ܘܕܽܘܟܪܳܢܳܐ ܕܡܳܪܝ ܒܰܣܶܝܠܺܝܳܘܣ ܘܡܳܪܝ ܓܪܺܝܓܳܘܪܺܝܳܘܣ

ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܠܟܽܘܢ ܛܽܘܒܰܝܟܽܘܢ ܡܰܠ̈ܦܳܢܶܐ܆ ܕܢܽܘܗܪܶܗ ܕܥܳܠܡܳܐ ܐܺܝܬܰܝܟܽܘܢ܆ ܘܡܶܠܚܳܐ ܐܺܝܬܰܝܟܽܘܢ ܕܰܐܪܥܳܐ܆ ܘܥܰܡܽܘ̈ܕܶܐ ܕܰܛܥܺܝܢܺܝܢ ܠܳܗ̇܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܒܪܺܝܟ ܫܶܡܫܳܐ ܕܙܰܕܺܝܩܽܘܬܳܐ܆ ܕܰܓܒܳܐ ܫܠܺܝܚ̈ܶܐ ܠܰܣܒܰܪܬܶܗ܆ ܘܡܰܠ̈ܦܳܢܶܐ ܒܥܺܕܬܳܐ ܡܟܺܝܪܬܶܗ ܘܚܰܟܶܡ ܐܶܢܽܘܢ ܒܰܫܪܳܪܶܗ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܡܰܢܽܘ ܡܨܶܐ ܕܢܺܐܡܰܪ ܫܰܪܒܶܗ܆ ܕܢܰܨܺܝܚܳܐ ܒܰܣܶܝܠܺܝܳܘܣ܆ ܥܰܡܽܘܕܳܐ ܕܥܺܕܰܬ ܩܽܘܕܫܳܐ܆ ܘܡܰܠܦܳܢܳܐ ܕܫܰܪܺܝܪ̈ܳܬܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܐܰܘ

ܒܪܺܝܟܽ ܗ̱ܘ ܡܫܺܝܚܳܐ ܕܰܒܚܽܘܒܶܗ: ܐܶܬܬܰܚܬܺܝ ܘܰܗܘܳܐ ܐ̱ܢܳܫܳܐ: ܘܫܰܡܠܺܝ ܘܰܓܡܰܪ ܢܳܡܽܘܣܳܐ: ܘܟܽܠܗܶܝܢ ܕܺܝܠܰܢ ܓܶܝܪ ܩܰܒܶܠ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܡܽܘܫܶܐ ܪܺܝܫܳܐ ܕܰܢܒܺܝ̈ܶܐ: ܡܶܢܶܗ ܩܰܒܶܠ ܢܳܡܽܘܣܳܐ ܘܝܰܘܡܳܢܳܐ ܗܽܘ ܒܰܩܢܽܘܡܶܗ: ܫܰܡܠܺܝ ܟܽܠܗܶܝܢ ܕܰܟܬܺܝ̈ܒܳܢ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܢܰܨܺܝܚܳܐ ܒܰܣܶܝܠܺܝܳܘܣ: ܘܩܰܕܺܝܫܳܐ ܓܪܺܝܓܳܘܪܺܝܳܘܣ: ܫܰܐܠܘ̱ ܠܰܢ ܪ̈ܰܚܡܶܐ ܘܰܚܢܳܢܳܐ: ܡܶܢ ܡܳܪܟܽܘܢ ܒܝܽܘܡ ܕܽܘܟܪܳܢܗܽܘܢ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܠܳܟ ܬܶܫܒܽܘܚܬܳܐ ܐܰܠܳܗܳܐ: ܡܢܰܨܚܳܢܳܐ ܕܪ̈ܳܥܰܘܳܬܳܐ: ܕܰܥܒܰܕܘ ܘܰܐܠܶܦܘ ܐܰܝܟ ܕܦܰܩܶܕܬ: ܘܗܰܝܡܳܢܽܘܬܳܐ ܕܒܳܟ ܫܰܪܰܪܘ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܠܡܰܪܝܰܡ ܝܳܠܕܰܬ ܐܰܠܳܗܳܐ
ܫܽܘܒܚܳܐ ܠܳܟ ܕܰܒܦܽܘܩܕܳܢܳܟ ܐܰܡܠܶܟ

ܒܗܳܢܳܐ ܝܰܘܡܳܐ ܕܽܘܨܝ ܥܺܕܬܳܐ ܘܰܙܡܰܪܝ ܫܽܘܒܚܳܐ܆ ܕܰܐܝܟ ܢܰܗܺܝܪ̈ܶܐ ܐܶܬܚܙܺܝܘ ܒܰܐܪܒܰܥ ܦܶܢ̈ܝܳܢ܆ ܘܰܒܗܽܘܢ ܐܶܬܪܕܶܦ ܚܶܫܽܘܟܳܐ ܕܟܽܠ ܗܶܪ̈ܶܣܺܝܣ܆ ܘܢܶܗܪܰܬ ܐܰܪܥܳܐ ܡܶܢ ܣܳܟܳܗ̇ ܒܙܰܠܺܝܩܰܝ̈ܗܽܘܢ܀

ܫܽܘܒܚܳܐ

ܒܗܳܢܳܐ ܝܰܘܡܳܐ ܓܰܪ̈ܡܰܝܗܽܘܢ ܕܰܐܒܳܗ̈ܳܬܳܐ܆ ܒܓܰܘ ܩܰܒܪ̈ܰܝܗܽܘܢ ܗܳܐ ܙܳܡܪܺܝܢ ܫܽܘܒܚܳܐ ܦܰܐܝܳܐ܆ ܠܗܰܘ ܕܰܡܠܳܐ ܗ̱ܘܳܐ ܪܽܘܚ ܩܽܘܕܫܳܐ ܠܪ̈ܶܥܝܳܢܰܝܗܽܘܢ܆ ܘܰܐܟܪܶܙܘ ܣܒܰܪܬܶܗ ܒܰܒܪܺܝܬܳܐ ܐܰܠܳܗܳܐܺܝܬ܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܨܠܺܝܒܳܐ ܥܒܺܝܕ ܠܶܗ ܠܥܳܠܡܳܐ ܟܽܠܶܗ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ܆ ܕܟܰܠܶܠ ܘܰܐܘܪܶܒ ܕܽܘܟܪ̈ܳܢܰܝܟܽܘܢ.

ܡܳܪܳܐ ܛܳܒܳܐ. ܕܰܗܘܰܘ ܥܰܒ̈ܕܰܘܗ̱ܝ ܛܶܠܳܢܺܝܬܶܗ܆ ܘܰܠܟܽܠ ܐܰܝܟܳܐ ܕܚܳܪ ܪܶܥܝܳܢܶܗ܆ ܬܪܰܨܘ ܐܳܦ ܗܶܢܽܘܢ ܪ̈ܶܥܝܳܢܰܝܗܽܘܢ܆ ܘܰܕܢܰܗܺܝܪ ܗ̱ܘܳܐ܆ ܒܶܗ ܐܶܬܢܰܗܰܪܘ ܓܶܠܝܳܢܰܝ̈ܗܽܘܢ܀

ܫܰܝܶܢ ܡܳܪܰܢ. ܡܰܠ̈ܟܶܐ ܘܟܳܗ̈ܢܶܐ ܒܰܚܕܳܐ ܥܺܕܬܳܐ܆ ܟܳܗ̈ܢܶܐ ܢܨܰܠܽܘܢ ܥܰܠ ܡܰܠ̈ܟܰܝܗܽܘܢ܆ ܘܡܰܠ̈ܟܶܐ ܢܚܽܘܣܽܘܢ ܥܰܠ ܟܰܪ̈ܟܰܝܗܽܘܢ܆ ܫܰܝܢܳܐ ܕܰܠܓܰܘ܆ ܒܳܟ ܢܶܣܓܶܐ ܠܰܢ ܫܠܳܡܳܐ ܕܰܠܒܰܪ܀

ܘܳܝܳܐ ܠܣܰܟ̈ܠܶܐ. ܡܳܐ ܕܚܳܙܶܝܢ ܠܳܗ̇ ܠܗܳܝ ܡܶܫܬܽܘܬܳܐ܆ ܕܰܡܛܰܝܒܳܐ ܠܗܽܘܢ ܠܰܒ̈ܢܰܝ ܢܽܘܗܪܳܐ܆ ܘܝܳܗܒܺܝܢ ܛܽܘܒܳܐ ܠܟܽܠ ܟܰܫܺܝܪ̈ܶܐ܆ ܕܰܫܦܰܪ ܠܰܒܪܳܐ܆ ܒܕܽܘܒܳܪ̈ܰܝܗܽܘܢ ܘܰܒܥܰܡܠܰܝ̈ܗܽܘܢ܀

ܫܰܡܶܫ ܓܙܽܘܪܬܳܐ. ܗܳܝ ܕܰܐܫܠܶܡ ܗ̱ܘܳܐ ܠܥܰܒܕܶܗ ܐܰܒܪܳܡ܆ ܘܒܰܬܡܺܝܢܳܝܳܐ ܩܰܒܶܠ ܥܠܰܘܗ̱ܝ܆ ܕܢܶܬܓܙܰܪ ܓܙܽܘܪܬܳܐ ܐܰܝܟ ܝܺܠܺܝ̈ܕܶܐ܆ ܘܗܰܠܶܟ ܒܽܐܘܪܚܳܐ܆ ܗܳܝ ܕܰܪܫܰܡܘ ܠܶܗ ܢܒܺܝ̈ܶܐ ܕܰܐܒܽܘܗ̱ܝ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܫܽܘܒܚܳܐ ܠܳܟ ܒܽܘܟܪܶܗ ܕܰܐܒܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܗܽܘܢ ܕܡܰܠ̈ܦܰܝ ܩܽܘܫܬܳܐ܆

ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܐܰܪܕܺܟܠܳܐ ܕܗܰܝܡܳܢܽܘܬܳܐ܆ ܩܰܕܺܝܫܳܐ ܒܰܣܶܝܠܺܝܽܘܣ܆ ܢܽܘܗܪܳܐ ܕܬܶܐܽܘܠܽܘܓܺܝܰܐ܆ ܢܰܨܺܝܚܳܐ ܓܪܺܝܓܳܘܪܺܝܽܘܣ܆ ܐܰܝܟ ܠܰܡܦܺܝ̈ܕܶܐ ܢܰܗܺܝܪ̈ܶܐ܆ ܐܰܢܗܰܪܘ ܠܥܺܕܬܳܐ ܒܝܽܘܠܦܳܢܗܽܘܢ܀

ܫܽܘܒܚܳܐ ܠܰܐܒܳܐ ܕܟܰܠܶܠܟܽܘܢ܆ ܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ܆ ܘܠܰܒܪܶܗ ܝܶܫܽܘܥ ܬܰܘܕܺܝܬܳܐ܆ ܘܰܠܪܽܘܚ ܩܽܘܕܫܳܐ ܗܽܘܠܳܠܳܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܗܽܘܢ ܕܡܰܠ̈ܦܰܝ ܩܽܘܫܬܳܐ܆

ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀