ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܒܓܰܘ ܡܰܫܟܰܢܙܰܒܢܳܐ
ܐ̱ܡܰܪ ܠܰܢ ܐܶܫܰܥܝܳܐ܆ (ܣܳܠܶܩ ܒܗܰܒܠܳܗ̇ ܠܥܺܕܬܳܟ)

ܢܒܺܝܳܐ ܒܰܪ ܐܺܝܫܰܝ܆ ܐܶܬܢܰܒܺܝ ܡܶܛܽܠ ܝܰܠܕܳܟ܆ ܕܡܳܪܝܳܐ ܐܶܡܰܪ ܠܺܝ ܕܒܶܪܝ ܐܰܢ̱ܬ܆ ܘܶܐܢܳܐ ܝܰܘܡܳܢܳܐ܆ ܝܺܠܶܕܬܳܟ ܒܓܰܘ ܒܶܝܬ ܠܚܶܡ܆ ܘܥܰܡ̱̈ܡܶܐ ܢܶܗܘܽܘܢ ܝܳܪܬܽܘܬܳܟ܆ ܗ̄ ܘܽܐܘܚܕܳܢܰܝ̈ܟ ܥܶܒܪ̈ܶܝܗ̇ ܕܰܐܪܥܳܐ܆ ܡܶܢ ܣܰܘ̈ܦܶܝܗ̇ ܠܣܰܘ̈ܦܶܐ ܕܰܐܪܥܳܐ܀

ܫܽܘܒܚܳܐ

ܗܰܘ ܕܰܛܥܺܝܢܺܝܢ ܠܶܗ܆ ܟܪ̈ܽܘܒܶܐ ܒܰܪܬܺܝܬܳܐ ܘܙܰܘܥܳܐ܆ ܥܰܠ ܡܰܪܟܰܒܬܳܐ ܕܺܐܝܩܳܪܶܗ܆ ܗܳܐ ܒܬܽܘܠܬܳܐ ܡܰܪܝܰܡ܆ ܛܥܺܝܢܳܐ܆ ܘܰܡܙܰܝܚܳܐ ܠܶܗ ܘܙܳܡܪܳܐ ܫܽܘܒܚܳܐ ܒܡܰܘܠܳܕܶܗ܆ ܗ̄ ܫܽܘܒܚܳܐ ܠܶܗ ܕܶܐܬܳܐ ܘܰܦܪܰܩ܆ ܓܶܢܣܶܗ ܕܳܐܕܳܡ ܥܰܦܪܳܢܳܐ܀

ܣܽܘܓܺܝܬܳܐ

ܩܳܠܳܐ ܒܩ̄: ܥܰܡܳܐ ܘܥܰܡ̱̈ܡܶܐ

ܥܽܘܢܺܝܬܳܐ: ܒܪܺܝܟ ܕܰܒܝܰܠܕܶܗ ܦܪܰܩ ܠܳܐܕܳܡ܆ ܡܶܢ ܫܽܘܥܒܳܕܳܗ̇ ܕܰܚܛܺܝܬܳܐ.

ܒܳܐܬܳܐ ܕܬܶܗܪܳܐ ܐܶܬܕܰܡܰܪܘ܆ ܘܶܐܬܒܰܠܗܺܝܘ ܪ̈ܳܥܰܘܳܬܳܐ܆ ܕܰܚܙܰܘ ܡܰܠܰܐܟ̈ܶܐ ܕܬܳܢܶܝܢ܆ ܬܶܕܡܽܘܪܬܳܐ ܒܝܰܠܕܶܗ ܕܰܒܪܳܐ܀

ܕܽܘܡܳܪܳܐ ܘܬܶܗܪܳܐ ܪܰܒܳܐ܆ ܐܶܚܰܕ ܐܶܢܽܘܢ ܒܡܽܘܢ ܕܰܫܡܰܥܘ܆ ܡܶܢ ܡܰܠܰܐܟ̈ܶܐ ܕܰܡܣܰܒܪܺܝܢ܆ ܥܰܠ ܡܰܘܠܳܕܶܗ ܕܦܳܪܶܩ ܟܽܠ܀

ܘܫܰܪܺܝܘ ܐܳܡܪܺܝܢ ܠܰܚ̈ܕܳܕܶܐ܆ ܪ̈ܳܥܰܘܳܬܳܐ ܟܰܕ ܬܳܗܪܺܝܢ܆ ܬܰܘ ܢܺܐܙܰܠ ܠܰܢ ܠܒܶܝܬ ܠܚܶܡ܆ ܘܢܶܚܙܶܐ ܠܬܶܗܪܳܐ ܕܬܰܡܳܢ ܗܘܳܐ܀

ܚܰܕܽܘܬܳܐ ܐܶܬܥܰܛܰܦܘ ܗ̱ܘܰܘ܆ ܐܳܦ ܪܬܺܝܬܳܐ ܘܙܰܘܥܳܐ ܪܰܒܳܐ܆ ܒܡܶܕܶܡ ܕܰܫܡܰܥܘ ܕܬܶܗܪܳܐ ܡܠܶܐ܆ ܡܶܢ ܡܰܠܰܐܟ̈ܶܐ ܕܰܡܣܰܒܪܺܝܢ܀

ܝܳܗܒܺܝܢ ܫܽܘܒܚܳܐ ܦܽܘ̈ܡܰܝܗܽܘܢ܆ ܥܰܡ ܣܶܓ̈ܕܳܬܳܐ ܕܪ̈ܺܝܫܰܝܗܽܘܢ܆ ܩܽܘܪ̈ܒܳܢܶܐ ܒܓܰܘ ܚܽܘ̈ܦܢܰܝܗܽܘܢ܆ ܘܗܰܝܡܳܢܽܘܬܳܐ ܒܠܶܒܰܝ̈ܗܽܘܢ܀

ܠܳܐ ܥܰܩܶܒܘ ܥܰܠ ܡܰܘܠܳܕܶܗ܆ ܘܠܳܐ ܐܰܒܣܺܝܘ ܥܰܠ ܫܺܝܛܽܘܬܶܗ܆ ܒܥܰܝܢܰܝ̈ܗܽܘܢ ܥܽܘܠܳܐ ܙܥܽܘܪܳܐ܆ ܒܪܶܥܝܳܢܗܽܘܢ ܐܰܠܳܗ ܟܽܠܳܐ܀

ܢܽܘܗܪܳܐ ܕܰܕܢܰܚ ܒܰܡܥܰܪܬܳܐ܆ ܝܰܠܕܳܐ ܕܰܟܪܺܝܟ ܒܥܰܙܪܽܘܪ̈ܶܐ܆ ܡܳܪܝܳܐ ܡܳܪܳܐ ܘܰܐܠܳܗܳܐ܆ ܘܶܐܬܚܰܘܺܝ ܠܗܽܘܢ ܕܠܳܐ ܦܽܘܠܳܓ܀

ܥܰܠܘ ܘܰܚܙܰܘ ܥܽܘܠܳܐ ܕܺܝܠܺܝܕ܆ ܘܶܐܡܳܐ ܒܬܽܘܠܬܳܐ ܡܓܰܙܰܝܬܳܐ܆ ܐܰܒܳܐ ܫܺܐܝܠܳܐ ܘܡܶܣܟܺܢܳܐ܆ ܡܥܰܪܬܳܐ ܙܥܽܘܪܬܳܐ ܘܽܐܘܪܝܳܐ ܫܺܝܛ܀

ܨܰܠܝܰܬ ܐܶܡܳܐ ܘܰܒܬܽܘܠܬܳܐ܆ ܒܥܳܬ ܡܶܢ ܝܰܠܕܳܐ ܗܰܘ ܕܝܶܠܕܰܬ܆ ܕܰܠܪ̈ܳܥܰܘܳܬܳܐ ܢܒܰܪܶܟ܆ ܕܩܰܕ̈ܡܶܐ ܐܶܬܰܘ ܠܣܶܓܕܬܶܗ܀

ܪܰܘܡܳܐ ܘܥܽܘܡܩܳܐ ܠܳܟ ܢܶܣܓܕܽܘܢ܆ ܫܡܰܝܳܐ ܘܰܐܪܥܳܐ ܠܳܟ ܢܰܘܕܽܘܢ܆ ܟܽܠܗܽܘܢ ܥܰܡ̱̈ܡܶܐ ܠܳܟ ܢܫܰܒܚܽܘܢ܆ ܕܰܒܡܰܘܠܳܕܳܟ ܦܪܰܩܬ ܐܶܢܽܘܢ܀

ܬܰܘܕܺܝܬܳܐ ܠܳܟ ܡܳܪܶܐ ܟܽܠ܆ ܕܰܦܪܰܩܬ ܥܺܕܬܳܟ ܡܶܢ ܛܽܘܥܝܰܝ܆ ܘܗܳܐ ܙܳܡܪܳܐ ܠܳܟ ܬܶܫܒܽܘܚܬܳܐ܆ ܒܦܽܘܡܳܐ ܕܝܰܠ̈ܕܶܝܗ̇ ܒܟܽܠ ܥܶܕܳܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܟܺܐܦܳܐ ܕܰܚܙܳܐ ܕܳܢܺܝܐܶܝܠ

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܰܒܝܰܠܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܰܒܝܰܠܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܓܢܶܐ ܒܽܐܘܪܝܳܐ ܥܛܺܝܦ ܓܰܘܙܰܠܬܳܐ܆ ܘܝܳܢܶܩ ܚܰܠܒܳܐ ܡܶܢ ܐܶܡܶܗ܆ ܡܢܰܨܪܳܐ ܠܶܗ ܘܰܡܚܰܒܒܳܐ ܠܶܗ܆ ܘܣܳܓܕܳܐ ܠܶܗ ܐܰܝܟ ܕܰܠܡܳܪܳܐ܀

ܫܽܘܒܚܳܐ ܠܪܳܡܳܐ ܕܶܐܬܡܰܟܰܟ܆ ܕܠܰܢ ܡܶܢ ܡܰܦܽܘܠܬܳܐ ܢܪܰܡܪܶܡ܆ ܠܶܗ ܘܠܰܐܒܽܘܗ̱ܝ ܘܰܠܪܽܘܚ ܩܽܘܕܫܳܐ܆ ܬܶܫܒܽܘܚܬܳܐ ܘܰܥܠܰܝܢ ܪ̈ܰܚܡܶܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܰܒܝܰܠܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܰܒܝܰܠܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀