽܘܗܪܳܐ ܪܰܒܳܐ܆ ܕܥܺܝܪ̈ܶܐ ܠܳܐ ܡܨܶܝܢ ܚܳܙܶܝܢ ܠܶܗ܀

ܢܶܫܠܽܘܢ ܕܳܪ̈ܽܘܫܶܐ܆ ܝܰܠܕܳܐ ܕܝܶܠܕܶܬ ܒܪܶܗ ܕܰܐܒܰܐ ܗ̱ܘ܆ ܒܚܰܕܽܘܬܳܐ ܕܠܶܒܳܗ̇܆ ܐܶܡܪܰܬ ܡܰܪܝܰܡ ܟܰܕ ܪܳܘܙܳܐ܆ ܘܠܳܐ ܢܥܰܩܒܽܘܢ ܥܠܰܘܗ̱ܝ܆ ܕܥܶܠܳܝ ܫܰܪܒܶܗ ܡܶܢ ܡܶܠܬܳܐ܆ ܕܝܶܠܕܶܬ ܒܰܒܬܽܘܠܽܘܬܝ܆ ܥܽܘܠܳܐ ܕܩܰܫܺܝܫ ܡܶܢ ܕܳܪ̈ܶܐ܀

ܡܰܢܽܘ ܘܒܰܪ ܡܰܢܽܘ܆ ܛܰܠܝܳܐ ܕܺܝܠܺܝܕ ܒܰܒܬܽܘ̈ܠܶܐ܆ ܕܗܳܐ ܪܗܺܝܒܳܐ ܒܪܺܝܬܳܐ܆ ܕܬܶܬܶܠ ܫܽܘܒܚܳܐ ܠܟܰܣܝܽܘܬܶܗ܆ ܐܺܝܬܰܘܗ̱ܝ ܐܰܠܳܗܳܐ܆ ܕܡܶܢ ܐܰܠܳܗܳܐ ܫܰܪܺܝܪܳܐ܆ ܗܰܘ ܕܰܩܕܳܡ ܥܳܠ̈ܡܶܐ܆ ܝܰܠܕܶܗ ܕܰܐܒܳܐ ܡܬܽܘܡܳܝܳܐ܀

ܓܽܘ̈ܕܶܐ ܕܓܰܘܙܰܠܬܳܐ܆ ܪܳܥܠܺܝܢ ܡܶܢܶܗ ܒܰܡܪ̈ܰܘܡܶܐ܆ ܘܰܒܥܽܘܒܳܗ ܕܡܰܪܝܰܡ܆ ܝܰܪ̈ܚܶܐ ܬܶܫܥܳܐ ܐܶܙܕܰܝܰܚ܆ ܟܰܕ ܗܽܘ ܒܓܰܘ ܟܰܪܣܳܐ܆ ܨܳܐܰܪ ܥܽܘ̈ܠܶܐ ܒܟܰܪ̈ܣܳܬܳܐ܆ ܟܰܕ ܝܳܢܶܩ ܚܰܠܒܳܐ܆ ܘܛܽܘ̈ܦܰܝ ܡܶܛܪܳܐ ܓܳܠܶܦ ܗ̱ܘܳܐ܀

ܒܝܰܘܡܳܐ ܕܣܽܘܒܳܪܶܟܝ܆ ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ܆ ܐܰܦܺܝܣܝ ܠܺܝܚܺܝܕܶܟܝ܆ ܕܢܰܫܪܶܐ ܫܰܝܢܶܗ ܒܰܒܪܺܝܬܳܐ܆ ܩܪ̈ܳܒܶܐ ܢܶܬܒܰܛܠܽܘܢ܆ ܘܡܰܠ̈ܟܶܐ ܒܫܰܝܢܳܐ ܢܶܬܒܰܣܡܽܘܢ܆ ܘܥܺܕܬܳܐ ܥܰܡ ܝܰܠ̈ܕܶܝܗ̇܆ ܬܶܙܡܰܪ ܫܽܘܒܚܳܐ ܠܺܝܚܺܝܕܶܟܝ܀

ܣܽܘܓܺܝܬܳܐ

ܩܳܠܳܐ ܒܩ̄: ܥܰܡܳܐ ܘܥܰܡ̱̈ܡܶܐ

ܥܽܘܢܺܝܬܳܐ: ܫܽܘܒܚܳܐ ܠܳܟ ܡܳܪܝ ܕܰܒܡܶܐܬܝܳܟ܆ ܦܢܰܘ ܚܰܛܳܝ̈ܶܐ ܡܶܢ ܥܰܘܠܗܽܘܢ.

ܚܰܝܠܶܗ ܕܰܐܒܳܐ ܕܰܢܚܶܬ ܫܪܳܐ܆ ܒܥܽܘܒܳܐ ܒܬܽܘܠܳܐ ܕܚܽܘܒܶܗ ܥܨܳܝܗ̱ܝ܆ ܗܰܒ ܠܺܝ ܩܳܠܳܐ ܕܶܐܡܰܠܶܠ܆ ܫܰܪܒܳܟ ܪܰܒܳܐ ܕܠܳܐ ܡܶܬܕܪܶܟ܀

ܗܰܒܠܺܝ ܐܶܩܪܽܘܒ ܡܳܪܶܐ ܟܽܠ܆ ܟܰܕ ܕܳܚܶܠ ܐ̱ܢܳܐ ܡܶܢ ܡܰܫܩܠܶܗ܆ ܕܪܺܝܫܳܐ ܕܥܺܝܪ̈ܶܐ ܟܰܕ ܣܰܒܪܳܗ̇܆ ܠܶܐܡܳܐ ܛܠܺܝܬܳܐ ܥܰܠ ܡܶܐܬܝܳܟ܀

ܐܰܒܳܐ ܒܚܽܘܒܶܗ ܠܰܒܪܶܗ ܫܠܰܚ܆ ܕܢܶܚܽܘܬ ܢܶܦܪܽܘܩ ܠܰܓܒܺܝܠܬܶܗ܆ ܘܰܠܓܰܒܪܺܐܶܝܠ ܥܺܝܪܳܐ ܦܩܰܕ܆ ܢܰܬܩܶܢ ܐܽܘܪܚܳܐ ܩܕܳܡ ܡܰܚܬܶܗ܀

ܛܳܣ ܢܽܘܪܳܢܳܐ ܘܰܢܚܶܬ ܡܛܳܐ܆ ܠܰܡܓܰܙܰܝܬܳܐ ܘܥܽܘܬܪܳܐ ܡܠܳܗ̇܆ ܫܠܳܡܳܐ ܝܰܗ̱ܒܠܳܗ̇ ܐܳܦ ܣܰܒܪܳܗ̇܆ ܡܶܛܽܠ ܒܰܛܢܳܐ ܡܰܬܗܰܪ ܟܽܠ܀

ܐܳܡܪܳܐ ܡܰܪܝܰܡ ܡܰܢ ܐܰܢ̱ܬ ܡܳܪܝ܆ ܘܡܳܢܰܘ ܗܳܢܳܐ ܕܰܡܡܰܠܠܰܬ܆ ܪܰܚܺܝܩ ܗ̱ܽܘ ܡܶܢܝ ܡܽܘܢ ܕܳܐܡܪܰܬ܆ ܘܡܳܢܰܘ ܚܰܝܠܶܗ ܠܳܐ ܝܳܕܥܳܢ܀

ܒܳܥܝܳܐ ܐ̱ܢܳܐ ܡܳܪܝ ܠܳܐ ܬܰܪܗܒܰܢܝ܆ ܓܽܘܡܪ̈ܶܐ ܥܛܺܝܦ ܐܰܢ̱ܬ ܠܳܐ ܬܰܘܩܕܰܢܝ܆ ܢܽܘܟܪܳܝܰܐ ܗ̱ܘ ܠܺܝ ܡܽܘܢ ܕܳܐܡܪܰܬ܆ ܘܰܐܕܪܶܟ ܚܰܝܠܶܗ ܠܳܐ ܡܶܫܟܚܳܢ܀

ܓܰܘܙܰܠܬܳܐ ܐܰܢ̱ܬ ܠܳܐ ܬܰܕܚܠܰܢܝ܆ ܓܽܘܡܪ̈ܶܐ ܠܒܺܝܫ ܐܰܢ̱ܬ ܠܳܐ ܬܣܰܪܕܰܢܝ܆ ܐܳܘ ܢܽܘܪܳܢܳܐ ܠܡܽܘܢ ܐܰܫܪܳܟ܆ ܕܟܽܠ ܚܰܕ̈ܬܳܬܳܐ ܠܺܝ ܡܡܰܠܠܰܬ܀

ܕܳܚܠܳܐ ܐ̱ܢܳܐ ܡܳܪܝ ܕܶܐܩܰܒܠܳܟ܆ ܕܳܐܦ ܐܶܡܝ ܚܰܘܳܐ ܟܰܕ ܩܰܒܠܰܬ܆ ܠܚܶܘܝܳܐ ܕܡܰܠܶܠ ܐܰܝܟ ܪܳܚܡܳܐ܆ ܡܶܢ ܬܶܫܒܽܘܚܬܳܗ̇ ܐܶܫܬܰܠܚܰܬ܀

ܗܳܢܳܐ ܫܰܪܒܳܐ ܕܰܐܝܬܺܝܬ ܠܺܝ܆ ܣܰܓܺܝ ܥܣܶܩܽ ܗ̱ܘ ܠܳܐ ܬܥܰܕܠܰܢܝ܆ ܕܠܰܒܬܽܘܠܬܳܐ ܒܪܳܐ ܠܳܐ ܡܶܬܚܙܶܐ܆ ܐܳܦܠܳܐ ܒܟܰܪܣܳܐ ܐܰܠܳܗܳܐ܀

ܘܰܥܕܳܟ ܫܰܦܺܝܪ ܐܳܦ ܡܶܐܬܝܳܟ܆ ܐܶܠܽܘ ܟܝܳܢܳܐ ܠܳܐ ܡܙܺܝܥ ܠܺܝ܆ ܘܗܽܘ ܡܦܰܠܶܓ ܠܺܝ ܥܰܠ ܡܶܐܬܝܳܟ܆ ܕܰܐܝܟܰܢ ܦܺܐܪܳܐ ܒܰܒܬܽܘܠܬܳܐ܀

ܙܳܥܶܬ ܠܺܝ ܡܳܪܝ ܘܶܐܣܬܰܪܕܶܬ܆ ܘܟܰܕ ܕܳܚܠܳܐ ܐ̱ܢܳܐ ܠܳܐ ܡܗܰܝܡܢܳܢ܆ ܕܳܐܦ ܗܽܘ ܟܝܳܢܳܐ ܠܳܐ ܡܦܺܝܣ ܠܺܝ܆ ܕܰܒܬܽܘ̈ܠܳܬܳܐ ܠܳܐ ܝܳܠ̈ܕܳܢ܀

ܚܶܙܘܳܟ ܝܰܩܺܝܪ ܘܫܰܪܒܳܟ ܕܚܺܝܠ܆ ܘܫܰܠܗܶܒܺܝܬܳܟ ܡܶܬܓܰܘܙܠܳܐ܆ ܩܢܽܘܡܶܗ ܕܡܳܪܳܟ ܠܳܐ ܡܶܬܒܨܶܐ܆ ܘܕܰܐܫܰܪ ܗܳܕܶܐ ܥܰܣܩܳܐ ܗ̱ܝ ܠܺܝ܀

ܛܠܺܝܬܳܐ ܐܶܢܳܐ ܘܠܳܐ ܡܶܫܟܚܳܢ܆ ܠܓܰܒܪܳܐ ܕܢܽܘܪܳܐ ܐܶܩܰܒܶܠ܆ ܕܰܟܣܶܐ ܗ̱ܽܘ ܫܰܪܒܳܐ ܕܰܡܡܰܠܠܰܬ܆ ܘܰܡܣܰܪܶܕ ܠܺܝ ܕܶܐܩܰܒܠܺܝܘܗ̱ܝ܀

ܝܰܘܡܳܢ ܬܶܗܪܶܬ ܘܶܐܬܕܰܡܪܶܬ܆ ܒܗܳܠܶܝܢ ܟܽܠܗܶܝܢ ܕܶܐܡܰܪܬ ܠܺܝ܆ ܘܕܳܚܠܳܐ ܐ̱ܢܳܐ ܡܳܪܝ ܕܶܐܩܰܒܠܳܟ܆ ܕܠܳܐ ܒܓܰܘ ܡܶܠܬܳܟ ܢܶܟܠܳܐ ܟܣܶܐ܀

ܟܝܳܢܳܐ ܕܥܶܠܳܝ ܡܶܢ ܐ̱ܢܳܫ̈ܳܐ܆ ܘܡܶܢ ܬܶܓ̈ܡܶܐ ܕܥܺܝܪ̈ܰܝ ܪܰܘܡܳܐ܆ ܡܶܠܬܶܗ ܕܰܐܒܳܐ ܫܡܰܝܳܢܳܐ܆ ܕܳܢܰܚ ܡܶܢܶܟܝ ܐܳܘ ܒܬܽܘܠܬܳܐ܀

ܠܺܝ ܡܬܽܘܡ ܓܰܒܪܳܐ ܠܳܐ ܚܟܺܝܡ ܠܺܝ܆ ܘܰܒܙܽܘܘܳܓܳܐ ܠܳܐ ܪܓܺܝܫܳܢ܆ ܘܰܐܝܟܰܢ ܡܰܨܝܳܐ ܡܽܘܢ ܕܳܐܡܰܪܬ܆ ܕܰܕܠܳܐ ܢܶܩܦܳܐ ܢܶܗܘܶܐ ܒܪܳܐ܀

ܡܳܕܶܝܢ ܥܺܝܪܳܐ ܠܳܐ ܡܰܗܦܟܳܢ܆ ܕܪܽܘܚܳܐ ܕܩܽܘܕܫܳܐ ܐܳܬܶܐ ܠܘܳܬܝ܆ ܐܰܡܬܶܗ ܐܶܢܳܐ ܘܫܰܠܺܝܛ ܥܠܰܝ܆ ܢܶܗܘܶܐ ܠܺܝ ܡܳܪܝ ܐܰܝܟ ܡܶܠܬܳܟ܀

ܢܶܬܬܪܺܝܡ ܪܺܝܫܝ ܐܰܟܡܳܐ ܕܳܐܡܰܪܬ܆ ܘܰܐܘܕܶܐ ܠܰܫܡܶܗ ܟܰܕ ܚܳܕܝܳܢ܆ ܕܶܐܢ ܐܰܢ̱ܬ ܥܰܒܕܶܗ ܗܳܟܰܢ ܦܶܐܝܬ܆ ܠܡܽܘܢ ܕܳܡܶܐ ܗܽܘ ܐܶܢ ܝܳܕܥܰܬ܀

ܣܶܕܪ̈ܶܐ ܘܛܶܟ̈ܣܶܐ ܕܓܰܘܙܰܠܬܳܐ܆ ܠܳܐ ܡܨܶܝܢ ܩܳܪܒܺܝܢ ܠܒܶܝܬ ܘܰܥܕܶܗ܆ ܘܰܐܝܟܰܢ ܡܰܨܝܳܐ ܕܒܺܝ ܢܶܫܪܶܐ܆ ܓܰܒܪܳܐ ܕܢܽܘܪܳܐ ܦܰܫܶܩ ܠܺܝ܀

ܥܺܝܪܳܐ ܓܠܺܝ ܠܺܝ ܠܡܽܘܢ ܟܰܝ ܫܦܰܪ܆ ܠܡܳܪܳܟ ܕܢܶܫܪܶܐ ܒܡܶܣܟܺܢ̱ܬܳܐ܆ ܕܗܳܐ ܒܢ̈ܳܬ ܡܰܠ̈ܟܶܐ ܥܳܠܡܳܐ ܡܠܶܐ܆ ܘܒܺܝ ܠܡܳܢܳܐ ܨܒܳܐ ܕܰܡܓܰܙܝܳܢ܀

ܦܰܐܝܳܐ ܠܡܳܪܳܟ ܘܰܦܫܺܝܩ ܠܶܗ܆ ܟܽܠ ܡܳܐ ܕܨܳܒܶܐ ܘܫܰܠܺܝܛ ܠܶܗ܆ ܐܰܡܬܶܗ ܐܶܢܳܐ ܐܰܝܟ ܡܶܠܬܳܟ܆ ܘܰܐܝܟ ܨܶܒܝܳܢܶܗ ܢܶܣܥܽܘܪ ܠܘܳܬܝ܀

ܨܳܒܝܳܐ ܐ̱ܢܳܐ ܡܳܪܝ ܕܶܐܫܰܐܠܳܟ܆ ܬܽܘܒ ܦܰܫܶܩ ܠܺܝ ܥܝܳܕܰܘ̈ܗ̱ܝ ܕܡܳܪܝ܆ ܕܰܫܪܶܐ ܠܶܗ ܒܺܝ ܘܠܳܐ ܝܶܕܥܶܬ܆ ܡܽܘܢ ܐܶܥܒܶܕ ܠܶܗ ܕܠܳܐ ܢܶܬܬܫܺܝܛ܀

ܩܰܕܺܝܫ ܘܰܫܒܺܝܚ ܘܰܒܪܺܝܟ ܫܡܶܗ܆ ܕܰܒܡܽܘܟܳܟܳܗ̇ ܚܳܪ ܕܰܐܡܬܶܗ܆ ܛܽܘܒܳܐ ܡܶܟܺܝܠ ܢܶܬܠܳــ̈ـܢ ܠܺܝ܆ ܟܽܠ ܫܰܪ̈ܒܳܬܳܐ ܕܰܒܥܳܠܡܳܐ܀

ܪܰܒ ܗ̱ܽܘ ܐ̱ܪܳܙܶܗ ܘܠܳܐ ܡܶܬܡܫܰܚ܆ ܘܰܒܣܶܦ̈ܘܳܬܳܐ ܠܳܐ ܡܶܬܪܬܶܡ܆ ܕܠܳܐ ܐܳܚܕܳܐ ܠܶܗ ܫܡܰܝܳܐ ܠܥܶܠ܆ ܗܳܐ ܣܶܦܩܰܬ ܠܶܗ ܟܰܪܣܳܐ ܠܬܰܚܬ܀

ܫܡܰܝܳܐ ܘܥܺܝܪ̈ܶܐ ܢܶܚܕܽܘܢ ܠܥܶܠ܆ ܘܰܐܪܥܳܐ ܬܶܪܘܰܙ ܒܰܒܬܽܘܠܬܳܐ܆ ܕܰܗܘܳܬ ܐܶܡܳܐ ܠܡܳܪܶܐ ܟܽܠ܆ ܘܒܶܗ ܐܶܫܬܰܝܰܢܘ ܓܰܒ̈ܶܐ ܬܪܶܝܢ܀

ܬܰܘܕܺܝ ܠܳܟ ܡܳܪܝ ܡܶܢ ܟܽܠܗܽܘܢ܆ ܥܳܠ̈ܡܰܝ ܢܽܘܪܳܐ ܕܠܳܐ ܡܶܬܚܙܶܝܢ܆ ܘܡܶܢ ܟܽܠ ܦܽܘ̈ܡܺܝܢ ܕܰܒܥܳܠܡܳܐ܆ ܬܶܙܡܰܪ ܐܰܪܥܳܐ ܠܳܟ ܬܶܫܒ̈ܚܳܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܡܰܠܰܐܟܳܐ ܕܒܶܣܪܳܐ ܐܺܝܬܰܘܗ̱ܝ ܝܰܕܽܘܥܬܳܢܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܡܰܪܝܰܡ ܕܺܝܠܶܕܬܳܟ܆

ܒܰܨܠܽܘܬܳܗ̇ ܘܚܺܝܠ ܒܳܥܽܘܬܳܗ̇ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܓܰܒܪܺܐܶܝܠ ܪܺܝܫ ܡܰܠܰܐܟ̈ܶܐ: ܪܶܡܙܳܐ ܩܰܒܶܠ ܟܰܣܝܳܐܝܺܬ: ܘܰܦܪܰܚ ܒܶܐܒܪ̈ܶܐ ܩܰܠܺܝ̈ܠܶܐ: ܘܰܡܛܳܐ ܠܢܳܨܪܰܬ ܨܶܝܕ ܡܰܪܝܰܡ: ܘܚܰܘܺܝ ܢܰܦܫܶܗ ܠܰܕܟܺܝܬܳܐ: ܒܣܰܝܒܽܘܬܳܐ ܟܢܺܝܟܰܬ ܚܶܙܘܳܐ: ܕܠܳܐ ܬܶܕܚܰܠ ܡܰܠܝܰܬ ܫܽܘܦܪ̈ܶܐ: ܘܢܶܫܪܶܐ ܙܰܘܥܳܐ ܒܗܰܕܳܡܶܝ̈ܗ̇: ܡܳܐ ܕܥܺܝܪܳܐ ܡܡܰܠܶܠ ܥܰܡܳܗ̇: ܡ̈ܶܠܶܐ ܕܡܰܠ̈ܝܳܢ ܕܽܘܡܳܪܳܐ܀

ܐܳܡܰܪ ܥܺܝܪܳܐ ܠܰܒܬܽܘܠܬܳܐ: ܫܠܳܡ ܠܶܟܝ ܡܰܠܝܰܬ ܛܰܝܒܽܘܬܳܐ: ܐܶܫܟܰܚܬ ܓܶܝܪ ܠܘܳܬ ܐܰܠܳܗܳܐ: ܛܰܝܒܽܘܬܳܐ ܕܪܳܡܳܐ ܡܶܢ ܟܽܠ: ܡܶܢ ܗܳܫܳܐ ܬܩܰܒܠܺܝܢ ܒܰܛܢܳܐ: ܘܬܺܐܠܕܺܝܢ ܦܺܐܪܳܐ ܡܰܚܶܐ ܟܽܠ: ܪܽܘܚܩܽܘܕܫܳܐ ܢܺܐܬܶܐ ܠܘܳܬܶܟܝ: ܘܚܺܝܠ ܥܶܠܳܝܳܐ ܢܰܓܶܢ ܒܶܟܝ: ܘܡܶܢܶܟܝ ܕܳܢܰܚ ܒܰܒܪܺܝܬܳܐ: ܐܰܠܳܗܳܐ ܓܰܢ̱ܒܳܪ ܥܳܠ̈ܡܶܐ܀

ܐ̱ܚܪܺܢܳܐ

ܐܳܡܪܳܐ ܒܬܽܘܠܬܳܐ ܠܡܰܠܰܐܟܳܐ܆ ܕܰܐܝܟܰܢܳܐ ܬܶܗܘܶܐ ܗܳܕܶܐ܆ ܕܗܳܐ ܐܶܢܳܐ ܠܰܡ ܒܬܽܘܠܬܳܐ ܐ̱ܢܳܐ܆ ܘܓܰܒܪܳܐ ܡܶܡܬܽܘܡ ܠܳܐ ܚܟܺܝܡ ܠܺܝ܀

ܫܽܘܒܚܳܐ ܠܚܰܝܠܶܗ ܕܥܶܠܳܝܳܐ܆ ܕܰܨܒܳܐ ܕܢܶܗܘܶܐ ܒܰܪܢܳܫܳܐ܆ ܫܽܘܒܚܳܐ ܠܗܰܘ ܕܰܟܣܶܐ ܡܶܢ ܟܽܠ܆ ܕܰܗܘܳܐ ܒܶܣܪܳܐ ܘܰܐܓܶܢ ܒܰܢ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܡܰܪܝܰܡ ܕܺܝܠܶܕܬܳܟ܆

ܒܰܨܠܽܘܬܳܗ̇ ܘܚܺܝܠ ܒܳܥܽܘܬܳܗ̇ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀