ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ ܕܰܢܩܰܕܶܡ

ܡܳܐ ܕܬܳܩܶܢ ܟܽܘܪܣܰܝ ܕܺܝܢܳܐ܆ ܝܳܬܶܒ ܕܰܝܳܢܳܐ ܟܺܐܢܳܐ܆ ܘܰܡܫܰܪܶܐ ܕܢܶܥܒܶܕ ܕܺܝܢܳܐ܆ ܒܰܐܝܠܶܝܢ ܕܠܳܐ ܢܛܰܪܘ ܦܽܘܩܕܳܢܰܘ̈ܗ̱ܝ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܥܰܡ ܐܰܗܪܽܘܢ ܟܳܗܢܳܐ ܙܰܗܝܳܐ܆ ܘܰܒܓܰܘ ܥܽܘܒܶܗ ܕܰܐܒܪܳܗܳܡ܆ ܢܶܬܒܰܣܡܽܘܢ ܟܽܠܗܽܘܢ ܐܰܚܰܝ̈ܢ܆ ܕܰܦܛܰܪܘ ܡܶܢ ܚܰܝ̈ܶܐ ܕܙܰܒܢܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܒܥܽܘ̈ܒܶܐ ܐܰܒܪ̈ܳܗܳܡܳܝܶܐ܆ ܘܒܰܩܕܽܘܫ ܩܽܘܕܫܺܝ̈ܢ ܕܺܐܝܩܳܪܳܐ܆ ܐܰܫܪܳܐ ܡܳܪܝܳܐ ܒܛܰܝܒܽܘܬܳܟ܆ ܠܟܳܗ̈ܢܶܐ ܕܫܰܢܺܝܘ ܡܶܢ ܨܶܐܕܰܝܢ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܒܗܰܘ ܥܶܕܳܢܳܐ ܕܡܶܬܬܰܒܥܺܝܢ܆ ܗܳܢܽܘܢ ܕܰܢܣܰܒܘ ܟܳܗܢܽܘܬܳܐ܆ ܕܰܢܩܰܪܒܽܘܢ ܟܰܟܪ̈ܶܐ ܕܩܰܒܶܠܘ܆ ܚܽܘܢ ܡܳܪܝܳܐ ܠܥܰܒ̈ܕܶܐ ܕܺܝܠܳܟ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܠܡܰܪܝܰܡ ܝܰܠܕܰܬ ܐܰܠܳܗܳܐ
ܥܰܡ ܐܶܡܪ̈ܶܐ ܒܢܰܝ̈ ܝܰܡܺܝܢܳܟ

ܠܟܳܗܢܽܘܬܳܐ ܕܫܰܢܝܰܬ ܝܰܘܡܳܢ ܡܶܢ ܗܳܢ ܥܳܠܡܳܐ܆ ܘܰܗܘܳܬ ܥܰܦܪܳܐ ܘܕܰܚܺܝܚܳܐ ܒܠܶܒܳܗ̇ ܕܰܐܪܥܳܐ܆ ܡܦܺܝܣܺܝܢܰܢ ܠܳܟ ܚܰܢܳܢܳܐ ܘܣܰܓܺܝ ܪ̈ܰܚܡܶܐ܆ ܐܰܫܘܳܐ ܐܶܢܽܘܢ ܠܒܽܘܣܳܡܳܐ ܕܥܰܡ ܩܰܕܺܝܫܰܝ̈ܟ܀

ܫܽܘܒܚܳܐ

ܒܪܺܝܟܽ ܗ̱ܘ ܡܰܠܟܳܐ ܫܡܰܝܳܢܳܐ܆ ܕܝܰܗ̱ܒ ܫܽܘܠܛܳܢܳܐ܆ ܠܰܒ̈ܢܰܝ ܐ̱ܢܳܫ̈ܳܐ ܡܳܝܽܘ̈ܬܶܐ ܒܪܰܘܡܳܐ ܘܥܽܘܡܩܳܐ܆ ܘܰܒܫܶܢܰܬ ܡܰܘܬܳܐ ܕܙܰܒܢܳܐ ܐܰܦܛܰܪ ܐܶܢܽܘܢ܆ ܡܶܢ ܚܰܝ̈ܶܐ ܬܥܺܝ̈ܫܶܐ ܠܚܰܝ̈ܶܐ܆ ܕܠܳܐ ܡܶܬܚܰܒܠܺܝܢ܀

ܡܰܕܪܳܫܳܐ

ܩܳܠܳܐ ܒܩ̄: ܟܰܠܰܬ ܡܰܠܟܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ ܕܝܰܩܰܪ܆ ܝܽܘܡ ܕܽܘܟܪܳܢܳܐ ܕܟܺܐܢ̈ܶܐ ܕܪܰܚܡܽܘܗ̱ܝ.

ܚܙܰܘ ܡܰܘܗܰܒܬܳܐ ܕܝܰܗ̱ܒ ܠܗܽܘܢ܆ ܡܳܪܰܢ ܠܟܳܗ̈ܢܶܐ ܟܡܳܐ ܪܳܡ ܕܰܪܓܳܗ̇܆ ܕܡܶܢ ܡܰܠܰܐܟ̈ܶܐ ܡܥܰܠܝܳܐ܆ ܐܳܦ ܡܶܢ ܟܪ̈ܽܘܒܶܐ ܪܰܒ ܫܽܘܠܛܳܢܳܗ̇܆ ܕܠܳܐ ܫܰܠܺܝܛ ܠܶܗ܆ ܠܚܰܕ ܡܶܢ ܥܺܝܪ̈ܶܐ܆ ܕܢܶܐܣܽܘܪ ܚܰܒܪܶܗ܆ ܒܡܶܠܰܬ ܦܽܘܡܶܗ܆ ܘܟܰܕ ܛܳܒ ܢܽܘܪ̈ܳܢܶܐ܆ ܘܪ̈ܽܘܚܳܢܶܐ ܡܶܬܩܪܶܝܢ܆ ܠܬܰܚܬ ܡܶܢ ܟܳܗܢܽܘܬܳܐ ܐܺܝܬܰܝܗܽܘܢ܀

ܪܳܡܺܝܢ ܕܰܪ̈ܓܶܐ ܕܟܳܗܢܳܐ܆ ܡܶܢ ܕܰܪ̈ܓܰܝܗܽܘܢ ܕܰܒ̈ܢܰܝ ܢܽܘܗܪܳܐ܆ ܘܠܳܐ ܡܨܶܝܢ ܟܪ̈ܽܘܒܶܐ ܕܢܶܥܠܽܘܢ܆ ܠܰܐܝܟܳܐ ܕܥܳܐܠܳܐ ܡܶܠܬܶܗ ܕܟܳܗܢܳܐ܆ ܠܰܩܕܳܡ ܐܰܒܳܐ܆ ܘܰܠܘܳܬ ܝܰܠܕܶܗ܆ ܘܥܳܐܠܳܐ ܘܫܳܪܝܳܐ܆ ܘܩܳܪܝܳܐ ܠܪܽܘܚܳܐ܆ ܕܬܶܚܽܘܬ ܘܰܬܪܰܚܶܦ܆ ܥܰܠ ܡܰܕܒܰܚ ܩܘܽܕܫܳܐ܆ ܘܬܶܬܶܠ ܚܽܘܣܳܝܳܐ ܠܰܡܗܰܝ̈ܡܢܶܐ܀

ܐܰܒܳܗ̈ܳܬܳܐ ܒܪ̈ܺܝܟܶܐ܆ ܕܰܐܟܪܶܙܘ ܡܶܠܬܳܐ ܕܗܰܝܡܳܢܽܘܬܳܐ܆ ܘܓܳܚ ܝܽܘܠܦܳܢܗܽܘܢ ܒܰܐܪܥܳܐ܆ ܒܰܕܡܽܘܬ ܝܰܡܳܐ ܕܰܡܠܶܐ ܩܽܘܫܬܳܐ܆ ܥܩܰܪܘ ܕܶܚ̈ܠܳܬܳܐ܆ ܒܢܰܘ ܥܺܕ̈ܳܬܳܐ܆ ܦܪܰܩܘ ܢܰܦ̈ܫܳܬܳܐ܆ ܡܶܢ ܣܳܛܳܢܳܐ܆ ܘܗܳܐ ܢܳܨܰܚ ܝܰܘܡܳܐ܆ ܫܒܺܝܚܳܐ ܕܕܽܘܟܪܳܢܗܽܘܢ܆ ܘܰܫܡܰܝ̈ܳܐ ܚܳܕܶܝܢ ܒܥܺܐܕܰܝ̈ܗܽܘܢ܀

ܙܳܕܶܩ ܕܢܶܗܘܶܐ ܟܳܗܢܳܐ܆ ܐܰܝܢܳܐ ܕܢܳܛܰܪ ܡܶܠܬܶܗ ܕܦܰܘܠܳܘܣ܆ ܗܳܝ ܕܰܟܬܰܒ ܗ̱ܘܳܐ ܘܰܫܠܰܚ܆ ܠܛܺܝܡܳܬܶܐܘܳܣ ܟܰܕ ܐܳܡܰܪ ܠܶܗ܆ ܕܢܶܗܘܶܐ ܟܳܗܢܳܐ܆ ܐܰܝܢܳܐ ܕܰܕܟܶܐ܆ ܘܰܐܝܢܳܐ ܕܡܰܟܺܝܟ܆ ܘܰܫܦܶܐ ܘܒܰܣܺܝܡ܆ ܘܰܐܝܢܳܐ ܕܠܳܐ ܪܰܘܳܝ. ܘܰܐܝܢܳܐ ܕܠܳܐ ܢܰܨܳܝ܆ ܘܰܐܝܢܳܐ ܕܠܳܐ ܥܳܠܶܒ ܟܢܰܘ̈ܳܬܶܗ܀

ܡܰܢ ܠܳܐ ܢܝܰܩܰܪ ܠܟܳܗܢܳܐ܆ ܕܰܛܥܺܝܢ ܒܺܐܝܕܶܗ ܣܒܰܪܬܳܐ ܕܚܰܝ̈ܶܐ܆ ܢܽܘܪܳܐ ܚܰܝܬܳܐ ܕܒܳܚܪܳܐ܆ ܐܰܝܟ ܕܰܒܟܽܘܪܳܐ ܠܰܕܩܳܪܶܒ ܠܳܗ̇܆ ܐܰܫܺܝܓܘ ܨܳܐܬܳܐ܆ ܕܪ̈ܶܥܝܳܢܰܝܟܽܘܢ܆ ܘܰܫܪܰܘ ܩܶܛܪ̈ܶܐ܆ ܕܚܶܡܬܳܐ ܟܣܺܝܬܳܐ܆ ܘܕܰܟܰܘ ܠܶܒܰܝ̈ܟܽܘܢ܆ ܘܪܰܥܰܘ ܠܰܪ̈ܓܺܝܙܶܐ܆ ܗܳܝܕܶܝܢ ܢܳܣܒܺܝܬܽܘܢ ܣܰܡ ܚܰܝ̈ܶܐ܀

ܒܝܰܘܡܳܐ ܐ̱ܚܪܳܝܳܐ ܕܡܶܬܓܠܶܐ܆ ܪܳܥܝܳܐ ܡܫܺܝܚܳܐ ܥܰܠ ܡܰܪܥܺܝܬܶܗ܆ ܒܟܳܗ̈ܢܶܐ ܡܫܰܪܶܐ ܬܒܰܥܬܳܐ܆ ܕܰܢܩܰܪܒܽܘܢ ܠܶܗ ܓܽܘ̈ܥܠܳܢܰܝܗܽܘܢ܆ ܒܪ̈ܰܒܰܝ ܒ̈ܳܬܶܐ܆ ܕܗܰܝܡܳܢܽܘܬܳܐ܆ ܡܫܰܪܶܐ ܠܽܘܩܕܰܡ܆ ܠܰܡܫܰܐܳܠܽܘ܆ ܠܝܳܕܥܰܝ̈ ܨܶܒܝܳܢܶܗ. ܡܰܥܶܠ ܠܡܰܪܫܽܘܬܳܐ܆ ܘܗܳܝܕܶܝܢ ܡܶܬܬܕܺܝܢܺܝܢ ܒܰܪ̈ܳܝܶܐ܀

ܦܽܘ̈ܡܶܐ ܕܙܰܡܰܪܘ ܘܫܰܒܚܽܘܟ܆ ܒܥܺܕܰܬ ܩܽܘܕܫܳܐ ܟܰܫܺܝܪܳܐܺܝܬ܆ ܒܥܺܕܬܳܐ ܪܰܒܬܳܐ ܕܒܽܘܟܪ̈ܶܐ܆ ܢܶܩܥܽܘܢ ܫܽܘܒܚܳܟ ܒܥܳܠܡܳܐ ܚܰܕ̱ܬܳܐ܆ ܪ̈ܶܓܠܶܐ ܕܗܰܠܶܟ̈ܝ܆ ܘܕܰܝܶܠ̈ܝ ܫܰܡܫܽܘܟ܆ ܒܓܰܘ ܒܶܝܬ ܩܽܘܕܫܳܐ܆ ܩܰܕܺܝܫܳܐܺܝܬ܆ ܢܶܥ̈ܠܳܢ ܠܰܓܢܽܘܢܳܐ܆ ܕܰܢܛܺܝܪ ܠܩܰܕܺܝ̈ܫܶܐ܆ ܘܰܢܕܰܝܪ̈ܳܢ ܬܰܡܳܢ ܕܠܳܐ ܫܶܠܝܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܦܢܶܐ ܕܶܝܢ ܘܶܐܫܬܰܥܶܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ ܕܰܒܩܳܠܶܗ܆ ܩܳܝܡܺܝܢ ܟܽܠܗܽܘܢ ܥܰܢܺܝ̈ܕܶܐ.

ܐܶܦܢܶܐ ܕܶܝܢ ܘܶܐܫܬܰܥܶܐ ܠܟܽܘܢ܆ ܥܰܠ ܪܶܚܡܰܬ ܚܰܝ̈ܶܐ ܚܰܕ̱̈ܬܶܐ܆ ܠܗܳܒܺܝܠ ܥܶܒܕܰܬ ܩܽܘܪܒܳܢܳܐ܆ ܣܓܽܘܠܳܐ ܕܰܐܪܥܳܐ ܒܚܰܡܪܶܗ ܪܘܳܬ܆ ܘܰܪܬܰܚ ܒܳܗ̇ ܐܳܦ ܡܰܠܶܠ ܒܳܗ̇܆ ܘܓܳܥܶܐ ܗ̱ܘܳܐ ܥܰܠ ܩܳܛܽܘܠܶܗ܆ ܠܰܚܢܽܘܟ ܥܶܒܕܰܬ ܩܰܕܡܳܝܳܐ ܕܰܙܟܳܐ ܠܡܰܘܬܳܐ܆ ܘܒܰܝܢܳܬ ܩܛܺܝ̈ܠܶܐ ܙܰܟܳܝܳܐ ܗܘܳܐ ܒܝܰܕ ܥܰܡܠܶܗ܆ ܘܰܐܝܠܶܠ ܡܰܘܬܳܐ ܒܫܽܘܪܳܝܳܐ܆ ܕܰܢܒܰܕܶܩ ܥܰܠ ܫܽܘܠܳܡܳܐ܀

ܠܫܺܝܬ ܝܶܗܒܰܬ ܗ̱ܘܳܬ ܒܽܘܪ̈ܟܳܬܳܐ. ܘܰܠܡܰܠܟܺܝܙܕܶܩ ܟܽܘܡܪܽܘܬܳܐ܆ ܘܠܰܐܒܪܳܡ ܝܶܗܒܰܬ ܡܽܘܠܟܳܢܳܐ܆ ܘܒܺܐܝܣܚܳܩ ܨܳܪܰܬ ܗ̱ܘܳܬ ܐ̱ܪܳܙܳܐ܆ ܒܝܰܥܩܽܘܒ ܛܽܘܦܣܳܐ ܪܶܫܡܰܬ ܗ̱ܘܳܬ. ܠܝܰܘܣܶܦ ܝܶܗܒܰܬ ܢܶܨܚܳܢ̈ܶܐ܆ ܠܡܽܘܫܶܐ ܝܶܗܒܰܬ ܦܽܘܪܩܳܢܳܐ. ܥܽܘܫܢܳܐ ܠܝܶܫܽܘܥ ܘܟܳܗܢܽܘܬܳܐ ܠܰܐܗܪܽܘܢ. ܘܰܠܕܰܘܺܝܕ ܐܳܦ ܡܰܠܟܽܘܬܳܐ܆ ܟܪܽܘܡܳܐ ܕܰܟܝܳܐ ܠܰܫܡܽܘܐܶܝܠ܆ ܘܓܰܠܝܽܘܬ ܐܰܦ̈ܶܐ ܠܶܐܠܺܝܫܳܥ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܐܳܦܪܰܬ

ܥܽܘܢܺܝܬܳܐ: ܐܰܢܺܝܚ ܡܳܪܝܳܐ ܠܥܰܒ̈ܕܶܐ ܕܺܝܠܳܟ܆ ܕܶܐܟܰܠܘ ܦܰܓܪܳܟ ܘܶܐܫܬܺܝܘ ܠܰܕܡܳܟ.

ܐܳܘ ܟܡܳܐ ܙܳܕܶܩ ܠܰܡܫܰܒܳܚܽܘ܆ ܠܚܰܝܳܐ ܕܶܐܬܳܐ ܗܽܘ ܒܰܩܢܽܘܡܶܗ܆ ܘܰܢܚܶܬ ܠܗܳܡܳܢ ܘܰܐܪܡܺܝ ܒܓܰܘܳܗ̇܆ ܙܰܪܥܳܐ ܕܚܰܝ̈ܶܐ ܠܰܫܟܺܝ̈ܒܶܐ ܕܒܳܗ̇܆ ܘܰܗܦܰܟ ܘܶܐܬܥܰܠܺܝ ܠܘܳܬ ܐܰܒܽܘܗ̱ܝ܆ ܘܬܽܘܒ ܐܳܬܶܐ ܒܰܕܡܽܘܬ ܡܶܛܪܳܐ܆ ܘܰܡܢܰܚܶܡ ܘܡܰܠܒܶܫ܆ ܬܶܫܒܽܘܚܬܳܐ ܠܟܺܐܢ̈ܶܐ. ܕܰܢܛܰܪܘ ܦܽܘ̈ܩܕܳܢܰܘܗ̱ܝ܀

ܗܳܐ ܓܰܢ̱ܒܳܪ̈ܶܐ ܚܒܺܝܫܺܝܢ ܒܰܫܝܽܘܠ. ܒܠܶܒܳܗ̇ ܕܰܐܪܥܳܐ ܥܰܕ ܢܽܘܚܳܡܳܐ܆ ܘܝܳܬܶܒ ܡܰܘܬܳܐ ܐܰܝܟ ܐܰܪܟܽܘܢܳܐ܆ ܟܰܕ ܡܰܗܶܠ ܒܶܗ ܒܛܽܘܗܡܳܐ ܪܰܒܳܐ܆ ܫܺܝܛܺܝܢ ܡܰܠ̈ܟܶܐ ܘܰܥܒܺܝܕܺܝܢ ܥܰܦܪܳܐ܆ ܐܳܦ ܕܰܝܳܢ̈ܶܐ ܗܳܐ ܒܓܰܘ ܩܰܒܪ̈ܶܐ܆ ܬܶܟܪܶܐ ܠܳܟ ܡܳܪܝ܆ ܥܰܠ ܥܰܦܪܶܗ ܕܳܐܕܳܡ. ܘܰܐܚܳܝܗ̱ܝ ܒܛܰܝܒܽܘܬܳܟ܀

ܒܰܩܕܽܘܫܩܽܘܕܫܺܝ̈ܢ ܗܰܘ ܓܰܘܳܝܳܐ. ܐܰܝܟܰܢܳܐ ܕܫܰܪܝܳܐ ܫܟܺܝܢܬܶܗ ܕܰܒܪܳܐ܆ ܬܰܡܳܢ ܐܰܫܪܳܐ ܠܟܳܗܢܰܝ̈ܟ ܕܰܥܢܰܕܘ܆ ܘܰܠܥܰܢܺܝ̈ܕܶܐ ܕܡܺܝܬܘ ܥܰܠ ܣܰܒܪܳܟ܆ ܐܰܢ̱ܬ ܐܰܒܳܐ ܚܰܣܳܐ ܚܰܘ̈ܒܰܝܗܽܘܢ܆ ܒܪܳܐ ܡܫܺܝܚܳܐ ܫܒܽܘܩ ܒܽܘܨܳܪ̈ܰܝܗܽܘܢ܆ ܐܰܢ̱ܬ ܪܽܘܚܳܐ ܕܩܽܘܕܫܳܐ܆ ܚܰܝܳܐ ܘܡܰܚܝܳܢܳܐ. ܐܰܥܒܰܪ ܣܰܟܠ̈ܘܳܬܗܽܘܢ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܒܪܳܐ ܕܒܰܨܠܺܝܒܶܗ ܦܰܪܩܳܗ̇ ܠܥܺܕܬܶܗ

ܠܟܳܗܢܰܝ̈ܟ ܐܰܢܺܝܚ ܒܰܝܢܳܬ ܟܺܐܢ̈ܶܐ ܒܪܳܐ ܕܰܐܠܳܗܳܐ܆

ܒܗܳܝ ܡܰܠܟܽܘܬܳܐ ܕܠܳܐ ܡܶܫܬܰܪܝܳܐ ܥܰܡ ܩܰܕܺܝܫܰܝ̈ܟ܀

ܒܰܪ ܐܰܠܳܗܳܐ ܕܰܓܒܳܐ ܠܥܰܒ̈ܕܰܘܗ̱ܝ ܘܰܫܩܰܠܘ ܢܺܝܪܶܗ܆ ܨܠܺܝܒܳܟ ܢܶܗܘܶܐ ܫܽܘܪܳܐ ܠܟܽܠܰܢ ܡܶܢ ܢܶܟ̈ܝܳܢܶܐ܆ ܡܦܺܝܣܺܝܢܰܢ ܠܳܟ ܕܬܶܦܪܽܘܥ ܐܶܢܽܘܢ ܫܰܦܺܝܪ̈ܳܬܳܐ܆ ܘܰܐܫܪܳܐ ܐܶܢܽܘܢ ܒܚܰܝ̈ܶܐ ܚܰܕ̱̈ܬܶܐ ܒܶܝܬ ܡܰܠܟܽܘܬܳܐ܆ ܚܠܳܦ ܐܽܘܠ̈ܨܳܢܶܐ ܕܣܰܝܒܰܪܘ ܗܳܪܟܳܐ ܐܰܫܘܳܐ ܐܶܢܽܘܢ܆ ܠܰܢ̈ܝܳܚܳܬܳܐ ܘܰܠ̈ܓܶܐܘܳܬܳܐ ܕܥܰܡ ܩܰܕܺܝ̈ܫܶܐ܀

ܘܰܚܠܳܦ ܡܰܓܣܳܐ ܘܡܰܫܟܒܳܐ ܫܺܝܛܳܐ ܗܰܘ ܕܥܰܠ ܐܰܪܥܳܐ܆ ܐܰܣܡܶܟ ܐܶܢܽܘܢ ܥܰܡ ܩܰܕܺܝܫܰܝ̈ܟ ܡܳܐ ܕܳܐܬܶܐ ܐܰܢ̱ܬ܆ ܘܰܚܠܳܦ ܕܫܰܡܫܽܘܟ ܒܓܰܘ ܒܶܝܬ ܩܽܘܕܫܳܐ ܩܰܕܺܝܫܳܐܺܝܬ܆ ܫܰܡܶܫ ܐܶܢܽܘܢ ܒܶܝܬ ܡܰܠܟܽܘܬܳܐ ܐܰܝܟ ܫܽܘܘܕܳܝܳܟ܆ ܘܰܚܠܳܦ ܕܰܗܘܰܘ ܐܰܚ̈ܶܐ ܕܺܝܠܳܟ ܡܶܢ ܓܰܘ ܡܰܝ̈ܳܐ܆ ܗܘܺܝ ܠܗܽܘܢ ܪܳܚܡܳܐ ܐܳܦ ܩܰܪܺܝܒܳܐ ܒܶܝܬ ܡܰܠܟܽܘܬܳܐ܀

ܡܫܺܝܚܳܐ ܕܺܐܝܬܰܝܟ ܡܳܪܳܐ ܕܟܽܘܡܪ̈ܶܐ ܘܪܰܒܳܐ ܕܟܳܗ̈ܢܶܐ܆

ܚܰܣܳܐ ܠܟܳܗܢܰܝ̈ܟ ܕܫܰܡܶܫܘ ܐ̱ܪ̈ܳܙܰܝܟ ܘܠܳܟ ܬܶܫܒܽܘܚܬܳܐ܀