ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܗܰܒܠܳܗ̇ ܠܥܺܕܬܳܟ
ܫܠܳܡܠܳܟ ܐܳܘ ܓܰܒܝܳܐ ܬܰܓܳܪܳܐ

ܟܳܪܽܘܙܳܐ ܕܩܽܘܫܬܳܐ܆ ܝܽܘܚܰܢܳܢ ܐܰܟܪܶܙ ܘܶܐܡܰܪ ܕܗܳܢܰܘ ܐܶܡܪܶܗ ܚܰܝܳܐ ܕܰܐܠܳܗܳܐ܆ ܗܳܢܰܘ ܐܰܟܳܪܳܐ܆ ܕܶܐܬܳܐ ܕܢܶܥܩܽܘܪ ܙܺܝ̈ܙܳܢܶܐ ܘܢܶܟܢܽܘܫ ܚ̈ܶܛܶܐ ܠܰܐܘܨܰܪ ܚܰܕ̈ܘܳܬܳܐ܀

ܫܽܘܒܚܳܐ

ܒܕܶܢܚܳܟ ܩܰܕܺܝܫܳܐ܆ ܘܒܰܥܡܳܕܳܟ ܐܰܠܳܗܳܝܳܐ ܚܳܕܶܝܢ ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ܆ ܘܡܰܣܩܺܝܢ ܠܳܟ ܫܽܘܒܚܳܐ܆ ܝܰܠ̈ܕܰܘܗ̱ܝ ܕܳܐܕܳܡ ܥܰܦܪܳܢܳܐ ܕܰܒܝܽܘܡ ܕܶܢܚܳܟ ܗܘܳܐ ܠܗܽܘܢ ܚܽܘܣܳܝܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܠܟܶܢܫܳܐ ܥܶܠܳܝܳܐ

ܥܽܘܢܺܝܬܳܐ: ܒܰܥܡܳܕܳܟ ܡܳܪܰܢ܆ ܚܰܣܳܐ ܫܽܘܪ̈ܥܳܬܰܢ܆ ܘܒܰܣܚܳܬܳܐ ܕܦܰܓܪܳܟ ܫܒܽܘܩ ܣܰܟ̈ܠܘܳܬܰܢ.

ܒܟܶܢ̈ܫܶܐ ܕܰܚܕܽܘ̈ܓܶܐ܆ ܟܣܶܐ ܗ̱ܘܳܐ ܘܠܳܐ ܝܺܕܺܝܥ܆ ܘܰܡܟܺܝܪܰܬ ܢܽܘܗܪܳܐ ܫܚܺܝܩܳܐ ܒܫܽܘ̈ܐܴܠܶܐ܆ ܕܰܐܝܟܰܘ ܒܰܪ ܡܰܠܟܳܐ܆ ܕܫܽܘܦܪ̈ܰܘܗ̱ܝ ܡܙܺܝܥܺܝܢ ܠܺܝ܆ ܘܡܶܢ ܛܶܒܰܘ̈ܗ̱ܝ ܛܳܒ̈ܶܐ ܪܰܘܝܳܐ ܐ̱ܢܳܐ ܒܪܶܚܡܬܶܗ܆ ܘܰܩܥܳܐ ܝܽܘܚܰܢܳܢ ܘܣܰܒܪܳܗ̇܆ ܕܗܳܐ ܒܟܶܢ̈ܫܶܐ ܩܳܐܶܡ ܟܰܕ ܟܣܶܐ܆ ܘܰܒܚܽܘܒܶܗ ܪܘܺܝܬ ܕܶܐܩܰܒܠܺܝܘܗ̱ܝ܀

ܒܩܳܠܶܗ ܡܰܟܪܶܙ ܗ̱ܘܳܐ܆ ܒܕܰܒܪܳܐ ܟܰܕ ܡܰܙܥܶܩ܆ ܘܰܠܟܰܠܰܬ ܢܽܘܗܪܳܐ ܩܰܪܒܰܗ̇ ܕܬܶܣܓܽܘܕ ܠܶܗ܆ ܣܚܳܬ ܘܣܶܠܩܰܬ ܩܳܡܰܬ܆ ܚܙܳܬܶܗ ܘܣܶܘܚܰܬ ܠܶܗ܆ ܝܽܘܚܰܢܳܢ ܡܰܪܬܶܐ ܘܰܡܚܰܟܶܡ ܕܢܰܠܦܺܝܗ̇܆ ܕܗܳܐ ܟܽܘܡܪܳܐ ܘܕܶܒܚܳܐ ܘܶܐܡܪܳܐ܆ ܘܩܽܘܪܒܳܢܳܐ ܪܓܺܝܓܳܐ ܘܟܳܗܢܳܐ܆ ܕܗܽܘ ܫܳܩܶܠ ܚܛܺܝܬܶܗ ܕܥܳܠܡܳܐ܀

ܙܳܥ ܢܰܗܪܳܐ ܕܰܚܙܳܐ܆ ܠܡܳܪܳܐ ܕܡܰܒܽܘ̈ܥܶܐ. ܕܰܢܚܶܬ ܗ̱ܘܳܐ ܕܢܶܣܚܶܐ ܒܡܰܝ̈ܳܐ ܕܫܽܘܒܩܳܢܳܐ܆ ܕܰܟܝܳܢܳܐ ܟܽܠܶܗ܆ ܒܡܰܝ̈ܳܐ ܡܰܓܶܢ ܗ̱ܘܳܐ܆ ܐܰܝܟ ܛܽܘܪܳܐ ܕܣܺܝܢܰܝ ܟܰܕ ܩܰܒܶܠ ܫܟܺܝܢܬܶܗ܆ ܣܚܳܬ ܢܽܘܪܳܐ ܣܶܠܩܰܬ ܘܩܰܕܫܰܬ܆ ܡܰܝ̈ܳܐ ܠܚܽܘܣܳܝܶܗ ܕܥܳܠܡܳܐ܆ ܕܢܺܚܽܘܢ ܚܰܛܳܝ̈ܶܐ ܕܥܳܡܕܺܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܬܬܥܺܝܪܘ ܫܳܗܪ̈ܶܐ

ܥܽܘܢܺܝܬܳܐ: ܫܽܘܒܚܳܐ ܠܗܰܘ ܕܰܥܡܰܕ܆ ܒܓܰܘ ܝܽܘܪܕܢܳܢ ܢܰܗܪܳܐ܆ ܒܰܥܡܳܕܶܗ ܕܰܟܝܰܢ ܘܡܶܢ ܒܺܝܫܳܐ ܦܰܨܝܰܢ.

ܬܰܘ ܢܶܚܙܶܐ ܒܝܽܘܪܕܢܳܢ. ܢܽܘܪܳܐ ܟܰܕ ܥܳܡܕܳܐ܆ ܘܺܐܝܕܳܐ ܕܡܰܓܢܳܐ ܥܠܶܝܗ̇܆ ܕܒܶܣܪܳܐ ܘܠܳܐ ܝܳܩܕܳܐ܀

ܚܰܣܝܳܐ ܠܳܐܕܳܡ ܠܒܶܫ. ܘܰܒܡܰܝ̈ܳܐ ܐܰܥܡܕܶܗ܆ ܘܙܰܝܢܳܐ ܚܫܰܠ ܐܰܠܒܫܶܗ܆ ܕܪܽܘܚܳܐ ܕܠܳܐ ܡܶܙܕܟܶܐ܀

ܠܦܰܓܪܳܐ ܕܰܚܛܳܐ ܘܚܳܒ. ܨܒܳܐ ܗ̱ܘܳܐ ܕܰܢܥܰܕܪܶܗ܆ ܘܰܕܠܰܒܫܶܗ ܩܰܕܫܶܗ܆ ܘܒܰܡܪ̈ܰܘܡܶܐ ܐܰܘܬܒܶܗ܀

ܐܳܘ ܠܦܰܓܪܳܐ ܕܶܐܫܬܓܰܪ. ܒܓܰܘ ܟܽܘܪ ܕܢܽܘܪܳܐ ܘܪܽܘܚ܆ ܙܰܝܢܳܐ ܕܪܽܘܚܳܐ ܚܫܰܠ܆ ܘܰܒܕܰܒܪܳܐ ܢܦܰܩ ܙܟܳܐ܀

ܝܽܘܚܰܢܳܢ ܐܶܫܬܶܐܠ. ܕܺܐܝܕܶܗ ܢܣܺܝܡ ܥܠܰܘܗ̱ܝ܆ ܡܳܪܶܗ ܟܐܳܐ ܘܚܰܟܡܶܗ܆ ܕܟܺܐܢܽܘܬܳܐ ܬܶܬܓܡܰܪ܀

ܠܳܟ ܬܶܫܒ̈ܚܳܢ ܡܫܺܝܚܳܐ. ܕܢܽܘܪܳܐ ܒܡܰܝ̈ܳܐ ܡܙܰܓܬ܆ ܘܪܽܘܚܳܐ ܥܠܰܝܗܽܘܢ ܫܪܳܬ܆ ܘܰܥܡܰܕܬ ܕܰܬܩܰܕܫܰܢ܀

ܡܶܢ ܡܰܝ̈ܳܐ ܚܫܰܠܬ ܠܰܢ. ܙܰܝܢܳܐ ܕܠܳܐ ܡܶܙܕܟܶܐ܆ ܘܣܳܡܬ ܠܰܢ ܒܰܥܡܳܕܳܟ܆ ܟܠܺܝܠܳܐ ܕܠܳܐ ܡܶܫܬܪܶܐ܀

ܡܰܥܡܽܘܕܺܝܬܳܐ ܡܳܪܝ. ܬܗܶܐ ܠܰܢ ܢܽܘܛܳܪܳܐ܆ ܡܶܢ ܟܽܠܶܗ ܝܰܗܠܳܐ ܘܰܦܠܰܓܳܐ ܕܫ̈ܺܐܕܶܐ܀

ܡܰܥܡܽܘܕܺܝܬܳܐ ܡܳܪܝ. ܬܶܗܘܶܐ ܠܰܢ ܓܺܝܫܪܳܐ܆ ܘܒܶܗ ܢܶܥܒܰܪ ܐܰܬܪܳܐ܆ ܕܚܺܝܠܳܐ ܕܒܶܝܬ ܩܶܢܛܳܐ܀

ܡܰܥܡܽܘܕܺܝܬܳܐ ܡܳܪܝ. ܗܺܝ ܬܶܦܪܽܘܣ ܟܶܢܦܶܝ̈ܗ̇܆ ܘܬܰܥܠܰܢܝ ܠܡܰܠܟܽܘܬܳܟ܆ ܕܟܶܬܒܶܬ ܥܽܘܗܕܳܢܳܟ܀

ܒܳܥܽܘܬܳܐ ܕܡܳܪܝ ܒܰܠܰܝ
ܒܕܽܘܟܪܳܢ ܩܰܕܺܝ̈ܫܶܐ ܐܰܚܰܝ̈ ܢܶܬܟܰܢܰܫ

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܡܶܢ ܛܽܘܥܝܰܝ܆

ܚܰܣܳܐ ܠܰܢ ܡܳܪܰܢ ܘܚܰܣܳܐ ܠܥܰܢܺܝ̈ܕܰܝܢ܀

ܦܳܪܽܘܩܰܢ ܥܡܰܕ ܗ̱ܘܳܐ܆ ܒܓܰܘ ܝܽܘܪܕܢܳܢ ܢܰܗܪܳܐ܆ ܘܒܰܕܶܩ ܚܰܘܺܝ ܠܰܢ܆ ܐ̱ܪܳܙܳܐ ܕܰܟܣܶܐ ܗ̱ܘܳܐ܀

ܐܶܚܰܕ ܗ̱ܘܳܐ ܠܥܺܝܪ̈ܶܐ܆ ܬܶܗܪܳܐ ܘܕܽܘܡܳܪܳܐ܆ ܕܰܚܙܰܐܽܘܗ̱ܝ ܠܡܳܪܗܽܘܢ܆ ܕܥܳܡܶܕ ܒܓܰܘ ܝܽܘܪܕܢܳܢ܀

ܡܳܪܳܐ ܕܥܶܠܳܝ̈ܶܐ ܘܣܰܒܪܳܐ ܕܬܰܚ̈ܬܳܝܶܐ܆

ܩܰܒܶܠ ܬܶܫܡܶܫܬܰܢ ܘܶܐܬܪܰܚܰܡܥܠܰܝܢ܀