ܘܕܽܘܟܪܳܢܳܐ ܕܡܳܪܝ ܒܰܣܶܝܠܺܝܳܘܣ ܘܡܳܪܝ ܓܪܺܝܓܳܘܪܺܝܳܘܣ

ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܗܰܒ ܠܳܗ̇ ܠܥܺܕܬܳܟ
ܫܽܘܒܚܳܐ ܠܗܰܘ ܩܳܠܳܐ. ܕܶܐܡܰܪ ܡܳܪܰܢ

ܫܽܘܒܚܳܐ ܒܟܽܠܥܶܕܳܢ܆ ܢܰܣܶܩ ܠܰܐܒܳܐ ܡܬܽܘܡܳܝܳܐ܆ ܕܰܓܒܳܐ ܡܳܐܢ̈ܶܐ ܕܚܳܫܚܺܝܢ ܠܺܐܝܩܳܪܶܗ܆ ܘܰܐܩܪܶܒܘ ܥܰܡ ܛܽܘܥܝܰܝ܆ ܘܚܳܒܰܬ ܡܶܢܗܽܘܢ ܣܶܡܳܠܳܐ܆ ܘܰܢܨܰܚ ܫܪܳܪܳܐ ܒܓܰܒܳܐ ܕܝܰܡܺܝܢܳܐ܀

ܫܽܘܒܚܳܐ

ܣܶܓܕܬܳܐ ܠܪܽܘܚ ܩܽܘܕܫܳܐ܆ ܕܒܶܗ ܐܶܙܕܰܝܰܢܘ ܫܰܪܺܝܪ̈ܶܐ܆ ܒܰܣܶܝܠܺܝܳܘܣ ܘܰܓܪܺܝܓܳܘܪܺܝܳܘܣ܆ ܘܰܪܕܰܦܘ ܠܛܳܥܝܽܘܬܳܐ܆ ܕܟܽܠ ܗܶܪ̈ܶܣܺܝܣ ܡܶܢ ܥܺܕܬܳܐ܆ ܒܝܽܘܠܦܳܢܗܽܘܢ ܫܰܪܺܝܪܳܐ ܢܶܗܪܰܬ܀

ܡܰܕܪܳܫܳܐ

ܩܳܠܳܐ ܒܩ̄: ܟܰܠܰܬ ܡܰܠܟܳܐ

ܥܽܘܢܺܝܬܳܐ: ܒܪܺܝܟ ܗ̱ܽܘ ܕܰܐܘܪܶܒ ܕܽܘܟܪܳܢ܆ ܐܰܒܳܗ̈ܳܬܳܐ ܒܰܐܪܒܰܥ ܦܶܢ̈ܝܳܢ.

ܬܰܘ ܢܶܬܕܰܡܰܪ ܒܛܽܘܗܡܰܢ܆ ܐܰܪܥܳܢܳܝܳܐ ܕܰܫܘܶܐ ܠܗܳܕܶܐ܆ ܕܶܐܬܳܐ ܡܳܪܰܢ ܘܝܰܗ̱ܒܠܶܗ܆ ܟܽܠ ܫܽܘܠ̈ܛܳܢܺܝܢ ܕܪܰܘܡܳܐ ܘܥܽܘܡܩܳܐ܆ ܐܳܦ ܥܰܠܠܳܢ̈ܶܐ܆ ܘܪ̈ܳܥܰܘܳܬܳܐ܆ ܘܪ̈ܰܒܰܝ ܒ̈ܳܬܶܐ܆ ܒܥܺܕܬܳܐ ܣܳܡ ܠܶܗ܆ ܘܦܰܩܶܕ ܕܰܗܘܰܝܬܽܘܢ܆ ܥܺܝܪܺܝܢ ܘܰܡܨܰܠܶܝܢ܆ ܕܠܳܐ ܢܰܘܒܶܕ ܒܺܝܫܳܐ ܠܡܰܪܥܺܝܬܳܐ܀

ܚܳܣ ܠܺܝ ܕܺܐܝܬ ܠܺܝ ܥܰܠ ܒܪܳܐ܆ ܣܶܕ̈ܩܶܐ ܒܪܶܥܝܳܢܝ ܕܠܰܘ ܐܰܠܳܗܰܐ ܗ̱ܘ܆ ܘܰܚܪܶܡ ܐܰܝܢܳܐ ܕܳܐܡܰܪ܆ ܕܰܒܨܺܝܪ ܡܶܕܶܡ ܡܶܢ ܝܳܠܽܘܕܶܗ܆ ܡܗܰܝܡܶܢ ܐ̱ܢܳܐ ܒܶܗ܆ ܕܶܐܬܳܐ ܠܝܰܠܕܳܐ܆ ܘܰܛܥܶܡ ܡܰܘܬܳܐ܆ ܘܰܐܚܺܝ ܠܬܺܒܶܝܠ܆ ܫܰܝܢܳܐ ܠܥܺܕ̈ܳܬܳܐ܆ ܫܠܳܡܳܐ ܠܕܰܝܪ̈ܳܬܳܐ܆ ܕܝܶܫܽܘܥ ܙܟܳܐ ܘܰܢܨܰܚ ܒܰܨܠܺܝܒܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܗܳܢܳܐ ܝܰܘܡܳܐ ܚܰܕܺܝ

ܥܽܘܢܺܝܬܳܐ: ܠܳܟ ܫܽܘܒܚܳܐ ܒܪܳܐ ܕܰܐܠܳܗܳܐ. ܒܕܽܘܟܪ̈ܳܢܰܝܗܽܘܢ ܕܰܪ̈ܚܽܘܡܰܝܟ.

ܛܽܘܒܰܝܟ ܐܳܘ ܐܺܝܓܢܰܐܛܺܝܳܘܣ܆ ܗܰܘ ܕܢܽܘܪܳܢܳܐ ܡܶܬܦܰܫܰܩ܆ ܕܟܽܠ ܐܰܝܢܳܐ ܕܩܰܒܶܠ ܡܶܠܰܝ̈ܟ܆ ܢܽܘܪܶܗ ܕܡܳܪܝܳܐ ܣܶܦܰܬ ܒܶܗ܀

ܛܽܘܒܰܝܟ ܐܳܘ ܒܰܣܶܝܠܺܝܳܘܣ܆ ܗܰܘ ܕܡܰܠܟܳܝܳܐ ܡܶܬܬܰܪܓܰܡ܆ ܕܟܽܠ ܡܰܢ ܕܰܠܐܺܝ ܒܝܽܘܠܦܳܢܳܟ܆ ܡܰܠܟܽܘܬܳܐ ܕܪܰܘܡܳܐ ܝܺܪܶܬ܀

ܛܽܘܒܰܝܟ ܐܳܘ ܐܺܝܘܰܐܢܢܺܝܣ܆ ܕܶܐܬܟܰܢܺܝ ܦܽܘܡܳܐ ܕܕܰܗܒܳܐ܆ ܕܟܽܠ ܕܰܫܡܰܥ ܡܰܠܦܳܢܽܘܬܳܟ܆ ܝܺܪܶܬ ܥܽܘܬܪܳܐ ܫܡܰܝܳܢܳܐ܀

ܐܶܬܳܐ ܠܝܰܠܕܳܐ ܘܰܓܙܽܘܪܬܳܐ܆ ܘܫܰܡܠܺܝ ܗ̱ܘܳܐ ܡܕܰܒܪܳܢܽܘܬܶܗ܆ ܘܰܐܝܟ ܕܰܪܫܰܡܘ ܢܒܺܝ̈ܶܐ ܕܰܐܒܽܘܗ̱ܝ܆ ܒܰܬܡܺܝܢܳܝܳܐ ܐܶܬܓܙܰܪ ܗ̱ܘܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܐܳܦܪܰܬ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܳܪܳܐ ܕܟܽܠ ܦ̈ܶܠܳܐܬܳܐ: ܕܫܰܡܶܫ ܐ̱ܪܳܙܶܗ ܕܥܰܒܕܶܗ ܐܰܒܪܰܡ.

ܠܟܽܘܢ ܛܽܘܒܰܝܟܽܘܢ ܐܰܒܳܗ̈ܳܬܳܐ܆ ܘܪ̈ܳܥܰܘܳܬܳܐ ܕܥܺܕܰܬ ܩܽܘܕܫܳܐ܆ ܕܶܐܬܗܰܝܡܰܢܬܽܘܢ ܥܰܠ ܡܰܪܥܺܝܬܳܐ܆ ܙܒܺܝܢܰܬ ܒܰܕܡܶܗ ܕܒܰܪ ܐܰܠܳܗܳܐ܆ ܛܽܘܒ ܠܥܶܪ̈ܒܶܐ ܕܒܰܓܙܳܪܟܽܘܢ ܐܶܬܡܢܺܝܘ܆ ܘܠܰܢ̈ܩܰܘܳܬܳܐ ܕܒܰܛܝܳܪܟܽܘܢ ܐܶܬܚܡܶܠ̈ܝ܆ ܒܟܽܘܢ ܗ̱ܽܘ ܐܰܙܠܶܓ܆ ܢܽܘܗܪܳܐ ܫܡܰܝܳܢܳܐ܆ ܠܥܺܕܬܳܐ ܡܗܰܝܡܰܢܬܳܐ܀

ܒܗܳܢܳܐ ܝܰܘܡܳܐ ܕܕܽܘܟܪ̈ܳܢܰܝܟܽܘܢ܆ ܐܰܒܳܗ̈ܳܬܳܐ ܐܰܠܳܗܳܝ̈ܶܐ܆ ܐܰܦܺܝܣ ܚܠܳܦܰܝܢ ܠܗܰܘ ܕܰܓܒܳܟܽܘܢ܆ ܕܬܶܪܥܽܘܢ ܠܥܳܢ̈ܶܗ ܩܰܕܺܝܫܳܐܺܝܬ܆ ܕܢܰܥܒܰܪ ܡܶܢܰܢ ܫܰܒ̈ܛܶܐ ܕܪܽܘܓܙܳܐ܆ ܘܢܶܟ̈ܝܳܢܶܐ ܘܽܐܘܠ̈ܨܳܢܶܐ ܩܫܰܝ̈ܳܐ܆ ܘܰܢܫܰܟܶܢ ܠܰܢ܆ ܕܢܶܪܕܶܐ ܒܥܶܩܒܳܬܟܽܘ̈ܢ܆ ܥܕܰܡܳܐ ܠܫܽܘܠܳܡܳܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܫܽܘܒܚܳܐ ܠܳܟ ܒܽܘܟܪܶܗ ܕܰܐܒܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܗܽܘܢ ܕܡܰܠ̈ܦܰܝ ܩܽܘܫܬܳܐ܆

ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܗܳܢܽܘܢ ܕܰܗܘܰܘ ܐܰܪ̈ܕܺܟܠܶܐ܆ ܠܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܘܥܰܠ ܫܽܘܥܳܐ ܕܗܰܝܡܳܢܽܘܬܳܐ܆ ܫܰܪܰܪܘ ܣܳܡܽܘܗ̇ ܚܠܺܝܡܳܐܺܝܬ܆ ܗܳܢܽܘܢ ܕܰܗܘܰܘ ܣܳܬܽܘܪ̈ܶܐ܆ ܕܗܶܪ̈ܶܣܺܝܣ ܡܰܠ̈ܝܰܝ ܪܽܘܫܥܳܐ܆ ܒܰܛܶܠܘ ܘܰܪܕܰܦܘ ܡܶܢ ܥܺܕܬܳܐ܆ ܛܳܥܝܽܘܬܳܐ ܕܟܽܠ ܦܽܘ̈ܠܳܓܶܐ܀

ܗܳܢܽܘܢ ܕܰܗܘܰܘ ܟܶܢܳܪ̈ܶܐ܆ ܡܰܠ̈ܝܰܝ ܪܽܘܚܳܐ ܩܰܕܺܝܫܳܐ܆ ܘܒܰܙܡܺܝܪ̈ܳܬܗܽܘܢ ܐܶܬܦܰܨܚܰܬ܆ ܡܰܪܥܺܝܬܶܗ ܕܒܰܪ ܐܰܠܳܗܳܐ܆ ܗܳܢܽܘܢ ܕܰܗܘܰܘ ܥܰܠ̈ܠܳܢܶܐ܆ ܘܪ̈ܳܥܰܘܳܬܳܐ ܫܰܪܺܝܪ̈ܶܐ܆ ܘܒܰܨܠܺܝܒ ܢܽܘܗܪܳܐ ܪܥܰܘ ܘܕܰܒܰܪܘ܆ ܠܥܳܢ̈ܳܐ ܦܪܺܝܩܬܳܐ ܕܰܡܫܺܝܚܳܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܗܽܘܢ ܕܡܰܠ̈ܦܰܝ ܩܽܘܫܬܳܐ܆

ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀