ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܠܡܰܪܝܰܡ ܝܳܠܕܰܬ ܐܰܠܳܗܳܐ
ܫܽܘܒܚܳܐ ܠܳܟ ܕܰܒܦܽܘܩܕܳܢܳܟ. ܐܰܡܠܶܟ ܡܰܘܬܳܐ

ܐ̱ܶܣܛܶܦܰܢܳܘܣ ܢܰܨܺܝܚܳܐ ܢܶܚܙܶܝܟ ܟܽܠܰܢ: ܒܓܽܘ̈ܕܰܝܗܽܘܢ ܘܰܒܣܶܕܪ̈ܰܝܗܽܘܢ ܕܐ̱ܢܳܫ̈ܳܐ ܟܺܐܢ̈ܶܐ: ܘܥܰܡܗܽܘܢ ܢܰܣܶܩ ܬܶܫܒܽܘܚܬܳܐ ܠܰܐܒܳܐ ܘܠܰܒܪܳܐ: ܘܰܠܪܽܘܚ ܩܽܘܕܫܳܐ ܕܓܶܕܠܰܬ ܠܳܟ ܟܠܺܝܠ ܩܽܘ̈ܠܳܣܶܐ܀

ܐܺܝܢ ܓܰܒܝܳܐ ܐܶܣܛܶܦܰܢܳܘܣ ܣܳܗܕܳܐ ܒܪܺܝܟܳܐ܆ ܐܰܝܟܰܢܳܐ ܗ̱ܘܳܐ ܗܰܘ ܚܶܙܘܳܐ ܕܰܚܙܰܝܬ ܒܰܫܡܰܝܳܐ܆ ܚܙܺܝܬܶܗ ܠܰܒܪܶܗ ܕܰܐܠܳܗܳܐ ܟܰܕ ܩܳܐܶܡ ܗ̱ܘܳܐ܆ ܡܶܢ ܝܰܡܺܝܢܳܐ ܕܫܳܠܽܘܚܶܗ ܐܰܒܳܐ ܡܬܽܘܡܳܝܳܐ܀

ܫܽܘܒܚܳܐ

ܣܳܗܕܳܐ ܕܬܰܪܣܺܝ ܡܰܪܥܺܝܬܳܟ ܒܰܪ ܐܰܠܳܗܳܐ܆ ܘܪܰܒܺܝ ܒܫܶܩܝܳܐ ܪܽܘܚܳܢܳܐ ܠܶܐܡܪ̈ܶܐ ܕܥܳܢ̈ܳܟ܆ ܗܳܐ ܥܺܕܰܬ ܩܽܘܕܫܳܐ ܡܙܰܝܚܳܐ ܠܝܽܘܡ ܕܽܘܟܪܳܢܳܟ܆ ܘܫܳܐܠܳܐ ܪ̈ܰܚܡܶܐ ܘܰܚܢܳܢܳܐ ܒܰܨ̈ܠܰܘܳܬܳܟ܀

ܡܰܕܪܳܫܳܐ

ܩܳܠܳܐ ܒܩ̄: ܟܰܠܰܬ ܡܰܠܟܳܐ

ܥܽܘܢܺܝܬܳܐ: ܕܽܘܟܪܳܢ ܣܳܗܕܳܐ ܢܶܗܘܶܐ: ܫܽܘܪܳܐ ܪܳܡܳܐ ܠܥܺܕܰܬ ܩܽܘܕܫܳܐ.

ܣܳܗܕܳܐ ܓܰܒܝܳܐ ܕܰܗܘܳܐ܆ ܕܶܒܚܳܐ ܡܠܺܝܠܳܐ ܐܳܦ ܩܽܘܪܒܳܢܳܐ܆ ܘܠܳܐ ܙܳܥ ܘܰܕܚܶܠ ܘܶܐܬܪܗܶܒ܆ ܡܶܢ ܠܽܘ̈ܚܳܡܶܐ ܕܥܰܡܳܐ ܦܰܩܪܳܐ܆ ܘܰܙܟܳܐ ܘܰܢܨܰܚ܆ ܐܳܦ ܐܶܬܟܰܠܰܠ܆ ܘܰܐܥܕܺܝ ܟܠܺܝܠܳܐ܆ ܡܠܶܐ ܢܶܨ̈ܚܳܢܶܐ܆ ܘܫܰܢܺܝ ܠܰܓܢܽܘܢܳܐ܆ ܕܰܡܠܶܐ ܚܰܕ̈ܘܳܬܳܐ܆ ܗܳܐ ܝܰܘܡܳܢ ܢܳܨܰܚ ܕܽܘܟܪܳܢܶܗ܀

ܪܰܒ ܗ̱ܽܘ ܚܽܘܒܶܗ ܕܣܳܗܕܳܐ܆ ܘܠܳܐ ܣܳܦܶܩ ܐ̱ܢܳܐ ܐܺܡܰܪ ܫܰܪܒܶܗ܆ ܕܪܳܓܡܺܝܢ ܗ̱ܘܰܘ ܠܶܗ ܒ̈ܟܺܐܦܶܐ܆ ܘܰܡܨܰܠܶܐ ܗ̱ܘܳܐ ܥܰܠ ܪ̈ܳܓܽܘܡܰܘܗ̱ܝ܆ ܒܡܳܪܶܗ ܡܰܪܺܝ܆ ܘܒܶܗ ܐܶܬܕܰܡܺܝ܆ ܕܳܐܦ ܗܽܘ ܨܰܠܺܝ܆ ܥܰܠ ܨܳܠܽܘܒܰܘ̈ܗ̱ܝ܆ ܫܽܘܒܚܳܐ ܠܗܰܘ ܕܰܓܒܳܝܗ̱ܝ܆ ܛܽܘܒܰܘܗ̱ܝ ܕܶܐܬܢܰܨܰܚ܆ ܒܪܺܝܟ ܡܳܪܶܗ ܕܰܐܘܪܶܒ ܕܽܘܟܪܳܢܶܗ܀

ܟܰܕ ܪܳܓܡܺܝܢ ܠܶܗ ܒ̈ܟܺܐܦܶܐ܆ ܠܶܐܣܛܶܦܰܢܳܘܣ ܥܰܡܳܐ ܣܰܟܠܳܐ܆ ܬܠܳܐ ܗ̱ܘܳܐ ܥܰܝܢܰܘ̈ܗ̱ܝ ܠܪܰܘܡܳܐ܆ ܘܰܚܙܳܐ ܫܡܰܝ̈ܳܐ ܕܰܦܬܺܝܚܺܝܢ ܗ̱ܘܰܘ܆ ܘܠܰܒܪܳܐ ܡܫܺܝܚܳܐ܆ ܕܩܳܐܶܡ ܒܫܽܘܒܚܳܐ܆ ܡܶܢ ܝܰܡܺܝܢܳܐ܆ ܕܰܐܒܳܐ ܕܫܰܠܚܶܗ܆ ܥܰܠ ܕܰܐܘܕܺܝ ܘܶܐܡܰܪ܆ ܡܫܺܝܚܳܐ ܒܪܶܗ ܕܰܐܒܳܐ܆ ܗܽܘܝܽܘ ܥܬܺܝܕ ܕܢܰܡܠܶܟ ܘܰܠܥܳܠܡܺܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܫܺܝܚܳܐ ܘܡܶܫܚܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܐܘܪܶܒ ܕܽܘܟܪܳܢܳܟ܆ ܢܰܨܺܝܚܳܐ ܡܳܪܝ ܐ̱ܶܣܛܶܦܰܢܳܘܣ.

ܗܰܒܠܺܝ ܫܶܐܠܰܬ ܚܽܘ̈ܫܳܒܰܝ܆ ܪܽܘܚܳܐ ܡܰܥܬܰܪ ܠܰܣܢܺܝ̈ܩܶܐ܆ ܘܣܰܒ ܠܳܟ ܕܳܫ̈ܢܶܐ ܕܬܰܘܕܺܝܬܳܐ܆ ܡܶܢ ܡܶܣܟܺܢܳܐ ܘܚܰܣܺܝܪܳܐ܆ ܕܶܐܓܕܽܘܠ ܠܶܗ ܟܠܺܝܠ ܩܽܘ̈ܠܳܣܶܐ܆ ܠܩܰܕܺܝܫܳܐ ܪܺܝܫܳܐ ܕܣܳܗ̈ܕܶܐ܆ ܘܩܰܕܡܳܝܳܐ ܕܰܡܫܰܡ̈ܫܳܢܶܐ܆ ܐܶܣܛܶܦܰܢܳܘܣ ܡܠܶܐ ܪܽܘܚܩܽܘܕܫܳܐ܀

ܚܳܕܝܳܐ ܥܺܕܬܳܐ ܥܰܡ ܝܰܠ̈ܕܶܝܗ̇. ܒܕܽܘܟܪܳܢܶܗ ܕܶܐܣܛܶܦܰܢܳܘܣ܆ ܘܙܳܡܪܳܐ ܫܽܘܒܚܳܐ ܠܰܡܫܺܝܚܳܐ܆ ܕܰܒܚܰܫܰܘ̈ܗ̱ܝ ܠܶܗ ܐܶܬܕܰܡܺܝ܆ ܕܒܰܨܠܽܘܬܶܗ ܘܰܒܒܳܥܽܘܬܶܗ܆ ܫܰܝܢܳܐ ܢܰܡܠܶܟ ܒܰܒܪܺܝܬܳܐ܀

ܐܳܘ ܣܳܗܕܳܐ ܡܳܪܝ ܐ̱ܶܣܛܶܦܰܢܳܘܣ܆ ܩܰܪܶܒ ܚܠܳܦܰܝܢ ܒܳܥܽܘܬܳܐ܆ ܠܰܡܫܺܝܚܳܐ ܕܩܰܒܶܠܬ ܚܠܳܦܰܘܗ̱ܝ܆ ܪܓܽܘܡܝܳܐ ܘܚܰܫ̈ܶܐ ܘܡܰܚ̈ܘܳܬܳܐ܆ ܘܒܰܨ̈ܠܰܘܳܬܳܐ ܕܰܫܠܺܝ̈ܚܶܐ܆ ܕܠܳܟ ܓܒܰܘ ܕܬܶܗܘܶܐ ܡܫܰܡܫܳܢܳܐ܆ ܘܒܰܨܠܽܘܬܳܐ ܕܚܰܒܪ̈ܰܝܟ ܓܒܰܝ̈ܳܐ܆ ܕܫܰܡܶܫܬܽܳܘܢ ܥܺܕܬܶܗ ܕܰܒܪܳܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܫܽܘܒܚܳܐ ܠܳܟ ܒܽܘܟܪܶܗ ܕܰܐܒܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܣܳܗܕܳܐ ܐ̱ܶܣܛܶܦܰܢܳܘܣ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܐ̱ܶܣܛܶܦܰܢܳܘܣ ܪܺܝܫܳܐ ܕܣܳܗ̈ܕܶܐ܆ ܒܟܺܐܦ̈ܶܐ ܪܰܓܡܽܘܗ̱ܝ ܝܗ̱ܽܘ̈ܕܳܝܶܐ܆ ܥܰܠ ܕܰܐܘܕܺܝ ܒܒܰܪ ܐܰܠܳܗܳܐ܆ ܚܙܳܐ ܠܰܫ̈ܡܰܝܳܐ ܕܰܦܬܺܝܚܺܝܢ܆ ܘܠܰܡܫܺܝܚܳܐ ܟܰܕ ܡܶܫܬܰܒܰܚ܆ ܡܶܢ ܝܰܡܺܝܢܳܐ ܕܫܳܠܽܘܚܶܗ܀

ܒܰܕܓܽܘܢ ܐܰܝܟ ܗܰܘ ܕܠܳܐ ܡܰܪܓܶܫ܆ ܡܰܘܬܳܐ ܕܰܪܓܽܘܡܝܳܐ ܩܰܒܶܠ܆ ܘܥܰܠ ܪ̈ܳܓܽܘܡܰܘܗ̱ܝ ܡܨܰܠܶܐ ܗ̱ܘܳܐ܆ ܐܰܝܟ ܡܳܪܶܗ ܒܥܶܕܳܢ ܚܰܫ̈ܶܐ܆ ܥܰܠ ܗܳܕܶܐ ܗܳܐ ܡܶܬܢܰܨܰܚ܆ ܕܽܘܟܪܳܢܶܗ ܨܠܽܘܬܶܗ ܥܰܡܰܢ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܣܳܗܕܳܐ ܐ̱ܶܣܛܶܦܰܢܳܘܣ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀