ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ
ܡܶܢ ܗܳܢ ܥܳܠܡܳܐ ܥܳܒܽܘܪܳܐ

ܗܳܐ ܚܳܕܶܝܢ ܥܰܡ̱̈ܡܶܐ ܒܕܶܢܚܳܟ܆ ܘܪܳܘܙܳܐ ܥܺܕܬܳܐ ܥܰܡ ܝܰܠ̈ܕܶܝܗ̇܆ ܕܪܰܗܒܽܘܢܳܐ ܩܰܒܶܠܘ ܡܶܢܳܟ ܦܳܪܽܘܩܰܢ܆ ܘܗܳܐ ܙܳܡܪܺܝܢ ܫܽܘܒܚܳܐ ܟܽܠܝܽܘܡ܆ ܠܗܰܘ ܕܰܐܥܬܰܪ ܟܶܢܳܪ̈ܰܝܗܽܘܢ܆ ܫܽܘܒܚܳܐ ܠܶܗ ܕܰܒܝܽܘܡ ܕܶܢܚܶܗ. ܦܰܪܩܰܢ ܡܶܢ ܛܽܘܥܝܰܝ܀

ܫܽܘܒܚܳܐ

ܙܡܰܪܘ ܫܽܘܒܚܳܐ ܫܡܰܝܳܐ ܘܰܐܪܥܳܐ܆ ܠܗܰܘ ܡܰܠܟܳܐ ܕܰܫܪܶܐ ܒܪܰܘܡܳܐ܆ ܕܡܰܟܶܟ ܢܰܦܫܶܗ ܘܶܐܬܬܰܚܬܺܝ. ܡܶܛܽܠ ܦܽܘܪܩܳܢܰܢ܆ ܘܰܐܥܡܕܰܢ ܒܢܽܘܪܳܐ ܘܰܒܡܰܝ̈ܳܐ܆ ܘܚܰܕܬܶܗ ܠܦܰܓܪܰܢ ܡܳܝܽܘܬܳܐ܆ ܘܥܰܒܕܰܢ ܝܳܪ̈ܬܶܐ ܒܡܰܠܟܽܘܬܶܗ܆ ܫܽܘܒܚܳܐ ܠܛܰܝܒܽܘܬܶܗ܀

ܡܰܕܪܳܫܳܐ

ܩܳܠܳܐ ܒܩ̄: ܚܽܘܬܘ ܐܰܚܰܝ̈ ܪ̈ܫܺܝܡܶܐ

ܥܽܘܢܺܝܬܳܐ: ܒܪܺܝܟ ܡܳܪܳܐ ܕܰܥܡܰܕ܆ ܒܝܽܘܪܕܢܳܢ ܡܶܢ ܥܰܒܕܶܗ.

ܚܽܘܬܘ ܐܰܚܰܝ̈ ܪ̈ܫܺܝܡܶܐ. ܠܒܽܘܫܽܘܢܳܝܗ̱ܝ ܠܡܳܪܰܢ܆ ܘܶܐܬܚܰܠܰܛܘ ܒܛܽܘܗܡܶܗ. ܕܒܰܪ ܛܽܘܗܡܰܐ ܗ̱ܘ ܪܰܒܳܐ܆ ܐܰܝܟ ܕܶܐܡܰܪ ܒܡܰܬܠܶܗ܀

ܬܶܣܓܽܘܕ ܠܳܟ ܥܺܕܬܳܐ. ܥܰܡ ܟܽܠܗܽܘܢ ܝܰܠ̈ܕܶܝܗ̇܆ ܝܶܫܽܘܥ ܦܳܪܽܘܩܰܢ. ܕܒܰܥܡܳܕܳܟ ܦܪܰܩܬܳܗ̇܆ ܡܶܢ ܐܺܝ̈ܕܰܝ ܒܺܝܫܳܐ܀

ܥܰܒܕܳܐ ܕܶܝܢ ܕܠܰܒܫܶܗ. ܠܦܳܪܶܩ ܟܽܠ ܒܡܰܝ̈ܳܐ܆ ܐܶܢ ܥܰܒܕܰܐ ܗ̱ܘ ܒܰܐܪܥܳܐ. ܒܰܪ ܚܺܐܪ̈ܶܐ ܗ̱ܘ ܒܪܰܘܡܳܐ܆ ܕܚܺܐܪܽܘܬܳܐ ܡܥܰܛܰܦ܀

ܐܶܡܪ̈ܶܐ ܪ̈ܽܘܚܳܢܶܐ. ܒܢܰܝ̈ ܥܺܕܬܳܐ ܓܒܺܝܬܳܐ܆ ܕܪܰܒܝܰܬ ܪܽܘܚ ܩܽܘܕܫܳܐ. ܥܰܠ ܡܰܝ̈ܳܐ ܒܪ̈ܺܝܟܶܐ܆ ܐܶܙܕܗܰܪܘ ܡܶܢ ܒܺܝܫܳܐ܀

ܓܢܽܘܢܳܐ ܕܠܳܐ ܥܳܒܰܪ. ܘܛܽܘܒܳܐ ܕܠܳܐ ܦܳܛܰܪ܆ ܫܩܰܠܬܽܘܢ ܡܶܢ ܡܰܝ̈ܳܐ. ܒܢܰܝ̈ܳܐ ܪ̈ܽܘܚܳܢܶܐ܆ ܒܗܳܢ ܥܳܠܡܳܐ ܘܰܒܗܰܘ܀

ܒܢܽܘܪܳܐ ܘܰܒܡܰܝ̈ܳܐ: ܘܰܒܪܽܘܚܳܐ ܥܡܰܕܬܽܘܢ: ܘܰܟܠܺܝ̈ܠܶܐ ܕܫܽܘܒܚܳܐ ܒܪ̈ܺܝܫܰܝܟܽܘܢ ܣܺܝܡܺܝܢ: ܒܪܺܝܟܽ ܗ̱ܘ ܕܗܰܕܰܪܟܽܘܢ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܢܦܰܩܘ ܡܶܢ ܝܺܗܽܘܕ ܒܢܰܝ̈ ܝܺܣܪܳܐܶܝܠ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܚܰܘܺܝ ܗ̱ܘܳܐ ܠܳܗ̇ ܠܒܽܘ̈ܫܶܐ ܬܡܺܝ̈ܗܶܐ ܕܠܳܐ ܚܙܶܝܢ ܗ̱ܘܰܘ ܠܳܗ̇܆ ܕܰܒܗܰܘ ܢܰܘܠܳܐ ܕܒܰܪ ܐܰܠܳܗܳܐ ܐܶܬܥܰܬܰܕܘ ܗ̱ܘܰܘ܆ ܫܒܳܗ̇ ܒܰܣܘܳܕܶܗ ܫܰܓܽܘܫܬܳܢܳܐ ܛܰܢܳܢ ܩܽܘܫܬܳܐ܆ ܟܰܕ ܡܰܟܪܶܙ ܠܳܗ̇ ܠܒܰܪ̱ܬ ܚܳܕܽܘܪ̈ܶܐ ܡܰܠܟܽܘܬ ܪܰܘܡܳܐ܀

ܚܙܳܐ ܝܽܘܚܰܢܳܢ ܠܢܰܗܪܳܐ ܕܪܳܬܰܚ ܘܗܳܦܟܺܝܢ ܫܶܦܥܰܘ̈ܗ̱ܝ܆ ܘܺܝܕܰܥ ܗ̱ܘܳܐ ܠܶܗ ܕܗܰܘ ܩܰܕܺܝܫܳܐ ܐ̱ܬܳܐ ܠܰܥܡܳܕܳܐ܆ ܩܦܰܣ ܗ̱ܘܳܐ ܐܺܝܕܶܗ ܕܠܳܐ ܢܰܥܡܶܕ ܗ̱ܘܳܐ ܠܰܐܝܠܶܝܢ ܕܳܐܬܶܝܢ܆ ܕܢܶܬܓܠܶܐ ܘܰܢܩܽܘܡ ܚܰܬܢܳܐ ܡܫܺܝܚܳܐ ܗܽܘ ܒܰܠܚܽܘܕܰܘܗ̱ܝ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀