ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܡܰܠܰܐܟܳܐ ܫܰܪܺܝܪܳܐ
ܡܰܠܰܐܟܳܐ ܫܰܪܺܝܪܳܐ ܫܰܕܰܪ ܡܳܪܝܳܐ ܫܰܪܺܝܪܳܐ (ܣܳܠܶܩ: ܒܶܐܢܳܐ ܐ̱ܢܳܐ ܢܽܘܗܪܳܐ)

ܒܰܨ̈ܠܰܘܳܬܳܗ̇ ܕܝܳܠܶܕܬܳܟ܆ ܡܫܺܝܚܳܐ ܡܰܠܟܳܐ ܕܬܶܫܒܽܘܚܬܳܐ܆ ܟܠܺܝ ܡܶܢ ܐܰܪܥܳܐ ܘܥܳܡܽܘܪ̈ܶܝܗ̇܆ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ܆ ܘܰܟܠܺܝܠ ܫܰܢ̱ܬܳܐ ܢܶܬܒܰܪܰܟ܆ ܒܛܰܝܒܽܘܬܳܟ ܕܢܰܘܕܶܐ ܘܢܶܣܓܽܘܕ ܘܰܢܫܰܒܚܳܟ܀

ܫܽܘܒܚܳܐ

ܒܪܺܝܫܺܝܬ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ܆ ܘܗܽܘ ܡܶܠܬܳܐ ܠܘܳܬ ܐܰܠܳܗܳܐ܆ ܘܰܐܠܳܗܳܐ ܐܺܝܬܰܘܗ̱ܝ ܡܶܠܬܳܐ܆ ܘܗܳܢܳܐ ܒܪܺܝܫܺܝܬ ܐܺܝܬܰܘܗ̱ܝ ܗ̱ܘܳܐ܆ ܠܘܳܬ ܐܰܠܳܗܳܐ ܒܰܟܝܳܢܳܐ܆ ܘܒܰܩܢܽܘܡܳܐ ܟܰܕ ܠܳܐ ܦܪܺܝܫ ܡܶܢ ܝܳܠܽܘܕܶܗ܀

ܡܰܕܪܳܫܳܐ

ܩܳܠܳܐ ܒܩ̄: ܩܽܘܡ ܦܰܘܠܳܘܣ
ܬܰܘ ܢܺܐܡܰܪ ܛܽܘܒܶܝܗ̇ ܠܗܳܝ ܡܰܪܝܰܡ

ܥܽܘܢܺܝܬܳܐ: ܒܪܺܝܟ ܕܰܐܘܪܶܒ ܕܽܘܟܪܳܢ ܝܳܠܶܕܬܶܗ ܒܰܫܡܰܝܳܐ ܘܒܰܐܪܒܰܥ ܦܶܢ̈ܝܳܬܳܐ.

ܡܰܪܟܰܒܬܳܐ ܕܒܶܣܪܳܐ ܗܘܳܬ ܡܰܪܝܰܡ܆ ܕܰܬܙܰܝܰܚ ܒܥܽܘܒܳܗ̇ ܠܢܽܘܪܳܢܳܐ܆ ܡܰܠܰܐܟ̈ܶܐ ܬܗܰܪܘ ܒܳܗ̇ ܒܒܰܪ̱ܬ ܐ̱ܢܳܫ̈ܳܐ܆ ܕܰܠܡܳܪܳܐ ܕܟܽܠܗܽܘܢ ܛܥܺܝܢܳܐ ܗ̱ܘܳܬ܆ ܗܰܘ ܪܺܝܫܳܐ ܕܥܺܝܪ̈ܶܐ܆ ܒܬܶܗܪܳܐ ܣܓܶܕ ܩܽܘܕܡܶܝܗ̇ ܘܰܫܠܳܡܳܐ ܫܰܦܝܳܐ܆ ܝܰܗ̱ܒ ܠܳܗ̇ ܒܗܺܝܠܳܐܺܝܬ܆ ܦܟܰܪ ܐܺܝ̈ܕܰܘܗ̱ܝ ܘܰܣܓܶܕ ܠܕܰܟܝܽܘܬܳܗ̇܆ ܕܰܐܪܓܶܫ ܗ̱ܘܳܐ ܕܡܳܪܶܗ ܫܪܶܐ ܨܶܝܕܶܝܗ̇܀

ܒܰܫܪܳܪܳܐ ܛܽܘܒܶܝܗ̇ ܕܶܐܬܓܰܒܝܰܬ܆ ܕܬܶܗܘܶܐ ܠܶܗ ܐܶܡܳܐ ܠܡܳܪܶܐ ܟܽܠ܆ ܘܡܶܢ ܚܰܠܒܳܗ̇ ܝܳܢܶܩ ܙܳܐܶܢ ܟܽܠ܆ ܒܪܺܝܟ ܕܰܕܢܰܚ ܡܶܢܳܗ̇ ܡܚܰܪܰܪ ܟܽܠ܆ ܛܽܘܒܶܝܗ̇ ܓܶܝܪ ܕܰܗܘܳܬ܆ ܠܰܒܪܺܝܬܳܐ ܟܽܠܳܗ̇܆ ܡܰܒܽܘܥܳܐ ܕܓܳܣܶܐ܆ ܚܰܝ̈ܶܐ ܘܟܽܠ ܚ̈ܰܕܘܳܢ܆ ܕܢܰܚ ܡܶܢܳܗ̇ ܢܽܘܗܪܳܐ ܠܒܶܪ̈ܝܳܬܳܐ܆ ܢܶܬܶܠ ܠܳܗ̇ ܛܽܘܒܳܐ ܟܡܳܐ ܣܶܦܩܰܬ܀

ܚܳܒܶܬ ܠܺܝ ܒܫܰܪܒܶܟܝ ܡܠܶܐ ܬܶܗܪܳܐ܆ ܩܰܕܺܝܫܬܳܐ ܒܬܽܘܠܬܳܐ ܒܰܪ̱ܬ ܕܰܘܺܝܕ܆ ܚܳܒ ܒܶܟܝ ܕܶܝܢ ܟܝܳܢܳܐ ܘܶܐܬܥܰܕܰܠ܆ ܕܰܐܢ̱ܬܝ ܠܚܽܘܕܰܝܟܝ ܝܺܠܶܕܬܝ ܕܠܳܐ ܢܶܩܦܳܐ܆ ܨܳܪܽܘܟܝ ܒܺܐܝܠܳܢܳܐ܆ ܕܰܐܘܠܶܕ ܗ̱ܘܳܐ ܐܶܡܪܳܐ܆ ܕܰܦܪܰܩ ܗ̱ܘܳܐ ܠܺܐܝܣܚܳܩ܆ ܡܶܢ ܩܶܛܠܳܐ ܕܰܐܒܽܘܗ̱ܝ܆ ܘܡܶܢܶܟܝ ܕܶܝܢ ܕܢܰܚ ܠܰܢ ܗܰܘ ܐܶܡܪܳܐ܆ ܕܗܽܘ ܒܰܕܡܶܗ ܚܰܪܰܪ ܒܶܪ̈ܝܳܬܳܐ܀

ܪܰܒ ܘܰܫܒܺܝܚ ܫܰܪܒܳܐ ܕܬܰܫܥܺܝܬܶܟܝ܆ ܐܳܦ ܡܺܐܡܪܶܟܝ ܙܳܟܶܐ ܠܟܽܠ ܠܶܫܳܢ܆ ܐܶܢ ܥܺܝܪ̈ܶܐ ܬܗܰܪܘ ܒܶܟܝ ܟܡܳܐ ܝܺܪܶܒܬܝ܆ ܟܡܳܐ ܢܶܣܦܰܩ ܥܰܦܪܳܐ ܠܩܽܘ̈ܠܳܣܰܝܟܝ܆ ܙܳܟܝܰܬܝ ܠܟܽܠܒܶܪ̈ܝܳܢ܆ ܕܰܒܪܶܟܝ ܒܪܳܐ ܐܶܢܶܝܢ܆ ܘܚܰܝܠܶܗ ܛܥܺܝܢ ܠܗܶܝܢ܆ ܘܪܶܡܙܶܗ ܡܕܰܒܰܪ ܠܗܶܝܢ܆ ܘܗܽܘ ܝܳܗܶܒ ܐܰܓܪܳܐ ܠܡܰܢ ܕܰܫܗܰܪ܆ ܘܶܐܫܬܰܘܬܰܦ ܒܝܰܘܡܳܐ ܕܕܽܘܟܪܳܢܶܟܝ܀

ܙܰܝܰܚܬܶܗ ܠܡܳܪܳܐ ܕܥܶܠܳܝ̈ܶܐ܆ ܐܳܦ ܚܰܒܒܰܬ ܠܣܰܒܪܳܐ ܕܬܰܚܬܳܝ̈ܶܐ܆ ܫܶܦܪܰܬ ܠܶܗ ܫܩܰܠܬܶܗ ܘܢܰܨܰܪܬܶܗ܆ ܠܨܰܝܳܪܳܐ ܕܥܽܘ̈ܠܶܐ ܒܨܶܒܝܳܢܶܗ܆ ܐܶܠܽܘ ܡܨܶܐ ܕܢܶܗܘܶܐ܆ ܚܣܳܡܳܐ ܒܥܶܠܳܝ̈ܶܐ܆ ܟܪ̈ܽܘܒܶܐ ܕܰܡܒܰܪܟܺܝܢ܆ ܚܣܰܡܘ ܗ̱ܘܰܘ ܒܒܰܪ̱ܬ ܐ̱ܢܳܫ̈ܳܐ܆ ܕܥܰܠ ܚܰܨܗܽܘܢ ܕܡܽܘܬܳܐ ܕܺܐܝܩܳܪܶܗ܆ ܘܰܒܗܳܕܶܐ ܫܪܳܪܳܐ ܕܪܰܒܽܘܬܶܗ܀

ܨܳܝܕܺܝܢ ܠܶܗ ܫܰܒܪ̈ܶܐ ܘܡܳܚܶܝܢ ܠܶܗ܆ ܘܰܐܟܘܳܬܗܽܘܢ ܥܳܒܶܕ ܠܟܽܠܡܶܕܶܡ܆ ܡܕܰܝܶܨ ܗ̱ܘܳܐ ܘܥܳܒܰܪ ܒܰܝܢܳܬܗܽܘܢ܆ ܘܬܰܗܺܝܪܺܝܢ ܛܶܟ̈ܣܶܐ ܕܢܽܘܪ̈ܳܢܶܐ܆ ܡܶܢ ܪܰܘܡܳܐ ܒܳܪܟܺܝܢ܆ ܠܓܰܘ ܥܽܘܡܩܳܐ ܢܳܚܬܺܝܢ܆ ܘܣܳܓܕܺܝܢ ܠܶܗ ܒܕܶܚܠܳܐ܆ ܘܬܳܗܪܺܝܢ ܒܡܽܘܟܳܟܶܗ܆ ܘܰܡܝܰܒܒܺܝܢ ܠܚܽܘܒܶܗ ܕܠܳܐ ܣܳܟܳܐ܆ ܟܡܳܐ ܪܳܚܶܡ ܠܓܶܢܣܳܐ ܕܒܶܝܬ ܐܳܕܳܡ܀

ܡܢܺܝܕܳܐ ܠܶܗ ܕܢܶܕܡܰܟ ܘܠܳܐ ܕܳܡܶܟ܆ ܗܰܘ ܥܺܝܪܳܐ ܕܡܶܡܬܽܘܡ ܠܳܐ ܕܳܡܶܟ܆ ܝܳܗܒܳܐ ܠܶܗ ܚܰܠܒܳܐ ܐܰܝܟ ܫܰܒܪܳܐ܆ ܘܗܽܘ ܡܬܰܪܣܶܐ ܠܟܽܠܗܶܝܢ ܒܶܪ̈ܝܳܬܳܐ܆ ܥܳܐܠܳܐ ܡܦܺܝܣܳܐ ܠܶܗ܆ ܕܰܦܩܽܘܕ ܠܰܣܪ̈ܳܦܶܐ܆ ܕܢܽܘܪܳܐ ܘܰܕܪܽܘܚܳܐ܆ ܬܳܠܶܝܢ ܓܶܦܰܝ̈ܗܽܘܢ܆ ܕܶܐܥܽܘܠ ܡܳܪܝ ܐܶܒܪܽܘܟ ܘܶܐܣܓܽܘܕ ܠܳܟ܆ ܘܶܐܬܶܠ ܠܳܟ ܚܰܠܒܳܐ ܕܫܳܦܰܪ ܠܳܟ܀

ܬܰܘ ܐܰܚܰܝ̈ ܢܶܬܗܰܪ ܒܦܽܘܪܫܳܢܳܐ܆ ܒܚܰܕ̱̈ܬܳܬܳܐ ܕܠܳܐ ܡܬܽܘܡ ܗܘܰܝ̈ ܒܰܐܪܥܳܐ܆ ܥܽܘܠܳܐ ܚܰܕ ܕܝܳܢܶܩ ܒܰܛܠܺܝܬܳܐ܆ ܕܺܝܠܶܕܬܶܗ ܘܠܳܐ ܚܰܟܡܳܗ̇ ܓܰܒܪܳܐ܆ ܪܰܒܝܰܬܶܗ ܟܰܕ ܗܽܘ܆ ܐܺܝܬܰܘܗ̱ܝ ܕܠܳܐ ܡܫܽܘܚܬܳܐ܆ ܘܰܐܠܒܶܫܬܶܗ ܐܶܡܶܗ܆ ܠܒܽܘ̈ܫܶܐ ܒܰܡܫܽܘܚܬܳܐ܆ ܛܥܺܝܢܳܐ ܠܶܗ ܘܰܛܥܺܝܢ ܠܟܽܠܡܶܕܶܡ܆ ܣܺܝܡ ܒܽܐܘܪܝܳܐ ܟܰܕ ܗܽܘ ܕܠܳܐ ܡܫܽܘܚܬܳܐ܀

ܡܢܺܝܕܳܐ ܠܶܗ ܕܢܶܕܡܰܟ ܘܠܳܐ ܕܳܡܶܟ܆ ܙܶܥܩܰܬ ܒܶܗ ܕܳܚܶܠ ܕܠܳܐ ܬܶܡܚܶܝܘܗ̱ܝ܆ ܕܽܘܡܳܪܰܐ ܗ̱ܘ ܟܽܠܗܶܝܢ ܕܦܳܪܽܘܩܰܢ܆ ܕܰܚܠܳܦܰܝܢ ܓܰܕܫܽܘܗ̱ܝ ܒܡܽܘܟܳܟܳܐ܆ ܒܬܽܘܠ ܓܽܘܫܡܳܗ̇ ܕܶܐܡܶܗ܆ ܘܰܬܕܶܝ̈ܗ̇ ܡܠܶܝܢ ܚܰܠܒܳܐ܆ ܘܒܰܒܬܽܘ̈ܠܶܝܗ̇ ܡܰܝܢܩܳܐ܆ ܠܙܳܝܽܘܢܳܐ ܕܥܳܠ̈ܡܶܐ܆ ܝܳܗܒܳܐ ܠܶܗ ܕܢܺܐܢܰܩ ܘܢܶܫܠܶܐ ܠܶܗ܆ ܘܡܳܐ ܕܺܝܢܶܩ ܫܳܠܶܐ ܘܠܳܐ ܒܳܟܶܐ܀

ܣܳܝܡܳܐ ܠܶܗ ܫܡܳܗ̈ܶܐ ܒܢܽܘܨܪ̈ܳܬܳܐ܆ ܘܳܐܡܪܳܐ ܠܶܗ ܡ̈ܶܠܶܐ ܒܠܽܘܓܠܳܓܳܐ܆ ܡܡܰܠ̱ܠܳܐ ܠܶܗ ܡ̈ܶܠܶܐ ܙܥܽܘܪ̈ܝܳܬܳܐ܆ ܡܢܰܨܪܳܐ ܠܶܗ ܘܰܡܨܰܠܝܳܐ ܠܚܰܝܰܘ̈ܗ̱ܝ܆ ܘܰܡܦܺܝܣܳܐ ܠܡܳܪܝܳܐ܆ ܕܰܢܪܰܒܶܝܘܗ̱ܝ ܠܰܒܪܳܗ̇܆ ܟܰܕ ܗܽܘ ܒܪܳܐ ܒܪܶܡܙܶܗ܆ ܠܟܽܠܗܶܝܢ ܒܶܪ̈ܝܳܬܳܐ܆ ܫܳܡܰܥ ܠܳܗ̇ ܘܫܰܬܺܝܩ ܐܰܝܟ ܫܰܒܪܳܐ܆ ܘܟܰܣܝܳܐܺܝܬ ܫܳܡܰܥ ܨܠܰܘ̈ܳܬܳܗ̇܀

ܟܪܺܝܟ ܘܰܪܡܶܐ ܒܽܐܘܪܝܳܐ ܕܚܰܝ̈ܘܳܬܳܐ܆ ܒܝܰܕ ܓܽܘܫܡܳܐ ܕܚܰܝܶܕ ܠܪܰܒܽܘܬܶܗ܆ ܩܦܰܣ ܢܰܦܫܶܗ ܘܰܨܒܳܐ ܕܢܶܣܬܰܝܰܟ܆ ܟܰܕ ܐܺܝܬܰܘܗ̱ܝ ܟܽܠܶܗ ܕܠܳܐ ܣܳܟܳܐ܆ ܙܶܩܪܰܬ ܠܶܗ ܐܳܦ ܗܺܝ܆ ܠܒܽܘܫܳܐ ܕܰܬܟܰܣܶܝܘܗ̱ܝ܆ ܕܳܐܦܠܳܐ ܗܽܘ ܗܰܘܢܳܐ. ܡܨܶܐ ܗ̱ܘܳܐ ܘܰܕܢܶܚܙܶܝܘܗ̱ܝ܆ ܡܶܫܚܰܬ ܠܶܗ ܡܶܫܚܳܐ ܥܰܠ ܒܽܘܪ̈ܟܶܝܗ̇܆ ܘܦܶܟܪܰܬ ܠܶܗ ܐܺܝ̈ܕܰܘܗ̱ܝ ܒܥܰܙܪܽܘܪ̈ܶܐ܀

ܡܫܰܕܪܳܐ ܠܶܗ ܐܶܡܶܗ ܠܟܳܐ ܘܰܠܟܳܐ܆ ܘܫܳܡܰܥ ܠܳܗ̇ ܘܥܳܒܶܕ ܠܦܽܘܩܕܳܢܳܗ̇܆ ܘܶܐܢ ܓܶܕܫܰܬ ܘܠܳܐ ܥܒܰܕ ܠܗܳܝ ܕܶܐܡܪܰܬ܆ ܙܶܥܩܰܬ ܒܶܗ ܘܩܳܡܰܬ ܥܠܰܘܗ̱ܝ ܕܬܶܡܚܶܝܘܗ̱ܝ܆ ܘܶܐܢ ܐܶܬܛܦܺܝܣ ܘܰܥܒܰܕ܆ ܠܗܳܝ ܕܶܐܡܪܰܬ ܗ̱ܘܳܬ ܠܶܗ܆ ܢܰܨܪܰܬ ܘܚܰܒܶܒܬܶܗ. ܘܥܰܦܩܰܬ ܘܢܰܫܶܩܬܶܗ܆ ܘܶܐܢ ܓܶܕܫܰܬ ܘܰܐܕܶܫ ܐܰܝܟ ܫܰܒܪܳܐ܆ ܩܳܡܰܬ ܥܠܰܘܗ̱ܝ ܘܰܪܗܶܛ ܕܠܳܐ ܬܶܡܚܶܝܘܗ̱ܝ܀

ܟܠܺܝܠܳܐ ܐܰܢ̱ܬܝ ܕܰܒܕܰܗܒܳܐ ܡܨܰܒܰܬ܆ ܕܒܶܗ ܟܰܠܠܽܘܗ̱ܝ ܟܳܗ̈ܢܶܐ ܠܰܫܠܶܝܡܽܘܢ܆ ܒܒܶܪ̈ܽܘܠܶܐ ܘܟܺܐܦܷ̈ܐ ܛܳܒ̈ܳܬܳܐ܆ ܨܰܒܬܽܘܗ̱ܝ ܗ̱ܘܰܘ ܒܝܰܘ̈ܡܰܝ ܚܰܬܢܽܘܬܶܗ܆ ܩܳܠܳܐ ܕܫܽܘ̈ܦܢܺܝܢܶܐ܆ ܘܩܽܘܩܢܳܘܣ ܒܩܺܝ̈ܢܳܬܶܗ܆ ܙܠܺܝ̈ܚܶܐ ܘܫܰܪ̈ܘܰܝܢܶܐ܆ ܘܚܰܡܪܳܐ ܚܠܶܐ ܛܰܥܡܳܐ܆ ܠܳܐ ܦܳܚܡܺܝܢ ܠܫܽܘܦܪ̈ܰܝܟܝ ܫܰܦܺܝܪܬܳܐ܆ ܡܶܣܟܺܢ̱ܬܳܐ ܕܥܶܬܪܰܬ ܒܒܰܪ ܡܰܠܟܳܐ܀

ܡܶܢ ܡܰܪܝܰܡ ܣܰܬܳܐ ܡܒܰܪܰܟܬܳܐ܆ ܕܢܰܚ ܣܓܽܘܠܳܐ ܕܰܡܠܶܐ ܚ̈ܰܕܘܳܬܳܐ܆ ܒܓܳܓܽܘܠܬܳܐ ܥܰܨܪܽܘܗ̱ܝ ܝܗ̱ܽܘܕܳܝ̈ܶܐ܆ ܘܩܰܒܶܠܬܶܗ ܥܺܕܬܳܐ ܘܠܶܗ ܣܳܓܕܳܐ܆ ܘܝܰܠ̈ܕܶܝܗ̇ ܗܳܐ ܫܳܬܶܝܢ܆ ܫܶܩܝܳܐ ܪܽܘܚܳܢܳܐ܆ ܘܙܳܡܪܺܝܢ ܬܶܫܒܽܘܚܬܳܐ܆ ܠܰܒܪܳܐ ܕܰܐܠܳܗܳܐ܆ ܕܶܐܬܬܰܚܬܺܝ ܘܚܰܪܰܪ ܒܶܪ̈ܝܳܬܳܐ܆ ܡܶܢ ܬܰܪ̈ܥܰܘܗ̱ܝ ܟܡܺܝܪ̈ܶܐ ܕܰܐܒܕܳܢܳܐ܀

ܡܰܢ ܣܳܦܶܩ ܕܢܺܐܡܰܪ ܩܽܘܠܳܣܰܝ̈ܟܝ܆ ܐܳܘ ܒܬܽܘܠܬܳܐ ܡܰܪܝܰܡ ܒܰܪ̱ܬ ܕܰܘܺܝܕ܆ ܕܟܽܠ ܐ̱ܪ̈ܳܙܶܐ ܕܚܰܙܳܝ̈ܶܐ ܟܽܠܗܽܘܢ܆ ܘܟܽܠ ܛܽܘ̈ܦܣܶܐ ܒܶܟܽܝ ܗ̱ܘ ܡܶܬܓܰܡܪܺܝܢ܆ ܩܺܐܒܽܘܬܳܐ ܕܡܽܘܫܶܐ܆ ܟܺܐܦܳܐ ܕܕܳܢܺܝܐܶܝܠ܆ ܓܶܙܬܳܐ ܗܳܝ ܕܓܶܕܥܽܘܢ܆ ܘܩܶܣܛܳܐ ܗܳܝ ܕܡܰܢ̱ܢܳܐ܆ ܠܶܟܝ ܬܰܪܥܳܐ ܚܙܳܐ ܗ̱ܘܳܐ ܚܰܙܩܺܝܐܶܝܠ܆ ܕܒܶܗ ܥܳܐܠܺܝܢ ܓܡܺܝܪ̈ܶܐ ܠܰܫܡܰܝܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܝܰܠܕܳܐ ܕܥܶܠܳܝ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ ܕܢܰܨܰܚ ܥܺܐܕܶܟܝ܆ ܒܬܽܘܠܬܳܐ ܡܰܠܝܰܬ ܛܰܝܒܽܘܬܳܐ .

ܠܰܒܬܽܘܠܬܳܐ ܡܰܠܝܰܬ ܬܶܗܪܳܐ܆ ܚܙܳܗ̇ ܪܶܥܝܳܢܳܐ ܘܩܳܡ ܬܳܗܰܪ ܒܶܗ܆ ܘܰܐܝܟ ܕܰܒܚܽܘܒܳܐ ܡܢܰܨܰܪ ܗ̱ܘܳܐ ܠܳܗ̇܆ ܫܠܳܡ ܠܶܟܝ ܡܰܠܝܰܬ ܛܰܝܒܽܘܬܳܐ܆ ܕܠܳܐ ܪܳܡܳܐ ܫܡܰܝܳܐ ܡܶܢܶܟܝ܆ ܘܰܐܬܪܳܐ ܕܥܺܝܪ̈ܶܐ ܪܗܺܝܒ ܡܶܢ ܝܰܠܕܶܟܝ܆ ܘܰܛܥܺܝܢܰܬܝ ܠܶܗ ܘܰܒܗܺܝܠܰܬܝ. ܘܥܺܝܪ̈ܶܐ ܒܪܰܘܡܳܐ ܗܽܘ ܡܰܚܶܐ܆ ܕܰܨܒܳܐ ܒܚܰܠܒܶܟܝ ܐܶܬܪܰܒܺܝ܆ ܬܶܗܪܳܐ ܡܰܠ̈ܝܳܢ ܨܶܒ̈ܥܳܬܶܟܝ܆ ܕܰܡ̈ܗܰܦܟܳܢ ܠܳܗ̇ ܠܰܓܡܽܘܪܬܳܐ܆ ܘܰܫܠܶܐ ܥܽܘܙܳܐ ܕܝܳܩܽܘܕܽܘܬܶܗ܆ ܛܽܘܒܰܝܟܝ ܡܰܪܝܰܡ ܠܡܰܢܽܘ ܝܺܠܶܕܬܝ܀

ܫܰܒܛܶܗ ܕܰܐܗܪܽܘܢ ܗܰܘ ܕܰܐܦܪܰܥ ܗ̱ܘܳܐ܆ ܠܶܟܝ ܨܳܐܰܪ ܗ̱ܘܳܐ ܒܰܪ̱ܬ ܥܶܒܪ̈ܳܝܶܐ܆ ܒܶܝܬ ܝܰܒܺܝ̈ܫܶܐ ܪܓܶܐ ܗ̱ܘܳܐ ܘܰܦܐܶܐ܆ ܐܰܟܘܳܬܶܟܝ ܡܰܠܝܰܬ ܬܶܗܪܳܐ܆ ܕܒܰܥܠܰܝ̈ܡܳܬܳܐ ܢܳܨܚܳܐ ܐܰܢ̱ܬܝ܆ ܘܒܰܒܬܽܘ̈ܠܳܬܳܐ ܬܡܺܝܗܽ ܗ̱ܘ ܫܰܪܒܶܟܝ܆ ܚܰܕ ܫܰܒܛܳܐ ܒܥܳܠܡܳܐ ܐܶܬܚܙܺܝ܆ ܘܠܳܐ ܗܘܳܐ ܐ̱ܚܪܺܢܳܐ ܕܕܳܡܶܐ ܠܶܗ܆ ܚܕܳܐ ܒܬܽܘܠܬܳܐ ܒܬܶܗܪܳܐ ܝܶܠܕܰܬ܆ ܝܺܚܺܝܕܳܐܺܝܬ ܘܰܐ̱ܚܪܺܬܳܐ ܠܳܐ܆ ܡܰܬܠܰܐ ܗ̱ܘ ܗܳܢܳܐ ܕܶܐܬܦܰܫܰܩ ܠܶܗ܆ ܐ̱ܪܳܙܳܐ ܕܰܢܒܰܓ ܡܶܢ ܐܳܪܽܘܢܳܐ܆ ܒܪܺܝܟ ܕܰܒܣܶܦܪ̈ܶܐ ܟܣܶܐ ܗ̱ܘܳܐ ܫܰܪܒܶܗ܀

ܠܡܽܘܫܶܐ ܟܺܐܦܳܐ ܡܟܺܝܪܳܐ ܗ̱ܘܳܬ܆ ܘܥܶܙܰܩܬܳܐ ܚܽܘܛܪܳܐ ܐܰܘܫܶܛ ܠܳܗ̇܆ ܠܒܰܪ̱ܬ ܥܶܒܪ̈ܳܝܶܐ ܡܟܰܪ ܓܰܒܪܺܐܶܝܠ܆ ܘܰܫܠܳܡܳܐ ܫܰܦܝܳܐ ܝܰܗ̱ܒ ܠܳܗ̇܆ ܘܰܒܚܽܘܒܶܗ ܕܰܐܒܳܐ ܪܰܫܡܶܗ܆ ܬܶܗܪܳܐ ܗ̱ܝ ܟܽܠܳܗ̇ ܡܰܠܝܰܬ ܫܽܘܦܪ̈ܶܐ܆ ܕܪܺܝܫܳܐ ܕܥܺܝܪ̈ܶܐ ܗܘܳܐ ܡܳܟܽܘܪܳܗ̇܆ ܘܡܳܪܳܐ ܕܥܺܝܪ̈ܶܐ ܢܚܶܬ ܘܰܫܪܳܐ ܒܳܗ̇܆ ܗܘܳܬ ܐܶܡܳܐ ܠܝܰܠܕܶܗ ܕܰܐܒܳܐ܆ ܘܛܶܥܢܰܬ ܠܰܛܥܺܝܢ ܒܶܪ̈ܝܳܬܳܐ܆ ܗܘܳܬ ܒܺܐܪܬܳܐ ܠܡܳܪܶܐ ܡܰܠ̈ܟܶܐ܆ ܘܡܳܪܶܐ ܡܰܠ̈ܟܶܐ ܢܚܶܬ ܘܰܫܪܳܐ ܒܳܗ̇܆ ܒܪܺܝܟ ܕܰܕܢܰܚ ܠܰܢ ܡܶܢ ܕܰܟܝܽܘܬܳܗ̇܀

ܐ̱ܚܪܺܢܳܐ

ܩܳܠܳܐ ܒܩ̄: ܢܨܰܒ ܒܳܪܽܘܝܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ ܕܡܶܢ ܡܰܪܝܰܡ ܐܶܬܺܝܠܶܕ܆ ܘܰܗܘܳܐ ܠܰܢ ܦܳܪܽܘܩܳܐ.

ܥܢܳܬ ܕܶܝܢ ܡܰܪܝܰܡ. ܘܰܠܥܺܝܪܳܐ ܐܳܡܪܳܐ ܗ̱ܘܳܬ܆ ܘܦܰܢܝܰܬ ܠܶܗ ܦܶܬܓܳܡܳܐ܆ ܐ̱ܡܰܪ ܠܺܝ ܗܳܫܳܐ܆ ܟܡܳܐ ܥܰܒ̈ܕܶܐ ܐܰܟܘܳܬܳܟ܆ ܐܳܬܶܝܢ ܩܕܳܡ ܡܳܪܳܟ܆ ܟܰܕ ܐܳܬܶܐ ܕܢܶܫܪܶܐ ܒܺܝ܆ ܘܰܐܝܟܰܢ ܡܶܬܚܰܘܶܐ ܠܺܝ܆ ܡܳܪܳܟ ܢܽܘܪܳܢܳܐ܆ ܡܰܨܝܳܐ ܐ̱ܢܳܐ ܕܶܐܚܽܘܪ ܒܶܗ ܒܦܰܪܨܽܘܦܶܗ܆ ܐܰܘ ܕܰܠܡܳܐ ܡܰܘܩܶܕ ܠܺܝ܆ ܡܶܢ ܥܽܘܙܳܐ ܕܢܰܒܪܰܫܬܶܗ܀

ܢܒܺܝ̈ܶܐ ܒܰܕܩܽܘܟܝ. ܒܐ̱ܪ̈ܳܙܰܝܗܽܘܢ ܒܰܪ̱ܬ ܕܰܘܺܝܕ܆ ܒܬܽܘܠܬܳܐ ܩܰܕܺܝܫܬܳܐ܆ ܡܽܘܫܶܐ ܒܣܰܢܝܳܐ܆ ܕܰܒܢܽܘܪܳܐ ܡܶܬܓܰܘܙܰܠ܆ ܘܣܰܢܝܳܐ ܠܳܐ ܝܳܩܶܕ܆ ܚܰܙܩܺܝܐܶܝܠ ܬܰܪܥܳܐ ܕܰܐܚܺܝܕ܆ ܕܠܳܐ ܥܰܠ ܒܶܗ ܐܶܠܳܐ ܡܶܠܬܳܐ ܐܰܠܳܗܳܐ܆ ܘܗܳܐ ܐܰܚܺܝܕ ܘܠܳܐ ܐ̱ܢܳܫ ܥܳܐܶܠ ܒܶܗ܆ ܥܰܠ ܘܰܢܦܰܩ ܒܶܗ܆ ܗܽܘ ܡܶܠܬܳܐ ܐܰܠܳܗܳܐ܆ ܘܠܳܐ ܫܪܳܐ ܛܰܒ̈ܥܶܐ ܚܬܺܝ̈ܡܶܐ܀

ܒܗܶܬ ܟܳܦܽܘܪܳܐ. ܕܰܡܥܰܩܶܒ ܥܰܠ ܝܰܠܕܳܐ܆ ܕܰܒܬܽܘܠܬܳܐ ܒܰܪ̱ܬ ܕܰܘܺܝܕ܆ ܕܗܺܝ ܒܰܠܚܽܘܕܶܝܗ̇܆ ܝܶܠܕܰܬ ܗ̱ܘܳܬ ܠܥܳܒܽܘܕܳܗ̇܆ ܘܰܒܝܰܠܕܳܗ̇ ܣܟܺܝܪ ܦܽܘܡܳܐ܆ ܕܕܳܪ̈ܽܘܫܶܐ ܕܠܳܐ ܡܗܰܝܡܢܺܝܢ܆ ܘܰܚܦܰܪܘ ܒܳܨܽܘ̈ܝܶܐ܆ ܘܰܒܗܶܬܘ ܕܳܪ̈ܽܘܫܶܐ܆ ܕܝܶܠܕܰܬ ܡܰܪܝܰܡ ܒܬܽܳܘܠܬܳܐ ܙܰܟܳܝܳܐ܆ ܕܙܰܟܺܝ ܗ̱ܘܳܐ ܠܚܰܝܳܒ̈ܶܐ܆ ܘܰܐܟܶܣ ܗ̱ܘܳܐ ܠܡܰܪ̈ܳܚܶܐ܀

ܣܽܘܓܺܝܬܳܐ

ܩܳܠܳܐ ܒܩ̄: ܣܠܶܩ ܠܰܨܠܺܝܒܳܐ

ܥܽܘܢܺܝܬܳܐ: ܠܳܟ ܬܶܫܒܽܘܚܬܳܐ܆ ܒܪܳܐ ܕܺܝܠܺܝܕ ܡܶܢ ܐܰܒܳܐ܆ ܘܕܰܨܒܰܝܬ ܒܚܽܘܒܳܟ܆ ܐܶܬܺܝܠܶܕܬ ܡܶܢ ܡܰܪܝܰܡ.

ܐܰܢ̱ܬܝ ܗ̱ܺܝ ܡܰܪܝܰܡ. ܩܺܐܒܽܘܬܳܐ ܡܢܰܦܰܫܬܳܐ܆ ܕܒܶܟܝ ܫܪܳܐ ܠܰܚܡܳܐ܆ ܕܶܐܫܬܰܕܰܪ ܡܶܢ ܐܰܒܳܐ܆ ܐܰܙܥܶܩ ܗ̱ܘܳܐ ܒܟܶܢ̈ܫܶܐ ܟܰܕ ܐܳܡܰܪ܆ ܕܟܽܠ ܕܳܐܟܶܠ ܡܶܢܶܗ ܠܳܐ ܡܳܐܶܬ܆ ܠܶܟܝ ܛܽܘܒܰܝܟܝ ܕܺܝܠܶܕܬܺܝܘܗ̱ܝ܆ ܠܗܰܘ ܣܰܒܪܳܐ ܕܒܶܪ̈ܝܳܬܳܐ܀

ܓܳܠܘ ܗ̱ܘܰܘ ܪ̈ܰܚܡܰܝܟ. ܐܰܠܳܗܳܐ ܥܰܠ ܨܰܠܡܳܟ܆ ܕܰܐܫܚܶܬ ܘܰܒܠܺܝ܆ ܒܓܰܘ ܚܶܙ̈ܶܐ ܕܰܐܒܕܳܢܳܐ܆ ܘܰܒܚܰܪܬܳܐ ܕܙܰܒ̈ܢܶܐ ܕܰܫܦܰܪ ܠܳܟ܆ ܡܶܢ ܒܬܽܘܠܬܳܐ ܕܟܺܝܬܳܐ ܐܶܬܒܰܣܰܪܬ܆ ܘܰܐܦܢܺܝܬܳܝܗ̱ܝ ܠܝܳܪܬܽܘܬܶܗ܆ ܟܰܕ ܙܳܡܰܪ ܬܶܫܒܽܘܚܬܳܐ܀

ܐܳܘ ܒܰܪ̱ܬ ܕܰܘܺܝܕ. ܢܒܺܝ̈ܶܐ ܥܠܰܝܟܝ ܐܶܬܢܰܒܺܝܘ܆ ܘܰܒ̈ܦܶܠܳܐܬܳܐ܆ ܐ̱ܪ̈ܳܙܶܐ ܠܶܟܝ ܨܳܝܪܺܝܢ ܗ̱ܘܰܘ܆ ܕܢܰܚ ܡܶܢܶܟܝ ܡܳܪܳܐ ܕܰܢܒܺܝ̈ܶܐ܆ ܘܠܰܥܒܳܕܳܐ ܐܶܬܰܝ̈ ܡܶܠܰܝ̈ܗܽܘܢ܆ ܒܪܺܝܟ ܕܶܐܬܳܐ ܘܒܶܟܝ ܣܰܝܶܟ܆ ܐ̱ܪ̈ܳܙܰܝܗܽܘܢ ܕܰܢܒܺܝ̈ܶܐ܀

ܙܳܚ ܡܶܢ ܪܰܘܡܳܐ. ܘܰܫܪܳܐ ܒܳܗ̇ ܒܰܛܠܺܝܬܳܐ܆ ܘܰܢܦܰܩ ܡܶܢܳܗ̇܆ ܘܠܳܐ ܚܰܒܶܠ ܒܬܽܘܠܽܘܬܳܗ̇܆ ܘܠܳܐ ܐܶܣܬܢܶܩ ܕܢܶܦܬܰܚ ܗ̱ܘܳܐ ܬܰܪܥܳܐ܆ ܘܟܶܢ ܢܶܦܽܘܩ ܠܥܳܠܡܳܐ ܒܝܰܕ ܐܽܘܪܚܳܐ܆ ܘܥܰܠ ܗܳܕܶܐ ܕܽܘܡܳܪܰܐ ܗ̱ܘ܆ ܐܰܝܟ ܕܶܐܡܰܪ ܐܶܫܰܥܝܳܐ܀

ܛܽܘܒܰܝܟܝ ܡܰܪܝܰܡ. ܕܺܝܠܶܕܬܺܝܘܗ̱ܝ ܠܰܐܠܳܗܳܐ܆ ܘܠܳܐ ܫܪܳܐ ܛܰܒ̈ܥܶܐ܆ ܕܰܒܬܽܘ̈ܠܰܝܟܝ ܒܡܰܘܠܳܕܶܗ܆ ܗܳܐ ܫܡܰܝܳܐ ܚܳܕܝܳܐ ܒܕܽܘܟܪܳܢܶܟܝ܆ ܐܳܦ ܐܰܪܥܳܐ ܪܳܘܙܳܐ ܘܟܽܠ ܕܰܥܠܶܝܗ̇܆ ܟܰܕ ܙܳܡܪܺܝܢ ܬܶܫܒܽܘܚܬܳܐ܆ ܠܗܰܘ ܕܰܕܢܰܚ ܡܶܢ ܥܽܘܒܶܟܝ܀

ܟܰܕ ܚܰܒܬܳܐ ܐܰܢ̱ܬ. ܥܰܦܪܳܢܳܐ ܠܡܽܘܢ ܗܳܡܣܰܬ܆ ܨܶܝܕ ܥܶܠܳܝ̈ܶܐ܆ ܕܰܥܛܺܝܦܺܝܢ ܓܰܘܙܰܠܬܳܐ܆ ܘܪ̈ܶܒܘܳܬܳܐ ܘܟܶܢ̈ܫܶܐ ܕܪ̈ܽܘܚܳܢܶܐ܆ ܥܰܡ ܐܰܪ̈ܟܰܣ ܘܛܶܟ̈ܣܶܐ ܕܡܰܠܰܐܟ̈ܶܐ܆ ܓܢܺܝܙ ܡܶܢܳܟ ܝܺܚܺܝܕܳܐ܆ ܠܳܐ ܬܶܪܢܶܐ ܒܰܒܥܳܬܶܗ܀

ܡܳܐ ܕܡܶܬܥܰܠܝܳܐ. ܦܳܪܰܚܬܳܐ ܠܥܶܠ ܒܳܐܐܰܪ܆ ܠܳܐ ܡܶܬܡܰܢ̈ܝܳܢ. ܦ̈ܣܳܥܳܬܳܗ̇ ܘܕܽܘܪ̈ܟܳܬܳܗ̇܆ ܠܳܐ ܠܶܐܠܦܳܐ ܐܽܘܪܚܳܐ ܒܓܰܘ ܝܰܡܳܐ܆ ܘܠܳܐ ܠܢܽܘܢܳܐ ܫܒܺܝܠܳܐ ܒܓܰܘ ܡܰܝ̈ܳܐ܆ ܘܠܳܐ ܠܡܰܪܝܰܡ ܙܽܘܘܳܓܳܐ܆ ܚܪܶܡ ܐܰܝܢܳܐ ܕܕܳܪܶܫ ܠܶܗ܀

ܣܪ̈ܳܦܶܐ ܡܚܰܦܶܝܢ. ܐܰܦܰܝ̈ܗܽܘܢ ܡܶܢ ܙܺܝܘܶܗ܆ ܘܒܰܪ̱ܬ ܡܶܣ̈ܟܺܢܶܐ܆ ܡܢܰܨܪܳܐ ܠܶܗ ܐܰܝܟ ܫܰܒܪܳܐ܆ ܫܦܰܪ ܠܳܟ ܡܳܪܝ ܘܰܗܘܺܝܬ ܠܳܟ ܐܶܡܳܐ܆ ܟܰܕ ܐܰܒܽܘܟ ܡܶܡܬܽܳܘܡ ܠܳܐ ܚܙܶܐ ܠܺܝ܆ ܠܺܝ ܟܽܠ ܫܰܪ̈ܒܳܢ ܕܥܰܠ ܐܰܪܥܳܐ܆ ܠܺܝ ܓܶܝܪ ܢܶܬܠܳــ̈ـܢ ܛܽܘܒܳܐ܀

ܦܽܘܡܳܐ ܕܣܳܦܪܳܐ. ܠܳܐ ܢܥܰܩܶܒ ܠܗܰܘ ܝܰܠܕܳܐ܆ ܕܠܳܐ ܡܶܫܬܰܥܒܰܕ܆ ܠܰܕܪܳܫܳܐ ܕܚܰܟܺܝ̈ܡܶܐ܆ ܕܠܳܐ ܒܥܳܬܶܗ ܝܰܠܕܶܗ ܗ̱ܘܳܐ ܐܰܒܳܐ܆ ܕܠܳܐ ܢܶܩܦܳܐ ܝܺܠܶܕܬܶܗ ܒܬܽܘܠܬܳܐ܆ ܕܠܳܐ ܚܶܪܝܳܢܳܐ ܢܰܘܕܶܐ܆ ܕܳܪܽܘܫܳܐ ܕܰܐܠܳܗܰܐ ܗ̱ܘ܀

ܩܰܝܣܳܐ ܕܚܰܝ̈ܶܐ܆ ܕܰܢܨܺܝܒ ܗ̱ܘܳܐ ܒܓܰܘ ܥܕܶܢ܆ ܗܳܐ ܫܘܰܚ ܘܺܝܥܳܐ܆ ܡܶܢ ܓܽܘܙܥܳܗ̇ ܕܒܰܪ̱ܬ ܐ̱ܢܳܫܳܐ܆ ܕܠܳܐ ܫܶܩܝܳܐ ܐܰܦܪܰܥ ܗ̱ܘܳܐ ܛܰܪ̈ܦܶܐ܆ ܗܰܘ ܫܰܒܛܳܐ ܕܰܐܗܪܽܘܢ ܠܶܘܳܝܳܐ܆ ܘܰܡܫܺܝܚܳܐ ܕܠܳܐ ܙܰܪܥܳܐ܆ ܡܶܢ ܒܬܽܘܠܬܳܐ ܐܶܬܺܝܠܶܕ܀

ܫܡܰܝܳܐ ܘܰܐܪܥܳܐ. ܘܡܰܠܰܐܟ̈ܶܐ ܥܰܡ ܐ̱ܢܳܫ̈ܳܐ܆ ܬܗܰܪܘ ܘܶܐܬܕܰܡܰܪܘ܆ ܒܡܽܘܟܳܟܳܟ ܒܰܪ ܚܰܝܳܐ܆ ܕܡܶܢ ܫܽܘܒܚܳܐ ܘܗܶܕܪܳܐ ܕܰܣܪ̈ܳܦܶܐ܆ ܕܩܳܥܶܝܢ ܠܳܟ ܩܰܕܺܝܫ ܥܰܡ ܐܰܒܽܘܟ܆ ܐܶܬܬܰܚܬܺܝܬ ܒܨܶܒܝܳܢܳܟ܆ ܠܘܳܬ ܫܽܘܒܚܳܐ ܕܰܐܪ̈ܥܳܢܶܐ܀

ܬܶܒܪܽܘܟ ܘܬܶܣܓܽܘܕ. ܒܰܪ̱ܬ ܥܰܡ̱̈ܡܶܐ ܕܶܐܬܦܰܪܩܰܬ܆ ܡܶܢ ܣܶܓ̈ܕܳܬܳܐ܆ ܕܰܦܬܰܟܪ̈ܶܐ ܘܰܓܠܺܝ̈ܦܶܐ܆ ܠܗܰܘ ܕܰܐܦܢܝܳܗ̇ ܠܽܐܘܪܚܳܐ ܕܰܫܪܳܪܳܐ܆ ܕܒܶܗ ܬܶܣܓܽܘܕ ܠܰܐܒܳܐ ܝܳܠܽܘܕܶܗ܆ ܘܰܠܪܽܘܚܳܐ ܩܰܕܺܝܫܳܐ܆ ܕܗܽܘ ܐܺܝܬܰܘܗ̱ܝ ܓܳܡܽܘܪܳܗ̇܀

ܐ̱ܚܪܺܢܳܐ

ܩܳܠܳܐ ܒܩ̄: ܠܟܶܢܫܳܐ ܥܶܠܳܝܳܐ

ܥܽܘܢܺܝܬܳܐ: ܐܰܫܘܳܢ ܐܳܦ ܠܺܝ ܡܳܪܝ܆ ܕܶܐܙܡܰܪ ܠܳܟ ܫܽܘܒܚܳܐ܆ ܒܕܽܘܟܪܳܢ ܝܳܠܶܕܬܳܟ ܒܬܽܘܠܬܳܐ ܩܰܕܺܝܫܬܳܐ.

ܢܒܺܝܳܐ ܚܰܙܩܺܝܐܶܝܠ܆ ܬܡܺܝܗܳܐ ܒܓܶܠ̈ܝܳܢܶܐ܆ ܢܶܚܕܶܐ ܕܒܰܥܒܳܕܳܐ ܫܶܠܡܰܬ ܢܒܺܝܽܘܬܶܗ܆ ܬܰܡܳܢ ܒܓܰܘ ܒܳܒܶܝܠ܆ ܬܰܪܥܳܐ ܚܙܳܐ ܕܰܐܚܺܝܕ܆ ܘܶܐܡܰܪ ܕܥܳܐܶܠ ܒܶܗ܆ ܡܳܪܝܳܐ ܟܰܕ ܐܰܚܺܝܕ܆ ܡܰܪܝܰܡ ܗ̱ܺܝ ܬܰܪܥܳܐ ܕܰܐܚܺܝܕ܆ ܘܰܡܫܺܝܚܳܐ ܥܰܠ ܒܶܗ ܠܥܳܠܡܳܐ܆ ܘܠܳܐ ܦܰܬܚܶܗ ܢܶܫܠܽܘܢ ܕܳܪ̈ܽܘܫܶܐ܀

ܡܕܺܝ̈ܢܳܬܶܗ ܕܡܰܠܟܳܐ܆ ܡ̈ܥܳܕܳܢ ܐܶܢܶܝܢ ܟܽܠܗܶܝܢ܆ ܕܰܟܠܺܝ̈ܠܶܐ ܕܕܰܗܒܳܐ ܢܩܰܪ̈ܒܳܢ ܒܺܐܝ̈ܕܰܝܗܶܝܢ܆ ܡܕܺܝ̈ܢܳܬܳܐ ܕܒܺܝܗܽܘܕ܆ ܟܠܺܝ̈ܠܶܐ ܡܳܪܝ ܡܠܺܝ̈ܠܶܐ܆ ܟܠܺܝ̈ܠܰܝܗܶܝܢ ܒܺܐܝ̈ܕܰܝܗܶܝܢ܆ ܠܳܟ ܡܰܠܟܳܐ ܡܩܰܪ̈ܒܳܢ܆ ܒܶܝܬ ܠܚܶܡ ܘܩܳܛܢܶܐ ܐܳܦ ܢܳܨܪܰܬ܆ ܒܶܝܬ ܥܰܢܝܳܐ ܘܰܫܟܺܝܡ ܘܫܳܡܪܺܝܢ܆ ܥܰܡ ܟܰܪ̈ܟܶܐ ܕܰܫܘܰܘ ܘܰܐܩܒܠܽܘܟ܀

ܟܠܺܝܠܳܐ ܩܰܕܡܳܝܳܐ܆ ܡܕܺܝܢ̱ܬܳܟ ܬܩܰܪܶܒ ܠܳܟ܆ ܬܪܶܝܢ ܟܠܺܝ̈ܠܺܝܢ ܐܰܟܚܕܳܐ ܕܡܰܪܝܰܡ ܘܳܐܦܰܪܬܳܐ܆ ܟܽܠܗܶܝܢ ܡܕܺܝ̈ܢܳܬܳܐ܆ ܡܶܢ ܕܺܝܠܗܶܝܢ ܡܩܰܪ̈ܒܳܢ܆ ܠܳܟ ܡܳܪܝ ܡܶܢ ܕܺܝܠܳܟ ܟܠܺܝ̈ܠܰܝܗܶܝܢ ܡܩܰܪ̈ܒܳܢ܆ ܡܰܠܟܳܐ ܓܶܝܪ ܢܳܣܶܒ ܕܠܳܐ ܝܰܗ̱ܒ܆ ܡܕܺܝ̈ܢܳܬܳܟ ܢܶܨܚܳܢܰܝ̈ܟ ܓ̈ܳܕܠܳܢ܆ ܘܰܟܠܺܝܠܳܐ ܕܫܽܘܒܚܳܐ ܠܳܟ ܡܩܰܪ̈ܒܳܢ܀

ܐܶܡܳܐ ܕܺܝܠܶܕܬܶܗ܆ ܫܳܘܝܳܐ ܠܕܽܘܟܪܳܢܳܐ܆ ܘܟܰܪܣܳܐ ܕܰܛܥܶܢܬܶܗ ܫܳܘܝܳܐ ܠܒܽܘܪ̈ܟܳܬܳܐ܆ ܐܳܦ ܝܰܘܣܶܦ ܕܰܐܒܳܐ܆ ܐܶܬܩܪܺܝ ܒܛܰܝܒܽܘܬܳܐ܆ ܠܰܒܪܳܐ ܕܰܫܪܳܪܳܐ܆ ܗܰܘ ܕܰܐܒܽܘܗ̱ܝ ܡܫܰܒܚܰܐ ܗ̱ܘ܆ ܪܳܥܶܐ ܠܟܽܠ ܒܶܪ̈ܝܳܢ ܕܶܐܫܬܠܰܚ܆ ܥܰܠ ܥܶܪܒܳܐ ܕܶܐܒܰܕ ܘܰܐܦܢܝܶܗ܆ ܘܰܠܕܰܝܪܶܗ ܙܰܝܰܚ ܘܰܐܥܠܶܗ܀

ܐܰܢ̱ܬ ܡܳܪܝ ܐܰܠܶܦܰܝܢܝ܆ ܕܰܐܝܟܰܢ ܘܥܰܠ ܡܳܢܳܐ܆ ܡܶܢ ܥܽܘܒܳܐ ܒܬܽܘܠܳܐ ܫܦܰܪ ܠܳܟ ܘܶܐܬܺܝܠܶܕܬ܆ ܠܡܳܐ ܛܽܘܦܣܶܗ ܕܳܐܕܳܡ܆ ܕܡܶܢ ܐܰܪܥܳܐ ܒܬܽܘܠܬܳܐ܆ ܕܠܳܐ ܐܶܬܒܰܪܟܰܬ ܗ̱ܘܳܬ ܥܕܰܟܺܝܠ ܐܶܬܓܒܶܠ ܗ̱ܘܳܐ܆ ܡܽܘܢ ܟܰܝ ܐܳܠܨܳܐ ܗ̱ܘܳܬ ܕܬܶܬܡܟܰܪ܆ ܐܶܡܳܟ ܠܝܰܘܣܶܦ ܒܰܪ ܕܰܘܺܝܕ܆ ܘܶܐܬܺܝܠܶܕܬ ܡܶܢܳܗ̇ ܕܠܳܐ ܓܒܰܪ܀

ܐܰܝܟܳܐ ܡܶܫܟܰܚ ܠܳܟ܆ ܐܰܝܢܳܐ ܕܒܳܥܶܐ ܠܳܟ܆ ܘܰܐܝܟܳܐ ܚܳܙܶܐ ܠܳܟ ܐܰܝܢܳܐ ܕܪܳܚܶܡ ܠܳܟ܆ ܒܰܫܡܰܝܳܐ ܢܶܒܥܶܝܟ܆ ܒܥܽܘܒܳܐ ܕܝܳܠܽܘܕܳܟ܆ ܐܰܘ ܕܶܝܢ ܒܳܐܦܰܪܬܳܐ ܒܽܐܘܪܝܳܐ ܒܒܶܝܬ ܠܚܶܡ܆ ܘܶܐܢ ܒܥܽܘܒܳܗ̇ ܕܡܰܪܝܰܡ ܢܶܒܥܶܝܟ܆ ܬܚܶܝܬ ܛܰܒ̈ܥܶܐ ܢܛܺܝܪ̈ܶܐ ܟܣܶܐ ܐܰܢ̱ܬ܆ ܬܶܗܪܰܐ ܗ̱ܘ ܡܰܘܠܳܕܳܟ ܒܟܽܠܗܶܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܬܬܥܺܝܪܘ ܫܳܗܪ̈ܶܐ

ܥܽܘܢܺܝܬܳܐ: ܫܽܘܒܚܳܐ ܠܗܰܘ ܕܰܓܒܳܗ̇܆ ܠܡܰܪܝܰܡ ܒܰܪ̱ܬ ܕܰܘܺܝܕ܆ ܘܰܢܚܶܬ ܘܰܫܪܳܐ ܒܳܗ̇܆ ܘܠܳܐ ܡܶܬܒܨܶܐ ܡܶܢ ܐ̱ܢܳܫ.

ܟܶܢ̈ܫܶܐ ܗܳܐ ܙܰܡܢܰܬ. ܒܬܽܘܠܬܳܐ ܩܰܕܺܝܫܬܳܐ܆ ܕܰܩܕܳܡܰܝܗܽܘܢ ܬܪܺܝܡ. ܩܳܠܳܗ̇ ܟܰܕ ܐܳܡܪܳܐ܀

ܐܰܚܰܝ̈ ܬܰܘ ܨܽܘܬܘ ܫܡܰܥܘ. ܠܡܰܪܝܰܡ ܟܰܕ ܩܳܒܠܳܐ܆ ܥܰܠ ܐܰܝܠܶܝܢ ܕܳܐܡܪܺܝܢ. ܕܠܰܘ ܐܰܠܳܗܰܐ ܗ̱ܘ ܒܪܳܗ̇܀

ܙܽܘܘܳܓܳܐ ܠܳܐ ܚܙܺܝܬ. ܘܓܰܒܪܳܐ ܠܳܐ ܚܟܺܝܡ ܠܺܝ܆ ܘܗܳܢ ܕܶܐܬܺܝܠܶܕ ܡܶܢܝ܆ ܐܰܠܳܗܳܐ ܢܶܬܟܪܶܙ܀

ܐܳܘ ܕܳܘܰܝ̈ܳܐ ܠܡܽܘܢ. ܥܳܫܩܺܝܢ ܐ̱ܢܬܽܘܢ ܠܶܗ ܠܒܶܪܝ܆ ܘܶܐܢܳܐ ܠܰܡ ܒܬܽܘܠܬܳܐ. ܛܠܺܝܡܳܐ ܐ̱ܢܳܐ ܡܶܢܟܽܘܢ܀

ܐܶܢ ܡܶܢ ܢܶܩܦܳܐ ܗܘܳܐ. ܢܶܬܦܰܫܰܩ ܡܶܢܟܽܘܢ܆ ܘܶܐܢ ܡܶܢ ܪܽܘܚܳܐ ܗܘܳܐ. ܠܡܳܢܳܐ ܫܳܚܩܺܝܬܽܘܢ܀

ܐܶܠܽܘ ܐܶܙܕܰܘܓܶܬ. ܒܰܪܢܳܫܳܐ ܝܶܠܕܶܬ܆ ܘܰܕܠܳܐ ܚܙܺܝܬ ܥܳܠܡܳܐ. ܒܰܪ ܡܳܪܰܐ ܗ̱ܘ ܕܥܳܠ̈ܡܶܐ܀

ܟܡܳܐ ܕܢܶܒܨܽܘܢ ܣܳܦܪ̈ܶܐ. ܓܢܺܝܙܳܐ ܐ̱ܢܳܐ ܡܶܢܗܽܘܢ܆ ܕܠܳܐ ܚܫܺܝܒܳܐ ܡܶܠܬܗܽܘܢ܆ ܠܬܶܕܡܽܘܪܬܳܐ ܪܰܒܬܳܐ܀

ܐܶܠܽܘ ܐܶܫܬܰܘܬܦܶܬ܆ ܦܫܺܝܩܽ ܗ̱ܘ ܕܰܬܡܰܠܠܽܘܢ܆ ܘܕܰܚܬܺܝܡܬܳܐ ܐܺܝܬܰܝ܆ ܠܡܽܘܢ ܬܪܺܝܥ ܦܽܘܡ ܣܳܦܪ̈ܶܐ܀

ܐܶܡܰܬܝ ܘܰܐܝܟܰܢܳܐ܆ ܗܘܳܬ ܗܳܕܶܐ ܒܥܳܠܡܳܐ܆ ܘܶܐܢ ܬܶܕܡܽܘܪܬܳܐ ܠܡܽܘܢ܆ ܠܳܐ ܒܳܗܬܺܝܢ ܣܳܦܪ̈ܶܐ܀

ܗܳܐ ܚܰܠܒܳܐ ܥܰܠ ܬܕܰܝ̈܆ ܘܰܒܬܽܘ̈ܠܶܐ ܥܰܠ ܩܢܽܘܡܝ܆ ܐܰܝܟܰܢ ܡܶܬܦܰܫ̈ܩܳܢ܆ ܬܰܪ̈ܬܰܝܗܶܝܢ ܐܰܟܚܕܳܐ܀

ܗܽܘ ܐܰܠܳܗܰܐ ܗ̱ܘ ܠܥܶܠ܆ ܘܗܽܘ ܒܰܪܢܳܫܰܐ ܗ̱ܘ ܠܬܰܚܬ܆ ܗܽܘܝܽܘ ܠܥܶܠ ܘܰܠܬܰܚܬ܆ ܘܚܰܕ ܝܰܠܕܰܐ ܗ̱ܘ ܘܠܰܘ ܬܪܶܝܢ܀

ܠܳܐ ܬܶܒܨܽܘܢ ܣܰܟ̈ܠܶܐ. ܠܰܒܪܳܐ ܦܳܪܽܘܩܟܽܘܢ܆ ܕܰܐܠܳܗܳܐ ܡܳܪܟܽܘܢ܆ ܘܒܰܪܢܳܫܳܐ ܥܰܡܟܽܘܢ܀

ܒܰܪ ܐ̱ܢܳܫܺܝ̈ܢ ܟܰܢܝܶܗ܆ ܕܳܢܺܝܐܶܝܠ ܟܰܕ ܚܙܳܝܗ̱ܝ܆ ܘܶܐܫܰܥܝܳܐ ܐܰܟܪܙܶܗ܆ ܓܰܢ̱ܒܳܪܳܐ ܕܥܳܠ̈ܡܶܐ܀

ܒܬܰܪ̈ܬܰܝܗܶܝܢ ܐܰܟܪܙܽܘܗ̱ܝ܆ ܢܒܺܝ̈ܶܐ ܕܡܶܢ ܥܳܠܡܺܝܢ܆ ܘܠܰܬܪܶܝܢ ܠܳܐ ܦܰܠܓܽܘܗ̱ܝ܆ ܕܺܝܚܺܝܕܳܝܰܐ ܗ̱ܘ ܒܪܳܐ܀

ܡܺܝܟܳܐ ܡܰܠܟܳܐ ܩܪܳܝܗ̱ܝ܆ ܘܰܙܟܰܪܝܳܐ ܪܳܥܝܳܐ܆ ܘܡܽܘܫܶܐ ܢܒܺܝܳܐ ܟܬܰܒ܆ ܕܩܳܐܶܡ ܡܶܢ ܥܰܡܟܽܘܢ܀

ܫܡܽܘܐܶܝܠ ܡܫܺܝܚܳܐ ܩܪܳܝܗ̱ܝ܆ ܘܕܰܘܺܝܕ ܡܳܪܝ ܐܰܟܪܙܶܗ܆ ܚܰܕ ܕܶܢܚܳܐ ܣܰܒܪܶܗ܆ ܐ̱ܚܪܺܝܢ ܟܺܐܦ ܬܽܘܩܰܠܬܳܐ܀

ܚܰܕ ܥܰܠ ܫܽܘܪܳܐ ܚܙܳܝܗ̱ܝ܆ ܘܰܐ̱ܚܪܺܢܳܐ ܒܟܽܘܪܣܝܳܐ܆ ܘܰܒܗܳܠܶܝܢ ܟܽܠܗܶܝܢ܆ ܕܚܰܕܽ ܗ̱ܘ ܒܪܳܐ ܐܶܬܟܪܶܙ܀

ܢܒܺܝ̈ܶܐ ܠܳܐ ܐܶܨܛܒܺܝܘ܆ ܕܢܶܩܪܽܘܢ ܠܰܒܪܳܐ ܬܪܶܝܢ܆ ܫܠܺܝ̈ܚܶܐ ܬܽܘܒ ܟܰܕ ܢܦܰܩܘ܆ ܚܰܕ ܒܰܠܚܽܘܕ ܐܰܟܪܙܽܘܗ̱ܝ܀

ܘܟܰܕ ܗܳܠܶܝܢ ܐܳܡܪܳܢ܆ ܒܦܰܓܪܶܗ ܠܳܐ ܟܳܦܪܳܢ܆ ܕܡܶܢܝ ܐܶܬܓܰܫܰܡ ܘܒܺܝ܆ ܫܽܘܚܠܳܦܳܐ ܠܳܐ ܩܢܳܐ܀

ܡܶܢ ܥܺܝܪ̈ܶܐ ܠܳܐ ܢܣܰܒ܆ ܦܰܓܪܳܐ ܘܨܶܐܕܰܝ ܢܚܶܬ܆ ܒܦܰܓܪܳܐ ܕܡܶܢܝ ܐܶܬܚܙܺܝ܆ ܟܰܕ ܐܰܠܳܗܰܐ ܗ̱ܘ ܕܟܽܠ܀

ܒܺܝ ܐܶܙܕܰܝܰܢ ܘܡܶܢܝ܆ ܠܽܘܩܒܰܠ ܡܶܠܬܳܐ ܢܦܰܩ܆ ܘܟܰܕ ܛܳܒ ܦܰܓܪܳܐ ܠܒܶܫ܆ ܕܚܰܕ ܗ̱ܽܘ ܒܪܳܐ ܠܰܘ ܬܪܶܝܢ܀

ܥܰܡ ܦܰܓܪܳܐ ܚܰܕ ܒܪܳܐ܆ ܒܓܽܘܫܡܳܐ ܘܰܕܠܳܐ ܓܫܽܘܡ܆ ܗܽܘ ܩܰܫܺܝܫ ܥܳܠ̈ܡܶܐ܆ ܘܝܰܘܡܳܢ ܐܶܬܺܝܠܶܕ܀

ܕܠܳܐ ܚܰܫ ܒܺܐܝܬܽܘܬܶܗ܆ ܘܗܽܘܝܽܘ ܚܰܫ ܕܢܶܦܪܩܰܢ܆ ܗܽܘ ܠܳܐ ܡܳܐܶܬ ܘܡܺܝܬ܆ ܘܗܽܘ ܟܰܕ ܗܽܘ ܚܰܕ ܒܪܳܐ܀

ܠܰܬܪܶܝܢ ܠܳܐ ܢܶܬܡܢܶܐ܆ ܚܰܕܽ ܗ̱ܘ ܠܳܐ ܢܶܣܬܕܶܩ܆ ܕܺܝܚܺܝܕܳܝܰܐ ܗ̱ܘ ܒܪܳܐ܆ ܘܶܐܢ ܬܪܶܝܢ ܗ̱ܽܘ ܠܰܘ ܒܪܰܐ ܗ̱ܘ܀

ܒܩܽܘܫܬܳܐ ܐܶܬܗܰܝܡܢܰܬ܆ ܒܬܽܘܠܬܳܐ ܩܰܕܺܝܫܬܳܐ܆ ܘܰܒܪܳܐ ܕܡܶܢܳܗ̇ ܕܢܰܚ܆ ܕܰܐܠܳܗܰܐ ܗ̱ܘ ܐܰܟܪܙܽܘܗ̱ܝ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܒܟܽܠ ܫܶܡ ܡܰܪܝܰܡ ܐܶܬܩܰܠܣܰܬ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܡܰܪܝܰܡ ܕܺܝܠܶܕܬܳܟ܆

ܒܰܨܠܽܘܬܳܗ̇ ܘܚܺܝܠ ܒܳܥܽܘܬܳܗ̇ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܛܥܶܢܬܶܗ ܡܰܪܝܰܡ ܠܰܡܫܺܝܚܳܐ܆ ܘܢܰܨܰܪܬܶܗ ܚܰܒܺܝܒܳܐܺܝܬ܆ ܣܳܓܕܳܐ ܐ̱ܢܳܐ ܠܳܟ ܡܳܪܝ ܘܰܐܠܳܗܝ܆ ܕܰܗܘܰܝܬ ܠܺܝ ܒܪܳܐ ܒܛܰܝܒܽܘܬܳܟ܆ ܠܳܟ ܫܽܘܒܚܳܐ ܒܽܘܟܪܶܗ ܕܰܐܒܳܐ܆ ܕܶܐܬܰܚܬܺܝܬ ܨܶܝܕ ܡܶܣܟܺܢܽܘܬܝ܆ ܣܳܓܕܳܐ ܐ̱ܢܳܐ ܠܳܟ ܛܠܶܐ ܘܩܰܫܺܝܫ܆ ܫܪܶܐ ܒܰܐܪܥܳܐ ܫܪܶܐ ܒܰܫܡܰܝܳܐ܆ ܡܰܢ ܢܶܬܶܠ ܠܰܡܓܰܙܰܝܬܳܐ܆ ܕܦܺܐܪܶܗ ܕܰܐܒܳܐ ܢܶܫܪܶܐ ܒܳܗ̇܆ ܫܡܰܝܳܐ ܬܶܬܶܠ ܠܺܝ ܛܽܘܒܳܐ܆ ܕܗܰܘ ܕܰܫܪܶܐ ܒܳܗ̇ ܗܳܐ ܓܢܶܐ ܒܺܝ܆ ܐܰܪܥܳܐ ܬܶܬܶܠ ܠܺܝ ܛܽܘܒܳܐ܆ ܕܰܛܥܺܝܢܳܐ ܐ̱ܢܳܐ ܡܕܰܒܪܳܢܳܗ̇܀

ܐܳܕܳܡ ܢܶܬܶܠ ܠܺܝ ܛܽܘܒܳܐ܆ ܕܒܺܝ ܡܶܬܦܰܢܶܐ ܠܦܰܪܕܰܝܣܳܐ܆ ܡܶܟܺܝܠ ܢܶܬܠܽܘܢ ܠܺܝ ܛܽܘܒܳܐ܆ ܡܰܠ̈ܟܶܐ ܘܟܳܗ̈ܢܶܐ ܘܰܢܒܺܝ̈ܶܐ܆ ܕܒܺܝ ܐܶܫܬܰܡ̈ܠܺܝ ܡܶܠܰܝ̈ܗܽܘܢ܆ ܘܰܗ̈ܘܰܝ ܟܽܠܗܶܝܢ ܒܰܥܒܳܕܳܐ܀

ܬܶܫܒܽܘܚܬܳܐ ܠܰܐܒܳܐ ܕܰܓܒܳܗ̇܆ ܠܰܕܟܺܝܬܳܐ ܡܶܢܟܽܠ ܫܰܪ̈ܒܳܢ܆ ܘܬܰܘܕܺܝܬܳܐ ܠܰܒܪܳܐ ܚܰܝܳܐ܆ ܕܰܗܘܳܐ ܡܶܢܳܗ̇ ܒܰܪܢܳܫܳܐ܆ ܠܪܽܘܚܳܐ ܕܩܽܘܕܫܳܐ ܗܽܘܠܳܠܳܐ܆ ܕܰܐܘܪܶܒ ܝܰܘܡܳܐ ܕܕܽܘܟܪܳܢܳܗ̇܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܡܰܪܝܰܡ ܕܺܝܠܶܕܬܳܟ܆

ܒܰܨܠܽܘܬܳܗ̇ ܘܚܺܝܠ ܒܳܥܽܘܬܳܗ̇ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀