ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܥܰܠ ܒܶܝܬ ܠܚܶܡ
ܩܪܳܐ ܠܶܗ ܡܳܪܝܳܐ ܠܡܽܘܫܶܐ ܒܰܪ ܥܰܡܪܰܡ

ܡܰܠܶܠ ܡܳܪܝܳܐ ܥܰܡ ܡܽܘܫܶܐ ܘܶܐܡܰܪ܆ ܕܰܩܪܶܒ ܠܶܗ ܙܰܒܢܳܐ ܕܰܢܡܽܘܬ ܐܰܗܪܽܘܢ ܐܰܚܽܘܟ܆ ܘܢܶܦܽܘܩ ܡܶܢ ܥܳܠܡܳܐ܆ ܩܪܽܘܒ ܐܰܫܠܰܚܳܝܗ̱ܝ ܡܳܐܢ̈ܶܐ ܕܟܳܗܢܽܘܬܳܐ܆ ܘܰܐܠܒܶܫܳܝܗ̱ܝ ܠܶܐܠܺܝܥܳܙܳܪ. ܕܢܶܗܘܶܐ ܚܠܳܦܰܘܗ̱ܝ܆ ܟܳܗܢܳܐ ܒܬܶܫܡܶܫܬܶܗ܆ ܩܪܶܒ ܗ̱ܘܳܐ ܡܽܘܫܶܐ ܘܥܰܦܩܶܗ ܗ̱ܘܳܐ ܠܰܐܗܪܽܘܢ܆ ܘܡܰܘܬܳܐ ܩܳܐܶܡ ܡܶܢ ܪܽܘܚܩܳܐ ܘܰܡܣܰܟܶܐ ܗ̱ܘܳܐ܆ ܠܪܶܡܙܳܐ ܕܢܶܦܩܽܘܕ ܠܶܗ܆ ܘܰܫܠܰܚ ܡܽܘܫܶܐ ܡܳܐܢ̈ܶܐ ܕܟܳܗܢܽܘܬܳܐ܆ ܘܥܰܠ ܡܰܘܬܳܐ ܘܕܰܒܪܶܗ ܘܰܢܦܰܩ܆ ܘܰܛܥܶܡ ܟܳܣܳܐ܆ ܗܰܘ ܕܰܡܙܰܓ ܐܳܕܳܡ܆ ܒܪܺܝܟܽ ܗ̱ܘ ܡܫܺܝܚܳܐ ܡܟܰܠܶܠ ܠܣܳܓܽܘܕܰܘ̈ܗ̱ܝ܆ ܘܡܶܢ ܝܰܡܺܝܢܶܗ ܡܩܺܝܡ ܠܗܽܘܢ ܗ̄܆ ܒܝܰܘܡܳܐ ܕܡܶܐܬܺܝܬܶܗ܀

ܫܽܘܒܚܳܐ

ܩܪܳܝܗ̱ܝ ܗ̱ܘܳܐ ܕܰܘܺܝܕ ܠܰܒܪܶܗ ܘܶܐܡܰܪ ܠܶܗ܆ ܚܙܺܝ ܫܠܶܝܡܳܘܢ ܗܳܐ ܡܳܐܶܬ ܐ̱ܢܳܐ܆ ܛܰܪ ܐܽܘܪ̈ܚܳܬܶܗ ܕܡܳܪܝܳܐ ܘܦܽܘ̈ܩܕܳܢܰܘܗ̱ܝ܆ ܘܶܐܬܟܰܢܰܫܘ ܗ̱ܘܰܘ ܫܰܒ̈ܛܶܐ ܕܺܝܣܪܳܐܶܝܠ܆ ܘܶܐܬܰܘ ܕܢܶܬܒܰܪܟܽܘܢ ܡܶܢܶܗ܆ ܐܰܝܟ ܕܡܶܬܟܰܢܫܳܐ܆ ܥܳܢ̈ܳܐ ܨܶܝܕ ܪܳܥܝܳܐ܆ ܨܰܠܺܝ ܟܺܐܢܳܐ ܒܰܚܢܰܓܬܳܐ ܘܶܐܡܰܪ܆ ܡܳܪܝܳܐ ܢܶܗܘܶܐ ܠܟܽܘܢ ܪܺܝܫܳܐ܆ ܘܰܡܕܰܒܪܳܢܳܐ ܥܕܰܡܳܐ ܠܫܽܘܠܳܡܳܐ܆ ܒܰܪܶܟ ܡܰܠܟܳܐ ܠܥܰܡܳܐ ܘܠܰܫܠܶܝܡܽܘܢ܆ ܘܫܰܕܰܪ ܐܶܢܽܘܢ ܒܰܫܠܳܡܳܐ܆ ܘܰܫܟܶܒ ܘܶܐܬܬܢܺܝܚ ܫܶܢܬܳܐ ܕܰܢܝܳܚܳܐ܆ ܒܪܺܝܟܽ ܗ̱ܘ ܡܳܪܝܳܐ ܕܰܠܪ̈ܳܚܡܰܘܗ̱ܝ ܝܰܩܰܪ܆ ܘܶܐܫܬܰܘܕܺܝ ܠܗܽܘܢ ܡܰܠܟܽܘܬܳܐ ܗ̄܆ ܘܰܓܢܽܘܢ ܚܰܕ̈ܘܳܬܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܐܶܬܩܰܛܰܠܘ ܗ̱ܘܰܘ

ܥܽܘܢܺܝܬܳܐ: ܒܪܺܝܟ ܕܰܛܥܶܡ ܡܰܘܬܳܐ ܚܠܳܦܰܝܢ܆ ܘܰܐܦܢܺܝ ܠܳܐܕܳܡ ܠܦܰܪܕܰܝܣܳܐ.

ܕܰܘܺܝܕ ܗܰܘ ܐܰܠܳܗܳܝܳܐ. ܢܒܺܝܳܐ ܘܡܰܠܟܳܐ ܕܺܝܣܪܳܐܶܝܠ. ܒܥܶܕܳܢܳܐ ܕܰܡܫܰܢܶܐ ܗ̱ܘܳܐ܆ ܡܶܢ ܚܰܝ̈ܶܐ ܗܳܠܶܝܢ ܕܙܰܒܢܳܐ܆ ܩܪܳܐ ܠܰܒܪܶܗ ܘܶܐܡܰܪ ܠܶܗ. ܕܰܥ ܠܰܐܠܳܗܳܐ ܕܰܐܒܳܗܰܝ̈ܟ܆ ܘܰܦܠܽܘܚ ܩܽܘܕܡܰܘܗ̱ܝ ܕܰܟܝܽܘܬܳܐ. ܘܰܢܛܰܪ ܟܽܠܗܽܘܢ ܦܽܘܩܕܳܢܰܘ̈ܗ̱ܝ܆ ܕܶܐܢ ܒܳܥܶܐ ܐܰܢ̱ܬ ܠܶܗ ܢܶܒܥܶܝܟ܆ ܘܶܐܢ ܫܳܒܶܩ ܐܰܢ̱ܬ ܠܶܗ ܢܶܫܒܩܳܟ܀

ܝܽܘܫܺܝܳܐ ܗܰܘ ܒܰܪ ܐܰܡܽܘܢ܆ ܥܢܰܕ ܗ̱ܘܳܐ ܘܰܦܛܰܪ ܡܶܢ ܚܰܝ̈ܶܐ܆ ܘܒܰܟܝܶܗ ܗ̱ܘܳܐ ܟܽܠܶܗ ܥܰܡܳܐ܆ ܐܰܝܟ ܢܳܡܽܘܣܳܐ ܕܥܶܒܪ̈ܳܝܶܐ܆ ܙܰܕܺܝ̈ܩܶܐ ܘܙܰܕܺܝ̈ܩܳܬܳܐ܆ ܠܙܰܕܺܝܩܽܘܬܶܗ ܐܳܠܶܝܢ ܗ̱ܘܰܘ܆ ܕܰܐܘܦܺܝ ܘܰܥܒܰܪ ܡܶܢ ܚܰܝ̈ܶܐ܆ ܘܠܰܝܬ ܗ̱ܘܳܐ ܐ̱ܢܳܫ ܕܩܳܐܶܡ ܒܕܽܘܟܬܶܗ܆ ܒܪܺܝܟܽ ܗ̱ܘ ܕܝܰܩܰܪ ܩܰܕܺܝܫܰܘ̈ܗ̱ܝ܆ ܗܳܪܟܳܐ ܘܬܰܡܳܢ ܙܰܗܝܳܐܺܝܬ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܽܘܡ ܦܰܘܠܳܘܣ
ܟܰܕ ܡܳܐܶܬ ܝܰܥܩܽܘܒ ܒܓܰܘ ܡܶܨܪܶܝܢ

ܥܽܘܢܺܝܬܳܐ: ܡܳܪܝ ܘܰܐܠܳܗܝ ܐܰܫܘܳܢܝ ܠܫܽܘܒܩܳܢܳܐ܆ ܕܶܐܙܡܰܪ ܠܳܟ ܫܽܘܒܚܳܐ ܒܦܽܘܪܫܳܢܳܐ.

ܒܪܺܝܫܺܝܬ ܕܶܝܢ ܠܳܐܕܳܡ ܡܶܢ ܥܰܦܪܳܐ܆ ܓܒܰܠܬܳܝܗ̱ܝ ܡܳܪܝ ܡܶܛܽܠ ܬܶܫܒܽܘܚܬܳܟ܆ ܘܰܥܒܰܕܬܳܝܗ̱ܝ ܡܳܐܢܳܐ ܕܬܶܕܡܽܘܪܬܳܐ܆ ܕܢܶܗܘܶܐ ܠܳܟ ܟܶܢܳܪܳܐ ܡܫܰܒܚܳܐ܆ ܘܕܰܥܒܰܪ ܦܽܘܩܕܳܢܳܟ܆ ܛܪܰܕܬܳܝܗ̱ܝ ܡܶܢ ܓܰܢܬܳܐ܆ ܘܰܕܓܳܠܘ ܥܠܰܘܗ̱ܝ ܪ̈ܰܚܡܰܝܟ܆ ܒܝܰܕ ܡܰܘܬܳܟ ܦܪܰܩܬܳܝܗ̱ܝ܆ ܘܰܐܥܶܠܬܳܝܗ̱ܝ ܠܰܥܕܶܢ ܕܒܽܘ̈ܣܳܡܶܐ܆ ܘܩܰܕܶܫܬܳܝܗ̱ܝ ܒܰܕܡܳܐ ܕܡܶܢ ܕܰܦܢܳܟ܀

ܕܽܘܒܳܪ̈ܶܐ ܕܢܽܘܚ ܗܰܘ ܙܰܕܺܝܩܳܐ܆ ܘܡܰܠܟܺܝܙܕܶܩ ܕܶܐܫܬܘܺܝܘ ܠܟܰܣ̈ܝܳܬܳܐ܆ ܕܶܐܬܓܰܘܺܝܘ ܒܥܽܘܡܩܳܐ ܕܺܝܕܰܥܬܳܐ܆ ܘܶܐܬܡܰܛܺܝܘ ܠܐ̱ܪ̈ܳܙܶܐ ܕܰܣܬܺܝܪܺܝܢ܆ ܗܰܘ ܚܰܘܺܝ ܥܺܕܬܳܐ. ܘܰܪܫܰܡ ܨܽܘܪ̈ܳܬܳܗ̇. ܘܕܰܪ̈ܓܶܐ ܕܒܶܢ̈ܝܳܢܶܝܗ̇܆ ܕܰܣܕܰܪ ܘܛܰܟܶܣ ܒܳܗ̇܆ ܘܡܰܠܟܺܝܙܕܶܩ ܦܰܫܶܩ ܐܳܦ ܚܰܘܺܝ܆ ܕܰܐܝܟܰܢܳܐ ܐ̱ܪ̈ܳܙܶܐ ܡܶܫܬܰܡܠܶܝܢ܀

ܘܺܐܝܣܚܳܩ ܬܽܘܒ ܕܩܰܕܶܡ ܪܫܰܡ ܐ̱ܪ̈ܳܙܰܝܟ܆ ܐܳܦ ܝܰܥܩܽܘܒ ܕܩܰܒܶܠ ܒܽܘܪ̈ܟܳܬܳܟ܆ ܗܳܐ ܒܰܥܕܶܢ ܐܶܡܳܐ ܕܒܽܘ̈ܣܳܡܶܐ܆ ܡܶܬܓܰܐܺܝܢ ܘܙܳܡܪܺܝܢ ܬܶܫܒܽܘܚܬܳܐ܆ ܕܝܰܩܪܽܘܟ ܒܚܰܝܰܝ̈ܗܽܘܢ܆ ܚܳܕܶܝܢ ܒܣܽܘܟܳܝܗܽܘܢ. ܕܫܰܕܰܪܬ ܠܰܒ̈ܢܰܝܗܽܘܢ. ܠܰܐܪܥܳܐ ܕܡܽܘܠܟܳܢܳܐ܆ ܗܳܐ ܠܒܺܝܟܺܝܢ ܥܽܘܒܳܐ ܒܡܰܠܟܽܘܬܳܐ܆ ܘܡܶܬܦܰܛܡܺܝܢ ܒܛܽܘ̈ܒܶܐ ܕܦܳܬܽܘܪܳܟ܀

ܚܰܒܺܝܒ ܠܳܟ ܕܰܘܺܝܕ ܒܰܪ ܐܺܝܫܰܝ܆ ܕܪܽܘܚ ܩܽܘܕܫܳܐ ܠܶܒܳܟ ܟܰܢܝܶܗ ܗ̱ܘܳܐ܆ ܐܰܙܥܶܩ ܗ̱ܘܳܐ ܒܩܳܠܳܐ ܕܟܶܢܳܪܶܗ܆ ܟܰܕ ܩܳܥܶܐ ܠܓܰܒܳܐ ܕܰܓܡܺܝܪ̈ܶܐ܆ ܕܰܒܝܽܘܡ ܢܽܘܚܳܡܳܐ. ܐܳܬܶܐ ܒܰܪ ܡܰܠܟܳܐ. ܕܰܢܕܽܘܢ ܠܥܳܡܰܪܬܳܐ܆ ܒܟܺܐܢܽܘܬܳܐ ܘܩܽܘܫܬܳܐ܆ ܙܰܕܺܝܩܳܐ ܐܰܝܟ ܕܶܩܠܳܐ ܢܰܦܪܰܥ܆ ܘܰܐܝܟ ܐܰܪ̈ܙܶܐ ܢܶܫܘܰܚ ܒܡܰܠܟܽܘܬܳܐ܀

ܝܰܗ̱ܒܘ ܩ̈ܳܠܶܐ ܡܶܢ ܓܰܘ ܢܰܒܪܰܫܬܳܐ܆ ܬܠܺܝ̈ܬܳܝܶܐ ܛܥܺܝܢܰܝ̈ ܟܽܠ ܛܽܘ̈ܒܶܐ܆ ܚܰܢܰܢܝܳܐ ܘܰܐܚܽܘܗ̱ܝ ܥܶܙܰܪܝܳܐ܆ ܘܡܺܝܫܳܐܶܝܠ ܕܺܐܝܬܰܘܗ̱ܝ ܬܠܺܝܬܳܝܳܐ܆ ܘܰܐܝܟ ܗܰܘ ܕܒܽܐܘܪܓܰܢܽܘܢ܆ ܩ̈ܳܠܶܐ ܡܒܰܝܳܐܢ̈ܶܐ܆ ܐܰܙܥܶܩܘ ܦܨܺܝܚܳܐܺܝܬ܆ ܩܽܘ̈ܕܫܶܐ ܬܠܺܝ̈ܬܳܝܶܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܚܰܝܠܬܳܢܳܐ܆ ܕܟܽܠܒܶܪ̈ܝܳܢ ܣܳܓ̈ܕܳܢ ܠܺܐܝܩܳܪܳܟ܀

ܠܳܟ ܡܳܪܝܳܐ ܐܰܓܥܶܠܘ ܚܰܝܰܝ̈ܗܽܘܢ܆ ܠܶܘܳܝ̈ܶܐ ܘܟܳܗ̈ܢܶܐ ܒܟܽܠ ܕܳܪ̈ܺܝܢ܆ ܦܛܰܪܘ ܡܶܟܳܐ ܘܩܰܘܺܝܘ ܒܰܐܘܳܢܷ̈ܐ܆ ܕܰܠܗܽܘܢ ܡܳܪܝ ܛܰܝܶܒܬ ܕܢܶܬܬܢܺܝܚܽܘܢ܆ ܒܕܳܪ̈ܶܐ ܕܢܰܨܺܝ̈ܚܶܐ. ܘܒܰܣ̈ܡܳܟܶܐ ܕܢܽܘܗܪܳܐ. ܕܝܰܠܕܳܟ ܣܡܺܝܟ ܘܰܓܐܶܐ܆ ܘܥܰܡܶܗ ܒܢܰܝ̈ ܐ̱ܪܳܙܶܗ܆ ܘܢܳܫܒܳܐ ܠܗܽܘܢ ܪܽܘܚܳܐ ܕܒܽܘ̈ܣܳܡܶܐ܆ ܡܶܢ ܙܺܝܘܳܐ ܡܫܰܒܚܳܐ ܕܪܰܒܽܘܬܶܗ܀

ܢܰܗܺܝܪ ܗ̱ܘ ܐܰܬܪܳܐ ܕܙܰܕܺܝ̈ܩܶܐ܆ ܘܚܶܫܽܘܟܳܐ ܥܠܰܝܗܽܘܢ ܠܳܐ ܡܰܡܠܶܟ܆ ܗܰܘ ܫܶܡܫܳܐ ܦܰܐܝܳܐ ܕܠܳܐ ܥܳܪܶܒ܆ ܒܶܗ ܚܳܕܶܝܢ ܘܛܳܥܶܝܢ ܥܳܩ̈ܳܬܗܽܘܢ܆ ܝܰܘܡܳܐ ܕܦܽܘܪܫܳܢܳܐ. ܕܒܶܗ ܡܶܬܒܚܰܪ ܟܽܠܢܳܫ. ܘܒܶܗ ܢܳܣܒܺܝܢ ܐܰܓܪܳܐ ܟܺܐܢ̈ܶܐ ܘܙܰܕܺܝ̈ܩܶܐ܆ ܗܰܒܠܰܢ ܡܳܪܝ ܕܥܰܡܗܽܘܢ ܕܩܰܕܺܝ̈ܫܰܝܟ܆ ܕܠܳܐ ܫܶܠܝܳܐ ܢܶܙܡܰܪ ܠܳܟ ܫܽܘܒܚܳܐ܀

ܥܕܶܢ ܪܰܒܬܳܐ ܠܗܽܘܢ ܚܳܝܪܳܐ ܟܽܠܫܳܥ܆ ܕܰܬܩܰܒܶܠ ܐܶܢܽܘܢ ܒܚܰܕܽܘܬܳܐ܆ ܕܒܳܗ̇ ܢܳܝܚܺܝܢ ܟܽܠܗܽܘܢ ܩܰܕ̈ܡܳܝܶܐ܆ ܡܶܢ ܥܰܡ̈ܠܶܐ ܘܕܽܘ̈ܥܬܶܐ ܘܰܐܓܽܘ̈ܢܶܐ܆ ܘܒܳܗ̇ ܛܳܥܶܝܢ ܟܺܐܢ̈ܶܐ. ܟܺܐܒ̈ܶܐ ܘܟܽܘܪ̈ܗܳܢܶܐ. ܕܣܰܝܒܰܪܘ ܒܓܰܘ ܥܳܠܡܳܐ܆ ܥܽܘܡܪܳܐ ܕܥܳܩ̈ܳܬܳܐ܆ ܘܕܰܢܛܰܪܘ ܗ̱ܘܰܘ ܦܽܘܩܕܳܢ ܒܳܪܽܘܝܳܐ܆ ܗܳܐ ܢܛܺܝܪܺܝܢ ܒܓܰܙܳܐ ܫܡܰܝܳܢܳܐ܀

ܨܰܠܺܝܘ ܠܳܟ ܟܳܗ̈ܢܶܐ ܘܶܐܬܩܰܒܰܠܘ܆ ܨܠܰܘ̈ܳܬܗܽܘܢ ܡܶܛܽܠ ܡܰܪ̈ܥܝܳܬܗܽܘܢ܆ ܘܗܳܐ ܟܶܢܫܰܢ ܩܕܳܡܰܝܟ ܐܰܠܳܗܳܐ܆ ܡܨܰܠܶܝܢܰܢ ܘܠܳܟ ܡܶܬܟܰܫܦܺܝܢܰܢ܆ ܕܰܠܟܳܗ̈ܢܶܐ ܕܫܰܡܶܫܘ. ܒܓܰܘ ܗܰܝܟܰܠ ܩܽܘܕܫܳܐ. ܐ̱ܪ̈ܳܙܰܝܟ ܩܰܕܺܝ̈ܫܶܐ܆ ܒܟܽܠܳܗ̇ ܕܰܟܝܽܘܬܳܐ܆ ܢܶܬܡܰܢܥܽܘܢ ܠܛܽܘ̈ܒܶܐ ܥܕܶܢܳܝ̈ܶܐ܆ ܘܢܶܬܚܰܠܰܛ ܥܰܡܗܽܘܢ ܒܓܽܘܕܰܝ̈ܗܽܘܢ܀

ܪܰܒ ܐܰܬܪܳܐ ܓܰܐܝܳܐ ܕܦܰܪܕܰܝܣܳܐ܆ ܦܐܶܐ ܘܰܪܓܺܝܓ ܘܳܐܚܶܕ ܠܕܰܣܡܺܝܟܺܝܢ܆ ܘܗܰܘ ܐܰܬܪܳܐ ܕܓܺܗܰܢܳܐ ܐܰܠܺܝܨ܆ ܩܦܺܝܣ ܘܰܡܠܶܐ ܦܰܓܪ̈ܶܐ ܕܪ̈ܰܫܺܝܥܶܐ܆ ܠܳܐ ܠܗܳܠܶܝܢ ܬܰܡܳܢ. ܚܳܣܰܪ ܒܽܘܣܳܡܳܐ. ܘܠܳܐ ܠܗܳܠܶܝܢ ܒܰܫܝܽܘܠ܆ ܦܳܛܪ̈ܳܢ ܬܶܢ̈ܚܳܬܳܐ܆ ܕܰܝܳܢܳܐ ܟܺܐܢܳܐ ܕܗܰܘ ܐܰܬܪܳܐ܆ ܠܳܐ ܬܰܥܶܠ ܠܥܰܒ̈ܕܰܝܟ ܠܫܽܘܢܳܩܳܐ܀

ܬܰܘܕܺܝܬܳܐ ܩܰܪܶܒܘ ܦܽܘ̈ܡܰܝܟܽܘܢ܆ ܘܬܶܫܒܽܘܚܬܳܐ ܙܡܰܪܘ ܠܶܫܳܢܰܝ̈ܟܽܘܢ܆ ܬܝܳܒܽܘܬܳܐ ܪܥܶܡܘ ܦܶܬܓܳܡܰܝ̈ܟܽܘܢ܆ ܘܬܰܟܫܶܦܬܳܐ ܩܰܪ̈ܶܒܝ ܣܶܦ̈ܘܳܬܟܽܘܢ܆ ܘܓܽܘ̈ܕܰܝܟܽܘܢ ܪ̈ܳܥܡܳܢ. ܒܰܬܪ̈ܰܝܗܽܘܢ ܥܳܠ̈ܡܶܐ܆ ܗܳܪܟܳܐ ܒܥܺܕ̈ܳܬܳܐ܆ ܘܰܠܥܶܠ ܒܰܡܪ̈ܰܘܡܶܐ܆ ܚܰܝܽ ܗ̱ܘ ܠܟܽܘܢ ܡܳܪܝܳܐ ܕܰܐܚܶܒܬܽܘܢ܆ ܘܚܰܝ̈ܶܐ ܐ̱ܢ̱ܬܽܘܢ ܒܰܐܬܪܳܐ ܕܺܐܝܬܰܝܟܽܘܢ܀

ܡܰܢܰܥ ܠܶܗ ܝܰܘܡܳܐ ܕܬܶܬܦܰܪܥܽܘܢ܆ ܘܢܶܬܬܣܺܝܡܽܘܢ ܟܠܺܝ̈ܠܶܐ ܒܪ̈ܺܝܫܰܝܟܽܘܢ܆ ܢܶܗܘܶܐ ܠܺܝ ܐܳܦ ܠܺܝ ܥܽܘܕܪܳܢܳܐ܆ ܘܒܰܨܠܽܘܬܟܽܘܢ ܐܶܣܰܒ ܫܽܘܒܩܳܢܳܐ܆ ܥܺܝܪ̈ܶܐ ܡܶܬܦܰܨܚܺܝܢ. ܘܰܣܪ̈ܳܦܶܐ ܡܩܰܕܫܺܝܢ. ܘܡܰܠܰܐܟ̈ܶܐ ܡܝܰܒܒܺܝܢ܆ ܒܫܽܘܒܚܳܐ ܩܕܳܡܰܝܟܽܘܢ܆ ܩܳܝܽܘ̈ܡܶܐ ܗܘܰܘ ܠܰܢ ܒܟܽܠܥܶܕܳܢ܆ ܘܰܚܠܳܦܰܝܢ ܩܰܪܶܒܘ ܒܳܥܽܘܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܳܘ ܥܽܘܡܪܳܐ ܕܙܰܒܢܳܐ

ܥܽܘܢܺܝܬܳܐ: ܫܽܘܒܚܳܐ ܠܰܡܫܺܝܚܳܐ܆ ܕܡܶܢ ܒܰܪ̱ܬ ܕܰܘܺܝܕ ܨܒܳܐ ܘܰܕܢܰܚ. ܘܰܐܘܪܶܒ ܕܽܘܟܪܳܢܳܐ܆ ܒܰܐܪܥܳܐ ܘܰܠܥܶܠ ܒܰܫܡܰܝܳܐ.

ܐܶܢ ܢܽܘܪܳܐ ܒܒܺܐܪܳܐ. ܫܢܰܝ̈ܳܐ ܫܰܒܥܺܝܢ ܠܳܐ ܕܶܥܟܰܬ܆ ܘܦܺܝܪܡܳܐ ܕܚܽܘܣܳܝܳܐ܆ ܒܥܶܛܪܶܗ ܟܰܬܰܪ ܐܰܝܟ ܕܺܐܝܬܰܘܗ̱ܝ܆ ܟܡܳܐ ܟܺܝܬ ܬܶܬܝܰܬܰܪ. ܢܽܘܪܳܐ ܛܡܺܝܪܰܬ ܒܰܩܒܺܝܪ̈ܶܐ܆ ܦܰܓܪܶܗ ܕܰܡܫܺܝܚܳܐ. ܕܗܽܘܝܽܘ ܡܚܰܕܶܬ ܦܰܓܪ̈ܰܝܗܽܘܢ܀

ܐܶܢܗܽܘ ܕܶܐܠܺܝܳܐ. ܐܰܚܺܝ ܠܰܒܪܳܗ̇ ܕܰܐܪܡܰܠܬܳܐ܆ ܒܐ̱ܪܳܙܳܐ ܩܰܕܡܳܝܳܐ. ܕܰܒܪܳܐ ܡܢܰܚܶܡ ܠܥܰܢܺܝ̈ܕܶܐ܆ ܟܡܳܐ ܟܺܝܬ ܢܶܬܚܰܣܽܘܢ܆ ܐܰܝܠܶܝܢ ܕܰܫܟܶܒܘ ܒܰܡܫܺܝܚܳܐ܆ ܕܡܳܪܶܗ ܕܶܐܠܺܝܳܐ. ܕܳܒܚܺܝܢ ܟܳܗ̈ܢܶܐ ܚܠܳܦܰܝܗܽܘܢ܀

ܐܶܢ ܒܰܛܥܳܡ ܕܶܒܫܳܐ. ܕܰܒܪܺܝܫ ܚܽܘܛܪܶܗ ܕܝܽܘܢܳܬܳܢ܆ ܢܗܰܪ̈ܝ ܥܰܝܢܰܘ̈ܗ̱ܝ ܘܰܚܙܳܐ܆ ܘܰܩܢܳܐ ܚܙܳܬܳܐ ܕܪ̈ܽܘܚܳܢܶܐ܆ ܟܡܳܐ ܟܺܝܬ ܢܶܬܝܰܬܰܪ܆ ܕܡܳܐ ܕܒܰܙܩܺܝܦܳܐ ܐܶܫܬܰܦܰܥ܆ ܕܛܰܥܡܽܘܗ̱ܝ ܥܰܢܺܝ̈ܕܶܐ. ܘܰܐܢܗܰܪ̈ܝ ܥܰܝ̈ܢܶܐ ܕܪܶܥܝܳܢܗܽܘܢ܀

ܐܶܢ ܪܽܘܒܺܝܠ ܕܰܚܛܳܐ. ܘܕܳܫ ܦܽܘܩܕܳܢܳܐ ܘܶܐܬܟܰܬܰܡ܆ ܒܝܰܕ ܦܺܝܪܡܶܗ ܕܡܽܘܫܶܐ܆ ܢܣܰܒ ܫܽܘܒܩܳܢܳܐ ܘܶܐܬܚܰܣܺܝ܆ ܟܡܳܐ ܟܺܝܬ ܢܶܬܚܰܣܽܘܢ. ܒܦܺܝܪܡܳܐ ܓܰܒܝܳܐ ܕܟܳܗܢܽܘܬܳܐ܆ ܐܰܝܠܶܝܢ ܕܰܪܫܺܝܡܺܝܢ. ܒܪܽܘܫܡܶܗ ܚܰܝܳܐ ܕܰܡܫܺܝܚܳܐ܀

ܐܶܢ ܩܰܝܣܳܐ ܦܣܺܝܩܳܐ. ܒܪܺܝܚܳܐ ܕܡܰܝ̈ܳܐ ܘܰܕܥܰܦܪܳܐ܆ ܡܶܬܥܰܫܰܢ ܘܝܳܗܶܒ܆ ܛܰܪ̈ܦܶܐ ܘܦܺܐܪ̈ܶܐ ܟܰܕ ܫܳܘܰܚ܆ ܟܡܳܐ ܟܺܝܬ ܢܶܬܢܰܚܡܽܘܢ. ܐܰܝܠܶܝܢ ܕܰܥܢܰܕܘ ܒܰܡܫܺܝܚܳܐ. ܒܪܺܝܚ ܦܰܓܪܶܗ ܘܰܕܡܶܗ. ܩܳܢܶܝܢ ܚܰܝ̈ܶܐ ܘܡܶܬܒܰܣܡܺܝܢ܀

ܐܶܢ ܩܳܠܶܗ ܕܪܰܥܡܳܐ. ܡܰܫܘܰܚ ܙܰܪܥܳܐ ܒܰܚܛܽܘ̈ܛܶܐ܆ ܡܪܰܓܶܐ ܒܰܪ̈ܣܺܝܣܶܐ܆ ܕܢܶܗܘ̈ܝܳܢ ܫܶܒ̈ܠܶܐ ܦܰܐܝ̈ܳܬܳܐ܆ ܟܡܳܐ ܟܺܝܬ ܒܫܺܝܦܽܘܪܳܐ܆ ܩܳܝܡܺܝܢ ܡܺܝ̈ܬܶܐ ܡܶܢ ܩܰܒܪ̈ܶܐ. ܘܛܰܠܳܐ ܕܒܽܘ̈ܣܳܡܶܐ. ܡܪܰܓܶܐ ܡܚܰܕܶܬ ܦܰܓܪ̈ܰܝܗܽܘܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܐܳܘ ܪܳܚܡܶܗ ܕܡܺܝܬܳܐ ܕܰܥܢܰܕ

ܡܳܪܰܢ ܐܶܬܪܰܚܰܡ ܥܠܰܝܢ ܐܰܠܳܗܳܐ ܚܰܣܳܐ ܠܟܳܗܢܰܝ̈ܟ܆

ܘܰܐܩܺܝܡ ܐܶܢܽܘܢ ܦܳܪܽܘܩܰܢ ܡܶܢ ܗܰܘ ܓܰܒܳܐ ܕܝܰܡܺܝܢܳܟ܀

ܒܪܶܗܛܳܐ ܕܨܰܘܡܳܐ ܐܶܬܢܰܨܰܚܘ܆ ܒܫܰܗܪܳܐ ܘܩܰܘܡܳܐ ܐܶܬܟܰܫܰܪܘ܆ ܒܰܒܬܽܘܠܽܘܬܳܐ ܐܶܬܓܰܢ̱ܒܰܪܘ܆ ܒܡܰܟܺܝܟܽܘܬܳܐ ܐܶܬܪܰܡܪܰܡܘ܆ ܒܢܰܟܦܽܘܬܳܐ ܛܳܒ ܐܶܬܩܰܠܰܣܘ܆ ܘܢܰܩܦܽܘܗ̱ܝ ܠܰܡܫܺܝܚܳܐ ܡܳܪܗܽܘܢ܆ ܘܗܰܠܶܟܘ ܒܟܽܠܗܶܝܢ ܐܽܘܪ̈ܚܳܬܶܗ܆ ܘܰܢܛܰܪܘ ܟܽܠܗܽܘܢ ܦܽܘ̈ܩܕܳܢܰܘܗ̱ܝ܀

ܒܥܰܝܢܳܐ ܕܠܶܒܳܐ ܚܳܝܪܺܝܢ ܗ̱ܘܰܘ܆ ܒܰܢܒܺܝ̈ܶܐ ܐܳܦ ܒܰܫܠܺܝ̈ܚܶܐ܆ ܘܨܳܪܘ ܐܶܢܽܘܢ ܥܰܠ ܦܰܓܪ̈ܰܝܗܽܘܢ܆ ܘܰܒܗܽܘܢ ܡܕܺܝܩܺܝܢ ܗ̱ܘܰܘ ܟܽܠܫܳܥ܆ ܘܰܡܫܰܒܚܺܝܢ ܗ̱ܘܰܘ ܒܟܽܠ ܥܶܕܳܢ܆ ܠܰܐܒܳܐ ܘܠܰܒܪܳܐ ܘܪܽܘܚ ܩܽܘܕܫܳܐ܆ ܚܰܕ ܐܰܠܳܗܳܐ ܫܰܪܺܝܪܳܐ܆ ܕܠܶܗ ܫܽܘܒܚܳܐ ܘܰܥܠܰܝܢ ܪ̈ܰܚܡܰܘܗ̱ܝ܀

ܡܳܪܰܢ ܐܶܬܪܰܚܰܡ ܥܠܰܝܢ ܐܰܠܳܗܳܐ ܚܰܣܳܐ ܠܟܳܗܢܰܝ̈ܟ܆

ܘܰܐܩܺܝܡ ܐܶܢܽܘܢ ܦܳܪܽܘܩܰܢ ܡܶܢ ܗܰܘ ܓܰܒܳܐ ܕܝܰܡܺܝܢܳܟ܀