ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܓ: ܝܘ ـ ܟܓ܇ ܕ:ܐ ـ ܗ 1Corinthians 3:16-23, 4:1-5

ܠܐ ܝܳܕܥܺܝܢ ܐܢ̱ܬܽܘܢ ܕܗܰܝܟ‍ܠܶܗ ܐܰܢ̱ܬܘܢ ܕܰܐܠܳܗܳܐ܇ ܘܪܽܘܚܶܗ ܕܰܐܠܳܗܳܐ ܥܳܡܪܳܐ ܒܟܽܘܢ. ܘܡܰܢ ܕܰܡܚܰܒܶܠ ܗܰܝܟ‍ܠܶܗ ܕܰܐܠܳܗܳܐ܆ ܡܚܰܒܶܠ ܠܶܗ ܐܠܗܳܐ. ܗܰܝܟ‍ܠܶܗ ܓܶܝܪ ܕܰܐܠܳܗܳܐ ܩܰܕܺܝܫ ܗ̱ܽܘ ܕܰܐܢ̱ܬܘܢ ܐܶܢܽܘܢ. ܐ̱ܢܳܫ ܠܐ ܢܰܛܥܶܐ ܢܰܦܫܶܗ. ܡܰܢ ܕܣܳܒܰܪ ܒܟܽܘܢ ܕܚܰܟܺܝܡ ܗܽܘ ܒܥܳܠܡܳܐ ܗܳܢܳܐ܆ ܢܶܗܘܶܐ ܠܶܗ ܣܰܟܠܳܐ ܕܢܶܗܘܶܐ ܚܰܟܺܝܡܳܐ. ܚܶܟܡܬܶܗ ܓܶܝܪ ܕܥܳܠܡܳܐ ܗܳܢܳܐ ܠܶ‍ܠܽܘܬܳܐ ܗ̱ܝ ܠܘܳܬ ܐܠܗܳܐ. ܟ‍ܬܺܝܒ ܗܽܘ ܓܶܝܪ܆ ܕܳܐܚܶܕ ܚܰܟܺܝ̈ܡܶܐ ܒܚܳܪܥܽܘܬܗܽܘܢ. ܘܬܘܒ܆ ܡܳܪܝܳܐ ܝܳܕܰܥ ܡܰܚ̈ܫܒܳܬܗܽܘܢ ܕܚܰܟܺܝ̈ܡܶܐ ܕܰܣܪ̈ܺܝܩܳܢ ܐܶܢܶܝ̈ܢ. ܡܶܛܽܠ ܗܳܢܳܐ ܠܐ ܐ̱ܢܳܫ ܢܶܫܬܰܒܗܰܪ ܒܰܒܢܰܝ̈ܢܳܫܳܐ. ܟܽ‍ܠܡܶܕܶܡ ܓܶܝܪ ܕܺܝܠܟܽܘܢ ܗܽܘ. ܐܶܢ ܦܰܘܠܳܘܣ ܘܶܐܢ ܐܰܦܳܠܳܘ܇ ܘܶܐܢ ܟܺܐܦܳܐ܇ ܘܶܐܢ ܥܳܠܡܳܐ܇ ܘܶܐܢ ܚܰـ̈ܝܶܐ ܘܶܐܢ ܡܰܘܬܐ܇ ܘܶܐܢ ܕܩܳܝ̈ܡܳܢ ܘܶܐܢ ܕܰܥܬܺܝ̈ܕܳܢ܆ ܟܽ‍ܠ ܡܶܕܶܡ ܕܺܝܠܟܽܘܢ ܗ̱ܽܘ. ܘܰܐܢ̱ܬܘܢ ܕܰܡܫܺܝܚܳܐ. ܘܰܡܫܺܝܚܳܐ ܕܰܐܠܗܳܐ. ܗܳܟܰܢܳܐ ܗܘܰܝܢ ܚܫܺܝܒܺܝܢ ܠܟܽܘܢ܆ ܐܰܝܟ ܡܫܰܡ̈ܫܳܢܶܐ ܕܰܡܫܺܝܚܳܐ܇ ܘܪ̈ܰܒܰܝ ܒܳـ̈ܬܐ ܕܐ̱ܪ̈ܳܙܰܘܗܝ ܕܰܐܠܳܗܳܐ. ܗܳܪܟܳܐ ܡܶܟܺܝܠ ܡܶܬܒܥܶܐ ܒܪ̈ܰܒܰܝ ܒܳـ̈ܬܐ܆ ܕܐ̱ܢܳܫ ܟܰܕ ܡܗܰܝܡܰܢ ܢܶܫܬܟܰܚ. ܠܺܝ ܕܶܝܢ ܗܳܕܶܐ ܒܨܺܝܪܽܘܬܳܐ ܗ̱ܝ ܠܺܝ ܕܡܶܢܟܽܘܢ ܐܶܬܕܺܝܢ܆ ܐܰܘ ܡܶܢ ܟܽ‍ܠ ܒܰܪ ܐ̱ܢܳܫ. ܐܶܠܐ ܐܳܦܠܐ ܐܶܢܳܐ ܢܰܦܫܝ ܕܳܐܶܢ ܐ̱ܢܳܐ. ܠܐ ܓܶܝܪ ܡܶܕܶܡ ܒܢܰܦܫܝ ܚܫܺܝܫ ܐ̱ܢܳܐ. ܐܶܠܐ ܠܰܘ ܒܗܳܕܶܐ ܐܶܙܕܰܕܩܶܬ. ܕܰܝܳܢܝ ܓܶܝܪ ܡܳܪܝܰܐ ܗ̱ܘ. ܡܶܛܽܠ ܗܳܢܳܐ ܠܐ ܡܶܢ ܩܕܳܡ ܙܰܒܢܳܐ ܬܶܗܘܽܘܢ ܕܳܝܢܺܝܢ܇ ܥܕܰܡܳܐ ܕܢܺܐܬܶܐ ܡܳܪܝܳܐ܆ ܗܰܘ ܕܡܰܢܗܰܪ ܟܰܣ̈ܝܳܬܶܗ ܕܚܶܫܽܘܟܳܐ܇ ܘܓܳܠܶܐ ܡܰܚ̈ܫܒܳܬܗܽܘܢ ܕܠܶܒܰܘ̈ܳܬܳܐ. ܘܗܳܝܕܶܝܢ ܢܶܗܘܶܐ ܫܽܘܒܚܳܐ ܠܐܢܳܫ ܐ̱ܢܳܫ ܡܶܢ ܐܠܗܳܐ܀