ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܒܪܺܝܟ ܒܽܘܟܪܳܐ ܕܝܰܗ̱ܒ ܕܶܡ̈ܘܳܬܶܗ: ܠܢܰܨܺܝ̈ܚܶܐ ܕܢܶܬܕܰܡܽܘܢ ܒܶܗ: ܘܩܰܕܡܳܝܳܐ ܢܣܰܒ ܕܶܡ̈ܘܳܬܶܗ: ܪܺܝܫܳܐ ܕܣܳܗ̈ܕܶܐ ܐ̱ܶܤܛܶܦܰܢܳܘܣ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܪܺܝܫܳܐ ܕܣܳܗ̈ܕܶܐ ܐ̱ܶܣܛܶܦܰܢܳܘܣ܆ ܐܶܬܕܰܡܺܝ ܠܒܰܪ ܐܰܠܳܗܳܐ܆ ܘܰܒܪܽܘܚ ܩܽܘܕܫܳܐ ܐܶܬܥܰܠܺܝ܆ ܘܰܚܙܳܝܗ̱ܝ ܠܰܒܪܳܐ ܒܬܶܫܒܽܘܚܬܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܪܳܓܡܺܝܢ ܗ̱ܘܰܘ ܠܶܗ ܟܰܕ ܫܰܬܺܝܩ: ܘܰܡܢܰܓܕܺܝܢ ܠܶܗ ܘܠܳܐ ܡܡܰܠܶܠ: ܘܰܡܨܰܠܶܐ ܘܒܳܥܶܐ ܥܠܰܝܗܽܘܢ: ܘܣܳܐܶܡ ܒܽܘܪܟܳܐ ܚܠܳܦܰܝܗܽܘܢ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܐܰܪܺܝܡ ܥܰܝ̈ܢܰܘܗ̱ܝ ܠܰܫܡܰܝܳܐ܆ ܘܰܚܙܳܐ ܠܰܒܪܳܐ ܒܬܶܫܒܽܘܚܬܳܐ܆ ܡܶܢ ܝܰܡܺܝܢܳܐ ܕܫܳܠܽܘܚܶܗ܆ ܘܰܒܚܽܘܒܶܗ ܚܰܫ̈ܶܐ ܣܰܝܒܰܪ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܗܰܒܠܰܢ ܚܰܝܠܳܐ ܕܰܢܡܰܠܶܠ܆ ܫܰܪܒܶܗ ܕܣܳܗܕܳܐ ܐܶܣܛܶܦܰܢܳܘܣ܆ ܗܳܢܳܐ ܕܰܪܕܳܐ ܒܥܶܩ̈ܒܳܬܳܟ܆ ܘܰܗܘܳܐ ܒܽܘܟܪܳܐ ܠܢܰܨܺܝ̈ܚܶܐ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܒܪܺܝܟܽ ܗ̱ܘ ܕܚܰܝܶܠ ܠܰܐܬܠܺܝܛܶܗ܆ ܘܚܰܙܩܶܗ ܒܚܰܝܠܳܐ ܕܪܽܘܚ ܩܽܘܕܫܳܐ܆ ܒܪܺܝܟ ܡܳܪܝܳܐ ܕܟܰܠܶܠ ܠܥܰܒܕܶܗ ܒܰܟܠܺܝܠܳܐ ܕܡܰܘܕܝܳܢܽܘܬܳܐ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܗܰܒܠܳܗ̇ ܠܥܺܕܬܳܟ
ܫܽܘܒܚܳܐ ܠܗܰܘ ܩܳܠܳܐ ܕܶܐܡܰܪ ܡܳܪܰܢ

ܐܰܬܠܺܝܛܳܐ ܒܪܺܝܟܳܐ܆ ܪܺܝܫܳܐ ܕܣܳܗ̈ܕܶܐ ܩܰܕܺܝ̈ܫܶܐ܆ ܐܶܣܛܶܦܰܢܳܘܣ ܓܰܒܪܳܐ ܢܰܨܺܝܚܳܐ܆ ܕܰܙܟܳܐ ܒܰܐܓܽܘܢܳܐ܆ ܘܰܐܥܕܺܝ ܟܠܺܝܠܳܐ ܕܙܳܟܽܘܬܳܐ܆ ܨܠܽܘܬܶܗ ܬܶܗܘܶܐ܆ ܫܽܘܪܳܐ ܠܢܰܦ̈ܫܳܬܰܢ܀

ܫܽܘܒܚܳܐ

ܚܠܳܦ ܝܰܓܪܳܐ ܕܟܺܐܦ̈ܶܐ܆ ܕܰܡܛܳܟ ܗ̱ܘܳܐ ܡܶܢ ܗܰܘ ܥܰܡܳܐ܆ ܠܺܝܛܳܐ ܘܚܰܪܡܳܐ ܪ̈ܳܓܡܰܝ ܩܰܕܺܝ̈ܫܶܐ܆ ܐܶܬܦܬܰܚܘ ܠܳܟ ܫܡܰܝ̈ܳܐ܆ ܘܰܚܙܰܝܬܳܝܗ̱ܝ ܠܒܰܪ ܐܰܠܳܗܳܐ܆ ܟܰܕ ܓܳܕܶܠ ܠܳܟ܆ ܟܠܺܝܠܳܐ ܕܙܳܟܽܘܬܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܨܠܺܝܒܳܐ ܥܒܺܝܕ ܠܶܗ܆ ܠܥܳܠܡܳܐ ܟܽܠܶܗ ܐܰܝܟ ܥܰܡܽܘܕܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܐܘܪܶܒ: ܝܽܘܡ ܕܽܘܟܪܳܢܳܟ: ܣܳܗܕܳܐ ܒܪܺܝܟܳܐ.

ܗܳܐ ܬܽܘܒ ܟܶܢ̈ܫܶܐ: ܒܝܽܘܡ ܥܰܕܥܺܐܕܶܗ ܫܠܶܝܢ ܘܰܒܗܺܝܠܺܝܢ: ܨܳܝܒܺܝܢ ܘܳܐܬܶܝܢ ܒܗܰܝܡܳܢܽܘܬܳܐ: ܘܫܳܐܠܺܝܢ ܡܶܢܶܗ ܣܽܘܢܩܳܢܰܝ̈ܗܽܘܢ: ܕܰܐܬܠܺܝܛ ܩܽܘܫܬܳܐ: ܒܰܐܬܪܳܐ ܕܣܺܝܡܺܝܢ ܓܰܪ̈ܡܰܘܗ̱ܝ ܬܰܡܳܢ܀

ܪܰܓܡܶܗ ܥܰܡܳܐ: ܠܣܳܗܕܳܐ ܓܰܒܝܳܐ ܡܳܪܝ ܐ̱ܶܣܛܶܦܰܢܳܘܣ: ܘܰܡܨܰܠܶܐ ܗ̱ܘܳܐ ܘܒܳܥܶܐ ܥܠܰܝܗܽܘܢ: ܕܠܳܐ ܡܳܪܝ ܬܩܺܝܡ ܠܗܽܘܢ ܗܳܕܶܐ ܚܛܺܝܬܳܐ: ܕܰܣܥܰܪܘ ܨܶܝܕܰܝ ܐܶܠܳܐ ܒܪ̈ܰܚܡܶܐ ܢܰܛܰܪ ܐܶܢܽܘܢ܀

ܒܪܺܝܟܽ ܗ̱ܘ ܚܰܝܠܳܐ: ܕܚܰܝܠܶܗ ܠܣܳܗܕܳܐ ܐܶܣܛܶܦܰܢܳܘܣ: ܒܪܺܝܟܽ ܗ̱ܘ ܕܰܐܘܪܶܒ ܝܽܘܡ ܕܽܘܟܪܳܢܶܗ: ܘܢܰܨܰܚ ܥܺܐܕܶܗ ܒܰܐܪܒܰܥ ܦܶܢ̈ܝܳܢ: ܒܪܺܝܟܽ ܗ̱ܘ ܕܰܐܪܡܺܝ: ܢܽܘܪܶܗ ܒܠܶܒܶܗ ܕܣܳܗܕܳܐ ܪܚܺܝܡܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܚܽܘܬܘ ܐܰܚܰܝ̈ ܪ̈ܫܺܝܡܶܐ

ܥܽܘܢܺܝܬܳܐ: ܒܪܺܝܟ ܕܰܓܒܳܟ ܐܰܒܽܘܢ܆ ܘܙܰܡܢܳܟ ܠܡܰܠܟܽܘܬܳܐ.

ܓܰܒܝܳܐ ܐ̱ܶܣܛܶܦܰܢܳܘܣ܆ ܩܰܕܡܳܝܳܐ ܕܣܳܗ̈ܕܶܐ܆ ܪܺܝܫܳܐ ܕܢܰܨܺܝ̈ܚܶܐ܆ ܕܰܕܪܰܫ ܗ̱ܘܳܐ ܐܽܘܪܚܳܐ ܕܡܰܘܒܠܳܐ ܠܶܗ ܠܚܰܝ̈ܶܐ܀

ܕܠܳܐ ܪ̈ܰܚܡܶܐ ܒܟܺܐܦ̈ܶܐ܆ ܪܰܓܡܽܘܗ̱ܝ ܪ̈ܰܫܺܝܥܶܐ܆ ܘܰܚܠܳܦ ܪ̈ܳܓܽܘܡܰܘܗ̱ܝ ܨܠܽܘܬܳܐ ܡܩܰܪܶܒ ܗ̱ܘܳܐ܆ ܒܚܰܫܳܐ ܠܘܳܬ ܡܳܪܶܗ܀

ܩܰܒܶܠ ܠܰܟܠܺܝܠܳܐ܆ ܘܰܢܨܰܚ ܒܰܐܓܽܘܢܳܐ܆ ܘܚܰܒܪܳܐ ܗܘܳܐ ܠܥܺܝܪ̈ܶܐ܆ ܘܰܐܚܳܐ ܠܪ̈ܽܘܚܳܢܶܐ܆ ܨܠܽܘܬܶܗ ܬܥܰܕܰܪ ܠܰܢ܀

ܐܰܩܺܝܡܘ ܗ̱ܘܰܘ ܫܠܺܝ̈ܚܶܐ܆ ܫܰܒܥܳܐ ܡܫܰܡ̈ܫܳܢܶܐ܆ ܓܰܒܝܳܐ ܐ̱ܶܣܛܶܦܰܢܳܘܣ܆ ܕܰܚܣܰܡܘ ܒܶܗ ܘܩܰܛܠܽܘܗ̱ܝ܆ ܥܰܡܳܐ ܕܝܽܗ̱ܘ̈ܕܳܝܶܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܨܠܽܘܬܳܟ ܥܰܡܰܢ ܒܽܘܟܪܳܐ ܕܣܳܗ̈ܕܶܐ ܨܠܽܘܬܳܟ ܥܰܡܰܢ܆

ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܡܳܪܰܢ ܝܶܫܽܘܥ ܚܰܣܳܐ ܘܰܫܒܽܘܩ ܐܰܝܟ ܚܰܢܳܢܳܐ: ܠܟܽܠ ܕܶܐܫܬܰܘܬܰܦܘ ܒܩܶܛܠܶܗ ܕܥܰܒܕܳܟ ܐܶܣܛܶܦܰܢܳܘܣ: ܚܛܺܝܬܳܐ ܗܳܕܶܐ ܠܳܐ ܬܩܺܝܡ ܠܗܽܘܢ ܕܰܣܥܰܪܘ ܨܶܝܕܰܝ: ܐܶܠܳܐ ܒܪ̈ܰܚܡܶܐ ܢܰܛܰܪ ܐܶܢܽܘܢ ܘܰܒܫܽܘܒܩܳܢܳܐ܀

ܫܽܘܒܚܳܐ ܠܰܐܒܳܐ ܕܒܶܗ ܐܶܬܚܰܝܰܠ ܪܺܝܫܳܐ ܕܣܳܗ̈ܕܶܐ: ܘܰܗܘܳܐ ܒܽܘܟܪܳܐ ܠܟܽܠ ܐܰܬܠܺܝ̈ܛܶܐ ܕܒܶܗ ܢܶܬܕܰܡܽܘܢ: ܡܫܺܝܚܳܐ ܕܰܐܪܘܺܝ ܠܣܳܗܕܳܐ ܓܰܒܝܳܐ ܘܕܳܫ ܥܰܠ ܡܰܘܬܳܐ: ܢܰܛܰܪ ܟܶܢܫܳܐ ܕܙܳܡܰܪ ܫܽܘܒܚܳܐ ܒܝܽܘܡ ܕܽܘܟܪܳܢܶܗ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀

ܐܰܘ

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܫܽܘܒܚܳܐ ܠܳܟ ܒܽܘܟܪܶܗ ܕܰܐܒܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܣܳܗܕܳܐ ܐ̱ܶܣܛܶܦܰܢܳܘܣ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܚܙܳܐ ܠܰܫܡܰܝ̈ܳܐ ܕܰܦܬܺܝܚܺܝܢ܆ ܘܠܰܒܪܳܐ ܡܫܺܝܚܳܐ ܟܰܕ ܝܳܬܶܒ܆ ܡܶܢ ܝܰܡܺܝܢܳܐ ܕܫܳܠܽܘܚܶܗ܆ ܘܰܡܚܰܝܶܠ ܠܶܗ ܒܰܐܓܽܘܢܳܐ܀

ܬܰܘܕܺܝܬܳܐ ܡܩܰܪܒܳܐ ܥܺܕܬܳܐ܆ ܠܰܐܠܳܗܳܐ ܡܳܪܝܳܐ ܡܫܺܝܚܳܐ܆ ܒܕܽܘܟܪܳܢܶܗ ܕܶܐܣܛܶܦܰܢܳܘܣ܆ ܣܳܗܕܳܐ ܒܚܺܝܪܳܐ ܘܢܰܨܺܝܚܳܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܣܳܗܕܳܐ ܐ̱ܶܣܛܶܦܰܢܳܘܣ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀