ܕܰܬܪܶܝܢ ܒܫܰܒܳܐ

ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܒܩ̈ܳܠܶܐ ܕܰܡܠܶܝܢ ܬܰܘܕܺܝܬܳܐ
ܦܬܰܚ ܠܰܢ ܡܳܪܝ ܬܰܪܥܳܐ ܕܪ̈ܰܚܡܰܝܟ

ܙܳܥܘ ܢܺܝܢ̈ܘܳܝܶܐ ܡܶܢ ܩܳܠܶܗ ܕܝܰܘܢܳܢ ܒܰܪ ܡܰܬܰܝ܆ ܘܒܰܬܝܳܒܽܘܬܳܐ ܐܶܬܓܰܘܰܣܘ ܒܫܰܗܪܳܐ ܘܨܰܘܡܳܐ ܘܰܨ̈ܠܰܘܳܬܳܐ܆ ܘܰܒܕܶܡ̈ܥܶܐ ܘܰܒܚܶܢ̈ܓܳܬܳܐ ܐܶܬܒܰܛܰܠ ܗ̱ܘܳܐ܆ ܓܙܳܪ ܕܺܝܢܳܐ ܕܰܐܟܪܶܙ ܝܰܘܢܳܢ ܗܦܽܘܟܝܳܐ ܠܢܺܝܢ̈ܘܳܝܶܐ܆ ܡܶܢ ܒܺܝ̈ܫܳܬܳܐ ܠܛܳܒ̈ܳܬܳܐ܆ ܒܪܺܝܟ ܚܰܢܳܢܳܐ ܕܰܐܦܢܺܝ ܐܶܢܽܘܢ܀

ܫܽܘܒܚܳܐ

ܒܰܬܪܰܥ ܪ̈ܰܚܡܰܝܟ ܢܳܩܫܺܝܢܰܢ ܡܳܪܝܳܐ ܐܰܠܳܗܳܐ܆ ܫܒܽܘܩ ܠܰܢ ܚܰܘ̈ܒܰܝܢ ܘܰܚ̈ܛܳܗܰܝܢ ܐܰܝܟ ܕܰܫܒܰܩܬ ܠܳܗ̇ ܠܢܺܝܢܘܶܐ ܡܕܺܝܢ̱ܬܳܐ܆ ܘܰܐܝܟ ܕܰܐܥܒܰܪܬܳܝܗ̱ܝ ܠܗܰܘ ܪܽܘܓܙܳܐ ܕܰܓܙܺܝܪ ܗ̱ܘܳܐ ܥܠܶܝܗ̇܆ ܐܰܥܒܰܪ ܡܶܢܰܢ ܦܳܪܽܘܩܰܢ ܫܰܒ̈ܛܶܐ ܘܡܰܚ̈ܘܳܬܳܐ܆ ܩܰܒܶܠ ܨܰܘܡܰܢ ܘܰܨܠܽܘܬܰܢ܆ ܘܬܶܬܪܰܥܶܐ ܠܰܢ ܐܰܠܳܗܽܘܬܳܟ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܺܝܢܬܳܐ ܕܺܝܠܳܢܳܝܬܳܐ ܕܨܰܘܡܳܐ

ܦܬܰܚ ܠܰܢ ܡܳܪܰܢ ܬܰܪܥܳܟ ܪܰܒܳܐ ܕܰܡܠܶܐ ܖ̈ܰܚܡܶܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܐܰܘ

ܩܳܪܶܝܢܰܢ ܠܳܟ ܡܳܪܝܳܐ ܡܳܪܰܢ ܬܳܐ ܠܥܽܘܕܪܳܢܰܢ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܘܰܠܝܰܠܽܘ̈ܕܶܐ ܟܠܰܘ ܡܶܢ ܚܰܠܒܳܐ ܒܦܽܘܩܕܳܢ ܡܰܠܟܳܐ܆ ܕܠܳܐ ܐ̱ܢܳܫ ܢܶܫܪܶܐ ܨܰܘܡܶܗ ܕܡܰܠܟܳܐ ܒܚܰܕ ܡܶܢ ܐܶܣܟܺܝܡ܆ ܟܦܶܝܢ ܗ̱ܘܰܘ ܣܳܒ̈ܶܐ ܒܪܺܝܫ ܒܳܥܽܘܬܳܐ ܐܰܝܟ ܩܰܫܺܝ̈ܫܶܐ܆ ܘܕܳܡܶܐ ܡܰܠܟܳܐ ܠܟܳܗܢܳܐ ܪܰܒܳܐ ܒܪܺܝܫܶܗ ܕܥܰܡܳܐ܀

ܡܰܠܟܳܐ ܒܩܶܛܡܳܐ ܚܳܕܽܘܪܳܐ ܟܰܝ ܡܳܢܳܐ ܢܶܥܒܶܕ܆ ܓܰܐܝܳܐ ܡܡܰܟܰܟ ܡܫܰܦܠܳܐ ܬܰܡܳܢ ܡܽܘܢ ܣܳܥܰܪ ܗ̱ܘܳܐ܆ ܐܰܝܟ ܡܰܠܦܳܢܳܐ ܡܰܠܟܳܐ ܡܰܠܶܦ ܗܳܝ ܒܳܥܽܘܬܳܐ܆ ܠܓܰܒܪ̈ܶܐ ܘܢܶܫ̈ܶܐ ܐܳܦ ܠܰܛ̈ܠܳܝܶܐ ܘܟܽܠܶܗ ܥܰܡܳܐ܀

ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨ̈ܠܰܘܳܬܳܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܐܰܘ

ܥܢܺܝܢ ܐܰܠܳܗܳܐ ܥܢܺܝܢ ܐܰܠܳܗܳܐ ܘܪܰܚܶܡܥܠܰܝܢ܆

ܘܰܐܦܢܳܐ ܠܶܒܗܽܘܢ ܕܰܒܢܰܝ̈ܢܳܫܳܐ ܠܰܬܝܳܒܽܘܬܳܐ܀