ܕܰܬܪܶܝܢ ܬܪܶܝܢ ܒܫܰܒܳܐ

ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܗܳܢܰܘ ܝܰܪܚܳܐ

ܝܳܕܰܥ ܐ̱ܢܳܐ ܡܳܪܝ ܕܟܽܠܳܟ ܪ̈ܰܚܡܶܐ ܒܪ̈ܰܚܡܶܐ ܫܦܺܝܥ ܐܰܢ̱ܬ܆ ܒܫܳܥܬܳܐ ܕܪ̈ܰܚܡܶܐ ܐܳܘ ܡܠܶܐ ܪ̈ܰܚܡܶܐ܆ ܝܶܫܽܘܥ ܣܰܒܪܳܐ ܕܫܳܐܠܰܝ̈ ܪ̈ܰܚܡܶܐ܆ ܐܰܫܦܰܥ ܪ̈ܰܚܡܰܝܟ ܥܰܠ ܚܰܛܳܝ̈ܶܐ ܕܪ̈ܰܚܡܰܝܟ ܫܳܐܠܺܝܢ܀

ܩܳܠܳܐ ܒܩ̄: ܩܽܘܩܳܝܳܐ
ܟܽܠܳܗ̇ ܐܰܪܥܳܐ ܕܶܐܦܶܣܳܘܣ

ܬܰܘ ܐܰܚܰܝ̈ ܢܶܬܕܰܡܶܐ ܒܶܗ ܒܗܰܘ ܡܰܠܟܳܐ ܕܢܺܝܢܘܶܐ܆ ܕܗܽܘ ܚܰܘܺܝ ܠܰܢ ܕܰܒܕܶܡ̈ܥܶܐ ܡܶܬܪܰܥܶܐ ܡܳܪܝܳܐ܆ ܠܰܝܬ ܗ̱ܘܳܐ ܬܰܡܳܢ܆ ܦܽܘܡܳܐ ܕܓܳܚܶܟ ܗ̱ܘܳܐ܆ ܘܡܰܠܟܳܐ ܘܥܰܒ̈ܕܰܘܗ̱ܝ܆ ܠܒܺܝܫܺܝܢ ܗ̱ܘܰܘ ܣܰܩ̈ܶܐ܆ ܣܠܶܩܘ ܕܶܡ̈ܥܶܐ ܘܰܢܚܶܬܘ ܪ̈ܰܚܡܶܐ ܥܰܠ ܢܺܝܢ̈ܘܳܝܶܐ܆ ܐܰܠܳܗܳܐ ܕܰܥܢܰܝܬ ܐܶܢܽܘܢ ܥܢܺܝ ܠܰܢ ܐܰܟܘܳܬܗܽܘܢ܆ ܗ̄ ܘܚܽܘܣ ܘܶܐܬܪܰܚܰܡ ܥܠܰܝܢ܀

ܫܽܘܒܚܳܐ

ܫܰܦܺܝܪ̈ܳܢ ܡܰܪ̈ܓܳܢܝܳܬܳܐ ܒܬܳܓ̈ܶܐ ܕܡܰܠ̈ܟܶܐ܆ ܘܰܐܝܟ ܕܶܡ̈ܥܶܐ ܠܳܐ ܫܰܦܺܝܪ̈ܳܢ ܕܚܰܛܳܝ̈ܶܐ ܕܬܳܝܒܺܝܢ܆ ܕܶܡ̈ܥܶܐ ܕܥܰܝ̈ܢܶܐ܆ ܣܳܠ̈ܩܳܢ ܠܰܫܡܰܝܳܐ܆ ܘܡܰܪ̈ܓܳܢܝܳܬܳܐ܆ ܠܳܐ ܦܳܚ̈ܡܳܢ ܠܕܶܡ̈ܥܶܐ܆ ܣܳܗܕܳܐ ܠܰܢ ܗܳܝ ܒܳܥܽܘܬܳܐ ܕܥܶܒܕܰܬ ܢܺܝܢܘܶܐ܆ ܕܣܶܠܩܰܬ ܗ̱ܘܳܬ ܟܰܕ ܟܰܪܝܳܐ ܠܳܗ̇܆ ܘܢܶܚܬܰܬ ܟܰܕ ܚܳܕܝܳܐ܆ ܗ̄ ܕܢܶܣܒܰܬ ܫܶܐܠܳــ̈ـܬܳܗ̇܀

ܡܰܕܪܳܫܳܐ

ܩܳܠܳܐ ܒܩ̄: ܕܡܰܘ̈ܕܝܳܢܶܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܫܰܚܠܶܦ ܠܢܺܝ̈ܢܘܳܝܶܐ ܡܶܢ ܒܺܝ̈ܫܳܬܳܐ ܠܛܳܒ̈ܳܬܳܐ.

ܡܛܳܐ ܝܰܘܡܳܐ ܕܰܐܟܪܶܙ ܝܰܘܢܳܢ܆ ܕܒܶܗܽ ܗ̱ܘ ܢܺܝܢܘܶܐ ܡܶܣܬܰܚܦܳܐ܆ ܘܰܗܘܳܬ ܠܳܗ̇ ܟܽܠܳܗ̇ ܡܕܺܝܢ̱ܬܳܐ܆ ܒܶܐܒܠܳܐ ܘܒܶܟܝܳܐ ܣܰܓܺܝܳܐܐ܆ ܘܟܽܠܢܳܫ ܡܰܘܬܶܗ ܩܕܳܡ ܥܰܝܢܰܘ̈ܗ̱ܝ܆ ܣܺܝܡ ܗ̱ܘܳܐ ܘܚܳܐܰܪ ܠܫܽܘܠܳܡܳܐ܀

ܗܦܰܟ ܗ̱ܘܳܐ ܓܰܘܢܳܐ ܕܰܐܦܰܝ̈ܗܽܘܢ܆ ܕܰܫܡܰܥܘ ܕܪܽܘܓܙܳܐ ܡܛܳܐ ܥܠܰܝܗܽܘܢ܆ ܘܰܒܟܰܘ ܟܽܠܗܽܘܢ ܠܰܚ̈ܕܳܕܶܐ܆ ܐܰܝܟ ܐ̱ܢܳܫ̈ܳܐ ܕܰܐܘܦܺܝܘ ܡܶܢ ܫܶܠܝ܆ ܘܟܽܠܢܳܫ ܥܰܠ ܐܰܚܰܘ̈ܗ̱ܝ ܒܳܟܶܐ܆ ܘܥܰܠ ܚܰܒܺܝܒܰܘ̈ܗ̱ܝ ܘܥܰܠ ܚܰܝܰܘ̈ܗ̱ܝ܀

ܐܰܪܒܥܺܝܢ ܝܰܘ̈ܡܺܝܢ ܡܶܢ ܙܰܘܥܳܐ܆ ܠܳܐ ܫܠܳܬ ܐܰܪܥܳܐ ܠܰܡܙܳܥܽܘ܆ ܝܰܘܢܳܢ ܩܳܐܶܡ ܡܶܢ ܪܽܘܚܩܳܐ܆ ܘܕܳܚܶܠ ܕܰܠܡܳܐ ܢܶܬܕܰܓܰܠ܆ ܗܰܘ ܟܳܪܽܘܙܳܐ ܕܶܐܫܬܰܕܰܪ܆ ܕܢܰܗܦܶܟ ܡܕܺܝܢ̱ܬܳܐ ܘܥܳܡܽܘܪ̈ܶܝܗ̇܀

ܒܥܶܕܳܢܳܐ ܕܰܣܒܰܪ ܝܰܘܢܳܢ܆ ܕܢܺܝܢܘܶܐ ܡܕܺܝܢ̱ܬܳܐ ܡܶܬܗܰܦܟܳܐ܆ ܒܶܗ ܒܝܰܘܡܳܐ ܘܰܒܥܶܕܳܢܳܐ܆ ܐܶܬܦܰܪܩܰܬ ܡܶܢ ܐܰܒܕܳܢܳܐ܆ ܥܢܳܢ̈ܶܐ ܘܥܰܪ̈ܦܶܠܶܐ ܡܶܢ ܫܶܠܝ܆ ܐܶܬܒܰܕܰܪ̈ܝ ܘܰܗܘܳܐ ܫܶܠܝܳܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܟܺܐܦܳܐ ܕܰܚܙܳܐ ܕܳܢܺܝܐܶܝܠ

ܡܳܪܰܢ ܐܶܬܪܰܚܰܡܥܠܰܝܢ: ܡܳܪܰܢ ܩܰܒܶܠ ܬܶܫܡܶܫܬܰܢ܆

ܫܰܕܰܪ ܠܰܢ ܡܶܢ ܒܶܝܬ ܓܰܙܳܟ: ܚܢܳܢܳܐ ܘܪ̈ܰܚܡܶܐ ܘܫܽܘܒܩܳܢܳܐ܀

ܫܰܡܥܽܘܗ̱ܝ ܡܰܠ̈ܟܶܐ ܘܶܐܫܬܰܦܰܠܘ܆ ܫܕܰܘ ܬܳܓܰܝ̈ܗܽܘܢ ܘܶܐܬܡܰܟܰܟܘ܆ ܫܰܡܥܽܘܗ̱ܝ ܚܺܐܪ̈ܶܐ ܘܶܐܬܒܰܠܗܺܝܘ܆ ܘܰܚܠܳܦ ܢܰܚ̈ܬܶܐ ܣܰܩܳܐ ܠܒܶܫܘ܆ ܫܰܡܥܽܘܗ̱ܝ ܥܰܬܺܝܪ̈ܶܐ ܦܬܰܚܘ ܗ̱ܘܰܘ܆ ܓܰܙܰܝ̈ܗܽܘܢ ܩܕܳܡ ܡܶܣ̈ܟܺܢܶܐ܀

ܫܽܘܒܚܳܐ ܠܰܐܒܳܐ ܚܰܢܳܢܳܐ܆ ܕܡܰܓܰܪ ܪܽܘܚܶܗ ܠܚܰܛܳܝ̈ܶܐ܆ ܘܣܶܓܕܬܳܐ ܠܰܒܪܳܐ ܡܪܰܚܡܳܢܳܐ܆ ܕܩܳܪܶܐ ܠܗܽܘܢ ܠܰܬܝܳܒܽܘܬܳܐ܆ ܠܪܽܘܚܳܐ ܕܩܽܘܕܫܳܐ ܬܰܘܕܺܝܬܳܐ܆ ܕܚܳܕܶܐ ܒܢܰܦܫܳܐ ܕܡܶܬܦܰܢܝܳܐ܀

ܫܳܡܽܘܥܳܐ ܕܰܨ̈ܠܰܘܳܬܳܐ܇ ܘܰܡܦܰܢܝܳܢܳܐ ܕܫ̈ܶܐܠܳܬܳܐ܆

ܫܡܰܥ ܨܠܽܘܬܰܢ ܘܶܐܬܪܰܥܳܐ ܠܰܢ܇ ܘܦܰܢܳܐ ܒܪ̈ܰܚܡܰܝܟ ܫ̈ܶܐܠܳܬܰܢ܀