ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܒܗܳܢܳܐ ܠܺܠܝܳܐ ܐܶܬܺܝܠܶܕ܆ ܦܳܪܽܘܩܰܢ ܒܓܰܘ ܒܶܝܬ ܠܚܶܡ܆ ܘܰܡܓܽܘ̈ܫܶܐ ܘܪ̈ܳܥܰܘܳܬܳܐ. ܩܰܪܶܒܘ ܠܶܗ ܩܽܘܪ̈ܒܳܢܰܝܗܽܘܢ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܒܠܺܠܝܳܐ ܕܫܰܠܝܳܐ ܐ̱ܢܳܫܽܘܬܳܐ܆ ܕܢܰܚ ܠܰܢ ܢܽܘܗܪܳܐ ܫܰܪܺܝܪܳܐ܆ ܘܡܰܠܰܐܟ̈ܶܐ ܘܰܒܢܰܝ̈ܢܳܫܳܐ܆ ܙܳܡܪܺܝܢ ܫܽܘܒܚܳܐ ܒܡܰܘܠܳܕܶܗ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܢܰܘܕܶܐ ܠܶܗ ܠܒܰܪ ܐܰܠܳܗܳܐ܆ ܕܰܒܡܰܘܠܳܕܶܗ ܚܰܪܰܪ ܠܰܢ܆ ܡܶܢ ܛܳܥܝܽܘܬܳܐ ܕܰܦܬܰܟܪ̈ܶܐ܆ ܘܰܐܠܶܦ ܠܰܢ ܕܰܢܙܰܡܰܪ ܠܶܗ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܥܰܢܺܝ̈ܕܶܐ ܕܠܰܒܫܽܘܟ ܡܳܪܰܢ. ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ܆ ܘܶܐܟܰܠܘ ܦܰܓܪܳܟ ܩܰܕܺܝܫܳܐ܆ ܘܶܐܫܬܺܝܘ ܠܰܕܡܳܟ ܡܚܰܣܝܳܢܳܐ܆ ܢܩܽܘܡܽܘܢ ܡܳܪܝ ܡܶܢ ܝܰܡܺܝܢܳܟ܆ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܐܰܝܟ ܦܺܝܪܡܳܐ ܕܩܰܪܶܒ
ܥܰܠ ܗܳܢܳܐ ܥܶܛܪܳܐ ܕܒܶܣ̈ܡܶܐ (ܣܳܠܶܩ: ܒܡܰܪܝܰܡ ܝܳܠܕܰܬ ܐܰ‍ܠܳܗܳܐ)

ܒܰܪ ܥܰܬܺܝܪܳܐ ܟܰܕ ܐܶܬܳܐ ܕܢܶܗܘܶܐ ܒܰܪܢܳܫܳܐ܆ ܦܶܓܥܰܬ ܒܶܗ ܡܶܣܟܺܢܽܘܬܳܐ ܡܥܰܪܬܳܐ ܘܥܰܙܪܽܘܪ̈ܶܐ܆ ܐܰܒܽܘܗ̱ܝ ܫܺܐܝܠܳܐ ܢܰܓܳܪܳܐ܆ ܘܶܐܡܶܗ ܒܬܽܘܠܬܳܐ ܕܰܨܪܺܝܟܳܐ܀

ܫܽܘܒܚܳܐ

ܓܰܒܪܺܐܶܝܠ ܡܚܰܦܶܐ ܐܰܦܰܘ̈ܗ̱ܝ ܕܠܳܐ ܢܺܐܩܰܕ ܡܶܢܶܗ܆ ܘܟܺܐܢܳܐ ܝܰܘܣܶܦ ܒܰܕܪ̈ܳܥܘܗ̱ܝ ܥܰܦܶܩ ܗܰܕܳܡܰܘ̈ܗ̱ܝ܆ ܫܰܠܗܶܒܺܝܬܳܐ ܟܪܺܝܟܳܐ ܠܶܗ܆ ܘܶܐܡܶܗ ܒܬܽܘܠܬܳܐ ܛܥܺܝܢܳܐ ܠܶܗ܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܒܬܽܘܠܬܳܐ ܩܪܳܬܰܢܝ܆ ܕܺܐܡܰܪ ܫܰܪܒܳܗ̇ ܟܰܕ

ܥܽܘܢܺܝܬܳܐ: ܠܳܟ ܬܶܫܒܽܘܚܬܳܐ ܝܰܠܕܳܐ ܦܰܐܝܳܐ ܕܡܶܢ ܐܺܝܬܽܘܬܳܐ.

ܠܰܘ ܥܰܠ ܕܰܕܚܶܠ. ܡܶܢ ܗܶܪܳܘܕܶܣ ܥܪܰܩ ܗ̱ܘܳܐ ܠܡܶܨܪܶܝܢ܆ ܐܶܠܳܐ ܐ̱ܪܳܙܳܐ ܒܥܳܐ ܕܰܢܫܰܡܠܶܐ܆ ܗܳܝ ܕܰܟܬܺܝܒܳܐ ܒܰܢܒܺܝܽܘܬܳܐ܆ ܕܡܶܢ ܡܶܨܪܶܝܢ ܩܪܺܝܬ ܠܒܶܪܝ ܚܰܒܺܝܒܳܐ ܐܶܡܰܪ ܢܒܺܝܳܐ܀

ܟܰܕ ܗܽܘ ܝܶܫܽܘܥ. ܘܶܐܡܶܗ ܘܫܳܠܽܘܡ ܘܟܺܐܢܳܐ ܝܰܘܣܶܦ܆ ܒܽܐܘܪܚܳܐ ܕܡܶܨܪܶܝܢ ܒܓܰܝ̈ܳܣܶܐ ܦܓܰܥܘ܆ ܘܚܰܠܶܨܘ ܐܶܢܽܘܢ ܫܩܰܠܘ ܡܳܐܢܰܝ̈ܗܽܘܢ܆ ܘܗܰܘ ܓܰܝܳܣܳܐ. ܕܰܐܦܢܺܝ ܠܡܳܐܢ̈ܶܐ ܫܩܰܠ ܒܽܘܪ̈ܟܳܬܳܐ܀

ܟܡܳܐ ܥܳܩ̈ܳܬܳܐ. ܘܰܟܡܳܐ ܚܰܫ̈ܶܐ ܣܶܒܠܰܬ ܡܰܪܝܰܡ܆ ܘܥܰܡܳܗ̇ ܝܰܘܣܶܦ ܓܰܒܪܳܗ̇ ܟܺܐܢܳܐ܆ ܟܡܳܐ ܙܰܘ̈ܥܳܬܳܐ ܘܰܟܡܳܐ ܕܶܚ̈ܠܶܐ܆ ܟܡܳܐ ܫܡܽܘ̈ܥܝܳܬܳܐ܆ ܡܰܪܺܝܪ̈ܳܬܳܐ ܡܶܢ ܒܥܶܠ̈ܕܒܳܒܶܐ܀

ܟܰܦܢܳܐ ܘܨܰܗܝܳܐ. ܘܚܰܫܳܐ ܘܥܳܩܬܳܐ ܘܰܐܟܣܢܳܝܽܘܬܳܐ܆ ܟܡܳܐ ܠܽܘ̈ܚܳܡܶܐ ܘܰܟܡܳܐ ܓ̈ܙܳܡܶܐ܆ ܡܶܢ ܕܰܝܳܢ̈ܶܐ ܘܡܰܠ̈ܟܶܐ ܚܰܢ̈ܦܶܐ܆ ܣܶܒܠܰܬ ܡܰܪܝܰܡ. ܘܟܺܐܢܳܐ ܝܰܘܣܶܦ ܒܰܐܪܥܳܐ ܕܡܶܨܪܶܝܢ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܬܶܟܪܶܐ ܠܳܟ ܡܳܪܝ ܥܰܠ ܥܺܕ̈ܳܬܳܐ

ܒܪܳܐ ܕܰܒܝܰܠܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀

ܬܗܰܪܘ ܡܰܠܰܐܟ̈ܶܐ ܘܝܰܒܶܒܘ ܟܶܢ̈ܫܶܐ ܘܰܐܙܥܶܩܘ ܣܶܕܪ̈ܶܐ܆ ܗܰܠܶܠܘ ܬܶܓ̈ܡܶܐ ܘܙܳܚܘ ܠܶܓ̈ܝܽܘܢܶܐ ܘܰܢܚܶܬܘ ܠܰܐܪܥܳܐ܆ ܕܠܰܩܘ ܢܽܘܪ̈ܳܢܶܐ ܢܫܰܡܘ ܪ̈ܽܘܚܳܢܶܐ ܘܰܟܢܰܫܘ ܓܽܘ̈ܕܶܐ܆ ܘܫܰܒܰܚܘ ܐܰܠܦ̈ܶܐ ܥܰܡ ܪ̈ܶܒܘܳܬܳܐ ܒܩܳܠܰܝ̈ ܫܽܘܒܚܳܐ܀

ܥܛܺܝܦ ܓܰܘܙܰܠܬܳܐ ܟܪܺܝܟ ܥܰܙܪܽܘܪ̈ܶܐ ܘܠܳܐ ܡܶܣܬܰܝܰܟ܆ ܓܢܶܐ ܒܰܬܪܽܘܢܽܘܣ ܣܺܝܡ ܒܓܰܘ ܐܽܘܪܝܳܐ ܘܠܳܐ ܡܶܬܥܰܩܰܒ. ܡܙܺܝܥ ܠܰܟܪ̈ܽܘܒܶܐ ܥܛܺܝܦ ܗܰܕܳܡ̈ܶܐ ܕܚܺܝܠ ܒܶܝܬ ܓܺܝ̈ܓܠܶܐ܆ ܫܩܺܝܠ ܒܰܟܪ̈ܽܘܒܶܐ ܘܙܳܐܶܢ ܛܽܘ̈ܗܡܶܐ ܘܝܳܢܶܩ ܚܰܠܒܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀