ܕܰܬܪܶܝܢ ܬܪܶܝܢ ܒܫܰܒܳܐ

ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܡܛܳܐ ܝܰܘܡܳܐ ܕܰܐܟܪܶܙ ܝܰܘܢܳܢ܆ ܕܒܶܗܽ ܗ̱ܘ ܡܶܬܗܰܦܟܳܐ ܢܺܝܢܘܶܐ܆ ܘܰܗܘܳܬ ܠܳܗ̇ ܡܕܺܝܢ̱ܬܳܐ ܟܽܠܳܗ̇܆ ܒܶܐܒܠܳܐ ܘܒܶܟܝܳܐ ܘܒܰܚܢܰܓܬܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܩܪܳܐ ܡܳܪܝܳܐ ܠܝܰܘܢܳܢ ܢܒܺܝܳܐ܆ ܘܫܰܕܪܶܗ ܗ̱ܘܳܐ ܨܶܝܕ ܢܺܝܢ̈ܘܳܝܶܐ܆ ܕܢܰܟܪܶܙ ܗ̱ܘܳܐ ܠܗܽܘܢ ܥܰܠ ܪܽܘܓܙܳܐ܆ ܕܰܥܬܺܝܕ ܗ̱ܘܳܐ ܕܢܺܐܬܶܐ ܥܠܰܝܗܽܘܢ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܐܰܟܡܳܐ ܕܒܰܛܶܠܬ ܡܶܢ ܢܺܝܢܘܶܐ܆ ܓܙܳܪ ܕܺܝܢܳܐ ܕܡܶܢ ܟܺܐܢܽܘܬܳܐ܆ ܒܰܛܶܠ ܒܪ̈ܰܚܡܰܝܟ ܡܶܢ ܥܺܕܬܳܟ ܣܶܕ̈ܩܶܐ ܒܺܝ̈ܫܶܐ ܘܚܶܪ̈ܝܳܢܶܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ܆ ܚܰܕ ܐܰܠܳܗܳܐ ܫܰܪܺܝܪܳܐ܆ ܐܶܬܪܰܚܰܡ ܥܰܠ ܡܰܪܥܺܝܬܳܟ܆ ܘܦܰܢܳܐ ܫ̈ܶܐܠܳܬܰܢ ܒܪ̈ܰܚܡܰܝܟ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܗܳܢܰܘ ܝܰܪܚܳܐ

ܝܰܡܳܐ ܪܰܒܳܐ ܕܰܡܠܶܐ ܚܢܳܢܳܐ ܒܳܟ ܐܶܬܕܰܠܶܐ܆ ܡܶܢ ܛܽܘܒܳܥܶܗ ܕܥܳܠܡܳܐ ܗܳܢܳܐ܆ ܒܰܕܡܽܘܬ ܦܶܛܪܳܘܣ ܒܶܝܬ ܡܰܚ̈ܫܽܘܠܶܐ܆ ܕܰܐܢ̱ܬܽ ܗ̱ܘ ܠܡܺܐܢܳܐ ܕܟܽܠܗܽܘܢ ܐܰܝܠܶܝܢ ܕܰܡܣܰܒܪܺܝܢ ܒܳܟ܀

ܩܳܠܳܐ ܒܩ̄: ܣܳܗ̈ܕܰܘܗ̱ܝ ܐܰܢ̱ܬܽܘܢ
ܐܶܙܰܠܬ ܡܰܪܝܰܡ܆ ܨܶܝܕ ܐܶܠܝܫܒܰܥ

ܠܳܟ ܡܶܬܟܰܫܦܳܐ ܥܺܕܰܬ ܩܽܘܕܫܳܐ܆ ܒܰܪ ܐܰܠܳܗܳܐ ܒܚܰܫܳܐ ܘܟܰܪܝܽܘܬܳܐ܆ ܫܡܰܥ ܒܳܥܽܘܬܳܗ̇ ܐܰܝܟ ܕܰܡܥܳܕ ܐܰܢ̱ܬ܆ ܘܗܰܒ ܫܶܐܠܳــ̈ـܬܳܗ̇ ܐܰܝܟ ܣܽܘܓܳܐܐ ܕܪ̈ܰܚܡܰܝܟ܆ ܫܰܝܢܳܐ ܠܰܐܪܥܳܐ܆ ܫܠܳܡܳܐ ܘܫܽܘܒܩܳܢܳܐ ܠܝܰܠ̈ܕܶܝܗ̇܆ ܘܣܰܒܪܳܐ ܛܳܒܳܐ ܠܐܢܳܫܽܘܬܳܐ܀

ܫܽܘܒܚܳܐ

ܒܰܕܡܽܘܬ ܓܰܠ̱̈ܠܶܐ ܫܓܺܝ̈ܫܶܐ ܕܝܰܡܳܐ܆ ܢܗܰܡܘ ܗ̱ܘܰܘ ܩ̈ܳܠܶܐ ܫܓܺܝ̈ܫܶܐ ܒܓܰܘ ܢܺܝܢܘܶܐ܆ ܒܥܺܝܪܳܐ ܕܓܳܥܝܳܐ ܛܠܳܝ̈ܶܐ ܕܒܳܟܶܝܢ܆ ܘܢܶܫ̈ܶܐ ܕܳܐܠܝ̈ܳܢ ܘܣܳܒ̈ܶܐ ܕܰܡܒܰܓܢܺܝܢ܆ ܘܩܳܥܶܝܢ ܘܳܐܡܪܺܝܢ܆ ܕܡܳܪܝ ܐܶܬܪܰܚܰܡ ܥܰܠ ܥܰܡܳܟ܆ ܘܠܳܐ ܬܰܗܡܶܐ ܡܶܢ ܝܳܪܬܽܘܬܳܟ܀

ܡܰܕܪܳܫܳܐ

ܩܳܠܳܐ ܒܩ̄: ܐܰܝܢܰܘ ܕܢܰܓܺܝܪܳܐ
ܨܠܺܝܒܳܐ ܥܒܺܝܕ ܠܶܗ܆ ܠܥܳܠܡܳܐ ܟܽܠܶܗ ܐܰܝܟ ܥܰܡܽܘܕܳܐ

ܥܽܘܢܺܝܬܳܐ: ܫܽܘܒܚܳܐ ܠܛܰܝܒܽܘܬܳܟ܆ ܚܳܢܰܬ ܠܢܺܝ̈ܢܘܳܝܶܐ܆ ܕܠܰܡܕܺܝܢ̱ܬܗܽܘܢ ܥܰܕܪܰܬ ܘܡܶܢ ܪܽܘܓܙܳܐ ܦܰܨܝܰܬ.

ܒܪ̈ܰܚܡܰܝܟ ܬܳܗܰܪ ܐ̱ܢܳܐ܆ ܘܬܶܡܗܶܬ ܘܶܐܬܕܰܡܪܶܬ܆ ܕܰܫܦܺܝܥܺܝܢ ܣܰܓܺܝ܆ ܘܥܰܠ ܟܽܠ ܡܪܰܚܶܡ ܐܰܢ̱ܬ܆ ܪܳܕܝܳܐ ܟܺܐܢܽܘܬܳܟ܆ ܘܛܰܝܒܽܘܬܳܟ ܚܳܢܳܐ܀

ܕܰܐܪܫܰܥܘ ܢܺܝ̈ܢܘܳܝܶܐ܆ ܘܰܚܛܰܘ ܕܠܳܐ ܡܫܽܘܚܬܳܐ܆ ܪܶܓܙܰܬ ܟܺܐܢܽܘܬܳܟ܆ ܘܓܶܙܡܰܬ ܠܡܰܘܒܳܕܽܘ܆ ܚܳܢܰܬ ܛܰܝܒܽܘܬܳܟ܆ ܘܟܰܕ ܬܳܒܘ ܐܶܬܥܰܕܰܪܘ܀

ܕܰܚܙܳܬ ܛܰܝܒܽܘܬܳܟ܆ ܕܰܪܗܶܛܘ ܘܰܛܦܰܣܘ ܒܳܗ̇܆ ܪܰܥܝܰܬ ܠܟܺܐܢܽܘܬܳܟ܆ ܘܰܟܠܳܬ ܠܡܰܪܕܽܘܬܳܐ ܘܪܶܗܛܰܬ ܬܝܳܒܽܘܬܳܐ܆ ܘܬܽܘܪ̈ܥܳܬܳܐ ܣܳܓܰܬ܀

ܚܙܳܬܶܗ ܠܒܰܪ ܡܰܬܰܝ܆ ܕܰܠܚܺܝܡ ܘܓܳܙܶܡ ܠܳܗ̇܆ ܪܶܗܛܰܬ ܘܶܐܬܓܰܘܣܰܬ ܒܰܬܪܰܥ ܚܰܢܳܢܳܐ܆ ܘܫܶܐܠܰܬ ܫܽܘܒܩܳܢܳܐ܆ ܘܢܶܣܒܰܬ ܥܽܘܕܪܳܢܳܐ܀

ܝܰܘ̈ܡܳܬܳܐ ܕܬܰܚܶܡ܆ ܝܰܘܢܳܢ ܒܰܪ ܡܰܬܰܝ܆ ܘܶܐܡܰܪ ܕܡܶܬܗܰܦܟܳܐ܆ ܢܺܝܢܘܶܐ ܒܫܽܘܠܳܡܗܽܘܢ܆ ܠܶܒܟܰܬ ܬܝܳܒܽܘܬܳܐ܆ ܘܰܦܢܳܬ ܘܶܐܬܚܰܢܢܰܬ܀

ܠܳܐ ܫܠܳܬ ܘܠܳܐ ܫܶܬܩܰܬ܆ ܒܠܺܠܝܳܐ ܘܒܺܐܝܡܳܡܳܐ܆ ܡܶܢ ܒܶܟܝܳܐ ܕܣܳܒܷ̈ܐ܆ ܘܕܶܡ̈ܥܶܐ ܕܰܛܠܳܝ̈ܶܐ܆ ܘܬܶܢ̈ܚܳܬܳܐ ܕܫܰܒܪ̈ܶܐ܆ ܕܓܳܥܶܝܢ ܘܡܶܬܬܰܢܚܺܝܢ܀

ܢܺܝܢܘܶܐ ܐܰܠܦܰܬ ܗ̱ܘܳܬ܆ ܬܝܳܒܽܘܬܳܐ ܠܥܰܡܳܐ܆ ܕܰܚܛܳܬ ܘܶܐܬܪܰܕܝܰܬ ܘܶܐܬܦܰܢܝܰܬ ܘܶܐܬܚܰܢܢܰܬ܆ ܘܕܶܚܠܰܬ ܘܶܐܬܥܰܕܪܰܬ܆ ܘܬܶܒܥܰܬ ܘܶܐܬܩܰܒܠܰܬ܀

ܥܶܪܩܰܬ ܛܰܝܒܽܘܬܳܐ܆ ܕܚܳܢܰܬ ܬܝܳܒܽܘܬܳܐ܆ ܘܠܰܒܟܰܬ ܠܕܳܘܺܝܬܳܐ܆ ܘܪܰܥܝܰܬ ܠܟܺܐܢܽܘܬܳܐ܆ ܘܚܳܢܰܬ ܠܰܡܕܺܝܢ̱ܬܳܐ܆ ܒܚܰܫܳܐ ܘܒܳܥܽܘܬܳܐ܀

ܨܽܘܪܰܬ ܬܝܳܒܽܘܬܳܐ܆ ܕܡܽܘܬܳܐ ܘܡܰܚܙܺܝܬܳܐ܆ ܗܘܳܬ ܒܳܥܽܘܬ ܢܺܝܢܘܶܐ܆ ܠܟܽܠܗܽܘܢ ܚܰܛܳܝ̈ܶܐ܆ ܘܺܝܕܰܥܘ ܕܰܐܝܟܰܢܳܐ܆ ܡܳܪܝܳܐ ܡܶܬܪܰܥܶܐ܀

ܪܶܗܛܰܬ ܘܛܶܦܣܰܬ ܠܳܗ̇܆ ܒܟܶܢ̈ܦܶܐ ܕܛܰܝܒܽܘܬܳܟ܆ ܘܰܩܪܳܬ ܒܓܶܢ ܛܳܒܳܐ܆ ܕܚܳܕܶܐ ܒܬܰܝܳܒ̈ܶܐ܆ ܘܩܰܪܒܰܬ ܬܝܳܒܽܘܬܳܐ܆ ܘܰܙܟܳܬ ܠܡܰܪܕܽܘܬܳܐ܀

ܬܝܳܒܽܘܬܳܐ ܕܥܶܒܕܰܬ܆ ܡܫܰܡܰܗܬܳܐ ܢܺܝܢܘܶܐ܆ ܒܰܕܡܽܘܬ ܡܰܚܙܺܝܬܳܐ܆ ܐܺܝܬܶܝܗ̇ ܠܥܳܡܰܪܬܳܐ܆ ܠܟܽܠܗܽܘܢ ܬܰܝܳܒ̈ܶܐ܆ ܕܦܳܢܶܝܢ ܘܡܶܬܦܰܪܩܺܝܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܟܺܐܦܳܐ ܕܰܚܙܳܐ ܕܳܢܺܝܐܶܝܠ

ܡܳܪܰܢ ܐܶܬܪܰܚܰܡܥܠܰܝܢ: ܡܳܪܰܢ ܩܰܒܶܠ ܬܶܫܡܶܫܬܰܢ܆

ܫܰܕܰܪ ܠܰܢ ܡܶܢ ܒܶܝܬ ܓܰܙܳܟ: ܚܢܳܢܳܐ ܘܪ̈ܰܚܡܶܐ ܘܫܽܘܒܩܳܢܳܐ܀

ܢܚܶܬ ܝܰܘܢܳܢ ܠܝܰܡܳܐ ܘܫܰܓܫܶܗ܆ ܘܰܣܠܶܩ ܗ̱ܘܳܐ ܠܝܰܒܫܳܐ ܘܕܰܠܚܶܗ܆ ܫܓܰܫ ܝܰܡܳܐ ܟܰܕ ܥܳܪܶܩ ܗ̱ܘܳܐ܆ ܘܙܳܥ ܝܰܒܫܳܐ ܟܰܕ ܡܰܟܪܶܙ ܗ̱ܘܳܐ܆ ܫܠܺܝ ܗ̱ܘܳܐ ܝܰܡܳܐ ܒܰܨܠܽܘܬܳܐ܆ ܐܳܦ ܝܰܒܫܳܐ ܒܰܬܝܳܒܽܘܬܳܐ܆ ܨܠܽܘܬܳܐ ܠܝܰܘܢܳܢ ܦܶܪܩܰܬ ܗ̱ܘܳܬ܆ ܘܰܠܢܺܝ̈ܢܘܳܝܶܐ ܒܳܥܽܘܬܳܐ܀

ܫܽܘܒܚܳܐ ܠܰܐܒܳܐ ܩܰܕܺܝܫܳܐ܆ ܡܩܰܒܠܳܢܳܐ ܕܟܽܠ ܬܰܝܳܒ̈ܶܐ܆ ܣܶܓܕܬܳܐ ܠܰܒܪܳܐ ܚܰܢܳܢܳܐ܆ ܡܦܰܢܝܳܢܳܐ ܕܟܽܠ ܫ̈ܶܐܠܳܬܳܐ܆ ܬܰܘܕܺܝܬܳܐ ܠܪܽܘܚܳܐ ܕܩܽܘܕܫܳܐ܆ ܕܚܰܣܺܝ ܘܰܫܒܰܩ ܠܢܺܝ̈ܢܘܳܝܶܐ܆ ܚܰܣܳܐ ܠܰܢ ܡܳܪܝ ܐܰܟܘܳܬܗܽܘܢ܆ ܘܰܫܒܽܘܩ ܚܰܘ̈ܒܰܝܢ ܘܰܚ̈ܛܳܗܰܝܢ܀

ܫܳܡܽܘܥܳܐ ܕܰܨ̈ܠܰܘܳܬܳܐ܇ ܘܰܡܦܰܢܝܳܢܳܐ ܕܫ̈ܶܐܠܳܬܳܐ܆

ܫܡܰܥ ܨܠܽܘܬܰܢ ܘܶܐܬܪܰܥܳܐ ܠܰܢ܇ ܘܦܰܢܳܐ ܒܪ̈ܰܚܡܰܝܟ ܫ̈ܶܐܠܳܬܰܢ܀