ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܝ: ܗ ـ ܟܐ Romans 10:5-21

ܡܽܘܫܶܐ ܓܶܝܪ ܗܳܟܰܢܳܐ ܟ‍ܬܰܒ ܟܺܐܢܽܘܬܐ ܕܰܒܢܳܡܽܘܣܳܐ܆ ܕܡܰܢ ܕܢܶܥܒܶܕ ܗܳܠܶܝܢ ܢܺܚܶܐ ܒܗܶܝܢ. ܟܺܐܢܽܘܬܐ ܕܶܝܢ ܕܰܒܗܰܝܡܳܢܽܘܬܐ ܗܳܟܰܢܳܐ ܐܳܡܪܳܐ. ܕܠܳܐ ܬܺܐܡܰܪ ܒܠܶܒܳܟ܆ ܕܡܰܢܽܘ ܣܠܶܩ ܠܰܫܡܰܝܳܐ ܘܰܐܚܶܬ ܠܰܡܫܺܝܚܳܐ. ܘܡܰܢܽܘ ܢܚܶܬ ܠܰܬܗܽܘܡܳܐ ܕܰܫܝܽܘܠ܆ ܘܰܐܣܶܩ ܠܰܡܫܺܝܚܳܐ ܡܶܢ ܒܶܝܬ ܡܺܝ̈ܬܐ. ܐܶܠܳܐ ܡܳܢܳܐ ܐܶܡܰܪ. ܩܰܪܺܝܒ ܗ̱ܽܘ ܠܳܟ ܦܶܬܓܳܡܳܐ ܠܦܽܘܡܳܟ ܘܰܠܠܶܒܳܟ. ܗܳܕܳܐ ܗ̱ܝ ܡܶܠܬܐ ܕܗܰܝܡܳܢܽܘܬܐ ܕܡܰܟܪܙܺܝܢܰܢ. ܘܶܐܢ ܬܰܘܕܶܐ ܒܦܽܘܡܳܟ ܒܡܳܪܰܢ ܝܶܫܽܘܥ܇ ܘܰܬܗܰܝܡܶܢ ܒܠܶܒܳܟ ܕܰܐܠܳܗܳܐ ܐܰܩܺܝܡܶܗ ܡܶܢ ܒܶܝܬ ܡܺܝ̈ܬܶܐ܆ ܬܺܚܶܐ. ܠܶܒܳܐ ܓܶܝܪ ܕܰܡܗܰܝܡܶܢ ܒܶܗ ܡܶܙܕܰܕܰܩ. ܘܦܽܘܡܳܐ ܕܡܰܘܕܶܐ ܒܶܗ ܚܳܝܶܐ. ܐܶܡܰܪ ܓܶܝܪ ܟ‍ܬܳܒܳܐ܆ ܕܟܽ‍ܠ ܕܰܡܗܰܝܡܶܢ ܒܶܗ ܠܳܐ ܢܶܒܗܰܬ. ܘܰܒܗܳܕܶܐ ܠܳܐ ܦܪܰܫ ܠܺܝ̈ܗܽܘܕܳܝܶܐ ܘܠܳܐ ܠܰܐܪ̈ܡܳܝܶܐ. ܚܰܕ ܗܽܘ ܓܶܝܪ ܡܳܪܝܳܐ ܕܟܽ‍ܠܗܽܘܢ܆ ܕܥܰܬܺܝܪ ܒܟܽ‍ܠ ܕܩܳܪܶܐ ܠܶܗ. ܟܽ‍ܠ ܓܶܝܪ ܕܢܶܩܪܶܐ ܫܡܶܗ ܕܡܳܪܝܳܐ ܢܺܚܶܐ. ܐܰܝܟܰܢܳܐ ܗܳܟܺܝܠ ܢܶܩܪܽܘܢ ܠܐܝܢܳܐ ܕܠܳܐ ܗܰܝܡܶܢܘ ܒܶܗ. ܐܰܘ ܐܝܟܰܢܳܐ ܢܗܰܝܡܢܽܘܢ ܠܗܰܘ ܕܠܳܐ ܫܰܡܥܽܘܗ̱ܝ. ܐܰܘ ܐܰܝܟܰܢܳܐ ܢܶܫܡܥܽܘܢ ܕܠܳܐ ܡܰܟܪܙܳܢܳܐ. ܐܰܘ ܐܰܝܟܰܢܳܐ ܢܰܟܪܙܽܘܢ ܐܶܢ ܠܳܐ ܢܶܫܬܰܠܚܽܘܢ. ܐܰܝܟ ܕܰܟ‍ܬܺܝܒ܆ ܕܡܳܐ ܝܳـ̈ܐܝܳܢ ܪ̈ܶܓ‍ܠܰܝܗܽܘܢ ܕܰܡܣܰܒܪ̈ܰܝ ܫܠܳܡܳܐ ܘܕܰܡܣܰܒܪ̈ܰܝ ܛܳـ̈ܒܳܬܐ. ܐܶܠܳܐ ܠܳܐ ܗ̱ܘܳܐ ܟܽ‍ܠܗܽܘܢ ܐܶܫܬܡܰܥܘ ܠܰܣܒܰܪܬܐ ܕܶܐܘܰܢܓܶ‍ܠܺܝܳܘܢ. ܐܶܫܰܥܝܳܐ ܓܶܝܪ ܐܶܡܰܪ܆ ܡܳܪܝ ܡܰܢܽܘ ܗܰܝܡܶܢ ܠܒܰܪ̱ܬ ܩܳܠܰܢ. ܡܶܟܺܝܠ ܗܰܝܡܳܢܽܘܬܐ ܡܶܢ ܡܰܫܡܰܥ ܐܶܕܢܳܐ ܗ̱ܝ. ܘܡܰܫܡܰܥ ܐܶܕܢܳܐ ܡܶܢ ܡܶܠܬܐ ܕܰܐܠܗܳܐ. ܐܶܠܳܐ ܐܳܡܰܪ ܐ̱ܢܳܐ܆ ܕܰܠܡܳܐ ܠܳܐ ܫܡܰܥܘ. ܘܗܳܐ ܒܟܽ‍ܠܳܗ̇ ܐܰܪܥܳܐ ܢܶܦܩܰܬ ܒܰܪ̱ܬ ܩܳܠܗܽܘܢ܆ ܘܰܒܣܰܘܦܶܝ̈ܗ̇ ܕܬܺܒܶܝܠ ܡܶܠܰܝ̈ܗܽܘܢ. ܐܶܠܳܐ ܐܳܡܰܪ ܐ̱ܢܳܐ܆ ܕܰܠܡܳܐ ܠܐ ܝܺܕܰܥ ܐܺܝܣܪܳܝܶܠ. ܩܰܕܡܳܝܳܐ ܡܽܘܫܶܐ ܗܳܟܰܢܳܐ ܐܶܡܰܪ܆ ܐܰܛܶܢܟܽܘܢ ܒܥܰܡ ܕܠܳܐ ܥܰܡ܇ ܘܰܒܥܰܡܳܐ ܕܠܳܐ ܡܶܬܛܦܺܝܣ ܐܰܪܓܶܙܟܽܘܢ. ܐܶܫܰܥܝܳܐ ܕܶܝܢ ܐܰܡܪܰܚ ܘܶܐܡܰܪ. ܕܶܐܬܚܙܺܝܬ ܠܰܐܝܠܶܝܢ ܕܠܳܐ ܒܥܰܐܘܽܢܝ܇ ܘܶܐܫܬܰܟܚܶܬ ܠܰܐܝܠܶܝܢ ܕܰܥܠܰܝ ܠܐ ܫܰܐܷܠܘ. ܠܐܺܝܣܪܳܝܶܠ ܕܶܝܢ ܐܶܡܰܪ. ܕܦܶܫܛܶܬ ܐܻܝ̈ܕܰܝ ܝܰܘܡܳܐ ܟܽ‍ܠܶܗ܆ ܠܘܳܬ ܥܰܡܳܐ ܕܡܶܬܚܪܶܐ ܘܠܳܐ ܡܶܬܛܦܺܝܣ܀

ܕܚܓܐ ܕܐܘ̈ܫܥܢܐ ܕܒܘܪܟ ܣܘܟ̈ܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܝܐ: ܝܓ ـ ܠܘ Romans 11:13-36

ܠܟܽܘܢ ܕܶܝܢ ܐܳܡܰܪ ܐ̱ܢܳܐ ܠܥܰܡ̱̈ܡܶܐ. ܐܶܢܳܐ ܕܺܐܝܬܝ ܫܠܺܝܚܳܐ ܕܥܰܡ̱̈ܡܶܐ܆ ܠܬܶܫܡܶܫܬܝ ܡܫܰܒܰܚ ܐ̱ܢܳܐ. ܕܰܠܡܳܐ ܐܰܛܶܢ ܠܰܒ̈ܢܰܝ ܒܶܣܪܝ܇ ܘܰܐܚܶܐ ܐ̱ܢܳܫܺܝ̈ܢ ܡܶܢܗܽܘܢ. ܐܶܢ ܓܶܝܪ ܡܶܣܬܰܠܝܳܢܽܘܬܗܽܘܢ ܬܰܪܥܽܘܬܳܐ ܠܥܳܠܡܳܐ ܗܘܳܬ܆ ܟܡܳܐ ܗܳܟܺܝܠ ܦܽܘܢܳܝܗܽܘܢ܇ ܐܶܠܐ ܚܰـ̈ܝܶܐ ܕܡܶܢ ܒܶܝܬ ܡܺܝ̈ܬܐ. ܘܶܐܢ ܕܶܝܢ ܪܺܫܺܝܬܐ ܩܰܕܺܝܫܳܐ܆ ܐܳܦ ܓܒܺܝܠܬܳܐ. ܘܶܐܢ ܥܶܩܳܪܳܐ ܩܰܕܺܝܫ ܗܽܘ܆ ܐܳܦ ܣܰܘ̈ܟܶܐ. ܘܶܐܢ ܡܶܢ ܣܰܘ̈ܟܶܐ ܐܶܬܦܫܰܚ̈ܝ܇ ܘܰܐܢ̱ܬ ܕܙܰܝܬܳܐ ܐܰܢ̱ܬ ܕܒܰܪܳܐ ܐܶܬܛܥܶܡܬ ܒܕܽܘܟܝܳܬܗܶܝ̈ܢ܇ ܘܰܗܘܰܝܬ ܫܰܘܬܳܦܳܐ ܠܥܶܩܳܪܶܗ ܘܰܠܫܽܘܡܢܶܗ ܕܙܰܝܬܐ܆ ܠܐ ܬܶܫܬܰܒܗܰܪ ܥܰܠ ܣܰܘ̈ܟܶܐ. ܐܶܢ ܕܶܝܢ ܡܶܫܬܰܒܗܰܪ ܐܰܢ̱ܬ܆ ܠܐ ܗܘܳܐ ܐܰܢ̱ܬ ܫܩܺܝܠ ܠܶܗ ܠܥܶܩܳܪܳܐ܇ ܐܶܠܐ ܗܽܘ ܥܶܩܳܪܳܐ ܫܩܺܝܠ ܠܳܟ. ܘܰܟܒܰܪ ܬܻܐܡܰܪ ܕܣܰܘ̈ܟܶܐ ܕܶܐܬܦܫܰܚ̈ܝ܆ ܕܶܐܢܳܐ ܒܕܽܘܟܝܳܬܗܶܝ̈ܢ ܐܶܬܛܥܶܡ. ܫܰܦܺܝܪ. ܗܳܠܶܝܢ ܡܶܛܽܠ ܕܠܐ ܗܰܝܡܶܢ ܐܶܬܦܫܰܚ. ܐܰܢ̱ܬ ܕܶܝܢ ܒܗܰܝܡܳܢܽܘܬܐ ܩܳܡܬ. ܠܐ ܬܶܬܪܺܝܡ ܒܪܶܥܝܳܢܳܟ܆ ܐܶܠܐ ܕܚܰܠ. ܐܶܢ ܐܠܗܳܐ ܓܶܝܪ ܥܰܠ ܣܰܘ̈ܟܶܐ ܕܡܶܢ ܟܝܳܢܗܶܝܢ ܠܐ ܚܳܣ܆ ܕܰܠܡܳܐ ܐܳܦܠܐ ܥܠܰܝܟ ܢܚܽܘܣ. ܚܙܺܝ ܗܳܟܺܝܠ ܒܰܣܺܝܡܽܘܬܗ ܘܩܰܫܝܽܘܬܗ ܕܰܐܠܗܳܐ. ܥܰܠ ܐܰܝܠܶܝܢ ܕܰܢܦܰܠܘ ܩܰܫܝܽܘܬܐ. ܥܠܰܝܟ ܕܶܝܢ ܒܰܣܺܝܡܽܘܬܐ܆ ܐܶܢ ܬܩܰܘܶܐ ܒܳܗ̇ ܒܒܰܣܺܝܡܽܘܬܐ. ܘܶܐܢ ܠܐ܇ ܐܳܦ ܐܰܢ̱ܬ ܬܶܬܦܫܰܚ. ܘܗܳܢܽܘܢ ܐܶܢ ܠܐ ܢܩܰܘܽܘܢ ܒܚܰܣܺܝܪܽܘܬ ܗܰܝܡܳܢܽܘܬܗܽܘܢ܆ ܐܳܦ ܗܶܢܽܘܢ ܢܶܬܛܰܥܡܽܘܢ. ܡܶܫܟܰܚ ܓܶܝܪ ܐܠܗܳܐ ܕܬܘܒ ܢܰܛܥܶܡ ܐܶܢܽܘܢ. ܐܶܢ ܓܶܝܪ ܐܰܢ̱ܬ ܕܡܶܢ ܙܰܝܬܳܐ ܐܰܢ̱ܬ ܕܒܰܪܳܐ܇ ܗܰܘ ܕܒܰܟܝܳܢܳܟ ܐܶܬܦܫܰܚܬ܇ ܘܰܕܠܳܐ ܒܰܟܝܳܢܳܟ ܐܰܬܛܥܶܡܬ ܒܙܰܝܬܐ ܛܳܒܳܐ܆ ܟܡܳܐ ܗܳܟܺܝܠ ܗܳܢܽܘܢ ܐܶܢ ܢܶܬܛܰܥܡܽܘܢ ܒܙܰܝܬܐ ܕܰܟܝܳܢܗܽܘܢ. ܨܳܒܶܐ ܐ̱ܢܳܐ ܓܶܝܪ ܕܬܶܕܥܽܘܢ ܐܰܚܰـ̈ܝ ܐ̱ܪܳܙܳܐ ܗܳܢܳܐ܇ ܕܠܐ ܬܶܗܘܽܘܢ ܚܰܟܺܝܡܺܝܢ ܒܪܶܥܝܳܢ ܢܰܦܫܟܽܘܢ܇ ܕܰܥܘܺܝܪܽܘܬ ܠܶܒܳܐ ܡܶܢ ܐܰܬܰܪ ܩܰܠܺܝܠ ܗܘܳܬ ܠܐܻܝܣܪܳܝܶܠ܆ ܥܕܰܡܳܐ ܕܢܶܥܽܘܠ ܡܽܘܠܳܝܳܐ ܕܥܰܡ̱̈ܡܶܐ܆ ܘܗܳܝܕܶܝܢ ܟܽ‍ܠܶܗ ܐܝܣܪܳܝܶܠ ܢܺܚܶܐ. ܐܰܝܟܰܢܳܐ ܕܰܟ‍ܬܺܝܒ. ܕܢܺܐܬܶܐ ܡܶܢ ܨܶܗܝܽܘܢ ܦܳܪܽܘܩܳܐ܆ ܘܢܰܗܦܶܟ ܥܰܘܠܳܐ ܡܶܢ ܝܰܥܩܽܘܒ. ܘܗܳܝܕܶܝܢ ܬܶܗܘܶܐ ܠܗܽܘܢ ܕܺܝܰܬܩܺܐ ܗܳܝ ܕܡܶܢ ܠܘܳܬܝ܇ ܡܳܐ ܕܫܶܒܩܶܬ ܠܗܽܘܢ ܚܛܳܗܰܝ̈ܗܽܘܢ. ܒܶܐܘܰܢܓܶ‍ܠܺܝܳܘܢ ܕܶܝܢ܆ ܒܥܶܠܕ̈ܒܳܒܶܐ ܐܶܢܽܘܢ ܡܶܛܽܠܳܬܟܽܘܢ. ܘܰܒܓܰܒܝܽܘܬܐ ܚܰܒܺܝܒܺܝܢ ܐܶܢܽܘܢ ܡܶܛܽܠ ܐܰܒܳܗ̈ܳܬܐ. ܠܐ ܓܶܝܪ ܗܳܦܶܟ ܐܠܗܳܐ ܒܡܰܘܗܰܒܬܶܗ ܘܰܒܩܶܪܝܳܢܶܗ. ܐܰܝܟܰܢܳܐ ܓܶܝܪ ܕܳܐܦ ܐܰܢ̱ܬܘܢ ܠܐ ܡܶܬܛܦܺܝܣܺܝܢ ܗܘܰܝܬܘܢ ܠܰܐܠܳܗܳܐ ܡܶܢ ܩܕܺܝܡ܇ ܘܗܳܫܳܐ ܐܶܬܚܢܶܢܬܘܢ ܡܶܛܽܠ ܠܐ ܡܶܬܛܦܺܝܣܳܢܽܘܬܗܽܘܢ ܕܗܳܢܽܘܢ܆ ܗܳܟܰܢܳܐ ܐܳܦ ܗܳܠܶܝܢ ܠܐ ܐܶܬܛܦܺܝܣܘ ܗܳܫܳܐ ܠܪ̈ܰܚܡܶܐ ܕܰܥܠܰܝܟܽܘܢ܇ ܕܳܐܦ ܥܠܰܝܗܽܘܢ ܢܶܗܘܽܘܢ ܪ̈ܰܚܡܶܐ. ܚܒܰܫ ܓܶܝܪ ܐܰܠܗܳܐ ܠܟܽ‍ܠܢܳܫ ܒܠܳܐ ܡܶܬܛܦܺܝܣܳܢܽܘܬܐ܆ ܕܥܰܠ ܟܽ‍ܠ ܐ̱ܢܳܫ ܢܪܰܚܶܡ. ܐܳܘ ܥܽܘܡܩܳܐ ܕܥܽܘܬܪܳܐ ܘܚܶܟܡܬܳܐ ܘܡܰܕܥܳܐ ܕܰܐܠܗܳܐ܆ ܕܐܢܳܫ ܠܐ ܡܳܫ ܕܺܝ̈ܢܰܘܗܝ: ܘܽܐܘܪ̈ܚܳܬܶܗ ܡܶܬܥܰܩ̈ܒܳܢ. ܡܰܢܽܘ ܓܶܝܪ ܝܺܕܰܥ ܪܶܥܝܳܢܶܗ ܕܡܳܪܝܳܐ. ܐܰܘ ܡܰܢܽܘ ܗܘܳܐ ܠܶܗ ܒܥܶܠ ܡܶܠܟܳܐ. ܘܡܰܢܽܘ ܩܰܕܶܡ ܝܰܗ̱ܒ ܠܶܗ܆ ܘܟܶܢ ܢܣܰܒ ܡܶܢܶܗ. ܡܶܛܽܠ ܕܟܽ‍ܠ ܡܶܢܶܗ ܘܟܽ‍ܠ ܒܶܗ ܘܟܽ‍ܠ ܒܺܐܝܕܶܗ. ܕܠܶܗ ܬܶܫܒ̈ܚܳܢ ܘܒܽܘܪ̈ܟܳܢ܇ ܠܥܳܠܰܡ ܥܳܠܡܺܝܢ ܐܰܡܺܝܢ܀