ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܥܰܠ ܡܳܢܳܐ ܪܳܚܡܰܬܝ ܫܶܢܬܳܐ

ܒܠܺܠܝܳܐ ܢܶܬܬܥܺܝܪ ܡܶܢ ܫܶܢܬܳܐ܆ ܘܢܶܙܡܰܪ ܫܽܘܒܚܳܐ ܘܬܰܘܕܺܝܬܳܐ܆ ܠܗܰܘ ܕܰܫܡܰܝܳܐ ܙܥܽܘܪܺܝܢ ܠܶܗ܆ ܘܶܐܬܳܐ ܕܢܶܥܡܰܕ ܡܶܢ ܥܰܒܕܶܗ܆ ܒܪܺܝܟܽ ܗ̱ܘ ܕܩܰܕܫܰܢ ܒܰܥܡܳܕܶܗ܆ ܡܳܪܶܐ ܟܽܠ ܫܽܘܒܚܳܐ ܠܳܟ܀

ܐ̱ܪܳܙܳܐ ܟܰܣܝܳܐ ܚܙܳܐ ܓܰܒܝܳܐ܆ ܝܽܘܚܰܢܳܢ ܒܪܶܗ ܕܰܙܟܰܪܝܳܐ܆ ܒܪܳܐ ܕܥܳܡܶܕ ܘܰܐܒܳܐ ܕܩܳܥܶܐ܆ ܘܪܽܘܚܳܐ ܕܩܽܘܕܫܳܐ ܕܰܡܪܰܚܶܦ܆ ܬܠܺܝܬܳܝܽܘܬܳܐ ܡܫܰܒܰܚܬܳܐ܆ ܡܳܪܶܐ ܟܽܠ ܫܽܘܒܚܳܐ ܠܳܟ܀

ܫܽܘܒܚܳܐ

ܢܶܬܬܥܺܝܪ ܐܰܚܰܝ̈ ܡܶܢ ܫܶܢܬܳܐ܆ ܘܢܶܙܡܰܪ ܫܽܘܒܚܳܐ ܠܡܳܪܶܐ ܟܽܠ܆ ܘܥܰܡ ܡܰܠܰܐܟ̈ܶܐ ܢܶܩܥܶܐ ܠܶܗ܆ ܫܽܘܒܚܳܐ ܠܳܟ ܓܢܺܝܙ ܡܶܢ ܥܺܝܪ̈ܶܐ܆ ܕܰܒܝܰܕ ܥܡܳܕܳܟ ܚܰܣܺܝܬܳܢ܆ ܡܳܪܶܐ ܟܽܠ ܫܽܘܒܚܳܐ ܠܳܟ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܠܰܬܚܽܘܡܳܐ ܕܗܰܝܡܳܢܽܘܬܳܐ
ܐܰܢ̱ܬ ܡܳܪܰܢ ܚܽܘܪ ܒܰܡܚܺܝܠܽܘܬܝ

ܒܗܳܢܳܐ ܠܺܠܝܳܐ ܩܰܕܺܝܫܳܐ܆ ܐܶܬܒܰܪܰܟܘ ܟܽܠܗܽܘܢ ܡܥܺܝ̈ܢܶܐ. ܘܢܰܗܪ̈ܰܘܳܬܳܐ܆ ܘܶܐܓ̈ܡܶܐ ܐܳܦ ܝܰܡ̱̈ܡܶܐ܆ ܕܰܢܚܶܬ ܡܳܪܗܽܘܢ ܘܰܣܚܳܐ ܠܶܗ܆ ܒܰܟܝܳܢܗܽܘܢ ܒܓܰܘ ܝܽܘܪܕܢܳܢ܆ ܘܨܰܪܶܗ ܠܚܶܘܝܳܐ܆ ܗܰܘ ܕܰܠܗܽܘܢ ܕܳܠܰܚ܆ ܘܨܳܪ ܠܰܢ ܛܽܘܦܣܳܐ ܫܰܪܺܝܪܳܐ܆ ܡܰܥܡܽܘܕܺܝܬܳܐ ܩܰܕܺܝܫܬܳܐ ܗ̄ ܙܰܝܢܳܐ ܕܠܳܐ ܚܳܐܶܒ܀

ܫܽܘܒܚܳܐ

ܪܓܺܝܓ ܗ̱ܘܳܐ ܩܳܠܶܗ ܕܝܽܘܚܰܢܳܢ܆ ܟܰܕ ܐܳܡܰܪ ܠܶܗ ܠܰܡܫܺܝܚܳܐ܆ ܕܕܳܚܶܠ ܐ̱ܢܳܐ ܡܳܪܝ. ܐܶܬܩܰܪܰܒ ܨܶܐܕܰܝܟ܆ ܓܶܠܳܐ ܐ̱ܢܳܐ ܘܠܳܐ ܡܰܡܪܰܚ ܐ̱ܢܳܐ܆ ܐܶܚܽܘܕ ܓܰܘܙܰܠܬܳܐ ܒܺܐܝ̈ܕܰܝ܆ ܘܶܐܢ ܩܳܪܶܒ ܐ̱ܢܳܐ܆ ܡܳܪܝ ܝܳܩܶܕ ܐ̱ܢܳܐ ܠܺܝ܆ ܗܳܐ ܡܰܝ̈ܳܐ ܩܳܝܡܺܝܢ ܘܰܫܠܶܝܢ܆ ܣܺܝܡ ܐܺܝܕܳܟ ܥܰܠ ܪܺܝܫ ܘܰܫܠܺܝ ܗ݊ ܘܶܐܢܳܐ ܥܳܡܶܕ ܐ̱ܢܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܡܫܺܝܚܳܐ ܘܡܶܫܚܳܐ

ܥܽܘܢܺܝܬܳܐ: ܒܪܺܝܟ ܕܰܥܡܰܕ ܡܶܢ ܝܽܘܚܰܢܳܢ܆ ܘܩܰܕܶܫ ܠܰܢ ܡܰܥܡܽܘܕܺܝܬܳܐ.

ܡܶܢ ܥܰܡ̱̈ܡܶܐ ܦܰܪܫܶܗ ܠܥܰܡܳܐ܆ ܒܪܽܘܫܡܳܐ ܩܰܕܡܳܐ ܕܰܓܙܽܘܪܬܳܐ܆ ܒܪܽܘܫܡܳܐ ܕܶܝܢ ܕܰܡܫܺܝܚܽܘܬܳܐ܆ ܠܥܰܡ̱̈ܡܶܐ ܦܪܰܫ ܗ̱ܘܳܐ ܡܶܢ ܥܰܡܳܐ܆ ܟܰܕ ܓܶܝܪ ܥܰܡ̱̈ܡܶܐ ܛܳܥܶܝܢ ܗ̱ܘܰܘ܆ ܠܥܰܡܳܐ ܦܳܪܶܫ ܡܶܢ ܥܰܡ̱̈ܡܶܐ܆ ܗܳܫܳܐ ܕܰܛܥܳܐ ܠܶܗ ܥܰܡܳܐ܆ ܦܪܰܫ ܐܶܢܽܘܢ ܠܥܰܡ̱̈ܡܶܐ ܡܶܢܶܗ܀

ܕܳܡܶܝܢ ܗ̱ܘܰܘ ܟܶܢ̈ܫܶܐ ܒܕܰܒܪܳܐ܆ ܠܥܶܪ̈ܒܶܐ ܕܪܳܥܝܳܐ ܠܰܝܬ ܠܗܽܘܢ܆ ܗܘܳܐ ܠܗܽܘܢ ܪܳܥܝܳܐ ܪܰܚܡܳܢܳܐ܆ ܘܰܐܣܓܺܝ ܠܗܽܘܢ ܪܶܥܝܳܐ ܕܠܰܚܡܳܐ܆ ܠܟܽܘܢ ܛܽܘܒܰܝܟܽܘܢ ܬܰܡܺܝ̈ܡܶܐ܆ ܐܶܡܪ̈ܶܐ ܪ̈ܫܺܝܡܶܐ ܕܰܡܫܺܝܚܳܐ܆ ܕܰܠܦܰܓܪܳܐ ܘܰܕܡܳܐ ܫܘܰܝܬܽܘܢ܆ ܘܗܽܘ ܪܳܥܝܳܐ ܗܘܳܐ ܠܟܽܘܢ ܪܶܥܝܳܐ܀

ܠܰܒܢܰܝ̈ ܠܽܘܛ ܐܶܡܰܪ ܡܽܘܫܶܐ܆ ܕܰܒܟܶܣܦܳܐ ܗܰܒܘ ܠܺܝ ܡܰܝ̈ܳܐ܆ ܗܳܐ ܒܥܺܕ̱ܬܳܐ ܡܰܝ̈ܳܐ ܚܰܝ̈ܶܐ܆ ܘܰܫܒܺܝܠܳܐ ܕܡܰܥܶܠ ܥܡܺܝ̈ܕܶܐ܆ ܗܳܫܳܐ ܣܰܒܘ ܠܰܡ̈ܦܺܐܕܰܝܟܽܘܢ܆ ܐܰܝܟ ܠܰܡܦܺܝܕ ܓܶܕܥܽܘܢ ܒܚܰܪܒܳܐ܆ ܙܟܰܘ ܠܚܶܫܟܳܐ ܒܠܰܡܦܺܝ̈ܕܰܝܟܽܘܢ܆ ܘܰܠܫܶܬܩܳܐ ܒܽܐܘ̈ܫܰܥܢܰܝܟܽܘܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܽܘܡ ܦܰܘܠܳܘܣ
ܦܬܰܚ ܠܺܝ ܡܳܪܝ ܬܰܪܥܳܟ ܡܠܶܐ

ܥܽܘܢܺܝܬܳܐ: ܒܪܺܝܟ ܥܡܳܕܳܟ ܕܡܶܛܽܠ ܚܽܘܣܳܝܰܢ܆ ܘܰܣܚܳܬܳܟ ܕܡܶܛܽܠ ܕܽܘܟܳܝܰܢ.

ܗܳܝ ܢܽܘܪܳܐ ܓܠܺܝܬܳܐ ܠܗܰܠ ܢܶܨܚܰܬ܆ ܘܥܰܠ ܢܽܘܪܳܐ ܒܰܕܩܰܬ ܪܽܘܚ ܩܽܘܕܫܳܐ܆ ܕܗܳܐ ܡܙܺܝܓܳܐ ܘܟܰܣܝܳܐ ܒܓܰܘ ܡܰܝ̈ܳܐ܆ ܒܓܰܘܙܰܠܬܳܐ ܨܳܪ ܠܡܰܥܡܽܘܕܺܝܬܳܐ܆ ܒܗܳܕ ܫܰܠܗܶܒܺܝܬܳܐ܆ ܬܰܘ ܥܽܘܠܘ ܥܡܰܕ ܐܰܚܰܝ̈܆ ܕܗܺܝ ܫܳܪܝܳܐ ܦܟܳܪ̈ܶܐ܆ ܘܗܺܝ ܫܳܒܩܳܐ ܚܰܘ̈ܒܶܐ܆ ܕܒܳܗ̇ ܗܽܘ ܫܪܶܐ ܘܰܟܣܶܐ ܬܠܺܝܬܳܝܳܐ܆ ܕܒܰܐܬܽܘܢܳܐ ܐܶܬܚܙܺܝ ܪܒܺܝܥܳܝܳܐ܀

ܝܽܘܚܰܢܳܢ ܙܳܥ ܗ̱ܘܳܐ ܕܠܳܐ ܢܰܥܡܶܕ܆ ܘܰܐܟܘܳܬܶܗ ܝܽܘܪܕܢܳܢ ܕܠܳܐ ܢܶܛܥܰܢ܆ ܠܗܰܘ ܚܰܝܠܳܐ ܕܰܛܥܺܝܢ ܒܶܪ̈ܝܳܬܳܐ܆ ܕܶܐܬܡܰܟܰܟ ܕܢܶܥܡܰܕ ܐܰܝܟ ܣܢܺܝܩܳܐ܆ ܘܰܦܩܰܕ ܠܝܽܘܚܰܢܳܢ܆ ܘܫܰܡܥܶܗ ܕܢܰܥܡܕܶܗ ܗ̱ܘܳܐ܆ ܘܰܠܝܽܘܪܕܢܳܢ ܢܰܗܪܳܐ܆ ܦܩܰܕ ܗ̱ܘܳܐ ܘܛܰܥܢܶܗ ܗ̱ܘܳܐ܆ ܢܚܶܬ ܡܳܪܰܢ ܘܰܥܡܰܕ ܐܰܝܟ ܕܰܨܒܳܐ܆ ܘܠܰܣܢܺܝ̈ܩܶܐ ܒܡܰܝ̈ܳܐ ܣܳܡ ܓܰܙܰܘ̈ܗ̱ܝ܀

ܩܪܳܐ ܩܳܠܳܐ ܘܟܰܢܶܫ ܥܠܰܝ̈ܡܳܬܳܐ܆ ܠܰܚܠܽܘܠܳܗ̇ ܕܟܰܠܰܬ ܢܰܗܺܝܪ̈ܶܐ܆ ܕܰܠܛܶܒܶܗ ܕܚܰܬܢܳܐ ܚܳܝܪܳܐ ܗ̱ܘܳܬ܆ ܘܨܳܒܘ ܘܶܐܬܰܘ ܚܕܽܘ̈ܓܶܐ ܕܠܳܐ ܣܳܟܳܐ܆ ܥܰܠ ܝܽܘܪܕܢܳܢ ܢܰܗܪܳܐ܆ ܩܳܡܰܬ ܬܣܰܟܶܐ ܠܶܗ܆ ܘܰܡܫܰܐܠܳܐ ܕܰܐܝܟܰܘ܆ ܘܰܡܥܰܩܒܳܐ ܕܡܰܢܽܘ܆ ܢܰܦܺܝܩܳܐ ܟܰܠܬܶܗ ܒܰܒܥܳܬܶܗ܆ ܘܟܰܦܢܳܐ ܗ̱ܘܳܬ ܠܫܽܘܦܪ̈ܰܘܗ̱ܝ ܘܰܚܙܳܬܶܗ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܐܰܨܶܕ ܗܰܘܢܳܟ ܚܰܟܺܝܡܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܕܳܠ ܚܰܬܢܳܐ ܡܶܢ ܒܶܝܬ ܐܰܒܳܐ܆ ܕܰܚܠܽܘܠܳܐ ܠܟܰܠܬܳܐ ܢܶܥܒܶܕ܆ ܘܰܒܥܽܘܒܳܐ ܕܡܰܥܡܽܘܕܺܝܬܳܐ܆ ܟܰܠܶܠ ܨܰܒܬܳܗ̇ ܠܰܕܟܺܝܬܳܐ܀

ܓܰܒܠܶܗ ܠܳܐܕܳܡ ܡܶܢ ܥܰܦܪܳܐ܆ ܘܶܐܬܚܰܒܰܠ ܠܶܗ ܒܰܚܛܺܝܬܳܐ܆ ܘܰܒܡܰܝ̈ܳܐ ܕܡܰܥܡܽܘܕܺܝܬܳܐ܆ ܦܢܳܐ ܠܬܽܘܩܳܢܶܗ ܩܰܕܡܳܝܳܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀