ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܐܶܬܬܥܺܝܪܘ ܘܩܽܘܡܘ

ܝܰܘܡܳܢܳܐ ܐܶܬܳܐ܆ ܡܳܪܰܢ ܠܓܰܘ ܝܽܘܪܕܢܳܢ ܢܰܗܪܳܐ܆ ܕܢܶܥܡܰܕ ܐܰܝܟ ܣܢܺܝܩܳܐ܆ ܡܶܛܽܠ ܦܽܘܪܩܳܢܰܢ܀

ܝܰܘܡܳܢܳܐ ܦܳܪܽܘܩܰܢ܆ ܐܶܡܰܪ ܠܶܗ ܠܝܽܘܚܰܢܳܢ܆ ܕܰܩܪܽܘܒ ܐܰܥܡܶܕܰܝܢܝ܆ ܕܶܐܓܡܽܘܪ ܟܺܐܢܽܘܬܳܐ܀

ܦܳܪܽܘܩܰܢ ܢܚܶܬ܆ ܘܰܥܡܰܕ ܒܓܰܘ ܝܽܘܪܕܢܳܢ ܢܰܗܪܳܐ܆ ܘܰܐܒܳܐ ܕܩܳܥܶܐ ܕܗܳܐ ܗܳܢܰܘ܆ ܒܪܳܐ ܕܺܝܠܝ ܚܰܒܺܝܒܳܐ܀

ܝܰܘܡܳܢܳܐ ܢܚܶܬ܆ ܪܽܘܚ ܩܽܘܕܫܳܐ ܥܰܠ ܪܺܝܫܶܗ ܕܰܒܪܳܐ܆ ܘܚܰܘܝܶܗ ܗ̱ܘܳܐ ܠܟܶܢ̈ܫܶܐ܆ ܕܗܳܢܰܘ ܒܰܪ ܡܰܠܟܳܐ܀

ܫܽܘܒܚܳܐ

ܫܽܘܒܚܳܐ ܠܶܗ ܠܺܝܚܺܝܕܳܐ܆ ܕܰܥܡܰܕ ܒܓܰܘ ܝܽܘܪܕܢܳܢ ܢܰܗܪܳܐ܆ ܘܠܰܐܒܽܘܗ̱ܝ ܘܰܠܪܽܘܚܶܗ܆ ܣܶܓܕܬܳܐ ܘܪܽܘܡܪܳܡܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܠܡܰܪܝܰܡ ܝܳܠܕܰܬ ܐܰܠܳܗܳܐ
ܣܳܡ ܒܰܢ ܝܶܫܽܘܥ ܒܰܪ ܡܰܠܟܳܐ

ܒܕܶܚܠܳܐ ܪܰܒܳܐ ܘܒܰܪܬܺܝܬܳܐ ܩܳܡ ܝܽܘܚܰܢܳܢ܆ ܟܰܕ ܒܓܰܘ ܢܰܗܪܳܐ ܡܰܥܡܶܕ ܠܶܗ ܠܦܳܪܽܘܩܶܗ ܕܥܳܠܡܳܐ܆ ܩܳܝܡܺܝܢ ܟܶܢ̈ܫܶܐ ܘܠܳܐ ܝܳܕܥܺܝܢ ܕܰܐܝܢܰܘ ܚܰܬܢܳܐ܆ ܥܕܰܡܳܐ ܕܶܐܬܳܐ ܝܽܘܚܰܢܳܢ ܘܰܒܨܶܒܥܳܐ ܚܰܘܝܶܗ܀

ܫܽܘܒܚܳܐ

ܚܠܺܝܛܺܝܢ ܟܶܢ̈ܫܶܐ ܥܰܠ ܢܰܗܪܳܐ ܚܰܕ ܥܰܡ ܚܰܒܪܶܗ܆ ܕܡܰܠܰܐܟ̈ܶܐ ܘܰܒܢܰܝ̈ܢܳܫܳܐ ܟܰܕ ܩܳܥܶܝܢ ܘܳܐܡܪܺܝܢ܆ ܚܙܰܐܽܘܟ ܡܰܝ̈ܳܐ ܐܰܠܳܗܳܐ ܚܙܰܐܽܘܟ ܘܰܕܚܶܠܘ܆ ܕܩܰܕܶܫܬ ܐܶܢܽܘܢ ܒܰܥܡܳܕܳܟ ܕܰܢܚܰܣܽܘܢ ܚܰܘ̈ܒܶܐ܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܘܳܝܠܺܝ ܕܰܗܘܺܝܬ܆ ܒܰܝܢܳܬ ܟܺܐܢ̈ܶܐ

ܥܽܘܢܺܝܬܳܐ: ܠܳܟ ܬܶܫܒܽܘܚܬܳܐ܆ ܒܝܰܘܡܳܐ ܕܕܶܢܚܳܟ ܡܶܢ ܡܰܪܥܺܝܬܳܟ.

ܡܰܢܽܘ ܣܳܦܶܩ. ܕܰܢܣܰܝܶܟ ܠܳܟ ܓܰܙܳܐ܆ ܕܐ̱ܪ̈ܳܙܶܐ܆ ܕܒܳܟ ܐܶܬܒܰܕܰܪܘ ܠܟܽܠ ܐܰܬܪ̈ܰܘܳܢ܆ ܘܒܳܟ ܐܶܬܟܰܢܰܫܘ ܡܶܢ ܟܽܠ ܦܶܢ̈ܝܳܢ܆ ܒܳܟ ܐܶܬܒܰܕܰܪܘ܆ ܘܒܳܟ ܐܶܬܟܰܢܰܫܘ܆ ܠܳܟ ܬܶܫܒܽܘܚܬܳܐ܀

ܩܥܳܐ ܝܽܘܚܰܢܳܢ. ܠܥܺܕܰܬ ܩܽܘܕܫܳܐ܆ ܟܰܕ ܐܳܡܰܪ ܠܳܗ̇܆ ܕܗܳܢܰܘ ܓܰܒܪܳܐ ܕܰܫܡܶܗ ܕܶܢܚܳܐ܆ ܕܰܕܢܰܚ ܘܶܐܬܳܐ ܡܶܢ ܨܶܝܕ ܐܰܒܳܐ܆ ܘܕܰܟܝܶܗ ܠܥܳܠܡܳܐ܆ ܡܶܢ ܙܰܗܡܽܘܬܳܐ܆ ܕܰܦܬܰܟܪܽܘܬܳܐ܀

ܚܳܒ ܚܶܫܽܘܟܳܐ. ܕܰܢܒܰܕܶܩ ܗ̱ܘܳܐ ܕܚܳܒ܆ ܣܳܛܳܢܳܐ܆ ܘܰܙܟܳܐ ܢܽܘܗܪܳܐ ܕܰܢܝܰܒܶܒ ܗ̱ܘܳܐ܆ ܕܰܢܨܰܚ ܒܽܘܟܪܳܐ ܚܳܒ ܠܶܗ ܚܶܫܟܳܐ܆ ܥܰܡ ܚܶܫܽܘܟܳܐ. ܘܰܙܟܳܐ ܢܽܘܗܪܳܐ܆ ܥܰܡ ܢܰܗܺܝܪܳܐ܀

ܗܰܘ ܥܶܠܳܝܳܐ. ܚܰܘܺܝ ܟܝܳܢܶܗ܆ ܕܡܶܢ ܪܰܒܽܘܬܰܐ ܗ̱ܘ܆ ܐܳܦ ܬܰܚܬܳܝܳܐ ܚܰܘܺܝ ܦܰܓܪܶܗ܆ ܕܡܶܢ ܐ̱ܢܳܫܽܘܬܰܐ ܗ̱ܘ ܬܶܗܪܳܐ ܪܰܒܳܐ܆ ܕܰܐܠܳܗܽܘܬܶܗ. ܐܳܦ ܐ̱ܢܳܫܽܘܬܶܗ܆ ܒܗܽܘܢ ܐܶܬܟܰܪܙܰܬ܀

ܫܡܰܝ̈ܳܐ ܦܬܺܝܚܺܝܢ. ܘܰܐܪܥܳܐ ܦܨܺܝܚܳܐ܆ ܘܝܰܡܳܐ ܘܰܫܒܺܝܚ܆ ܩܳܠܶܗ ܕܰܐܒܳܐ ܛܳܒ ܡܶܢ ܪܰܥܡܳܐ܆ ܕܬܳܟܶܒ ܘܳܐܡܰܪ ܕܗܳܢܰܘ ܚܰܒܺܝܒܝ. ܥܺܝܪ̈ܶܐ ܣܰܒܰܪܘ܆ ܟܶܢ̈ܫܶܐ ܝܰܒܶܒܘ܆ ܒܽܐܘ̈ܫܰܥܢܰܝܗܽܘܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܕܳܠܰܬ ܪܽܘܚܳܐ

ܥܽܘܢܺܝܬܳܐ: ܒܪܺܝܟ ܕܰܥܡܰܕ ܕܰܠܟܽܘܢ ܢܰܥܡܶܕ܆ ܕܬܶܬܚܰܣܽܘܢ ܡܶܢ ܚܰܘ̈ܒܰܝܟܽܘܢ.

ܕܳܨܰܬ ܥܳܢ̈ܶܗ ܕܰܡܫܺܝܚܳܐ܆ ܘܰܟܪܰܟܬܳܗ̇ ܠܡܰܥܡܽܘܕܺܝܬܳܐ܆ ܒܡܰܝ̈ܳܐ ܠܶܒܫܰܬ ܕܶܡ̈ܘܳܬܳܐ܆ ܕܰܨܠܺܝܒܳܐ ܚܰܝܳܐ ܘܦܰܐܝܳܐ܆ ܕܒܶܗ ܚܳܝܪܳܐ ܟܽܠܳܗ̇ ܒܪܺܝܬܳܐ܆ ܘܶܐܬܛܰܒܥܰܬ ܟܽܠܳܗ̇ ܒܟܽܠܳܗ̇܀

ܡܶܢ ܓܰܒܪ̈ܶܐ ܓܒܳܐ ܠܶܗ ܓܶܕܥܽܘܢ܆ ܓܰܒܪ̈ܶܐ ܕܰܙܟܰܘ ܒܰܩܪܳܒܳܐ܆ ܢܚܶܬܬܽܘܢ ܕܶܝܢ ܠܡܰܝ̈ܳܐ ܕܟܰܝ̈ܳܐ܆ ܣܰܩܘ ܐܶܬܢܰܨܰܚܘ ܒܰܐܓܽܘܢܳܐ܆ ܣܰܒܘ ܡܶܢ ܡܰܝ̈ܳܐ ܚܽܘܣܳܝܳܐ܆ ܘܡܶܢ ܐܰܓܽܘܢܳܐ ܟܽܘܠܳܠܳܐ܀

ܒܡܰܥܡܽܘܕܺܝܬܳܐ ܕܫܺܝܠܽܘܚܳܐ܆ ܐܰܫܺܝܓ ܣܰܡܝܳܐ ܘܶܐܬܦ̈ܬܰܚܝ ܗ̱ܘܰܝ̈܆ ܒܳܒ̈ܳܬܶܗ ܘܡܶܢ ܡܰܝ̈ܳܐ ܢܗܰܪ̈ܝ܆ ܫܠܰܚ̈ܝ ܚܶܫܽܘܟܳܐ ܕܰܥܠܰܝܗܶܝܢ܆ ܚܶܫܽܘܟܳܐ ܟܰܣܝܳܐ ܫܠܰܚܬܽܘܢ܆ ܘܡܶܢ ܡܰܝ̈ܳܐ ܢܽܘܗܪܳܐ ܠܒܶܫܬܽܘܢ܀

ܥܰܠ ܒܺܐܪܳܐ ܩܰܒܠܰܬ ܪܰܦܩܳܐ܆ ܒܺܐܝ̈ܕܶܝܗ̇ ܘܒܶܐܕܢܶܝ̈ܗ̇ ܚܶܫ̈ܠܳܬܳܐ܆ ܡܟܺܝܪܬܶܗ ܕܰܡܫܺܝܚܳܐ ܠܶܒܫܰܬ܆ ܣܺܝ̈ܡܳܬܳܐ ܡܶܢ ܓܰܘ ܡܰܝ̈ܳܐ܆ ܥܰܠ ܐܺܝ̈ܕܶܝܗ̇ ܦܰܓܪܳܐ ܚܰܝܳܐ܆ ܘܰܒܓܰܘ ܐܶܕܢܶܝ̈ܗ̇ ܡܽܘܠܟܳܢܳܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܝܽܘܠܦܳܢܳܐ ܣܰܘܩܳܐ ܕܐ̱ܢܳܫ̈ܳܐ ܘܡܰܪܕܽܘܬܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܕܳܨܰܬ ܠܳܗ̇ ܥܳܢ̈ܳܐ ܕܰܚܙܳܬ܆ ܕܩܶܪܒܰܬ ܐܺܝܕܳܐ ܠܡܰܥܡܳܕܽܘ܆ ܩܰܕܰܘ ܥܶܪ̈ܒܶܐ ܪ̈ܽܘܫܡܰܝܟܽܘܢ܆ ܥܽܘܠܘ ܘܶܐܬܚܰܠܰܛܘ ܒܰܓܙܳܪܳܐ܆ ܛܳܒ ܡܶܢ ܕܰܒܟܽܠܳܗ̇ ܥܳܢ̈ܳܐ܆ ܗܳܐ ܚܳܕܶܝܢ ܥܺܝܪ̈ܶܐ ܒܪܰܘܡܳܐ܀

ܡܶܢ ܟܽܠ ܦܽܘܡܺܝ̈ܢ ܫܰܘܝܳܐܺܝܬ܆ ܕܥܶܠܳܝ̈ܶܐ ܘܰܕܬܰܚ̈ܬܳܝܶܐ܆ ܥܺܝܪ̈ܶܐ ܟܪ̈ܽܘܒܶܐ ܘܰܣܪ̈ܳܦܶܐ܆ ܥܡܺܝ̈ܕܶܐ ܪ̈ܫܺܝܡܶܐ ܘܫܳܡܽܘ̈ܥܶܐ܆ ܢܺܐܡܰܪ ܟܽܠܰܢ ܒܰܩܥܳܬܳܐ܆ ܫܽܘܒܚܳܐ ܠܳܟ ܡܳܪܶܐ ܥܺܐܕܺܝ̈ܢ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀