ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܫܠܳܡ ܠܶܟܝ ܒܺܝܪܬܳܐ ܡܫܰܠܰܠܬܳܐ: ܕܰܡܠܶܟ ܡܰܠ̈ܟܶܐ ܫܳܪܶܐ ܒܶܟܝ: ܠܥܶܠ ܒܰܬܪܽܘܢܽܘܣ ܐܰܪܦܺܝܬܶܗ: ܘܗܳܪܟܳܐ ܨܶܝܕܰܝܟܝ ܐܶܫܟܰܚܬܶܗ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܓܰܒܪܺܐܶܝܠ ܪܺܝܫ ܡܰܠܰܐܟ̈ܶܐ: ܐܶܡܰܪ ܡܒܰܪܰܟܬܳܐ ܡܰܪܝܰܡ: ܫܠܳܡ ܠܶܟܝ ܡܰܠܝܰܬ ܛܰܝܒܽܘܬܳܐ: ܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܩܪܶܒ ܥܺܝܪܳܐ ܘܰܐܪܟܶܢ ܪܺܝܫܶܗ: ܩܽܘܕܡܰܬ ܡܳܪܶܗ ܒܰܛܠܺܝܬܳܐ: ܣܓܶܕ ܠܶܗ ܕܰܚܙܳܐ ܕܰܫܪܳܐ ܒܳܗ̇: ܡܳܪܳܐ ܕܥܺܝܪ̈ܶܐ ܘܰܕܐ̱ܢܳܫ̈ܳܐ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܐܳܡܪܳܐ ܒܬܽܘܠܬܳܐ ܠܡܰܠܰܐܟܳܐ: ܡܰܢܽܘ ܡܳܪܳܟ ܠܳܐ ܝܳܕܥܳܢܝ: ܘܡܰܢܽܘ ܗܰܘ ܕܰܠܘܳܬܝ ܫܰܕܪܳܟ: ܘܡܳܢܰܘ ܫܠܳܡܳܟ ܕܠܳܐ ܒܰܥܝܳܕ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܢܶܬܕܟܰܪ ܐܶܢܽܘܢ ܠܰܐܒܳܗܰܝ̈ܢ: ܕܡܰܠܦܺܝܢ ܗ̱ܘܰܘ ܠܰܢ ܟܰܕ ܚܰܝܺܝ̈ܢ: ܕܢܶܗܘܶܐ ܒܢܰܝ̈ܳܐ ܠܰܐܠܳܗܳܐ: ܒܪܳܐ ܕܰܐܠܳܗܳܐ ܢܢܺܝܚ ܐܶܢܽܘܢ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܬܰܘܕܺܝܬܳܐ ܠܳܟ ܡܳܪܶܐ ܟܽܠ: ܡܶܢ ܟܽܠ ܦܽܘܡܺܝ̈ܢ ܫܰܘܝܳܐܺܝܬ: ܕܰܠܫܽܘܒܚܳܟ ܬܰܩܶܢܬ ܐܶܢܽܘܢ: ܕܢܶܬܠܽܘܢ ܫܽܘܒܚܳܐ ܠܺܐܝܬܽܘܬܳܟ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܐ̱ܚܪܺܢܳܐ

ܒܪܺܝܟܬܳܐ ܕܢܶܫ̈ܶܐ ܡܳܪܝ ܥܰܡܶܟܝ܆ ܘܡܶܢܶܟܝ ܕܳܢܰܚ ܦܳܪܽܘܩܳܐ܆ ܘܡܰܢܗܰܪ ܠܟܽܠܗܶܝܢ ܒܶܪ̈ܝܳܬܳܐ܆ ܕܚܶܫܽܘ̈ܟܳܢ ܗ̱ܘܰܝ̈ ܒܰܚܛܺܝܬܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܪܰܘܡܳܐ ܘܥܽܘܡܩܳܐ ܠܶܗ ܢܰܘܕܽܘܢ܆ ܥܺܝܪ̈ܶܐ ܘܐ̱ܢܳܫ̈ܳܐ ܠܶܗ ܢܫܰܒܚܽܘܢ܆ ܕܰܢܚܶܬ ܘܰܫܪܳܐ ܒܰܒܬܽܘܠܬܳܐ܆ ܕܢܶܦܪܽܘܩ ܠܳܐܕܳܡ ܘܰܠܝܰܠ̈ܕܰܘܗ̱ܝ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܡܶܢ ܢܽܘܓܪܳܐ ܕܰܩܕܳܡ ܕܳܪ̈ܶܐ܆ ܡܠܰܟ ܐܰܒܳܐ ܠܰܐܒܪܳܡ ܘܕܰܘܺܝܕ܆ ܥܰܠ ܝܰܠܕܶܗ ܕܰܥܬܺܝܕ ܕܢܶܕܢܰܚ܆ ܡܶܢ ܡܰܪܝܰܡ ܒܚܰܪܰܬ ܙܰܒ̈ܢܶܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܡܶܢ ܪܰܘܡܳܐ ܒܝܰܕ ܓܰܒܪܺܐܶܝܠ܆ ܫܠܰܚ ܐܰܒܳܐ ܣܒܰܪܬܳܐ ܠܡܰܪܝܰܡ܆ ܕܡܶܢ ܥܽܘܒܳܗ̇ ܬܽܘܒ ܢܶܬܺܝܠܶܕ܆ ܦܳܪܽܘܩܳܐ ܕܟܽܠ ܒܶܪ̈ܝܳܬܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ
ܒܪܺܝܟ݂ ܗ̱ܽܘ ܕܫܰܡܠܺܝ ܐܰܓܽܘܢܳܟ݂ (ܣܳܠܶܩ: ܐܶܢܳܐ ܐ̱ܢܳܐ ܢܘܽܗܪܳܐ ܫܰܪܝܪܳܐ)

ܛܳܣ ܥܺܝܪܳܐ ܘܰܦܪܰܚ ܘܰܢܚܶܬ. ܡܶܢ ܪܰܘܡܳܐ ܠܰܫܠܳܡܳܗ̇ ܕܡܰܪܝܰܡ. ܘܰܣܓܶܕ ܠܳܗ̇ ܘܝܰܗ̱ܒ ܠܳܗ̇ ܐܶܓܰܪܬܳܐ. ܕܡܰܠܝܳܐ ܫܠܳܡܳܐ ܘܣܰܒܪܳܐ ܠܥܳܠܡܳܐ. ܬܶܡܗܰܬ ܡܰܪܝܰܡ ܒܰܚܙܳܬܶܗ: ܘܫܰܪܝܰܬ ܕܬܺܐܡܰܪ ܗܳܟܰܢܳܐ: ܡܰܢܽܘ ܡܳܪܝ ܐܺܝܬܰܝܟ. ܘܡܰܢܽܘ ܕܰܡܣܰܒܰܪ ܐܰܢ̱ܬ ܠܺܝ܀

ܫܽܘܒܚܳܐ

ܨܪܳܐ ܢܽܘܪܳܢܳܐ ܠܓܰܘܙܰܠܬܳܐ: ܘܕܳܫ ܥܰܠ ܓܽܘܡܪ̈ܶܐ ܒܰܝܢܳܬ ܓܺܝ̈ܓܠܶܐ. ܘܣܰܕܩܶܗ ܠܳܐܐܰܪ ܟܰܕ ܢܳܚܶܬ: ܘܰܡܛܳܐ ܠܢܳܨܪܰܬ ܨܶܝܕ ܡܰܪܝܰܡ. ܘܶܐܡܰܪ ܠܳܗ̇ ܫܠܳܡܳܐ ܥܰܡܶܟܝ: ܡܳܪܰܢ ܥܰܡܶܟܝ ܡܒܰܪܰܟܬܳܐ: ܦܺܐܪܳܐ ܕܰܒܟܰܪܣܶܟܝ. ܡܰܥܒܰܪ ܚܶܣܕܳܐ ܕܒܶܝܬ ܐܳܕܳܡ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܰܒܠܳܗ̇ ܠܥܺܕܬܳܟ
ܫܠܳܡ ܠܳܟ ܐܳܘ ܓܰܒܝܳܐ

ܐܳܡܪܳܐ ܠܶܗ ܡܰܪܝܰܡ܆ ܠܡܰܠܰܐܟܳܐ ܕܡܳܢܰܘ ܫܰܪܒܳܟ ܘܡܰܢܽܘ ܫܰܠܚܳܟ ܨܶܐܕܰܝ ܡܶܣܟܺܢ̱ܬܳܐ܆ ܕܡܳܪܳܟ ܡܰܢ ܐܺܝܬܰܘܗ̱ܝ܆ ܕܠܳܐ ܚܙܶܐ ܠܺܝ ܘܠܳܐ ܝܳܕܥܳܢ ܠܶܗ܆ ܘܰܐܝܟܰܢ ܬܶܗܘܶܐ܆ ܗܳܕܶܐ ܐܰܝܟ ܕܶܐܡܰܪܬ܀

ܫܽܘܒܚܳܐ

ܒܝܰܘܡܳܐ ܕܒܶܗ ܣܰܒܰܪ܆ ܓܰܒܪܺܐܶܝܠ ܠܶܐܡܳܟ ܒܬܽܘܠܬܳܐ܆ ܡܶܛܽܠ ܒܰܛܢܳܟ ܡܶܠܬܳܐ ܐܰܠܳܗܳܐ܆ ܬܗܰܪܘ ܥܺܝܪ̈ܶܐ ܒܪܰܘܡܳܐ܆ ܕܰܫܦܰܪ ܠܳܟ ܕܬܶܗܘܶܐ ܐ̱ܢܳܫܳܐ܆ ܡܶܛܽܠ ܐܳܕܳܡ܆ ܕܰܒܠܺܝ ܒܰܚܛܺܝܬܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܘܳܝܳܐ ܠܣܰܟ̈ܠܶܐ܆ ܡܳܐ ܕܚܳܙܶܝܢ ܠܗܽܘܢ ܠܰܒܢܰܝ̈ ܢܽܘܗܪܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܫܪܳܐ: ܒܥܽܘܒܳܗ̇ ܕܡܰܪܝܰܡ ܕܰܢܚܰܪܰܪ ܟܽܠ.

ܐܳܡܰܪ ܥܺܝܪܳܐ: ܐܰܒܳܐ ܨܒܳܐ ܒܶܟܝ ܕܬܶܗܘܶܝܢ ܐܶܡܳܐ: ܠܺܝܚܺܝܕܳܝܶܗ ܘܪܽܘܚܳܐ ܡܩܰܒܠܰܬܝ: ܘܰܒܪܳܐ ܝܳܠܕܰܬܝ ܕܠܳܐ ܙܽܘܘܳܓܳܐ: ܘܡܶܢ ܓܰܘ ܥܽܘܒܶܟܝ: ܕܳܢܰܚ ܫܶܡܫܳܐ ܕܙܰܕܺܝܩܽܘܬܳܐ܀

ܡܶܠܬܳܐ ܢܶܚܬܰܬ: ܡܶܢ ܡܶܕܝܳܪ̈ܶܐ ܪ̈ܳܡܶܐ ܕܰܠܥܶܠ: ܘܶܐܕܢܳܗ̇ ܕܡܰܪܝܰܡ ܩܰܒܶܠܬܳܗ̇ ܗ̱ܘܳܬ: ܕܺܐܝܬܶܝܗ̇ ܬܰܪܥܳܐ ܕܰܐܥܶܠ ܡܰܘܬܳܐ: ܘܥܰܠܘ ܗ̱ܘܰܘ ܚܰܝ̈ܶܐ: ܕܢܶܫܪܽܘܢ ܡܰܘܬܳܐ ܕܩܰܛܠܶܗ ܠܳܐܕܳܡ܀

ܦܪܰܚ ܗ̱ܘܳܐ ܥܺܝܪܳܐ: ܡܶܢ ܒܶܝܬ ܣܶܕܪ̈ܶܐ ܕܰܫ̈ܡܰܝܳܢܶܐ: ܘܰܡܛܳܐ ܠܢܳܨܪܰܬ ܒܙܰܘܥܳܐ ܪܰܒܳܐ: ܚܙܳܗ̇ ܠܰܒܬܽܘܠܬܳܐ ܕܰܪܓܺܝܓܳܐ ܗ̱ܘܳܬ: ܘܡ̈ܶܠܶܐ ܕܰܫܡܰܥ: ܡܰܠܶܠ ܥܰܡܳܗ̇ ܕܛܽܘܒܳܢܺܝܬܳܐ܀

ܫܶܡܥܰܬ ܡܰܪܝܰܡ: ܡܶܠܬܶܗ ܕܥܺܝܪܳܐ ܘܰܐܚܕܳܗ̇ ܬܶܗܪܳܐ: ܘܥܰܡ ܚܰܕܽܘܬܳܐ ܥܢܳܬ ܘܶܐܡܪܰܬ ܠܶܗ: ܐܰܝܟܰܢ ܢܶܗܘܶܐ ܡܽܘܢ ܕܳܐܡܰܪ ܐܰܢ̱ܬ: ܐܰܝܕܳܐ ܒܬܽܘܠܬܳܐ: ܩܰܒܠܰܬ ܒܰܛܢܳܐ ܐܰܝܟ ܕܳܐܡܰܪ ܐܰܢ̱ܬ܀

ܐ̱ܚܪܺܢܳܐ

ܩܳܠܳܐ ܒܩ̄: ܟܰܠܰܬ ܡܰܠܟܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܫܰܕܰܪ ܐܺܝܙܓܰܕܶܗ܆ ܘܣܰܒܪܳܗ̇ ܠܰܒܬܽܘܠܬܳܐ ܥܰܠ ܒܰܛܢܶܗ.

ܟܰܕ ܛܠܺܝܬܳܐ ܗ̱ܘܺܝܬ ܪܰܒܝܽܘܢܝ܆ ܟܳܗ̈ܢܰܝ ܥܰܡܳܐ ܒܓܰܘ ܒܶܝܬ ܩܽܘܕܫܳܐ܆ ܘܗܳܫܳܐ ܕܰܗܘܺܝܬ ܥܠܰܝܡܬܳܐ܆ ܐܶܬܳܐ ܘܡܰܟܪܰܢܝ ܟܺܐܢܳܐ ܝܰܘܣܶܦ܆ ܓܰܒܪܳܐ ܕܢܽܘܪܳܐ܆ ܐܶܬܳܐ ܘܣܰܒܪܰܢܝ܆ ܘܝܰܗ̱ܒܠܺܝ ܫܠܳܡܳܐ܆ ܘܩܰܒܠܶܬ ܒܰܛܢܳܐ܆ ܘܶܐܙܶܠ̱ܬ ܘܺܝܠܶܕܬܶܗ܆ ܒܽܐܘܪܝܳܐ ܕܒܶܝܬ ܠܚܶܡ܆ ܘܚܰܕܺܝ ܒܡܰܘܠܳܕܶܗ ܠܒܶܪ̈ܝܳܬܳܐ܀

ܗܳܐ ܠܰܡ ܐܶܢܳܐ ܐܰܡܬܶܗ܆ ܕܡܳܪܝ ܗܰܘ ܕܰܩܪܰܝܬ ܐܰܝܟ ܕܰܐܢ̱ܬ ܥܰܒܕܶܗ܆ ܫܰܠܺܝܛܽ ܗ̱ܘ ܠܶܗ ܠܡܳܪܳܐ ܕܢܶܫܪܶܐ܆ ܒܰܥܒܳܕ ܐܺܝ̈ܕܰܘܗ̱ܝ ܕܰܨܒܰܘ ܪ̈ܰܚܡܰܘܗ̱ܝ܆ ܢܶܗܘܶܐ ܠܺܝ ܡܳܪܝ܆ ܐܰܝܟ ܕܣܰܒܰܪܬܳܢܝ܆ ܘܢܶܦܪܽܘܩ ܠܓܶܢܣܰܢ܆ ܕܰܒܠܺܝ ܒܰܫܝܽܘܠ܆ ܫܽܘܒܚܳܐ ܠܚܰܢܳܢܳܐ܆ ܕܚܳܢܳܗ̇ ܠܐ̱ܢܳܫܽܘܬܰܢ܆ ܬܰܘܕܺܝ ܠܛܰܝܒܽܘܬܶܗ ܕܚܰܝ݂ܕܰܢ ܠܶܗ܀

ܐܳܡܰܪ ܥܺܝܪܳܐ ܠܰܒܬܽܘܠܬܳܐ܆ ܠܳܐ ܬܶܬܪܰܗܒܺܝܢ ܡܰܠܝܰܬ ܪ̈ܰܚܡܶܐ܆ ܪܽܘܚܳܐ ܕܩܽܘܕܫܳܐ ܢܺܐܬܶܐ܆ ܘܚܺܝܠ ܥܶܠܳܝܳܐ ܢܰܓܶܢ ܥܠܰܝܟܝ܆ ܕܡܶܬܺܝܠܶܕ ܒܶܟܝ܆ ܠܰܡ ܩܰܕܺܝܫܰܐ ܗ̱ܘ܆ ܒܪܶܗ ܕܥܶܠܳܝܳܐ܆ ܬܽܘܒ ܢܶܬܩܪܶܐ܆ ܘܢܶܬܶܠ ܠܶܗ ܡܳܪܝܳܐ܆ ܟܽܘܪܣܝܳܐ ܗܰܘ ܕܕܰܘܺܝܕ܆ ܘܢܰܡܠܶܟ ܥܰܠ ܒܰܝܬܶܗ ܕܝܰܥܩܽܘܒ ܠܕܳܪܕܳܪ̈ܺܝܢ܀

ܐܶܡܪܰܬ ܡܰܪܝܰܡ ܠܥܺܝܪܳܐ܆ ܢܶܗܘܶܐ ܠܺܝ ܡܳܪܝ ܐܰܝܟܰܢ ܕܶܐܡܰܪܬ܆ ܢܺܐܬܶܐ ܘܢܶܫܪܶܐ ܐܰܝܟ ܕܶܐܨܛܒܺܝ܆ ܗܰܘ ܕܰܫܡܰܝܳܐ ܡܠܶܝܢ ܡܶܢ ܫܽܘܒܚܶܗ܆ ܬܰܘܕܺܝ ܠܚܽܘܒܶܗ܆ ܕܶܐܬܪܟܶܢ ܒܪ̈ܰܚܡܰܘܗ̱ܝ܆ ܨܶܝܕ ܡܶܣܟܺܢ̱ܬܳܐ܆ ܕܢܶܠܒܰܫ ܦܰܓܪܳܐ܆ ܘܢܶܦܪܽܘܩ ܠܰܓܒܺܝܠܬܶܗ܆ ܡܶܢ ܐܺܝ̈ܕܰܝ ܒܺܝܫܳܐ܆ ܘܢܰܦܢܶܝܘܗ̱ܝ ܠܰܐܒܺܝܕܳܐ ܠܝܳܪܬܽܘܬܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܐܳܦܪܰܬ

ܥܽܘܢܺܝܬܳܐ: ܠܳܟ ܬܶܫܒܽܘܚܬܳܐ ܝܰܠܕܳܐ ܓܢܺܝܙܳܐ܆ ܕܶܐܬܳܐ ܠܓܶܠܝܳܐ ܡܶܢ ܒܰܪ̱ܬ ܕܰܘܺܝܕ.

ܛܽܘܒܰܝܟܝ ܡܰܪܝܰܡ܆ ܕܰܫܡܰܥܝ̈ ܐܶܕܢܰܝ̈ܟܝ܆ ܫܠܳܡܳܐ ܫܰܦܝܳܐ ܒܝܰܕ ܓܰܒܪܺܐܶܝܠ܆ ܘܰܫ̈ܩܰܠܝ ܐܺܝ̈ܕܰܝܟܝ܆ ܗܳܝ ܐܶܓܰܪܬܳܐ܆ ܕܰܐܝܟ ܕܰܒܐ̱ܪܳܙܳܐ ܐܶܬܟܰܬܒܰܬ ܗ̱ܘܳܬ܆ ܛܽܘܒ ܠܥܽܘܒܶܟܝ ܕܶܐܬܩܰܕܰܫ ܒܡܰܚܬܶܗ܆ ܕܩܰܕܺܝܫܳܐ ܕܶܐܬܪܟܶܢ ܘܒܶܟܝ ܫܪܳܐ܆ ܛܽܘܒܳܐ ܠܥܰܝܢܰܝ̈ܟܝ܆ ܕܠܳܐ ܓܗܰܪ̈ܝ ܡܶܢ ܙܺܝܘܶܗ܆ ܕܡܳܪܳܐ ܕܒܶܪ̈ܝܳܬܳܐ܀

ܡܶܢ ܒܶܝܬ ܣܶܕܪ̈ܶܐ. ܕܰܫ̈ܡܰܝܳܢܶܐ܆ ܛܳܣ ܗ̱ܘܳܐ ܥܺܝܪܳܐ ܒܙܰܘܥܳܐ ܪܰܒܳܐ܆ ܘܰܛܥܺܝܢ ܣܰܩܪܳܐ܆ ܡܶܢ ܒܶܝܬ ܡܰܠܟܳܐ܆ ܘܦܰܬܚܳܗ̇ ܕܢܶܩܪܶܝܗ̇ ܐ̱ܪܳܙܳܢܳܐܺܝܬ܆ ܠܰܪ̈ܓܺܝܙܶܐ ܫܠܳܡܳܐ ܐܺܝܬ ܒܳܗ̇܆ ܠܡܳܝܽܘ̈ܬܶܐ ܣܰܒܪܳܐ ܪܫܺܝܡ ܒܳܗ̇܆ ܠܥܰܡ̱̈ܡܶܐ ܕܰܛܥܰܘ܆ ܕܢܶܬܦܢܽܘܢ ܠܰܐܬܪܗܽܘܢ܆ ܘܢܺܐܪܬܽܘܢ ܡܰܠܟܽܘܬܳܐ܀

ܫܠܳܡ ܠܶܟܝ ܐܶܡܳܐ. ܡܰܠܝܰܬ ܩܽܘ̈ܕܫܶܐ܆ ܩܥܳܐ ܓܰܒܪܺܐܶܝܠ ܠܰܡܒܰܪܰܟܬܳܐ܆ ܡܳܪܰܢ ܥܰܡܶܟܝ܆ ܒܪܺܝܟܬܳܐ ܕܢܶܫ̈ܶܐ܆ ܘܡܶܢܶܟܝ ܕܳܢܰܚ ܕܢܶܦܪܽܘܩ ܥܳܠ̈ܡܶܐ܆ ܫܠܳܡ ܠܶܟܝ ܕܰܗܘܰܝܬܝ ܠܶܗ ܫܟܺܝܢܬܳܐ܆ ܫܠܳܡ ܠܶܟܝ ܕܩܰܒܶܠܬܺܝܘܗ̱ܝ ܒܕܶܚܠܬܳܐ܆ ܘܒܰܕܡܽܘܬ ܡܶܛܪܳܐ܆ ܢܺܝ݂ܚܳܐ ܢܚܶܬ ܥܠܰܝܟܝ܆ ܬܶܫܒ̈ܚܳܢ ܠܫܳܠܽܘܚܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܘܕܰܘ ܥܰܡ̱̈ܡܶܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܶܐܬܳܐ ܕܢܶܦܪܩܰܢ܆ ܒܪܺܝܟ ܕܰܒܚܽܘܒܶܗ ܚܰܪܪܰܢ.

ܫܠܳܡܳܐ ܝܰܗ̱ܒܠܳܗ̇ ܒܣܶܓܕܬܳܐ܆ ܣܒܰܪܬܳܐ ܩܰܪܶܒ ܠܳܗ̇ ܒܚܽܘܒܳܐ܆ ܡܰܠܶܠ ܥܰܡܳܗ̇ ܒܕܶܚܠܳܐ܆ ܡ̈ܶܠܶܐ ܕܡܰܠ̈ܝܳܢ ܬܶܗܪܳܐ܆ ܕܡܶܢ ܓܰܘ ܟܰܪܣܶܟܝ ܕܳܢܰܚ܆ ܐܶܡܪܶܗ ܚܰܝܳܐ ܕܰܐܠܳܗܳܐ܆ ܒܪܺܝܟ ܕܶܐܬܡܰܟܰܟ ܘܪܰܡܪܡܰܢ܀

ܐܳܡܰܪ ܥܺܝܪܳܐ ܠܡܰܪܝܰܡ܆ ܠܳܐ ܬܶܬܪܰܗܒܺܝܢ ܛܠܺܝܬܳܐ܆ ܡܶܠܬܶܗ ܕܰܐܒܳܐ ܓܢܺܝܙܳܐ܆ ܢܳܚܶܬ ܘܫܳܪܶܐ ܒܥܽܘܒܶܟܝ܆ ܘܡܶܢܶܟܝ ܠܳܒܶܫ ܦܰܓܪܳܐ܆ ܘܗܳܘܶܐ ܐ̱ܢܳܫܳܐ ܒܝܰܕ ܚܽܘܒܶܗ܆ ܕܢܶܦܪܽܘܩ ܓܶܢܣܳܐ ܕܐ̱ܢܳܫ̈ܳܐ܀

ܡܶܢ ܒܶܝܬ ܣܶܕܪ̈ܶܐ ܕܢܽܘܪܳܐ܆ ܢܚܶܬ ܓܰܒܪܺܐܶܝܠ ܒܙܰܘܥܳܐ܆ ܘܰܛܥܺܝܢ ܣܒܰܪܬܶܗ ܕܰܒܪܳܐ܆ ܘܰܠܡܰܪܝܰܡ ܐܰܘܫܛܳܗ̇ ܗ̱ܘܳܐ܆ ܫܠܳܡܳܐ ܥܰܡܶܟܝ ܒܺܝܪܬܳܐ܆ ܕܰܡܠܶܟ ܡܰܠ̈ܟܶܐ ܫܳܪܶܐ ܒܶܟܝ܆ ܒܪܺܝܟ ܕܥܰܒܕܶܟܝ ܠܶܗ ܫܟܺܝܢܬܳܐ܀

ܩܰܒܠܰܬ ܡܰܪܝܰܡ ܒܰܛܢܳܐ܆ ܕܰܡܠܶܐ ܬܶܗܪܳܐ ܪܰܒܳܐ܆ ܪܽܘܚܳܐ ܕܩܽܘܕܫܳܐ ܫܪܳܐ ܒܳܗ̇܆ ܘܕܰܟܺܝ ܘܡܰܪܩܳܗ̇ ܘܩܰܕܫܳܗ̇܆ ܘܚܺܝܠ ܥܶܠܳܝܳܐ ܐܰܓܶܢ ܒܳܗ̇܆ ܕܬܶܗܘܶܐ ܐܶܡܳܐ ܠܪܰܒܽܘܬܶܗ܆ ܒܪܺܝܟܽ ܗ̱ܘ ܕܰܓܒܳܐ ܠܰܕܟܺܝܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܫܺܝܚܳܐ ܘܡܶܫܚܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܐܘܪܶܒ ܕܽܘܟܪܳܢܳܗ̇܆ ܕܝܳܠܶܕܬܶܗ ܒܰܐܪܒܰܥ ܦܶܢ̈ܝܳܢ.

ܡܫܺܝܚܳܐ ܘܡܶܫܚܳܐ ܐܶܫܬܰܘܬܰܦܘ܆ ܟܰܣܝܳܐ ܒܓܶܠܝܳܐ ܐܶܬܡܰܙܰܓ܆ ܡܶܫܚܳܐ ܡܳܫܰܚ ܓܰܠܝܳܐܺܝܬ܆ ܡܫܺܝܚܳܐ ܪܳܫܶܡ ܟܰܣܝܳܐܺܝܬ܆ ܐܶܡܪ̈ܶܐ ܚܰܕ̱̈ܬܶܐ ܘܪ̈ܽܘܚܳܢܶܐ܆ ܓܙܳܪܳܐ ܕܰܬܪܶܝܢ ܢܶܨܚܳܢܰܘ̈ܗ̱ܝ܆ ܒܰܛܢܶܗ ܓܶܝܪ ܡܶܢ ܓܰܘ ܡܶܫܚܳܐ܆ ܘܡܰܘܠܳܕܶܗ ܡܶܢ ܓܰܘ ܡܰܝ̈ܳܐ܀

ܟܺܐܦܳܐ ܕܰܚܙܳܐ ܕܳܢܺܝܐܶܝܠ܆ ܕܶܐܬܓܰܙܪܰܬ ܕܠܳܐ ܒܺܐܝ̈ܕܰܝܳܐ܆ ܗܽܘܝܽܘ ܡܫܺܝܚܳܐ ܒܰܫܪܳܪܳܐ܆ ܕܶܐܬܺܝܠܶܕ ܕܠܳܐ ܙܽܘܘܳܓܳܐ܆ ܚܶܕܝܰܬ ܡܰܪܝܰܡ ܕܺܝܠܶܕܬܶܗ܆ ܘܝܽܘܚܰܢܳܢ ܟܰܕ ܡܰܥܡܶܕ ܠܶܗ܆ ܚܶܕܝܰܬ ܒܶܗ ܫܡܰܝܳܐ ܘܰܐܪܥܳܐ܆ ܒܟܰܘܟܒܳܐ ܕܕܳܢܰܚ ܡܶܢ ܝܰܥܩܽܘܒ܀

ܕܳܠ ܘܰܢܚܶܬ ܡܶܢ ܒܶܝܬ ܣܶܕܪ̈ܶܐ܆ ܢܽܘܪܳܢܳܐ ܒܦܽܘܩܕܳܢ ܡܳܪܶܗ܆ ܘܰܡܛܳܐ ܠܢܳܨܪܰܬ ܨܶܝܕ ܡܰܪܝܰܡ܆ ܘܰܥܢܳܐ ܘܗܳܟܰܢ ܐܶܡܰܪ ܠܳܗ̇܆ ܫܠܳܡ ܠܶܟܝ ܐܶܡܶܗ ܕܰܓܢܺܝܙܳܐ܆ ܕܰܨܒܳܐ ܕܢܶܕܢܰܚ ܡܶܢ ܥܽܘܒܶܟܝ܆ ܠܥܶܠ ܐܰܪܦܺܝܬܶܗ ܟܰܕ ܢܶܚܬܶܬ܆ ܘܩܰܕܡܰܢܝ ܘܰܫܪܳܐ ܒܓܰܘ ܥܽܘܒܶܟܝ܀

ܐܶܢ ܡܫܰܐܠܺܝܢ ܠܳܟ ܕܳܪ̈ܽܘܫܶܐ܆ ܕܡܶܢ ܐܰܝܟܳܐ ܒܶܛܢܰܬ ܡܰܪܝܰܡ܆ ܦܰܢܳܐ ܠܗܽܘܢ ܚܰܟܺܝܡܳܐܺܝܬ܆ ܕܡܶܢ ܐܰܝܟܳܐ ܒܛܶܢܘ ܐܺܝ̈ܠܳܢܶܐ܆ ܐܺܝ̈ܠܳܢܶܐ ܒܛܶܢܘ ܡܶܢ ܪܽܘܚܳܐ܆ ܘܡܰܪܝܰܡ ܡܶܢ ܪܽܘܚܳܐ ܕܩܽܘܕܫܳܐ܆ ܐܺܝܠܳܢܳܐ ܐܰܘܠܶܕ ܐܶܡܪܳܐ܆ ܘܡܰܪܝܰܡ ܝܶܠܕܰܬ ܠܰܡܫܺܝܚܳܐ܀

ܐܶܡܰܪܝ ܠܺܝ ܟܰܠܰܬ ܡܰܠܟܳܐ܆ ܐܰܝܟܰܢ ܚܙܰܝܬܺܝܘܗ̱ܝ ܠܰܡܫܺܝܚܳܐ܆ ܕܫܰܦܺܝܪ ܘܰܗܕܺܝܪ ܡܶܢ ܟܽܠ ܐ̱ܢܳܫ܆ ܘܕܳܡܶܐ ܫܽܘܦܪܶܗ ܠܝܳܠܽܘܕܶܗ܆ ܒܰܙܡܰܪ̈ܓܕܶܐ ܘܡܰܪ̈ܓܳܢܝܳܬܳܐ܆ ܘܺܐܝܰܣܦܽܘܢ ܕܰܩܪܽܘܣܛܰܠܳܘܣ܆ ܐܶܫܬܰܘܕܺܝ ܕܢܶܒܢܶܐ ܫܽܘܪ̈ܰܝ܆ ܒܰܪ ܐܰܒܳܐ ܒܽܘܟܪܳܗ̇ ܕܡܰܪܝܰܡ܀

ܚܙܳܝ ܡܶܢ ܐ̱ܢܳܫ̈ܳܐ ܡܳܟܽܘܪ̈ܰܝܟܝ܆ ܘܰܕܚܰܠܝ ܡܶܢܗܽܘܢ ܘܶܐܣܬܰܪܰܕܝ܆ ܕܒܰܓܢܽܘܢ ܢܽܘܗܪܳܐ ܢܶܚܙܽܘܢܶܟܝ܆ ܘܢܶܬܬܪܺܝܡ ܪܺܝܫܗܽܘܢ ܒܰܚܙܳܬܶܟܝ܆ ܝܽܘܚܰܢܳܢ ܗܰܘ ܟܳܪܽܘܙܳܐ܆ ܘܫܶܡܥܽܘܢ ܟܺܐܦܳܐ ܪܰܒ ܒܰܝܬܳܐ܆ ܘܦܰܘܠܳܘܣ ܓܰܒܝܳܐ ܘܛܰܢܳܢܳܐ܆ ܘܪܳܚܶܡ ܫܶܠܝܳܐ ܘܢܰܟܦܽܘܬܳܐ܀

ܦܩܰܕ ܠܶܗ ܡܳܪܝܳܐ ܠܓܰܒܪܺܐܺܝܠ܆ ܕܢܶܚܽܘܬ ܢܣܰܒܰܪ ܠܰܒܬܽܘܠܬܳܐ܆ ܕܗܳܐ ܢܳܚܶܬ ܫܳܪܶܐ ܒܥܽܘܒܶܟܝ܆ ܐܰܠܳܗܳܐ ܕܡܶܢ ܐܰܠܳܗܳܐ܆ ܘܐ̱ܢܳܫܳܐ ܡܶܢܶܟܝ ܡܶܬܺܝܠܶܕ܆ ܥܽܘܠܳܐ ܕܩܰܫܺܝܫ ܡܶܢ ܕܳܪ̈ܶܐ܆ ܘܰܒܝܽܘܡ ܝܰܠܕܶܗ ܡܶܬܦܰܨܚܺܝ݂ܢ܆ ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ܀

ܓܰܒܪܺܐܶܝܠ ܪܺܝܫ ܡܰܠܰܐܟ̈ܶܐ܆ ܪܶܡܙܳܐ ܩܰܒܶܠ ܟܰܣܝܳܐܺܝܬ܆ ܘܰܦܪܰܚ ܒܶܐܒܪ̈ܶܐ ܩܰܠܺܝ̈ܠܶܐ܆ ܘܰܡܛܳܐ ܠܢܳܨܪܰܬ ܨܶܝܕ ܡܰܪܝܰܡ܆ ܘܚܰܘܺܝ ܢܰܦܫܶܗ ܠܰܕܟܺܝܬܳܐ܆ ܒܣܰܝܒܽܘܬܳܐ ܟܢܺܝܟܰܬ ܚܶܙܘܳܐ܆ ܠܳܐ ܬܶܕܚܰܠܝ ܡܰܠܝܰܬ ܫܽܘܦܪ̈ܶܐ܆ ܘܬܶܫܪܶܐ ܪܬܺܝܬܳܐ ܒܗܰܕܳܡܶܝ̈ܗ̇܀

ܟܰܕ ܥܺܝܪܳܐ ܡܰܠܶܠ ܥܰܡܳܗ̇܆ ܡ̈ܶܠܶܐ ܕܡܰܠ̈ܝܳܢ ܕܽܘܡܳܪܳܐ܆ ܘܰܦܬܰܚ ܦܽܘܡܶܗ ܘܶܐܡܰܪ ܠܳܗ̇܆ ܟܰܕ ܩܳܝܡܳܐ ܩܕܳܡ ܐܰܠܳܗܳܐ܆ ܘܰܚܝ݂ܳܪܳܗ̇ ܡܰܪܟܰܢ ܒܰܐܪܥܳܐ܆ ܘܠܶܒܳܗ̇ ܓܳܥܶܐ ܒܰܨܠܽܘܬܳܐ܆ ܫܠܳܡܳܐ ܥܰܡܶܟܝ ܒܰܪ̱ܬ ܐ̱ܢܳܫܳܐ܆ ܕܰܐܠܳܗܳܐ ܡܶܢܶܟܝ ܕܳܢܰܚ܀

ܫܠܳܡ ܠܶܟܝ ܡܰܠܝܰܬ ܛܰܝܒܽܘܬܳܐ܆ ܕܰܫܘܰܝܬܝ ܕܬܶܗܘܶܝܢ ܠܶܗ ܐܶܡܳܐ܆ ܠܗܰܘ ܕܬܶܓ̈ܡܶܐ ܓܢܺܝ̈ܙܶܐ ܕܰܠܥܶܠ܆ ܒܰܪܬܺܝܬܳܐ ܩܳܝܡܺܝܢ ܩܽܘܕܡܰܘܗ̱ܝ܆ ܐܶܫܟܰܚܬܝ ܓܶܝܪ ܠܘܳܬ ܐܰܠܳܗܳܐ܆ ܛܰܝܒܽܘܬܳܐ ܕܪܳܡܳܐ ܡܶܢ ܟܽܠ܆ ܕܪܽܘܚ ܩܽܘܕܫܳܐ ܐܳܬܶܐ ܠܘܳܬܶܟܝ܆ ܘܚܺܝܠ ܥܶܠܳܝܳܐ ܡܰܓܶܢ ܒܶܟܝ܀

ܠܒܰܟܬܶܗ ܒܬܽܘܠܬܳܐ ܠܡܰܠܰܐܟܳܐ܆ ܘܰܡܫܰܐܠܳܐ ܠܶܗ ܒܰܦܝܳܣܳܐ܆ ܕܰܐܝܟܰܢܳܐ ܬܶܗܘܶܐ ܗܳܕܶܐ܆ ܕܓܰܒܪܳܐ ܡܶܡܬܽܘܡ ܠܳܐ ܚܟܺܝܡ ܠܺܝ܆ ܐܶܡܰܪ ܠܳܗ̇ ܕܡܶܢ ܪܽܘܚ ܩܽܘܕܫܳܐ܆ ܗܳܘܶܐ ܒܰܛܢܳܐ ܕܫܳܪܶܐ ܒܶܟܝ܆ ܘܬܺܐܠܕܺܝܢ ܝܰܠܕܳܐ ܕܕܽܘܡܳܪܳܐ܆ ܕܗܽܘܝܽܘ ܦܳܪܶܩ ܒܶܪ̈ܝܳܬܳܐ܀

ܥܰܠ ܟܽܘܪܣܝܳܐ ܕܫܰܠܗܶܒܺܝܬܳܐ܆ ܗܰܘ ܕܰܟܪ̈ܽܘܒܶܐ ܛܥܺܝܢܺܝܢ ܠܶܗ܆ ܫܰܒܩܶܗ ܗ̱ܘܳܐ ܪܺܝܫ ܡܰܠܰܐܟ̈ܶܐ܆ ܠܰܡܠܶܟ ܡܰܠ̈ܟܶܐ ܫܡܰܝܳܢܳܐ܆ ܘܰܢܚܶܬ ܕܢܰܬܩܶܢ ܐܰܘܳܢܳܐ܆ ܘܶܐܫܟܚܶܗ ܕܰܫܪܳܐ ܒܰܒܬܽܘܠܬܳܐ܆ ܫܽܘܒܚܳܐ ܠܶܗ ܕܪܰܘܡܳܐ ܘܥܽܘܡܩܳܐ܆ ܡܠܶܝܢ ܡܶܢܶܗ ܘܰܙܥܽܘܪܺܝܢ ܠܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܐ ܡܰܠܟܽܘܬܳܐ

ܥܽܘܢܺܝܬܳܐ: ܫܰܘܬܶܦ ܡܳܪܰܢ ܒܛܽܘ̈ܒܶܐ ܕܡܰܠܟܽܘܬܳܟ܆ ܠܟܶܢܫܳܐ ܕܝܰܩܰܪ ܕܽܘܟܪܳܢ ܝܳܠܶܕܬܳܟ.

ܟܰܕ ܕܶܝܢ ܢܚܶܬ ܗ̱ܘܳܐ ܪܺܝܫܳܐ ܕܡܰܠܰܐܟ̈ܶܐ܆ ܕܰܢܣܰܒܪܺܝܗ̇ ܗ̱ܘܳܐ ܠܡܰܪܝܰܡ ܥܰܠ ܒܰܛܢܳܐ܆ ܐܰܘܣܶܦ ܬܢܳܐ ܠܳܗ̇ ܒܬܶܗܪܳܐ ܟܰܕ ܐܳܡܰܪ܆ ܕܗܳܐ ܐܶܠܺܝܫܒܰܥ ܐ̱ܚܝܳܢܬܶܟܝ ܘܗܺܝ ܒܰܛܢܳܐ܀

ܬܶܗܪܳܐ ܪܰܒܳܐ ܘܕܽܘܡܳܪܳܐ ܐܰܚܕܰܢܝ܆ ܒܗܳܝ ܒܰܪ̱ܬ ܕܰܘܺܝܕ ܡܰܠܝܰܬ ܛܰܝܒܽܘܬܳܐ܆ ܕܰܡܫܰܐܠܳܐ ܗ̱ܘܳܬ ܠܪܺܝܫܳܐ ܕܡܰܠܰܐܟ̈ܶܐ܆ ܕܰܐܝܟܰܢ ܬܶܗܘܶܐ ܕܓܰܒܪܳܐ ܠܳܐ ܚܟܺܝܡ ܠܺܝ܀

ܗܳܝܕܶܝܢ ܥܺܝܪܳܐ ܦܰܫܩܳܗ̇ ܠܬܶܕܡܽܘܪܬܳܐ܆ ܟܰܕ ܐܳܡܰܪ ܠܳܗ̇ ܠܡܰܪܝܰܡ ܡܒܰܪܰܟܬܳܐ܆ ܪܽܘܚܳܐ ܕܩܽܘܕܫܳܐ ܢܰܓܶܢ ܫܳܪܶܐ ܒܶܟܝ܆ ܘܝܳܠܕܰܬܝ ܡܰܠܟܳܐ ܦܳܪܶܩ ܒܶܪ̈ܝܳܬܳܐ܀

ܗܰܘ ܚܰܙܳܝܳܐ ܕܟܽܠܗܶܝܢ ܣܬܺܝܪ̈ܳܬܳܐ܆ ܚܙܳܗ̇ ܠܰܒܬܽܘܠܬܳܐ ܕܕܰܟܝܳܐ ܘܩܰܕܺܝܫܳܐ܆ ܘܫܰܕܰܪ ܚܰܝܠܶܗ ܘܰܢܚܶܬ ܫܪܳܐ ܒܥܽܘܒܳܗ̇܆ ܘܰܠܒܶܫ ܦܰܓܪܳܐ ܘܒܶܗ ܦܪܰܩ ܒܶܪ̈ܝܳܬܳܐ܀

ܛܽܘܒܳܐ ܪܰܒܳܐ ܢܶܬܠܽܘܢ ܟܽܠ ܥܰܡ̱̈ܡܺܝܢ܆ ܠܰܡܒܰܪܰܟܬܳܐ ܘܡܰܠܝܰܬ ܛܰܝܒܽܘܬܳܐ܆ ܕܗܺܝ ܒܰܠܚܽܘܕܶܝܗ̇ ܫܶܦܪܰܬ ܠܰܐܠܳܗܳܐ܆ ܘܰܢܚܶܬ ܘܰܫܪܳܐ ܒܓܰܘ ܥܽܘܒܳܗ̇ ܕܰܟܝܳܐ܀

ܒܶܟܝ ܐܶܣܬܰܝܰܟܘ ܐ̱ܪ̈ܳܙܶܐ ܕܰܢܒܺܝ̈ܶܐ܆ ܐܳܘ ܒܰܪ̱ܬ ܕܰܘܺܝܕ ܡܰܠܝܰܬ ܛܰܝܒܽܘܬܳܐ܆ ܘܒܶܟܝ ܐܶܬܦܰܫܰܩܘ ܛܽܘ̈ܦܣܶܐ ܘܦ̈ܶܠܳܐܬܳܐ܆ ܕܡܰܠܶܠܘ ܟܽܠܗܽܘܢ ܢܒܺܝ̈ܶܐ ܘܚܰܙܳܝ̈ܶܐ܀

ܪܫܺܝܡܺܝܢ ܫܽܘܦܪ̈ܰܝܟܝ ܒܐ̱ܪ̈ܳܙܶܐ ܕܰܢܒܺܝ̈ܶܐ܆ ܡܕܺܝܩܺܝܢ ܐ̱ܪ̈ܳܙܰܝܟܝ ܒܚܰܘ̈ܩܶܐ ܕܰܟ̈ܬܳܒܶܐ܆ ܗܳܐ ܒܶܐܫܰܥܝܳܐ ܢܳܨܚܺܝ݂ܢ ܦܶܠܳܐܬܶܟ̈ܝ܆ ܘܒܶܝܬ ܟܰܠ̈ܕܳܝܶܐ ܙܡܰܪܬܶܟܝ ܢܒܺܝܽܘܬܳܐ܀

ܕܟܺܝܪ ܐܶܫܰܥܝܳܐ ܕܰܩܪܳܝܗ̱ܝ ܕܽܘܡܳܪܳܐ܆ ܠܝܰܠܕܳܐ ܦܰܐܝܳܐ ܕܰܕܢܰܚ ܡܶܢ ܥܽܘܒܶܟܝ܆ ܒܬܽܘ̈ܠܶܐ ܢܛܺܝܪܺܝܢ ܘܺܝܠܺܝܕ ܓܰܢ̱ܒܳܪܳܐ܆ ܗܳܐ ܕܽܘܡܳܪܳܐ ܕܠܳܐ ܣܳܟ ܡܶܣܬܰܝܰܟ܀

ܪܺܝܫ ܡܰܠܰܐܟ̈ܶܐ ܫܠܳܡܳܐ ܩܰܪܶܒ ܠܶܟܝ܆ ܘܚܺܝܠ ܥܶܠܳܝܳܐ ܐܰܓܶܢ ܘܰܫܪܳܐ ܒܶܟܝ܆ ܘܺܝܠܶܕܬܝ ܠܡܰܠܟܳܐ ܘܡܳܪܳܐ ܕܟܽܠ ܥܰܡ̱̈ܡܺܝܢ܆ ܘܗܳܐ ܟܽܠ ܥܳܠ̈ܡܺܝܢ ܛܽܘܒܳܐ ܝܳܗܒܺܝܢ ܠܶܟܝ܀

ܬܰܪܥܳܐ ܕܰܐܚܺܝܕ ܩܪܳܟܝ ܗ̱ܘܳܐ ܚܰܙܩܺܝܐܶܝܠ܆ ܕܶܐܠܳܐ ܡܫܺܝܚܳܐ ܠܳܐ ܐ̱ܢܳܫ ܥܳܐܶܠ ܒܶܗ܆ ܥܰܠ ܘܰܢܦܰܩ ܒܶܗ ܡܳܪܳܐ ܕܟܽܠ ܒܶܪ̈ܝܳܢ܆ ܘܠܳܐ ܫܪܳܐ ܛܰܒ̈ܥܶܐ ܚܬܺܝ̈ܡܶܐ ܕܰܒܬܽܘ̈ܠܰܝܟܝ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܚܰܙܽܘܪ ܕܰܗܒܳܐ ܕܰܚܫܺܝܠ ܘܰܩܪܺܝܡ

ܨܠܽܘܬܶܟܝ ܥܰܡܰܢ ܐܳܘ ܡܒܰܪܰܟܬܳܐ ܨܠܽܘܬܶܟܝ ܥܰܡܰܢ܆

ܠܰܨ̈ܠܰܘܳܬܶܟܝ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܫܽܘܦܪܳܗ̇ ܕܡܰܪܝܰܡ ܗܳܐ ܡܶܬܢܰܨܰܚ ܒܶܝܬ ܡܰܠܟܽܘܬܳܐ܆ ܘܟܽܠܗܽܘܢ ܥܰܡ̱̈ܡܶܐ ܛܽܘܒܳܐ ܝܳܗܒܺܝܢ ܠܰܒܬܽܘܠܽܘܬܳܗ̇܆ ܕܒܶܛܢܰܬ ܝܶܠܕܰܬ ܚܰܝ̈ܶܐ ܘܣܰܒܪܳܐ ܠܰܒ̈ܢܰܝ ܐ̱ܢܳܫܳܐ܆ ܘܝܽܘܡ ܕܽܘܟܪܳܢܳܗ̇ ܗܳܐ ܡܶܙܕܰܝ݂ܰܚ ܒܥܺܕܰܬ ܩܽܘܕܫܳܐ܀

ܠܡܰܪܓܳܢܺܝܬܳܐ ܕܳܡܶܐ ܫܽܘܦܪܶܟܝ ܐܳܘ ܒܰܪ̱ܬ ܕܰܘܺܝܕ܆ ܘܢܳܨܚܺܝ݂ܢ ܫܽܘܦܪ̈ܰܝܟܝ ܘܰܡܚܰܕܶܝܢ ܠܳܗ̇ ܠܥܺܕܰܬ ܩܽܘܕܫܳܐ܆ ܐܰܦܺܝܣܝ ܘܰܒܥܳܝ ܠܺܝ݂ܚܺܝ݂ܕܳܝܶܟܝ ܡܶܛܽܠܳܬܰܢ܆ ܕܢܶܫܬܘܶܐ ܠܪ̈ܰܚܡܶܐ ܒܝܽܘܡ ܓܶܠܝܳܢܶܗ ܨܠܽܘܬܶܟܝ ܥܰܡܰܢ܀

ܒܰܨ̈ܠܰܘܳܬܳܗ̇ ܕܗܳܝ ܕܰܛܥܶܢܬܳܟ ܝܰܪ̈ܚܶܐ ܬܶܫܥܳܐ܆

ܒܰܪ ܐܰܠܳܗܳܐ ܐܰܥܒܰܪ ܡܶܢܰܢ ܫܰܒ̈ܛܶܐ ܕܪܽܘܓܙܳܐ܀