ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܢܶܙܡܰܪ ܐܰܚܰܝ̈ ܥܰܡ ܥܺܝܪ̈ܶܐ܆ ܫܽܘܒܚܳܐ ܠܰܐܠܳܗܳܐ ܒܪܰܘܡܳܐ܆ ܘܥܰܠ ܐܰܪܥܳܐ ܢܰܡܠܶܟ ܫܰܝܢܳܐ܆ ܘܣܰܒܪܳܐ ܛܳܒܳܐ ܠܐܢܳܫܽܘܬܳ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܒܗܳܢܳܐ ܠܺܠܝܳܐ ܐܶܬܺܝܠܶܕ܆ ܦܳܪܽܘܩܰܢ ܒܒܶܝܬ ܠܚܶܡ܆ ܡܓܽܘ̈ܫܶܐ ܐܶܬܰܘ ܠܺܐܝܩܳܪܶܗ܆ ܘܩܰܪܶܒܘ ܠܶܗ ܩܽܘܪ̈ܒܳܢܰܝܗܽܘܢ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܒܝܰܠܕܳܟ ܚܳܕ̈ܝܳܢ ܒܶܪ̈ܝܳܬܳܐ܆ ܘܰܦܨܺܝ̈ܚܳܢ ܟܽܠ ܦܶܢ̈ܝܳܬܳܐ܆ ܘܪ̈ܳܘܙܳܢ ܟܽܠܗܶܝܢ ܥܺܕ̈ܳܬܳܐ܆ ܕܝܰܠܕܳܟ ܐܰܦܨܰܚ ܝܰܠ̈ܕܰܝܗܶܝܢ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܝܰܘܡܳܢ ܥܺܝܪ̈ܶܐ ܣܰܒܰܪܘ ܗ̱ܘܰܘ܆ ܠܪ̈ܳܥܰܘܳܬܳܐ ܚܰܕܽܘܬܳܐ܆ ܕܬܰܘ ܙܶܠܘ ܘܰܚܙܰܘ ܒܒܶܝܬ ܠܚܶܡ܆ ܕܺܝܠܺܝܕ ܡܰܠܟܳܐ ܕܺܐܝܩܳܪ̈ܶܐ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܡܳܪܝܳܐ ܡܳܪܰܢ
ܡܳܪܝܳܐ ܡܳܪܰܢ ܟܰܕ ܙܳܚܰܬ ܐܰܠܳܗܽܘܬܳܟ

ܡܳܪܝܳܐ ܡܳܪܰܢ܆ ܥܠܰܝܟ ܐܶܬܢܰܒܺܝ ܚܰܙܩܺܝܐܶܝܠ܆ ܕܰܚܙܳܐ ܟܪ̈ܽܘܒܶܐ ܘܡܰܪܟܰܒܬܳܐ ܕܚܺܝܠܬܳܐ܆ ܕܰܟܕܺܝ̈ܢܳܢ ܒܳܗ̇܆ ܚܰܝ̈ܘܳܬܳܐ ܕܰܐܪܒܰܥ ܐܰܦܺܝ̈ܢ܆ ܐܰܪܝܳܐ ܘܬܰܘܪܳܐ܆ ܘܢܶܫܪܳܐ ܘܒܰܪܢܳܫܳܐ܆ ܘܰܫܡܰܥ ܩܳܠܳܐ܆ ܡܶܢ ܒܶܝܬ ܚܰܝ̈ܘܳܬܳܐ܆ ܕܳܐܡܰܪ ܒܪܺܝܟ ܐܺܝܩܳܪܶܗ܆ ܕܡܳܪܝܳܐ ܡܶܢ ܐܰܬܪܶܗ܀

ܫܽܘܒܚܳܐ

ܡܳܪܝܳܐ ܡܳܪܰܢ܆ ܒܒܰܛܢܳܟ ܒܛܺܝ̈ܢܶܐ ܐܶܬܩܰܕܰܫܘ ܐܰܝܟ ܝܽܘܚܰܢܳܢ܆ ܟܳܪܽܘܙܳܐ ܕܩܽܘܫܬܳܐ܆ ܘܰܒܝܽܘܡ ܝܰܠܕܳܟ܆ ܝܰܠܽܘ̈ܕܶܐ ܗܘܰܘ ܪܺܝܫܺܝܬܳܐ܆ ܘܰܐܝܟ ܩܽܘܪ̈ܒܳܢܶܐ ܐܶܬܩܰܪܰܒܘ ܚܠܳܦܰܝܟ܆ ܘܰܒܛܰܝܒܽܘܬܳܟ܆ ܠܰܐܪܥܳܐ ܕܡܶܨܪܶܝܢ ܐܶܬܬܰܚܬܺܝܬ܆ ܕܬܶܣܥܽܘܪ ܐܶܢܽܘܢ ܒܰܚܢܳܢܳܟ ܪܰܒܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܗܳܢܰܘ ܝܰܪܚܳܐ܆ ܕܰܛܥܺܝܢ ܟܽܠܶܗ ܟܽܠ ܚܰܕ̈ܘܳܬܳܐ

ܥܽܘܢܺܝܬܳܐ: ܒܪܺܝܟ ܕܰܒܝܰܠܕܶܗ ܫܰܝܶܢ ܪܰܘܡܳܐ ܘܟܽܠ ܦܶܢ̈ܝܳܬܳܐ.

ܐܶܬܰܝܢ ܕܢܶܚܙܶܐ. ܥܽܘܡܪܳܐ ܕܰܡܛܳܟ ܡܶܢ ܒܶܝܬ ܕܰܘܺܝܕ܆ ܐܽܘܪܝܳܐ ܙܥܽܘܪܳܐ ܡܶܢ ܥܰܪ̈ܣܳܬܶܗ܆ ܡܥܰܪܬܳܐ ܡܛܳܬܳܟ ܡܶܢ ܐܳܦܰܕܢܰܘ̈ܗ̱ܝ܆ ܚܠܳܦ ܡܰܪܟܰܒܬܶܗ܆ ܕܪ̈ܳܥܶܝܗ̇ ܕܡܰܪܝܰܡ ܗܳܐ ܡܙܰܝܚܺܝܢ ܠܳܟ܀

ܬܳܐ ܢܽܘܚ ܘܰܫܠܺܝ. ܒܥܽܘܡܪܳܗ̇ ܕܶܐܡܳܟ ܒܰܪ ܝܰܩܺܝܪܳܐ܆ ܠܳܐ ܦܐܶܐ ܚܽܘܨܦܳܟ ܠܰܒ̈ܢܰܝ ܡܰܠ̈ܟܶܐ܆ ܒܰܪ ܕܰܘܺܝܕ ܐܰܢ̱ܬ ܗܰܘ ܝܰܩܺܝܪܳܐ܆ ܐܳܦ ܒܰܪ ܡܰܪܝܰܡ܆ ܕܰܒܬܰܐܘܳܢܳܐ ܫܽܘܦܪܳܗ̇ ܢܶܛܪܰܬ܀

ܒܟܽܠ ܐܰܬܪ̈ܰܘܳܢ. ܐܶܢ ܦܳܗܶܐ ܐ̱ܢܳܫ ܡܶܛܽܠܳܬܳܟ܆ ܒܪܰܘܡܳܐ ܘܥܽܘܡܩܳܐ ܘܰܒܟܽܠ ܦܶܢ̈ܝܳܢ܆ ܫܰܪܝܳܐ ܘܡܰܠܝܳܐ ܗܺܝ ܪܰܒܽܘܬܳܟ܆ ܘܠܳܐ ܡܣܰܝܟܺܝܢ ܠܳܟ܆ ܟܽܠ ܕܳܪ̈ܽܘܫܶܐ ܘܠܳܐ ܡܶܬܕܰܪܟܰܬ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܬܩܰܛܰܠܘ ܗ̱ܘܰܘ

ܥܽܘܢܺܝܬܳܐ: ܒܪܺܝܟܽ ܗ̱ܘ ܝܰܘܡܶܗ ܕܡܰܘܠܳܕܳܟ܆ ܕܒܶܗ ܐܶܬܚܰܪܰܪ̈ܝ ܒܶܪ̈ܝܳܬܳܐ.

ܟܽܠܗܽܘܢ ܡܰܠ̈ܟܶܐ ܕܒܶܝܬ ܕܰܘܺܝܕ܆ ܟܽܘܪܣܝܳܐ ܢܛܰܪܘ ܥܕܰܡܳܐ ܕܶܐܬܰܝܬ܆ ܥܠܰܝܟ ܐܶܬܢܰܒܺܝ ܗ̱ܘܳܐ ܝܰܥܩܽܘܒ܆ ܟܰܕ ܐܳܡܰܪ ܗ̱ܘܳܐ ܗܳܟܰܢܳܐ܆ ܕܢܺܐܬܶܐ ܠܰܡ ܡܰܢ ܕܕܺܝܠܶܗ ܗ̱ܺܝ. ܡܰܠܟܽܘܬܳܐ ܘܰܢܒܺܝܽܘܬܳܐ܆ ܘܠܶܗ ܢܣܰܟܽܘܢ ܟܽܠܗܽܘܢ ܥܰܡ̱̈ܡܶܐ. ܘܰܢܚܰܘܰܪ ܠܒܽܘܫܶܗ ܒܚܰܡܪܳܐ܆ ܘܒܰܕܡܳܐ ܕܥܶܢ̈ܒܶܐ ܬܰܟܣܺܝܬܶܗ܆ ܕܰܠܚܰܫܶܗ ܘܡܰܘܬܶܗ ܨܳܐܰܪ܀

ܒܫܽܘܪܳܝܳܐ ܠܳܟ ܬܶܫܒܽܘܚܬܳܐ܆ ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ܆ ܒܳܟ ܫܰܪܺܝܬ ܗܰܒܠܺܝ ܚܰܝܠܳܐ܆ ܕܶܐܬܡܰܢܰܥ ܨܶܝܕ ܫܽܘܠܳܡܳܐ܆ ܘܶܐܙܡܰܪ ܫܽܘܒܚܳܐ ܠܺܐܝܬܽܘܬܳܟ. ܫܽܘܪܳܝܳܐ ܕܠܳܐ ܫܽܘܠܳܡܳܐ܆ ܘܡܳܐ ܕܰܐܘܦܺܝ̈ ܡܶܠܰܝ̈ ܫܰܦܠܽܘܬܝ܆ ܒܩܰܒܪܳܐ ܡܚܰܒܶܠ ܟܽܠ ܫܽܘܦܪ̈ܺܝܢ܆ ܒܛܰܝܒܽܘܬܳܟ ܡܳܪܝ ܚܽܘܣ ܥܠܰܝ܆ ܘܶܐܫܬܰܘܙܰܒ ܡܶܢ ܓܺܗܰܢܳܐ܀

ܛܠܰܡܘ ܟܶܢܳܪܳܐ ܕܶܐܫܰܥܝܳܐ: ܕܥܰܠ ܒܰܛܢܳܐ ܕܰܟܝܳܐ ܝܰܒܶܒ: ܫܰܠܺܝܘ ܟܶܢܳܪ ܡܰܙܡܽܘܪ̈ܶܐ: ܕܥܰܠ ܟܽܘܡܪܽܘܬܶܗ ܪܳܡܶܙ ܗ̱ܘܳܐ: ܩܺܝܬܳܪܳܐ ܕܪܽܘܚܳܐ ܫܰܬܶܩܘ ܕܥܰܠ ܡܰܠܟܽܘܬܶܗ ܙܳܡܰܪ ܗ̱ܘܳܐ: ܗ̱ܘܳܐ ܬܚܶܝܬ ܫܶܬܩܳܐ ܪܰܒܳܐ ܟܶܢܳܪܳܐ ܡܠܶܐ ܢܒܺܝܽܘܬܳܐ: ܩܥܰܘ ܥܶܠܳܝ̈ܶܐ ܘܬܰܚ̈ܬܳܝܶܐ: ܒܪܺܝܟ ܕܰܕܢܰܚ ܡܶܢ ܓܰܘ ܫܶܬܩܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܦܰܪܕܰܝܣܳܐ
ܡܰܢܽܘ ܚܙܳܐ ܢܶܩܝܳܐ ܟܰܕ ܡܰܝܢܩܳܐ ܠܰܐܪܝܳܐ

ܥܽܘܢܺܝܬܳܐ: ܫܽܘܒܚܳܐ ܠܫܳܠܽܘܚܳܟ ܝܰܠܕܳܐ ܕܬܶܕܡܽܘܪܬܳܐ܆ ܐܳܘ ܝܰܠܕܶܗ ܕܰܐܒܳܐ ܘܰܒܪܳܗ̇ ܕܰܒܬܽܘܠܬܳܐ.

ܟܝܳܢܳܐ ܕܰܛܪܽܘܢܳܐ ܕܚܺܝܠ ܗ̱ܘܳܐ ܘܰܩܫܶܐ ܛܳܒ܆ ܘܣܶܓܕܬܳܐ ܘܫܽܘܠܛܳܢܳܐ ܕܰܐܪܥܳܐ ܠܗܽܘܢ ܐܶܫܬܠܶܡ܆ ܟܰܕ ܐܰܕܺܝܩ ܘܰܚܙܳܐ ܝܳܪܬܳܐ ܕܒܰܬܚܽܘ̈ܡܶܐ܆ ܕܽܐܘܚܕܳܢܳܐ ܕܡܰܘܬܳܐ ܐܺܝܬ ܠܗܽܘ݉ܢ܆ ܗܳܢܽܘܢ ܕܰܚܙܰܐܽܘܗ̱ܝ ܠܝܳܪܬܳܐ ܕܥܰܠ ܠܰܐܪܥܳܐ܆ ܒܪܶܟܘ ܥܰܠ ܐܰܦܰܝ̈ܗܽܘܢ ܘܰܣܓܺܝ̈ܕܶܐ ܣܓܶܕܘ ܠܶܗ܀

ܚܰܕ ܐ̱ܢܳܫ ܡܶܣܟܺܢܳܐ ܥܰܡ ܐܰܒܽܘܗ̱ܝ ܫܺܐܝܠܳܐ܆ ܘܶܐܡܳܐ ܡܓܰܙܰܝܬܳܐ ܥܰܠ ܠܰܐܪܥܳܐ ܕܡܶܨܪܶܝܢ܆ ܟܰܕ ܠܳܐ ܐܺܝܩܳܪܳܐ ܘܠܳܐ ܚܰܝܠܰܘ̈ܳܬܳܐ܆ ܐܰܪܡܺܝ ܗ̱ܘܳܐ ܪܗܳܒܬܳܐ ܒܥܳܠܡܳ݉ܐ܆ ܡܰܠ̈ܟܶܐ ܕܰܫܓܺܝܫܺܝܢ ܕܰܡܒܰܠܒܠܺܝܢ ܛܶܟ̈ܣܶܐ܆ ܒܪܺܝܟ ܕܶܐܬܳܐ ܘܫܰܝܶܢ ܠܡܰܠ̈ܟܶܐ ܘܰܠܛܶܟ̈ܣܶܐ܀

ܡܰܟܺܝܟ ܫܠܶܐ ܘܫܰܬܺܝܩ ܘܪܶܡܙܶܗ ܕܚܺܝܠ ܥܰܙܺܝܙ܆ ܚܶܙܘܶܗ ܫܺܝܛ ܘܰܒܣܶܐ܆ ܘܚܰܝܠܶܗ ܡܙܺܝܥ ܘܡܰܪܗܶܒ܆ ܩܽܘܕܡܰܬ ܥܰܙܪܽܘܪ̈ܰܘܗ̱ܝ ܪܡܶܝܢ ܬܳܓ̈ܶܐ ܕܡܰܠ̈ܟܶܐ܆ ܘܟܽܠܗܽܘܢ ܐܰܠܳܗ̈ܶܐ ܕܡܶܨ݉ܪܶܝܢ܆ ܢܦܰܠܘ ܥܰܠ ܐܰܦܰܝ̈ܗܽܘܢ ܘܰܗܘܰܘ ܕܰܚܺܝܚܳܐ܆ ܒܪܺܝܟ ܕܰܐܒܗܶܬ ܐܶܢܽܘܢ ܘܰܠܣܳܓܽܘ̈ܕܰܝܗܽܘܢ܀

ܣܽܘܓܺܝܬܳܐ

ܩܳܠܳܐ ܒܩ̄: ܐܶܬܬܥܺܝܪ ܫܳܗܪ̈ܶܐ

ܥܽܘܢܺܝܬܳܐ: ܒܪܺܝܟ ܝܰܠܕܳܐ ܣܓܺܝܕܳܐ܆ ܕܥܺܝܪ̈ܶܐ ܠܶܗ ܣܳܓܕܺܝܢ܆ ܒܪܺܝܟ ܡܳܪܳܐ ܛܳܒܳܐ ܕܥܺܕܬܳܐ ܦܪܰܩ ܒܰܕܡܶܗ.

ܠܡܽܘܢ ܕܰܡܺܝܟܺܝܢ ܐ̱ܢ̱ܬܽܘܢ܆ ܢܒܺܝ̈ܶܐ ܕܟܰܣ̈ܝܳܬܳܐ܆ ܚܰܙܳܝ̈ܶܐ ܕܪܽܘܚܳܐ܆ ܒܥܰܝܢܳܐ ܢܰܗܺܝܪܬܳܐ܀

ܡܰܢܽܘ ܕܗܳܐ ܡܥܰܛܰܦ܆ ܘܰܟܪܺܝܟ ܒܥܰܙܪܽܘܪ̈ܶܐ܆ ܕܪܰܘܡܳܐ ܐܳܦ ܥܽܘܡܩܳܐ܆ ܐܳܬܶܝܢ ܠܰܫܠܳܡܶܗ܀

ܐܺܝܙܓܰܕܶܗ ܦܪܰܚ ܡܛܳܐ܆ ܠܦܳܪܶܣ ܕܰܡܓܽܘ̈ܫܶܐ܆ ܘܗܽܘ ܘܶܐܡܶܗ ܝܰܘܡܳܢ܆ ܠܡܶܨܪܶܝܢ ܥܰܪܺܝܩܺܝܢ܀

ܟܽܠ ܡܳܐ ܕܰܢܒܺܝ̈ܶܐ. ܡܰܠܶܠܘ ܟܰܣܝܳܐܺܝܬ܆ ܡܳܪܝܳܐ ܕܢܰܚ ܒܰܐܪܥܳܐ܆ ܘܫܰܪܰܪ ܡܶܠܰܝ̈ܗܽܘܢ܀

ܒܪܺܝܬܳܐ ܒܶܗ ܪܗܺܝܒܳܐ܆ ܘܛܰܟܣܺܝ̈ܣ ܕܰܫܡܰܝܳܐ܆ ܘܶܐܢ ܠܳܐ ܕܚܶܠ ܡܳܕܶܝܢ܆ ܡܶܛܽܠ ܡܽܘܢ ܥܰܪܺܝܩ܀

ܚܰܕ ܐܶܡܰܪ ܕܡܳܪܝܳܐ܆ ܥܳܐܶܠ ܠܓܰܘ ܠܡܶܨܪܶܝܢ܆ ܘܰܐ̱ܚܪܺܢܳܐ ܐܶܡܰܪ܆ ܕܡܶܢ ܡܶܨܪܶܝܢ ܩܪܺܝܬ ܠܒܶܪܝ܀

ܚܰܕ ܡܰܠܟܳܐ ܫܰܡܗܶܗ܆ ܓܰܐܝܳܐ ܕܺܝܣܪܳܐܶܝܠ܆ ܘܰܐ̱ܚܪܺܢܳܐ ܩܪܳܝܗ̱ܝ ܗ̱ܘܳܐ܆ ܪܺܝܫܳܐ ܘܦܳܩܽܘܕܳܐ܀

ܚܰܕ ܪܳܥܝܳܐ ܟܰܢܝܶܗ܆ ܕܪܳܥܶܐ ܠܺܝܣܪܳܐܶܝܠ܆ ܐ̱ܚܪܺܝܢ ܒܫܰܒܛܳܐ ܕܦܰܪܙܠܳܐ܆ ܢܶܪܥܶܐ ܠܽܐܘܚ̈ܕܳܢܶܐ܀

ܚܰܕ ܚܙܳܝܗ̱ܝ ܥܰܠ ܫܽܘܪܳܐ܆ ܪܳܡܳܐ ܘܰܡܥܰܠܝܳܐ܆ ܘܫܶܩܠܳܐ ܕܰܫܦܽܘܠܰܘ̈ܗ̱ܝ܆ ܕܳܪܶܟ ܥܰܠ ܐܰܪܥܳܐ܀

ܐ̱ܚܪܺܢܳܐ ܕܶܝܢ ܟܰܢܝܶܗ܆ ܡܶܛܪܳܐ ܘܰܪܣܺܝܣܳܐ܆ ܕܢܳܚܶܬ ܥܰܠ ܐܰܪܥܳܐ܆ ܨܗܺܝܬܳܐ ܡܛܰܪܰܦܬܳܐ܀

ܚܰܕ ܐܶܡܪܳܐ ܩܪܳܝܗ̱ܝ ܗ̱ܘܳܐ܆ ܕܫܳܩܶܠ ܠܰܚܛܺܝܬܶܗ܆ ܕܥܳܠܡܳܐ ܘܦܳܪܶܩ ܠܶܗ܆ ܒܰܙܒܰܢ ܕܒܺܝܚܽܘܬܶܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢ̱ܬܳܐ

ܒܪܳܐ ܕܰܒܝܰܠܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀

ܨܰܠ̈ܡܶܐ ܚܰܪ̈ܒܶܐ ܕܰܗܘܰܘ ܦܰܚ̈ܶܐ ܠܣܳܓܽܘܕܰܝ̈ܗܽܘܢ܆ ܚܽܘܬܘ ܠܰܚܒܳܠܳܐ ܘܠܳܐ ܬܨܽܘܕܽܘܢ ܬܽܘܒ ܠܰܡܚܰܒܳܠܽܘ܆ ܥܒܺܝ̈ܕܶܐ ܕܰܫܩܰܠܘ ܫܶܡ ܐܰܠܳܗ̈ܶܐ ܘܕܰܚܠܽܘܗ̇ ܠܰܐܪܥܳܐ܆ ܗܳܐ ܥܳܒܽܘܕܳܐ ܕܳܠ ܡܶܢ ܐܰܬܪܶܗ ܕܰܢܦܰܪܣܶܝܟܽܘܢ܀

ܫܽܘܒܚܳܐ ܠܰܐܒܳܐ ܕܫܰܕܰܪ ܠܰܒܪܶܗ ܥܰܠ ܓܳܠܽܘܬܳܐ܆ ܘܣܶܓܕܬܳܐ ܠܰܒܪܳܐ ܕܰܐܝܟ ܓܰܢ̱ܒܳܪܳܐ ܐܰܥܕܺܝ ܫܒܺܝܬܳܐ܆ ܬܰܘܕܺܝ ܠܪܽܘܚܳܐ ܕܰܐܦܢܺܝ ܫܒܰܝ̈ܳܐ ܡܶܢ ܫܰܒܳܝܳܐ܆ ܘܰܥܠܰܝܢ ܪ̈ܰܚܡܶܐ ܒܟܽܠ ܥܶܕܳܢܺܝ̈ܢ ܐܰܡܺܝܢ ܘܰܐܡܺܝܢ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀