ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܠܶܟܝ ܛܽܘܒܰܝܟܝ ܡܰܪܝܰܡ ܕܺܝܠܶܕܬܺܝܘܗ̱ܝ

ܒܗܳܢ ܝܰܘܡܳܐ ܚܳܕ̈ܝܳܢ ܪ̈ܽܘܚܳܬܗܽܘܢ܆ ܕܰܢܒܺܝ̈ܶܐ ܒܓܰܘ ܦܰܪܕܰܝܣܳܐ܆ ܕܰܗ̈ܘܰܝ ܟܽܠܗܶܝܢ ܡܶܠܰܝ̈ܗܽܘܢ܆ ܕܶܐܬܢܰܒܺܝܘ ܡܶܛܽܠܳܬܳܟ܆ ܕܗܳܐ ܚܳܕܶܝܢ ܟܽܠܗܽܘܢ ܥܰܡ̱̈ܡܶܐ܆ ܘܰܡܫܰܒܚܺܝܢ ܒܗܽܘܠܳܠܰܝ̈ܗܽܘܢ܆ ܘܓܽܘ̈ܕܶܐ ܕܥܺܝܪ̈ܶܐ ܘܰܐ̱ܕܢܳܫ̈ܳܐ܆ ܗܳܐ ܩܳܥܶܝܢ ܩܰܕܺܝܫ ܩܰܕܺܝܫ܆ ܩܰܕܺܝܫ ܒܪܰܘܡܳܐ ܘܰܒܥܽܘܡܩܳܐ܀

ܫܽܘܒܚܳܐ

ܪ̈ܳܥܰܘܳܬܳܐ ܐܰܪܓܶܫܘ ܒܶܗ܆ ܘܰܡܓܽܘ̈ܫܶܐ ܐܶܬܰܘ ܠܺܐܝܩܳܪܶܗ܆ ܦܬܰܚܘ ܣܺܝ̈ܡܳܬܗܽܘܢ ܘܩܰܪܶܒܘ ܠܶܗ܆ ܕܰܗܒܳܐ ܘܡܽܘܪܳܐ ܘܰܠܒܽܘܢܬܳܐ܆ ܡܰܐܓܰܣ ܒܽܐܘܪܝܳܐ ܡܳܪܶܐ ܟܽܠ܆ ܘܰܟܪܺܝܟ ܪ̈ܽܘܩܥܶܐ ܘܥܰܙܪܽܘܪ̈ܶܐ ܘܰܪܗܺܝܒܺܝܢ ܥܺܝܪ̈ܶܐ ܩܕܳܡܰܘܗ̱ܝ܆ ܢܚܶܬܘ ܕܰܢܒܰܪܟܽܘܢ ܘܰܢܩܰܕܫܽܘܢ܆ ܘܰܢܣܰܒܪܽܘܢ ܚܰܝ̈ܶܐ ܠܐ̱ܢܳܫܽܘܬܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܐܳܕܳܡ ܚܛܳܐ ܘܰܩܢܳܐ

ܥܽܘܢܺܝܬܳܐ: ܒܪܺܝܟ ܝܰܠܕܶܗ ܕܰܐܒܳܐ ܒܪܳܗ̇ ܕܡܰܪܝܰܡ܆ ܕܚܰܕ ܗ̱ܽܘ ܕܠܳܐ ܦܽܘܠܳܓ ܐܰܠܳܗܳܐ.

ܒܗܳܢ ܝܰܘܡܳܐ ܥܺܝܪ̈ܶܐ ܗܳܐ ܚܳܕܶܝܢ܆ ܕܶܐܬܳܐ ܠܶܗ ܥܺܝܪܳܐ ܕܰܢܥܺܝܪܰܢ܆ ܒܗܳܢ ܠܺܠܝܳܐ ܡܰܢܽܘ ܡܨܶܐ ܕܢܶܕܡܰܟ܆ ܕܒܶܗܽ ܗ̱ܘ ܓܶܝܪ ܥܺܝܪ̈ܳܢ ܟܽܠ ܒܶܪ̈ܝܳܢ܆ ܒܪܺܝܟ ܕܰܥܒܰܕ ܥܺܝܪ̈ܶܐ ܥܰܠ ܐܰܪܥܳܐ܀

ܒܡܰܚܰܬܬܶܗ ܕܡܳܪܰܢ ܕܰܠܡܶܨܪܶܝܢ܆ ܫܪܳܐ ܘܰܐܣܺܝ ܠܚܰܕ ܐ̱ܢܳܫ ܕܰܒܚܶܪ̈ܫܶܐ܆ ܥܒܺܝܕ ܗ̱ܘܳܐ ܟܽܘܕܰܢܝܳܐ ܠܚܰܪ̈ܳܫܶܐ܆ ܘܰܐܪܟܒܽܘܗ̱ܝ ܠܰܡܫܺܝܚܳܐ ܥܰܠ ܟܽܘܕܰܢܝܳܐ܆ ܘܡܶܚܕܳܐ ܬܩܶܢ ܓܰܒܪܳܐ ܘܶܐܬܰܐܣܺܝ܀

ܟܰܘܟܒܳܐ ܪܗܶܛ ܣܰܒܰܪ ܠܰܡܓܽܘ̈ܫܶܐ܆ ܕܢܰܝܬܽܘܢ ܩܽܘܪ̈ܒܳܢܶܐ ܠܝܰܠܽܘܕܳܐ܆ ܕܰܗܒܳܐ ܛܥܶܢܘ ܘܶܐܬܰܘ ܡܶܢ ܦܳܪܶܣ܆ ܕܰܢܩܰܪܒܽܘܢ ܠܡܰܠܟܳܐ ܕܶܐܬܺܝܠܶܕ܆ ܘܢܰܟܪܙܽܘܢ ܒܶܝܬ ܥܰܡ̱̈ܡܶܐ ܡܰܠܟܽܘܬܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܚܕܰܘ ܥܰܡ̱̈ܡܶܐ

ܥܽܘܢܺܝܬܳܐ: ܫܽܘܒܚܳܐ ܠܶܗ ܠܺܝ݂ܚܺܝ݂ܕܳܐ ܕܰܒܝܰܠܕܶܗ ܐܰܢܗܪܰܢ܆ ܘܥܰܒܕܰܢ ܠܶܗ ܐܰܚ̈ܶܐ ܕܥܰܡܶܗ ܢܰܡܠܶܟ.

ܝܰܘܡܳܢܳܐ ܢܚܶܬܘ ܥܺܝܪ̈ܶܐ܆ ܘܫܰܒܰܚܘ ܒܰܐܪܥܳܐ܆ ܬܶܫܒܽܘܚܬܳܐ ܠܗܰܘ ܝܰܠܕܳܐ܆ ܕܡܶܢ ܡܰܪܝܰܡ ܕܢܰܚ܀

ܝܰܘܡܳܢܳܐ ܬܶܫܒܽܘܚܬܳܐ܆ ܘܣܰܒܪܳܐ ܣܰܒܰܪܘ܆ ܡܰܠܰܐܟ̈ܶܐ ܠܒܶܪ̈ܝܳܬܳܐ܆ ܒܝܰܠܕܳܐ ܕܶܐܬܓܠܺܝ܀

ܝܰܘܡܳܢܳܐ ܒܩܰܒܪ̈ܰܝܗܽܘܢ܆ ܢܒܺܝ̈ܶܐ ܐܰܪܓܶܫܘ܆ ܕܶܐܬܳܐ ܠܶܗ ܒܰܥܒܳܕܳܐ܆ ܡܶܕܶܡ ܕܰܐܟܪܶܙܘ܀

ܝܰܘܡܳܢܳܐ ܗܰܘ ܒܶܠܥܰܡ܆ ܩܳܨܽܘܡܳܐ ܢܶܚܕܶܐ܆ ܕܗܳܐ ܟܰܘܟܒܳܐ ܐܶܬܚܰܘܺܝ܆ ܐܰܟܡܳܐ ܕܶܐܡܰܪ܀

ܝܰܘܡܳܢܳܐ ܚܰܙܩܺܝܐܶܝܠ܆ ܢܶܚܕܶܐ ܒܓܶܠܝܳܢܶܗ܆ ܕܰܒܬܰܪܥܳܐ ܐܰܚܺܝ݂ܕܳܐ܆ ܢܦܰܩ ܠܶܗ ܡܶܠܬܳܐ܀

ܝܰܘܡܳܢܳܐ ܐܶܠܺܝܫܳܥ܆ ܒܩܰܒܪܶܗ ܢܶܪܘܰܙ܆ ܕܗܳܐ ܡܶܠܚܳܐ ܕܰܒܩܽܘܩܬܳܐ܆ ܒܰܣܡܰܬ ܠܐ̱ܢܳܫܽܘܬܳܐ܀

ܒܗܳܢ ܝܰܘܡܳܐ ܢܽܘܨܪ̈ܳܬܳܐ܆ ܕܡܰܪܝܰܡ ܐܶܫܬܡܰܥ̈ܝ܆ ܕܰܠܝܰܠܕܳܐ ܕܡܶܢ ܥܽܘܒܳܗ̇܆ ܒܚܰܕܽܘܬܳܐ ܡܢܰܨܪܳܐ܀

ܝܰܘܡܳܢܳܐ ܒܰܪ ܐܺܝܫܰܝ܆ ܢܶܚܕܶܐ ܘܢܶܪܘܰܙ܆ ܕܡܶܢ ܙܰܪܥܶܗ ܩܳܡ ܡܰܠܟܳܐ܆ ܘܪܺܝܫܳܐ ܠܥܰܡ̱̈ܡܶܐ܀

ܒܗܳܢ ܝܰܘܡܳܐ ܐܳܦ ܝܰܘܣܶܦ܆ ܟܺܐܢܳܐ ܢܶܬܦܨܰܚ܆ ܕܗܰܘ ܕܰܟܣܶܐ ܡܶܢ ܥܺܝܪ̈ܶܐ܆ ܗܳܐ ܕܢܰܚ ܠܶܗ ܘܶܐܬܓܠܺܝ܀

ܝܰܘܡܳܢܳܐ ܗܺܝ ܡܰܪܝܰܡ܆ ܠܰܡܓܽܘ̈ܫܶܐ ܐܶܡܪܰܬ܆ ܕܡܶܢ ܐܰܝܟܳܐ ܝܺܕܰܥܬܽܘܢ܆ ܕܡܰܠܟܳܐ ܝܶܠܕܶܬ܀

ܝܰܘܡܳܢܳܐ ܙܳܝܽܘܢܳܐ܆ ܕܟܽܠ ܒܶܪ̈ܝܳܬܳܐ܆ ܐܰܝܟ ܫܰܒܪܳܐ ܐܰܝܢܶܩܬܶܗ܆ ܡܰܪܝܰܡ ܚܰܠܒܳܐ܀

ܒܗܳܢ ܝܰܘܡܳܐ ܥܰܙܪܽܘܪ̈ܶܐ. ܫܺܝܛܳܐ ܟܪܺܝܟ ܗ̱ܘܳܐ܆ ܗܰܘ ܕܰܥܛܺܝܦ ܓܰܘܙܰܠܬܳܐ܆ ܘܒܰܪ̈ܩܶܐ ܕܢܽܘܪܳܐ܀

ܒܗܳܢ ܝܰܘܡܳܐ ܡܳܪܶܐ ܟܽܠ. ܒܽܐܘܪܝܳܐ ܐܶܬܬܣܺܝܡ܆ ܘܰܗܘܳܐ ܠܰܢ ܡܶܐܟܽܘܠܬܳܐ܆ ܕܒܳܗ̇ ܚܰܝ̈ܶܐ ܟܣܶܝܢ܀

ܒܗܳܢ ܝܰܘܡܳܐ ܠܳܟ ܫܽܘܒܚܳܐ܆ ܝܶܫܽܘܥ ܡܶܠܬܳܐ܆ ܕܰܒܝܰܠܕܳܟ ܐܶܬܚܰܪܰܪ̈ܝ܆ ܟܽܠ ܒܶܪ̈ܝܳܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܢܰܘ ܢܺܝܣܳܢ

ܥܽܘܢܺܝܬܳܐ: ܒܪܺܝܟ ܕܰܒܡܰܘܠܳܕܶܗ ܫܰܝܶܢ ܥܶܠܳܝ̈ܶܐ ܥܰܡ ܬܰܚ̈ܬܳܝܶܐ.

ܡܓܽܘ̈ܫܶܐ ܒܢܰܝ̈ ܦܳܪܶܣ܆ ܒܩܽܘܪ̈ܒܳܢܶܐ ܪ̈ܓܺܝܓܶܐ ܐܶܬܰܘ ܘܶܐܬܘܰܥܰܕܘ܆ ܠܘܳܬ ܝܰܠܕܳܐ ܙܥܽܘܪܳܐ ܘܡܰܠܟܳܐ ܕܰܟܣܶܐ ܗ̱ܘܳܐ܆ ܘܗܶܢܽܘܢ ܠܶܗ ܫܰܘܕܰܥܘ܆ ܩܪܰܘ ܒܰܟܬܳܒܶܗ ܕܒܶܠܥܰܡ ܕܶܐܡܰܪ܆ ܕܢܶܕܢܰܚ ܡܶܟܺܝܠ ܟܰܘܟܒܳܐ ܡܶܢ ܝܰܥܩܽܘܒ܆ ܘܰܢܩܽܘܡ ܬܽܘܒ ܪܺܝܫܳܐ ܡܶܢ ܝܺܣܪܳܐܶܝܠ܆ ܗܰܘ ܡܰܠܟܳܐ ܘܡܳܪܳܐ܆ ܕܰܡܣܰܟܶܝܢ ܥܰܡ̱̈ܡܶܐ ܕܢܶܗܘܶܐ ܦܳܪܽܘܩܗܽܘܢ܀

ܡܓܽܘ̈ܫܶܐ ܒܢܰܝ̈ ܦܳܪܶܣ܆ ܒܩܽܘܪ̈ܒܳܢܶܐ ܪ̈ܓܺܝܓܶܐ ܐܶܬܰܘ ܘܶܐܬܘܰܥܰܕܘ܆ ܠܘܳܬ ܝܰܠܕܳܐ ܙܥܽܘܪܳܐ ܘܡܰܠܟܳܐ ܕܰܟܣܶܐ ܗ̱ܘܳܐ܆ ܘܗܶܢܽܘܢ ܠܶܗ ܫܰܘܕܰܥܘ܆ ܩܪܰܘ ܒܰܟܬܳܒܶܗ ܕܒܶܠܥܰܡ ܕܶܐܡܰܪ܆ ܕܢܶܕܢܰܚ ܡܶܟܺܝܠ ܟܰܘܟܒܳܐ ܡܶܢ ܝܰܥܩܽܘܒ܆ ܘܰܢܩܽܘܡ ܬܽܘܒ ܪܺܝܫܳܐ ܡܶܢ ܝܺܣܪܳܐܶܝܠ܆ ܗܰܘ ܡܰܠܟܳܐ ܘܡܳܪܳܐ܆ ܕܰܡܣܰܟܶܝܢ ܥܰܡ̱̈ܡܶܐ ܕܢܶܗܘܶܐ ܦܳܪܽܘܩܗܽܘܢ܀

ܣܽܘܓܺܝܬܳܐ

ܩܳܠܳܐ ܒܩ̄: ܥܰܡܳܐ ܘܥܰܡ̱̈ܡܶܐ
ܡܰܢܽܘ ܚܙܳܐ ܢܶܩܝܳܐ ܟܰܕ ܡܰܝܢܩܳܐ

ܥܽܘܢܺܝܬܳܐ: ܒܪܺܝܟ ܐܰܒܳܐ ܕܫܰܠܚܶܗ ܨܶܐܕܰܝܢ܆ ܒܪܺܝܟܳܐ ܗ̱ܝ ܡܰܪܝܰܡ ܕܺܝܠܶܕܬܶܗ.

ܒܰܪ̱ܬ ܡܶܣ̈ܟܺܢܶܐ ܐܶܡܳܐ ܗܘܳܬ܆ ܠܒܰܪ ܥܰܬܺܝܪܳܐ ܕܚܽܘܒܶܗ ܥܨܳܝܗ̱ܝ܆ ܢܽܘܪܳܐ ܒܥܽܘܒܳܗ̇ ܕܰܥܠܰܝܡܬܳܐ܆ ܘܡܶܢ ܓܰܘܙܰܠܬܳܐ ܠܳܐ ܝܳܩܕܳܐ܀

ܫܶܡܫܳܐ ܪܰܒܳܐ ܚܡܰܠ ܘܶܐܬܩܦܶܣ܆ ܒܰܚܕܳܐ ܥܢܳܢܳܐ ܢܰܗܺܝܪܬܳܐ܆ ܘܰܗܘܳܬ ܠܶܗ ܛܠܺܝܬܳܐ ܐܶܡܳܐ܆ ܠܕܰܐܘܠܶܕ ܠܳܐܕܳܡ ܘܰܠܥܳܠܡܳܐ܀

ܟܶܐܡܰܬ ܒܶܪܝ ܐܰܢ̱ܬ ܐܶܢܰܨܪܳܟ܆ ܕܰܗܘܺܝܬ ܐܶܡܳܟ ܐܶܚܰܒܒܳܟ܆ ܡܳܪܝ ܕܺܝܠܶܕܬܶܗ ܘܩܰܫܺܝܫ ܡܶܢܝ܆ ܒܶܪܝ ܕܰܛܥܶܢܬܶܗ ܘܰܛܥܺܝܢ ܠܺܝ܀

ܐܰܝܟ ܝܰܠܽܘܕܳܐ ܙܰܝ݂ܰܚܬܳܟ܆ ܘܰܐܝܟ ܓܰܢ̱ܒܳܪܳܐ ܡܶܬܥܰܫܢܰܬ܆ ܕܽܘܡܳܪܳܐ ܐܰܢ̱ܬ ܐܰܝܟ ܕܳܐܦ ܩܪܳܟ܆ ܗܰܘ ܐܶܫܰܥܝܳܐ ܕܰܐܟܪܙܳܟ܀

ܒܺܝ ܘܒܰܫܡܰܝܳܐ ܐܺܝܬ ܡܰܫܪܝܳܟ܆ ܐܰܟܘܳܬܳܗ̇ ܡܳܪܝ ܐܶܫܰܒܚܳܟ܆ ܥܳܡܪ̈ܰܝ ܪܰܘܡܳܐ ܒܺܝ ܬܳܗܪܺܝܢ܆ ܘܟܽܠܗܽܘܢ ܛܽܘܒܳܐ ܠܺܝ ܢܶܬܠܽܘܢ܀

ܡܳܐ ܝܰܩܺܝܪܳܐ ܘܰܡܫܰܒܚܳܐ܆ ܐܶܡܶܗ ܕܡܰܠܟܳܐ ܡܶܢ ܟܽܘܪܣܝܳܐ܆ ܐܰܘܕܳܐ ܒܺܝ ܡܳܪܝ ܕܰܨܒܰܝܬ ܒܺܝ܆ ܕܶܐܗܘܶܐ ܐܶܡܳܟ ܘܶܐܢܰܨܪܳܟ܀

ܩܰܫܺܝܫ ܡܶܢ ܟܽܠ ܕܰܢܚܶܬ ܗܘܳܐ܆ ܥܽܘܠܳܐ ܨܶܐܕܰܝ ܠܳܟ ܡܰܘܪܒܳܢ܆ ܫܪܶܝܬ ܥܰܠ ܒܽܘܪ̈ܟܰܝ ܘܡܶܢܳܟ ܡܠܶܝܢ܆ ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ܀

ܠܒܺܝܟ ܐܰܢ̱ܬ ܠܰܬܕܰܝ̈ ܘܰܡܕܰܒܪܰܬ܆ ܐܰܪܥܳܐ ܘܝܰܡ̱̈ܡܶܐ ܘܟܽܠ ܕܺܐܝܬ ܒܗܽܘܢ܆ ܗܳܐ ܡܰܪܟܰܒܬܳܐ ܒܪܰܘܡܳܐ ܠܥܶܠ܆ ܘܰܛܥܺܝܢܳܐ ܠܳܟ ܟܰܕ ܐܰܢ̱ܬ ܒܺܝ܀

ܡܰܠܝܳܐ ܡܶܢܳܟ ܫܡܰܝܳܐ ܠܥܶܠ: ܘܰܛܥܺܝܢܳܐ ܠܳܟ ܟܶܢܦܳܐ ܠܬܰܚܬ: ܒܶܝܬ ܥܶܠܳܝ̈ܶܐ ܒܢܽܘܪܳܐ ܫܪܶܝܬ: ܘܰܠܬܰܚ̈ܬܳܝܶܐ ܠܳܐ ܡܰܘܩܕܰܬ܀

ܣܪ̈ܳܦܶܐ ܒܩܽܘ̈ܕܳܫܶܐ ܡܒܰܪܟܺܝܢ܆ ܘܰܐܝܟܰܢܳܐ ܡܳܪܝ ܐܶܢܰܨܪܳܟ܆ ܟܪ̈ܽܘܒܶܐ ܒܙܰܘܥܳܐ ܠܳܟ ܡܝܰܒܒܺܝܢ܆ ܘܰܒܩܳܠܰܝ̈ ܕܺܝܠܝ ܡܶܬܢܰܨܪܰܬ܀

ܥܰܒ̈ܕܶܐ ܛܪ̈ܺܝܕܶܐ ܒܺܝ ܢܶܥܠܽܘܢ܆ ܠܗܰܘ ܝܽܘܬܪܳܢܳܐ ܕܡܶܢܶܗ ܢܦܰܩܘ܆ ܠܒܽܘܫܳܐ ܕܫܽܘܒܚܳܐ ܬܶܗܘܶܐ ܠܗܽܘܢ܆ ܕܰܢܟܰܣܽܘܢ ܒܶܗ ܦܽܘܪܣܳܝܗܽܘܢ܀

ܚܰܘܳܐ ܬܶܓܠܶܐ ܘܰܬܢܰܨܪܳܟ܆ ܕܒܶܗܬܰܬ ܐܰܦܶܝ̈ܗ̇ ܒܳܟ ܫܰܢܝܰܬ܆ ܩܳܠܳܐ ܬܶܫܡܰܥ ܕܫܰܝܢܳܐ ܡܠܶܐ܆ ܕܗܳܐ ܒܰܪ ܒܰܪܬܳܗ̇ ܚܰܘܒܬܳܗ̇ ܦܪܰܥ܀

ܚܰܘܳܐ ܘܳܐܕܳܡ ܒܺܝ ܢܶܛܦܣܽܘܢ܆ ܘܦܺܐܪܳܐ ܕܚܰܝ̈ܶܐ ܒܺܝ ܢܶܩܛܦܽܘܢ܆ ܕܒܺܝ ܚܶܢ̱ܟܰܝ̈ܗܽܘܢ ܢܶܬܚܰܠܝܽܘܢ܆ ܚܠܳܦ ܗܰܘ ܦܺܐܪܳܐ ܕܰܐܡܰܪ ܠܗܽܘܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܒܟܽܠ ܫܶܡ ܡܰܪܝܰܡ ܐܶܬܩܰܠܣܰܬ

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܰܒܝܰܠܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܰܒܝܰܠܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܒܝܰܠܕܳܟ ܚܳܕ̈ܝܳܢ ܒܶܪ̈ܝܳܬܳܐ܆ ܘܰܦܨܺܝ݂̈ܚܳܢ ܟܽܠ ܦܶܢ̈ܝܳܬܳܐ܆ ܘܪ̈ܳܘܙܳܢ ܟܽܠܗܶܝܢ ܥܺܕ̈ܳܬܳܐ܆ ܕܝܰܠܕܳܟ ܐܰܦܢܺܝ ܝܰܠ̈ܕܰܝܗܶܝܢ܀

ܥܺܝܪ̈ܶܐ ܝܰܘܡܳܢ ܣܰܒܰܪܘ ܗ̱ܘܰܘ܆ ܚܰܕܽܘܬܳܐ ܠܪ̈ܳܥܰܘܳܬܳܐ܆ ܕܬܰܘ ܙܶܠܘ ܘܰܚܙܰܘ ܒܒܶܝܬ ܠܚܶܡ܆ ܕܺܝܠܺܝܕ ܡܰܠܟܳܐ ܕܺܐܝܩܳܪ̈ܶܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܰܒܝܰܠܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܰܒܝܰܠܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀