ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܬܪ̈ܰܝܗܽܘܢ ܥܳܠ̈ܡܶܐ ܕܺܝܠܳܟ
(ܣܳܠܶܩ܆ ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ ܕܠܳܐ ܡܶܨ̈ܥܳܝܳܬܳܐ)

ܒܗܳܢܳܐ ܝܰܘܡܳܐ ܐܶܬܚܰܙܝܰܬ܆ ܬܠܺܝܬܳܝܽܘܬܳܐ ܥܰܠ ܢܰܗܪܳܐ܆ ܘܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܐܶܬܡܰܟܪܰܬ ܠܺܝܚܺܝܕܳܝܳܐ܀

ܫܽܘܒܚܳܐ

ܪܥܶܡ ܐܰܒܳܐ ܡܶܢ ܡܶܕܝܳܪ̈ܰܘܗ̱ܝ܆ ܩܳܠܳܐ ܕܫܽܘܒܚܳܐ ܘܰܕܚܰܝܠܳܐ܆ ܕܗܳܢܳܐ ܐܺܝܬܰܘܗ̱ܝ ܒܶܪܝ ܚܰܒܺܝܒܝ܆ ܕܶܐܬܓܰܫܰܡ ܘܰܗܘܳܐ ܐ̱ܢܳܫܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܐܰܒܳܐ ܟܬܰܒ ܗ̱ܘܳܐ
ܐܰܝܢܳܐ ܕܪܳܚܶܡ ܝܽܘܠܦܳܢܳܐ ܣܰܓܺܝ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ ܕܒܰܥܡܳܕܶܗ܆ ܢܗܰܪ̈ܝ ܣܰܘ̈ܦܶܐ ܘܦܶܢ̈ܝܳܬܳܐ ܟܽܠܗܶܝܢ.

ܚܙܳܬܶܗ ܥܺܕܬܳܐ ܠܝܽܘܚܰܢܳܢ܆ ܒܓܰܘ ܚܽܘܪܒܳܐ ܕܺܝܗܽܘܕ ܟܰܕ ܡܰܟܪܶܙ܆ ܪܶܗܛܰܬ ܣܶܓܕܰܬ ܠܶܗ܆ ܕܣܶܒܪܰܬ ܠܳܗ̇ ܕܚܰܬܢܰܐ ܗ̱ܘ܆ ܩܥܳܐ ܝܽܘܚܰܢܳܢ ܘܶܐܡܰܪ ܠܳܗ̇܆ ܕܗܳܐ ܒܳܬܰܪܝ ܐܳܬܶܐ ܘܦܳܪܶܩ ܠܶܟܝ܀

ܐܶܢܳܐ ܥܰܒܕܳܐ ܘܗܽܘ ܡܳܪܳܐ܆ ܘܰܣܢܺܝܩ ܐ̱ܢܳܐ ܕܡܶܢܶܗ ܐܶܬܥܡܶܕ܆ ܐܶܢܳܐ ܒܝܰܕ ܡܰܝ̈ܳܐ܆ ܡܰܥܡܶܕ ܐ̱ܢܳܐ ܒܰܠܚܽܘܕ܆ ܗܽܘ ܕܶܝܢ ܐܺܝܬܰܘܗ̱ܝ ܐܰܠܳܗܳܐ܆ ܘܡܰܥܡܶܕ ܒܪܽܘܚ ܩܽܘܕܫܳܐ ܘܰܒܢܽܘܪܳܐ܀

ܒܫܽܘ̈ܒܚܰܘܗ̱ܝ ܕܚܰܬܢܳܐ ܕܣܰܓܺܝܐܺܝܢ܆ ܘܡܶܢ ܛܽܘ̈ܒܰܘܗ̱ܝ ܛܳܒ̈ܶܐ ܕܫܰܦܺܝܪܺܝܢ܆ ܟܪܺܝܗܳܐ ܗ̱ܘܳܬ ܕܬܶܚܙܶܝܘܗ̱ܝ܆ ܥܰܠ ܝܽܘܪܕܢܳܢ ܩܳܡܰܬ܆ ܘܰܟܣܶܐ ܚܰܬܢܳܐ ܘܠܳܐ ܝܺܕܺܝܥ܆ ܘܝܽܘܚܰܢܳܢ ܫܰܘܫܒܺܝܢܶܗ ܠܰܒܒܳܗ̇܀

ܟܰܠܬܳܗ̇ ܚܙܳܬܶܗ ܠܰܡܟܺܝܪܳܗ̇܆ ܥܰܠ ܝܽܘܪܕܢܳܢ ܘܒܶܪܟܰܬ ܣܶܓܕܰܬ ܠܶܗ܆ ܕܝܶܠܦܰܬ ܡܰܢ ܐܺܝܬܰܘܗ̱ܝ܆ ܕܰܐܣܗܶܕ ܥܰܠ ܝܰܠܕܶܗ܆ ܒܪܽܘܚܳܐ ܕܢܶܚܬܰܬ ܥܰܠ ܪܺܝܫܶܗ܆ ܘܰܒܟܽܠܗܶܝܢ ܕܚܰܬܢܰܐ ܗ̱ܘ ܗܰܝܡܢܰܬ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܐ ܩܛܺܝܠܽ ܗ̱ܘ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܐܘܠܶܕ ܠܰܢ ܪܽܘܚܳܢܳܐܺܝܬ܆ ܡܶܢ ܡܰܝ̈ܳܐ ܕܟܰܝ̈ܳܐ ܕܡܰܥܡܽܘܕܺܝܬܳܐ.

ܐܶܙܡܰܪ ܒܰܚܠܽܘܠܳܐ ܕܒܰܪ̱ܬ ܢܰܗܺܝܪ̈ܶܐ܆ ܬܶܫܒܽܘܚܬܳܐ ܚܕܰܬܳܐ ܒܩܳܠܰܝ̈ ܫܽܘܒܚܳܐ܆ ܕܗܳܐ ܢܶܚܬܰܬ ܕܬܶܠܒܰܫ ܡܶܢ ܓܰܘ ܡܰܝ̈ܳܐ܆ ܘܬܰܦܪܶܓ ܒܰܚܠܽܘܠܶܗ ܕܒܰܪ ܐܰܠܳܗܳܐ܀

ܓܢܽܘܢܳܐ ܒܓܰܘ ܡܰܝ̈ܳܐ ܩܛܰܪ ܠܳܗ̇ ܚܰܬܢܳܐ܆ ܘܢܶܚܬܰܬ ܙܳܢܺܝܬܳܐ ܠܡܶܬܩܰܕܳܫܽܘ܆ ܘܰܒܬܽܘܠܬܳܐ ܕܟܺܝܬܳܐ ܘܰܕܠܳܐ ܡܽܘܡܳܐ܆ ܣܶܠܩܰܬ ܡܶܢ ܡܰܝ̈ܳܐ ܒܫܽܘܒܚܳܐ ܪܰܒܳܐ܀

ܘܰܥܕܳܐ ܠܒܶܝܬ ܐܰܒܳܐ ܝܰܗ̱ܒ ܠܳܗ̇ ܚܰܬܢܳܐ܆ ܕܬܶܬܒܰܣܰܡ ܬܰܡܳܢ ܥܰܡ ܩܰܕܺܝܫܰܘ̈ܗ̱ܝ܆ ܕܡܳܐ ܕܰܣܚܳܬ ܘܣܶܠܩܰܬ ܬܺܐܪܰܬ ܚܰܝ̈ܶܐ܆ ܘܣܺܝ̈ܡܳܬܳܐ ܘܓ̈ܰܙܶܐ ܕܠܳܐ ܡܶܬܕܰܪܟܺܝܢ܀

ܛܰܗܶܡ ܠܶܗ ܓܶܢܣܰܢ ܝܺܚܺܝܕܳܝܳܐ܆ ܠܰܒܫܰܢ ܘܰܠܒܶܫܢܳܝܗ̱ܝ ܕܢܶܬܡܰܙܰܓ ܒܶܗ܆ ܗܘܳܐ ܗ̱ܘܳܐ ܒܰܪܢܳܫܳܐ ܡܶܢ ܒܰܪܬ ܐ̱ܢܳܫ̈ܳܐ܆ ܘܥܰܒܕܰܢ ܐܰܠܳܗ̈ܶܐ ܒܡܰܥܡܽܘܕܺܝܬܳܐ܀

ܝܰܘܡܳܢ ܡܰܒܽܘ̈ܥܶܐ ܘܢܰܗܪ̈ܰܘܳܬܳܐ܆ ܚܳܕܶܝܢ ܘܰܦܨܺܝܚܺܝܢ ܕܶܐܬܩܰܕܰܫܘ ܗ̱ܘܰܘ܆ ܝܰܘܡܳܢ ܐܶܬܦܬܰܚ ܠܰܢ ܬܰܪܥܳܐ ܪܰܒܳܐ܆ ܕܗܳܝ ܓܰܢܬܳܐ ܕܰܫܒܰܩ ܐܰܒܽܘܢ ܐܳܕܳܡ܀

ܒܗܳܢܳܐ ܥܰܕܥܺܐܕܳܐ ܐܶܬܚܰܣܺܝܢܰܢ܆ ܒܝܰܕ ܡܰܝ̈ܳܐ ܕܟܰܝ̈ܳܐ ܕܡܰܥܡܽܘܕܺܝܬܳܐ܆ ܒܗܳܢܳܐ ܥܰܕܥܺܐܕܳܐ ܪܰܒܳܐ ܕܢܽܘܗܪ̈ܶܐ܆ ܬܰܘ ܢܶܫܗܰܪ ܠܰܒܪܳܐ ܩܰܕܺܝܫܳܐܺܝܬ܀

ܚܽܘܬܝ ܘܰܣܚܳܝ ܘܰܥܡܰܕܝ ܐܳܦ ܐܶܬܩܰܕܰܫܝ܆ ܐܳܡܰܪ ܗ̱ܘܳܐ ܠܟܰܠܬܳܐ ܗܰܘ ܠܶܘܳܝܳܐ܆ ܘܰܙܡܰܪܝ ܬܶܫܒܽܘܚܬܳܐ ܠܺܝܚܺܝܕܳܝܳܐ܆ ܘܠܰܐܒܽܘܗ̱ܝ ܘܰܠܪܽܘܚܶܗ ܦܰܪܰܩܠܺܝܛܳܐ܀

ܬܪܶܥܣܰܪ ܨܰܝ̈ܳܕܶܐ ܨܳܕ ܩܰܕܺܝܫܳܐ܆ ܘܰܗܦܰܟ ܨܳܕ ܗ̱ܘܳܐ ܒܗܽܘܢ ܒܪܺܝܬܳܐ ܟܽܠܳܗ̇܆ ܢܰܗܪܳܐ ܗܰܘ ܕܡܶܢܶܗ ܢܦܰܩ ܨܰܝܳܕܳܐ܆ ܒܶܗ ܗܽܘ ܥܡܰܕ ܘܰܣܠܶܩ ܨܳܐܶܕ ܟܽܠܳܐ܀

ܡܶܢ ܣܶܛܪܶܗ ܕܳܐܕܳܡ ܚܰܘܳܐ ܢܶܦܩܰܬ܆ ܘܶܐܬܩܰܪܝܰܬ ܐܶܡܳܐ ܕܟܽܠ ܒܶܪ̈ܝܳܬܳܐ܆ ܡܶܢ ܣܶܛܪܶܗ ܕܰܒܪܳܐ ܡܰܥܡܽܘܕܺܝܬܳܐ܆ ܗܘܳܬ ܐܶܡܳܐ ܕܚܰܝ̈ܶܐ ܠܥܳܠܡܳܐ ܟܽܠܶܗ܀

ܐ̱ܫܛܳܪܳܐ ܗܰܘ ܪܰܒܳܐ ܕܟܶܬܒܰܬ ܚܰܘܳܐ܆ ܕܰܢܗܰܡ ܥܰܠ ܕܳܪ̈ܶܐ ܘܰܐܙܺܝܥ ܐܶܢܽܘܢ܆ ܐ̱ܬܳܐ ܡܫܺܝܚܳܐ ܦܰܪܥܶܗ ܒܡܰܥܡܽܘܕܺܝܬܳܐ܆ ܘܶܐܬܚܰܪܰܪ ܓܶܢܣܰܢ ܡܶܢ ܬܰܒ̈ܥܳܬܳܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܚܰܛܦܰܢܝ ܪܰܡܫܳܐ ܘܰܒܡܰܛܰܪܬܶܗ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܪܡܰܙ ܠܰܚܕܽܘ̈ܓܶܐ ܘܝܰܗ̱ܒܘ ܠܶܗ ܐܰܬܪܳܐ ܒܰܝܢܳܬ ܟܶܢ̈ܫܶܐ܆ ܕܢܶܬܚܰܘܶܐ ܗ̱ܘܳܐ ܚܰܬܢܳܐ ܒܫܽܘܦܪܶܗ ܠܟܽܠܗܽܘܢ ܥܰܡ̱̈ܡܶܐ܆ ܥܪܰܩܘ ܗ̱ܘܰܘ ܟܶܢ̈ܫܶܐ ܕܰܟܪܺܝܟܺܝܢ ܠܳܗ̇ ܠܡܰܥܡܽܘܕܺܝܬܳܐ܆ ܘܩܳܡ ܒܰܠܚܽܘܕܰܘܗ̱ܝ ܒܰܪ ܡܰܠܟܽܘܬܳܐ ܝܺܚܺܝܕܳܐܺܝܬ܀

ܪܗܶܛ ܫܰܪܺܝܪܳܐ ܣܰܒܪܳܗ̇ ܠܚܺܐܪܬܳܐ ܥܰܠ ܦܳܪܽܘܩܳܐ܆ ܩܪܳܐ ܠܰܟܢܺܝܟܬܳܐ ܕܰܢܚܰܘܶܐ ܠܳܗ̇ ܕܗܳܢܰܘ ܡܳܪܶܟܝ܆ ܠܗܳܢܳܐ ܚܰܬܢܳܐ ܡܟܰܪܬܶܟܝ ܥܺܕܬܳܐ ܡܶܢ ܫܽܘܪܳܝܳܐ܆ ܒܣܶܛܪܶܗ ܕܗܳܢܳܐ ܡܰܘܬܶܒ ܗ̱ܘܺܝܬ ܠܶܟܝ ܡܶܢ ܟܰܕ ܐܶܬܺܝܬ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀