ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ
ܫܟܶܒܘ ܟܺܐܢ̈ܶܐ ܒܗܰܝܡܳܢܽܘܬܳܐ

ܒܰܕܡܽܘܬ ܪܳܥܝܳܐ ܕܰܡܦܰܪܶܫ܆ ܥܶܪ̈ܒܶܐ ܕܥܳܢ̈ܶܗ ܘܰܓܕܰܝ̈ܳܐ܆ ܡܦܰܪܶܫ ܡܳܪܰܢ ܒܗܰܘ ܝܰܘܡܳܐ܆ ܛܳܒ̈ܶܐ ܡܶܢ ܒܺܝ̈ܫܶܐ܆ ܡܩܺܝܡ ܛܳܒ̈ܶܐ ܡܶܢ ܝܰܡܺܝܢܳܐ܆ ܘܒܺܝ̈ܫܶܐ ܒܓܰܒܳܐ ܕܣܶܡܳܠܳܐ܆ ܘܳܐܙܺܠ̱ܝܢ ܛܳܒ̈ܶܐ ܠܡܰܠܟܽܘܬܳܐ܆ ܘܒܺܝ̈ܫܶܐ ܠܓܺܗܰܢܳܐ܀

ܫܽܘܒܚܳܐ

ܕܚܺܝܠܽ ܗ̱ܘ ܣܰܓܺܝ ܗܰܘ ܝܰܘܡܳܐ܆ ܕܕܳܢܰܚ ܒܶܗ ܡܰܠܟܳܐ ܡܫܺܝܚܳܐ܆ ܘܳܐܬܶܐ ܠܰܡܕܳܢ ܒܶܪ̈ܝܳܬܳܐ܆ ܒܕܺܝܢܳܐ ܕܟܺܐܢܽܘܬܳܐ܆ ܡܳܐ ܕܝܳܬܶܒ ܥܰܠ ܒܺܝܡ ܕܺܝܠܶܗ܆ ܘܥܳܐܠܺܝܢ ܩܽܘܕܡܰܘܗ̱ܝ ܟܽܠ ܥܰܡ̱̈ܡܺܝܢ܆ ܠܟܽܠ ܐ̱ܢܳܫ ܦܳܪܰܥ ܐܰܝܟ ܥܰܡܠܶܗ܆ ܕܠܳܐ ܡܰܣܰܒ ܒܰܐܦ̈ܶܐ܀

ܡܰܕܪܳܫܳܐ

ܩܳܠܳܐ ܒܩ̄: ܐܳܘ ܬܰܓܳܪ̈ܶܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ ܕܰܡܢܰܚܶܡ ܠܥܰܢܺܝ̈ܕܶܐ܆ ܘܡܰܠܒܶܫ ܫܽܘܒܚܳܐ ܠܦܰܓܪ̈ܶܐ ܕܚܰܒܶܠ ܡܰܘܬܳܐ.

ܐܳܘ ܥܰܢܺܝ̈ܕܶܐ ܩܢܰܘ ܣܰܒܪܳܐ ܒܩܰܒܪ̈ܰܝܟܽܘܢ܆ ܕܗܳܐ ܡܰܛܺܝ ܠܶܗ ܡܢܰܚܡܳܢܳܐ ܕܦܰܓܪ̈ܰܝܟܽܘܢ܆ ܪܰܗܒܽܘܢܳܐ ܕܚܰܝ̈ܶܐ ܩܰܒܶܠܬܽܘܢ. ܒܝܰܕ ܦܰܓܪܶܗ ܘܰܕܡܶܗ ܕܰܡܫܺܝܚܳܐ܆ ܗܽܘ ܡܢܰܚܶܡ ܘܰܡܩܺܝܡ ܠܟܽܘܢ. ܐܰܝܟܰܢܳܐ ܕܶܐܫܬܰܘܕܺܝ܀

ܓܢܶܐ ܒܶܝܬ ܡܺܝ̈ܬܶܐ ܗܰܘ ܚܰܝܳܐ ܕܪ̈ܽܘܚܳܬܳܐ܆ ܘܩܳܡ ܡܶܢ ܩܰܒܪܳܐ ܕܠܳܐ ܚܒܳܠܳܐ ܒܬܶܫܒܽܘܚܬܳܐ܆ ܘܰܫܒܰܩ ܠܰܢ ܣܰܒܪܳܐ ܕܢܽܘܚܳܡܳܐ. ܕܗܳܟܰܢܳܐ ܩܳܝܡܺܝܢ ܥܰܢܺܝ̈ܕܶܐ܆ ܐܶܬܠܰܒܰܒܘ ܡܳܝܽܘ̈ܬܶܐ. ܕܢܽܘܚܳܡܳܐ ܡܠܰܟ ܠܟܽܘܢ܀

ܗܘܳܐ ܬܰܘܬܳܒܳܐ ܥܳܡܽܘܪܳܐ ܕܰܫܡܰܝܳܐ܆ ܒܰܐܪܥܳܐ ܕܠܳܛܳܗ̇ ܡܶܛܽܠ ܓܒܺܝܠ ܩܰܕܡܳܝܳܐ܆ ܘܗܰܠܶܟ ܗ̱ܘܳܐ ܒܥܳܠܡܳܐ ܕܥܳܩܴ̈ܬܳܐ. ܘܒܶܝܬ ܡܺܝ̈ܬܶܐ ܗܘܳܐ ܦܰܓܪܳܢܳܐܺܝܬ܆ ܘܰܐܩܢܺܝ ܗ̱ܘܳܐ ܠܥܰܢܺܝ̈ܕܶܐ܆ ܪܰܗܒܽܘܢܳܐ ܕܢܽܘܚܳܡܳܐ܀

ܙܪܰܥ ܗ̱ܘܳܐ ܣܰܒܪܳܐ ܒܶܝܬ ܡܺܝ̈ܬܶܐ ܡܰܚܶܐ ܟܽܠ܆ ܟܰܕ ܢܚܶܬ ܐܰܓܶܣ ܒܓܰܘ ܩܰܒܪܳܐ ܐܰܝܟ ܡܺܝܬܳܐ܆ ܘܪܰܣ ܠܗܽܘܢ ܛܰܠܳܐ ܕܢܽܘܚܳܡܳܐ܆ ܠܰܫܟܺܝ̈ܒܶܐ ܥܳܡܪ̈ܰܝ ܒܓܰܘ ܩܰܒܪ̈ܶܐ܆ ܕܡܶܬܢܰܚܡܺܝܢ ܕܠܳܐ ܚܒܳܠܳܐ. ܘܠܳܒܫܺܝܢ ܐܶܣܛܰܠ ܫܽܘܒܚܳܐ܀

ܛܽܘܒܳܐ ܕܰܡܠܰܟܬ ܠܡܶܣ̈ܟܺܢܶܐ ܒܰܣܒܰܪܬܳܐ܆ ܕܡܶܣܟܺܢܳܐܺܝܬ ܚܝܰܘ ܒܰܐܬܪܳܐ ܕܰܐܟܣܶܢܝܳܐ܆ ܒܗܰܘ ܛܽܘܒܳܐ ܐܰܫܪܳܐ ܠܥܰܢܺܝ̈ܕܶܐ. ܕܰܥܢܰܕܘ ܗ̱ܘܰܘ ܒܰܐܬܪܳܐ ܕܰܐܟܣܶܢܝܳܐ܆ ܘܥܰܡ ܟܺܐܢ̈ܶܐ ܘܙܰܕܺܝ̈ܩܶܐ. ܢܶܬܒܰܣܡܽܘܢ ܒܰܓܢܽܘܢܳܐ܀

ܟܽܠ ܡܳܪܝ ܕܰܥܢܰܕܘ ܥܰܠ ܣܰܒܪܳܟ ܒܰܐܟܣܶܢܝܳܐ܆ ܒܶܝܬ ܡܰܠܟܽܘܬܳܐ ܢܶܬܒܰܣܡܽܘܢ ܥܰܡ ܟܺܐܢ̈ܶܐ܆ ܘܕܰܝܳܪ̈ܶܐ ܘܝܳܪ̈ܬܶܐ ܢܶܬܚܰܘܘܽܢ. ܒܗܰܘ ܐܰܬܪܳܐ ܕܰܡܠܶܐ ܚܰܕ̈ܘܳܬܳܐ܆ ܘܰܐܝܟ ܛܽܘܒܳܐ ܦܪܽܘܥ ܐܶܢܽܘܢ. ܚܠܳܦ ܕܣܰܝܒܰܪܘ ܛܽܘܪ̈ܳܦܶܐ܀

ܡܳܐ ܕܡܶܬܓܰܠܝܳܐ ܡܰܠܟܽܘܬܳܟ ܒܬܶܫܒܽܘܚܬܳܐ܆ ܘܩܳܪܝܳܐ ܩܰܪܢܳܐ ܘܡܶܬܢܰܚܡܺܝܢ ܥܰܢܺܝ̈ܕܶܐ܆ ܡܳܐ ܕܩܳܪܶܐ ܩܳܠܳܟ ܛܽܘܒܬܳܢܳܐ. ܬܰܘ ܒܪ̈ܺܝܟܰܘܗ̱ܝ ܕܳܐܒܝ ܝܺܪܰܬܘ ܚܰܝ̈ܶܐ܆ ܥܰܡ ܟܺܐܢ̈ܶܐ ܘܙܰܕܺܝ̈ܩܶܐ. ܐܰܫܪܳܐ ܡܳܪܝܳܐ ܠܥܰܒ̈ܕܰܝܟ܀

ܣܰܒܪܳܐ ܛܳܒܳܐ ܕܠܳܐ ܡܰܒܗܶܬ ܠܕܰܡܗܰܝܡܶܢ܆ ܒܰܫܡܶܗ ܚܰܝܳܐ ܘܰܒܦܰܓܪܶܗ ܡܶܬܚܰܣܶܝܢ܆ ܒܳܟ ܣܰܒܰܪܘ ܐܰܒܳܗܰܝ̈ܢ ܘܰܐܚܰܝ̈ܢ܆ ܘܥܰܠ ܣܰܒܪܳܟ ܫܰܠܶܡܘ ܚܰܝܰܝ̈ܗܽܘܢ܆ ܡܳܐ ܕܳܐܬܶܝܬ ܒܬܶܫܒܽܘܚܬܳܐ. ܥܰܡܳܟ ܢܶܚܕܽܘܢ ܒܥܺܐܕܳܟ܀

ܦܰܓܪܳܟ ܚܰܝܳܐ ܡܶܢ ܡܰܕܒܚܳܟ ܡܚܰܣܝܳܢܳܐ܆ ܐܰܝܟ ܪܰܗܒܽܘܢܳܐ ܫܩܰܠܘ ܘܒܰܕܡܳܟ ܐܶܬܚܰܣܺܝܘ܆ ܥܡܰܕܘ ܒܰܫܡܳܟ ܘܰܫܟܶܒܘ ܥܰܠ ܣܰܒܪܳܟ܆ ܘܡܶܢ ܚܰܝ̈ܶܐ ܕܙܰܒܢܳܐ ܕܒܰܪܬ ܐܶܢܽܘܢ܆ ܠܳܐ ܢܶܗܘܽܘܢ ܐܰܟ̈ܣܢܳܝܶܐ. ܠܗܰܘ ܐܰܬܪܳܐ ܕܓܶܐܘ̈ܳܬܳܐ܀

ܩܪܺܝ ܒܝܰܕ ܩܳܠܳܟ ܐܰܠܳܗܳܐ ܡܠܶܐ ܪ̈ܰܚܡܶܐ܆ ܒܝܽܘܡ ܢܽܘܚܳܡܳܐ ܠܟܽܠ ܕܰܥܢܰܕܘ ܒܰܐܟܣܶܢܝܳܐ܆ ܘܰܩܝܳܡܬܳܐ ܡܝܰܬܰܪܬܳܐ ܘܚܰܝ̈ܶܐ. ܘܢܽܘܚܳܡܳܐ ܥܒܶܕ ܠܗܽܘܢ ܥܰܡ ܟܺܐܢ̈ܶܐ܆ ܐܰܝܟܰܢܳܐ ܕܶܐܫܬܰܘܕܺܝ ܗܰܘ ܦܽܘܡܳܟ ܩܰܕܺܝܫܳܐ܀

ܫܽܘܒܚܳܐ ܠܪ̈ܰܚܡܰܝܟ ܐܳܘ ܛܳܒܳܐ ܘܒܰܣܺܝܡܳܐ܆ ܕܰܒܗܽܘܢ ܓܒܰܠܬܳܢ ܡܶܢ ܥܰܦܪܳܐ ܒܫܽܘܪܳܝܳܐ܆ ܘܰܒܗܽܘܢ ܢܚܶܬܬ ܘܰܗܘܰܝܬ ܒܰܪܢܳܫܳܐ܆ ܘܰܦܪܰܩܬ ܠܰܢ ܡܶܢ ܢܺܝܪܶܗ ܕܡܰܘܬܳܐ܆ ܒܪ̈ܰܚܡܰܝܟ ܚܽܘܢ ܠܣܳܓܽܘ̈ܕܰܝܟ܆ ܕܰܐܘܕܺܝܘ ܒܳܟ ܘܗܰܝܡܶܢܘ ܒܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܟܶܢܫܳܐ ܥܶܠܳܝܳܐ

ܥܽܘܢܺܝܬܳܐ: ܡܫܺܝܚܳܐ ܡܠܶܐ ܪ̈ܰܚܡܶܐ܆ ܘܡܳܪܶܗ ܕܦܰܪܕܰܝܣܳܐ ܒܶܗ ܡܳܪܝ ܢܶܬܒܰܣܡܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ.

ܒܦܰܪܕܰܝܣܳܐ ܕܛܽܘ̈ܒܶܐ. ܣܳܡܬܳܢܝ ܕܶܐܥܡܰܪ ܒܶܗ܆ ܘܨܶܐܕܰܘܗ̱ܝ ܕܺܐܝܠܳܢܳܐ ܕܚܰܝ̈ܶܐ ܡܕܰܝܰܪ ܗ̱ܘܺܝܬ܆ ܘܰܚܣܰܡ ܚܰܪܡܳܢܳܐ܆ ܘܣܰܚܦܰܢܝ ܒܓܰܘ ܩܰܒܪܳܐ܆ ܘܡܶܢ ܗܳܝ ܓܰܐܝܽܘܬܳܐ ܕܢܽܘܗܪܳܐ ܗܰܘ ܡܫܰܒܚܳܐ܆ ܒܚܶܫܽܘܟܳܐ ܣܰܚܦܰܢܝ ܒܥܶܠܕܒܳܒܝ܆ ܘܒܰܚܣܳܡܳܐ ܫܰܩܠܳܗ̇ ܠܝܳܪܬܽܘܬܝ܆ ܒܳܥܶܐ ܐ̱ܢܳܐ ܐܰܦܢܳܢܝ ܠܓܰܘ ܥܕܶܢ܀

ܐܰܫܪܶܩ ܒܺܝ ܚܶܘܝܳܐ. ܘܡܶܚܕܳܐ ܢܬܰܪ̈ܝ ܨܽܘܪ̈ܳܬܝ܆ ܘܶܐܬܚܰܒܰܠܘ ܫܽܘܦܪ̈ܰܝ ܗܳܠܶܝܢ ܕܰܐܠܒܶܫܬܳܢܝ܆ ܘܰܗܘܺܝܬ ܠܺܝ ܥܰܦܪܳܐ܆ ܘܽܐܘܟܠܳܐ ܠܬܰܢܺܝܢܳܐ܆ ܕܰܐܛܥܺܝ ܒܺܝ ܘܩܰܛܠܰܢܝ. ܘܰܒܢܶܟܠܶܗ ܫܰܦܠܰܢܝ܆ ܘܗܳܐ ܪܰܒܺܝܥ ܘܒܳܪܶܡ ܒܰܫܝܽܘܠ܆ ܫܰܪ̈ܒܳܬܳܐ ܘܕܳܪ̈ܶܐ ܟܽܠܗܽܘܢ܆ ܒܰܨܠܺܝܒܳܟ ܪܽܘܨܳܝܗܝ ܠܓܳܪܣܳܐ܀

ܣܰܓܺܝ ܕܚܝܺܠ ܡܰܘܬܳܐ. ܕܰܟܡܳܐ ܫܒܳܬ ܩܶܫܬܶܗ܆ ܘܰܟܡܳܐ ܚܪܰܒ ܣܰܝܦܶܗ. ܟܡܳܐ ܐܶܚܰܕ ܥܽܘܡܪܶܗ܆ ܘܰܟܡܳܐ ܡܠܶܝܢ ܓܰܙܰܘ̈ܗܝ܆ ܫܠܰܕ̈ܶܐ ܕܐ̱ܢܳܫܽܘܬܳܐ܆ ܘܰܟܡܳܐ ܥܰܙܺܝ̈ܙܶܐ. ܘܓܰܢ̱ܒܳܪ̈ܶܐ ܡܫܰܡ̈ܗܶܐ܆ ܚܒܺܝܫܺܝܢ ܒܳܐܦܰܕܢܰܘ̈ܗܝ ܒܢܶܩܥܬܳܐ܆ ܘܰܒܓܰܘ ܚܶܫܽܘܟܳܐ ܡܶܬܢܰܘܠܺܝܢ܆ ܩܳܠܳܟ ܡܳܪܝ ܢܰܦܶܩ ܠܟܽܠܗܽܘܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܒܳܐ ܟܬܰܒ ܗ̱ܘܳܐ
ܐܰܢܺܝܚ ܡܳܪܝܳܐ ܠܥܰܢܺܝ̈ܕܶܐ ܒܰܐܘ̈ܳܢܶܐ ܕܺܝܠܳܟ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ ܕܰܒܩܳܠܶܗ܆ ܡܶܬܢܰܚܡܺܝܢ ܥܰܢܺܝ̈ܕܶܐ ܟܽܠܗܽܘܢ.

ܓܠܺܝ ܡܶܢ ܐܰܦܰܝ̈ ܥܰܢܺܝ̈ܕܰܝܢ. ܬܰܚܦܺܝܬܳܐ ܟܡܺܝܪܬܳܐ ܕܡܰܘܬܳܐ܆ ܘܰܒܪ̈ܰܚܡܰܝܟ ܡܳܪܰܢ܆ ܗܰܒ ܠܗܽܘܢ ܕܢܶܫܡܥܽܘܢ܆ ܩ̈ܳܠܶܐ ܗܳܢܽܘܢ ܛܽܘ̈ܒܬܳܢܶܐ܆ ܟܰܕ ܡܥܰܕܥܕܺܝܢ ܘܚܳܕܶܝܢ ܒܳܟ ܡܳܪܝ܀

ܛܰܪ ܒܰܢ ܡܳܪܝܳܐ ܓܽܘܥܠܳܢܳܐ. ܘܪܰܗܒܽܘܢܳܐ ܕܦܰܓܪܳܟ ܘܰܕܡܳܟ܆ ܘܚܰܕܶܬ ܢܰܦ̈ܫܳܬܳܐ. ܘܦܰܓܪ̈ܶܐ ܕܥܰܢܺܝ̈ܕܶܐ܆ ܬܶܒܗܰܬ ܢܽܘܪܳܐ ܡܳܐ ܕܰܡܚܳܗ̇܆ ܡܶܢ ܥܰܒ̈ܕܰܝܟ ܪܺܝܚ ܦܰܓܪܳܟ ܘܰܕܡܳܟ܀

ܒܓܽܘ̈ܕܶܐ ܘܩܰܘ̈ܡܶܐ ܕܩܰܕܺܝ̈ܫܰܝܟ. ܘܰܒܟܶܢ̈ܫܶܐ ܕܟܺܐܢ̈ܶܐ ܘܰܕܟܳܗ̈ܢܶܐ܆ ܚܠܽܘܛ ܡܳܪܝ ܠܥܰܢܺܝ̈ܕܶܐ܆ ܕܶܐܫܬܰܘܬܰܦܘ ܒܦܰܓܪܳܟ܆ ܘܒܰܕܡܳܟ ܚܰܣܳܐ ܚܰܘ̈ܒܰܝܗܽܘܢ܆ ܘܠܳܐ ܬܶܥܽܘܠ ܠܕܺܝܢܳܐ ܥܰܡܗܽܘܢ܀

ܛܰܠܳܐ ܕܪ̈ܰܚܡܶܐ ܘܕܰܚܢܳܢܳܐ. ܪܽܘܣ ܡܳܪܝܳܐ ܠܥܰܢܺܝ̈ܕܶܐ ܡܗܰܝܡ̈ܢܶܐ܆ ܕܠܰܒܫܽܘܟ ܡܶܢ ܡܰܝ̈ܳܐ܆ ܘܫܰܩܠܽܘܟ ܡܶܢ ܡܰܕܒܚܳܐ܆ ܢܽܘܪܳܐ ܠܘܳܬܗܽܘܢ ܠܳܐ ܬܶܩܪܽܘܒ܆ ܕܰܐܘܕܺܝܘ ܒܳܟ ܘܰܫܟܶܒܘ ܥܰܠ ܣܰܒܪܳܟ܀

ܟܽܠܗܽܘܢ ܡܺܝ̈ܬܶܐ ܕܰܒܩܰܒܪ̈ܶܐ. ܕܥܰܠ ܣܰܒܪܳܟ ܡܳܪܰܢ ܐܶܬܬܢܺܝܚܘ܆ ܗܳܐ ܡܣܰܟܶܝܢ ܘܚܳܝܪܺܝܢ܆ ܠܝܰܘܡܳܐ ܕܡܶܐܬܺܝܬܳܟ܆ ܐܰܩܺܝܡ ܐܶܢܽܘܢ ܡܶܢ ܩܰܒܪ̈ܶܐ܆ ܘܠܰܐܦܰܝ̈ܗܽܘܢ ܡܶܢ ܕܰܚܺܝܚܳܐ ܦܶܨ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܳܕܳܡ ܚܛܳܐ ܘܰܩܢܳܐ

ܥܽܘܢܺܝܬܳܐ: ܐܰܚܰܝ̈ ܨܠܰܘ ܐܶܕܢܳܐ ܒܦܽܘܪܫܳܢܳܐ܆ ܘܺܝܠܰܦܘ ܕܥܳܒܰܪ ܠܶܗ ܟܽܠܡܶܕܶܡ.

ܝܰܘܡܶܗ ܕܥܽܘܢܕܳܢܳܐ ܐܶܬܕܰܟܪܶܬ. ܘܕܶܡ̈ܥܰܝ ܫܚܰܠܝ̈ ܘܰܢܚܶܬܝ̈ ܥܰܠ ܦܰܟܰܝ̈܆ ܘܶܐܡܪܶܬ ܕܡܽܘܢ ܐܶܥܒܶܕ ܒܒܶܝܬ ܕܺܝܢܳܐ. ܡܳܐ ܕܡܶܬܓܠܶܐ ܬܳܒܰܥ ܟܰܣ̈ܝܳܬܳܐ܆ ܘܬܳܒܰܥ ܒܶܝܬ ܐܺܝ̈ܕܰܝ ܚܽܘܫܒܳܢܳܐ܀

ܐܳܕܳܡ ܢܦܰܠ ܒܺܐܝ̈ܕܰܝ ܓܰܝܳܣܷ̈ܐ. ܒܺܐܝ̈ܕܰܘܗ̱ܝ ܕܣܳܛܳܢܳܐ ܘܰܕܡܰܘܬܳܐ܆ ܘܫܰܠܰܚܘ ܫܩܰܠܘ ܡܶܢܶܗ ܦܰܐܝܽܘܬܶܗ. ܐܰܕܺܝܩ ܚܙܳܝܗ̱ܝ ܡܳܪܶܗ ܟܶܪܝܰܬ ܠܶܗ܆ ܘܫܰܡܰܪ ܥܨܰܒ ܐܶܢܶܝܢ ܠܡܰܚ̈ܘܳܬܶܗ܀

ܒܗܳܢ ܥܳܠܡܳܐ ܡܶܕܶܡ ܠܳܐ ܦܳܐܶܫ. ܡܽܘܢ ܟܰܝ ܡܫܰܢܶܩ ܠܰܢ ܒܰܚܙܳܬܶܗ܆ ܕܥܽܘܬܪܶܗ ܛܶܠܳܠܰܐ ܗ̱ܘ ܘܡܰܛܥܶܐ ܠܰܢ. ܫܽܘܦܪܶܗ ܐܰܝܟ ܚܶܠܡܰܐ ܗ̱ܘ ܘܫܳܒܶܐ ܠܰܢ܆ ܓܽܘܚܟܳܐ ܕܚܶܠܡܳܐ ܙܟܳܢ ܘܛܶܠܳܠܳܐ܀

ܩܳܠܗܶܝܢ ܕܢܰܦ̈ܫܳܬܳܐ ܡܶܢ ܐܰܘܨܪ̈ܶܐ. ܟܰܕ ܝܳܗ̈ܒܳܢ ܛܽܘܒܳܐ ܠܰܚ̈ܕܳܕܶܐ܆ ܛܽܘܒܶܝܗ̇ ܠܗܳܝ ܕܺܐܝܬ ܠܳܗ̇ ܒܰܒܪܺܝܬܳܐ܆ ܓܶܢܣܳܐ ܕܥܳܒܰܪ ܠܳܗ̇ ܕܽܘܟܪܳܢܳܐ܆ ܕܟܽܠ ܝܽܘܡ ܥܰܠ ܡܰܕܒܚܳܐ ܡܶܬܒܰܣܡܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܐܳܦܪܰܬ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ ܕܰܢܚܶܬ ܠܰܫܝܽܘܠ܆ ܘܰܥܒܰܕ ܣܰܒܪܳܐ ܠܟܽܠܗܽܘܢ ܫܟܺܝ̈ܒܶܐ.

ܐܰܡܠܶܟ ܡܰܘܬܳܐ ܥܰܠ ܫܰܪ̈ܒܳܬܳܐ. ܕܰܥܒܰܪ ܐܳܕܳܡ ܥܰܠ ܦܽܘܩܕܳܢܳܐ܆ ܘܰܐܥܶܠ ܚܰܒܫܶܗ ܒܥܽܘܡܪܳܗ̇ ܕܰܫܝܽܘܠ. ܒܰܐܬܪܳܐ ܕܡܺܝ̈ܬܶܐ ܕܰܡܠܶܐ ܚܶܫܟܳܐ܆ ܓܳܠܘ ܥܠܰܘܗ̱ܝ ܪ̈ܰܚܡܰܘܗ̱ܝ ܕܺܝܚܺܝܕܳܝܳܐ. ܘܰܢܚܶܬ ܣܰܥܪܶܗ ܒܶܝܬ ܥܰܢܺܝ̈ܕܶܐ܆ ܘܬܰܒܰܪ ܬܰܪ̈ܥܰܘܗ̱ܝ܆ ܘܡܽܘ̈ܟܠܰܘܗ̱ܝ ܕܰܐܒܕܳܢܳܐ. ܘܰܐܚܺܝ ܠܡܳܝܽܘ̈ܬܶܐ܀

ܝܰܘܡܰܐ ܗ̱ܘ ܪܰܒܳܐ ܝܰܘܡܶܗ ܕܡܳܪܰܢ. ܡܳܐ ܕܠܰܬܒܰܥܬܳܐ ܕܟܽܠ ܐ̱ܢܳܫ ܐܳܬܶܐ܆ ܘܙܳܝ̈ܥܳܢ ܡܶܢܶܗ ܟܽܠ ܫܰܪ̈ܒܳܬܳܐ. ܡܳܐ ܕܫܳܡ̈ܥܳܢ ܠܶܗ ܠܩܳܠ ܫܺܝܦܽܘܪܳܐ܆ ܡܶܬܬܥܺܝܪܺܝܢ ܕܰܡ̈ܟܶܐ ܕܡܶܢ ܩܕܺܝܡ܆ ܘܰܒܩܳܠܳܐ ܕܩܰܪܢܳܐ ܩܳܝܡܺܝܢ. ܘܚܳܙܶܝܢ ܒܺܝ̈ܫܳܐ܆ ܠܛܳܒ̈ܶܐ ܕܡܶܬܥܰܠܶܝܢ. ܐܳܠܶܝܢ ܠܚܰܝܰܝ̈ܗܽܘܢ܀

ܒܓܰܘܪܳܐ ܣܰܢܝܳܐ ܘܪܶܓܬܳܐ ܫܟܺܝܪܬܳܐ. ܡܶܫܬܰܠܰܚ ܐ̱ܢܳܫ ܡܶܢ ܛܰܝܒܽܘܬܳܐ܆ ܘܗܳܘܝܳܐ ܢܰܦܫܶܗ ܒܰܝܬܳܐ ܕܚܰܪܺܝܒ. ܘܰܣܪܺܝܩ ܘܰܣܦܺܝܩ ܡܶܢ ܪܽܘܚ ܩܽܘܕܫܳܐ܆ ܘܶܐܢ ܠܳܐ ܬܰܫܰܪ ܠܗܳܠܶܝܢ ܕܶܐܡܪܶܬ. ܚܙܺܝ ܠܺܝܣܪܳܐܶܝܠ ܕܰܢܦܰܠ ܒܡܶܕܝܰܢ. ܘܶܐܬܒܰܩܳܐ ܬܽܘܒ܆ ܒܫܶܡܫܽܘܢ ܘܒܰܫܠܶܝܡܽܘܢ. ܬܪ̈ܰܝܗܽܘܢ ܓܳܪܘ ܘܰܢܦܰܠܘ܀

ܗܳܐ ܫܰܪ̈ܒܳܬܳܐ ܕܰܒܢܰܝ̈ܢܳܫܳܐ. ܚܒܺܝ̈ܫܳܢ ܒܰܫܝܽܘܠ ܥܰܠ ܕܰܚܺܝܚܳܐ܆ ܡܚܰܒܠܺܝܢ ܓܰܐܝ̈ܳܐ. ܣܚܺܝܦܺܝܢ ܡܰܠ̈ܟܶܐ܆ ܫܩܺܝܠܺܝܢ ܬܳܓ̈ܶܐ ܕܫܰܠܺܝ̈ܛܳܢܶܐ܆ ܚܽܘܣ ܦܳܪܽܘܩܰܢ ܥܰܠ ܨܰܠܡܳܟ܆ ܘܠܳܐ ܢܰܗܶܠ ܒܶܗ ܡܰܘܬܳܐ ܝܰܥܢܳܐ܆ ܩܪܺܝ ܒܝܰܕ ܩܳܠܳܟ܆ ܚܰܝܳܐ ܘܰܐܩܺܝܡܳܝܗ̱ܝ. ܒܓܰܒܳܟ ܕܝܰܡܺܝܢܳܐ܀

ܬܳܐ ܚܙܺܝ ܠܰܐܕܳܡ ܗܰܘ ܪܺܝܫ ܓܶܢܣܰܢ. ܕܰܥܒܺܝܕ ܥܰܦܪܳܐ ܐܳܦ ܕܰܚܺܝܚܳܐ܆ ܨܰܠܡܳܐ ܪܰܒܳܐ ܕܰܒܪܳܝܗ̱ܝ ܡܳܪܶܗ. ܘܣܳܡܶܗ ܕܢܶܗܘܶܐ ܒܓܰܘ ܦܰܪܕܰܝܣܳܐ܆ ܘܠܰܐܒܪܳܗܳܡ ܘܠܺܐܝܣܚܳܩ ܘܰܠܝܰܥܩܽܘܒ. ܟܺܐܢ̈ܶܐ ܕܰܢܨܰܚܘ ܘܰܫܦܰܪܘ ܠܰܐܠܳܗܳܐ. ܘܰܒܟܺܝ ܠܰܩܢܽܘܡܳܟ܆ ܕܳܘܝܳܐ ܘܚܰܠܳܫܳܐ. ܕܡܶܬܚܰܒܰܠ ܒܰܫܝܽܘܠ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܫܽܘܒܚܳܐ ܠܳܟ ܒܽܘܟܪܶܗ ܕܰܐܒܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܐܰܠܳܗܳܐ ܚܰܣܳܐ ܠܥܰܒܕܰܝ̈ܟ܆

ܘܰܐܩܺܝܡ ܐܶܢܽܘܢ ܦܳܪܽܘܩܰܢ ܡܶܢ ܗܰܘ ܓܰܒܳܐ ܕܝܰܡܺܝܢܳܟ܀

ܡܫܺܝܚܳܐ ܕܰܡܠܰܟ ܢܽܘܚܳܡܳܐ܆ ܘܚܰܝ̈ܶܐ ܚܰܕ̱̈ܬܶܐ ܠܒܶܝܬ ܐܳܕܳܡ܆ ܚܽܘܣ ܥܰܠ ܥܰܒܕܰܝ̈ܟ ܘܰܐܡ̈ܗܳܬܳܟ܆ ܘܣܳܓܽܘܕܰܝ̈ܟ ܕܡܺܝܬܘ ܥܰܠ ܣܰܒܪܳܟ܆ ܘܡܳܐ ܕܳܐܬܶܐ ܐܰܢ̱ܬ ܒܬܶܫܒܽܘܚܬܳܐ܆ ܥܰܡ ܟܺܐܢ̈ܶܐ ܒܰܣܶܡ ܐܶܢܽܘܢ܀

ܚܰܝܠܳܐ ܕܶܐܬܠܰܘܺܝ ܠܝܰܘܣܶܦ܆ ܟܺܐܢܳܐ ܒܰܐܬܪܳܐ ܕܰܐܟܣܶܢܝܳܐ܆ ܢܶܗܘܶܐ ܠܶܘܝܳܐ ܠܥܰܢܺܝ̈ܕܶܐ܆ ܕܡܺܝܬܘ ܥܰܠ ܣܰܒܪܶܗ ܕܰܚܢܳܢܳܟ܆ ܘܡܳܐ ܕܡܶܬܦܰܪܥܺܝܢ ܟܺܐܢܳܐܺܝܬ܆ ܝܰܠ̈ܕܰܘܗ̱ܝ ܕܳܐܕܳܡ ܐܰܝܟ ܕܰܣܥܰܪܘ܆ ܚܽܘܢ ܐܰܠܳܗܳܐ ܒܛܰܝܒܽܘܬܳܟ܆ ܠܰܐܒܳܗܰܝ̈ܢ ܘܠܰܐܚܰܝ̈ܢ ܕܰܥܢܰܕܘ܀

ܡܳܪܰܢ ܐܶܬܪܰܚܰܡ ܥܠܰܝܢ ܐܰܠܳܗܳܐ ܚܰܣܳܐ ܠܥܰܒܕܰܝ̈ܟ܆

ܘܰܐܩܺܝܡ ܐܶܢܽܘܢ ܦܳܪܽܘܩܰܢ ܡܶܢ ܗܰܘ ܓܰܒܳܐ ܕܝܰܡܺܝܢܳܟ܀