ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܡܳܪܰܢ ܐܶܬܳܐ ܠܰܥܡܳܕܳܐ܆ ܘܰܠܣܳܗܕܽܘܬܶܗ ܕܝܽܘܚܰܢܳܢ܆ ܐܰܒܳܐ ܐܰܙܥܶܩ ܡܶܢ ܪܰܘܡܳܐ܆ ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܒܝܽܘܡ ܕܶܢܚܳܟ ܒܰܪ ܐܰܠܳܗܳܐ܆ ܚܳܕܝܳܐ ܬܺܒܶܝܠ ܒܰܡܠܳܐܳܗ̇܆ ܘܰܦܨܺܝܚܳܐ ܥܺܕܰܬ ܩܽܘܕܫܳܐ܆ ܘܙܳܡܪܳܐ ܫܽܘܒܚܳܐ ܗܺܝ ܘܝܰܠ̈ܕܶܝܗ̇: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܒܕܶܢܚܶܗ ܐܰܦܨܰܚ ܒܶܪ̈ܝܳܬܳܐ܆ ܕܰܫܒܺܝ̈ܩܳܢ ܗ̱ܘܰܝ̈ ܒܰܚܛܺܝܬܳܐ܆ ܘܒܰܥܡܳܕܶܗ ܩܰܕܶܫ ܡܰܝ̈ܳܐ܆ ܘܦܰܓܪܶܗ ܝܰܗ̱ܒ ܠܰܢ ܡܶܐܟܽܘܠܬܳܐ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܒܪܺܝܟ ܫܶܡܫܳܐ ܕܙܰܕܺܝܩܽܘܬܳܐ܆ ܕܰܕܢܰܚ ܝܰܘܡܳܢ ܒܰܒܪܺܝܬܳܐ܆ ܘܫܰܡܠܺܝ ܡ̈ܶܠܶܐ ܕܰܢܒܺܝ̈ܶܐ܆ ܕܰܒܪܽܘܚܳܐ ܥܠܰܘܗ̱ܝ ܐܶܬܢܰܒܺܝܘ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܒܗܳܢܳܐ ܝܰܘܡܳܐ ܕܰܥܡܳܕܳܟ܆ ܝܶܫܽܘܥ ܡܰܠܟܰܢ ܘܰܐܠܳܗܰܢ܆ ܢܰܣܶܩ ܫܽܘܒܚܳܐ ܠܛܰܝܒܽܘܬܳܟ܆ ܘܠܰܐܒܽܘܟ ܘܰܠܪܽܘܚܳܐ ܕܩܽܘܕܫܳܐ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܡܳܐ ܪܚܺܝܡܺܝܢ ܕܽܘܟܪ̈ܳܢܰܝܟܽܘܢ
ܩܳܝܡܺܝܢ ܣܳܗ̈ܕܶܐ ܒܒܶܝܬ ܕܺܝܢܳܐ

ܒܗܳܢܳܐ ܝܰܘܡܳܐ ܐܶܬܚܰܙܝܰܬ ܬܠܺܝܬܳܝܽܘܬܳܐ. ܥܰܠ ܝܽܘܪܕܢܳܢ ܢܰܗܪܳܐ܆ ܒܪܳܐ ܕܥܳܡܶܕ ܘܰܐܒܳܐ ܕܩܳܥܶܐ܆ ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ܆ ܘܪܽܘܚܳܐ ܕܩܽܘܕܫܳܐ ܕܰܡܪܰܚܶܦ ܠܥܶܠ ܡܶܢ ܡܰܝ̈ܳܐ ܘܰܡܩܰܕܶܫ ܠܗܽܘܢ܀

ܫܽܘܒܚܳܐ

ܩܳܝܡܳܐ ܥܺܕܬܳܐ ܥܰܠ ܢܰܗܪܳܐ ܟܰܕ ܒܰܥܡܺܝ̈ܕܶܐ܆ ܟܽܠܗܽܘܢ ܡܶܬܒܰܩܝܳܐ܆ ܕܰܐܝܢܳܐ ܕܢܳܚܶܬ ܥܠܰܘܗ̱ܝ ܪܽܘܚܳܐ܆ ܗܽܘܝܽܘ ܚܰܬܢܳܐ ܕܰܫܪܳܪܳܐ܆ ܬܶܒܪܽܘܟ ܬܶܣܓܽܘܕ ܘܰܬܩܰܒܠܺܝܘܗ̱ܝ ܘܰܒܦܽܘܡ ܝܰܠ̈ܕܶܝܗ̇܆ ܬܶܙܡܰܪ ܠܶܗ ܫܽܘܒܚܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܘܳܝܳܐ ܠܣܰܟ̈ܠܶܐ܆ ܡܳܐ ܕܚܳܙܶܝܢ ܠܗܽܘܢ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܝܰܗ̱ܒ ܠܰܢ. ܐܽܘܙܢܳܐ ܕܚܰܝ̈ܶܐ ܕܒܶܗܽ ܗ̱ܘ ܢܶܬܬܫܺܝܓ.

ܡܶܢ ܛܰܡܐܽܘܬܳܐ܆ ܡܶܬܕܰܟܺܝܢܰܢ ܒܡܰܥܡܽܘܕܺܝܬܳܐ܆ ܘܒܳܗ̇ ܗܳܘܶܝܢܰܢ ܒܢܰܝ̈ܳܐ ܠܰܐܒܳܐ܆ ܘܰܐܚ̈ܶܐ ܪ̈ܚܺܝܡܶܐ ܠܺܝܚܺܝܕܳܝܳܐ܆ ܐܳܦ ܫܰܘ̈ܬܳܦܶܐ܆ ܠܪܽܘܚܳܐ ܕܩܽܘܕܫܳܐ ܗܰܘ ܡܰܚܝܳܢܳܐ܀

ܟܽܠ ܡܰܢ ܕܰܠܒܺܝܫ܆ ܡܰܥܡܽܘܕܺܝܬܳܐ ܪܚܺܝܡ ܥܰܠ ܡܳܪܝܳܐ܆ ܕܚܺܝܠ ܥܰܠ ܫ̈ܺܐܕܶܐ ܘܙܳܝܥܺܝܢ ܡܶܢܶܗ܆ ܘܗܺܝ ܦܳܪܫܳܐ ܠܶܗ ܡܶܢ ܢܽܘܟܪ̈ܳܝܶܐ܆ ܘܡܶܢ ܒܰܪ̈ܳܝܶܐ܆ ܘܗܺܝ ܡܓܰܘܝܳܐ ܠܶܗ ܥܰܡ ܐܰܠܳܗܳܐ܀

ܒܡܰܥܡܽܘܕܺܝܬܳܐ܆ ܣܓܺܝ ܠܶܗ ܓܰܒܳܐ ܕܒܶܝܬ ܐܰܠܳܗܳܐ܆ ܘܗܳܐ ܡܶܬܡܰܪܡܰܪ ܐܳܟܶܠܩܰܪܨܳܐ܆ ܕܚܳܙܶܐ ܙܰܝܢܳܐ ܕܰܠܒܺܝܫܺܝܢܰܢ܆ ܒܳܗܶܬ ܡܶܢܰܢ܆ ܕܰܣܢܶܐ ܪܺܝܚܶܗ ܓܥܺܝܨ ܘܰܡܫܰܟܰܪ܀

ܟܡܳܐ ܚܠܶܐ ܘܒܰܣܺܝܡ܆ ܪܺܝܚܳܐ ܕܡܽܘܪܽܘܢ ܕܒܶܗ ܪܫܺܝܡܺܝܢܰܢ܆ ܘܗܽܘ ܡܰܩܢܶܐ ܠܰܢ ܩܰܕܺܝܫܽܘܬܳܐ܆ ܘܗܽܘ ܡܳܠܶܐ ܠܰܢ ܗܰܢܺܝܐܽܘܬܳܐ܆ ܘܗܽܘ ܡܩܰܪܶܒ ܠܰܢ܆ ܠܘܳܬ ܐܰܠܳܗܳܐ ܠܒܶܝܬ ܡܰܠܟܽܘܬܳܐ܀

ܗܰܒܠܰܢ ܡܳܪܰܢ܆ ܕܢܶܛܰܪ ܪܽܘܫܡܳܐ ܕܰܥܛܺܝܦܺܝܢܰܢ܆ ܕܗܽܘ ܢܡܰܢܰܥ ܠܰܢ ܠܰܓܢܽܘܢ ܢܽܘܗܪܳܐ܆ ܘܗܽܘ ܡܰܘܪܶܬ ܠܰܢ ܚܰܝ̈ܶܐ ܚܰܕ̱̈ܬܶܐ܆ ܘܠܳܐ ܢܶܚܕܶܐ ܠܰܢ܆ ܐܳܟܶܠܩܰܪܨܳܐ ܟܰܕ ܢܶܨܛܰܐܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܦܢܶܐ ܕܶܝܢ ܘܶܐܫܬܰܥܶܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܚܰܣܺܝ ܒܛܰܝܒܽܘܬܶܗ܆ ܠܥܰܡ̱̈ܡܶܐ ܕܰܐܘܕܺܝܘ ܒܰܨܠܺܝܒܶܗ.

ܡܫܺܝܚܳܐ ܡܳܪܳܐ ܕܟܳܗܢܽܘܬܳܐ܆ ܕܰܕܪܰܫ ܐܽܘܪܚܳܐ ܒܡܰܫܡܰܥܬܳܐ܆ ܕܶܐܣܬܰܟܪܰܬ ܩܽܘܕܡܰܬ ܩܳܠܳܐ܆ ܘܪܳܕܝܳܐ ܡܰܝܬܝܳܐ ܒܓܰܘ ܐܶܕܢܳܐ܆ ܘܰܦܬܰܚ ܠܰܢ ܡܰܥܡܽܘܕܺܝܬܳܐ ܘܽܐܘܪܚܳܐ܆ ܒܝܰܕ ܝܽܘܚܰܢܳܢ ܒܪܶܗ ܕܰܙܟܰܪܝܳܐ܆ ܪܕܳܬ ܡܶܠܬܳܐ ܕܰܐܒܳܐ ܟܰܣܝܳܐ܆ ܟܰܕ ܨܺܝܪ ܒܳܗ̇ ܨܠܶܡ ܒܳܪܽܘܝܳܗ̇܆ ܒܶܗܽ ܗ̱ܘ ܫܶܦܪܰܬ ܣܰܢܝܽܘܬܳܐ܆ ܕܥܰܡ̱̈ܡܶܐ ܕܰܩܢܰܘ ܦܰܐܝܽܘܬܳܐ܀

ܬܪܶܝܢ ܐܺܝ̈ܠܳܢܶܐ ܕܠܳܐ ܫܳܠܚܺܝܢ܆ ܛܰܪ̈ܦܰܝܗܽܘܢ ܣܰܬܘܳܐ ܘܩܰܝܛܳܐ܆ ܩܰܠܣܽܘܗ̱ܝ ܠܰܡܫܺܝܚܳܐ ܡܳܪܰܢ܆ ܕܰܐܫܠܰܚܘ ܢܰܚ̈ܬܰܘܗ̱ܝ ܒܒܶܝܬ ܕܺܝܢܳܐ܆ ܕܶܩܠܳܐ ܕܦܺܐܪ̈ܰܘܗ̱ܝ ܚܠܰܝ̈ܳܐ܆ ܫܰܒܰܚ ܗ̱ܘܳܐ ܠܡܳܪܶܐ ܙܩܺܝܦܳܐ܆ ܘܙܰܝܬܳܐ ܕܰܒܝܰܕ ܡܶܫܚܶܗ ܡܰܥܬܰܪ ܠܰܫܪ̈ܳܓܶܐ ܒܢܰܗܺܝܪ̈ܰܝܗܽܘܢ܆ ܒܣܰܘ̈ܟܰܘܗ̱ܝ ܐܰܥܬܰܪ ܠܝܰܠܽܘ̈ܕܶܐ܆ ܘܫܰܒܚܽܘܗ̱ܝ ܗ̱ܘܰܘ ܒܽܐܘ̈ܫܰܥܢܰܝܗܽܘܢ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܡܰܠܰܐܟܳܐ ܕܒܶܣܪܳܐ ܐܺܝܬܰܘܗ̱ܝ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܒܝܰܠܕܳܟ ܡܳܪܝ ܣܰܒܪܳܐ ܣܓܺܝ ܠܰܢ܆ ܘܰܒܕܶܢܚܳܟ ܚܰܝ̈ܶܐ ܕܢܰܚܘ ܠܰܢ܆ ܘܒܰܥܡܳܕܳܟ ܕܡܶܢ ܝܽܘܚܰܢܳܢ܆ ܐܶܬܚܰܣܺܝ̈ ܠܰܢ ܚܰܘ̈ܒܳܬܰܢ܆ ܒܡܶܨܥܳܝܽܘܬܳܟ ܦܳܪܽܘܩܰܢ܆ ܪܽܘܚܩܽܘܕܫܳܐ ܐܶܫܬܰܟܰܢ ܠܰܢ܀

ܣܓܺܝܕ ܐܰܒܽܘܟ ܝܰܠܕܳܐ ܣܓܺܝܕܳܐ܆ ܒܕܶܢܚܳܟ ܘܝܰܠܕܳܟ ܘܰܥܡܳܕܳܟ܆ ܬܰܘܕܺܝܬܳܐ ܠܪܽܘܚܳܐ ܕܩܽܘܕܫܳܐ܆ ܕܒܰܥܡܳܕܳܟ ܫܰܟܶܢܬܳܝܗ̱ܝ ܠܰܢ܆ ܫܽܘܒܚܳܐ ܠܰܬܠܺܝܬܳܝܽܘܬܳܐ܆ ܕܪܶܚܦܰܬ ܥܰܠ ܝܽܘܪܕܢܳܢ ܢܰܗܪܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀