ܕܢܓܗ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܦܺܝܠܶܡܽܘܢ
ܐ: ܐ ـ ܟܗ Philemon 1:1-25

ܦܰܘܠܳܘܣ ܐܰܣܺܝܪܶܗ ܕܝܶܫܽܘܥ ܡܫܺܝܚܳܐ ܘܛܺܝܡܳܬܶܐܘܣ ܐܰܚܳܐ܆ ܠܦܺܝܠܺܡܳܘܢ ܚܰܒܺܝܒܳܐ ܘܦܳܠܚܳܐ ܕܥܰܡܰܢ. ܘܠܰܐܦܝܰܐ ܚܰܒܺܝܒܬܰܢ. ܘܠܰܐܪܟܺܝܦܳܘܣ ܦܳܠܚܳܐ ܕܥܰܡܰܢ. ܘܰܠܥܺܕ̱ܬܐ ܕܰܒܒܰܝܬܟ. ܛܰܝܒܽܘܬܐ ܥܰܡܟܽܘܢ ܘܰܫܠܳܡܳܐ ܡܶܢ ܐܠܳܗܳܐ ܐܰܒܽܘܢ܆ ܘܡܶܢ ܡܳܪܰܢ ܝܶܫܽܘܥ ܡܫܺܝܚܳܐ. ܡܰܘܕܶܐ ܐ̱ܢܳܐ ܠܰܐܠܳܗܝ ܒܟܽ‍ܠܙܒܰܢ. ܘܡܶܬܕܟܰܪ ܐ̱ܢܳܐ ܠܳܟ ܒܰܨ̈ܠܰܘܳܬܝ܆ ܗܳܐ ܡܶܢ ܕܫܶܡܥܶܬ ܗܰܝܡܳܢܽܘܬܟ. ܘܚܽܘܒܳܐ ܕܺܐܝܬ ܠܳܟ ܠܘܳܬ ܡܳܪܰܢ ܝܶܫܽܘܥ ܘܰܠܘܳܬ ܟܽ‍ܠܗܽܘܢ ܩܰܕܺܝ̈ܫܶܐ܆ ܕܬܶܗܘܶܐ܆ ܫܰܘܬܳܦܽܘܬܐ ܕܗܰܝܡܳܢܽܘܬܟ ܝܳܗܒܳܐ ܦܺܐܪ̈ܶܐ܇ ܒܰܥ̈ܒܳܕܶܐ ܘܒܺܝܕܰܥܬܳܐ ܕܟܽ‍ܠ ܛܳܒ̈ܳܢ ܕܺܐܝܬ ܠܟܽܘܢ ܒܝܶܫܽܘܥ ܡܫܺܝܚܳܐ. ܚܰܕܽܘܬܳܐ ܓܶܝܪ ܣܰܓܺܝܐܬܳܐ ܐܻܝܬ ܠܰܢ ܘܒܽܘܝܳܐܴܐ܆ ܕܰܒܝܰܕ ܚܽܘܒܳܟ ܐܶܬܬܢܺܝܚܘ ܪ̈ܰܚܡܶܐ ܕܩܰܕܺܝ̈ܫܶܐ. ܡܶܛܽܠ ܗܳܕܶܐ ܦܰܪܶܗ̱ܣܺܝܰܐ ܣܰܓܺܝܐܬܳܐ ܐܺܝܬ ܠܺܝ ܒܰܡܫܺܝܚܳܐ܆ ܕܶܐܦܩܽܘܕ ܠܳܟ ܐܰܝܠܶܝܢ ܕܙܳܕ̈ܩܳܢ. ܡܶܛܽܠ ܚܽܘܒܳܐ ܕܶܝܢ ܡܶܒܥܰܐ ܗ̱ܘ ܒܳܥܶܐ ܐ̱ܢܳܐ ܡܶܢܳܟ ܐܶܢܳܐ ܦܰܘܠܳܘܣ܆ ܕܺܐܝܬܝ ܣܳܒܳܐ ܐܰܝܟ ܕܝܳܕܰܥ ܐܰܢ̱ܬ܇ ܗܳܫܳܐ ܕܶܝܢ ܐܳܦ ܐܰܣܺܝܪܳܐ ܕܝܶܫܽܘܥ ܡܫܺܝܚܳܐ. ܘܒܳܥܶܐ ܐ̱ܢܳܐ ܡܶܢܳܟ܆ ܥܰܠ ܒܶܪܝ ܐܰܝܢܳܐ ܕܝܶܠܕܶܬ ܒܰܐܣܽܘܪ̈ܰܝ. ܐܳܢܺܣܺܝܡܳܘܣ܇ ܗܰܘ ܕܒܰܙܒܰܢ ܠܰܝܬ ܗܘܳܐ ܠܳܟ ܒܶܗ ܚܰܫܚܽܘ܇ ܗܳܫܳܐ ܕܶܝܢ ܐܳܦ ܠܳܟ ܐܳܦ ܠܺܝ ܛܳܒ ܚܳܫܰܚ. ܘܫܰܕܰܪܬܶܗ ܠܳܟ. ܐܰܢ̱ܬ ܕܶܝܢ ܐܰܝܟ ܕܰܠܝܰܠܕܳܐ ܕܺܝܠܝ ܗܳܟܰܢܳܐ ܩܰܒܶܠܳܝܗܝ. ܨܳܒܶܐ ܗܘܺܝܬ ܓܶܝܪ ܕܰܠܘܳܬܝ ܐܶܚܕܺܝܘܗ̱ܝ܆ ܕܢܶܗܘܶܐ ܡܫܰܡܶܫ ܠܺܝ ܚܠܳܦܰܝܟ ܒܰܐܣܽܘܪ̈ܶܐ ܕܶܐܘܰܢܓܶ‍ܠܺܝܳܘܢ. ܒܶܠܥܳܕ ܡܶܠܟܳܟ ܕܶܝܢ ܠܐ ܨܒܺܝܬ ܡܶܕܶܡ ܠܡܶܥܒܰܕ܆ ܕܠܐ ܐܝܟ ܕܒܰܩܛܺܝܪܳܐ ܬܶܗܘܶܐ ܛܳܒܬܟ܇ ܐܶܠܐ ܒܨܶܒܝܳܢܳܟ. ܟܒܰܪ ܕܶܝܢ ܐܳܦ ܡܶܛܽܠ ܗܳܕܶܐ ܫܰܢܺܝ ܕܫܳܥܬܳܐ܆ ܕܰܠܥܳܠܰܡ ܬܶܐܚܕܺܝܘܗܝ܇ ܠܐ ܡܶܟܺܝܠ ܐܰܝܟ ܥܰܒܕܳܐ. ܐܶܠܐ ܝܰܬܝܪ ܡܶܢ ܥܰܒܕܳܐ. ܐܰܚܳܐ ܚܰܒܺܝܒܳܐ ܕܺܝܠܝ ܚܰܕ ܟܡܳܐ ܕܺܝܠܳܟ. ܘܒܰܒܣܰܪ ܘܰܒܡܳܪܰܢ. ܐܶܢ ܗܳܟܺܝܠ ܐܺܝܬܰܝܟ ܠܺܝ ܫܰܘܬܳܦܳܐ܆ ܩܰܒܶܠܳܝܗܝ ܐܰܝܟ ܕܠܺܝ. ܘܶܐܢ ܡܶܕܶܡ ܚܰܣܪܳܟ ܐܰܘ ܚܰܝܳܒ܆ ܗܳܕܶܐ ܥܠܰܝ ܚܫܽܘܒ. ܐܶܢܳܐ ܦܰܘܠܳܘܣ ܟܶ‍ܬܒܶܬ ܒܺܐܝ̈ܕܰܝ. ܐܶܢܳܐ ܦܳܪܰܥ ܐ̱ܢܳܐ܆ ܕܠܐ ܐܻܡܰܪ ܠܳܟ܇ ܕܳܐܦ ܢܰܦܫܳܟ ܚܰܝܳܒ ܐܰܢ̱ܬ ܠܺܝ. ܐܻܝܢ ܐܳܚܝ. ܐܶܢܳܐ ܐܶܬܬܢܺܝܚ ܒܳܟ ܒܡܳܪܰܢ. ܐܰܢܺܝܚ ܪ̈ܰܚܡܰܝ ܒܰܡܫܺܝܚܳܐ. ܡܶܛܽܠ ܕܰܬܟܺܝܠ ܐ̱ܢܳܐ ܕܫܳܡܰܥ ܐܰܢ̱ܬ ܠܺܝ܆ ܟܶ‍ܬܒܶܬ ܠܳܟ. ܘܝܳܕܰܥ ܐ̱ܢܳܐ ܕܝܰܬܝܪ ܡܶܢ ܡܳܐ ܕܳܐܡܰܪ ܐ̱ܢܳܐ܇ ܥܳܒܶܕ ܐܰܢ̱ܬ. ܒܰܚܕܳܐ ܕܶܝܢ ܐܳܦ ܛܰܝܶܒ ܠܺܝ ܒܶܝܬ ܡܰܫܪܝܳܐ. ܡܣܰܒܰܪ ܐ̱ܢܳܐ ܓܶܝܪ܆ ܕܒܰܨ̈ܠܰܘܳܬܟܽܘܢ ܡܶܬܺܝܗܶܒ ܐ̱ܢܳܐ ܠܟܽܘܢ. ܫܳܐܷܠ ܒܰܫܠܳܡܳܟ ܐܶܦܰܦܪܰܐ ܫܰܒܝܳܐ ܕܥܰܡܝ ܒܝܶܫܽܘܥ ܡܫܺܝܚܳܐ. ܘܡܰܪܩܳܘܣ ܘܰܐܪܺܣܛܰܪܟܳܘܣ. ܘܕܺܡܰܐ. ܘܠܽܘܩܰܐ ܡܥܰܕܪ̈ܳܢܰܝ. ܛܰܝܒܽܘܬܗ ܕܡܳܪܰܢ ܝܶܫܽܘܥ ܡܫܺܝܚܳܐ ܥܰܡ ܪܽܘܚܟܽܘܢ ܐܰܡܺܝܢ܀

ܕܨܦܪܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܙ: ܟܗ܇ ܚ ـ ܠ Romans 7:25, 8:1-30

ܡܰܘܕܶܐ ܐ̱ܢܳܐ ܠܐܠܳܗܳܐ ܒܝܰܕ ܡܳܪܰܢ ܝܶܫܽܘܥ ܡܫܺܝܚܳܐ. ܗܳܫܳܐ ܗܳܟܺܝܠ ܐܶܢܳܐ ܒܪܶܥܝܳܢܝ܆ ܥܰܒܕܳܐ ܐ̱ܢܳܐ ܕܢܳܡܽܘܣܳܐ ܕܰܐܠܳܗܳܐ. ܒܒܶܣܪܝ ܕܶܝܢ ܐܺܝܬܰܝ ܥܰܒܕܳܐ ܕܢܳܡܽܘܣܳܐ ܕܰܚܛܺܝܬܐ. ܡܶܟܺܝܠ ܠܰܝܬ ܚܰܝܳܒܽܘܬܐ ܠܰܐܝܠܶܝܢ ܕܠܐ ܡܗܰܠܟܺܝܢ ܒܰܒܣܰܪ ܒܝܶܫܽܘܥ ܡܫܺܝܚܳܐ. ܢܳܡܽܘܣܳܐ ܓܶܝܪ ܕܪܽܘܚܳܐ ܕ̈ܚܰܝܶܐ ܕܰܒܝܶܫܽܘܥ ܡܫܺܝܚܳܐ܆ ܚܰܪܪܳܟ ܡܶܢ ܢܳܡܽܘܣܳܐ ܕܰܚܛܺܝܬܐ ܘܰܕܡܰܘܬܐ. ܡܶܛܽܠ ܕܰܡܚܺܝܠ ܗ̱ܘܳܐ ܓܶܝܪ ܢܳܡܽܘܣܳܐ ܒܝܰܕ ܟܪܺܝܗܽܘܬܶܗ ܕܒܶܣܪܳܐ܆ ܫܰܕܰܪ ܐܠܳܗܳܐ ܠܰܒܪܶܗ ܒܰܕܡܽܘܬܐ ܕܒܶܣܪܳܐ ܕܰܚܛܺܝܬܐ܆ ܡܶܛܽܠܳܬܗ̇ ܕܰܚܛܺܝܬܐ ܕܰܢܚܰܝܒܺܝܗ̇ ܠܰܚܛܺܝܬܐ ܒܒܶܣܪܶܗ. ܕܟܺܐܢܽܘܬܐ ܕܢܳܡܽܘܣܳܐ ܒܰܢ ܬܶܬܡܰܠܷܐ. ܕܠܐ ܗܘܳܐ ܒܰܒܣܰܪ ܡܗܰܠܟܺܝܢܰܢ ܐܶܠܐ ܒܪܽܘܚ. ܐܰܝܠܶܝܢ ܓܶܝܪ ܕܒܰܒܣܰܪ ܐܶܢܽܘܢ ܕܰܒܣܰܪ ܗ̱ܽܘ ܡܶܬܪܰܥܶܝܢ. ܘܰܐܝܠܶܝܢ ܕܰܕܪܽܘܚ ܐܶܢܽܘܢ ܕܪܽܘܚ ܗ̱ܽܘ ܡܶܬܪܰܥܶܝܢ. ܬܰܪܥܺܝܬܳܐ ܓܶܝܪ ܕܒܶܣܪܳܐ ܡܰܘܬܰܐ ܗ̱ܘ. ܘܬܰܪܥܺܝܬܐ ܕܪܽܘܚܳܐ ܚܰـ̈ܝܶܐ ܘܰܫܠܳܡܳܐ. ܡܶܛܽܠ ܕܬܰܪܥܺܝܬܐ ܕܒܶܣܪܳܐ ܒܥܶܠܕܒܳܒܽܘܬܳܐ ܗ̱ܝ ܠܘܳܬ ܐܠܳܗܳܐ. ܠܢܳܡܽܘܣܳܐ ܓܶܝܪ ܕܰܐܠܳܗܳܐ ܠܐ ܡܶܫܬܰܥܒܕܳܐ. ܡܶܛܽܠ ܕܠܐ ܡܶܫܟܚܳܐ. ܘܰܐܝܠܶܝܢ ܕܒܰܒܣܰܪ ܐܶܢܽܘܢ ܠܡܶܫܦܰܪ ܠܐܠܳܗܳܐ ܠܐ ܡܶܫܟܚܺܝܢ. ܐܰܢ̱ܬܘܢ ܕܶܝܢ ܠܐ ܗܘܰܝܬܘܢ ܒܰܒܣܰܪ ܐܶܠܐ ܒܪܽܘܚ܆ ܐܶܢ ܫܰܪܺܝܪܳܐܝܺܬ ܪܽܘܚܶܗ ܕܰܐܠܳܗܳܐ ܥܳܡܪܳܐ ܒܟܽܘܢ. ܐܶܢ ܕܶܝܢ ܐ̱ܢܳܫ ܠܰܝܬ ܒܶܗ ܪܽܘܚܶܗ ܕܰܡܫܺܝܚܳܐ܆ ܗܳܢܳܐ ܠܐ ܗܘܳܐ ܕܺܝܠܶܗ. ܘܶܐܢ ܕܶܝܢ ܡܫܺܝܚܳܐ ܒܟܽܘܢ܆ ܦܰܓܪܳܐ ܡܺܝܬ ܗ̱ܽܘ ܡܶܛܽܠ ܚܛܺܝܬܐ܇ ܪܽܘܚܳܐ ܕܶܝܢ ܚܰܝܳܐ ܗ̱ܝ ܡܶܛܽܠ ܟܺܐܢܽܘܬܐ. ܘܶܐܢ ܪܽܘܚܶܗ ܕܗܰܘ ܡܰܢ ܕܰܐܩܺܝܡ ܠܡܳܪܰܢ ܝܶܫܽܘܥ ܡܫܺܝܚܳܐ ܡܶܢ ܒܶܝܬ ܡܺܝ̈ܬܐ ܥܳܡܪܳܐ ܒܟܽܘܢ܆ ܗܰܘ ܡܰܢ ܕܰܐܩܺܝܡܶܗ ܠܝܶܫܽܘܥ ܡܫܺܝܚܳܐ ܡܶܢ ܒܶܝܬ ܡܺܝ̈ܬܐ ܐܳܦ ܠܦܰܓܪ̈ܰܝܟܽܘܢ ܡܺܝ̈ܬܐ ܢܰܚܶܐ܇ ܡܶܛܽܠ ܪܽܘܚܶܗ ܕܥܳܡܪܳܐ ܒܟܽܘܢ. ܗܳܫܳܐ ܐܰܚܰـ̈ܝ ܚܰܝܳܒܺܝܢܰܢ܆ ܠܰܘ ܠܒܶܣܪܳܐ ܕܒܰܒܣܰܪ ܢܗܰܠܶܟ܇ ܐܶܢ ܓܶܝܪ ܒܰܒܣܰܪ ܚܳܐܷܝܢ ܐܢ̱ܬܽܘܢ ܥܬܺܝܕܺܝܢ ܐܢ̱ܬܽܘܢ ܗ̱ܽܘ ܠܰܡܡܳܬ܇ ܘܶܐܢ ܒܪܽܘܚ ܗܽܘ̈ܦܳܟܰܝ ܦܰܓܪܳܐ ܡܡܺܝܬܺܝܢ ܐܢ̱ܬܽܘܢ ܚܳܐܷܝܢ ܐܢ̱ܬܽܘܢ. ܐܰܝܠܶܝܢ ܓܶܝܪ ܕܰܒܪܽܘܚܳܐ ܕܰܐܠܳܗܳܐ ܡܶܬܕܰܒܪܺܝܢ܆ ܗܳܠܶܝܢ ܒ̈ܢܰܝܳܐ ܐܶܢܽܘܢ ܕܰܐܠܳܗܳܐ. ܠܐ ܓܶܝܪ ܢܣܰܒܬܘܢ ܪܽܘܚܳܐ ܕܥܰܒܕܽܘܬܐ ܬܘܒ ܠܕܶܚܠܬܳܐ܆ ܐܶܠܐ ܢܣܰܒܬܘܢ ܪܽܘܚܳܐ ܕܣܺܝܡܰܬ ܒ̈ܢܰܝܳܐ܇ ܕܒܳܗ̇ ܩܳܪܶܝܢܰܢ ܐܰܒܰܐ ܐܰܒܽܘܢ. ܘܗܺܝ ܪܽܘܚܳܐ ܡܰܣܗܕܳܐ ܠܪܽܘܚܰܢ ܕܺܐܝܬܝܢ ܒ̈ܢܰܝܳܐ ܕܰܐܠܳܗܳܐ. ܘܶܐܢ ܒ̈ܢܰܝܳܐ ܐܳܦ ܝܳܪ̈ܬܶܐ. ܝܳܪ̈ܬܶܐ ܕܰܐܠܳܗܳܐ܆ ܘܰܒ̈ܢܰܝ ܝܳܪܬܽܘܬܶܗ ܕܝܶܫܽܘܥ ܡܫܺܝܚܳܐ. ܕܶܐܢ ܢܶܚܰܫ ܥܰܡܶܗ ܐܳܦ ܥܰܡܶܗ ܢܶܫܬܰܒܰܚ. ܡܶܬܪܰܥܶܐ ܐ̱ܢܳܐ ܓܶܝܪ ܕܠܳܐ ܫܳܘܶܝܢ ܚܰܫܰܘ̈ܗ̱ܝ ܕܙܰܒܢܳܐ ܗܳܢܳܐ܇ ܠܬܶܫܒܽܘܚܬܐ ܐܰܝܕܳܐ ܕܰܥܬܝܕܳܐ ܕܬܶܬܓܠܐܷ ܒܰܢ. ܟܽ‍ܠܳܗ̇ ܓܶܝܪ ܒܪܺܝܬܐ ܡܣܰܒܪܳܐ ܘܰܡܣܰܟܝܳܐ ܠܓܶ‍ܠܝܳܢܳܐ ܕܰܒܢܰܘ̈ܗ̱ܝ ܕܰܐܠܳܗܳܐ. ܒܪܺܝܬܐ ܓܶܝܪ ܐܶܫܬܰܥܒܕܰܬ ܠܰܣܪܺܝܩܽܘܬܐ܆ ܠܐ ܒܨܶܒܝܳܢܳܗ̇܇ ܐܶܠܐ ܡܶܛܽܠ ܡܰܢ ܕܫܰܥܒܕܳܗ̇ ܥܰܠ ܣܰܒܪܳܐ. ܕܳܐܦ ܗܺܝ ܒܪܺܝܬܐ ܬܶܬܚܰܪܰܪ ܡܶܢ ܥܰܒܕܽܘܬܐ ܕܰܚܒܳܠܳܐ܇ ܒܰܚܪ̈ܽܘܪܶܐ ܕܬܶܫܒܽܘܚܬܐ ܕܰܒ̈ܢܰܝܳܐ ܕܰܐܠܳܗܳܐ. ܝܳܕܥܺܝܢܰܢ ܓܶܝܪ ܕܟܽ‍ܠܗܶܝܢ ܒܶܪ̈ܝܳܬܐ܆ ܡܶܬܬܰܢ̈ܚܳܢ ܘܰܡܚܰܒ̈ܠܳܢ ܥܕܰܡܳܐ ܠܝܰܘܡܳܢܳܐ. ܘܠܐ ܒܰܠܚܽܘܕ ܗܶܢܶܝܢ ܐܶܠܐ ܐܳܦ ܚܢܰܢ ܕܺܐܝܬ ܒܰܢ ܪܺܫܺܝܬܐ ܕܪܽܘܚܳܐ܆ ܡܶܬܬܰܢܚܺܝܢܰܢ ܒܢܰܦܫܰܢ܇ ܘܰܡܣܰܟܶܝܢܰܢ ܠܣܺܝܡܰܬ ܒ̈ܢܰܝܳܐ ܘܰܠܦܽܘܪܩܳܢܳܐ ܕܦܰܓܪ̈ܰܝܢ. ܡܶܛܽܠ ܕܰܒܣܰܒܪܰܐ ܗ̱ܘ ܚܝܰܝܢ. ܣܰܒܪܳܐ ܕܶܝܢ ܕܡܶܬܚܙܶܐ ܠܐ ܗܘܳܐ ܣܰܒܪܳܐ. ܐܶܢ ܓܶܝܪ ܚܳܙܶܝܢܰܢ ܠܶܗ܆ ܡܳܢܳܐ ܡܣܰܟܶܝܢܰܢ ܠܶܗ. ܐܶܢ ܕܶܝܢ ܠܡܶܕܶܡ ܕܠܐ ܡܶܬܚܙܶܐ ܡܣܰܒܪܺܝܢܰܢ܆ ܒܰܡܣܰܝܒܪܳܢܽܘܬܐ ܡܩܰܘܶܝܢܰܢ. ܗܳܟܰܢܳܐ ܐܳܦ ܗܺܝ ܪܽܘܚܳܐ ܡܥܰܕܪܳܐ ܠܰܟܪܺܝܗܽܘܬܢ. ܡܳܢܳܐ ܓܶܝܪ ܢܨܰܠܐܷ ܐܰܝܟ ܡܳܐ ܕܘܳܠܐܷ ܠܐ ܝܳܕܥܺܝܢܰܢ. ܐܶܠܐ ܗܺܝ ܪܽܘܚܳܐ ܡܨܰܠܝܳܐ ܚܠܳܦܰܝܢ܇ ܒܬܶܢ̈ܚܳܬܐ ܕܠܐ ܡܶܬܡ̈ܰܠ‍ܠܳܢ. ܕܡܳܐܷܫ ܕܶܝܢ ܠܶܒ̈ܰܘܳܬܐ܆ ܗܽܘ ܝܳܕܰܥ ܡܳܢܳܐ ܗ̱ܝ ܬܰܪܥܺܝܬܐ ܕܪܽܘܚܳܐ܇ ܕܰܐܝܟ ܨܶܒܝܳܢܶܗ ܗܽܘ ܕܰܐܠܗܳܐ ܡܨܰܠܝܳܐ ܚܠܳܦ ܩܰܕܺܝ̈ܫܶܐ. ܝܳܕܥܺܝܢܰܢ ܕܶܝܢ ܕܰܐܝܠܶܝܢ ܕܡܰܚܒܺܝܢ ܠܐܠܳܗܳܐ܆ ܒܟܽ‍ܠ ܡܶܕܶܡ ܡܥܰܕܰܪ ܠܗܽܘܢ ܠܛܳܒܬܐ. ܠܰܐܝܠܶܝܢ ܕܩܰܕܶܡ ܣܳܡ ܕܢܶܗܘܽܘܢ ܩܪ̈ܰܝܳܐ܇ ܘܡܶܢ ܠܽܘܩܕܰܡ ܝܺܕܰܥ ܐܶܢܽܘܢ܇ ܘܰܪܫܰܡ ܐܶܢܽܘܢ ܒܰܕܡܽܘܬܐ ܕܨܽܘܪܬܐ ܕܰܒܪܶܗ܆ ܕܗܽܘ ܢܶܗܘܶܐ ܒܽܘܟܪܳܐ ܕܰܐܚܶـ̈ܐ ܣܰـ̈ܓܺܝܶܐܐ. ܠܰܐܝܠܶܝܢ ܕܶܝܢ ܕܩܰܕܶܡ ܪܫܰܡ܆ ܠܗܽܘܢ ܩܪܳܐ. ܘܠܰܐܝܠܶܝܢ ܕܰܩܪܳܐ܆ ܠܗܽܘܢ ܙܰܕܶܩ. ܘܠܰܐܝܠܶܝܢ ܕܙܰܕܶܩ܆ ܠܗܽܘܢ ܫܰܒܰܚ܀

ܕܫܠܡܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܝܘ: ܝܙ ـ ܟܙ Romans 16:17-27

ܒܳܥܶܐ ܐ̱ܢܳܐ ܕܶܝܢ ܡܶܢܟܽܘܢ ܐܰܚ̈ܰܝ܆ ܕܬܶܙܕܰܗܪܽܘܢ ܡܶܢ ܐܰܝܠܝܢ ܕܦܳܠܰܓ̈ܘܳܬܳܐ ܘܡܰܟܫܽܘ̈ܠܶܐ ܥܳܒܕܺܝܢ܇ ܠܒܰܪ ܡܶܢ ܝܽܘܠܦܳܢܐ ܕܰܐܢ̱ܬܘܢ ܝܺܠܶܦܬܘܢ܇ ܕܬܶܬܪܰܚܩܽܘܢ ܠܟܘܢ ܡܶܢܗܘܢ. ܐܰܝܠܶܝܢ ܓܶܝܪ ܕܗܳܟܰܢܐ ܐܶܢܘܢ܆ ܠܳܐ ܡܫܰܡܫܺܝܢ ܠܡܳܪܰܢ ܝܶܫܘܥ ܡܫܺܝܚܐ ܐܶܠܳܐ ܠܟܰܪܣܗܽܘܢ ܘܰܒ̈ܡܠܶܐ ܒܰܣܺܝ̈ܡܳܬܳܐ ܘܰܒܒܽܘܪ̈ܟܳܬܳܐ ܡܰܛܥܶܝܢ ܠܶܒܰܘ̈ܳܬܳܐ ܕܰܦܫܺܝ̈ܛܶܐ. ܡܶܫܬܰܡܥܳܢܘܬܟܘܢ ܕܶܝܢ ܕܺܝܠܟܘܢ܉ ܠܟ‍ܠ ܒܰܪܢܳܫ ܐܶܬܝܰܕܥܰܬ ܚܳܕܶܐ ܐ̱ܢܳܐ ܗܳܟܺܝܠ ܒܟܘܢ. ܘܨܳܒܶܐ ܐ̱ܢܳܐ ܕܬܶܗܘܘܢ ܚܰܟܺܝܡܺܝܢ ܠܛܳܒ̈ܳܬܐ ܘܬܰܡܺܝܡܺܝܢ ܠܒܺܝ̈ܫܳܬܳܐ. ܐܰܠܗܐ ܕܝܢ ܕܰܫܠܳܡܐ ܢܶܫܚܩܺܝܘܗ̱ܝ ܒܰܥܓܰ‍ܠ ܠܣܳܛܳܢܐ ܬܚܶܝܬ ܪ̈ܓ‍ܠܰܝܟܘܢ. ܛܰܝܒܽܘܬܶܗ ܕܡܳܪܰܢ ܝܶܫܘܥ ܡܫܺܝܚܐ ܬܶܗܘܐ ܥܰܡܟܘܢ. ܫܳܐܠܺܝܢ ܒܰܫܠܳܡܟܘܢ ܛܺܝܡܬܶܐܴܘܣ ܦܳܠܚܳܐ ܕܥܰܡܝ܆ ܘܠܽܘܩܺܝܳܘܣ ܘܺܐܝܰܣܘܢ ܘܣܳܘܣܺܝܦܰܛܪܳܘܣ ܐ̱ܚ̈ܝܳܢܰܝ. ܫܳܐܷܠ ܐ̱ܢܳܐ ܒܰܫܠܳܡܟܘܢ ܐܶܢܳܐ ܛܶܪܛܺܝܳܘܣ ܕܟܶ‍ܬܒܶܬ ܐܶܓܰܪܬܳܐ ܒܡܪܰܢ. ܫܳܐܷܠ ܒܰܫܠܳܡܟܘܢ ܓܰܐܝܳܘܣ ܡܩܰܒܠܳܢܝ ܘܰܕܟ‍ܠܗ̇ ܥܺܕ̱ܬܳܐ. ܫܳܐܷܠ ܒܰܫܠܳܡܟܘܢ ܐܶܪܰܣܛܳܘܣ ܪܰܒܰܝܬܳܐ ܕܰܡܕܺܝܢ̱ܬܳܐ܆ ܘܩܘܰܐܪܛܘܣ ܐܰܚܳܐ. ܠܰܐܠܗܐ ܕܝܢ ܗܰܘ ܕܡܶܫܟܰܚ ܕܰܢܫܰܪܰܪܟܘܢ ܒܶܐܘܰܢܓܶ‍ܠܺܝܳܘܢ ܕܺܝܠܝ܇ ܗܰܘ ܕܶܐܬܟܪܶܙ ܥܰܠ ܝܶܫܘܥ ܡܫܺܝܚܐ ܒܓܶ‍ܠܝܳܢܳܐ ܕܐ̱ܪܳܙܳܐ: ܕܡܶܢ ܙܰܒ̈ܢܰܝ ܥܳܠܡ̈ܶܐ ܡܟܰܣܰܝ ܗ̱ܘܳܐ: ܐܶܬܓ‍ܠܺܝ ܕܝܢ ܒܙܰܒܢܐ ܗܳܢܐ ܒܝܰܕ ܟ‍ܬܳܒ̈ܶܐ ܕܰܢ̈ܒܺܝܶܐ܆ ܘܰܒܦܽܘܩܕܳܢܶܗ ܕܰܐܠܗܐ ܕܰܠܥܳܠܰܡ ܐܶܬܺܝܕܰܥ ܠܟ‍ܠܗܘܢ ܥܰܡ̱̈ܡܶܐ ܠܡܰܫܡܥܳܐ ܕܗܰܝܡܳܢܘܬܳܐ. ܕܗܽܘܝܽܘ ܚܰܟܺܝܡܳܐ ܒܰܠܚܘܕܰܘܗ̱ܝ܆ ܫܽܘܒܚܐ ܒܝܰܕ ܝܶܫܘܥ ܡܫܺܝܚܐ ܠܥܳܠܰܡܥܳܠܡܺܝܢ ܐܰܡܺܝܢ. ܛܰܝܒܽܘܬܶܗ ܕܡܳܪܰܢ ܝܶܫܘܥ ܡܫܺܝܚܐ ܥܰܡ ܟ‍ܠܟܘܢ ܐܰܡܺܝܢ܀

ܕܩܘܪܒܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܝܗ: ܟ ـ ܠܓ 1Corinthians 15:20-33

ܗܳܫܳܐ ܕܶܝܢ ܡܫܺܝܚܳܐ ܩܳܡ ܡܶܢ ܒܶܝܬ ܡܺܝ̈ܬܐ. ܘܰܗܘܳܐ ܪܺܫܺܝܬܐ ܕܕܰܡ̈ܟܶܐ. ܘܰܐܝܟܰܢܳܐ ܕܰܒܝܰܕ ܒܰܪܢܳܫܳܐ ܗܘܳܐ ܡܰܘܬܐ܆ ܗܳܟܰܢܳܐ ܐܳܦ ܒܝܰܕ ܒܰܪܢܳܫܳܐ ܗܳܘܝܳܐ ܚܰܝܰܬ ܡܺܝ̈ܬܐ. ܐܰܝܟܰܢܳܐ ܓܶܝܪ ܕܒܳܐܕܳܡ ܟܽ‍ܠܗܽܘܢ ܒܢܰܝ̈ܢܳܫܳܐ ܡܳܝܬܺܝܢ܆ ܗܳܟܰܢܳܐ ܐܳܦ ܒܰܡܫܺܝܚܳܐ ܟܽ‍ܠܗܽܘܢ ܚܳܐܷܝܢ. ܐ̱ܢܳܫ ܐ̱ܢܳܫ ܒܛܶܟܣܶܗ. ܪܺܫܺܝܬܐ ܗܘܳܐ ܡܫܺܝܚܳܐ. ܒܳܬܰܪܟܶܢ ܐܰܝܠܶܝܢ ܕܕܰܡܫܺܝܚܳܐ ܐܶܢܽܘܢ ܒܡܶܐܬܺܝܬܶܗ. ܘܗܳܝܕܶܝܢ ܬܶܗܘܶܐ ܚܰܪܬܐ܇ ܡܳܐ ܕܡܰܫܠܶܡ ܡܰܠܟܽܘܬܐ ܠܐܠܳܗܳܐ ܐܰܒܳܐ. ܡܳܐ ܕܒܰܛܶܠ ܟܽ‍ܠ ܪܺܝܫ ܘܟܽ‍ܠ ܫܽܘܠܛܳܢ ܘܟܽ‍ܠ ܚܰܝ̈ܠܺܝܢ. ܥܬܺܝܕ ܗ̱ܽܘ ܓܶܝܪ ܕܢܰܡܠܶܟ ܥܕܰܡܳܐ ܕܰܢܣܺܝܡ ܒܥܶܠܕܒܳܒܰܘ̈ܗ̱ܝ ܟܽܠܗܽܘܢ ܬܚܶܝܬ ܪ̈ܶܓ‍ܠܰܘܗܝ. ܘܰܐ̱ܚܪܳܝܳܐ ܒܥܶܠܕܒܳܒܳܐ ܡܶܬܒܰܛܰܠ ܡܰܘܬܐ. ܟܽܠ ܓܶܝܪ ܫܰܥܒܶܕ ܬܚܶܝܬ ܪ̈ܶܓ‍ܠܰܘܗܝ. ܡܳܐ ܕܶܐܡܰܪ ܕܶܝܢ ܕܟܽ‍ܠܡܶܕܶܡ ܡܶܫܬܰܥܒܰܕ ܠܶܗ܆ ܝܺܕܺܝܥܳܐ ܕܰܣܛܰܪ ܡܶܢ ܗܰܘ ܕܫܰܥܒܶܕ ܠܶܗ ܟܽܠ. ܘܡܳܐ ܕܶܐܫܬܰܥܒܰܕ ܠܶܗ ܟܽܠ܆ ܗܳܝܕܶܝܢ ܗܽܘ ܒܪܳܐ ܢܶܫܬܰܥܒܰܕ ܠܗܰܘ ܕܫܰܥܒܶܕ ܠܶܗ ܟܽܠ܇ ܕܢܶܗܘܶܐ ܐܠܳܗܳܐ ܟܽܠ ܒܟܽܠ. ܘܶܐܠܳܐ ܡܳܢܳܐ ܢܶܥܒܕܽܘܢ ܗܳܢܽܘܢ ܕܥܳܡܕܺܝܢ ܚܠܳܦ ܡܺܝ̈ܬܐ܆ ܐܶܢ ܡܺܝ̈ܬܐ ܠܳܐ ܩܳܝܡܺܝܢ܆ ܡܳܢܳܐ ܥܳܡܕܺܝܢ ܚܠܳܦ ܡܺܝ̈ܬܐ. ܘܰܠܡܳܢܳܐ ܐܳܦ ܚܢܰܢ ܒܟܽ‍ܠ ܫܳܥܳܐ ܒܩܽܢܕܺܝܢܳܘܣ ܩܳܝܡܺܝܢܰܢ. ܝܳܡܶܐ ܐ̱ܢܳܐ ܒܫܽܘܒܗܳܪܟܽܘܢ ܐܰܚܰـ̈ܝ܇ ܕܺܐܝܬ ܠܺܝ ܒܡܳܪܰܢ ܝܶܫܽܘܥ ܡܫܺܝܚܳܐ܆ ܕܟܽܠܝܽܘܡ ܡܳܐܶܬ ܐ̱ܢܳܐ. ܐܶܢ ܐܰܝܟ ܕܒܶܝܬ ܒܢܰܝ̈ܢܳܫܳܐ܇ ܐܶܫܬܕܺܝܬ ܠܚܰܝ̈ܘܳܬܐ ܒܶܐܦܶܣܳܘܣ܆ ܡܳܢܳܐ ܐܶܬܗܢܺܝܬ ܐܶܢ ܡܺܝ̈ܬܐ ܠܐ ܩܳܝܡܺܝܢ. ܢܶܐܟܽܘܠ ܘܢܶܫܬܐ. ܡܚܳܪ ܓܶܝܪ ܡܳܝܬܝܢܰܢ. ܠܐ ܬܶܛܥܽܘܢ. ܡܚܰܒ̈ܠܳܢ ܪ̈ܶܥܝܳܢܶܐ ܒܰܣܺܝ̈ܡܶܐ ܫܽܘ̈ܥܝܳܬܐ ܒܺܝ̈ܫܳܬܐ܀