ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ ܕܰܢܩܰܕܶܡ

ܒܝܰܘܡܶܗ ܪܰܒܳܐ ܕܢܽܘܚܳܡܳܐ܆ ܩܳܪܶܐ ܘܰܡܩܺܝܡ ܦܳܪܽܘܩܰܢ܆ ܠܟܽܠܗܽܘܢ ܥܰܢܺܝ̈ܕܶܐ ܕܰܫܟܶܒܘ܆ ܒܗܰܝܡܳܢܽܘܬܳܐ ܕܰܫܪܳܪܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܙܘܳܕ̈ܶܐ ܠܽܐܘܪܚܳܐ ܫܩܰܠܘ ܥܰܡܗܽܘܢ܆ ܦܰܓܪܳܟ ܘܰܕܡܳܟ ܪܰܗܒܽܘܢܳܐ܆ ܡܳܐ ܕܳܐܬܶܝܬ ܒܫܽܘܒܚܳܟ ܪܰܒܳܐ܆ ܥܰܡܳܟ ܢܶܥܠܽܘܢ ܠܰܓܢܽܘܢܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܒܗܳܝ ܡܰܠܟܽܘܬܳܐ ܕܠܳܐ ܥܳܒܪܳܐ܆ ܥܰܡ ܩܰܕܺܝ̈ܫܶܐ ܕܰܫܦܰܪܘ ܠܳܟ܆ ܢܶܚܕܽܘܢ ܥܰܒܕܰܝ̈ܟ ܕܰܥܡܰܕܘ ܒܳܟ܆ ܘܰܫܟܶܒܘ ܘܶܐܬܬܢܺܝܚܘ ܥܰܠ ܣܰܒܪܳܟ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܣܳܗ̈ܕܶܐ ܗܘܰܘ ܦܺܝܪ̈ܡܶܐ
(ܣܳܠܶܩ܆ ܒܗܰܒܠܳܗ̇ ܠܥܺܕܬܳܟ)

ܠܳܐ ܡܳܪܝ ܢܶܫܬܰܒܩܽܘܢ܆ ܥܰܒܕܰܝ̈ܟ ܒܰܐܬܪܳܐ ܕܰܐܟܣܶܢܝܳܐ܆ ܕܫܰܢܺܝܘ ܥܰܠ ܣܰܒܪܳܐ ܕܰܫܡܳܟ܆ ܒܦܰܓܪܳܟ ܐܶܫܬܰܘܬܰܦܘ܆ ܘܒܰܕܡܳܟ ܚܰܝܳܐ ܐܶܬܚܰܣܺܝܘ܆ ܘܚܰܝܰܝ̈ܗܽܘܢ ܒܺܐܝܕܰܝ̈ܟ ܐܰܓܥܶܠܘ܆ ܗ̄ ܒܩܳܠܳܟ ܡܳܪܰܢ ܢܶܬܢܰܚܡܽܘܢ܆ ܘܡܶܢ ܝܰܡܺܝܢܳܟ ܢܶܬܛܰܟܣܽܘܢ܀

ܫܽܘܒܚܳܐ

ܐܰܚܰܝ̈ܢ ܘܚܰܒܺܝܒܰܝ̈ܢ܆ ܘܰܐܒܰܗܰܝ̈ܢ ܕܰܐܝܟ ܬܰܘ̈ܬܳܒܶܐ܆ ܡܶܢ ܚܰܝ̈ܶܐ ܦܛܰܪܘ ܒܰܐܟܣܶܢܝܳܐ܆ ܒܰܐܬܪܳܐ ܢܽܘܟܪܳܝܳܐ܆ ܕܠܳܐ ܡܢܰܟܪܰܝ ܠܰܐܠܳܗܽܘܬܳܟ܆ ܦܠܰܚܘ ܘܰܠܐܺܝܘ ܘܰܫܗܰܪܘ ܩܽܘܕܡܰܝܟ܆ ܗ̄ ܚܠܽܘܛ ܐܶܢܽܘܢ ܥܰܡ ܩܰܕܺܝܫܰܝ̈ܟ܆ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܡܰܕܪܳܫܳܐ

ܩܳܠܳܐ ܒܩ̄: ܩܽܘܡ ܦܰܘܠܳܘܣ
ܡܶܢ ܥܳܠܡܳܐ ܡܶܕܶܡ ܠܳܐ ܟܰܢܫܶܬ

ܥܽܘܢܺܝܬܳܐ: ܚܽܘܢ ܡܳܪܝܳܐ ܒܪ̈ܰܚܡܶܐ ܕܛܰܝܒܽܘܬܳܟ܆ ܠܟܽܠ ܕܰܥܢܰܕܘ ܒܰܫܡܳܟ ܒܰܐܟܣܶܢܝܳܐ.

ܒܪܳܐ ܕܶܐܬܳܐ ܠܕܺܝܠܶܗ ܐܰܟܣܢܳܐܺܝܬ܆ ܕܠܰܐܟܣܢܳܝܳܐ ܢܰܦܢܶܐ ܠܝܳܪܬܽܘܬܶܗ܆ ܒܝܰܕ ܪ̈ܰܚܡܶܐ ܫܦܺܝ̈ܥܶܐ ܕܛܰܝܒܽܘܬܳܟ܆ ܢܶܬܚܰܣܽܘܢ ܥܰܒ̈ܕܰܝܟ ܕܰܫܟܶܒܘ ܒܳܟ܆ ܘܰܚܠܳܦ ܛܽܘܪ̈ܳܦܶܐ. ܕܣܰܝܒܰܪܘ ܒܰܐܟܣܶܢܝܳܐ. ܘܕܰܗܘܰܘ ܪ̈ܰܚܺܝܩܶܐ. ܘܢܽܘܟܪ̈ܳܝܶܐ ܠܓܶܢܣܳܐ. ܥܰܡ ܥܺܝܪ̈ܶܐ ܢܶܚܕܽܘܢ ܒܡܰܠܟܽܘܬܳܟ܆ ܒܗܰܘ ܐܰܬܪܳܐ ܕܰܡܠܶܐ ܛܳܒ̈ܳܬܳܐ܀

ܕܰܝܳܢܳܐ ܕܕܳܐܶܢ ܟܺܐܢܳܐܺܝܬ܆ ܘܰܬܪܺܝܨܽ ܗ̱ܘ ܕܺܝܢܳܐ ܕܟܺܐܢܽܘܬܶܗ܆ ܠܳܐ ܬܚܰܝܶܒ ܒܕܺܝܢܳܟ ܥܰܙܺܝܙܳܐ܆ ܠܡܰܢ ܕܰܫܩܰܠ ܦܰܓܪܳܟ ܘܗܰܝܡܶܢ ܒܳܟ܆ ܘܠܳܐ ܢܶܗܘܽܘܢ ܛܪ̈ܺܝܕܶܐ. ܡܶܢܳܗ̇ ܕܡܰܠܟܽܘܬܳܐ. ܕܛܰܝܶܒܬ ܠܩܰܕܺܝ̈ܫܰܝܟ. ܥܰܒ̈ܕܰܝܟ ܕܰܫܟܶܒܘ ܒܳܟ. ܘܰܚܠܳܦ ܗܳܝ ܕܒܰܐܟܣܶܢܝܳܐ ܡܺܝܬܘ ܗ̱ܘܰܘ܆ ܒܒܽܘ̈ܣܳܡܶܝܗ̇ ܕܰܥܕܶܢ ܢܶܬܬܢܺܝܚܽܘܢ܀

ܢܽܘܟܪ̈ܳܝܶܐ ܒܰܐܬܪܳܐ ܕܠܳܐ ܕܺܝܠܗܽܘܢ܆ ܘܬܰܘ̈ܬܳܒܶܐ ܒܥܽܘܡܪܳܐ ܕܰܐܟܣܶܢܝܳܐ܆ ܫܠܶܡ ܙܰܒܢܳܐ ܕܚܰܝ̈ܶܐ ܥܳܒܽܘܪ̈ܶܐ܆ ܫܟܶܒܘ ܒܰܫܝܽܘܠ ܐܶܡܳܐ ܕܣܰܓܺܝ̈ܐܶܐ܆ ܒܩܳܠܳܟ ܢܶܬܢܰܚܡܽܘܢ. ܒܡܶܠܬܳܟ ܢܶܬܬܥܺܝܪܽܘܢ. ܒܪܶܡܙܳܟ ܢܶܬܥܰܛܦܽܘܢ. ܐܶܣܛܰܠ ܬܶܫܒܽܘܚܬܳܐ. ܘܥܰܡ ܟܺܐܢ̈ܶܐ ܒܝܰܘܡܳܐ ܕܢܽܘܚܳܡܳܐ܆ ܢܝܰܒܒܽܘܢ ܠܳܟ ܩܳܠܰܝ̈ ܬܶܫܒܽܘܚܬܳܐ܀

ܥܶܕܝܳܝܳܐ ܛܪܺܝܕܳܐ ܗܘܳܐ ܐܳܕܳܡ܆ ܡܶܢ ܐܰܬܪܳܐ ܕܛܽܘ̈ܒܶܐ ܘܒܽܘ̈ܣܳܡܶܐ܆ ܘܢܽܘܟܪܳܝܳܐ ܗܘܳܐ ܗ̱ܘܳܐ ܠܦܰܪܕܰܝܣܳܐ܆ ܘܰܐܟܣܢܳܝܳܐ ܠܰܥܕܶܢ ܥܰܠ ܕܰܚܛܳܐ܆ ܒܰܐܪܥܳܐ ܕܠܰܘ̈ܛܳܬܳܐ. ܘܒܰܐܬܪܳܐ ܕܥܳܩ̈ܳܬܳܐ. ܟܰܬܰܪ ܗ̱ܘܳܐ ܢܽܘܓܪܳܐ. ܘܰܢܚܶܬܬ ܘܰܦܪܰܩܬܳܝܗ̱ܝ. ܘܰܒܪ̈ܰܚܡܶܐ ܐܶܬܦܢܺܝ ܠܦܰܪܕܰܝܣܳܐ܆ ܠܝܳܪܬܽܘܬܶܗ ܐܰܬܪܶܗ ܩܰܕܡܳܝܳܐ܀

ܬܶܫܒܽܘܚܬܳܐ ܠܪ̈ܰܚܡܶܐ ܕܛܰܝܒܽܘܬܳܟ܆ ܚܰܢܳܢܳܐ ܕܨܳܒܶܐ ܒܚܰܝ̈ܶܐ ܕܟܽܠ܆ ܢܫܰܒ̈ܚܳܢܳܟ ܟܽܠܗܶܝܢ ܪ̈ܽܘܚܳܬܳܐ܆ ܕܡܶܢ ܚܰܝ̈ܶܐ ܫܰܢܺܝ̈ ܒܦܽܘܩܕܳܢܳܟ܆ ܘܕܰܥܢܰܕܘ ܒܰܐܟܣܶܢܝܳܐ. ܚܳܝܪܺܝܢ ܠܢܽܘܚܳܡܳܐ. ܘܰܕܡܺܝܬܘ ܒܰܛܠܽܘܡܝܳܐ. ܡܣܰܟܶܝܢ ܠܰܣܒܰܪܬܳܟ܆ ܬܰܘܕܺܝܬܳܐ ܬܶܣܰܩ ܠܡܳܪܽܘܬܳܟ܆ ܒܟܽܠܥܶܕܳܢ ܡܫܺܝܚܳܐ ܦܳܪܽܘܩܰܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܬܽܘܠܬܳܐ ܒܰܪܬ ܕܰܘܺܝܕ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܒܰܓܢܽܘܢܶܗ܆ ܡܰܦܨܰܚ ܠܰܕܡܺܝܬ ܒܰܐܟܣܶܢܝܳܐ.

ܐܰܒܳܐ ܡܠܶܐ ܪ̈ܰܚܡܶܐ܆ ܕܫܰܕܰܪ ܠܰܒܪܶܗ ܠܦܽܘܪܩܳܢܰܢ܆ ܘܰܠܨܰܠܡܶܗ ܕܳܐܕܳܡ܆ ܚܰܕܶܬ ܕܰܒܠܺܝ ܒܰܚܒܳܠܳܐ܆ ܚܰܕܶܬ ܘܰܐܩܺܝܡ܆ ܒܝܽܘܡ ܢܽܘܚܳܡܳܐ܆ ܠܟܽܠ ܕܰܥܢܰܕܘ ܥܰܠ ܣܰܒܪܳܟ܀

ܓܰܠܘܳܝܳܐ ܗܘܳܐ ܗ̱ܘܳܐ܆ ܐܳܕܳܡ ܠܰܐܬܪܳܐ ܕܓܶܐܘ̈ܳܬܳܐ܆ ܘܒܰܐܪܥܳܐ ܕܠܰܘ̈ܛܳܬܳܐ܆ ܡܶܬܛܰܪܰܦ ܗ̱ܘܳܐ ܒܰܐܟܣܶܢܝܳܐ܆ ܘܢܽܘܓܪܳܐ ܪܰܒܳܐ܆ ܐܶܬܬܰܟܣܰܢ ܗ̱ܘܳܐ܆ ܒܥܽܘܡ̈ܩܶܝܗ̇ ܕܰܐܪܥܳܐ ܘܒܰܚ̈ܠܺܝܠܶܝܗ̇܀

ܗܘܳܐ ܠܶܗ ܢܽܘܟܪܳܝܳܐ܆ ܠܦܰܪܕܰܝܣܳܐ ܕܒܶܗ ܐܶܬܬܣܺܝܡ ܗ̱ܘܳܐ܆ ܘܒܰܐܬܪܳܐ ܕܥܳܩܴ̈ܬܳܐ܆ ܫܠܶܡ ܪܶܗܛܳܐ ܕܝܰܘ̈ܡܳܬܶܗ܆ ܐܰܪܦܺܝ ܠܪܰܘܡܳܐ܆ ܕܰܓܢܽܘܢ ܢܽܘܗܪܳܐ܆ ܘܰܢܚܶܬ ܠܥܽܘܡܩܳܐ ܕܰܚ̈ܛܳܗܶܐ܀

ܙܰܡܶܢ ܠܰܩܢܽܘܡܶܗ܆ ܠܰܘ̈ܛܳܬܳܐ ܚܠܳܦ ܒܽܘܪ̈ܟܳܬܳܐ܆ ܒܫܽܘܪܳܝܳܐ ܩܰܒܶܠ܆ ܒܽܘܪ̈ܟܳܬܳܐ ܒܓܰܘ ܦܰܪܕܰܝܣܳܐ܆ ܘܰܒܫܽܘܠܳܡܳܐ܆ ܕܰܚܛܳܐ ܐܶܬܬܠܺܝܛ܆ ܒܰܐܪܥܳܐ ܕܰܡܠܶܟ ܠܠܰܘ̈ܛܳܬܳܐ܀

ܛܽܘ̈ܒܶܐ ܐܰܪܦܺܝ ܗ̱ܘܳܐ܆ ܕܰܐܬܪܳܐ ܕܥܺܝܪ̈ܶܐ ܡܕܰܝܪܺܝܢ ܒܶܗ܆ ܘܳܝܳܐ ܝܺܪܶܬ ܗ̱ܘܳܐ܆ ܒܰܐܪܥܳܐ ܕܟܽܘ̈ܒܶܐ ܡܰܘܥܺܝܬܳܗ̇܆ ܚܠܳܦ ܚܰܒܪܽܘܬܳܐ܆ ܕܰܫ̈ܡܰܝܳܢܶܐ܆ ܗ̱ܘܳܐ ܬܰܘܬܳܒܳܐ ܒܰܐܟܣܶܢܝܳܐ܀

ܟܽܘ̈ܒܶܐ ܝܺܪܶܬ ܗ̱ܘܳܐ܆ ܚܠܳܦ ܗܳܝ ܓܰܢܬܳܐ ܕܒܽܘ̈ܣܳܡܶܐ܆ ܘܰܚܠܳܦ ܦܰܪܕܰܝܣܳܐ܆ ܥܡܰܪ ܗ̱ܘܳܐ ܒܰܐܪܥܳܐ ܕܠܳܐ ܕܺܝܠܶܗ܆ ܒܓܰܢܬܳܐ ܣܳܡܶܗ܆ ܡܳܪܳܗ̇ ܕܓܰܢܬܳܐ܆ ܘܰܐܟܣܢܳܝܳܐ ܗܘܳܐ ܒܚܺܐܪܽܘܬܶܗ܀

ܡܳܪܳܐ ܕܰܫܡܰܝܳܐ܆ ܕܰܝܰܪ ܒܰܐܪܥܳܐ ܕܠܰܘ̈ܛܳܬܳܐ܆ ܘܩܰܒܶܠ ܥܠܰܘܗ̱ܝ ܕܰܢܡܽܘܬ܆ ܒܦܰܓܪܳܐ ܕܰܢܣܰܒ ܡܶܢ ܡܰܪܝܰܡ܆ ܠܳܐ ܡܳܝܽܘܬܳܐ܆ ܕܡܺܝܬ ܥܰܠ ܐܰܦܰܝ̈ܢ܆ ܒܳܟ ܢܺܚܶܐ ܓܶܢܣܶܗ ܕܳܐܕܳܡ܀

ܣܰܒܪܳܐ ܕܥܰܢܺܝ̈ܕܶܐ܆ ܘܡܳܪܳܐ ܕܚܰܝ̈ܶܐ ܘܰܕܡܺܝ̈ܬܶܐ܆ ܚܰܣܳܐ ܠܥܰܢܺܝ̈ܕܶܐ܆ ܕܒܰܐܟܣܶܢܝܳܐ ܫܠܶܡܘ ܚܰܝܰܝ̈ܗܽܘܢ܆ ܘܰܚܠܳܦ ܕܰܥܢܰܕܘ܆ ܟܰܕ ܪܰܚܺܝܩܺܝܢ܆ ܩܰܪ̈ܺܝܒܶܐ ܢܶܗܘܽܘܢ ܠܰܥܕܶܢ܀

ܦܰܓܪܳܟ ܩܰܕܺܝܫܳܐ܆ ܪܰܗܒܽܘܢܳܐ ܕܚܰܝ̈ܶܐ ܩܰܒܶܠܘ܆ ܘܰܕܡܳܟ ܝܰܩܺܝܪܳܐ܆ ܡܙܺܝܓ ܘܰܛܡܺܝܪ ܒܗܰܕܳܡܰܝ̈ܗܽܘܢ܆ ܒܩܳܠܳܟ ܚܰܝܳܐ܆ ܩܪܺܝ ܘܢܶܬܢܰܚܡܽܘܢ܆ ܡܶܢ ܩܰܒܪ̈ܶܐ ܠܒܶܝܬ ܡܰܠܟܽܘܬܳܐ܀

ܩܳܠܳܟ ܡܰܚܝܳܢܳܐ܆ ܡܰܚܶܐ ܡܺܝ̈ܬܶܐ ܒܢܽܘܚܳܡܳܐ܆ ܘܗܽܘ ܢܶܩܪܶܐ ܐܶܢܽܘܢ܆ ܠܟܽܠܡܰܢ ܕܰܫܟܶܒ ܥܰܠ ܣܰܒܪܳܟ܆ ܘܡܶܢ ܕܰܚܺܝܚܳܐ܆ ܢܢܰܦܶܨ ܐܶܢܽܘܢ܆ ܘܥܰܡ ܩܰܕܺܝ̈ܫܶܐ ܢܶܬܒܰܣܡܽܘܢ܀

ܫܽܘܒܚܳܐ ܠܛܰܝܒܽܘܬܳܟ܆ ܐܶܡܳܐ ܕܟܽܠܗܽܘܢ ܐܰܟ̈ܣܢܳܝܶܐ܆ ܕܗܺܝ ܥܰܦܝܰܬ ܩܶܒܪܰܬ܆ ܠܰܐܝܠܶܝܢ ܕܰܥܢܰܕܘ ܒܰܐܟܣܶܢܝܳܐ܆ ܗܺܝ ܗܘܳܬ ܐܶܡܳܐ܆ ܘܰܐܚܳܐ ܘܓܶܢܣܳܐ܆ ܘܰܚܠܳܦ ܪ̈ܳܚܡܶܐ ܘܚܰܒܺܝ̈ܒܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܨܠܺܝܒܳܐ ܥܒܺܝܕ ܠܶܗ ܠܥܳܠܡܳܐ

ܥܽܘܢܺܝܬܳܐ: ܠܳܟ ܬܶܫܒܽܘܚܬܳܐ܆ ܡܢܰܚܶܡ ܡܺܝ̈ܬܶܐ ܡܶܢ ܩܰܒܪ̈ܰܝܗܽܘܢ.

ܚܽܘܬ ܒܰܪ ܚܰܝܳܐ. ܨܶܝܕ ܥܰܢܺܝ̈ܕܶܐ ܕܗܳܐ ܡܣܰܟܶܝܢ ܠܳܟ܆ ܕܰܚܕܳܐ ܙܒܰܢ̱ܬܳܐ ܢܚܶܬܬ ܨܶܐܕܰܝܗܽܘܢ܆ ܘܰܕܢܰܚ ܢܽܘܗܪܳܟ ܥܰܠ ܓܰܪ̈ܡܰܝܗܽܘܢ܆ ܒܗܳܕܶܐ ܕܬܰܪܬܶܝܢ܆ ܢܰܚܶܡ ܐܶܢܽܘܢ ܡܶܢ ܩܰܒܪ̈ܰܝܗܽܘܢ܀

ܢܰܦܶܨ ܐܶܢܽܘܢ. ܡܶܢ ܕܰܚܺܝܚܳܐ ܠܫܽܘܦܪ̈ܰܘܗ̱ܝ ܕܳܐܕܳܡ܆ ܘܰܒܢܽܘܚܳܡܳܐ ܚܰܕܶܬ ܐܶܢܽܘܢ܆ ܘܰܐܩܺܝܡ ܐܶܢܽܘܢ ܥܰܠ ܬܶܫܒܽܘܚܬܳܟ܆ ܘܒܳܟ ܢܶܬܢܰܚܡܽܘܢ܆ ܓܽܘ̈ܫܡܶܐ ܕܰܒܠܺܝܘ ܒܶܝܬ ܐܰܒܕܳܢܳܐ܀

ܦܽܘܩ ܥܰܬܺܝܪܳܐ. ܡܶܢ ܒܺܝܪ̈ܳܬܳܟ ܫܰܦܺܝܪ̈ܳܬܳܐ܆ ܘܙܶܠ ܨܶܝܕ ܩܰܒܪܳܐ ܘܰܚܙܺܝ ܬܰܡܳܢ܆ ܘܰܠܥܰܬܺܝܪ̈ܶܐ ܘܰܠܡܶܣ̈ܟܺܢܶܐ܆ ܘܰܐܝܠܶܠ ܘܰܒܟܺܝ܆ ܥܰܠ ܪܳܡܽܘܬܳܟ ܕܠܰܐܝܟܳܐ ܫܶܪܟܰܬ܀

ܡܶܢ ܪܺܝܫ ܓܶܢܣܰܢ܆ ܫܰܪܺܝ ܡܰܘܬܳܐ ܕܢܶܪܥܶܐ ܠܥܳܠܡܳܐ܆ ܘܰܡܬܰܚ ܘܶܐܬܳܐ ܥܰܠ ܟܽܠ ܕܳܪ̈ܺܝܢ܆ ܓܰܢ̱ܒܳܪ ܚܰܝܠܳܐ ܫܰܦܶܠ ܚܰܝܠܶܗ܆ ܕܗܳܐ ܡܶܫܬܰܥܠܶܐ܆ ܥܰܠ ܒܶܪ̈ܝܳܬܳܐ ܢܓܰܡܰܪ ܐܶܢܶܝܢ܀

ܫܡܰܥ ܡܳܪܝ ܩܳܠܶܗ܆ ܕܨܰܠܡܳܟ ܕܰܚܒܺܝܫ ܒܚܶܙܶܝ̈ܗ̇ ܕܰܫܝܽܘܠ܆ ܬܶܟܪܶܐ ܠܳܟ ܡܳܪܝ ܥܰܠ ܚܶܢ̈ܓܳܬܶܗ܆ ܕܡܶܢ ܓܰܘ ܥܰܦܪܳܐ ܒܚܰܫܳܐ ܡܒܰܓܶܢ܆ ܘܰܐܝܟ ܛܰܒܺܝܥܳܐ܆ ܠܳܟ ܡܶܬܟܰܫܰܦ ܐܰܢ̱ܬ ܡܳܪܝ ܕܰܠܳܝܗ̱ܝ܀

ܐ̱ܚܪܺܢܳܐ

ܩܳܠܳܐ ܒܩ̄: ܦܰܪܕܰܝܣܳܐ
ܒܝܰܘܡܳܐ ܕܶܐܬܝܰܠܕܶܬ ܫܶܡܫܳܐ ܡܰܪܩܶܕ

ܥܽܘܢܺܝܬܳܐ: ܚܰܕܶܬ ܡܠܶܐ ܪ̈ܰܚܡܶܐ ܒܪܺܝܬܳܟ ܒܢܽܘܚܳܡܳܐ܆ ܠܥܰܒ̈ܕܰܝܟ ܘܣܳܓܽܘ̈ܕܰܝܟ ܕܰܫܟܶܒܘ ܥܰܠ ܣܰܒܪܳܟ.

ܠܩܰܒܪܳܐ ܢܚܶܬ ܡܰܠܟܳܐ ܕܢܶܦܪܽܘܩ ܠܥܰܢܺܝ̈ܕܶܐ. ܘܒܺܝܫܳܐ ܣܒܰܪ ܕܰܩܛܰܪ ܬܳܓܳܐ ܥܰܠ ܟܽܠ ܐ̱ܢܳܫ܆ ܘܡܶܢܫܶܠܝ ܗܘܳܐ ܩܳܠܳܐ ܘܰܫܝܽܘܠ ܐܶܬܬܙܺܝܥܰܬ܆ ܘܰܢܦܰܩܘ ܥܰܢܺܝ̈ܕܶܐ ܒܫܽܘ݉ܒܚܳܐ܆ ܘܰܙܡܰܪܘ ܩܺܝ̈ܢܳܬܳܐ ܠܡܰܠܟܳܐ ܫܡܰܝܳܢܳܐ܆ ܕܰܥܒܰܕ ܠܶܗ ܣܰܒܪܳܐ ܠܳܐܕܳܡ ܕܶܐܬܚܰܒܰܠ܀

ܐܳܘ ܠܟܽܘܢ ܒܢܰܝ̈ ܐܰܪܥܳܐ ܪ̈ܳܚܡܰܝ ܣܪ̈ܺܝܩܳܬܳܐ. ܒܡܳܢܳܐ ܚܬܺܝܪܺܝܢ ܐ̱ܢ̱ܬܽܘܢ ܒܥܶܣܒܳܐ ܡܬܺܝܠܺܝܢ ܐ̱ܢ̱ܬܽܘܢ܆ ܘܰܐܝܟ ܐܳܪ̈ܚܶܐ ܠܩܰܒܪ̈ܶܐ ܙܡܺܝ̈ܢܶܐ ܥܒܺܝܕܺܝܢ ܐ̱ܢ̱ܬܽܘܢ܆ ܦܰܚܶܡܘ ܩܢܽܘܡܰܝ̈ܟܽܘܢ ܘܰܚ݉ܙܰܘ܆ ܫܰܒܥܺܝܢ ܫܢܺܝ̈ܢ ܐܶܢܶܝܢ ܕܕܰܘܺܝܕ ܟܬܰܒ ܘܶܐܡܰܪ܆ ܒܫܽܘܪܳܝܗܶܝܢ ܥܰܡܠܳܐ ܒܫܽܘܠܳܡܗܶܝܢ ܩܰܒܪܳܐ܀

ܬܰܘ ܥܽܘܠܘ ܚܙܰܘ ܬܶܠ̱̈ܠܶܐ ܕܦܰܓܪ̈ܶܐ ܕܶܐܬܚܰܒܰܠܘ. ܕܰܣܪܺܝ ܟܫܳܐ ܡܰܘܬܳܐ ܒܗܳܡܳܢ ܕܥܰܢܺܝ̈ܕܶܐ܆ ܕܰܫܕܶܝܢ ܫܪ̈ܰܕܽܘܕܶܐ ܘܰܪܡܶܝܢ ܠܣܽܘܪܳܕܳܐ܆ ܘܡܰܩܢܳܐ ܒܗܽܘܢ ܣܳܣܳܐ ܘܪܶܡ݉ܬܳܐ܆ ܘܒܳܣܪܺܝܢ ܠܡܰܢ ܕܰܚܬܺܝܪ ܘܒܳܣܶܝܢ ܒܡܰܢ ܕܰܛܥܳܐ܆ ܒܳܬܰܪ ܣܪ̈ܺܝܩܳܬܳܐ ܕܥܳܠܡܳܐ ܥܳܒܽܘܪܳܐ܀

ܡܺܝ̈ܬܶܐ ܕܰܒܩܰܒܪ̈ܶܐ ܚܳܝܪܺܝܢ ܠܝܽܘܡ ܕܶܢܚܳܟ܆ ܡܰܠܟܳܐ ܫܡܰܝܳܢܳܐ ܕܬܺܐܬܶܐ ܒܬܶܫܒܽܘܚܬܳܐ܆ ܘܰܡܣܰܟܶܝܢ ܕܠܶܐܡܰܬܝ ܕܳܢܰܚ ܗܰܘ ܝܰܘܡܳܐ܆ ܕܒܶܗ ܢܳܚܶܬ ܩܳܠܳܟ ܠܓܰܘ ܫܝܽܘ݉ܠ܆ ܘܚܳܪܒܳܐ ܐܳܦ ܨܳܕܝܳܐ ܘܡܶܣܬܰܚܦܺܝܢ ܫܽܘܪ̈ܶܝܗ̇܆ ܘܡܶܬܢܰܚܡܺܝܢ ܡܶܢܳܗ̇ ܟܽܠܗܽܘܢ ܥܰܢܺܝ̈ܕܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܘܕܰܘ ܥܰܡ̱̈ܡܶܐ

ܥܽܘܢܺܝܬܳܐ: ܒܪܺܝܟ ܕܰܒܩܳܠܶܗ ܡܚܰܕܶܬ܆ ܠܦܰܓܪ̈ܶܐ ܕܚܰܒܶܠ ܡܰܘܬܳܐ.

ܐܶܡܰܬܝ ܕܙܳܥܩܳܐ ܩܰܪܢܳܐ܆ ܘܡܰܪܥܶܠ ܙܰܘܥܳܐ ܠܰܫܟܺܝ̈ܒܶܐ܆ ܡܳܐ ܕܡܶܨܛܰܪܶܝܢ ܩܰܒܪ̈ܶܐ܆ ܘܩܳܝܡܺܝܢ ܡܺܝ̈ܬܶܐ ܒܫܽܘܒܚܳܐ܆ ܚܰܕܶܬ ܡܳܪܝ ܓܽܘ̈ܫܡܶܐ ܕܰܒܠܺܝܘ܆ ܘܰܥܬܶܩܘ ܒܰܐܬܪܳܐ ܕܰܐܒܕܳܢܳܐ܆ ܒܪܺܝܟ ܕܰܒܩܳܠܶܗ ܡܥܺܝܪ ܠܰܢ܀

ܢܶܒܥܳܐ ܕܚܰܝ̈ܶܐ ܕܰܢܚܶܬ܆ ܠܗܰܘܬܳܐ ܒܳܠܥܰܬ ܡܺܝ̈ܬܶܐ܆ ܘܒܶܗ ܐܶܬܚܰܕܺܝܘ ܫܟܺܝ̈ܒܶܐ܆ ܐܰܝܟ ܥܶܩܳܪ̈ܶܐ ܒܢܺܝܣܳܢ܆ ܠܩܳܠܳܟ ܢܶܫܡܥܽܘܢ ܕܰܡ̈ܟܶܐ܆ ܘܡܶܢܫܶܠܝ ܠܽܐܘܪܥܳܟ ܢܶܬܚܰܛܦܽܘܢ܆ ܒܪܺܝܟ ܕܰܡܚܰܕܶܬ ܓܒܺܝܠܬܶܗ܀

ܣܰܓܺܝ ܐܰܡܪܰܚ ܡܰܘܬܳܐ܆ ܥܰܠ ܓܶܢܣܳܐ ܕܥܰܦܪ̈ܳܢܶܐ܆ ܐܰܥܶܠ ܘܰܚܒܰܫ ܒܩܰܒܪ̈ܶܐ܆ ܥܰܡ̱̈ܡܶܐ ܘܛܽܘܗ̈ܡܶܐ ܘܫܰܪ̈ܒܳܬܳܐ܆ ܛܰܠܳܐ ܕܪ̈ܰܚܡܶܐ ܪܰܣܶܣ ܡܳܪܝ܆ ܒܰܐܦܰܝ̈ܗܽܘܢ ܘܢܰܚܶܡ ܐܶܢܽܘܢ܆ ܒܪܺܝܟ ܕܠܰܐܒܺܝ̈ܕܶܐ ܡܒܰܝܰܐ܀

ܐܰܚܰܝ̈ܢ ܕܰܦܪܰܫܘ ܡܶܢܰܢ܆ ܒܗܰܝܡܳܢܽܘܬܳܐ ܬܪܺܝܨܬܳܐ܆ ܢܝܰܩܰܪ ܟܽܠܰܢ ܥܽܘܗܕܳܢܗܽܘܢ܆ ܘܢܶܒܥܶܐ ܘܰܢܦܺܝܣ ܚܠܳܦܰܝܗܽܘܢ܆ ܕܢܶܬܡܰܢܥܽܘܢ ܠܰܐܬܪܳܐ ܕܚܰܝ̈ܶܐ܆ ܘܢܶܫܡܥܽܘܢ ܠܩܳܠܳܐ ܕܳܐܡܰܪ ܠܗܽܘܢ܆ ܬܰܘ ܥܽܘܠܘ ܝܺܪܰܬܘ ܡܰܠܟܽܘܬܳܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܠܥܰܒܕܰܝ̈ܟ ܐܰܢܺܝܚ ܒܰܝܢܳܬ ܟܺܐܢ̈ܶܐ ܒܪܳܐ ܕܰܐܠܳܗܳܐ܆

ܒܗܳܝ ܡܰܠܟܽܘܬܳܐ ܕܠܳܐ ܡܶܫܬܰܪܝܳܐ ܥܰܡ ܩܰܕܺܝܫܰܝ̈ܟ܀

ܚܠܳܦ ܕܶܐܬܥܰܦܺܝܘ ܡܶܢ ܢܽܘܟܪ̈ܳܝܶܐ ܐܰܝܟ ܬܰܘܬܳܒ̈ܶܐ܆ ܥܰܡ ܐܰܒܪܳܗܳܡ ܘܺܐܝܣܚܳܩ ܘܝܰܥܩܽܘܒ ܢܕܰܝܪܽܘܢ ܬܰܡܳܢ܆ ܚܠܳܦ ܕܶܐܬܪܰܓܪܰܓܘ ܕܢܶܚܙܽܘܢ ܠܰܐܒܳܐ ܘܠܶܐܡܳܐ ܘܠܰܐܚ̈ܶܐ܆ ܢܶܚܙܽܘܢ ܬܰܡܳܢ ܓܽܘܕܳܐ ܕܟܺܐܢ̈ܶܐ ܘܥܰܡܗܽܘܢ ܢܝܰܒܒܽܘܢ܀

ܫܽܘܒܚܳܐ ܠܰܐܒܳܐ ܕܰܡܠܰܟ ܛܽܘ̈ܒܶܐ ܠܰܕܗܰܝܡܶܢܘ ܒܶܗ܆ ܘܣܶܓܕܬܳܐ ܠܰܒܪܳܐ ܕܝܰܗ̱ܒ ܡܰܠܟܽܘܬܳܐ ܠܟܽܠ ܕܰܐܘܕܺܝ ܒܶܗ܆ ܬܰܘܕܺܝ ܠܪܽܘܚܳܐ ܕܰܒܢܽܘܚܳܡܳܐ ܡܩܺܝܡ ܠܰܩܒܺܝܪ̈ܶܐ܆ ܘܰܡܚܰܕܶܬ ܠܗܽܘܢ ܘܰܡܚܰܕܶܐ ܠܗܽܘܢ ܒܶܝܬ ܡܰܠܟܽܘܬܳܐ܀

ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ ܡܶܢ ܩܰܒܪ̈ܰܝܗܽܘܢ܆

ܘܡܰܠܒܶܫ ܠܗܽܘܢ ܐܶܣܛܰܠ ܫܽܘܒܚܳܐ ܒܝܽܘܡ ܢܽܘܚܳܡܳܐ܀

ܐ̱ܚܪܺܢܳܐ

ܠܳܐ ܡܳܪܝ ܢܶܫܡܰܥ ܠܗܳܝ ܒܰܪ̱ܬ ܩܳܠܳܐ ܕܰܦܣܳܩ ܣܰܒܪܳܐ܆

ܕܰܐܘܕܺܝܢܰܢ ܒܳܟ ܡܳܪܝ ܐܰܘܕܳܐ ܒܰܢ ܘܪܰܚܶܡ ܥܠܰܝܢ܀